شفاه ذابلة

هروب

يسعد مساؤكم...كل عام وانتو بالف خير يارب يحفظكم وعوائلكم من كل سوء ويجعل ايامكم هنى
ويفرج عن العراق ويعم الأمن والامان بربوع بلدنا الحبيب وكافة البلاد العربية ...
البارت اليوم طويل...وباجر ان شاء الله عيد...
فترة العيد استمحيكم عذرا ماكدر انزل...
واذا صار مجال انزل بارت قصير ...متابعة ممتعة
البارت الثالث عشر
همس ليل
طلع عدي يشوف منو...
اني جنت بغرفتي....ماعرف شكد مر وسمعت صوت على...
طلعت من غرفتي وزهراء صارت بوجهي
_شكو هذا مو صوت ابو صفاء
_ماعرف والله فرحة هم مثلج طلعت على الصوت
نزلنا وسمعنا صوت خالتي هم تصيح
_هاي من شوكت صارت بنت اخوك واتريد مصلحتها
نسيت لو اذكرك من الي بلغ عنهم وصار سبب تهجيرهم...
_لا تتهمين بالباطل ...شلون ابلغ على اخوية وامي وياه
_والله مادري شلون...بعد ماتكدر تأذيها صارت باسم رجال
_وينه الرجال راح لدار حقه...
وماعدها غيري...
اريد بنت اخوية...
من سمعت هيج عرفته عمي...
خليت ايدي على گلبي وزهراء تباوع علية
ياربي هذا مين عرف وشذكره بيا
_فرحة منو هذا تعرفيه
باوعت عليها وبالي بعيد ...راح لذيج الليلة
الي بعدها ماشفت اهلي
سمعت عدي جاوبه
_ماعندك مرة يمنا...
هاي مرت اخوية وجهاله ولدنا ماننطيها لو شمسوي
_خوش لعد اريد اشوفك شراح اسوي
سمعت صوت الباب ينسد بقوة...
بقيت افرك بيدي...طلعت خالتي اتجر بنفسها جر...
شافتني واكفة...
باعتلي وجهي اصفر...
_لا تخافين ...والله لو تنطبق السما على الكاع ماخليه يشوف طولج
_خالة فدوة هذا مين عرف
_شايف فايلج بالمنظمة الحزبية...
_زين شلون خاف يرجعون يسفروني
دخل عدي...شتحجين ام احمد ...
زوجج عراقي وعندج اطفال مايلوحج تسفير بعد
_يمة شلون هذا نذل النوب ايده طالت ...
_شيكدر يسوي
فرحة...خوية اخاف عليكم ...خاف يأذيك
زهراء ...شنو الموضوع...فهمونا...منو هذا وياتسفير
عدي...مالج غرض انتي...
جنة واكفية اباب الهول ...
خالتي دخلت كعدت على القنفة...
وعدي كعد يمها...واني وزهراء دخلنا براهم
بس اني بقيت واكفة افرك بيدي...
خالتي تحسه مكسورة ظهر مو مثل قبل ...
لا اني ولا هية نزعنا الاسود بس زهراء...
وهم خطية ماقبلت من دارت السنة كوة خالتي نزعتها...كالت لها موزين على رجلج
خالتي باوعت علية...
_شبيج يمة...هو بعز ذاك الوقت ماعفتج...
تريدين هسة من صرتي رويحت الغالي
وام جهاله...
عدي...خوية والله لو تصير كاتل ومكتول مانوله الي اباله
فرحة...من شوكت صار حنين ويدورني
ام حسام ...لا يمة لا حنين ولا هم يحزنون...
هذا عرف عندج بيت وراتب...يريد يستفاد براسج
بجت هدى...
ام حسام...صعدي لبنتج ولا تخافين ربج موجود
صعدت لبنتي ارضعها...واباوع لاحمد نايم
شلون بينا يمة...هذا وين ضاملياه الوعد...
حسام حبيبي الحكني وين عفتني وية هالدنيا العوجة...
