شفاه ذابلة

أمان العم

يسعد مساؤكم...اكو بنات من قروا البارت السابق كالوا قارين هاي القصة مدري وين...
عيوني قريتوها بالبارت الاول بس من جانب الولد وهالمرة بينت جانب هدى من شردت...
الشغلة الثانية صاحبة القصة انطتني بس خطوط عريضة فماركزت على الاعمار لذلك صار فرق عندي
ومواليدهم صفاء مواليد بداية ٨١
هدى بداية ٨٩
احمد ٨٥
علاء ٨٢
....متابعة ممتعة
البارت التاسع عشر
همس ليل
دكيت الباب بكل قوتي...
سمعت صوت عمي...
_منو بالباب
_اني هدى عمو افتحلي الباب
_خيرج عمو شجابج بهالليل...
جان يحجي واسمع صوته يقترب...
فتح الباب...واول ماشفته ذبيت نفسي بحضنه
شبكني وهو يسأل بخوف
_عمو امج بيها شي ...
لو اخيج دحجي...
اجى صوت من وراه...
_منو يابة
_بنت عمك هدى
اقترب الصوت...خير هدى شبيج من جابج
اني جنت ميتة بجي وماكدر اجاوب
_يابة خلي ندخلها جوة منة الناس...
جرني عمي للمطبخ....كعدني على الميز
وصفاء جابلي مي...
_اشربي هدى واهدي فهمينة...
شربت مي ...
_هسة عمو بس كليلي امج بيها شي
هزيت راسي لا
_احمد اخوج بي شي ...
هم هزيت راسي...
جان عمي مقابيلي كاعد...
وصفاء مجتف ايدي ومرتجي على الكاونتر...
فجأة حجى...منو راد يعتدي عليج
من سمعته طكيت بجي...
عمي تعصب وكام على حيله شنو
صفاء...اصبر بابا خلي نفهم...
هدى اهدي واحجي الصار...لان هسة ورب العز نكلبها على راسهم...
من كال هيج خفت...حجيت الصار ودموعي تجري
عمي خلى ايده على راسه...
صفاء...يعني ماكدرلج
هزيت راسي بلا...بس خاف مات
صفاء ...يطبه مرض هالعار
عدي...اني لي حجي وية حيدر وامج
بابا صفاء الحجي خلي بينا...حتى امك وعلاء لا تكول لهم...
انتي مالج.رجعة لهناك بعد
هدى...واذا سألت عمتي زهراء الصبح شوكت اجيت...
عدي...ام صفاء ابيت اهلها مهر بنت اخوها وباتت هناك...
بابا صفاء اخذ بنت عمك الصبح واشتريلها ملابس قبل ماتجي امك...
صفاء...يابة خلي نخابر امها نشوف شصار
يروح يأولون عليها
عمي جر الموبايل ودك على عمي حيدر...
الظاهر انفتح خط لان عمي سلم
_ها ام احمد...الموبايل يمج
سكت...رجع جاوب...هدى يمي...اي اجت...
ماعرف شلون وصلت بس حجت الي الصار
شلون الولد...
خوش...لنا حساب بعدين
جنت اتابع كلامه واريد بس اعرف جواب امي
هاج وياج بنتج...
اخذت الموبايل ارجف
_ها ماما..
_لج ليش ماما نهزمتي ليش ما اجيتي علية
_خفت ماما من شفت دمه ...كلت مات وشيخلصني
منو يصدكني
_لا مامات هالعار...ابقي يم عمج وباجر نجيج
يلا ماما دير بالج على نفسج
سديته...
صفاء...شنو الي صاير بابا
عدي...امها من متأخرة ...رايحة للبيت وشايفته
وراسا صايحة ابو حسين...
ورجله كايللها لا تحجين وماخذه للمستشفى هو واحمد
صفاء...لعد الموبايل ليش يم عمتي
عدي...ابو حسين مخليه حتى يخابروها لان احمد طالع يدور على هدى
كومي بابا نامي والله كريم للصبح...
وداني لغرفتهم...
