شفاه ذابلة

لقاء اخر

مساؤكم هنى...لا تنسوون الدعاء لاهلنا بالبصرة بالفرج والسلامة ويحقن دماء الشباب....متابعة ممتعة
البارت الخامس والعشرون
همس ليل
دخلت للادارة شفت بس المديرة واستاذ عباس
استغربت...
_السلام عليكم...
ست طالبتني
_وعليكم السلام...
تفضلي ست هدى عدنا موضوع وياج
كعدت جان استاذ عباس مقابيلي والمديرة ورة الميز كاعدة...
بقى نظري للمديرة رغم احسه يباوع علية ويراقبني
_ست هدى هو مو تدخل مني بشؤونج الخاصة
بس استاذ عباس ماحب يسبب احراج لج كدام المدرسات...
واضافة ندري بعض النفسيات الضعيفة شتأول
لذلك  اجة وسطني حتى يكون الموقف عادي
_خير ست صار شي
عباس...ست هدى ...احمد رجعلي خبر ...
بس حبيت اعرف السبب خاف علمود الحجي او لان انتي منفصلة
ترة اني ماعندي مشكلة ولا اهلي هم
سكتت واني اباوع عليه مرة ومرة على المديرة
حسيت بالاحراج والقهر ...
يعني مو بس قهر ما خلف...لا اضيف احراج زوجي طلكني لان ما اخلف...اكيد هيج راح يفسروها
المديرة...ست صح من حقج تقبلين وترفضين..
بس اكيد عندج سبب للرفض
دنكت...استاذ عباس...اكو هواي هنا مدرسات حبابات
يفيدنك اكثر
عباس.....هو كل واحد يعرف شنو يناسبه
ما اريد اضغط عليج...بس حبيت اعرف السبب
يجوز شي نكدر نتجاوزه
هدى...جنت اتمنى اكدر اكول بس السبب شخصي
وصدك ماله علاقة بشخصك...
بالعكس استاذ عباس ...
عباس...ها هية براحتج ست ونبقى زملاء عمل
ترخصت وطلعت...
من وصلت غرفة المعلمات...
سمعت لمى تحاجي مدرسة قبل يوم هية وزوجها وصلوني ...اول مرة ردت ادخل ماعبالي الحجي علية
لمى...ماتخافين على رجلج
ام علي...وليش اخاف قابل تختفه
لمى...طبعا...شمعرفج بنسوان هالوكت...مطلكة وحلوة
ام علي...لا ترة خوش بنية
ماكملت...طلعت للساحة...
اباوع على البنات...اكول كم وحدة راح تكمل ولو تبطا ويزوجوها...
كم وحدة حظها عاثر مثلي...
بس الخلل بينا مو بالمجتمع...
احنة النسوان مانكعد راحة...ننتقد المطلقة والارملة
ومانخاف يوم نصير بمكانها...
لو المرأة ترحم المرأة وتكف لسانها...
ينصلح وضع المرة...لا البنية خلصانة ولا المزوجة خلصانة....
استاذ عباس هم كف عني ...وكام يكتفي بالسلام
بس حسيته بزعل...مر يمكن شهر وسمعناه خاطب
بس مو من المدرسة...
بيومها لمى رادت تنفجر...
من ام علي وزعت جكليت خطوبته...
لمى...طبعا يروح يخطب من برة...
اذا كم وحدة ماتخاف ربها شوهت سمعة المدرسات
رباب...هية الزبنة لو بنص ...استغفر الله...هم تبين زينة ماتحتاج
لمى...لا حبيبتي..اكيد من يشوف هيج يكولك لعد كلهن نفس الشي...
رباب...ست...الي تلمحين لها ترة راح خطبها وهية الي ماقبلت...
لو مثل مادكولين ليش دك بابها...
جان دك باب غيرها ...
ظلت مبهوتة لمى...جذب
رباب...روحي اسألي المديرة...
هذا النقاش اني ماحاضرته بس رباب نقلته لي
هدى...جان ماكلتيها...عيب من استاذ عباس
هسة ايكول تتباهى برفضي
رباب...شمالج خايبة....مو احسن ماتشيع عليج
وهو ترة يوصله الحجي ويدري شتحجي...
بعدها بيومين لاكيته بالممر...
_استاذ عباس....
وكف انتظرني
_مبروك على الخطوبة...بالرفاه والبنين
_الله يبارك بيج...