نمت جوة التراب مرتاح ومافكرت بية...
رغم مرت سنة وشوية على استشهاده بس جمرة فراكه تسعر  بگلبي ...
ذيج الليلة مانمت ابد وجه الصبح يلا من التفكير
وتاخرت بنومتي...
كعدت لكيت خالتي مريكة احمد...
بس زهراء شكله مكلوب...
باوعت عليها واني اتسائل شصار بعدي وهية هيج مطنكرة علية ...
ام حسام ...يمة خلصي ريوكج انتي وبنتج وتعاي للهول...
جان اليوم جمعة...عدي كاعد ماطالع للدوام...
وحتى المحل مارايح له...
بهالوكت خالتي جابت ميز طعام بالمطبخ
لان مابيها حيل دكوم وتكعد من الكاع
كعدت وبحضني بنتي اريكها...
_زهراء شصار وراي
شو هاي ركعت غبق الجدر حيل...
_هسة راح تعرفين....
عافتني وراحت...
اني ماصبرت بعد بس خلصت ريوك هدى...
عفت الاكل ورحت للهول شفت عدي مدنك...
حتى من سلمت مارفع راسه
_اكعدي دحجي وياج
_كعدت وخليت هدى بالكاع تزحف...
جانت هستوة تتخطى...تسند على القنفة وراحت لعمها...
جانت حيل متعلقة بيه...شالها باسها وكعدها بحظنه
_خالة شكو صاير شي
_يمة اسمعيني زين...
عمج حزبي جبير...واخاف عليكم لا يروح يسويله لعبة...
من كالت هيج خفت كلت بس لا تريد تاخذ جهالي وتخليه ياخذني
_الحل الوحيد حتى نخلص من مشكلته...
سكتت وهية تباوع لعدي ورجعت كملت
_عدي يعقد عليج...حتى مايكدر يحجي وياج
شهكت من سمعت حجايتها...
_خالة عدي اخوية...وتريدين بعد حسام ازوج
_لا مو اخوج...حماج ويحل عليج...
وماكو غير حل...ولد ابني يبقون بحظني
_لا خالة اذا علمود الفلوس سجلي البيت باسمج
والراتب هم
_ماراح يبطل منج...
هم يحاول ياخذج ويقنعج تشتكين...
اعرف درابينه...
_لا خالة ما اقبل...مستحيل ازوج
_ما كلت ازوجي ...يعقد بس عليج
وكفت ...هم لا ماسويها
صاحت خالتي وهية توكف
_انتي تصيحين مستحيل
والتفت على عدي...
وانتة اتصيح مستحيل...
شوفوا اكولكم...تحظرون نفسكم باجر ترحون تعقدون...
لو القران الكريم...اخذ الجهال منج وانطيج لعمج وهو يصرف وياج
وانتة مو عبالك مايلوحك شي...
اخذ جهال حسام واروح لبيته...
وبعد ما اشوف شكلك...
وما ارضى عليك لحد ماموت
عدي...يمة ضغطج على كيفج
ام حسام...اشتعلت لشة امك
لك ذولة ريحة حسام...
اخوك الحنين الي ماقصر يوم وياك لحد ماكملت وتخرجت وتزوجت...
ماتكدر تصونهم ...علمود تمشي ورة حجاية مرتك
عافتنا وطلعت...
طبت زهراء...شوف عدي والله العظيم دقيقة مابقى هنا اذا ازوجت علية...
طلعت...
_روح خوية شوف مرتك...هسة نحجي وية خالتي
صعدت لغرفتي واخذت جهالي ...
شوية سمعت عركة زهراء وعدي...
وصوت الباب اركع...
طلعت شفت عدي نزل...
دكيت الباب على زهراء ودخلت لكيتها تلم بملابسها
_ استهدي بالرحمن ام صفاء
ماصار شي بعد
_شمصار...تريد باجر ترحون تعقدون...
