شفاه ذابلة

وعد المحبوب

يسعد مساؤكم....صح عندي ظرف حاليا...بس ما احب اعوف المتابع معلك....لذلك راح احاول اكتب وانزل بس مثل ماكلت مو يومي حسب فراغي...
وخاصة القصة يوميين أنمسحت من يمي وهسة رجعت...متابعة ممتعة
البارت الثالث
همس ليل
بقيت احوص شلون ياربي شسوي...
اخذت دبتي ولبست العباية...ورحت على قسمة
وبالطريق هية تسولف وتضحك واني بالي مو يمها
حتى البنات الي يرحن للمدرسة ما انتبهت عليهن
_خية شمالج اليوم...
حكج عاشكة ومفلسة...
_ماتلطمين شوية...اني وين وانتي وين
_يا...عليمن هاي...تاليتها هجي ...
والله ولا احاجيج بعد ..
مشت كدامي سريع والحكت بيها..
_تعاي ياخبلة...ليش اول مرة احاجيج هجي
_ما ..ماعلية ولا ارضى اليوم...
جريته من عبايته ورادت تنجبح على وجهها...
ظليت اضحك واني واكفة بمكاني
_جمالة تتمضحكين علية...
تعدل بعبايتها ...يلا المهم شفت سنونج...وضحكتي
سكتت ورجعت لهمي...
_شمالج ياخية اليوم وجهج مايكصه الطبر..
شجرالج
_خالي جواد يريد يرجع لديالى...
_يا دادة...جاشلون بمحبوب الكلب...
تمشيت لي يمها..وبدينا نمشي سوة
_ماعرف شسوي ...
_جا خالج يأخذج بدون مايشور على جدج..غير يسأله ...مايصير هجي
_مو بيبتي راحت لمرت عمي وكالت لها
_وهالحية مريت عمج شردت عليها
_ماعرف ...ماسمعت شكايلة...
رحنا ملينا مي...
_زهيرة ترة دبتج غوركت ...
وين عينج تفرفر ...مامش اليوم لا تظلين جنج عيون مطيرجي
_صدك شو اليوم ماكو
_شدراني...اخافن امه منعته..
رجعت اجر بنفسي جر...خاف صدك منعته امه
_قسمة اخاف صدج كلامج وامه ماتقبل
سمعت ضحكتها التفت عليها
_شمالج خايبة...ضحكينة وياج
_اريدن اسعالج ...شو انتي لا تتحجين مثلنا ولا تتحجين مثل البغدادين...
_شوف البطرانة انة وين وهية وين...
_لا صدج الله عليج
_مو ولادتي ابغداد واهلي مخلط بين هنا وهناك
_بس شنهي عودن الحبيب كله يحجي بغدادي
_اوووف منه ومن حجيه....
احس روحي اتموع وتسيح من اسمع صوته
_چا غير امس لكيت الزبد سايح...كلت حالك من حال صويحبتي
تحجي وتضحك علية...
جنة واصلين لبيتهم...دفعتها
_فوتي الله يساعد محيسن على هبلج
طبيت لبيتنا وشفت بيبتي تعزل بملابسها ...
_الله يساعدج بيبي...شسوين
_حبوبة غير اجهز غريضاتنا..
_ليش بيبي وين رايحين
_لديالى ...خالج ماله رزق هنا
صفنت بوجهه...شلون اسألها...
_بيبي وانة اروح وياكم مو
_اي حبوبة وين اعوفج..
سكتت عرفت معناها ماقبلت مرت خالي...
سويت الغدة وكملت شغلي مثل كل يوم...
بس فكري مشغول...
يجوز تريد تخطبله من بنات خاله...
زين وهو...قابل لو لا...
اكيد يقبل مايعارض امه...
وانة ...اذا مارايدني ليش يوكفلي يوميا...
ليش يأملني...
بيومها ماطلعت أملي مي...
وبالليل جانت مرت خالي وخالي وبيبتي يتعللون...
واني بالكبة ...