نزعت فستاني الجوة وبقيت بالدشداشة الي انطانياه الولد...
للصبح ماغفت عيني افكر شراح يصير...
الصبح دخل عمي...كال بس يطلع علاء يجيب امه ..
اطلعي...
غفيت يمكن ساعة...كعدت على صوت عمي...
عدي...عمو هدى كومي حتى تشترين ملابس
هدى...عمو خلي يجيبلي صفاء اي شي
عدي...دكومي انطي قياسج...
انطيت لصفاء قياسي...واباوع عليه مايباوعلي من يحجي...
راح واني سويت ريوك لعمي...
عدي...تعاي عمو وياي اتريكي...
لا تخافين ربج يفرجها...
جنت احس عمي مهموم...
_اسفة عمو جبتلك دوخة الراس
_مو عيب عمو هالحجي...
بس يابة اني احس قصرت وياكم
جان المفروض اخليكم جوة جناحي...
بس شسوي للنسوان...
صفاء ما تاخر جابلي دشداشتين وجبة وحجاب
وبراه بشوية وصل علاء وامه
علاء...لك هاي منو يمنا...لو ادري ولا اروح اجيب العجيز مالتنا
ضربته امه...وتقربت تبوسني...
_هلا عمة شلونج
منو جابج
_ها ...عمي...
عيني جانت على عمي عدي
خلصت اليوم بين شقة علاء واسئلة مرت عمي الي ماتخلص...
بس جنت اجاوب وفكري مشغول واقل صوت افز
شنو الصار...مات لا...شراح يكول عمي حيدر
واحمد اخوية شيسوي...
لو امي شراح يسوون بيها اذ عرفن...
اندك الجرس المغرب...طلع علاء يفتح الباب
جنة كاعدين كلنا بالهول...
طب علاء هو يكول...
_يابة عمتي ام احمد وعمي حيدر اجوي دخلتهم بالصالة...
عمي راسا كمز...واني ...
دخلت مرت عمي والولد يسلمون...
واني واكفة بالباب اقدم رجل وأخر رجل
اباوع لامي شلون مبين عليها التعب...
دخلت سلمت...امي راسا وكفت..
عدي...ام صفاء جاي وخلونة وحدنا..
طلعت واشوف نظرات استفهام بعينها...
شفت امي فتحت ايديها...
ذبيت نفسي بحظنها واني اشهك وابجي
_ليش يمة ليش نهزمتي بهالليل...
لوصايرلج شي شسوي...
غير تجين علية
_خفت ماما خفت
عدي...هية هاي الامانة ام احمد
جرتني كعدتني بصفها جانت كاعدة يم عمي حيدر
ماجاوبت عمي...تعودت من رجلها موجود هو يجاوب عنه
حيدر...حقكم ابو صفاء
..بس ترة الامانة مصيونة طول عمرها...
عدي...والي سواه ابن اخوك
حيدر ...عار حشاكم  مأخذة تربية...
وانة اربي لكم من جديد...
عدي...بعد مايفيد الحجي...
سمعة البنية راحت
حيدر...لا بوية محد درة...
انة نقلته وية احمد للمستشفى...
وخلينة الموضوع صنطة..
وانة بس يطلع من المستشفى اخاي يصلح خطأه
عدي...شلون بلة
حيدر...نزوجهم
اني فزيت...امي جلبت بيدي يعني لا تحجين
عدي..وتريد انطي بنت اخوية الوحيدة...
هالعار...مصانها وهية بحماك...
تريد يصونها وهية على ذمته...
لا عمي بنتنا عدنا ماترجع وياكم...
ولوما العيبة واخاف يمسها الحجي...
جان لي تصرف ثاني
جنت احس عمي حيدر كاعد على اعصابه...
يريد يحجي بس موقفه ضعيف
حيدر...ابو صفاء انتة هم عندك شباب...
على الاقل هناك كدام عين امها
عدي...وشنفعتها امها....
عموما نهاية الاسبوع صفاء يعقد عليها..وبس تخلص سادس يزوجون...
