شفاه ذابلة

افراح واحزان

البارت الحادي عشر
همس ليل
السنة الثانية للحرب على وشك تنتهي...
الدول العربية الي دزت قوات تساند في بداية الحرب سحبتها...
رجعت الدولة تسحب وتطلب مواليد مختلفة...
حتى شمل الموظفين ...
البلد امتلى عمال مصرية....
والحرب بأوجها....مع ذلك الناس متأملة باي لحظة توقف اطلاق النار....
همة مايدورن اكو هواي ناس مستفادة من الوضع...
وتأججه زيادة...
بيها الي تمد السلاح للدولتين...
وبيها الي مستفادة من التهاء العراق بالحرب...
جنت كاعدة صافنة على المي...
هنا صارت سلوتي...من اضوج اجي اشكي همي واحجي وية نفسي....
صار كم شهر بعد ما اجى حسام...
هيج جان حبه وقتي ماصدك كتله لا...
راح وبعد ما رجع...
ام حسام كام اطول يلا تجي..
وعدي يجيبها ...هسة التهت وية ابن عدي
اجاه ولد سماه صفاء...
من تكعد وية حسنة تسولف وتسألها حسنة على حسام...
اني گلبي يفز وكل حواسي تتنبه...
اريد اعرف شدكول...
_والله خية هو كل ٢١ يوم ينزل سبع ايام...
يخلصها ركض بين البيت والمحل...
فوك ضيم الحرب...
عدي مايسوي شي بالبيت ينتظر هالمسكين
من يجي...
وخوب اذا هجوم عده يبقى شهر ونص ماينزل اجازة...
صفنت ...الله يساعده ترة صعبة واحد يبقى شهر
مايشوف اهله...
رجعت للبيت...وانا اتمشى شفت سيارة من بعيد...
ركضت للبيت...
مرات حسنة من تريد تروح لبغداد وهية قليل ماتروح
ادز على واحد من اقاربهم يجي ياخذها...
بس اني ابد ما اطلع عليهم...
وهم ماسألها وين رايحة وين جاية ...
طبيت واني اصيح لحسنة
_عمة...اكو سيارة اجت ...
شفتها من بعيد
_وشمالج تنهدين...
اي راح اروح لبغداد...
على بيت عمتج ام حسام...
من كالت اسمه تخربطت احوالي...
واريد اسأل ليش...
بس احسه عيوني مفضوحة ...
_سلميلي عليها..
دخلت للغرفة وبداخلي رغبة اروح لبغداد
ارجع لولايتي اشوف بيتنا وين صفى بي الدهر...
سمعت صوت باب الخشب انطبك...
طبعا هو باب مو اصولي..مجموعة خشبات مكدوكة سوية...ومشكلة بالدخلة مال البيت...
بس بالليل نرده...ومن تطلع حسنة...
حتى الي يشوفه يعرفون محد بالبيت...
هو اصلا محد يوصل هنا...
يعرفوها وحدها ويدرون بنية صغيرة يمها...
وهية حسنة دائما تروح على اقاربها الي حولنا..
المهم...
اخذني الشوك...لذاك الشارع...وللبيت المنثور اصفر
وللحديقة الي جان عمي يتعب ويرتب بيها...
اشتاكيت لريحة طبخ عمتي سمر...
من ادخل للمطبخ واني راجعة من المدرسة...
ولصوت بيبتي وهية اتدردم عليها...
ومن تشوفني تظل تصيح...
هلا بريحة وليدي الغالي...
هلا بنت الحنينة...
اركض لحظنها اشبكها واشمها...
جنت احس بيها ريحة ابوية الي ماوعيت عليه
طلعت واني اغالب شوكي...
تمشيت لساكية المي...
اذكر حجي عمتي سمر عن امي...
جانت دكول تشوف ابوج من تملي مي من الاسالة
وتحجيلي عن بيت الطين...
امي بدت ابيت طين ونكل مي...
