شفاه ذابلة

عمة وچنة

البارت الرابع
همس ليل
مرت تلث سنوات على زواجنا...
بدايتها جانت مرت عمي تسمعني حجي وتثكل علية بالشغل...
بس بعيد عن عين جدي لان تخاف منه ...
مايقبل تأذيني...
بس بعد سنة جدي تمرض...
وصار مايطلع من غرفته هواي...
ودائما نايم ...ماطول شهرين وتوفى...
حيل تألمت لوفاته..جنت احسه الباقي من ريحة اهلي الي ماشفتهم...
ومن وفاته كامت تجاهر مرت عمي بعداوتي..
دائما تسمعني حجي...
_هذا ابني الي چنة فلكة كمر ياخذجج انتي الزركة...
لوما جدج مسلوك الصفحة جان اني اكلبج لابني..
هاي الموال اسمعه يوميا
اذا ماعجبها شغلي ....واذا مالكت شي خطأ
تحجج بأي شي...
هالشي يقهرني وماعرف لمن اشكي...
بس جانت سمر تهون علية...
وحبيب گلبي حويتم جنت ماحب اضوجه..
اكول خطية هو يجي هلكان من الشغل...
مع ذلك جان له مواقف يفهمني بيها هو بظهري..
اوله من وفى بوعده وسوالي غرفة جديدة بعد سنة ونص من زواجنا...
امه كومت الدنيا وكعدتها...على شنو تصرف فليساتك
وهية وين شايفة غرفة نوم...
اعلاها صندقجت بيبيتها
حاتم جان بطبعه هادئ مايعصب بسهولة...
حتى لو يضوج...يبقى يحجي بهدوء...
جاوبها لامه بهدوء...بس احسه ضايج
_يمة...لا تنسين زهرة بنت عمي وهذا خير جدي مو بس لنا...لها نصيب...
واذا تربت بعيد عن هالخير ..فالصوج بينا مو بيها
عافها وصعدلي...
اني جنت واكفة اصنت نهاية الدرج...
ومن شفته صعد راسا دخلت الغرفة ...
وسويت نفسي اعدل الملابس بالكنتور الجديد
دخل وكف وراي ...
_زهرة عمري...شسوين
_اصفط الملابس...
_زهورة عايفة حويتمج وكاعدة تشتغلين..
اقترب مني وحظني من ورة ...تعاي حبيبة خلي
نجرب جربايتنا خوش شغل مسويها لو لا...
انة من يقترب حويتم مني اروح بغير عالم...
وانسى كل زعل وكل قهر...
مرت سنة وماصار عندي حمل...والثانية وهم ماصار حمل...
وبدت عمتي تعيرني بهالشي...
حاتم يكول رزق الله شوكت مايجي...
وامه دكوله خلي اوديها شيخ يقرا عليها
_يمة شنو شيخ يتفرج على مرتي
_عاد من حورها مرتك
_يمة شسالفة ...هاي عرضي شلون تقبليها
_يمة مايسويلها شي اني موجودة...بس يقرأ عليها ايات...
_سدي الموضوع ...ماتروح...الاطفال رزق شوكت مايجي يجي
بس ماسكتت ظلت تنك براسي...
امشي اوديج للشيخ...
_عمة حاتم مايقبل شلون اطلع من وراه
_عما الدبب...والله اذا ماسمعين الكلام...
الا ازوجه وحدة ولادة...
هو انتو خلفتكم اصلا قليلة...
_عمة فدوة شسويله ...قابل اجبره يوافق
_جنبيت العيارات...هو انتي ماكلته للولد بلسانج وسوالفج ومخبلته...
باجر من الصبح من يمشي لشغله اخذج ...
نروح ونرجع قبل مايرجع...
ظليت حايرة اسوي مثل مادكول...
خاف يعرف حاتم ويزعل...
بالليل...من جنت نايمة يمه...
خليت راسي على صدره...
شم شعري...زهورة شو ماتخلين حنة مثل قبل...
مشتاق لريحتهة...
_باجر اخليلك تدلل...
جان يمشي ايده على شعري يمسده...
_كولي حبيبة عندج شي
_شلون عرفت...
_اعرفج اضلين تحوسين...
وهسة مردتي صدري من كد ماتفرين براسج
فتحت حلكي احجي واذكرت تهديد امه ازوجه
_حويتم ماتريد اطفال
_اكو واحد مايريد ...بس هذا رزق الله شوكت مايجي يجي
_يعني تحبهم
_اكيد...ذولة ذخر لنا من نكبر...