كلنا تفاجانا...باوعت لصفاء فتح عينه وكامت اطلع شرار بس مارد ابوه..
حيدر....بوية ليش تجبر الولد...
ناصر اكثر من مرة خطبها واني ارده
عدي...ابن عمها اولى بيها...وماكو جبر
سكت عمي حيدر لان دخلت مرت عمي...
شرب جايه...
يلا ام احمد ورانا طريق..
اني جلبت بيد امي...
_من رخصتك ابو احمد...اليوم خلني هنا ابات
وباجر الصبح دز احمد
حيدر...براحتج...
طلع وصله عمي للباب...وصفاء عاف الغرفة وطلع
شاورتني امي عمتج تعرف كتلها لا...
عاد بقينا لليل سوالف عادية وعشى..
واستأذنة من وكت صعدنا للغرفة...
عمي بقى هاي الغرفة لنا من نجي...فوك تلث غرف نوم وحدة لصفاء وحدة لعلاء وهاي بقت لنا
عماتي من ماتت بيبتي بعدها بفترة تنازلن عن حصصهن بالبيت لان بقى بس هالاخ..
والبيت بقى باسم عمي واسمي واسم احمد...
مال حصة ابوية لان امي تنازلتنا وكالت لعمي مانريد حصصهم خليهن ...
بدلت امي واجتت اتمددت يمي ...خليت راسي على صدره وهية تمسد بشعري
_ادري ما حصل منج شي بس خوما أذاج
_لا..
_شلون وصلتي لعمج
حجيتلها ...
_يا يمة شلون تسوين هيج...غير تجين لي ..ربج حماج والله لو طالعة عليج الجلاب جان ملخنج..
وحتى الولد لوما ابن حلال جان الله يعلم صارلج
يمة لا تخلين الخوف يفقدج عقلج ...
سويتها يوم وشردت بيكم...
وظليت اتعير بيها طول العمر...
_احمد شسوة من درى
_ذب ناصر بالمستشفى وطلع يدور بالبساتين القريبة...
سودة علية عقل ماظل براسه...
ومن مالكاج رجع على ناصر راد يموته بالمستشفى
الا حلفله انتي مامخليته يجوسج...
عمج حيدر تخبل هم جان كتله بس خاف عليج من حجي الناس
_وبالحفلة ما سالوا علية
_سألوا كتلهم متخربطة وراح ارجع اوديها للمستشفى
عمج حيدر كاللهم بالليل من فضت... ناصر زالك يم المشروع ومضروب راسه بالحجارة...
ثاني يوم كعدت لكيت احمد جاي وكاعد وية عمي ولده...
استحيت اطب اسلم...رغم مامسوية شي
هو صاحني خطية وشبكني...
امي اخذت مرت عمي وراحوا يسوون ريوك
احمد...هدى خيتي بيت ابونا موجود نروح نكعد بيه...
اشتغل وية راتب ابوية يكفينا...
عدي...شنو هالحجي عمي ودراستك...واني وين رحت
وبعدين اختك الخميس عقدها على ابن عمها
ماكالك ابو حسين
احمد...عمي على راسي انتة...بس اختي مامعيوبة تزوج مال استعجال ...
ولا صفاء مجبور ينجبر على هيج زواج
طبعا رغم صفاء اكبر من احمد بس بينهم احترام ومحبة...
عدي...ماكو اي جبر...صفاء بوية عندك اعتراض على بنت عمك
كلنا انتبهنا على صفاء...
جنت اتمنى يكول اي عندي...
خاصة تأخر يلا جاوب...
بس اجى جوابه غير تمنياتي...
صفاء...لا يابة....بنت عمي على راسي
رجع احمد وامي للبيت وبعدها باسبوع اجو وياهم عمي حيدر وعقدنا ...
مرت عمي ما اعترضت لان اول وتالي عندي حصة ابيتهم وعندي حصة بغير بيت...
غير عمي حيدر مايقصر وياي...
كل مايجيب امي يكون محمل اشكال صناديك المخضر...
وامي تنطيني راتب شهري بيدي ادري عمي حيدر يدزه..
