#ترجية_بيبي_رحاب
الجزء 13
(يم داركم )
_____
كُل الطرق كانت تؤدي إلى قلبها ،حتى إلتي لم أسمع بها من قبل !!
من صارت مسؤوليتي حسيت بأحساس غريب و حلو بنفس الوقت ،
أخذت ظمياء ورحت على أقرب فندق
حتى نتصل بأهل وردة ،
بعد ما عرفت هي بيتهم بالعامرية ،
وعلى الطريق مالتنه ،كلت انزلها ع شارع احسن و أبوها يجي يأخذها
حتى بسرعة يوديها للمستشفى
ينظف جرحها و ما يلتهب
وخابرت ظمياء و طلعت أمها و فهمتها وطمنتها هي مابيها شي و سوينالها الاجراءات اللازمة بس حتى نطمن عليها نوديها طبيب ..
رجعنه و خليتها تصعد بالباص ويايه
صح بصعوبة وصلت للباص مجانت تكدر ادوس على رجلها بس فرح وظمياء جانوا سانديها
و أني والولد شايل غراضهم
وصلنا قريب العامرية و أبوها جان بسيارته الكراون البيضة ينتظرها
أستحيت أنزل وياها
ظليت اباوع عليها من الجامة و أشوف ابوها شون مهتم وخايف عليها و هي تكوله
_مابية شي والله
جرح خفيف هي يطيب
و هو ما مقتنع
هسه اوديج كبل للمستشفى لا خفيف ولا مو خفيف .
جان ابوها امبين رجال طيب
طويل وضخم
و جان يلبس نظارات طبيبة بس ملونة
شواربة ثخينة و وجهة عريض
شعره أبيض واسود و عنده صلعة من النص
بس هو مسوي فرك صفح وجايب شعره و شامره ع جهة الثانية ،محاولة منه حتى يخفي الصلعة
ولابس قميص أبيض وكاف اردانه للعكس
و بنطرون اسود
جان اله هيبة و جانت
بيه حنينه
ذيج هيه مبينة
حنية أباء قبل .
أخذها وراح و رجعنه أني وعمر بسيارة
بين الفرحان بين الظال بالي يمها بين اذكر التفاصيل إلي صارت بين صوت المسجل و أغنية
عبرت الشط علمودك
وخليتك على رأسي
و بداخلي أكوله كاظم عندي استعداد أعبرلها محيط مو بس بحر .
_ها علي اليوم أغسل الصبة
ويضحك عمر
و اني أباوع عليه صفح و أبتسم
يلعب بشعره ويكول
_أني تعبان من السبح باجر عطلة
أذا تريد تعال
اليوم مابية حيل
ويباوع على علي بنظرة عود أني شخص مهم
وما تكدر بليايه
ويضحك
جان عمر يداهر علي
وعلي بس يضحك
عمر جان شكله حلو صح مو مثل علي بس هم حلو
شوية أكصر من علي
أسمر و عيونه سوده مكحلة كبار
حواجبه ثخينة سودة
شعره أسود عكش بس مطوله
جانت جتافه عريضة و رجليه رفيعة
يلعب كمال أجسام
فجسمه مقسم
عضلات الأيد و البطن و الرجل
جان جسمه حيل مرتب
هو أصله من الكاظمية عمامه و أهل أبوه كلهم من الكاظمية ،بس أبوه بشبابه حب ابنية من الأعظمية بس أهلها ما أنطوها اله بسبب فوارق طبقية ومادية ،اهله ضغطوا عليه يزوج بت عمه العلوية حتى شون رد أعتبار تصير ،قبل بس بشرط يسكن بالأعظمية ،جان أبوه يكفيه أن يعيش قريب على الشارع الي تسكن بي حبيبته ،وصار الي راده ابوه صح سافرت الأبنية ويه أهلها بعد كم سنة بس بعده يفوت من يم باب بيتهم ،البيت متروك ومقفول بس جانت رجليه تأخذه و تجي برأسه أغنية كريم منصور
يم بابكم
صدفة و أخذني الدرب
من يم بابكم
و التمت بروحي المحنة
وأشتهيت أخباركم
جان عمر الولد الوحيد الهم ماعنده بس اخت وحده ،
طبعه هادئ وما يحب يدخل نفسه بشي ما يخصه ،وجانت عينه على زميلته سحر و يحبها بس ما عنده جرأة يحاجيها .
____
مر كم يوم و وردة ما اداوم بسبب رجلها مجانت تكدر تمشي عليها ،جنت يومية اروح لصديقاتها اسال عليها و أطمن ،ردت أروحلها للبيت اخذ البنات و الولد
بس ظمياء كالت ماكو داعي باجر هي اداوم .
ثاني يوم علي كاعد من صلاة الفجر ،صله صح هو جان ما ملتزم بصلاته ،بس جان يعرف علاقته بربه ما منكطعه ،رب العالمين يسمعه شوكت ما ضاق صدره واحتاجه و يحاول يلتزم يعرف مفتاح كل حاجه هي الدعاء والصلاة .
فجان شكد ما يترك صلاته يرجعلها .
_علي شبيك من الغبشه جاي
ولك بعد وكت بعدني لا متريك لا امبدل
شكو
_ديله بدل ولا تتريك
نتريك بالجامعة
امشي
طبعًا عمر جان ماد جسمه من شباك غرفته ويحاجيه
جان بالفانيله و شعره كفشه و توه كاعد من النوم
_علي تخبلت أنت روح
أني أخذ تكسي و اجي وراك
_ولك دبدل لا اصعد ابدلك
يله سريع
ماعندي صبر
ويدك هورنات
عمر كام يصفك بايده
لاحول ولا قوة إلا بالله
ولك كافي كعدت الجواريين
جايك جايك
بس ابدل واغسل
_زين بس بدل
وغسل اهناك
_علي اذا ما تسكت
اجي اسكتك
_علي يضحك
ويأشر بايده روح روح
صعد عمر للسيارة
وشاف علي فرحان
ومشغل كاسيت اسماعيل الفروه وجي
والله أحبج والله
_هلوووو يااااااب
طيورك طايرة اليوم
هاي كله علمود وردة
عمر ما يمشط شعره و يطلع حتى القميص ما ضاربه اوتي
بس المهم نوصل ويشوف وردة
عمر يطلع ما مغسل وجهه زين
بس المهم نوصل اول الناس قبل وردة
من اشتعلت روحك عمر
بس المهم علي و وردة
أنت تقرأ
ترجية بيبي رحاب
Romanceرواية ما بين الماضي و الحاضر ، بين بغداد الماضي و بغداد اليوم ، ورحاب الذكريات و نور المستقبل ،شخصيات كثيرة و حوادث كلها تدور ما بين الحب و الفراق والموت .