واني انتهيت ابيت طين وانكل مي...
شلون دنيا غبرة...من تجور على الفقير اتجور بقسوة
هم يجي يوم وارد لبيتنا...
هم يجي يوم وارجع لحضن اهلي...
دموعي الي نزلت غصب غركت وجهي...
شكد عمري ستطعش...
بس اني احس نفسي بالثلاثين ...
كبرني الوكت والضيم الي شفته...
رجعت للبيت ...ماعرف شبية مختنكة...
الشوك اليوم غصة بصدري...
لمن ولمن اشتاك...لامي لي ماشبعت من حظنها
ولو لعمتي وعمي الي ربوني...
لو لحنية بيبتي...
لو لاخوتي الي ماجابتهم امي خاصة محمد..
الي راح بعز شبابه...
واكو شوك ثاني خانكني...واجع گلبي...
شوك للي كال احبج ومشى مسأل بعد عني...
رجعت حسنة المغرب...
علكت عباته واجت يمي اني كاعدة اسمع اخبار بالراديو...
_ام حسام سلمت عليج
_الله يسلمه...مشتاكة لها...صار شهرين من اخر مرة شفتها
_الله يساعدها...تروكض بين جنتها النفسة...وبين ابنها..
_قصدج ابن عدي شبيه
_خايبة على حسام...
_شبيه...كلتها بجفلة وبدون وعي
شفتها انتبهت علية بنظرة سؤال...
_مصوب بالهجوم الاخير
من كالت هيج احس خمطت روحي
اريد احجي...بس هاللسان الطايح حظه يخرس ويظل يمتمت...
_وي...ن مصو...ب
_برجله خطية...وهم بقى شكم يوم بالمستشفى..
ومن رجعوا للبيت الناس رايحة رادة عليهم...
ظلت تحجي واني بالي اخذني لبعيد ...
وجع بصدري صار...
_عمة صار شكد من اصوب
_شمالج مو دكولج قبل شهر...
سكتت واخاف اسال بعد ...
بس بقت روحي لايبة...شلون اعرف اخباره...
شو حسنة مكابلتني ماتطلع...
وام حسام اكيد ماتجي هسة...
همة عدهم تلفون ارضي...بس هنا وين اكو
بقت اسبوعين روحي لايبة...
اكلي قل واني افكر خاف متأذي...
والنوب كسرت خاطره من اخر مرة اجي
شكد غبرة هو الولد بالموت...
واني ادور ثارات حجي...
غمة اي والله ..فوك الي سواه لي
جنت احجي وية نفسي
_ها تخبلتي...شبيج ركبج جني تسولفين وية نفسج
جنت اكنس بالدير...
رفعت راسي...وجريت لثامي عن حلكي لان تراب
صح ارش مي بس من انظفه هم يعجج
_اي والله عمة الظاهر تخبلت...
سمعنا صوت سيارة برة
_هذا ياهو اجانة
طلعت حسنة...وسمعت صوت مو غريب...
بس ماميزته ....
_فوت عمة هلابيك
عدلت ربطتي ..وشفت عدي الي دخل
كيفت بلكت اعرف شي عن حسام
_هلا خوية ابو صفاء
_هلا بفرحة...
احلى ابو صفاء طلعت منج...
مو اكلج كمر...
_ماتبطل سوالفك...
_ادري الي يشوف هج وجهي يكدر يبطل
يلا خاتون حظري نفسج
تفاجأت وبقيت اباوع بوجهه...
ورجعت باوعت لحسنة
_شنو
_امي خبصتنا مشتاقة لفرحة...
كل شوية وصاحت كون واحد يجيبلياها...
ظليت صافنة بوجهه مثل الثولة...
بگلبي فرحت....بس جنت خايفة من روحتي
_خايبة شببج واكفة...فضيها الولد يريد يرد لاهله
اشري براسه...
دخلوا للهول واني ركض غسلت وجهي...