وأيجار بيتنا بيني وبين احمد...
يعني شافتني مكسب ومامخسرتهم شي...
بالعكس وجودي نفعها...تنظيف وترتيب وطبخ
صفاء...اول فترة جان بارد بتعامله وياي...
بس من بدى السادس وكام يقريني واقترب مني...
تغيير هواي...
بس اكو حاجز بينا ماعرف شنو...
اذكرت كل هالامور واني البس بدلة عرسي بالصالون
زفتي راح تكون منة...
بيت عمي حيدر بعيد...
امي تلبسني بدلتي وادموعها ادير...
_ليش تبجين ماما...
_مرت الايام وكبرتي وراح تبتعدين...
_اول وتالي يجي يوم وازوج
_اي يمة صدك...
باعت علية...شكد اشبهين ابوج...نفس حور العين
ونفس الملامح ...
_واحمد يشبه جدي ابوج يكولون هيج حلو جان
_اي يمة بس ماشايفته ولا اذكره...
_يمة هواي تذكرين ابوية ..
مانسيتيه بعد هالسنوات...
دمعت عينها...ابوج جان غير...حلم كصير عشته
مالحكت اتهنى بيه...
ماشفت مثله ومثل بيبيتج امه
امي ابد مابطلت تسوي ثوابات بين فترة وفترة لابوية ولبيبتي بس من ايجار بيتنا...
_بس ماما الله عوضج بعمي حيدر يحبج ...
واكيد هم حبيتيه
_اي يمة الله يحفظه...
سمعنا صوت الموسيقى ...جلبت بيد امي بخوف
اتبسمت بوجهي...
طلعنا من الصالون للبيت...لان جان نهاية ٢٠٠٦ والطائفية مشتغلة....
وراسا صعدوني للغرفة وصعد صفاء...
اجى صفاء...نزعني الكب وباس راسي
_شنو هالجمال...وين جنتي ضامته
علاء اخذلنا صور بالغرفة لان مارحنا مصور..
طبعا الحنة صارت قبل يوم للزلم...
واني رحت ابيت وحدة من عماتي...
مارحت لصالون ولا سويت شي...
بس العصر تفاجات بنات عماتي اجو وسوولي صينية
وكعدة بسيطة وبعدين راحوا لبيت العريس...
خلصت الصور...
امي اتقربت مني باستني...
_يمة ديري بالج على نفسج وعلى رجلج...
ادري بيج حبابة وتسمعين الكلام مثل ماربيتج
_راح ترحين
_اي يمة برانا طريق والدنيا تخوف واخوتج وياي
صعد احمد سلم علية وباس راسي...
وكرار حبيبي يحضني ويبجي...
حيل متعلق بية واني هم اموت عليه
عمره جان ١٢ سنة...
سلموا على صفاء وراحوا...
ظليت ابجي وراهم...
_هاي شنو ...ليش هالبجي حبي
قابل وين عايفيج...
وشوكت ماتردين اوديج عليهم...
مسحت وجهي عيوني بايدي مثل الطفلة...
_صدك صفاء...
_خرب بالحظ طلعتي باندا...اي صدك
كومي غسلي وبدلي لان ميت جوع
طبعا فوك ماجان اكو حمام...بس صفاء قبل زواجنا سووة واحد صغير...
اباوع على نفسي بالمراية...
وجهي يخرع الكحل سايح ومن مسحت عيوني الاظلال لاصت...
غسلت ورجعت للغرفة...
_اريد ابدل
_اي بدلي...
اباوع عليه مغير ملابسه ولابس دشداشة
شبسرعة...
_زين اطلع ...
ضحك وكام تقرب مني...
دارني بحيث صار ظهري له...
_مافكرتي هالسحاب والحبال شلون تفتحيها
موديل البدلة جانت عبارة عن حبال معبرة بالظهر
جان يفتح بيهن واني ميتة خجل وهو يهمس وية كل حبل يفتحه
_ما اريد نبديها مستحة...
اريدج وياي تنسين نفسج...
نصير شخص واحد ماكو فرق بينا...