اسمعهم يحجون...ودمعتي تنزل على خدي
جواد...والله هية الخسرانة وين تلكى هيج بنية حبابة ومرتبة
مرت خالي...هاي ام صالح من البداية ماأطيق زهرة
بيبتي...يمة شنسويلها بنيتنا عدنا وأبنهم عدهم...
الله يهني سعيد بسعيدة
للصبح مانمت..دموعي ماجفن...
احس بكلبي الم...
وية ماسمعت الأذن اخذت مي لبيبتي تتوضى
_شبيج حبوبة شو مالج خلك
_مابية بس احس جسمي مكسر
_روحي نامي ...مرت خالج تملي مي باجر
بقيت تلث ايام ماطلع املي مي...
مرت خالي هية تروح....وخالي يرتب باغراضنا يحاول ياخذ المهمات بس...
انة احس جسمي مكسر...ماعرف من الم كلبي...
لو من فكري الدايخ بزمانه...
ليش انة مو مثل باقي البنات...ماعندي اب وام
وفوكها الي عشكه كلبي مايصير لي...
اشفت بدنياي...جنت اوكف كدام كسرة المراية
واحاجيها...
كل عقلك يازهيرة يباوع عليج...
شي يشوف.. زركة وعيون دكم ...وهو جنه كمر...
كل بنات الطرف تباوعله...يعوف الكل ويجيج انتي
اجر نفس واكول هاي هية شسوي لزماني...
رابع يوم بيبيتي كالت حبوبة اذا مابج شي اطلعي املينا مي...
طلعت واني مالي عين اباوع لمكانه...
جنت امشي وحدي لان قسمة ماخذيها يجبولها نيشان من الكاظم ...
خطبها ابن خالها محسن...جان من زمان حاجزها
فرحتلها...قسمة طيبة وحيل على نياتها
ما حسيت على نفسي الا وردت انجبح من سمعت صوته يصيحني
_زهرة... زهرة....
الله...الله...مادكوللي شبيج تمشين وتعثرين
التفت شفته بملابس الشغل وجاي يتمشى بأتجاهي
حسيت كلبي راح يوكف وانة اشوف طوله الحلو..
وصل يمي..
_وين صار تلث ايام ماكو..
دنكت وذكرت هو مو لي ولا باله يمي...
_شبيج زهرة ...
_مابية شي ابن عمي...
مشى كدامي ...امشي لحد ينتبه عليج..
جان يمشي مسافة خطوتين او ثلاث وظهره لي ويحاجيني
_ليش ماكو ..صاير شي
_لا جنت مالي خلك...
_سلامتج...اخذ للمستوصف
دمعت عيني...ليش يهتم بية هيج ..
يجوز لان بنت عمه ويتيمة
_زهورة شبيج حبيبة جاوبيني
رفعت راسي فجأة وحسيت كلبي وكف...
صدك سمعت منه كلمة حبيبة لو اتخيل...
بقيت محنطة بمكاني...اشوفه يبتعد واني مثل الثولة واكفة لا اقدم رجل ولا أخر...
التفت فجأة ليورة شافني ...رجع علية
_شبيج واكفة وفاتحة حلكج...
_حاتم ليش ماتريدني وانة بنت عمك..
لطمت على حلكي ...ولا يجوز لساني يفلت
هو يبتسم....لازم ماسمعتي شحجيت..
وبعدين منو كال ما اريدج
_مو امك كالت...
سكتت شداخربط انة...حجيت وية نفسي..
تبسم ...كملي حجيتيها بعد
رجع مشى ..وانة وراه...
_احجي زهورة شبيها امي...
_ما اريد افتن ...
_تدرين شكد احب فطاريتج...
يلا احجيلي...
_خالي يريد ياخذنا لديالى...
فجاة وكف وانة جنت امشي واره ومدنكة نردمت بظهره...فزيت وابتعدت...
هو التفت علية مخنزر...
_شنو ياخذكم لديالى...ماعندج اهل...
غير يسأل جدي
_مو راحت بيبتي لامك...
_وشكالت لها
_ماعرف...بس من رجعت فهمت اني اروح وياهم
_حرام اذا فهمت عليج...
