شفاه ذابلة

مشاعر مفضوحة

البارت التاسع
همس ليل
_شدسوين
فززني الصوت الحاد...فلتت وحدة من ايدي...
رجع صاح...دير بالج...
ركض بأتجاهي...بس اني تلاحكت نفسي ورجعت
الزمت الخشبة قوية...
من وصل يمي رفعت عيني عليه
جانت نظراته تخزرني...
_لو فالتة جان سويتي...
متاكد حتة ماتعرفين اسبحين
اطلعي يلا
ظليت صافنة شطلع وهو واكف فوك راسي...
_دير وجهكك
انطاني ظهره...سحبت نفسي من المي...
واني استند.للخشبة...
وكفت عليها واباوع على دشداشتي الازكة على جسمي...
شلون راح امشي...جريتها ابعدها شوي...
_ماخلصتي
_روح كدامي للبيت
التفت فجاة علية...جنت مدنكة انفض بالدشداشة ومامنتبهة عليه
_اعرف ماعندج دماغ تفكرين...
منطقة جولة اجى احد هسة...
لو تصيحين لباجر محد يسمعج
_محد.هنا قريب... وصار اشهر ماشفت شي
_وعلى حظج اجى
رفعت راسي اجاوبه...بس تفاجأت بيه يباوع علية
جنت عبالي بعده داير ظهره...
ارتبكت....بقينا ساكتين...اني مدنكة انتظر يحس ويروح...
ووبنفس الوقت مستحية ماعرف شحجي...
_شلون راح تمشين هيج
فتحت حلكي اريد اكوله يوميا ابقة على المعبر الخشب لحد ما انشف...
بس من داباوع عليه نظرة عينه الغريبة خرستني
جان بيها شي اول مرة انتبه عليه...
_رجعتي خرسيتي مثل كل مرة
اندار ...
بس جملته ضايقتني
_عود انتة ليش كل ماتشوفني تتعامل وياي هيج
التفت علية
_شلون هيج بلة
_هيج بجفاء وعبالك حمل على ظهرك شايله
رفع تك حاجب ...
_يعني لو اتغزل ..لو اطلع اعاملج بجفة
_وين دتحجي ياغزل ياصخام...
ويني وين هالحجي...
شتتخرط انتة
رفعت صوتي من احجي...
قهرني بحجيه...
رفع اصبعه على حلكه يأشر
_اششش...صوتج ماترفعيه...
والله وطلع لسانج...
مو دكول مبين مو فقيرة...
امشي كدامي للبيت ...
واياج واياني اشوفج يم الساكية مرة ثانية
باوعت عليه بحقد...
شكد اكرهك ...كلتها بكلبي..
وجان بنفسي اكولها بوجهه...
مشيت ونسيت دشداشتي تكطر مي...
النعال لاستيك مبلل ومن امشي يتزحلك...
واني امشي بعصبية ماحس الا فلتت رجلي وعثرت
بس تلاحكت نفسي قبل ما اوكع ما اريده يشمت بية
وبنفس اللحظة مد ايده ولزمني من زندي
يريد يسدني...
فاجأتني حركته..
نفضت ايدي منه وكملت طريقي..
بدون ما احس على نظراته الي اخترقت ظهري وتفاصيلي من ورة...
وصلت للبيت سمعت صوت امه بالهول وية حسنة
رحت للغرفة غيرت دشداشتي وحجابي وطلعت عليها
سلمت...
شفته كاعد يحجي وية عمته...
عفتهم ورحت اسوي غدة...
اجت ام حسام تحجيلي على تجهيزات عرس عدي
جان بداية شهر التاسع.
من صبيت غدة كعدنا سوة نتغدى..
ام حسام...يمة صدقة ليدج هاي كم شهر وهيج صار طبخج...والله عمي سبعة
حسنة...صغيرونة قابل ...بعمرها انتي شايلة البيت
ام حسام....حسنة تجيبين زمنهم علينا...
