شفاه ذابلة

حب بدون امل

يسعد يومكم...اتفقت اول مانشرت التنزيل حسب الفراغ...وبعدين سويته بين يوم ويوم حتى ماتضيع متعة متابعة القصة...
يوميا ماكدر تعذروني...عندي دوام والتزامات هواي...
بارت اليوم نزلته لخاطركم ولان البنات بالفيس طلبوه مني...واني ماحب اردهم...
لذلك حبايب لا تكولون بارت قصير اعتبروه هدية لكم ....متابعة ممتعة...

البارت العاشر
همس ليل
ثكلت رجلية...ماعرف شوكت نزلت للكاع...
احاول اسالها منو...بس لساني مايقبل ينطق
وشة بأذني صارت..وحسيت معدتي انكلبت...
_ع..م..ة..من...و
الكلمات طلعت متقاطعة...
_فيصل
من سمعته حسيت بثكل براسي...
زادت الوشة وكمت ما اسمع شتحاجيني...
مدري هية تنعى واني عبالي وياي الحجي...
شوية وحسيت اريد اتقيء...طلعت ركض برة البيت...
جانت اكو نخلة قريب وكفت بسدها
وظليت اذب من راسي...لحد مانزلت للكاع مستندة للنخلة...
احساس فضيع تحسيه بلحظة فقدي شي غالي..
صح فرحت من عرفت مو هو...
بس كرهت نفسي بنفس اللحظة...
فيصل هم شاب زوجوه اهله من وكت لان ولد على ست بنات...
والنوب عنده تلث بنات ..ابو فيصل يصير ابن عم حسنة...
حرارة صعدت بكل جسمي...رغم احنة بعدنا بشهر الثالث...
والجو بيه برودة وخاصة احنة منطقة زراعية مفتوحة...
ركضت للساكية ونزلت بيها واني مجلبة بالخشبة...
خليت راسي عليها وجسمي طامس بالمي البارد..
بس اريد اخفف حرورته...
لحد ماحسيت كرصني البرد...
طلعت...هب هوى بارد...واني امشي مبلل وارجف ..
دخلت للبيت ...لكيت حسنة رايحة...
غيرت ملابسي...ولفيت جسمي بطانية وتمددت بفراشي
واني ارجف من البرد...هسة شجاني ونزلت بالمي البارد...
بس بلحظتها اشتعلت نار...
غفيت وماحسيت الا بالليل وحسنة فوك راسي
_خايبة شبيج ..تونين...انة ناقصتج
_شو ظلمة
_ماتكولين لروحج...شو متلفلفة ونايمة وكلشي مامسوية
_ماعرف بردانة حيل...
خلت ايدها على كصتي...
_دهر صابج...كصتج تشتعل نار
كامت...اشوفها تجر نفسها جر...الظاهر حيل ماذية نفسها باللطم...
رجعت جايبتلي شي حار...
_اكعدي اشربي
_هاي شنو
_خايبة مالي خلك للمناهدة مالتج...
كومي اشربي...
صدك كعدت شربته ونمت للصبح كعدت عركانة صايرة مي...
بس الصخونة فاكتني...
كمت مثل كل يوم على شغلي..
بس بيومها بطني حيل اسهال..
حتى اكل فقدت شهيتي..
بقيت يومين هيج...
حسيت حتة دوخة صارت عندي...
حسنة ملتهية بالفاتحة ..
تروح من الصبح لليل يلا ترجع...
والشغل كل براسي..
يوم الثالث تأخرت يلا اجت...جنت نايمة...
وعيت عليها من دخلت ورجعت غفيت...
كعدت وية الفجر ...جريت ربطي على راسي وخليتها مفتوحة من كدام...
كمت توضيت...من رفعت راسي دخت...
سندت نفسي للحايط ونزلت وياه للكاع...
شفت خيال طلع من باب الغرفة...
لابس دشداشة اريد اركز منو ...
عيني مغوشة...
بس من اجى دنك علية وحاجاني ميزته
_فرحة...شبيج
_حسام...حجيتها واني افرك بعيني
_لا خياله...شبيج
تبسمت هذا اسلوبه...وماتوقع غير رد
_شبيج خبلة تضحكين وية نفسج
سدي ربطتج وكومي ...
عافني ودخل للغرفة...
ميخالف خلك جاف وماتتحجى بس كون سالم...
كمت صليت وخليت القوري على النار...
وطلعت اجيب مي...بس الدوخة بعده لازمتني...
كعدت على الساكية اريد اتوازن يلا اخذ مي...
من حسيت نفسي وية احسن..
نزلت التنكة مليتها...وية ماداسحبها ورفعت راسي
اجتني دوخة قوية وزلت رجلي وكعت بنص الساكية
الساكية مو جبيرة بس مليانة مي...
والمي يصعد فوك راسي...
وكعتي صارت فجأة...احس المي وصل لرتين