مالج علاقة بهالحجي...اليوم احجي وية جدي
وباجر نجي نخطبج
_صدج حاتم...
صحت بصوت فرحانة
_لج صوتج...فضحتينا...
اي صدج على كولتج...
وصلني املي مي وشالها واحنة راجعين...
جنت احس مامشي على الكاع...
لا طايرة بالسما...
بيومها بالبيت بس افتر بين الكبب...
ماعرف شسوي مامصدكة نفسي...
يمة صدج ويصير حويتم من نصيبي...
ربي كملي فرحتي...
من غوربت الشمس سمعنا صوت ينتهد اباب البيت
ركزت هذا صوت جدي...
طلع عليه خالي ودخله للدير...
ماجنت اسمع شيحجون...بس سمعت صوت جدي ارتفع ...
اني سويت جاي واجى خالي اخذه لهم...
بعدها طلعوا...اريد اعرف اصار...
رحت لباب كبة بيبتي اتصنت على حجي خالي..
لان شفته دخل عليها...
جواد...يمة جدها يكول مو بكيف النسوان...
بتنا ناخذها لابنا...وتأخرنا لان الفلوس حطيناها على البيت..
_وليش رفع صوته
_يكول شلون تريد تاخذونها بدون علمنا...هو هذا الاتفاق
_يايمة وانة شلون اعوف بنيتي...
_يمة اول وتالي تزوج...اصلا هية تاخرت بالزواج
ماكملت التنصت جنت طايرة من الفرح...
ثاني يوم اجى عمي انطى فلوس لخالي كاله اطلعوا جهزوها...
راح خالي وبيبتي واخذوني وياهم...
اشترولي كلادة ام الليرات وياها ست بتوت ومحبس...وتراجي وحلقة...
واشترلتي عباية جديد وقماشات حتى اخيط ثوابة
وهواي شغلات...
من رجعت بيبتي دزتني وية مرت خالي لخياطة تعرفها...
حتى تخيطلي الملابس...
تاخروا خوالي تلث اسابيع لحتى يكملون جهازي...
وطبعا خالي بعد ماخلاني اطلع املي مي...
فماشفت حويتم...
اجت قسمة علية...
_خية كون اهوزلج للصبح واهلهل ....
وادبج...صدج راح تزوجين...
وتاخذين حبيب الكلب ...
_اي والله مامصدجة نفسي...
_خايبة لا تسويهن علية...عود مستحية
عودن ما وصيج افهي من يحاجيج وظلي جالكة حليكج...
_دكومي كومي ولي لمحيسن ..الي يكولك هية الفهيمة مالتنا...
قبل الحنة بكم يوم اجى جدي وعمي واخذوني وية خالي وبيبتي للكاظم...ويانة حاتم عقدونا سيد...
وزورونا...بيومها ماكدر ارفع راسي واباوع لحاتم
اجو خوالي من ديالى وسولي حنة...
لبست كلابية مشغلة ايد...وبيبتي حنت شعري وظفرته بالحنة...لحتة بيوم العرس تبقى الريحة بيه.
وجابلي ديرم (مادة تستخدمه النساء سابقا مثل الحمرة )وكحل ورشوش(مادة تشتري من العطار تستخدم كعطور )...
وظلن يصفكن ويدبجلي واني فرحانة...
وثاني اليوم...بيت عمي قريب مو ...
لبست بدلتي جانت خياط بيضة ردن بالركبة مشتغلتها الخياط بخيط ذهبي...ومن يم الخصر هم وبالذيال...
وظفرن شعري بسلسلة ذهب بيبتي جمعت من خوالي واشترتها لي خلن البركع...وفوكه العباية من سمعن هوزات الزفة
قبل ماجان العريس يجي هو ياخذ العروس...
اجى جدي وعمي...اخذوني للبيت...
وطبعا الزفة مشي...والهوسات ورانا...
ونسوان خوالي جانن كل وحدة شايلة بقجة ملابس فوك راسها(البقجة...منديل مربع توضع اغراض العروس بيها )...
دخلني جدي للهول..وطلع ماجنت اشوف شي...