هسة الي بعمرها حايرات بالمدارس..
خالة مو ١٤ سنة عمرج
فرحة...لا خالة صرت ١٥
ام حسام...صلوات يمة...يوم نفرح بيج صدك
ماعرف ليش رفعت عيني لحسام
شفت بسمة هزء ومن شافني اباوع عليه رفع تك حاجب..
كون ازين هذا حاجبك الي ماتبطل ترفعه..
طبعا كلتها بكلبي...
انتبهت على حسنة من جابت اسمي لان جنت ملتهية حرب عيون وية الحقنة الكاعد كدامي...
_فرحة تجي وياي غير
ام حسام...ها...مو ...سكتت
حسام...امي تريد دكول منريد الجوارين يشوفها...
وتعرفين راح مانخلص من حجيهم ليش باقية عدكم
والناس ماترحم
اني بقيت مدنكة وفهمت الحجي على عرس عدي
حسنة...حسيتها مامقتنعة بحجيهم...
يصورونها على نياتها بس من خلال عشرتي وياهة
عرفتها ذكية كلش
مدت ايدها شالت ماعون المرك ودارت منه على التمن...
هية تاكل بيدها ماتعترف بالخاشوكة...
حسنة...خوش...لعد اجي بيوم العرس وارجع بنفس اليوم
ام حسام...ليش ماتجين بالحنة
حسنة...قابل اعوف بنية حديثة تبات وحدها...
بعدين خية ويني وين الهوسة
سكتوا....كمت شلت الصينية...واني غافلة عن النظرات المراقبة لكل حركة مني...
ام حسام اجت وراي...
ودنكت يمي تهمس واني ارتب بالصينية
_يمة تعذريني...الشاهد الله نفسي تجين ...بس اخوتي يعرفوج ...
مو جانو يجون على عمتج سمر...
واخاف تطفر حجاية منهم من نسوانهم...
واحنة ماصدكنا أمنا عليج
اندارت ومديت ايدي  لراسها لزمته وبستها
هية تفاجات ...يمكن عبالها مثل اول ما جيت
مااعرف حتى اكول شكرا..
_خالة ماقصرتي وياي...
حتى عيب علية افتحي حلكي وياج...
لو انطيج عمر من عمري هم مقصرة وياج
كافي عرضتي نفسج ولدج للخطر...
دمعت عينها...جرتني لحضنها...
راحو....بس هالمرة حسيت بفراغ وراهم
وكمت اخاف اروح الظهر للساكية...
لنهاية الاسبوع...اجى حسام من الصبح اخذ حسنة
ماطلعت عليه...هو بقى برة واكف...مادخل
_ماوصيج عمة...لا طلعين...باب الخشب البرة راح اسده وراي...
يمج كلشي حتى للساكية لا توصلين...
بقيت طول اليوم افتر...ماعندي شي
نظفت وطلعت خبزة وروبة تغديت ونمت الظهر
واليوم مايقبل يخلص...
يومية يخلص شغل بين نكل المي وحش وجني المخضر والطبخ ماحس الا صارت المغرب...
بس اليوم حسيته شطوله ...
لليل يلا اجت سمعت صوت السيارة بس ماطلعت خفت...
لحد ماهية دفعت باب الخشب البرة..
طلعت اركض عبالك طفل شاف امه...
من شافتني ضحكت...
_هاولج لا تكولين خفتي
_لا ماخفت
_السلام عليكم...طب وراها حسام
_وعليكم السلام
حسنة ...تعشيتي
فرحة...اي
حسنة مو هاي خالتج ام حسام دزتلج عشاج وحتة كيك الحنة مبقيتلج منه...
انطتني علاكة...وهاي هم لج..
جانت تمشي واني وراها ذبت عباتها وعلكتها على الباب...
_عود افرشي لحسام بالدير ...يبات مايكدر يرجع
خطية تعب وماقبل غيره يوصلني...
