شفاه ذابلة

نهاية عذاب

مساؤكم خير وعافية ...بما ان اليوم نختم الجزء الاول من حياة هدى...وماقصرت وياكم نشرت يوميا
لذلك راح اخذ استراحة يومين...حتى ايدي ترتاح ...وبعدها نرجع نواصل النشر...متابعة ممتعة
البارت الثالث والعشرون
همس ليل
بقيت الوب بغرفتي...
هبة جانت يم اهلها وعلاء وياهة...
وعمي طالع...
شلون هسة خاف صار بيها شي ...
ياربي ...
ظليت على ناري للمغرب ....
نزلت كم مرة وماكو حس بس عمي اجي وحجيتله
خابر على عمتي لكاها ناسية تلفونها...
خابر على صفاء كاله بالمستشفى....
_خوما بيها شي
_ماعرف عمو ..
صعدت لغرفتي الوب بعدها بساعة اجى صفاء...
اول مادخل وكفت وتلكيته
_ها بشر شلونها...خوما الطفل بي شي
_بعد ننتظر دكتورتها ..ضربوها ابر
كعد على الجرباية....هدى شلون وكعت
_زحلكت...
ماردت اكول رادت تضربني
_يعني مو انتي وكعتيها
تفاجأت...صدك تحجي صفاء...
ليش اوكعها ...
_اني اريد اعرف...شغلة غيرة نسوان
_لا طبعا ما اسويها...انتي تعرفني مو جديد علية
_هو لان اعرفج أسال...
بس خالتي كالت شافتج دفعتيها...
طبعا جان يحجي وبنبرة صوته اتهام...
وكل كلمة يكولها سجينة ويغرزها بكلبي...
_وين شافتني اصلا جانت وية عمتي بالهول...
وعلى صيحتها اجني
اسال عمتي...
سكت شوية...
_شو سكتت...لا اتكول امك نفس الحجاية
_امي ماكالت شفت...بس كالت غيرة ضراير
صفنت شلون ظلم هذا وشكدر اسوي ...
وشلون ادافع
_وهسة شنو صدكتهن وجاي تحاكمني لو شنو بالضبط فهمني...
رفعت صوتي واني واكفة مقابيله احجي...
_لا ترفعين صوتج...اني جاي اسألج...
اذا استفزتج بحجاية و...
_و وشنو دفعتها....صدك تحجي...
هيج اشوف عقلي صغير واغار لدرجة أذي المقابيلي
هاي تاليتها ابن عمي...
فوك كل الي متحملته وياك جاي تتهمني
وكف مقابيلي ...شنومتحملة...مجوعج ...معريج...مكعدج بالشارع..
مقصر وياج بشي...
شنو المتحملة...
رفع صوته حيل...
_وينك من حملت مرتك لسة...صار شكد ماجاي بايت ليلة هنا...
واذا اجيت تلفون واحد تطلع تركض...
صار شكد ماكاعد وياي لو ربع ساعة...
هذا وعدك من تتزوج..
_كولي هيج...غيرة نسوان....
واذا انشغلت شوية تنكلب الدنيا...
_شبيك انتة تخبلت...تريدون بس اتثبتون التهمة علية
لزم زندي الايسر بقوة وبدة يهزني
_لا ترفعين صوتج...ولا تجاوزين...
افتهمتي لو لا...
ماعدنا شي وياج حتى نثبت عليج شي
لو انتي مريضة تصورين كل الناس ضدج
_مو اني المريضة...روح شوف المريضة منو...
والي بعدها تغار من شي قديم وتريد اطلعها علية
روح شوف امك واسالها ليش تتبلى علية
لو سال خالتك ليش بطلت بنتها وزوجتها لك
ماحس الا راشدي اجاني...
هد زندي وجلب بشعري...
_النوب صارت اتهام اعراض...
على الاقل مو هنة الي اجن نص الليل شاردات
ماكمل الجملة...وسكت
واني جنت احاول ادفع ايده اليمنى المجلبة بشعري...
ومن كال هيج عبالك اذكر رخت ايده...