انتظر لحد ماينزلج ضرة علية
_كولي ياالله خيتي...
ابو صفاء بمثابة اخوية
_لا مو اخوج...
ولا تقنعيني بس عقد وهاي هية
حتى لو انتي ماردتي هذا رجال
بعدين تحلين بعينه ويريدج...
صفنت على حجايتها واذكرت امي
عمتي سمر كالت...عمج بالبداية بس عقد وبعدين كام يدور وياهة...
طلعت من غرفتهم ورجعت لغرفتي...
عدي مو مثل كريم مع ذلك شضمني...
باوعت على جهالي ...هم اعيد مأساة امي...
بس شلون لعد...
اخلي خالتي تاخذ الجهال مني واروح للضيم برجلية
يارب حيرة شسوي...
طلعت زهراء لبيت اهلها زعلانة...
وعدي تعصب وتلاغى وية امه...
بس جانت قافلة...
نزلت حاولت احجي وياهة جان جوابها
_اعتبري رد جميل للي سويناه لج...
مااريد منج شي بس خلي الجهال بحظني لحد ماموت...
حجايتهة حيل اثرت بية...
لليل كتلهم روحوا صالحوا زهراء وقنعوها يلا...
صدك صبح الصبح خالتي اخذت عدي وولده لان امهم عافتهم يمنا...
راحوا واني صعدت لغرفتي...
طلعت صندوك الي انطتنياه عمتي سمر...
وخليت فوكه ذهب نيشاني...
كلبته بيدي...اي ياهلصندوك اجمع بيك تعب سنين لناس لا لبسته ولا تهنت بيه
والعباية نفسها مال عمتي...جنت ضامتهة ابد مالبستها...
واخذت ملابس لبنتي ولابني...
وطلعت ...دكيت الباب على الجيران  طلعتلي امهم
_هلا خالة ام احمد شلونج يمة
_الله يسلمج خالة...هذا المفتاح من تجي خالتي ام حسام انطيهياه...
_ليش وين رايحة انتي والجهال...
_رايحة لحسام
باعتلي باستغراب عبالها بية شي
_اسم الله يمة...دتعاي فوتي نسولف لحد ماتجي خالتج
_لا خالة ...رايحة للمقبرة يتأخر الوقت
عفتها ومشيت...اني اذكر شلون نركب...لان خالتي كل اسبوعين تودينه للمقبرة...
ركبت للكراج...ومناك ماركبت للنجف...
ركبت لكربلا...ماعرف ليش...
بالطريق صار بنجر السيارة ..نزلوا الركاب واني هم نزلت...
جان شهر العاشر.....بقينا ننتظر يصلح البنجر...
التفت ليورة...شفت طريق ترابي..
اذكرت يوم جابني حسام لحسنة...
شلت بنتي وكدت احمد ومشيت صاح علية ولد من ركاب
_خيتي وين رايحة هسة تصلح السيارة
التفت عليه...
_روحوا الله وياكم
امشي بالطريق واذكر ذيج الايام شلون جانت...
حسنة خطية بعد سنة من زواجنا اتوفت
وسويلناها فاتحة وحسام ابد ماقصر..
اني حيل تأثرت عليها...
لو موجودة جان رحت يمها...
بس كل الابواب انسدت بوجهي...
صارت الدنيا الظهر وحمت..واني تعبت وهدى كامت تبجي....
كعدت بظل نخلة ارضعها...
واحمد كال ماما جعت...جنت شايلة كيك انطيته
نامت هدى على صدري واحمد هم تمدد بعد مافرشتله ثوب ونام...
اباوع عليهم وعلى حالي...
شسويت اني...ليش طلعت وليش اجيت لهنا
جان قبلت عدي يعقد علية...
بس والله مو بيدي...اكو صور ابالي من جان عمي يضرب امي...
صح صغيرة جنت بس هيج لقطات...
غير حجي عمتي سمر...
وشلون اتحمل رجال غير حسام يكربلي
النوب عدي والله احسه اخوية...
