شفاه ذابلة

خيارات صعبة

يسعد يومكم...البارت القادم ان شاء الله نودع قصة فرحة حتى نبدي بقصة هدى ...متابعة ممتعة
البارت السادس عشر
همس ليل
اصعب فترة مرت علينا جانت مابعد الفاتحة...
البيت حزين...وعدي يوميا يدخل لغرفة امه يقفل الباب ويظل يبجي...
حتى الجهال من نصب اكل يركضون لغرفتها يريدون يصيحوها...
ومرات مايقبلون يأكلون الا تجي كوة نقنعهم...
حقهم جانت خالتي كلها حنية على الجبير والصغير
حتى الجوارين حزنوا عليها....
رغم حصار بس ماقصرنا كل خميس نسويلها ثواب وينجمعن بناتها يمنا هم يشاركن...
ونتفاجأ اكو من جوارين هم يسولها حتى لو شغلات بسيطة...
صار الاربعين وبعده بمدة خلصت الثوابات بس احنة مابطلنا نسوي ...
بس البنات قللن جياتهن...
مر على وفاتها تلث اشهر...
وبدت زهراء ترجع لاسلوبها....
وخاصة بعد زيارات امها لها...
هاي الزيارات كثرت بالفترة الاخيرة...
وبعد كل جية لازم تسوي مشكلة وتحجج...
ساعة على الجهال من يتعاركون...
ساعة ماعاجبها الاكل والوضع...
اني اسكت...شبيدي..
بس خطية عدي جان يجي تعبان وتتلكاه...
مرة طلعت بالليل اريد اجيب مي للجهال وسمعت صوتهم...
_ترة مايصير هيج انتة مقصر علينا...
كل ما اكلك شي ادكلي ماعندي
_ادري يابنت الحلال مين اجيبلج...
حصار ودتشوفين الوضع شلونه...
_ليش مو مثل باقي النسوان اني...
ماريد البس اطلع اطب...حتى روحة لاهلي حصرة علية
_شبيج مو مثل باقي النسوان...
شو كاعدة بيت شكبره وشكده...
ومحد مانعج ترحين لاهلج
_بيت شكبره شكده بس مو لي ...
مامأخذة راحتي...
وبعدين شلون اروح لاهلي واعوفك انتة والهانم.
اني ماجنت اتنسط بس دانزل على الدرج وصوتها  واضح عبالك دتسمعني...
صوت عدي ناصي ماسمعت شجاوبها...
وصلت المطبخ مليت دولكة مي...
وبقيت واكفة بمكاني...
هسة لو عندي اخ ...عم بي خير...خال
جانت رحت يمه...
صعدت جان صوتهم ماكو...
بس الاسابيع الي بعدها شدت حيل...
ومرة كعدت لكيت عدي ينظف بغرفة خالتي ويطلع الاغراض...
_صباح الخير ابو صفاء...
جان كتلي اني انظفها
سمعت صوت زهراء من وراي
_خوب يكل لمرته ليش لج
شفته خزرهت...
_ام احمد راح ننزل هنا ونبقي الغرفة الفوك للولد
طبعا يقصد ولده
_براحتك خوية...
البيت بيتك
_طبعا براحتنا ...
ليش اكو احد رايد رأيج
_زهراء
_على كيفك عيني لا تحمى...
ماكلنا شي..
لو تخاف على زعل الخاتون
عفتهم ورحت للمطبخ...
ظلوا طول اليوم ينكلون غراض من فوك لجوة ومن جوة لفوك...
ماادخلت كلت خاف هم تسمعني حجاية...
كملت الغدة ونظفت المطبخ وصعدت جهالي للغرفة.
احمد نزل جوة يمهم راد ولد عمه واني بقيت اصفط الهدوم الي جبتهن من الحبل
سمعت عيطة جوة...
نزلت اركض شفت احمد واكع بالكاع يبجي وصفاء يمه يسكت بيه وعلاء خانس
زهراء تعيط...ماتلطم وتكعد يم امك فوك...
فوك ماعايفتنا بهوستنا ولا كالت خلي اساعدهم شوي...
عبالك خدم عد الخلفوها...
_شبيج زهراء...اجيت على ابني اشوف شبيه
_جري ابنج ردت اوكع من الدرج من وراه
_كوم ماما...
صفاء ...عمة رجله توجعه...
حاولت اوكفه كام يبجي زيادة...
_ماما رجلي توجعني...اباوع رجله وارمه شلون دافعته ماعرف...
ركضت جريت عبايتي ودزداني...وشلته..
امشي بالشارع سريع...