واني دفعتها حيل فلتت ايدي اليمنى وانضربت على ميز التواليت...
صحت منها لان بيها كسر مضاعف من الحادثة
مدري صحت من حجايته الي طعنتي ...
وكف يباوع علية واني صفنت بوجهه
_مشكور ابن عمي ...ماقصرت رحم لله والديك
من سترت عرضك...
فتت من يمه واني لازمة ايدي...
والله حجايته وجعتني اكثر من الالم ايدي...
جريت جنطة من الكنتور...
_وين مولية
_انهزم ...متعودة
_مالج طلعة...اكسر رجلج
_كسرت الي اكبر منها
جنت احجي بهدوء...
مرات يصير عندك خدر بالاحساس من كثر الالام الي بداخلك...
_قسم بذات الله اذا طلعتي باب البيت ماترجعين
_كتله بدون ماتحلف...
راح احققلك الي تريده...
_اريد اشوف يامرة تطلع..جان يحجي بعصبية
طلع وقفل الباب علية...
كعدت على الجرباية لازمة ايدي اليمنى باليسرى...
جريت التلفون ودكيت على امي...
اول ما اجاني صوتها عبالك راح الخدر ..
وتوزع الالم بكل جزء من جسمي...
شهكت بالتلفون...
_ماما الحكيني
_شبيج يمة اسم الله شصار
_ادري انتي ماتريديني...ليش هيج عايفتني
مو حرام عليج...
خطية امي بين اسبوع والثاني تجيني...
بس جان اكو قهر بداخلي واريد انفجر بواحد
_يمة شبيج فهميني
_تعاي اخذيني راح اموت...تعرفين شنو اموت
جنت ابجي واصيح بالتلفون
_جاية يمة جاية بس على كيفج
سمعت دك على الباب
_عمو هدى افتحي الباب...
شبيج ليش اصيحين
تقربت من الباب
_عمو ابنك قفل الباب علية
ابنك الي جبرته يزوجني..
جاي هسة يعيرني لان ستر بنت عمه
_لا تنقهرين بابا هسة اطيح حظه...
خلي اشوف مفتاح...
نزل عمي بس بعد ما انفجرت ...
بدى الالم ايدي يزيد...
وعمي خطية صاعد نازل...يطمن بية
يخابر على صفاء مايجاوب...
سمعته خابر علاء
_شوفلي هذا الجلب اخوك وين ولى
ادك عليه مايجاوب ....
هسة تجي...
بديت الوب من ايدي ..كامت حيل توجعني
سمعت صوت علاء يحاجيني
_خيتي هدى ...شوفي بلكت اكو مفتاح يمج
_ماكو علاء دورت...
عفية علاء ايدي موتتني...
كمت ابجي من الالم...
سمعت علاء كام يسب ويغلط...
_ميخالف خيتي...دقيقة ادوره اذا مالكيته اكسر الباب...
نزل وبقيت وحدي كلبت المجرات ادور بيد وحد مسكن...
شوية سمعت صوت عالي...
خفت لا رجع صفاء...بس من سمعت صوت امي واحمد يحاجوني ...
حسيت مثل الطفلة التايهة ولكت اهلها...
ظليت ابجي بصوت وماكدر اجاوب...
احمد...هدى خوما بيج شي...
فرحة...يمة جاوبيني فدوة
ماسمع الا الباب تندفع...
علاء كسر الباب...من شفت امي ذبيت نفسي بحظنها
جان هواي يم الباب بس ماميزتهم...
احمد...امشي ماتبقين لحظة هنا
عدي...على كيفك وليدي...
كلشي يصير بين المزوجين...
وبعدين هذا بيتها هم...
علاء...احمد خلي ناخذها للمستشفى قبل مايصير الحظر...
امي جرتني للغرفة وهمة يحجون...
كعدتني على الجرباية وتلم بملابسي بالجنطة...
اباوع عليها ميتة قهر ...
رفعت راسها اجت صورة ابوية كبالها...
جنت مخلية صورة صغيرة له ...
صح مالحكت عليه ...بس حبيته من كد ماتحجيلي عنه...
