قاتلة بروح بريئة

جزء 13

☆ بارت 45 ☆

... كانت كاتمة كلشي لكن فقدانها لشرفها بدون ارادتها كانت النقطة الي فيضات الكاس شكون تلوم لمن تشكي .. شكون اتفهمها و اتيق كلامها هي براسها داخت من نهار ضهرات الأخرى و هي عايشة فدوامة ..
تفكرات صخر علاش هو علااااش كانت كتحس بجيهتو باحساس نقي و بريء عمرها حسات به من قبل .. و جات الأخرى تعرفات عليه و سلماتو راسها كأنها كتملكو و كتهدد فيها من الفوق ..
تفكرات الفيديو الي خلات ليها سيندي كتحذرها انها ما تقربش من ساحة صخر .. خوفا لا اشك بلي هما ماشي توأم و إنما نفس الشخص بشخصيتين ..

آه هي مريضة مرض نفسي " انفصام الشخصية " هو مرض الي ناتجه عليه وجود سيندي .. رغم أن غدير هي الحقيقة و سيندي مجرد مرض الا و هي الي كتحكم فيها و فحياتها ..
نسلات الغوب و الكيلوط و كملات الدوش لوات عليها فوطة و خرجات كتمشى بحال شي زومبي حي و ميت ..
رجليها كتلوح فيهم بتقل دخلات لبيتها تخشات تحت الغطا جرات الصورة الي حاطة حدا راسها .. عنقاتها و طلقات لعنان لدموعها هاد المرة كانت كتبكي بصمت دموعها كيجريو وحدا مورا لاخرى ..
مكمشة على وضعية الجنين بفوطتها مزيرة على الصورة بكل قوتها حتا دخل فيها الكادر من الجناب و جرحها من صدرها ..
هي محاسة بوالو الألم النفسي طغا على الألم الجسدي .. النهار كولو كتبكي دموعها نشفو و قواها خارت كتقاوم باش متنعسش لكن التعب لعب عليها و استسلمات للنوم ..

★ عند صخر الي دوش لوى على نصو الفوطة و خرج كيسوط دخل لبيتو كان خاوي قال بلي كاينة فالدوش ..
غادي جيهت دريسينغ روم وقف فجأة كيتسنط مكاينش الحس فالحمام قرب لباب و حط وذنو عليه ..
مكاين لا صوت الرشاشة لا حتا حركة مد يدو و فتح الباب دخل مبان ليه حد البينوار خاوي و الدوش حتا هو حينت الزاج كيبين ..
خرج كيقلب فارجاء البيت البالكون دريسينغ والو مكاينش حسها خرج قلب الشقة كلها تلفت جيهت الباب لقاه مترع ..
كعا بالمعقول مشا سدو و رجع خدا كارو خرج البالكون هكاك بفوتطو كيكمي بعصبية .. ليلة لبارح كانت ماشي فالحسبان لكن الي عطا الله عطاه ..
الي زاد نيرفاه هو علاش كانت ردة فعلها هكاك كأنو اغتاصبها .. و باش زادتها مشات واخة قاليها خاصنا نهضرو كان باغي اتناقشو و احطو النقط على الحروف ..
الي وقع لبارح كان خطأهم بجوج و هو ماشي شماتة باش اقلب عليها وجهو لاح الكارو عفط عليه و دخل البس .. عندو مشاكل أهم من هادشي حالياً .. لبس سروال بيج مع تيشورت بيض لاصق عليه مشط شعرو اللور و رش ريحتو الرجولية دار ساعتو و خرج ..

تاجه للمركز و تفكيرو فالقضية دبا عاد غادي ابدا اللعب ديال المعقول و اخدم كاع الحيل الي عندو باش اوصل لمبتغاه الا و هو القبض على القاتلة ..
دخل لمكتبو و هو اتبعو عمر هاز معاه ضوسي ديال الطب الشرعي .. خداه صخر كيقرا فيه و مزير على فكو سدو و هز عنيه فعمر الي جالس مقابل معاه ..