خالتي كالت يعقد عليج بس...
لكن اذكرت كلام زهراء...
خاف يوم احلى بعينه...
ميخالف يافرحة بس مو هيج تهجين
لا ماهجيت اريد ازور بلكت يرتاح بالي...
خلي ارتاح شوي...وارجع للطريق المبلط
اخذ سيارة ازور وارجع لبيتنا...
خطية خالتي مااجازيها هيج...
ربنا كريم للجاي...
جنت احجي وية نفسي وغفيت...
كعدت على صوت فوك راسي
_بوية...بوية...بنيتي اكعدي
فتحت عيني شفت رجال شايب واكف فوك راسي
ولازم احمد بيده...
عدلت كعدتي..وجريت بنتي لحظني
_بوية شمالج غافية بهالطريق
هذا الفريخ لج
جريت احمد منه...اي عمي
_چابوية غير ديرين بالج عليه...
جان لطيناه بالسيارة...
حظنت احمد ...يمة وليدي
_شنهي سالفتج....
وين هلج...انتي من هالديرة
باوعت عليه...لا عمي مو منة
_باين بوية...
هسة طريجج مين...
ماجاوبته...دنكت..
_بوية جاية لاحد هني
جاوبيني بنيتي...
_لا عمي...بنجرت السيارة...
جنة رايحين نزور...والظاهر نسوني
_العن اهاليهم....الي ماعدهم غيرة وعافوج...
بس بوية الطريق بعيد منة
_مو ظليت حايرة...
كلت اتمشى بلكت الكى بيت ارتاح بيه
_يابوية مايصير هجي...
هلج شلون عافوج انتي وفروخج وحدج
_ماعندي اهل عمي
سكت ...اني احجي مدنكة...
رفعت راسي شفته يتأملني بتفكير...
_كومي بوية...كولي ياالله...
_وين عمي
_تعاي يمنا ارتاحي ونوصلج وين ماتريدين
ماجد بوية رجع ليورة
التفت شفت بيك اب واكفة ويمها ولد يطلع ب١٧
سنة...
رجع ركب بالبدي...والحجي كاد احمد وفتح الباب الي يم السايق
_تعاي بوية اصعدي...
صعدت بدون تفكير...عقلي ماخذ استراحة مني
صعد احمد قبلي...
وصعد ساق...مشى مسافة بعيدة عن الشارع...
ونزل على طريق فرعي...
اشوف بنهايته بيت جبير مساحته بس طابق واحد
والزرع داير مدايره...
نزلت من نزل..
سكون المكان عبالك كلشي نايم
_تعاي بوية...
مشيت وراه...
_رسمية...رسمية...
اجت ابنية يطلع عمره بالتلاثينات
_ها بوية أمر
_بوية اخذي الحديثة وصبولهم غدة...
_صار بوية...تعاية خية هلا بيج
دخلتني بدير جبير ومرتب...مبين عليهم العز
كعدت شوية واجت مرة جبيرة بالعمر...
شفت بيها عمتي حسنة...
_هلا يمة...هلا بالجانة...
كمت لها واجت جرتني وبوستني عبالك تعرفني من زمان...
_ابو حييدر كال اجانة ضيوف...
كل الهلا بيج مناك لهنا
جانت ترك الكلمة من تحجي
_الله يخليج خالة...
اجت رسمية وياهة صينية اكل...
خلتها كدامي...وكامن اثنينهن...
_اكولي يمة وووكلي فروخج...
عافني يمكن حتى اخذ راحتي...
وكلت احمد وهدى..بس اني اكلت لكمتين...
واني اكول شبية انضربت بعقلي ...
رجعن رسمية جايبة جاي...
_تفضلي خية...
شو ماكليتي شي
_الحمد لله...ربي يزيدكم
_بالعافية ...بس والله خية الاكل مثل ماهو
اخافن ماعجبج اكلنا...