اخذت الصورة...شوف نفس الغرفة ...مثل ماطلعوني بيوم اكشر ...طلعوا بنتك...لا تعتب وادكول اهلي بعد
يمكن نست اني موجودة نقهرت عليها
شالت جنطتي...يلا يمة ...
نزلنا واحمد واكف ساكت وعمي وعلاء يحجون وياه
من شافنا عمي نزلنا...
فرحة...ابو صفاء هية هاي امانة امك وحسام...
انقهر من حجايتها ودنك...
عمي حباب انقهرت عليه...اجيت يمه...بست راسه
ماقصرت عمي ...بس ما اكدر بعد
بس هز راسه...
اجيت اطلع...حاجاني علاء ...
_لخاطري هداوي...هذا بيتج ليش طالعة...
مااخلي يوصل يروح لذاك بيته
_لا خوية مالي مكان هنا بعد...
طلعنا بالسيارة ...
احمد ...شلون ايدج...
تتحملين نطلع من بغداد وبكربلا نروح مستشفى
فرحة...لايمة خطية خاف نلكه المستشفيات بس خفر
خلي انشوف هنا مستشفى
احمد..لحد مانشوف ويسولها شي...
يصير حظر التجوال وين نروح...
فرحة...نروح للكاظم نحجز ونبات وهم نزور صار هواي ما زايرين...
صدك اخذوني للمستشفى...
الدكتور كال لان عدها كسر سابق وانظربت لازم نجبسها...
جبسوها...وطلعنا للكاظم...حجزنا فندق ورحنا نزور
طبعا اصلا طالعة بالعباية...
من طببت للامام...ماحجيت شي..ظلن بس دموعي ادير...
وحتى مادعيت...ماعرف شكول وشاريد...
حسيت حياتي منتهية...
طلعنا تعشينا ورجعنا للفندق ...
بعيون احمد سؤال شصار...
بس ماسأل ...بالفندق امي سألت...
من حجيت...كالت مو جديدة على زهراء هيج طلعات
مافهمت شقصدت ...
ادري عمي راد يزوج امي علمود يبقينة يمه
بس ماعرف التفاصيل كاملة...
رجعنا لبيت اهلي ...اي بيت اهلي ...هنا ربيت ...وهنا وكبرت...هنا ماسمعت كلمة تجرح...
ولا يوم ردولي طلب...رغم عمي حيدر غريب
بس جان احن من الاب علينا...
صح من زوجت كام مايداخل...
جان يكول بالموضوع حساسية وما اريد احرج احد
بس هم ماعافني...دوم يدزلي امي...
ومن تجي مامقصر ماداز وياهة....
حتى الايجار مال بيتنا كام مايخليها تاخذ منه ينقسم بيني وبين احمد...
بس جنة ننطيها حتى اثوب لابوية ولبيبتي...
ولحد مازوجت من تجيني راتب شهري يدزلي...
من وصلت جان واكف بالباب...من شفته دمعت عيني
اجى باس راسي...
_ولا تهونين بوية...
هذا بيتج واحنة خطارج..
ولي تريديه يجرالج...
بقيت كم يوم فاصلة عن العالم...
كل ماذكر حجايته ينعاد نفس الالم علية...
تلفوني قفلته....
وامي كالت صفاء مخابر احمد ومتلاغي وياه...
وبعد ماحجينة بالموضوع...
من زوج صفاء تعودت ما انام الا اخذ فاليوم...
مر اسبوع على وجودي...
باب البيت ماطلعت...
والتهيت اغلب وقتي نايمة...لو الاعب حسومي ابن احمد صار عمره تلث اشهر..ويخبل
دوامي احمد اخذ تقرير من المستشفى...
وسوالي اجازة وكال قبل ماتخلص اسويلج نقل...
اجى عمي نهاية الاسبوع هو وعلاء وهبة...
طبعا عمي حيدر ضيفهم وماقصر ...
وكال منك لبنت اخوك اذا تريد ترجع...
بس قبل ما ادخل كال بوية مثل ماكتلج...
هنا بيتج مامجبورة تتحملين شي...