صخر : كلشي هو هداك .. نفس الطريقة مخدر و الطعن عاد تقطيع العضو .. فقط المكان الي تغير
عمر : فنضرك علاش بدلات المكان .. و ممشاتش على منهجيتها ؟
صخر : ( كيحك فلحيتو ) كاين سبب خلاها بدلات شحال من حاجة .. أولاً كانت كتقتل الضحية فالسيارة فالخلاء بعيد على الأنظار من بعدما كتغويه .. تانيا التوقيت تبدل .. بين الضحايا التلاتة اللولين بيناتهم نفس المدة و الي هي شهر .. الضحية الرابعة بينها و بين آخر ضحية تلات أشهر .. اذن القاتلة ديالنا كانت عندها شي حاجة الي شغلاتها فهاد الآونة الأخيرة .. حتا بدلات الوقت و المكان حينت باين من التنفيذ كانت مزروبة حتا أنها غامرات و تشدات فالكاميرا واخة مبانش وجها .. لكن فكرة انها غامرات و تكشفات الهوية ديالها بلي انثى كيدل على انها بدات كترتاكب فوهات .. و أنا بضوري غادي نزير حينت استهنت بيها كتاااار من لقياس .. لكن قريب طيح بين يدي
عمر : إذن هاد التغير وراه شي حاجة واقعة فحياتها .. شنو ممكن اكون فنضرك ؟؟
صخر : ( بضحكة جانبية ) ....
☆ بارت 46 ☆

صخر : ( بضحكة جانبية ) منين نقبضو عليها .. نعرفو السبب من عندها شخصيا
عمر : نموت و نعرف شكون هادي !!
صخر : قرييييب .. ( شاف فالوراق الي قدامو ) بغيتك تنبش مزيان فحياة الضحية الأخيرة .. ضروري نلقاو خيط تماك
عمر : اوكي واخة صعيبة شوية
صخر : ( على حاجب ) علاش بالسلامة ؟
عمر : الشخص الي مات رجل أعمال كبير ' رامز الهلالي ' ضروري تكون سمعتي بيه
صخر : بقا ليا غير لقلاوي ديال رجال الأعمال حتا هما نعرفهم .. كلهم غير الزامل على خوه
عمر : هو الصراحة معروف عليه زهواني .. ترفعو عليه عدة قضايا اغتصاب و لكن فالاخير كيتسحبو .. عندو معارف و يدو واصلة
صخر : ( باستهزاء ) و كول لهاديك اليد ترجع ليه ز** الي غادي يتدفن بلا بيه
عمر : ( بتركيز ) لاحضتي بلي الضحايا بربعة واخة كل و مهنتو و حياتو .. لكن تابعاهم الشبهة و الي مدار الكتير فيهم دار القليل .. و القضية يا اما فيها تصفية حسابات هنا كاين احتمال انها تكون قاتلة مستأجرة كتقاضا الفلوس باش تصفيها ليهم .. او انتقام حينت مكتكتافيش تقتلهم فقط كتقطع ليهم حتا زنطيطهم .. زعما تكون القضية وراها شي اغتصاب جماعي ؟؟
صخر : كلشي ممكن .. لكن كاين القانون .. حتا حد معندو الحق ياخد حقو بيديه .. باغيني نتعاطف مع مجرمة كتقتل بدم بارد و نعطيها مبررات .. تؤ تؤ متحلمش بها مصيرها جهنم الكحلا
عمر : أنا نمشي نشوف شنو ورا هاد خينا واش مخلي وراه شي حاجة الي نبش فيها
صخر : ااه ديك القحيبة مزال مهدرات ؟
عمر : خدينا افادتها معندها باش تنفعنا .. مشافت والو حتا جاتها الدقة .. و معارفة والو
صخر : اوكي .. سير شوف شغلك

خرج عمر و صخر هز دوك الوراق كيشوف فيهم سد الملف و تفكر أحداث البارح و هاد الصباح تنهد و تكا على الكورسي كيفكر فسيندي ..
حتا جات غدير فبالو نهار شافها فالمركز و فاش باسها و بقات كترعد .. مسح على وجهو بعصبية و ناض وقف غادي جاي فالمكتب ..

