عيشة سعيدة

1

#عيشة_سعيدة1
Shahd Alsalman

شهد .. 25 سنة .. مهندسة حاسبات
حنطاوية.. عيون عسلي فاتح .. ملامح ناعمة
متروسة .. طويلة .. شعر بني طويل
وحيدة اهلها لا اخ ولا اخت .....
ولا حتى اب وام ،

هذي هي بطلتنا وراح تتعرفون عليها اكثر باحداث قصتها يمكن اليقراها يكول خيالية ماكو هيج شي بس هذا واقع موجود والنفوس الضعيفة هواية ..

- السلام عليكم ..
- عليكم السلام.. تفضلي منو حضرتج ؟
- اني ام قاسم جوارينكم الجدد بالمنطقة
- يا هلا بيج حياج الله تفضلي عيني
-زاد فضلج عيوني .. يا الله بسم الله
-زارتنا البركة شتحبين تشربين
- الله يخليج والله ما اريد اكلفج كلاص مي وهاهية
- لا العفو ماكو كلافة تعاي ماما جميلة
- نعم ماما ...
- سلمي على خالة ام قاسم جوارينا جدد وجيبي كلاص مي وضيافة
- مرحبا خالة شلونج
- هلا بيج حبيبة خالة صلوات كمر
- تسلمين خالة من رخصتج
- سمعنا جايين للمنطقة جوارين جدد بس الصراحة تعذريني ما صار مجال نواصلكم ونقوم بواجبكم اني ام عمار وموظفة وتعرفين بعد حياة الوظيفة
- اي والله الله يساعدكم ابو قاسم هم موظف واعرف شكد يركض ويتعب
- الله يساعدة.. وحضرتج ربة بيت ؟
اي جنت معلمة وبعد صار عندي مسؤولية وجايين من البصرة وتركت الوظيفة بس ابو قاسم ميقصر
وعندي قاسم الجبير خريج وموظف و باسم متوفي ومنال خريجة محاسبة مخطوبة وسمر اعدادية توها خلصت
- الله يرحمة ويحفظ الباقين ولو اضوجج بس شون مات ابنج الله يرحمة
- ويرحم موتاج والله مريض قلب من الولادة 18 سنة وتوفى والحمدلله على كل حال
- يا عيني الله يرحمة ويطرح البركة بالباقين
- الله يسلمج عيني
- تفضلي خالة
- يا خالة شكلفتي روحج جاية اسلم واروح والله
- على بختج شمسويلج قابل ذابحين الذبايح يا ام قاسم ههههه
- ماشاء الله شكد عمرها بنيتج
- هاي الوسطانية 23 سنة خريجة ادارة واقتصاد
وعندي عمار الجبير خريج وموظف وهسة مسافر يكمل برة و سارة اول كلية ومخطوبة وجمال اعدادية وابوهم بالداخلية موظف
- صلوات الله يحفظكم
- الله يسلمج خية
- احنا خامس بيت عنكم وان شاء الله ما ننكطع ونبقى اهل
- كل الهلا بيكم وان شاء الله نزوركم زيارة خاصة بس يرجع ابو عمار من خفارتة
- كل الهلا .. يلا عيني اترخص عايفة البيت وبعد وراية غدا تدرين وما ظل وكت
- والله بعد تونا ما شفناج
- الجايات هواية ان شاء الله
- ان شاء الله
- مع السلامة
- مع السلامة

(ببيت ام قاسم )..
- اليوم رحت لبيت الجوارين ما شاء الله شون اوادم ولد اصول مبينين بيت ابو عمار يسموهم
- ها زين سويتي احنا هنا غربة ولازم نتعرف ع الناس الجيران اهل يصيرون
- اي ونعم الاهل بس شون عدهم بنية صلوات الله يسترها كلت بنفسي تلوك لقسومي ونزوجة ونفرح بي وهمين منال حبيبتي حتتزوج ما بقالهة شي شتكول ؟
- اي شكو بيها انت فصلي واحنا نلبس وشوري ابنج ويشوفها ويصير خير
- الله يخليك النا خيمة يا رب
- يسلمج ويحفظج يا غالية
- قاسم يمة .. تعال
- اي يوم دقيقة حبيبة .. كولي حجية
- تعال حبيبي اكعد يمي باوع يمة انت هسة كبرت واني وابوك ادينا رسالتنا وان شاء الله مقصرنا بشي وياك ويا اخوتك وهسة صار دورك تفرحنا ونشوف خلفتك قبل لا الله ياخذ امانتة
- العمر الطويل يمة شهالحجي
- اي يمة حال الدنيا هذا بعد واني الصراحة شفتلك بنية جمال وادب و علم وبت ناس وان شاء الله من نصيبك
- يمة اللي تريدي يصير بس اشوفها وادانش فكري وسهلة
- الله يرضى عليك يا رب انت واخواتك
صارت زيارات وتعارفو الاهل اكثر قاسم انعجب بجميلة وبشخصيتها وبرقتها وهي نفس الشعور تجاهة
صارت القسمة وتزوجو ورتبو حياتهم وسكنو بيت وحد وبعد سنة جميلة صارت حامل اهلهم ما شالتهم الكاع من الفرحة والكل طاير بيهم لان هم وبشهادة الكل اروع زوجين وفعلا الارواح جنود مجندة وهم واحد حب اللاخ وجميلة ممقصرة بحق بيت عيالها ومداريتة لزوجها وهو نفس الشي لهذا الكل يحبها ويحبون تكون موجودة وياهم وبيوم حملها كلش كيفو لان يعتبرون الجاي هو ابن الغالية والغالي ..

صار يوم الولادة وجابت بنوتة صغيرة سمتها بيبيتها ام ابوها شهد على حلاة وجهها الناعم ..
بعد مرور 6 سنوات جميلة انصابت بمرض واضطرو يشيلون الرحم واكتفو بتربية شهد برغم كل محاولات تزويج قاسم حتى تكون عندة خلفة اكثر وطبعا الولد مو مثل البنية بذاك الوكت بس قاسم يحب مرتة وبنتة ومحافظ على بيتة برغم جميلة تكلة اتزوج وشوف ذريتك جانت تحس بالذنب تجاهة بس هي ما بيدها شي ...

كبرت بنتهم ودخلت مدرسة وصارت من الشطار وكل سنة اهلها وبيت اجدادها يحتفلون بيها لان اولى تطلع وجانت مميزة من بين الكل وكلش محبوبة بهاي الفترة ماتت بيبيتها ام امها وبعدهة ام ابوها وبعدها استشهد جدها ابو امها وتوفى اخر جد الها وكبرت ومرت الايام وهي بحضن اهلها

صارت الحرب ب 2003 وجان عمرها بذاك الوكت 12 سنة بس كل اليعرفها يحسها اكبر من عمرها وداركة وواعية عكس بقية الاطفال من عمرها
نتائج البكلوريا جانت من اصعب الايام انتظار وقلق لحد ما استلمتها ناجحة وبمعدل 96 سوولها احلى احتفالية والهداية والكيك جان احلى يوم بحياتها ودخلت متوسطة ..

بيوم رجعت تعبانة من الدوام فطلبت من امها حبة وجع راس مجان عدها انتظرت ابوها وراحو ديجيبون من الصيدلية بس بذاك الوقت جان كل شي خطر الطبة الطلعة اسمك هويتك كل شي خطر وصعب والخطف والقتل بدون مبرر ولا سبب
راحو يجيبون دوة لوجع راس شهد بس اجاها وجع راس و قلب اقوى مجانت حاسبة حسابة..