وغيرت ملابسي...وجبت عباتي واجيتهم
_شبسرعة...
ياريت زهراء مثلج...
لازم قبل يوم اكولها راح نطلع حتة تبدي تجهز نفسها
طلعنا واني اسلم على حسنة..
بالبداية عفته مركز بالطريق...
لحد ماصعد السريع...
_خوية عادي يعني ارجع وياك
_عادي يمعودة صار فوك السنتين...التفت علية
انتي كبرتي وتغيرتي هواي...
من اجيتي عبالك طفلة مو وحدة عمرها ١٤ سنة...
وللاحتياط امي كالت خلي تلف عبايتها على وجهه من تنزل...
عدي خلص الطريق شقة وضحك...
يسولف على مرته وابنه...
من دخلنا بغداد جريت نفس...
_اشتاقيتي لبغداد
_اي والله ياخوي...
احس نفسي بسجن...
_هو انتي عايشة بالمنفى...
الله يساعدج..
_ابو صفاء اسالك
_كولي
_ماكو خبر لا عن اهلي ولا عن محمد
_فرحة الي يروح نادرا مايرجع منهم...
_شلون لعد...ماعرف وين همة ولا وين  وصلوا
_هذا نصيبج...
ولا تسولفين بهالموضوع حتى وية نفسج
هزيت راسي...
_وصلنا...
من كال هيج...گلبي صار طبل..
المنطقة ماميزها لان دخلتلها خاتلة وطلعت خاتلة
ضرب هورن ...طلعت بنية لابسة حجاب...
فتحت الباب الجهتين...
وهو دخل السيارة بالطرمة...
_هاي مرتي...
نزل واني هم ...اجت تلكتنا...
_اهلا وسهلا ...
تقربت بوستني عبالك تعرفني من زمان..
وطلعت ام حسام هم تلكتني...
شبكتني وهية تهمس هلا بريحة الغالية...
دخلنا للهول...
_شلونج خالة
_يمة بالي يمج...وعذريني هالفترة ملتهية...
_لا خالة ادري بيج ماتقصرين...
زهراء...اكيد سطر راسج عدي بالحجي..
اسويلج جاي بين مايخلص الغدة
عافتني اني وام حسام...
_شلون حسنة
_سلمت عليكم...
سمعت الباب انفتح...
وصوت دكة بالكاع وية مشية واحد...
شفت ام حسام تبسمت...جانت كاعدة يمي على القنفة...
_السلام عليكم...
فزيت على هالصوت ...وكفت دون مااشعر والتفت عليه...
شفته ضعفان ومخلي عكازة  جوة ابطه يستند عليها
_وعليكم السلام...حمد لله على سلامتك خوية
هاي بعد ماربط صخماني لساني شوية يلا كدرت اجاوبه...
تقدم وكعد على القنفة المقابيلي...
جانت عينه علية مانزلت...
واني كعدت والف بعبايتي ومتوترة...
واحد يباوع للثاني العيون هية تحجي الشوك
_ها يمة خوما رجلك توجعك لان دست عليها
قطع سلسلة نظراتنا حجاية ام حسام..
حسام رجع يباوع لامه عبالك جان بغير عالم
_لا زينة...
واني دنكت ...بس لا انتبهت علينا...
دخلت زهراء جايبة جاي...
_شلونك حسومي...سمعت صوتك وجبتلك جاي ويانة...
بس هستوها قدمت الجاي صرخ ابنها عافتنا وطلعت
اجانة صوت عدي يلعلع
_ها زهورة شفتيها الله عليج مو كمر...
دخل للهول...
_شلونك ابو الشباب ...شلون رجلك..
كعد يم اخوه...لعد وين زهراء...
زهورة جايي وينه...تعاي كوليلي
حسام...ليش تصيح يمعود
عدي...اريد تجي...تكلي خبصتنة بفرحة
خلي تشوف مو عندي حق...