صخر : آش كنخرا انا .. ناعس مع وحدة و كنفكر فختها ( ضرب بكرسي قدامو حتا وصل عند الباب ) هاد القلاوي الي خاصني

دوز النهار كاملو فالخدمة مشطون مع القضية و داكشي الي وقع مع سيندي .. خرج خدا اللوطو و توجه لدار عند مو كل ساعة تصوني عليه ..
وقف أمام البوابة فتح ليه العساس و دخل حطها فالباركينغ جا خارج و هي تبان ليه رونج ديال خوه داخلة ..
خرج سراج كيضحك فاش شاف صخر قرب ليه عنقو عناق رجولي و صخر حاقد على الوضعية ..
صخر : عمرك تبدل .. سير عنق مراتك الى ناقص حنان و فوتني عليك
سراج : ( بابتسامة ) و الله الى ناقص حنان مكدبتيش .. خوك صايم هاد ليام .. المدام عندها عطلة ههه
صخر : ( كيحرك راسو يمين شمال ) و أنا مالي .. عطيني بالتساع راه واصلة فيا فين بغات

دخلو مع الباب و توجهو للصالة كانت أم صخر جالسة كتقرا فكتاب .. شافتو حطات الكتاب و هي كتبسم فوجهو .. قرب عندها باس ليها راسها و جلس حداها ..
روقية : عاد تفكرتي بلي عندك أم .. شحال انا نصوني و نعيط .. زعما كاع هادشي خدمة اولدي .. تشغل على ميمتك .. كطل علينا مرة فالشهر كالهلال
صخر : بديتي الواليدة .. صافي هاني جيت
سراج : ( جلس مقابل معاهم ) كنشكرو سيادتك الي تكرمتي و زرتينا
صخر : ديها فراسك شوية .. و قابلني
سراج : نسيتي يامات تبعني فينما مشيت .. و تخنن فاش نخرج و منديكش معايا
صخر : واش باغينا نجبدو الضواسا لقدام .. ايييه علاش لا حتا تنزل مرات خويا العزيز .. عندي بزااااف ديال الذكريات .. بغيت نشاركهم معها فاش كنت ( غمزو ) نلصق فيك و نمشي معاك
سراج : ههه و با صخر .. غير كنضحكو معاك
صخر : اوى هي الى قلبتي على ساحتي
☆ بارت 47 ☆

كملو جماعتهم سراج طبعو ضحوكي و كيبغي اشد فصخر الي جدي طول الوقت قليل فين كتلقاه ضاحك و هادشي مع عائلتو ..
اما الناس الي ضايرين به عمرهم شافوه ضاحك شخصيتو قاصحة و هضرتو ناشفة ..
ماتعرفو زاعف و لا ناشط ديما ملامح وجهو جدية .. و هادشي كيعطيه هبة قدام الناس و كيديرو احتياطهم و هما حداه ..
نزلات إيلاف زوجة سراج هازة بيان ولدها لفنيكيش عندو تلات سنوات .. سلمات على صخر باليد و بغات تجلس حتا شافت بيان كيتجبد عند صخر ..
مد صخر يديه شدو من عندها و على وجهو ابتسامة ساحرة ..
هادي من اللحظات القليلة الي كيشوفو فيها ابتسامتو فاش كيهز بيان و العب معاه .. كلهم حاضينو كيف كيتعامل معاه كيكون صخر واحد آخر وجه مشرق و مبشور و ابتسامة اسها فيها الواحد ..
علماتهم الخادمة بلي الغدا تحط ناضو كاملين خدات إيلاف بيان من عند صخر .. جلسو مجموعين كياكلو فجو مرح خالقو سراج الي شافو ميقولش هو الأخ الأكبر و صخر هو الأصغر ..
لكن واخا هكاك سراج ضحوكي و مطلوق فقط أمام عائلتو اما فالخدمة كيكون شخص جدي و صارم ..
دوز معاهم صخر النهار كولو تعاشات العشية خرج هو و سراج للجردة جالسين فوق الفوطويات ..
صخر : ( شعل كارو ) هاد القضية بوحدها
سراج : رخف على راسك شوية .. الخدمة عمرها تسالي ( بجدية ) واش مناويش تزوج و تستاقر خلاص .. 30 سنة شنو باقي كتسنا ؟؟
صخر : ( عقد حجبانو ) الزواج !! شي حاجة بعييييدة .. آخر حاجة نفكر فيها .. غادي غير ضيع معايا الحجرات ... سو
قاطعو الفون الي كيصوني جبدو شاف سميتها وقف بعد على سراج و جاوب ..