هو جان داخل للهول...
رحت رشيت الدير ومديت حصيرة وفرشت له ...
طلع مبدل لابس دشداشة...
رفعت عيني شفته يباوع علية...
اجيت اروح صاحني...
_فرحة...عود امي دزتلج اغراض شوفيها...
هزيت راسي...ورحت جبت فراش حسنة هم فرشته
بس اني كلت انام بالغرفة اليوم
طلعت شفتهم يسولفون على العرس...
_اسويلكم جاي
حسام...اي والله راسي راح يطك
حسنة...عمة بس لحسومي اني كايمة انام...
رحت للمطبخ...جان الطباخ منضدي..
سويت شوية ودرته بكلاص اعرفه مايشرب باستكان
من جنت يمهم...
وديته ومن دنكت انطيهياه...
_لج ليش تبقين ثولة...
صفنت بوجه...
_ليش شسويتلك
_انتبهي لنفسج
جر الصينية مني بقوة بحيث الجاي اتبدى...
رحت للغرفة...
شبيه هذا خبل...والله يالله
فتحت علاكة الكيك اخذت قطعة...
واني اتخيل الحنة والعرس شلون صارت ...
واذكر من جانت عمتي سمر  تاخذني لعرس عد اهلها اتونس حيل...
رجعت جريت العلاكة الثانية  اني كاعدة على الفراشي...طبعا ممدود بالكاع...
فتحته...لكيت دازتلي دشداشة جديدة وملابس داخلية...هية كل مرة ادزلي...
بس هالمرة ضايفة حمالات صدر...
استغربت شعجب كلما تجي اريد اكولها واستحي...
لذلك دائما انزل الربطة من كدام حتى مايبين شي
معقولة هالمرة انتبهت ...
كعدت الفجر اريد اصلي...
كمت بسكوت لان همة نايمين بنص الدير...
توضيت ورجعت صليت انتظرت شوية...
لحد علت الشمس...
هالمرة حسنة ظلت نايمة يمكن تعبت من الطريق وهية مرة جبيرة..
طلعت انكل مي ...جريت نفس من الهوى النظيف...
باوعت كلشي نايم ...بس اني والعصافير..
تمشيت على كيفي...
وصلت للساكية...كعدت شوي عليها اباوع للمي الصافي...
مشاعري ماعرف شبيها....
نزلت التنكة مليتها وجريتها واني اذكر اول ماجيت
شلون مليت مي وشلون نجبحت...
جريت التنكة وكفت بوجهي ابتسامة ...
وية مالتفت شفت حسام كدامي...
عطت وكعت التنكة من ايدي...
بس صارت وكعتها على رجلي...
رجعت صحت من رجلي وجعتني...
كعدت بالكاع...
_الله الله...
اجى سريع علية...
_شبيج مال الثول اكو واحد يوكع تنكة شكبرها على رجله...
دنك لزم رجلي الي بدت صارت حمرة...
رفعت عيني له....غير انت جفلتني...
هو هيج ماتحجي ...دكول
_شفتي وحش...
شنو هالعيارة
ضغط على رجلي ...عطت من الوجع
عقج حاجبه...هية مو انكسرت بس تنكة ثكيلة
يجوز رضى...
جان مدنك ويحجي....
واني مقابيله...بقيت صافنة على شعره...
اسود وسرح ...ووو فجاة رفع راسه...
اجت عينه بعينه....
صفن بوجهي...
حسيت بعينه تأكلني...
فد شي دغدغ مشاعري...
والهوى بينا ثكل ...حتة النفس صار صعب..
قطع هالتواصل بكومته راسا بحيث راد ينطخ صدره بوجهي....
_حاولي دكومين...اني راح املي مي ...
راح للساكية ملة التنكة...واجى...
_انطيني يدج اوكفج
_ميحتاج...
سندت ايدي بالكاع ووكفت...