النوب صايرة بعد احلى...
الناس تضربها الشمس تجلح...
بس هية...
هو يحجي وحسام عينه علية
حسام...عدي ...اثكل شوي صرت اب وبعدك نفس الخفية
عدي...على كيفك عيني...اكوم اروح لامرتي وابني...
ام حسام...يمة البيت بيتج...
اشوف الجدور على النار...
تحترك والمسعدة ماتدري...
طلعت وعافتنا...ظليت افرك بيدي متوترة
_شلونج فرحة
باوعت عليه..الحمد لله انتة شلون رجلك
_زينة...ليش ضعفانة
ردت اكوله من يوم صوابك لا ليلي ليل ولا نهاري نهار
_ماكو شي هيج
_لا دنكين...خليني اشوف عيونج...
لو تدرين شكد...مشتاك لهن
خجلت ونزلت راسي
_فدوة اروحلج لا دنكي
_اسم الله لا تكول هيج
_تخافين علية
سكتت...
_جاوبيني فرحة
هزيت راسي
_ليش لعد شلعين گلبي...
فراكج أذاني فرحة...
_مو انتة
_اشش لاتكملين ولا تعيدين الحجاية...
لج والنبي محمد  احبج..
لو تدرين الشوك البية هسة...
جريت نفس خجلانة..
_كون هالنفس بصدري هسة...
عزة...ردت الكاع تنشك وتبلعني...
دخلت زهراء وعدي...وهما يتلاغون ..
بس وكفوا فجأة عبالك حسوا الوضع مو طبيعي..
حسام ادارك الموقف...
_شبيه صفاء بس يبحي
زهراء..طالع على ابوه بس يون
عدي...هاي علية ...فوك ماونسكم واسويلكم جو
اجت ام حسام...وصار شقة بينهم وضحك
صبوا غدة...وحسام خلوله غداه على طبلة...
واحنة كعدنا بالكاع...انؤ ماكدرت اكل...
كل ما ارفع عيني...اشوف حسام يباوعلي...
وهم فرحتي بشوفته شبعتني..
ام حسام...يمة ما اكلتي زين
_خالة الحمد لله
عدي...ماتشوفيها عصفور صايرة...
هو الي يعاشر عمتي حسنة مايفقد الشهية ..
ام حسام...عيب ولك يمة عمتك هاي
عدي...شكايلين...جنها جندي مكلف
فرحة...لا ترة طيبة حيل
عدي...شوكت ذكتيها
دغته زهراء...اكل واسكت...
عدي...داكل...اصلا نفسي اليوم مفتوحة واني مكابل الكمر...
باوع لحسام...وحسام خزره...
زهراء....ليش شبينا مانعجب
عدي...لا حبيبة انتي الروح والرية
ظلينا نضحك على مداهرتهم...
واصلا مرته مو قاصرة هم حلوة...
كملنا وردت اكوم وياهم اغسل مواعين...
ام حسام شاورتني ابقي هسة
مافهمت شرادت الا من فرغ الهول ...
وحسام حاجاني
_ها يفرحة...ماتحنين علية
وتريحين گلبي
_شنو...
_لج لا تمرمريني...
خلينا نزوج...
عندي اجازة مال الاصابة ...
نزوج بيها..
سكتت وبكلبي اكول خلي افرح بعمري
_حسام
_عيونه
_ماتعيرني باجر عكبة...ماعندي اهل
لو تكوم تخاف لان اهلي اتسفروا
لو خاف يسفروني
_ينكطع لساني اذا فكرت اكولج كلمة
وانتي ماكو خوف عليج...
الي تزوج عراقي ماتسفر
_لعد اني شنو مو عراقية
_بوية هاي حجيهم...
يلا فدوة رحتلج...
فضيها..
_براحتك...دنكت مستحية
ورجلك شلون
_قابل ازوج برجلي
استحيت وصرت طماطة من حجايته...
ضحك...من شافني...