_عمة لا تخافين مابي شي
التفت شفت صفاء يركض وياي...
صفاء عمره تقريبا ١٢ سنة...
اخذت تاكسي للمستشفى ...
وهناك بهذلة من قسم لقسم يحولني واني ماعرف
خطية صفاء يركض كدامي ويسأل
طلعت رجله مفصوخة شدوها بنادج...
رجعت فورتات للبيت....والدنيا حارة وشايلته
وصلت بس فتحنا الباب..
تلكانة عدي..
_ها ام احمد...شبيه حمودي...
اخذه من ايدي ونيمه على القنفة...
اخذت كلاص مي بارد وكعدت يم ابني
_خلي ارتاح الدنيا تسمط برة
_والله خيتي ظليت حاير يامستشفى رحتوا..
حجيتله شسويت بالمستشفى...
بس صوت لزهراء ماكو...
هو بوقت الي صار الحادث..
عدي جان طالع يجيب بمسامير حتى يدك الكنتور...
_خليه هنا عود بالليل نصعده بالغرفة...
عافني وطلع...
_علاء وين امك لعد
_مو من اجى بابا اني كتله ماما وكعت احمد وكسرت رجله...
وهو لزمها كتله وطردها لاهلها
_خرب بغيرتك شكد فتان
ظل يضحك...
صفاء شخصيته مثل حسام رزن وعصبي
وعلاء مثل ابوه يشاقى ويضحك...
رغم هو بعد حسام تغير هواي...
مدري المسؤولية كبرته...
لليل سويت عشى وصحتهم...
من كعدوا حاجيت عدي
_خوية روح رجع ام صفاء...
ترة مامقصودة منها...
_لا...خلي تتأدب وتعقل
_لا خوية لخاطر جهالك...
_الله كريم..
بس مر اسبوع ومارجعها لحد ماظليت الح عليه
ودزيت الجهال وياه حتى تقتنع
بس رجع بدونها وضايج...
راسا دخل لغرفته...
استحيت اسأله...
صحت صفاء...واجى علاء يركض وياه
_صفاء...امك ليش مارجعت
_لا عمة ماقبلت...
وبيبتي ماقبلت ترجعها...
_ليش
سكت صفاء بس علاء ظل يحجي ويمتمت
_مو دكوله ما ارجع الا تطلع مرت اخوك..
وووو...بيبيتي دكول ماتستحي كاعدة يم رجال محرم
ووجدي كال عيب هالحجي...
بس كال لابوية كعدتهة مو صح يمكم
صفاء...جان يحاول يسكته...
اني جنت دايرة ظهري وميتة قهر...هسة وين اروح
يجوز عدها حق تخاف على رجلها...
بس اشو اني لابسة اسود من فوك لجوة...
واحاول ما احسسها بوجودي...
لو اريد ازوج ...صار اربع سنوات وشوية لحسام
بس مامتقبلة رجال ثاني...
_علاء...
جفلت على صوت عدي من صاح على ابنه...
_اطلعوا العبوا بالحديقة
تعاي ام احمد نحجي...
كعد عل الميز وكعدت مقابيله واني امسح ايدي بالخاولي...
_كول خوية
_امي الله يرحمها من رادت اعقد عليج جانت محسبة لهيج يوم...
وانتوا مو بس وصية امي...
الي بقى من ريحة اخوية...
واحسن حل حتى نخلص من دوخة الراس
اعقد عليج...
_لا خوية هذا مو حل..
انتة بهالشكل تأكد ظنونها...
وخاف النوب تعند وماتقبل ترجع
_لا ماتعند بالعكس تستسلم وترجع
وين تروح
_لا خوية لا...
طلع المؤجر من البيت واني اخذ الجهال واروح اكعد بيه
_شتحجين ام احمد...
ايجار البيت نافعنا...
والنوب بدل ماركض على بيت واحد اركض على بيتين
وهاي شوفة ايدج الاشياء بنار السودة
وحصار وكوة مدبريها...
لوما انتي مدبرة ومطلعة مسواك البيت من الحديقة
جان الله يعلم شلون دبرناهة
سكتت هم حقه...
_ماكو غير حل...
كام طلع...وفعلا ماعندي غير حل...
بس شيخلصها وية زهراء...
طلع ورجع بالليل ماتعشى راسا نام
ثاني يوم الصبح من طلع للمحل..
اندك الباب ...طلع علاء يفتحه...
صفاء يروح وية ابوه لان عطلة يساعده...
ما اشوف لا صوت زهراء وامها...
وينها ام الرياجيل...وينها...
اسبوع وقنعته يزوجها...
وكفت كبالهم...عيب هالحجي زهراء
_عيب تعرفين العيب...