كتمت صرخة الم من دست رجلي بعضة شفة
_توجعج...حجى وصوته بي بحة
باوعت عليه شفت عينه على شفتي..
_اي هسة اطيب..
مشى واني وراه اعرج...
لحد ماوصلنا تلكتنة حسنة
_هاولج...شبيج تعرجين
حسام...وكعت التنكة على رجلها
حسنة...خايبة صارلج اشهر تنكلين مي...قابل اول مرة
راح حسام فرغ المي بالحب ورجع مرة ثاني جاب بين ماسويت ريوك....
تريك وبدل وطلع...
عاد حسنة دهنت رجلية وطكتها ودفتها...
بقيت كم يوم يلا صارت زينة...
لنهاية شهر التاسع...
يلا اجى حسام وامه...جنة نتغدى من دخلوا علينا.
فرحت بجيتهم...
وبين السلام والملاكة...كعدوا تغدوا ويانة...
حسام...عمة ترة صارت حرب وية ايران...
اخزني شتحتاجين...
من كال هيج سجين ودخلها بصدري...
عفت الاكل وكمت..
ام حسام...ها وين يمة ماكملتي غداج
فرحة...الحمد لله...اسويلكم جاي...
رحت حطيت القوري على النار...بس ماتحملت..
طلعت من البيت للدامة مال الهايشة(غرفة للمبيت الحيوانات)
سندت نفسي للحايط وظليت ابجي...صار شكد لازمة نفسي وماانزل دمعة...
نزلت وية الحايط للكاع ولميت رجلي وخليت راسي عليهن واني اشهك بجي...
_ليش تبجين...
سمعت صوته...
بس ماجاوبته...
اجة وكف مقابيلي...فرحة...احجي ...من سمعتي بالحرب وجهج اصفر...
بقيت دافنة وجهي...جنت متأملة بلكت تتغير الظروف...
ويجي يوم يرجعون اهلي...هسة شيرجعهم اذا صارت حرب...
من يكول مايكتلوهم هناك...
سمعته تنهد...ماكو حرب اطول...وان شاء الله يرجعون وتفرحين بملكاهم
_واذا مارجعوا...شلون ابقى بلا اهل
_تزوجين ويصيرون عندج عائلة همة اهلج وعزوتج
من كال هيج اذكرت حجايته...
كمت من مكاني...
_منو يزوج مكطمة ...ماعدها لا اهل ولا عشيرة
اجيت اطلع...جرني من زندي
جان عاقج حاجبه...شنو قصدج بهالحجاية
_ماقصدي شي...حجيتها ونفضت ايدي من ايده
رجعت كملت الجاي...
وديته وكعدت يم ام حسام...
دخل هو وكعد يشرب جاي وعينه علية...
من باوعت عليه رجع رفع حاجبه...
تجاهلته...
راحوا...بس هالمرة تاخروا يلا اجوا...
واجت بس ام حسام وعدي...
مر تلث اشهر والحرب زادت ما نقصت...
بغداد انضربت بالطيران جان اول سنة وبعدها ماوصل ابد طيران لها...
وصافرات الانذار كام ينسمع دويها ...
الناس متأملة تنتهي الحرب كل شهر يكولون هالشهر...
مايدرون الشهر يجر شهر والسنة اتجر سنة...
والشهداء بدت قافلتهم ...
بجية من جيات ام حسام وعدي جابولنا راديو...
وكمنا نسمع الاخبار والبيانات العسكرية...
والاناشيد الحماسية...
جنت حيل خايفة...
يوم راجعة من الساكية...
شفت سيارة حسام بس توقعت عدي وامه...
ظليت امشي على كيفي...
وصلت السيارة للبيت....عيني عليها...
انفتح باب السايق...شفته نزل...
هالطول اعرفه....والهيئة اميزها...
حسيت كلبي زادت دكاته...
دار وجهه...شافني اجى يمشي بأتجاهي...