بيومها فرحت بشكل من رجعني عدي...
الدنيا ماوسعتني...
بعدها بيومين اجت ام حسام وعدي...
حجت وية حسنة...وحسنة صاحتني
_عمة اكيد تدرين ام حسام شتريد
هزيت راسي لا لان فعلا ما اعرف...
_جاية تريد تاخذ رايج علمود حسام
تقبلين بيه
استحيت وماعرفت شجاوب
ام حسام...هاي هية ...تعاي ويانة اخذلج ذهب وملابس...
_خالة شسوي بيهن كومة ذهب عندي
_لا يمة احنة نخاف الله
_خلص اخذي الي يعجبج
ماقبلت اروح وياهة...
بية خوفة مو طبيعية...
احس من امشي بالسوك كلها تعرفني...
اخذتلها اسبوعين ام حسام...
واجت اخذتني وحسنة وياي...
من وصلت جان حسام ماكو...
زهراء صعدتني لغرفة حسام..
من فتحتهة شفت غرفة اخشابها ضخمة مشتريها..
وديكورها حلو كلش...
زهراء فتحت الكنتور...
_تعاي فرحة شوفي...
تقربت شفت دشاديش اشكال وفساتين وسيتات نوم
_هاي عمتي كله تروح من الورزدي وتجيبلج
الورزدي جانت اسواق مركزية ضخمة شلون المول حاليا..فتحوها باسعار مدعومة...وجانو يجيبون
اغراض منزلية وملابس مستوردة ويوزعوها...
بس كله سرة الناس تلزم يلا تحصل...
والاغراض الكهربائية جانت قرعة تدخل الناس...
كل وجبة بوجتهة...
والناس هم مو كلشي تكدر تشتري...
لان الاسعار غالية...
المهم...اجى حسام ...يتوجى على عوجية خشب
سلم...
وسال اذا محتاجة شي بعده..
هزيت راسي لا...
بس بيومها ماكدرنا نحجي سوه...
حسنة ماعافتني...
ثاني يوم طلعنا للكاظم عقدنا سيد...
محكمة ماكدرنا لان قاصر وماعندي ولي امر...اجلناها لحد ماابلغ ١٨...
شفت فرحة بعيون حسام وهو يردد برة السيد
ومن اجى سراي...تنعكد لساني...
السيد يكول...قولي نعم وانتة وكيلي...
واني ابد...دنكت علية ام حسام...
_جاوبي خالة ...
كوة يلا طلع صوتي...
من طلعنا من السيد اجى بصفي حسام
_حتى بهاي شالعة گلبي...
ضحكت لحجايته...
زرنا وغدانا برة ورجعنا...
بعدها اخذوني ابيت اخته هبة...
كملولي تفاصيل العرس من حف وبدلة ...
حسنة رجعت للبيت...
وحسام بعد ماشفته...
اخوات وخالات حسام كالولهم البنية يتيمة...
وعايشة وية حسنة وفهموا حسنة دكول نفس الشي
ماسوينة حنة لان  فيصل مامكمل سنة....
وهو اقاربهم كلش
والعرس زفة عادية من الصالون اخذوني لمدينة الاعراس...
ام حسام اعترضت كالت صغيرة خلو الزفة بالبيت
بس حسام ماقبل...
من اجى اخذني من الصالون مارفعت راسي وشفته
جنت كلش خحلانة...
وخايفة لا احد من خواله يعرفني...
بس ام حسام كالت اتغير شكلج هواي ما اعتقد ينتبهون...
زفونا وامه تمشي وتوصي بيه علية...
بس سد باب الشقة...
جانت مدينة الاعراس مثل الشقة  وحولها حدايق...
كاعدة على جرباية وگلبي الف بدكاته واني اذكر حجي ام حسام وهية تفهمني على الليلة...
قفل حسام وراهم الباب واجى كعد بصفي...
_ها يافرحتي...
شبيج ترجفين...