_لا والله عاشت ايدج ...بس لان تعبانة
_كومي يمة فرشي لخيتج بالغرفة خلي تمدد
صدك رحت وياهة للغرفة...
فرشتلي نيمت الجهال وحاولت انام...
البيت سنطة...الظاهر الكل نايم ...
من التفكير والليل كله مانايمة وتعب اليوم غفيت...
كعدت الدنيا مظلمة...
عزة فاتني الوكت...
جهالي يمكن تعبوا لان بعدهم نايمين...
دخلت رسمية...ها خية كعدتي...اجيتن اوعيج
عدنا موزين نومة المغربية...
_عفية خية ماكو سيارة ترجعني لبغداد
_ماعرفن...هاي اسألي بيها الحجي..
هو كال من تصحى خلها تجيني...
اجيت اوعي الجهال ماقبلت كالت عوفيهم اذا كعدوا اني اجيبهم لج...
اخذتني لغرفة مو نفس الدير...
بيها بوفية عليها نضدت فرش...
وبالكاع مفروش مدات حلوة ومرتبة...
جان الحجي نفسه كاعد ويمه الحجية
من شافني...تعاي بوية هلا بيج
استريحي ...
كعدت من جهة الحجية...
_رسمية استكان جاي من ايدج
راحت رسمية بقينا وحدنا ويانة الحجية
_هسة بوية احجيليج شنهو فلمج
دنكت واني اعدل عباتي...
_ماكو شي حجي...اريد ارجع لبغداد...
ولو زحمتكم..بس ياريت اكو سيارة
_چا مو كلتي ماعندج اهل...
ماجاوبته..
_لا تخافين بنيتي...
احجيلي الصدج...
زلمتج وينه
من كال هيج طكت الدمعة بعيني...
_عمي لو زلمتي موجود ماتبهذل هيج
_ليش بوية وين مشى عنج
_استشهد
_لا اله الا الله...
مايدوم بس وجه ربنا
ابوج ...امج...اخوج
_ابوية مات من صغيرة...وامي هم لحكته على السنة
واني جنت وحيدتهم
الحجية...لا حول ولا قوة الا بالله
الحجي...زين بوية وين ربيتي...
خوالج...عمامج
_خوال ماعندي امي جانت وحيدة اهلها هم
وعمامي...
جريت حسرة..
_ها بوية اشوفن تجرين حسرات
_عمي سالفتي سالفة...
وانتو هليتو بية ما اريد اجيبلكم المشاكل
_الله يبعدنا عن المشاكل...
بس يابنيتي ...احجيلنا عسى ربج نكدر نعينج بشي
_عمي احجيلكم...
ذكرتني بعمي الي رباني...
بس كون محد يعرف...
_كولي بوية...
_من مات ابوية ...امي زوجوها لحماه لان ماعدها احد وحتى ابقى كدام عينهم...
بس عمي جان كافر ياذيها وماتت من قهرها على ابوية...
اخذني عمي الجبير ورباني وية ولده...
لحد ماصار عمري ١٤ سنة...بسنة ٨٠ اجت تسفيرات
واخذوهم لان اعتبروهم تبعية...
بس مرت عمي هزمتني خافت علية...
ودتني يم بيت اختها ماقصرت وياي المرة..
لحد ماصار عمري ١٦...ازوجت ابنها..
وخلفت منه الولد وجنت حامل بالبنية من جابوه شهيد...بعد بيان وقف طلاق النار...
واني ماعندي احد...طلع عمي الي جان مزوج امي يريدني ارجع اعيش وياه...
خالتي ام رجلي كالت حتى نخلص منه نزوجج حماج
_چا بوية هذا عمج ليش ماسفروه هم
_هو الي بلغ على عمي الجبير وهو منتمي وياهم
_عبنه عار....
كملي بوية
_بقيت بين نارين...
لااني اكدر ازوج حماي وهو اخوية...
الشاهد ربي احسه اخوية...حتى حرام ازوجه واني هيج احسه
ولا اكدر اروح لعمي وادري بيه جابه الطمع...