عدي...عمو هدى...ابني غلطان بكد شعر راسه
بس بلحظة عصبية كلشي واحد يحجي...
وانتي حبابة وماتقصرين لازم تتحملين
_لاعمي مو لازم اتحمل...تحملت هواي
مابقى بس يتهموني وكعت ابنه...
اذا عدت الله يعلم شيسون المرة التجي
_منو يكدر والله اكلب الدنيا عليهم...
ليش ماعرف اخلاقج
_جان رجلي وابن عمي كاللهم نفس الشي
علاء...هدى ارجعي بكل الاحوال البيت بيتج هم
واذا ماتريدين اتشوفيه...
اشو نص نهارج بالدوام...
والباقي هو بذاك بيته
_وعليش علاء....ابقى يم اهلي معززة مكرمة
عدي..ليش عمو لعد احنة مو اهلج
سكتت...وشكد حاولوا واني ماقبلت
هبة كالت عمي لعب طوبة بمرته...
وزعلت كالتله خلصنة من فرحة طلعتنا بنته
وصفاء يوم رجع ومالكاج كلب الدنيا...
وتعارك وية علاء شلون يكسر الباب ومايخابره
_ومريم طلعت من المستشفى...
_طلعت عرج مايطكها..
بس تعرفين اصور جان فلم مسوية...
ومتعمدة تنرفز...
_ليش
_مو صفاء طلع جان يدور بيت طابقين بنفس فرعنا
كال ماترهم ابقى هيج ابات بس هنا وعايف هدى
وهية متخبلة...
تنهدت...هسة بقى بس لها
_لج ليش تعوفيه لها جاهز مجهز
_هبة هو مو بيت حتى اعوفه جاهز مجهز...
انسان وهو يعرف قرارته ويعرف يختار...
وهاي شفتي عينج بعد ماخلفت وكامت ليلا تخربطت وخفت...
من يجي ابنها راح يصير يوم صخن...يوم سنونه
وهكذا...
_هو ليش لعد يدور على بيت واحد ويفصله
_لا يدور ولا هم يحزنون...خلي لها
من طلعوا بعد ما اعجزوا وياي...
علاء...هدى افتحي تلفونج...
صدكت بالليل فتحته...
اجت المسجات تركع...بهالوكت جنت افعل نت على السيم كارت...
وصفاء هم...
جانت الرسايل كلها عتب...
ماجاوبت عليها...اجتني مسج
_ظهر عندي شفتي الرسايل...
ليش مجاوبين
قريتها وماجاوبت
_هدى هيج هنت عليج...
لحظة عصبية...
وانتي هم ماقصرتي...
استفزيتيني...
جاوبي حبيبتي...
_حمد لله على سلامة مرتك ويوم تشوف ولي العهد
_انتي مرتي وانتي الاصل
_اني حي الله بنت عمك الي سترت عليها
بقى شوية يلا جاوب...
_عمري مافكرت بهالشي...
كتلج لحظة عصبية...
_هو الانسان بعصبيته يطلع شكو بكلبه ضامه
_شنو الي يرضيج
_انتة كلت اذا طلعت من البيت ماترجعين...
اني طلعت ليش تريد ارجع...طلكني صفاء
_ماتعيدين هاي الحجاية...مستحيل اسويها...
كلتها علمود ماطلعين...
_ماعندي بعد حجي وياك...
ابن عمي طلك وفضها...
رجعت قفلت موبايلي...وبعد مافتحته...
بعد اسبوع يوم الجمعة اجى عمي وياه صفاء..
ارتبكت حيل وماردت اواجه...
بس عمي حيدر صاحني...وبعد ماسلمت طلعوا وعافونا سوة
جان كاعد مقابيلي...
_شلون ايدج صارت
باوعت عليها...زينة
تنهد...
_ليش ماتباوعين علية...هيج كارهتني
_الي يحب صعب يكره
_هدى يكفي لعد كومي نرجع لبيتنا وهناك نتعاتب
_وحلفانك
_ماراح احاسبج على طلعتج ...بس ما اريد تكرر
بس ارجعي
رفعت راسي له
_صعب صفاء...الي بينا نكسر..