☆☆ فاقت كتعكز حلات عنيها لقات راسها فبيت غدير كيف ديما ناضت كتفوه حاسة بجسمها مهدود .. وسعات عنيها فاش تفكرات شنو وقع شوية ترسمات ابتسامة عريضة على وجها و هي كتسترجع الأحداث ..
فاش قرب منها و باسها استسلامها ليه كانت أسعد ليلة بالنسبة ليها فرحات حينت ملكها و ولات ليه .. هو الوحيد الي عندو الحق امسها و مندمناش حينت سلماتو نفسها ..
على هاد الفكرة لخرا تفكرات غدير و هي تقفز من بلاصتها .. غدير هي الي فاقت بجنبو تملكاتها لغيرة لوهلة شوية تفكرات شنو ممكن اكون وقع ..

سيندي : فااااااك .. علاش مرجعتش ديك الساع علاش غفيت حداه .. ديك الكلخة باينة كفساتها عليا و خربات ليا كلشي .. صخر الى عرف الحقيقة غادي اتخلى عليا .. لا لا ميمكاااانش منقدرش نعيش بلا بيه .. خاصني نتصرف كيفاش حتا رجعات لهنا و شنو وقع .. خاصني نعرف الله ياربي غادي نحماااااق

خرجات من البيت كتجري غادة لبيتها حتا بان ليها صاكها مليوح فالأرض هزاتو لقات فيه الفون ..
دارت نمرتو و هي كتفتف معارفاش شنو ممكن اكون وقع بيناتهم واش كلشي تفضح خافت بزاف مفاقت غير على صوتو ..
صخر : وي سيندي
سيندي : ( كتقفقف ) ص صخر .. ل لا باس ؟
صخر : ( باستغراب ) مالك كتفتفي ؟
سيندي : اآ .. لا والو
صخر : دابا مامسليش .. من بعد و نهضرو
سيندي : ( بخوف ) علاش غادي نهضرو ؟؟
صخر : ( بعصبية ) مالك كتحماقي عليا .. على داكشي الي وقع .. درتي هاكة و زدتي .. شوفي كنضن فهاد المدة الي عرفتيني فيها .. عارفة معنديش مع دوك الحركات و التبهليل
سيندي : ا انا حركات ؟!
صخر : ( بقلة صبر ) من بعد و نتفاهمو

قطع عليها و رجع عند سراج لقاه مربع يديه كيشوف فيه شوفات ديال شنو تماك .. جلس حداه شعل كارو كيكمي بعصبية ..
سراج : شكون هادي ؟
صخر : وحدة
سراج : باينة القضية مشابكة
صخر : اودي خلي داك الجمل راكد
سراج : كتبغيها ؟؟
☆ بارت 48 ☆

سراج : كتبغيها ؟؟
صخر : ( شاف فيه و رجع نطر نطرة طويلة ) شنووو !! ديما كتسول أغبى الأسئلة
سراج : إذن مكتبغيهاش
صخر : معرفتش .. ( وقف )
سراج : فين غادي ؟ جلس باقي الحال .. كتغبر و تخلي الوليدة ديما مشوشة عليك
صخر : ماشي لخاطري .. الخدمة مزيرة

دخل صخر ودع الأم ديالو الي مبغاش طلقو سلت غير بزز طلع فاللوطو ديالو و تحرك لدارو ..

سيندي كي قطع جلسات تفيبري بوحدها و تحلل فالهضرة الي قال ليها ..
سيندي : أكيد معاق بوالو و الا كان قلب عليا الدنيا باغي تفسير .. باينة تدهشرات و هربات .. أحسن حاجة دارتها فحياتها .. الجبن ديالها أخيرا جاب نتيجة .. خاصني نكون على بال باش مبقيش اوقع بحال هاكة من هنا لقدام

دخلات لبيتها بدلات عليها و اتاجهات لخدمتها فالكازينو مثوترة و فرحانة .. مكرهاتش تشوفو اليوم قبل غدا لكن خاص تصبر متحكرش باش متخنقوش و انفرها و ابعد عليها ..