بس ست ياريت ماتمشين وتتباهين بالموضوع
_ياموضوع
_خطوبتي لحضرتج...جنت اصورج اكبر من هالشي
صفنت عليه شجاوبه...ماردت اخذ وانطي وياه
ولا مهم شيفكر...بقت عليه
_مشكور استاذ
عفته ومشيت...رحت لرباب
_مو كتلج راح يوصله الحجي
_قصدج استاذ عباس ...شكالج
حجيتلها
_خطية هذا محروك كلبه وهيج يحجي
ليش ماكلتيله الصار
_هو شنو الصار...واني جنت ماحاضرة شي
_شكد تتجنبين المشاكل...
_حبيبتي اني عبارة عن كتلة من المشاكل حتى من اعثر اعثر بمشكلة مو بحجارة
ضحكت...شلون حظ هذا
_حظ فكر حشاج
كم يوم ودز عباس الفراشة علية
رحت لكيته كاعد وحده بغرفة المعاونين
_استاذ داز علية
_اي ست ممكن دقايق من وقتج ...استريحي
_عندي حصة بعد دقايق...
فماكو داعي للكعدة
_حقج...بس ردت اعتذر على حجايتي
ست رباب فهمتني الصار...
واتمنى ماديرين بال للحجي
_عادي استاذ كل واحد وحر بتفكيره...
اني مو مسؤولة عن افكار الاخرين...
من رخصتك
عفته وطلعت وكان هذا اخر موقف لنا سوة
لان بعدها هو قدم نقل لغير مدرسة...
وجنت اتمنى يجي احد بمكانه يكون شايب
وفعلا  صعدت ام علي...
وجانت تعرف نفاق كل وحدة ...
وية نهاية السنة انقلت لمى لان خلصت مدة الارياف ورجعت لمركز المدينة...
بدت العطلة وبدة الملل وياهة...
اجاني احمد كال علاء خابرني عمي مدخلي مستشفى...
ويريد يشوفكم....امي كالت لازم ترحون هو ماكطع وياكم وبقى متواصل...
رحنا اني واحمد وامي ....
من وصلنا المستشفى وبين ماسأل احمد على الغرفة
حسيت اختنكت واني اذكر نومتي بيها...
وفوك الخنكة ...التوتر الي لازمني...
شلون راح اشوفه...شحجي وياه...
عادي لو شلون...
وصلنا للغرفة...دك الباب احمد ودخلنا...
جريت نفس جان بس علاء
راسا كام اتلكانة...باس راس امي وسلم على احمد
_هلا بالكمر...وينج يابة شدعوة
_شلونك علاء ...وهبة شلونها
اتقدمت على عمي بعد ما سلمت امي واحمد
بست راسه وانقهرت من شفت وجه اصفر
_شلونك عمو
_هلا بعد عمج...ليش هيج عمي لا تسألون لا تكولون
_مو اخابرك دائما
_هو التلفون مثل الشوف ياعمي
علاء...عمي هو الكمر دومه بالعالي...
ضحكت امي...ماتبطل سوالفك...تذكر عدي شلون جنت تتلكاني...
عدي...اي ام احمد وحسام جان يتخبل الله يرحمه
...اوووف ذاك وكت الخير...راح وية روحة الاحباب
شلون مايتعب الگلب ويومية دافن عزيز
دمعت عينه
علاء...يابة على كيفك صحتك...
يم السرير مالته سرير ثاني كعد امي واحمد...
وعلى صفحة تلث كراسي....كعدت على كرسي وخليت جنطتي وجف يدي مستندة عليه على الكرسي الثاني...
جانوا يحجون شلون عمي ارتفع ضغطه فجاة وصارت عنده جلطة...
انفتح الباب ودخل صفاء سلم...كام احمد سالمه
وهو دنك باس راس امي...
والتفت علية...شلونج بنت عمي
هدى ...الحمد لله...
رجع علاء يكمل حجيه...وصفاء اجى كعد على الكرسي الثالث...بينا الكرسي الي عليه الجنطة
وقبل ماارفع ايدي...لزمه وضغط عليها حيل...
همس بصوت مشتاك وحق عيونج
وترك ايدي...علاء جان ظهره لنا...يعني مايشوفونة
خليت ايدي بحظني...واحس گلبي يريد يطلع من مكانه...
مارفعت راسي له...بقت عيني مركزة على عمي
الي يغمض مرة ومرة يفتح...
ماطولنا  ردنا نطلع علاء جلب تعالوا باتوا...
اعتذر احمد...كاله اوصلهم وباجر اجي ابات وية عمي
اجيت اسلم على عمي...
واحمد وامي طلعوا كدامي...
_هدى عمي مو كافي ارجعي لبيتج...
خليني ارتاح
_صحة وعافية ان شاء الله
_يعني ماجاوبتيني...
_عمي مو وكتها...اهم شي اتكوم بالسلامة..
بست راسه...شفت صفاء متجتف واكف قريب
من ردت افوت...
_ماتريدين تريحين عمج...