_مابية
_لا تخافين...
حسام يخاف عليج اكثر من روحه...
بس ماريدج اتعبيني...
هزيت راسي...
كمت اريد ابدل بدلتي.
من وكفت جلب بيدي
_وين رايحة...
_ابدل
ضحك...وكف مقابيلي ...
ماكو داعي...
تقرب علية وهو يرفع وجهي له...
عينه بعيني ومد ايده يفتح البركع ويسحب الماشات
دنك وطبع بوسة على شفايفي...
جرني لحظنه وهو يشتم بية ويجر نفس من عطري
_اوف لج وربي مشتاكلج...
ودومي احلم بيج بحظني...
ايده اتمدد فتحت سحاب البدلة...
الي وكعت بالكاع...
المستحة الي بيه اني خلاني مارفع عيني بوجه...
ماذكر شصار وشلون صار...
بس اذكر همساته وهو يكول احبج ويكررها...
وايده الي تمسد جسمي ...
ونفسه الي ثكل فجأة...
وياه رجفتي وخوفي من صارت اللاحظة الحاسمة
خلى ايده على حلكي من صحت...
وهو يخترق اسواري المحصنة الا منه...
غفينا بعدها حتى بدون عشى...
وكعدنا نص الليل...حسيته يهمس باذني كومي اعلمج شلون تسبحين...
_اعرف اسبح...شبية
_لا مو نفس السبحة العادية...كالها وهو يضحك
جرني للحمام...
_وج بابا بطلي مستحة...
شو تعاي..
علمني شلون اغسل...
بس ماكانت ابلاش...
طلعنا تعشينا ونمنا ...
ثاني يوم كعدنا على صوت دك الباب...
_كومي البس عباتج وحجابج
بس الدك على الباب سطرنا...
فتح الباب وطب عدي يهلهل...
ضحك حسام على اخوه...
ام حسام اجت يمي
_ها يمة بشري شلونج
استحيت من حجايتها رغم مابيها شي بس حسيتها متقصدة شي معين
هلهلت...وباركتلي وهية تبوس بية
وراحت لحسام حظنته وتباركله
رجعنا للبيت...الاسبوع الاول خالتي وزهراء ماخلني اسوي شي على عروس...
وماسوينة سبعة..ما رادت تحرجني ام حسام...
وهم خافت لا واحد ينتبه...
خلص الاسبوع خطار من الجيران يجون يباركون
وحسام مكابلني....
نادرا مايطلع من الغرفة...
_حسام عيب خلي ننزل
_شنو العيب عرسان جدد...
وبعدين بعد اسبوعين التحق...
خليني اشبع منج
_والله استحي كل شوي نازلة جوة وداخلة للحمام
_خليها غسلة وحدة طول اليوم
_يا والصلاة
كمت اريد اخذ ملابس اخذت ملابس داخلية من شاف الحمالات ضحك
_ليش تضحك...
اجة وكف مقابيلي ورفعها...
اذكرت من شفتج يم الساكية...ومن دنكتي علية...
_يا عزة...جان مبين..
_هو اني كلت لامي تشتريلج...
بس شنو بوكتها شعلتي اهل اهلي...
_جنت استحي اكول لامك...وبعدين منزلة الربطة ماجنت اصور مبين
_مبين...لعين عاشك يتأمل حبيبته مبين...
جرني من خصري له...
_هاي شكو...مو كافي
خليت ايدي على صدره ادفعه شوي
_ذكرتيني بذيج الايام واريد اخذ ثاري
بعد الاسبوع..حسام كام يروح للمحل...
وام حسام قسمت الشغل بيني وبين زهراء...
واجى موعد التحاق حسام...
من راح احس اخذ روحي وياه...
البيت بدونه ماله طعمه...
والنوب صار هجوم ..
وصرت كاعدة على نار شوكت تخلص ٢١ يوم ويجيني...
....وللحكاية تكملة..