وكفت بمكاني وعيني على كل خطوة يمشيها...
وصل مسافة عني وكف
_شلونج فرحة
_الحمد لله...انتة شلونك
_زين...مو بارد الجو طالعة من الصبح تنكلين مي
_شسوي...خالة مو وياك
_لا بس اني اجيت
_شعجب ما اجت....صاير شي
_لا ماصاير...
_اكيد.لعد جاي لعمتي علمود شي
هز راسه...لا مو علمودها...الي جابني غير شي وغصب عني..
_هلا بيك بكل حال...تفضل
مشيت كدامه بعد ما اخذ تنكة المي مني...
بيومها اتجنبت اكعد يمه...
سويت غدة وماتغديت وياهم...وسويت جاي وديته لهم بدون ما ارفع عيني له...
جنت احس عيني فاضحتني...
من شفته فرحت...واحس هالفرحة مبينة بعيوني
الظهر...حسنة تمددت تنام يمه بالهول...
واني رحت اروب الحليب بالمطبخ عبالي نام هو
بس حسيت من دخل المطبخ ...
ماانداريت عليه...
_فرحة شبيج...
_مابية شي ...تريد اسويلك جاي قبل ماتروح
_هيج بس تريدين اروح وتتخلصين مني
كمت وكفت...البيت بيتكم واني خطار شلون افكر هيج
رفع تك حاجب...شو لهجة جديدة هاي...
ماجاوبته...
_فرحة جاوبيني ليش تتهربين مني من الصبح لسة
_شعندي وياك حتة اتهرب...
ردت اطلع وكف بطريقي...
_خلني اطلع حسام
_لج رفعي عينج وحاجيني
_حسام شتريد مني
_ما رايد...اجيت اشوف عيونج
رفعت عيني له....شفته صافن بوجهي
_رحمة لاهلج مين جايبة هالعيون....لونهن لا هو اصفر ولا هو جوزي...
خوب من تضرب عليهن الشمس يكومن يجدحن نار
ضليت عيني بعينه...
_لاتنسى حسام ترة اني نفسي فرحة
_شنسى ...ليش ماعرف انتي فرحة
_اريد اذكرك...اني فرحة المكطمة ما تغير شي
يعني ابقى مافيدك...
واذا ابالك غير شي...فدكيت الباب الخطأ
وخرت عنه اريد اطلع لزمني من ايدي
_شتحجين...شنو قصدج أبالي غير شي
شفتيني جاوزت وياج...
مو اني الي خاطرت حتة استر عرض
وتالي اجي اهتكه...
لمست ايده جانت عنيفة ويضغط على ايدي قوي
هد ايدي بقوة...
_لسانج حيل طول
_واحد يوم كالي الفقير بهيج وكت مايراد
_اي بس مو تتطاولين
_الي يكول الحق يطاول
_حقيش...انتة مخبلة لو شنو...
على كل ...جيت اسلم عليكم...
طلبوا مواليدنا وراح نلتحق...
طلع وعافني مدهوشة بمكاني...
اريد الحكه ورجلية ماتقبل تتحرك...
مر شهرين ماشفته بعد...
ام حسام كامت كل شهر تجي مرة...
يجيبها عدي...
مرة رجعت للبيت جنت اجيب حشيش للهايشة...
دخلت واني افتح لفايف ايدي ووجهي...
علمتني حسنة الفهن حتى مايسودن بالشمس ولا يخششن...
سمعت صوت نعي وبجي...
هبطت وگلبي كام يرجف ...دخلت للغرفة ركض...
شفت حسنة مطلعة لبس اسود ودتغيير بوفطتها
وتنعي وتبجي...
_عمة شبيج
_لج عمة جابوا شهيد...يمة الشباب راح..
صارت طنة بأذني واني اتخيل التابوت الملفوف بالعلم...
كمت ما اسمع الي دكوله...
...وللحكاية بقية....