_صفاء سد الموضوع..
ردت افوت مانطاني مجال
رفعت عيني له..
_انطيني وعد اتفكرين...
بعد عندي امل اذكريلي طيب بعشرتنا...
_ماكلت عشرتنا مرة...
بس طرقنا تفاركت
_نخليها تلتقي...
هدى ورب السما حبج بگلبي ما نقص
صفنت بوجهه ...وعيونه الي تحوم على وجهي
_داينتظروني ...لا يرجع احمد
ابتعد عن طريقي...وبنفس اللحظة اجى احمد
_يلا هدى وينج
طلعت ومن مشينا
_شراد صفاء منج
_يريد ارجع
_وشكلتي
_شي راح وانتهى...صعب تعيد نفس التجربة مرتين
سلمنا على علاء ورجعنا...
بعدها بيومين طلع عمي...
وراح احمد وعبير وابنهم زاروه بالبيت
احمد كال البيت صغير مو مثل قبل...
هبة من اتصلت كالت صفاء يريد.رقمج
_لا تنطيه...مو يومية اغير رقم من وراج
_هدى...انطي فرصة...ترة بعده يحبج
_ماترهم بعد ...الوكت كافي ينسيه
دزلي طلب صداقة على الفيس
رفصته...
وغلقت الفيس فترة...
اختنكت ليش مايعوفني بحالي...
ازوج وخلف واستقر...شيريد بعد
جنت يمه ماقدر ولا صان..ومن ابتعدت كام يدورني
طلعت للحديقة الدنيا المغرب...
وظليت اتمشى بأتجاه البستان...
وكفت ابدايته واباوع عليه...
اذكرت يوم شردت من ناصر ركضت داخل هالبستان
ماعرف لوين وصلت...
البستان جان مشابك اكثر من هسة....
اكو هواي اشجار ماتت وخف هواي...
شلون ركضت بذاك الليل...ماخفت
يمكن الخوف الي بداخلي من البشر
اكبر من خوفي لا يطلع علية شي من البستان
تمشيت شوية بدايته...وكفت...
وين رايحة...راح تظلم الدنيا...
بقيت اتأمل بيه...اكيد بستان الولد الوصلني
بنهاية بستان عمي...
تنهدت وية ما انداريت ...
اتفاجأت بشخص وراي...
صحت من الخوف...
_على كيفج ...شجابج هنا بهالوكت
_ناصر...جفلتني ...شبيك
انتة شجابك هنا...
جنت جاي مناك ..اشر على جهة النخل...
وشفت خيال شخص...اجيت اشوف منو
_زين شفت...وخر خلي ارجع..
_اتمشى وياج للبيت...اريد احاجيج
طبعا اني مااطلع بدون حجاب خارج البيت
ماحاجيته...مشيت
_هدى ..اعتذرت منج ...
شنو الي يرضيج
_ما اعتقد يرضيني شي...
عوفني بحالي كافي الي صار
_حسبالج بس انتي تأذيتي
اعرفن عليج الموضوع اصعب
أنة هم تأثرت...انبذت من الكل
عمي ...واحمد الي جان صويحبي
ومريت بايام صعبة وانة اتخيل شلون شردتي
وشسويتي...
ليالي وايام الومن بنفسي...
جنت اكولن جانت جدامي واشوفنهة...
وهسة وين صفى بيها الدهر...
جنت اخافن اسأل وين كاعج...
وين صفيتي...لحد ماعرفت من رضيعاتي(اخواتي)
عقدولج مهر على ابن عمج...
جان يومها موتي...
وكفت والتفت عليه...
وهو هم وكف وعينه للبيت مو علية
_ليش ناصر...ضيعتني بتصرف طايش...
_لا تسألين ليش...
لحظة ضعف...جنت اهواج...
شاب طايش ماكدرت اسيطر على مشاعري
_وهسة ضميرك مأنبك...
وتريد تريحه بأعتذار...
تروح لعائلتك وانتة مطمن...
واني يطبني مرض...
لا ناصر...كلشي اسامح الا الي سويته انتة بحقي
عفته ورجعت للبيت...
من شوكت جنت حقودة...
بس كافي اقدم تنازلات وينداس علية...
شنو ذنبي سوء طالع لازمني...
يأذوني ويطلعون يحبون..
شلون فاهمين الحب ما ادري...
بعدها باسبوع رحنا لبغداد...
على دكتورة دلونا عليها...حجزنا فندق بالكاظم...
امي زورتني الصبح والعصر رحت للدكتورة...
من دخلنا وشرحت لها الحالة
_ماما هاي فحوصاتج قديمة...
اريد تحاليل وسونار وبعدين نشوف...