كام من مكانه وكعد يمي....دارني عليه
_هدى الي بينا مو بس زواج وعشرة وقرابة
الي بينا اكثر من هيج...
نسيت حبنا...نسيتي سهراتنا واحد وية الثاني من عنده شي...
وكفاتنا سوة...
مرينا بهواي امور...جنتي سند لي وجنت سند لج
ليش تبيعين كل هذا
_مو اني الي بعت...انتة باول موقف...
وبعدين ياحب هذا...
صفاء لا تضحك على نفسك ...انتة عمرك ماحبيتني
جنت واجب لك ...بنت عمك وابوك جبرك تزوجها
لذلك عمرك ماكلتها
_ورب العزة احبج...وية النفس انتي...
وحتى من ازوجت بموافقتج...
ليش قبلتي لعد...
_كتلك سابقا عمري ماراح اقبل تزوج...
بس شفتك مامتمسك...وتريد اطفال يعني اول وتالي
تزوج...
كلت بلكت تطلع بنت اوادم وخلفتك خلفتي...
ما ادري جبتلي حية...من بدايتها هيج بعدين شلون
_مالج غرض بيها ...لج طابق وحد...
وارجع اكولج الي تريديه يصير...
_كد كلمتك
_عمرج شفتي غير هالشي
وكفت...واني اريد اطلكني...
وكف مقابيلي...ماكو طلاك...تبقين طول عمرج معلكة هيج
عفته وطلعت....راحوا واني مصرة على رأي...
احمد نقلني من صارت نص السنة...
وكمت اداوم متوسطة يمهم صح بعيدة...
بس رحبت بالتعب...يخليني ما افكر....
غيرت رقم تلفوني...
اجى عمي مرتين وتلاثة واني بقيت مصرة
شي بداخلي انكسر...ليش ارجع شنو راح يقدملي
عمي بعد فترة تفاجانا راد احمد واني بالعقاري
رحنا لكيناه بايع البيت...
طبعا عماتي من تنازلنا صار البيت بالنص لي ولاحمد نص ولعمي نص ثاني والبيت جبير بس قديم
مشتري ١٢٥ متر ومرته متخبلة ...
احمد كام باع بيتنا وامي ماقبلت تاخذ شي...
وعمي حيدر كال لها اتنازلي لهم...
احمد اشترى بيتين واحد.بصف الثاني كل واحد ١٢٥ متر وجدد وسجل لكي  جزء وياي جزء وياه
كال حتى بكل بيت تريد تكعد لها حصة...
طبعا أجرناهن....
مرت سنة وشكد احمد حجى وية صفاء
ووية عمي ماقبل يطلك...
اجته بنية....مسميها هدى...
من كالت هبة...بيومها للصبح مانمت ظليت ابجي...
وكل ما اشتري رقم جديد ...
ياخذه من هبة ويراسلني لو يتصل...
اغيره لو احظر رقمه...
بعد السنة رفعت قضية طلاك
وهو تخبل وماحضر...
بس عمي حيدر واحمد راحوا على عمي عدي
وحجوا وياه وكالوا حتى يبقى الود خلي يطلك
وهبة كالت تعاركوا ...
خابرته واول ما سمع صوتي
_ماحنيتي...ماجنت اصور هيج گلبج حجر
_صفاء...لخاطر العشرى طلك
_ليش هدى ...شتريدين كتلج اسويلج
_انتة كلت كد كلمتك...واني هذا طلبي
_هيج بايعة العشرى بنت عمي...
صار...
فعلا اسبوع وصلني بلاغ طلاكي...
بس اثاري الكلام سهل ومن اتصير صدك
الاحساس غير..
الم...خذلان...فشل...حب...حقد...
كلها مشاعر انجمعت واني اشوف ورقتي بيدي
ورقة علنت نهاية مرحلة حلوة ومرة بحياتي
صفطت الورقة وخليتها بالكنتور واني امسح ادموعي واقرر ابدي حياة جديدة...
...وللحكاية بقية...