احس صوته يم اذني يدغدغني...
جفلت وهو يخلي ايدي على ظهري بعد مافتح السحاب..
مشى ايديه على طول ظهري يتلمسه...
ولحكت ايديه شفايفه تطبع لمساتها على ظهري...
بعد اكتاف البدلة الي وكعت يم رجلي...
حسيت كمت اشتعل خجل...
دارني بأتجاهه ...
_هذا الجمال كله لي...
رفع راسي بأتجاهه...
_راح اتعشى بيج اول...
جرني للجرباية...كام يطبع بوساته...واول ماصار فوكي...اذكرت موقف ناصر...
دفعته حيل وكمت اصيح وابجي...
_اشسش...
شبيج بعدنا ماسوينا شي...
جريت الجرجف اغطي نفسي ارجف وابجي
تقرب علية...شبيج هدى ...أذيتج
هزيت راسي لا...
_لعد شبيج حبي..
_اسفة والله...موقصدي ادفعك...
_مو مشكلة كومي لبسي وخلي نتعشى...
نزل جاب العشى...
جانوا محضريه...
واني بدلت لبست كلابية...
كعدنا نتعشى...
واحنة ساكتين...بعدين هم حاول ونفس الفلم
الصبح من نزل صعدت عمتي
_يمة ليش هيج...هية وراج وراج غير تفضيها
ماجاوبت...
بقينا هذا حالنا تلث ايام...
كلما يحاول افقد واظل ابجي...

طبعا الصبح يخلص بالخطار يجون يباركون والظهر نصعد لغرفتنا ويحاول وياي...ومن ماخليه...
يعوف الغرفة وينزل...
ثالث ليلة صعد بعد ماتعشينا جوة...
كعد يمي على الجرباية..
_هدى اريد نحجي الصدك..
هالعار وين وصل وياج
انداريت عليه
_شنو قصدك
_قصدي ليش تمنعني ...خايفة من شي
كوليلي..
_لا والله مااخذ شي مني
كمت ابجي
_لعد ليش تخافين فجاة وتبجين
_اذكر الصار ويرجعلي الخوف
_تذكرين بية النذل...اشكرج بنت عمي
عافني وطلع...
شسويت ...سويت شرخ بعلاقتنا بدون ما اقصد
بيومها نام بالغرفة الثانية...
الصبح...من كعدنا...جان ضايج ومبين عليه
طلع...وعمتي حاجتني
_هم ماكملتوا مو
سكتت ماجاوبتها
_يمة مايصير هيج لازم تفضيها...
اضغطي على نفسج شوية  وتحملي...
الشغلة ماتسوة كل هالخوف...
بيومها من رجع على الغدة وشفته شلون ضايج
علاء يشاقه..
_شو ولا عبالك عرسان...
الي يشوفكم يكول طالعين من معركة
صاح بيه صفاء...
_سد حلكك والصم
بس بعصبية...
علاء حس اكو شي سكت...
صفاء عاف الاكل وكام...
عدي...شبيه عصبي
عمتي باوعتلي بعتب..
كمت للمطبخ ...لحكتني
_صعدي برة رجلج وصالحيه
صعدت واني كلبي يدك سريع
فتحت الباب لكيته كاعد على الجرباية ...
بمجرد مادخلت رفع راسه...
_صفاء
_ما اريد اسمع صوت
_ماقصدت شي من حجيت ردت اوضح سبب
خوفي
_اي بس مافكرتي بالزمال الي كبالج شيفكر
_حشاك...موقصدي اجرحك
وكف مقابيلي....
_شنو يأكد ماصار شي..
فتحت عيني بوسعها...
_والله ماصار شي...
وهاي كدامك اني...
_كال نتاكد هسة...
دفعني الجرباية  ونام فوكاي....
واني بين الخوف والرعب وبين اريد اثبت برائتي
وهو بين العصبية وجرح الكرامة وبين يريد يتأكد من شي...
صحت من الالم خلى ايده على حلكي بقوة...
وجانت صدمتي....
....وللحكاية بقية...