طلعنا سوينا التحاليل والسونار بس مالحكنا على الدكتورة...
رجعنا للفندق...جان كرار ويانة...
وثاني يوم رحنا لها...
من شافتها...
_باعي بنتي...هو اصابتج جانت بالراس مالها علاقة بالرحم...
وضربتج بالسيارة هية مأذية الرحم بس مو بشكل قوي
بس الظاهر من مسويلج النتظيف بعد الاجهاض
مسببين ضرر بجدار الرحم...
انتي ماراجعني بعد الحادث
_دكتورة الي سوتلي نفسها راجعت...
ورحت لدكتورتين غيرها...
هسة شنو دكتورة مايصير عندي اطفال
_والله بنتي راح انطيج علاج حتى ارتب وضعج
والاطفال مسالة بيد رب العالمين
_دكتورة رجاء اريد جواب اكيد
_جوابي لج...حتى اذا صار عندج وهذا امل ضعيف
راح يكون ضعيف لو يكمل الحمل لو لا
طلعت منها واني اكطع الامل اول مرة ما ابجي
يجوز شبعت من القهر...
رجعنا للبيت...ومن عرف احمد
_انوديها لاربيل نشوف هناك دكتور...
لو لبنان نروح ..
_ماكو داعي خيي...هاي نصيبي خلص ارضى واسكت
الايام جانت تمر علية مشابهة مابيها شي جديد
عبير طلعت حامل ..وبنفس الوقت خطبوا لاخوها
وعزمونا بالمهر....رحنا جنت لابسة فستان ماروني طويل على الجسم...رداناته كبس...
وحجاب مشجر ...احنة رحنا لبيت العروسة راسا
وهناك نزعت حجابي وفتحت شعري...
تونست على هوساتهم ودبجهم...
ومن كالوا راح يدخل الولد يلبس الذهب...
لبست حجابي....
دخل لابس سترة وبنطلون نيلي وقميص ابيض
بس طول ماهو كاعد اني اباوع عليه...
يارب وين شايفته...
مايشبه هند وعبير...لعد وين شايفته...
المشكلة اني اهل عبير
اعرف اخواتها  امها وابوها بس
من يجون علينا...بس اخوتها ابد ماشايفتهم
ماصاير شي ونتقابل
وحتى لو يصير...مضيف الزلم وحد...
والمضيف ابيت ام حسين...
بس ماكدرت اميز...
من رجعنا ام عبير  اصرت الا نجي نتعشى يمهم...
رحنا وياهم...ومثل ماهم من يجون يمنا يكوفون بالمطبخ...
اني هم رحت وياهم...ظلن البنات يسولفن ويضحكن
انفتح باب المطبخ وسمعت صوت جمدني بمكاني...
_عبير خوية..اخذي حسوني لامه
_صار خوية....
_حضروا الجاي بسرعة الناس خلصوا عشى
_اي خوية...
جان ظهري للباب اصب جاي...
وغيري عبير وهند واختهم ثالثة حوراء ونسوان اخوانهم اثنين
بدوا يجيبون الصواني الاكل...
كلت ما ينتبه...بلكت احد ثاني يجي ياخذ الجاي
عبير...هدي جيبي صينية الجاي...
شفتها يم الباب...جبت الصينية...
بس وخرت على صفحة..انطيها لابو حسن
_جيبي خوية...
اهتزت الصينية بيدي من سمعت صوته...
هو جان مدنك بس من اهتزت الصينية...
رفع عينه...وبلحظتها فتحها على وسعها...
ظليت لازمة الصينية وهو صافن بوجهي...
_تفضل خوية...
كوة طلع صوتي...مد ايده اخذه وعينه علية
من راح ...
عبير...شماله ابو حسن
_يجوز استحى لان عباله وحدة من بناتكم
_يجوز...هذا اخوية الوسطاني
كلت بگلبي...هذا هم حظي...شلون يصير صخام الحظ
رحت كعدت يم امي وماتحركت من يمها...
اكول يشبه منو العريس...
زين هسة شلون ...ممكن يحجي لاخواته...
ما انفضحت بذاك الوقت هسة راح انفضح
يارب سترك...
مامعقولة يذكرني...ما اصور
اصلا من الصوت ميزته لان صوته اجش وبي بحة
اجت عبير كعدت بصفي..
_علي سأل عليج
_يا علي...
_اخوية ابو حسن...كال منو هاي البنية الي انطتني الجاي...كتله حماتي
سكتت ...شجاوبها ...
من طلعنا شفته واكف وية احمد لفيت عباتي
وراسا صعدت بالسيارة بس شفته اتقدم وية احمد وعينه على السيارة...
دنكت واني ايدي على گلبي بس لا ميزني
....وللحكاية بقية