من كال هيج...كلت لازم اسوي كلشي حتى اجيبله طفل...
مثل كل يوم كعدت غباشي سويتلهم ريوك...
عود عمتي وزعت الريوك يوم علية ويوم على سمر..
بس انة ماحب يطلع حويتم بدون ما اشوفه واريكه بيدي...
صار يومية الريوك علية ...
طلعوا منة...ومرت عمي كالت البسي عباتج وامشينا...
رحنا ...
البيت الي جنة كاصديه بالمنطقة الي مقابيلنابس عبرة شارع...
فرحنا مشي...من وصلنا مرت عمي دكت الباب ..
طلعت مرية لابسة كله اسود...
دخلتنا بغرفة جبيرة كلها ريحة بخور...
ومابيها بس بسط بالكاع...
شوي ودخل علينا رجال يطلع بالاربعينات من عمره
جان ضخم جثيث الجسم...
ولحية طويلة...وعيونه ماعرف شلون اوصفهن...
بياض عينه بيها لون احمر...
انة من شفته خفت...وظليت اطكطك...
ولمت نفسي ليش سمعت كلامها...
ظل يحجي وية مرت عمي...وانة طرشيت كمت ما اسمع شي...
اشري اقتربي...تيبست بمكاني...اريد اتحرك ما اكدر..
جرتني مرت عمي...
خلى ايده على راسي ويبدى يقرا...
من خلص نطاني حجاب وشي ملفوف بورقة...
كال اغسلي بيه...
وحاجى مرت عمي كاللها جيبيها بعد اسبوع ولازم نظيفة من الشهرية...
صرت بنص هدومي من كال هيج...
طلعنا...مرت عمي تمشي  ودردم علية..
وانة فكري مشغول ...ما اجي لو شميكون بعد..
رجعت للبيت وصعدت لغرفتي...
فتحت الورقة لنها بيها تراب...كعدت على جربايتي..
والخوف بعده بية...
شوي وطبت علية سمر
_لج ثولة شلون تسمعين كلامها وترحين..
تدرين اذا حاتم درى يكلب الدنيا علة راسج
_مو هية هددتني تزوج حويتم...وانة اموت ولا ياخذ غيري
جنت كاعدة ورافعة راسي لها وبعيني نظرة توسل
اقتربت مني...زهرة اسمعيني خيتي...اني احسج مثل خيتي الصغيرة...
الرجال اذا مو بمزاجه يريد يزوج محد يجبره..
وحاتم عمتي ماتنطخ بيه...
انتي ماشفتي شسوة قبل زواجكم من عرف هية كايلة لبيبتج هية خاطبة له من خواله...
هاي بعدج مامزوجته ....
مو عاد هسة ازوجج وشاف دلالج ...
_خية واذا ماحبلت شسوي
_قنعيه ياخذج للمستوصف...
يكولون جاية بيه دكتورة زينه...
هزيت راسي...
ومثل كل يوميا اول ماسمعت طبتهم...
ركضت جبتله طشت وخليت مي وملح...
صالح...مادشوفين ام محمد ...تعلمي منها..
سمر...والله زهرة حيل مدللة حويتم علة كولته
حاتم...ها بلشتو تباوعون علينا عفونا بحالنا
جانوا يداهرون واني بالي مو يمهم...
احس الحجاية واكفة بزردومي...
اريد اكوله طلعت واخاف...
صعد كدامي فوك...وانة كفيت شغلي وصعدت وراه
هو تمدد على الجرباية ...واني افتر حوله..
اشيل حاجة منة...وارجعها...
_زهيرة لا تفترين خيلتيني...
عندج شي احجي وفضيها...
باوع عليه...مخلي ايده على راسه ومغمض
_مين شفتني مومغمض..
_احس بيج...مااحتاج اشوفج...
كولي حبيبة..ادري ماضمين شي علية
اجيت كعدت على الجرباية يم رجليه...
وبديت افرك بيهن بيد وحدة..
_حويتم الله عليك لا تزعل مني...
ادري الي سويته غلط....
بس والله لخاطرك..اريد افرحنك بطفل..
وهية كالت ازوجنه بس ماتجين
جنت احجي سريع والبك بالحجي لبك
كعد عدل وباوع علية...مادام بديتي تحجي هجي يعني اكو شي وراج...
_ها...اي اني رحت وية عمتي للشيخ
بعدني مكملة حجايتي وهو طفر عصبي...