ردت اروح ازور واريح نفسي...
وماعرف شنو جانت نيتي...
_والله بوية قصتج ولا هاي الي يطلعوه بهذا الي يسمونه تلفزيون...
بس هاي دنيا نسمع بيها اشكال...
وهسة شنهي نيتج
_والله عمي مادري...
اريد ارجع وكلت اخذ بيتي اكعد بيه...
بس ادري عمي ماراح يعوفني بحالي...
وخوفي من الاكبر منها...
ولا عندي احد اظل بظله لحد مايكبرون جهالي..
حجية...بنيتي...خطي عمتج گلبها تلكي جمر على فروخ وليدها
سكتت...
_شوفي بوية ...
اذا تريدين رايي...رجعي لبيت عيالج...
وفهميهم مايصح زواجج وانت ماراضية
_ماتقبل عمتي دكول اخذ الجهال منج وانطيج لعمج
كمت ابجي...
والله عمي ما اريد من الدنيا شي بس اربي هالايتام
اني ربيت يتيمة وماريد جهالي يتبهذلون
_لا حول ولا قوة الا بالله...
التفت على الحجية...شرايج ام حييدر
باعتلي وعينها مدمعة...
_يمة اني هم جابولي وليدي شهيد بسنة ٨٤
وماتهنى بزواجه...وعنده بس ناصر...
وجبرنا اخوه يزوج مرته...
مااكولن عمتج غلطانة...بس اكول حقها تريد فروخ وليدها يربون كدامها...
الحجي...اي حجية بس مو مالن تجبر البنية...
دكولج احسه اخيي...
شوفي بوية ...اعتبرينا هلج...
اذا مالج نية تردين...هنا اسويلج صريفة واكعدي بيها انتي وفروخج...
واحنة مانقصر وياج
من كال هيج عبالك فرج اجى من رب العالمين
_صدك عمي...
الله ينطيك يارب ويجبر بخاطرك
_ابقي هاليومين وية خياتج بين ماخلي الوليدات يبنوها لج...
وموضوعج مايطلع برة حيطان هالغريفة...
كام وعافني...بس حسيت الحجية مو هلكد راضية...
بقيت يومين يمهم...طبعا الصبح يطلعون الكل للزرع وتبقى بس رسمية والحجية...
رسمية عليها التنظيف والاكل والخبز...
ومن يرجعون الظهر ادخل الغرفة ...وما اشوف احد...
عدا رسمية شفت مرت حيدر وهية نفسها مرت الشهيد
ووحدة ثانية كالو مرت قاسم اخوهم ..
الي عرفته حيدر الجبير ..بس اخوهم الشهيد مزوج قبله...
ومن مستشهد عنده بس ناصر عمره سنة...رايدين اهلها ياخذوها ويزوجها...
ماقابلين عيالها ومزوجها حيدر وعنده منها تلث بنات ولد واحد صغير...
وعدا رسمية الي  مامزوجة عدهم خمس بنات مزوجات...
بعد اليوم الثالث...صاحني الحجي واخذني لبيت طين مسافة عن بيتهم...
من ادخل من الباب...يجيني دير...وحوله غرفة ومطبخ صغير وحمام...
وخطية فراشيلي الغرفة...ومخلي بالمطبخ ثلاجة وطباخ منضدي وشوية اغراض مطبخ...
_هاي بوية كافية عليج...
لحد ماربج يفرجها منه...
واذا احد سألج...كلنا يتيمة ورجلها شهيد وماعدهة احد...
لا تتحجين شي زيادة...
والزرعات حولج...شتريدين اطلعي اخذي...
_مشكور عمي...
ربي يطول بعمرك...
_الشكر لله بوية...
عافني وراح وجانت اول ليلة لي بالبيت...
بالبداية خفت من صار الليل...
البيت مابي كهرباء...شعلت فانوس ...
والبك اكل الجهال ولا بيه بنكة...
ثاني يوم اجت رسمية من الصبح جابتلي حليب...