مرت خالي رفعت العباية...
وهم ظليت مدنكة مارفعت راسي...
بس حسيت بالعز واني اشوف بيبتي ونسوان خوالي محاوطاتني...
مو وحيدة انة...جنت هجي اكول لنفسي...
كالوا صعدوا العروسة لغرفتها دانصب عشى...
صعدوني وحبايبي حولي...بس انة بعالم ثاني...
اجت مرت خالي تشاورني...
_عود لاتعاندين رجلج شيكولج شسوي...
علمتني شغلات بسيطة واني ميتة مستحة...
واريد اكولها رجعيني وياج...ماجنت اعرفه هجي يصير....
واجى وكت زفت العريس...سمعت صوت الهوسات...
ودخلوه عليه ...
بيتي تقدمت وجرت ايدي وخلتها بيده...
بس ماسمعت شكالت....
جان باذني صوت كلبي الي يضرب سريع...
طلعت واني مجلبة بذيالها...
رجعت كعدت على الجرباية ومدنكة...
_ها...وين لسانج...شو مخرسة...
كعد بصفي ومد ايده رفع البركع...وانة وجهي بعد شوي ينطبك بصدري...
_زهورة...حبيبة...عمري....
مايصير هيج...انتظر هاللحظة من زمان...
واني اتخيلج يمي...
شوفي...جر ايدي وخلاه على كلبه...
شوفي هالكلب شلون يدك لج...
ارفعي راسج...شو خل اشوف عيونج ..
ها يازهرة خاف ماترديني...
زين اكوم اكول لجدي لعد....
كام يريد يطلع..
جفلت عبالي صدج...رفعت راسي
_لا حويتم وين رايح...
_مات حويتم وعشيرة حويتم
_اصملله...لاتكول هيج مديت ايدي اسد حلكه
باس باطن ايدي...
سحبتها راسا...واني احس نجويت من شفته
_يلا حبيبة ينتظرونا برة....
جرني لحظنه....لا تخافين ياعمر حويتم...بس كون مادفعيني...
لزمني الخوف وصرت ارجف بين ايديه...
بس هو ماسمعلي كمل...واخذ نيشاني ...
باس كصتي...رايتج بيضة بنت عمي...
عافني وطلع...
اجت مرت خالي اتشوفني...اخاف محتاجة شي..
بدلتلي ثوب قماشه جرسي...
يصير ناعم بدون ردن ودلعة...وعدلتلي شعري
وراحت من اجى حاتم...
_خامة متأذية...
هزيت راسي لا..
_تعاي نتعشى سوة...
كعدني بصفه...
_زهورة ...حبيبة اعذريني على الغرفة ماجبتلج شي زين...
جنت اريدلج احسن غرفة حطاطة...بس ابوية مابقة عنده فلوس..
كله حطيناه على البيت....
بس وعد مني اجمعلج واغيرها...
لاول مرة انتبه على الغرفة...
جانت كنتور تلث بوب...وجرباية حديد...فارشين على الدوشك فرشة عرس بيضة...
احنة ماستعملناها لان جانوا فارشينة دوشك بالكاع...
وبعد مراية وشمعة للملابس...
_مايهمني...انة المهم انتة وياي
_بوية تعالي...اموت على كلمة انة...
ولج حبيبة...بس سمعيني كلامج الحلو ليل نهار...
_ولك استحي حويتم خجلتني...
بعده باسبوع مشوا خوالي لديالى...
بيومها صدك حسيت باليتم...
حاتم ماقصر وياي...
دوم شريد يجيبلي...ويموت علية...
وانة كل مايجي من الشغل اركض اجيبله طشت بيه ماي وملح وافرك رجليه...
ومن ندخل لغرفتنا...غزله مايخلص..
مايصيحلي الا زهرة عمري...
بس جانت مرت عمي مرمرتني...
قسمت الشغل بيني وبين سمر...
بس ماتبطل تسم بدني بالحجي...
مرت تلث سنوات على زواجنا...
بس ماكو فرحة تكمل لليتيم...
....وللحكاية بقية