منو الي شردت اربع اشهر مانعرف شلعبت وشسوت
_صدك ماتستحين...
_هية الي ماتستحي...لو الي صار اسبوع كاعدة وية رجال يحل عليها....
الله الي يعلم شسويتيله ويريد يزوجج
_خالة عيب انتة مرة جبيرة براج موت...
مو كان ماتعقلين بنتج...
_انتي الي تعلميني العيب يالفوا...
ماعرف مين مامين جابوج ولفوج يمهم...
تالي فكرتيهم....
_انتو الظاهر مو مال واحد يحجي وياكم...
خلي يجي رجلج ويتفاهم وياكم
اريد اطلع من المطبخ وماحس الا وحدة جرتني من ورة وكعتني ونامت علية...ووكعت دك لي ضرب
اريد بس ادفعها عني اخذتني غفل
اسمع صوت الجهال يبجون...واحمد يضرب بيها يريد
يسحبها...
امها واكفة على صفحة تتفرج
_يمة عوفيها هاي وحدة ك..لا توسخين ايدج
سمعنا صوت الباب انركع...
ودخل عدي يصيح...
المحل قريب والظاهر علاء رايح عليه جايبه
_ياجلبة...جرها من علية وضربها
وامها تصيح...تضرب بنتي علمود ك...بتك
بسيطة اذا ماخليت اخوتها يأدبوك...
_اريد اشوف ذولة زلمكم وينهم ..
وبنتح عندج اشبعي بيها...
وهية طالك..
شهكت زهراء...لك عدي اطلكني لخاطر هاي الدايحة
الي مين مامين جاية
ضربها راشيدي
_هاي تاج راسج وراس الخلفج
عفتهم يتعاركون وصعدت لغرفتي اسحب بنفسي...
اباوع على حلكي يجري دم...
وشعري مكفوش...رفعت ردن الدشداشة مطلعة الدم من ايدي بالعض...
باوعت لصورة حسام...
باوع ...شوف ...كله صوجك...متت وعفتني مبهذلة
اني وجهالي...
شوف ارفع الردانات واقربها على الصورة...
ليش ماكلت منو لها واعوفها...
تمددت على الجرباية تعبانة...
صعدوا الجهال يمي شبكوني يبجون...
حظنتهم...
احمد...ماما ليش هيج سوت عمة زهراء...
جريته لحظني...يمة ماعدنا احد واستضعفتني
اندك الباب...واجاني صوت عدي
_ام احمد...خوما بيج شي...
امسحيها بوجهي...
والله لحظة ماتبقى على ذمتي..
وهسة رايح لخالي اريد اشوف يقبل هيج يصير
ماجاوبته...كلت بكلبي قابل راح ينطي بنته
وهو بعده مازوجني وهيج سوت لو يصير صدك شسوي...
كمت جريت جنطة مال ملابس جان حسام ياخذ بيها ملابسه من يلتحق...
مليتها ملابس للجهال ...وخليت صندوك الذهب..
هو شبقى بيه...
بدلت لجهالي ونزلتهم...غسلت وجهي وضمدت شفتي..
بس ورمت...وعيني طكعة صارت
لبست عباتي...
_عمة وين رايحة...حاجاني صفاء
_بهالدنيا عمة الي تلوبح بية
_ابقي عمة حبابة هسة يجي ابوية
جريته بسته...تذكرني بعمك ابقى هيج
طلعت واني حايرة وين اروح...
بعدين اذكرت مريت على صايغ بمنطقتنا بعتله كم قطعة ذهب...
وركبت كوستر للكراج ومناك ركبت لكربلا...
صار سنة ماجاية ...كون اذكر...
بقيت طول الوكت عيني على الطريق خاف اتيه...
وجهالي بحظني...
اشوف العبرية كل شوية واحد يباوع علية...
تالي حجية يمي حاجتني...
_يمة شبيج
التفت عليها...مابية شي خالة
_لعد.وجهج ليش هيج وارم...
عينج زركة وشفتج وارمة
_ماكو شي...
اريد اخلص من سؤالها وانتبه على الطريق
فجاة شفت اللوحة...
نازل...نازل صحت بدون شعور...
وكف السايق...وخطية واحد الولد جر جنطتي نزلها واخذ الجهال نزلهم...
مشت السيارة واني واكفة بمكاني...
الدنيا ظهر...وجنطتي جبيرة وجهال وياي...
شلون امشي...