_صبحج الله بالخير ام احمد
طبعا رسمية من اهل الله فطيرة وعلى نياتها
_هلا بخيتي...شو كاعدة من الصبح
_غير انا الكديش مالهم الي يركض طول اليوم
ضحكت على حجاياتها...
_لا حشاج انتي الخير والبركة...
بس رسمية اذا تريدين...ترة اني اعرف احلب واروب
واسوي جبن..وحتة اخبز اساعدج
_صدج خية ياريت...
خلي اكولن لابوية اخافن مايقبل...
كلت خلي اساعدهم على الاقل اطلع خبزتي...
وصدك ماكال شي...
اسبوع وجرولي كهرباء...
وجابولي بنكات ارضية...
وبديت اطلع من الصبح احلب الهوش وية رسمية
واساعدها بالتنظيف والطبخ ..
_خية انتي بنت بغداد من تعلمتي هالشغل...
_الزمن علمني اشكال
_چا شمالها هالعوبة مرت حييدر...
مابيها خير...
_شبيج خالة كورج من كورها
_والله خية...هية مو بنت خالي...
بس استحسفن بيها حييدر
لج غير ماشايفته ياطوله ياهيبته...
وهاي جنها ميت متيه كبره...
متت ضحك...
_الله يجازيج رسمية ضحكتيني واني من زمان ماضاحكة...
همزين مرت قاسم خلصانة من لسانج
_لا خية شجابها لمرت قاسم...
هاي نادرة حتة وية رجلها...
من ترجع تغسل وتبدل وتتهندم لزلمتها...
بس ذيج ام الوسخ...
نفس دشداشتها...
انة ماعرف خوية شلون له نفس بيها
_لا عاد مو لهدرجة...اشوفها دائما نظيفة
_دمشينا امشينا ام النظافة...
بيومها...شفتهم راجعين من الزرع...
جايبهم حيدر ...
اني شفت قاسم كم مرة ...
بس حيدر دائما اشوفه من بعيد  ..
لان اخلص شغلي وية رسمية وية رجعتهم
اعوفها اتصب غدة وارجع لبيتي وبعد ما اطلع
ومن كد ما مرت قاسم اسمها فاطمة...ورسمية
يحجون عن عصبيته...
وشكد يخافن من حجاياته...
اني من يمي اخاف...واحاول اتجنبه...
طبعا من اشوف احد اجر عبايتي اغطي جزء من وجهي...
سمعت رسمية دكول يأجرون فلح وياهم من يصير عدهم حوي...يعني يجنون المحصول...
كلت فرصة اطلع وياهم ...اخاف احتاج فلوس لشي لدكتور لا سامح الله...
الحجي دائما يسال اذا محتاجة شي..
والمخضر من الكاع...والخبز والحليب
يعني اكل مامحتاجة...
شفت الحجي...
_الله يساعدك عمي...
_هلا بوية...شلونج
جان متوضي وديكمل مسح رجليه
_عمي ردتك بشغلة
_كولي بوية...
مايردج الا لسانج
_عمي مو يطلعون وياكم بأجرة فلح
اريد اطلع وياهم
كلتهة واني مستحية
_ليش بوية مقصرين وياج
اذا محتاجة شي بس أمري
_لا عمي مابيك اي قصور...
بس اني ما اطيب نفسي للكعدة
_چا بوية ياكعدة وانتي تروكضين وية رسمية طول اليوم..
_عمي ربي ينطيك الصحة والعافية لا تردني
_استغفر الله...
ميخالف حظري نفسج باجر من الصبح
صدك كعدت وية صلاة الفجر...
صليت وريكت جهالي ورحت لبيت الحجي...
شفت حيدر بالباب...عرفته من طوله
جريت عبايتي غطيت جزء من وجهي..
فتت سلمت واريد ادخل من باب المطبخ
سمعت صوت خشن وحاد صاح...
_اوكفي...
...وللحكاية تكملة