اختنكت واريد اجلب بشي حتة ارفع راسي واجر نفس ماكو...
جنت ارفعه ويمكن اصيح...
وارجع اغط واختنك وايدي تراوح بالهوى بس كون اجلب بشي...
حسيت بالموت اجاني....فجأة سمعت صوت طبة يمي ...واحد جلب بية ورفع راسي برة المي...
جرني للجرف ....
_جلبي بية..جان يسحبني وياه ...
بس المي الي دخل بصدري خلاني خاوية ماكدر اعينه....
حاول يرفعني للجرف...
_فرحة حاولي ترفعين جسمج...ساعديني
حاولت اجلب بالكصب والحشيش واجر نفسي على الجرف...
صعد هو وجرني وياه...سند ظهري على الشجرة.
وتمدد يمي يلهث...
_عرفت خبالج يوم يغركج
سمعت حجايته.. واني احس المي يصعد لحلكي
درت راسي وظليت استفرغ...
حسيته يطب على ظهري...
_اي ذبيه المي لا يخنك صدرج...
ارتاحيت شوي بعد مااستفرغت...
وبعد جسمي يرجف من الخوف والرهبة
_هم رجعتي لثولج تسبحين
_ادري يامخبل يسبح بهالبرد ومن الصبح
جان مكبص مقابيلي...
_شلون وكعتي..
_دخت وماحسيت الا اني بنص المي...
جنت الهث واحجي...الكلمة كوة تطلع مني
خليت ايدي على صدري...
النفس ضيق جان...
_همزين عطتي واني جنت كاعد...طلعت على صوتج..لو نايم جان...
باوع علية...نظرته جانت حنينة...
جرني فجاة لحضنه...شبكني بقوة...
_لج فرحة گلبي نخمط من سمعت صوتج....طلعت اركض...
ومن شفتج تلوحين بيدج...
فرفحت روحي....
جان يحجي ويجرني لحظنه حيل يشبكني...
ايده تمسد بشعري وجه مدفون بركبتي...
ردت ابعده عني ..بس دفو حظنه جمدني...
احساس زحف من رجلية وصعد راسي...
بعدني عنه شوي ولزم وجهي بين ايديه...
وهو يباوع على ملاحمي ويتأملها...
_عيونج سلوتي هناك على الساتر...
من يصير هجوم ونأيس ...
اذكرهن احس گلبي يرجع يرغب للحياة..
احبج يافرحة...شكد.ردت ابتعد ومااشوفج...
بس ما ابتعدتي عن تفكيري...
وگلبي غصب عني يجيبني لج من يفيض بيه الشوك
طفلة ولعبتي بية لعب...
_مو طفلة اني عمري صار ١٦
ضحك....ولج شفتي من حياتج حتة مو طفلة
سكت...
ابهامه كام يفركه بخدي...ومن حجى صوته صار بي بحة...
فرحة ما اكدر بعد...صار سنتين احاول بيها ...
بس هسة رفعت الراية البيضة ...
الاجازة التجي نزوج...
من كال هيج اذكرت حجايته...مكطمة...
بعدت ايديه...واستندت على الشجرة...
وكمت...
_ما انفعك اني...
هو جان باقي نفس كعدته...
رفع راسه لي....ليش
_مكطمة ...ماعندي لا اهل ولا عزوة...
جنت احجي واتلفت وايدي على شعري..
شوكت وكعت ربطتي وينها...
رجعت عيوني له...وهو فاتح عينه...
انتبهت هو بالفانيلا والشورت...
استحيت ودنكت...اجيت امشي...
كام فجأة ولزمني من زندي...
_اكيد سمعتي حجيي...من ذيج المرة من كلتيها ظليت صافن...
بس هسة تأكدت...
فرحة اني ماخاف على نفسي...
اخاف على اهلي...فكرت بالمستقبل...
لو اخاف جان مارحت بعز الشغلة وطلعتج من بيت ام حارث...
_وشتغير هسة
_تغيرت مشاعري...وطز بكلشي...
مانعيش يومية...
من تشوفين الموت كدامج...
تعرفين الدنيا صغيرة والعمر مرة نعيشه..
خلي نعيشه براحة...
_لا حسام فكر زين...
جريت ايدي منه...ومشيت شوي...
بعدين التفت له...
ونسيت اشكرك واكولك رحمة لله والديك لان ساعدتني وطلعتني ...
مشيت واني رافعة راسي...
ما اكدر انسى حجاياته من كالها لامه...
بنص الطريق شفت دشداشته...
الظاهر من جاي يركض نازعها بطريقه...
وصلت للبيت غيرت ملابسي وسويتلهم ريوك...
وديت الصينية ورحت بالغرفة شغلت نفسي لحد ما طلع...
نزلت دموعي...ذني صويحباتي من عمري ست سنين
متلازمين ما نتفارك....
...وللحكاية بقية ...