جريت اطفالي جوة ظل نخلة وكعدت بلكت تمر سيارة
_ماما عطشان وجوعان
_سودة علية ماما شبيدي...اصبر بلكت تفوت سيارة
من حركت كلبي طلعت بدون ما أخذ شي لجهالي
هدى جانت اتجر بعبايتي
_شبيج يمة
_مي ...عمية
هدى جان عمرها اربع سنوات ونص...
بقينا نتظر والجهال تعبوا حيل حتى اني من الكتلة والصبح شغل وطلعت ركض وطريق...
شفت سيارة من بعيد اجت اشرتله...
جان بيها رجال ومرة ...
صعدوني وذبوني على الشارع ...لازم امشي لحد بيت الحجي لان مسافة...
دانمشي وقريب مانوصل طلعت جلاب تنبح...
خافوا الجهال وجلبوا بية...
طلع احد على الصوت...
_تفضلوا منو.... اجى يتمشى...
جان حيدر...من وصل تفاجأ بينا
_شلونك خوية...
_هلا هلا بأم احمد شلونج
باوع علية...هاي شنو شماله وجهج
دنكت ودموعي ادير...
_تعاي خوية تفضلي
صاح على رسمية...
طلعت اتلكتني
_هلا بخيتي...هلا
دخلنا جوة وجابتلي مي...
_خية شلونج شخبارج...
رحتي وكطعتي فد كطعة...
_رسمية خالتي ماتت..
منو يجيبني بعد
_لا حول الله ...
خطي الله يرحمها...
شماله وجهج خية
تنهدت...اوكفي خلن اصب غدة اكيد بدون اجل لسة
راحت جابت اكل واجت...
_تغدي وسولفيلي
اني جنت ما اشتهي...بس حجيتلها الصار ودموعي تهل
_طاح حظها هالغبرة هاي...
ان شاء الله كسر ليدها...
وانتي خية شمالج فاهية...
اتحطج وتكتلج انتي لا يد ولا رجل ترفعين
_فاجأتني واريد اعدل روحي ما اكدر
الحجي والحجية نايمين
_اي يخية چا مثل حالي
_ضحكتي الله يجازيج خير
_ضحكي خية اضحكي شناخذ منها بس الكفن الابيض...
تنهدت ...صدك كلشي ماخذت منها
_لا خية لا تتحجين هجي...
كولي الحمد لله...انتي احسن من غيرج هواي
الله يحبج
_يحبني وهيج مشلوع گلبي
_استغفري ربج...
لوما يحبج ماهيألج دوم الي يساعدج...
وعندج جهال مثل الورود ...
_الحمد لله
طلع الحجي...
_ياهلا ياهلا...
يابوية والله دوم بتفكيري
كمت بست ايده وهو باس راسي
وبراه الحجية هم سلمت عليها
_رسمية يلا بوية جايج وخبزتج الحار
جانت واكفة يمي...لو ظالين نايمين مو اخيرلي
ضحكت...عافتني وراحت
_تعاي بوية ...
مبين سالفتج مو هينة من وجهج
حجيتله...ظل صافن علية
الحجية...انة عرفتها مريت حماج مو هينة من اجيناكم ..
_بوية صريفتج موجودة ...
وعين غطة وعين فراش...
ماشايليج على راسنا...
_هو عمي ظليت حايرة...
ادري ضوجتكم بس مالي مكان
_بوية لا تتحجين هجي...
الخير بالكاع مامنطيج راتب حنة
وهسع اخلن الولد يعدلوها ...
متروكة صارلها زمن
وفعلاح بقيت كم يوم عدلولي الصريفة...
وسحبولي خط من المولدة مال بيتهم
طبعا بالتسعينات المولدات دخلت للمحافظات
قبل ماتدخل لبغداد...
لان كهرباء ماعدهم بس بغداد جان بيها جدول للقطع
حولت بيها ورجعت اساعد رسمية...
قاسم باني على حدة ...
باقي بس حيدر وية اهله
رسمية دكول يعرف مرته مادبرها وحدها...
مر عشر ايام وجانت الدنيا الظهر...
اجت رسمية علية
_كومي خية...حماج جاي
فزيت هذا شجابه...
رحت وياهة...
كالت الحجي فرغ المضيف ادخلي يمهم
جانوا يحجون من دخلت سكتوا...
كام الحجي...بوية حماج يريد يسولف وياج
انتي اختاري
وخلي ابالج مجانج محفوظ هني
_شلونج ام احمد
_الله يسلمك خوية شلونك وشلون الجهال
_ليش هيج سويتي وخليتيهم يشمتون بية
_خوية لا تعاتبني...اني بعد ماعندي گلب يتحمل
رجع مريتك وعيشوا حياتكم...
_زهراء راح اطلكها
ماخليته يكمل..