وصاح بصوت اول مرة اشوفه هجي عصبي
_شلون لج...وين رحتي ...انة موكلت مالج روحة لهناك...
شلون تكسرين كلمتي...
جرني من زندي ...احجي شسوالج
_والله ماسوة شي بس قرأ على راسي ونطاني تراب اغسل بيه...
رفع يده يريد يضربني.
واني من خوفي غطيت راسي بيدي...
_شوفي لج...وعلي اذا اسمع بيج طالعة من وراي مرة ثانية ماتلومين الا نفسج...
عافني ونزل...بس سمعت عياطه جوة على امه...
وشوي كبت عيطة بينهم...ابوه وامه وصالح...
خفت اطلع من الغرفة...
ما رجع للغرفة واني اخوط بالغرفة رايحة جاية
صار العصر وادري يحبون يشربون جاي...
نزلت للمطبخ شغلت الجولة...
دخلت مرت عمي...
_ها ولج ياحية...شعلتيها ورتاحيتي...
هاي فوك الزينية مالتي...
اني اعلمج منة وهيج..
ظلت بس دموعي ادير واني فاتحة حلكي على حجيها...
وديت استكانات الجاي...
بديت من عمي من وصلت يمه ماخذ جاي ومارفع عينه علية بالهول فراش بسط ...
ضجت حيل....
ومارجع الا بالليل...حتى ما اجى على العشى...
طب للغرفة...سلم ونزع دشداشته
تمدد على الجرباية وانطاني ظهره ...
اني جنت لابسة دشداشة جرسي وردي بدون ردن ومتعطرة ومنتظرة اصالحه...
خليت راسي على جتفه وهو مندار عني..
_حويتم تزعل من زهورتك...
ماجاوب...ليش تبقى ساكت...احجي علية...
اضربني بس لا تسكت حباب
_الضرب للحيوانات ومو للبشر...
وهاي عقاب لج حتى لاتكسرين حجايتي بعد
وخري عني...
وخرت بس الدمعة بعيني...ادري غلطت بس كتله
ماضميت عليه...
بقى يومين مايحاجيني وانة ماعرف شسويله...
ومرت عمي شدت وياي اكثر لان كتله...
ثالث يوم استلمتني من الصبح...
خبز وغدة وتنظيف وقبل الظهر ردت اغسل...
_وين مولية
_عمة اريد اغسل احتريت
_اي بنت الباشا حقج مامتعلمة ...
الله يرحم ايام نكل المي...
خلفلله على ابني ...سوة براسج حظ
حتى خوالج هم عافوج ومحد سأل عليج
انة ظليت بس دموعي ادير...
فزيت على صوت حاتم من صاح على امه حتى هية فزت...
_شنو هالحجي يمة
ماسمعت شكال عفتهم وصعدت فوك..
واول مرة ما اوكف اتنصت شيكولون...
دخلت لغرفتي وفتحت كنتوري اطلع بملابسي..
بس وكفت لحظة افكر وين اروح شو لا اهل ولا خوال ولا عمام...
طب حاتم وشافني ...
كعد على الجرباية...
_شدسوين
_شعجب حجيت وياي
_كتلج شدسوين
_وديني لاخوالي
_ليش...ضربتج...هنتج....ازوجت عليج
_حتى لو سويها منو الي....
يتيمة وماعندي احد..
جنت احجي واشاهك بالبجي....
واجيب واشمر بالملابس...
كام حاتم من مكانه وتقرب علية...
جر الملابس من ايدي..هو يجر واني اجر
_هجي زهورة...جا انة شنو...
مو بعينج...
جرني لحظنه...لج اني ابوج وامج واخوج وكل هلج
وغلاتج بكلبي ماتنضامين واني يمج...
ازعل منج اذا سمعتج دكولين ماعندي احد
اريد دكولين لاي احد حويتم كل هلي...
وامي مالج شغل بحجيها ....
مو جديدة عليج...اعتبريها امج..
واتحملي لخاطري...
رفع وجهي له....ما اريد اشوف دموع بعيونج بعد
طول ماخشمي يشم الهوى
_لك طولت العمر ياعمري
_بوية هذا الكلام الزين...
_راجع من وكت
_رجعت لزهرتي...مشتاق لحظنها...
_حويتم اطلب منك شي
_عيوني لج
_يمة رحت فدوة ونذر للعيونك الحلوة
_شو جنج تتغزلين بية...
_احجي صدج...
