قاتلة بروح بريئة

جزء 21

☆ بارت 74 ☆

كيف حسات بالحس تقطع ناضت مشات لباب بغات تحلو والو مسدود طلع ليها الزعف .. مشات للبالكون لقاتو حتا هو مسدود قلبات الغرفة كلها لا تلقا شي حاجة حادة ..

مكاينش دايرين احتياطهم صعرات بالمعقول ميمكنش تبقا محبوسة هنا عندها انتقامها الي مزال مسالا و 'صخر' صخر متقدرش متشوفوش ولات كتوحشو بلا قياس ..

خاصها تخرج فأسرع وقت و تبالي بدوك الي وصلوها لهنا هما اللولين تسطحات على الناموسية كتشوف فالسقف و رجعو ليها ذكريات غير مرغوب بيهم .. نزلات دمعة كتجري من عنيها حتا طاحت على وسادتها و هي كتذكر أسوء منظر شافتو فحياتها الي مكيفرقهاش و مترسخ فدماغها ..

#فلاش_باك

☆ قبل 10 سنوات ☆

في حي بسيط فيه عمارات عاديين و متوسطين عايشين فيه عائلات من الطبقة المتوسطة .. في إحدى الشقق عايشة عائلة افرادها تلاتة ديال الناس ..

كانت جالسة قدام المرايا كتقاد شعرها الأسود الحريري بالبلاك ..

فتاة فمقتبل العمر فأوائل العشرينيات جمالها فريد من نوعو عيون كبار مشفرين لونهم عسلي شفاه ممتلئة و وجه مستدير .. بشرة سمراء و ملامح كتطغا عليهم البرائة الي كتعكس شخصيتها الخجولة و الطاهرة ..

دارت مايكاب خفيف و وقفات كتسوس و تقاد فالبدلة الي كانت لابسة .. عبارة على فيست بسروالها فلكري مع قاميجة بيضة و كعب عالي اسود .. تمشات و جلسات فسرير صغير لشخص واحد جا جنب سريرها الي نفس الحجم ..

حطات يدها على الفتاة الي ناعسة كتحرك فيها و تبوس فوجها كامل .. عنكشاتها حتا حلات عنيها الي نفس اللون و نفس الملامح كأنها نسخة مصغرة عليها ..

بروج : غدير فيقي .. باركة من النعاس .. راه غادي امشي عليك الحال

غدير : اممم .. غير 5 دقايق عافاك

بروج : ( بابتسامة بريئة ) ناري على نعاسة ههه .. غادي نمشي لكوزينة نسخن الفطور عاوتاني .. تعطلي نعوم ختي بسطل ديال لما

مشات بروج لكوزينة سخنات الحليب الي برد و دارت الفرماج فالتوست و حطاتو فالطبسيل ديال غدير .. جلسات كتشرب القهوة و هي تبان ليها غدير داخلة بشعكاكتها و كتحك فعنيها ..

جلسات مقابلة معاها و هزات لحليب كتشرب فيه ..

بروج : غسلتي وجهك بعدا المعفونة ؟

غدير : ( عوجات فمها ) آه غسلتو .. المعفونة لكبيرة

بروج : ( وقفات ) فطري دغيا و مشطي شعرك قبل ما تمشي لمدرسة .. 12 سنة و دايرة كيف البيبي خاصني ندير ليك كلشي

غدير : علاش ندير و نتي كاينة اختي لعزيزة

بروج : ناري على بلحاسة .. أنا مغاديش ندوم ليك