_لا خوية هاي مو بس زوجتك وام ولدك...
هاي حبيبتك وعشرة عمر وكفت وياك بالشدة
مالازم تبيعها
_شنو الحل...تعبتوني...قابل اعوفج وجهال اخوية
_شوف خوية ...
اني هنا وسط اهلي...
لاتخاف علية...
جهال اخوك كل مدة تعال شوفهم
_شتدحجين...تدرين شصار بحالي واني ادور عليكم
بعدين اذكرت بيت الحجي...
شلون تريدين اعوف لحمنا عد الغربة
_اني رجعة للبيت ما ارجع...
اما تفرغ بيتنا واكعد بيه...
لو تخليني هنا على الاقل ماكو قال وقلت
شكد حاول يقنعني واني قافلة...
عاد رجع وبقيت يمهم...
يوم جنت طالعة من الصبح اروح اعاون رسمية
ولاكاني حيدر
_صبحج الله بالخير ام احمد
_صباح الخيرات خوية
_شلون صار وجهج
دنكت...الحمد لله زين
_دنكسر ايد الي تنمد عليج
_رحمة الله والديك...من رخصتك
مرت الايام...ودائما اشوف حيدر الصبح...
بس يصبح ويطلعون...
مرة تاخرت بالكعدة...رحت لكيته واكف يم سيارته
بس وصلت صبحت...
راسا ركب السيارة وراح...
كمت احس الموضوع مقصود...
اخذتلي اسبوع اتاخر يلا اروح لحد ما اسمع صوت السيارات تحركت...
عدي رجع مرة ثانية اجى...
من كالولي واجيت شفت حيدر واكف اباب المطبخ..
من ردت افوت حاجاني
_لا تقبلين ترجعين..ابقي هني ام احمد
عافني وراح...
كلت هاي مين طلعتلي النوب
دخلت سلمت على عدي...
وهم بقى يقنعني وكال اجيب زهراء تعتذر...
واني ماقبلت كتله مرتاحة هنا...
يوم الصبح رحت جبت الحليب وبرجعتي لاكاني حيدر
سلمت وردت اتعداه...
_اوجفي ام احمد عند.حجاية وياج
_خير خوية كول
_اشوفنج هالايام تتاخرين يلا تجين الصبح
سكتت ماعندي جواب
_يابنت الحلال يومي مايطيب غير من اصبحن بوجهج الكمر
_خوية ابو حسين مايصح هالكلام
_چابوية غير گلبي ملوع...
واريدنج بالحلال...
بس اخافن تفهمي الموضوع الغلط
ودكولي وية نفسج جيفن ظروفي هجي استغلها
_حشاك...مو انتو الي تستغلون احد
بس اني مامفكرة بالزواج مرة ثانية
_ليش...هالوجه چنه كمر يبقى بالحزن طول عمره
استحيت وماكدرت اجاوبه
ترخصت ومشيت...
مرت الايام...وماحاول بعدها ابد...بس بقى كل صبح ينتظر اجي ويصبح يلا يطلع...
قربت المدارس واني طلبت من عدي ينقل احمد...
وجان لازم اخذ قبول من المدرسة الي يمنا..
وحيدر جاب قبول من التربية الي بالمحافظة...
ومن المدرسة ...
ودزهن بيد الحجي من نزل لبغداد حتى عدي يكمل...
وتفاجات من راح جاب ملابس مدرسة لبناته
جايب ملابس لاحمد وجنطة...
ومن دزيت الفلوس بيد مرته رجعهن...
وبقى كم يوم ماينتظر الصبح...
عرفته زعلان...
بس غلست...مو بحال حب اني...
يوم اتفاجات بالحجي...يكولي واحد من فلح جايني خطابة...
كتله عمي ما اريد ازوج...
كام هذا الفلاح يشيع علية حجي موزين
على انو اني شاردة من اهلي....
لان لازميني وية احد...
من سمع حيدر راحله ومأدبه وطارده من المنطقة...
هسة اني وين ماروح بكبوري عظام...
لحد يوم جان حنة ابن عمهم...
وبيت عمهم قريب...
رسمية لحت تعاي ويانة...
رحت من الضوجة...
وصار وكت الجوبي...
طلعن للسطح يباوعن للجوبي...
اني بقيت وية الحجية ورسمية...
شافتني وحدة من اقاربهم وسالت الحجية علية...
ثاني يوم اشوف رسمية ماكالت تعاي ويانة...
كلت يجوز ملتهين بالعرس ونست...
المغرب سمعت صوت بالباب...
لبست عبايتي وطلعت اشوف منو...
وللحكاية بقية....