★★ فاقت على صوت لغفاي ناضت كتمشا بشوية الحريق نقص مبقاش كيف الأول دخلات للطواليت قضات حاجتها ..
و قفات قدام المرايا كتشوف فراسها جسد بدون روح لاحضات شفتها لتحتانية مجروحة .. دموعها نزلو كيجريو كتحسر على شرفها الي ضاع رغما عنها .. تفكرات نهار فاقت و حسات بألم فساقها ..
طلات عليها حتا كتصدم بوشم فتحت ساقها شحال بكات داك النهار ..
هادي فقط وحدة من بزااااف .. غسلات وجها و يديها كيرجفو مقاداش تحرك محطمة نفسيا و جسديا .. لكن خاصها تمشي لخدمتها باغة تجنب المشاكل ما أمكن ..
باركة عليها غير هاد المعانات الي كتحس بيها وحدها .. خرجات خدات الي لقات قدامها لبساتو جمعات شعرها كعكة مهملة معندها خاطر دير شي حاجة .. لبسات فرجليها سبرديلة كري ..
و هزات صاكادو كحل خرجات من شقتها بلا فطور .. واقفة فالشارع كتسنا طاكسي مقاداش تمشي فشي طوبيس اخيرا وقف ليها واحد و طلعات ..

بعد دقائق كانت قدام المجلة خلصاتو و هبطات غادة حادرة راسها و يديها خاشياهم فجيب القبية ..
دخلات مع الباب غادة جيهت الاسنسور و هي تلاقا برباعة لعقروشات غمضات عنيها بتعب مافيها الي اسمع شي هضرة ..
وقفات حداهم بعدما لقات التحية الي أكيد مرضوهاش عليها كانو كيتسناو الاسنسور اتفتح ..

بنت : ( بهمس و فنفس الوقت كتسمع لغدير الهضرة ) شفتي حالتها كيف دايرة .. الهالات السوداء قربو اوصلو لفمها و شعرها حالتو مشعكك .. تقولي بايتة كتحارب
بنت 2 : و متعرفي .. بحال هادو الي كيديرو فيها برائتي سر سعادتي .. تلقايهم محترفات فهزان الرجلين
بنت : ههه و الله مكذبتي .. كيلبسو وجه العفة و اعفن منهم مكاين .. الي شافوه اضورو بيه ( كتمعني على سيف )

غدير صافي مبقاش عندها فين تزيد بحال الى حكو ليها على الضبرة كلامهم دخل ذاتها كيف السم .. كتقول اه عندهم الحق انا وليت غير موسخة بلا شرف هما نقا مني ..
هضرتهم ضرباتها فالصميم واخة مدايرة لا بيديها لا برجليها .. حطات يدها على فمها حابسة البكية و مشات كتجري طالعة مع الدروج سمحات ليهم فداك الاسنسور ..
طالعة كتجري و تبكي شهيقها كيتسمع بسبب الصدى على الجهد وصلات لطبق فين كاين المكتب .. وقفات كتشوف فالباب الي كيدخل للطابق و كتشوف فالدروج الي كيطلعو الفوق ..
مسحات دموعها بكمامها و عنيها حمرين كيشوفو غير فدوك الدرجات لعب عليها الشيطان ..
طلعات معاهم بشوية طالعة درجة بدرجة و دماغها توقف عن التفكير مبقاش كتبان ليها شي حاجة زينة تستاحق تعيش على قبلها ..
صافي هادا جهدها حياتها كتشوفها ضلمة فضلمة لاش غادي تصبر و تكابر على ود من .. عائلتها ماتو واحد من وراء لاخر مخلينها من وراهم ..
شرفها الي اعز ما كتملك البنت فقداتو سو علاش كتعافر و باغة تعيش ..كانت وصلات لسطاح تقدمات جيهت الحيط القصير واقفة كتشوف فالمدينة كلها .