_تحجي عمري
_اخذني للمستوصف بيه دختورة زينة يكولون
_صار...واسمها دكتورة مو دختورة...
وتعاي هسة طفي نار كلبي...
ثاني يوم جان مخلصين قالب البيت الماخذي صبوه...
كعدني من الصبح...
واخذني للمستوصف...قريب علينا
بقينا ننتظر سرانا واني اطكطك من الخوف...
مو عبالك طابة افحص...
واجى دوري ماقبلوا يطب وياي حاتم...
طبيت وحدي...وبقيت واكفة بالباب...
التفت علية الدكتورة..
_تعاي ماما شبيج واكفة بالباب وخايفة
تقربت من الميز وانة افرك بيدي...
_اكعدي واحجيلي شبيج
كعدت على حافة الكرسي
_انة مزوجة صار ٣ سنوات وماحبلت
باعت علية الدكتور...
_تلث سنوات...ليش ماما شكد عمرج
_١٧ سنة
_الناس تتطور وتعلم بناته واحنة بعدنا نزوجهن بعمر الورد
كومي على السدية افحصج...
_ها دختورة ..شلون يعني...
التفت علية...لاتخافين ماما كومي
فحصتني واني بنص هدومي من المستحة...
_مابيج شي بس التهابات...
راح انطيج دهن وكبسول...واذا مافاد اسويلج تحاليل
طلعت لحاتم وكتله...
اخذ العلاج...
_امشينا ازورج الكاظم
_اي فدوة...بلكت الله والكاظم احبل
وداني فتنا زرنا وراح جابلي كباب...
بقاني كاعدة بالصحن...وادعي
_يالكاظم بجاه كلمن له جاه عندك اريدن احبل...
يتيم وماعندي احد فرحني بطفل
اجى حاتم وتغدينا وظلينا نسولف وللعصر يلا رجعنا
اخذينا دهينة لاهله...
ومن درت عمتي عوجت حلكها...
بقيت شهرين اراجع للدكتورة...
وبعدين حاتم كال كافي اذا الله راد ينطينا...
بيومها نقهرت...والنوب عمتي كامت دكول لعمي
خلي نزوجه هاي مابيها خلفة...
من طلع عمي...كتلها ماتخافين ربج تكسرين بخاطري
_شكو اكسر بخاطرج...ابني واريد افرح بضناه
_بس حاتم مايزوج علية
_هو بكيفه...هسة اخلي مايطيقج
متت قهر.....
كمت اخاف لا صدك يسويها ويزوج...
قل اكلي....والنوب كمت ما اطيق حاتم يتقربلي
اضوج منه...
_شبيج زهرة...صار كم مرة تتحججين وماتقبلين تجين يمي...
ماعرفت شجاوبه...رحت بدلت واجيت...
ومن كام يبوس بية لعبت نفسي وركضت للسطح ازوع...
هو شافني هيج ضاج كلش...
وكام يتاخر يلا يجي بالليل...
انة اظل متانيته...بس من اسمع صوت صعدته على الدرج اسوي نفسي نايمة
_شبيه حاتم...صارله مدة مايبقى بالبيت بس وكت الغدى...
سالتني سمر...جنة كاعدين بالكاع نكلب بانيا...
ونظلمها بابرة وخيط حتة نيبسها للشتى
حجيتلها الصار
_صخام...لج زهيرة خاف عمتي مسويتلك فراك
لطمت على صدري ...
_بيومة ...جا شسوي
_اوكفي خلي اروح لاهلي...جيرانهم شوافة اخليها تشوفلج...
وانتي حاولي دوسين علة نفسج وتتقربين لزلمتج
بيومها غسلت ولبست ثوب مال نوم...
وتعطرت...حاتم كام يجيبلي عطورات من السوك
وانتظرت حاتم...
من طب الغرفة...
_ها...شو اليوم كاعدة لهسة
_منتظرتك حبيب گلبي...ليش حويتم عايفني
_هو انة لو انتي حسرة الزمج تصفرين وتظلين ادفعين...
_جان مالي خلك...
اجى كعد يمي...ولزم ايدي
_ليش ماكلتي...جان وديتج للمستوصف
_لا هسة احسن
مددني على جرباية ونام بصفي...
بدة يتلمس ويبوس وانة احس روحي تريد تطلع...
وماتحملت دفعته وركضت للسطح ازوع...
لحكني...كال شغلتج و خالية باجر اوديج للمستوصف اخاف عندج شي بمعدتج...
...وللحكاية بقية