شفاه ذابلة

حلم ام كابوس

مساؤكم عافية...قربنا من النهاية... بارتين ونختم قصتنا....
المفروض اليوم استراحة بس تأجلت طلعتي لباجر
اذا باجر مانزلت اعذروني....متابعة ممتعة

البارت الثامن والعشرون
همس ليل
_منو هذا سعيد الحظ
_علي اخو عبير تعرفي
اتفاجأت وظليت صافنة بوجهه
باوعت على امي...ورجعت باوعت عليه
_عمو بس علي مزوج وعنده جهال
_بوية شكو بيها...هنانا الزلمة يزوج مرة ومرتين
_ميخالف عمو...بس اذا عنده عذر...
اذا ماعنده ليش يزوج
_شوفي بوية...الزواج اشكال بيه...
واكو امور بين الزلمة ومريته مانعرف بيها
ماكو زلمة يزوج بدون ماعنده سبب...
خاصة مثل علي
_يعني هسة كل واحد يزوج هنا عنده سبب
_لا بوية مو كل الزلم...اكو فراغة عين عدهم
بس مو  الي مثل علي قصدي
_لا عمي...لا ماكدر اكسر بغيري
اني انكسرت رغم جان عنده سبب يزوج
_بوية زين اكو زلمة ثاني...
اليوم من الصبح عراريس هلو علية
_منو..
_ناصر...
جنت متربعة على القنفة...
راسا نزلت رجلي بالكاع...
واني استعد عبالك لهجوم
_صدك تحجي عمو...ليش مو على ايدك الصار
_اعرفن عمي اعرفن...
بس عمي ناصر هواي تغير...
مو ذاك ناصر الطايش...
تربى عدل وصار زلمة ينحلف براسه
والعرب كلها تتمنى تنطي مرة
_حتى لو عمي هم يبق مزوج ..
واشو عنده ولد وبنية ومرته حامل
وخوش بنية بعد شيريد
_بوية ناصر تعرفينه من زمان عينه منج
وهسع زاد ما قل...
مابيها شي...
واذا مزوج...بوية لا زعلين مني
انتي هم مطلكة اكيد مايجيج واحد خالي
واحنة الزلمة لو شلون ماتكون مرته
مايطلكها بس يزوج عليها
صح كلامه وجعني حيل...
بس ماكال غير الحقيقة...
ابقى مطلكة وفوكها ماخلف...
يعني فرصي بس الي مزوج لان هنا مايطلكون
ها واذا اكو ارمل...
_عمو لعد خليني هيج احسن...
ما اهدم بيت احد...ولا اكسر كلب وحدة
_بوية شسالفة ...ليش تهدمين بيوت
مو كلنالج هنانا عدنا عادي
سكتت...
فرحة...ابو حسين خليها براحته
حيدر...براحتج بوية براحتج ...
بس فكري زين...محد دايم لاحد
والاخو اخو مرته...
عافنا وكام...
امي لحكته....
ثاني يوم جان عدنا دوام...
طلعت وعيوني ما اكدر افتحها...
الليل كله باقية سهرانة افكر...
شسوي لا ناصر فاك ياخة عني
ولا صفاء الي كل فترة يخلي هبة تحاجيني
وكل ظنه مامزوجة علموده
والنوب كملها علي....
ذكرت المثل الي يكول...
كثرن خطاطبيج يابنتي وبرتي
مرينة من يم مدرسة علي...
جان اكو سيارة تلوف...وكفت سيارتنا وقبلها سيارتين
باوعت شفت علي واكف وحوله جهال هواي يحاجيهم...
تحركت سيارتنا بس اشوف علي فجاة ركض
باوعت باتجاه ركضته...
شفت طفل يمكن بالاول ...يركض يعبر الشارع
بس بلحظة تحركت اول سيارة قبلنا
بعدها ماعرف الصار بس حسيت نفسي اتقدمت وانضربت بالكشن مال السايق
وصياح المدرسات اشتغل...وكف حسين ونزل يركض
اريد افتح باب السيارة ما اكدر رجلية جمدت من الهبطة...
واذكرت الانفجار...
المدرسة الي يمي...
_ست هدى انزلي على الهوى وجهج اصفر
ترة مابينا شي...
فتحت الباب اريد انزل...رفعت راسي
شفت علي شايل الطفل بيده...
ويركض لسيارته...
التفت باوع علينا...عبالك يخير نفسه
تالي ركب سيارته وياه مرة  ...وساق
حسين رجع علينا...
_اعذرونا ...راح اخذلكم سيارة توصلكم للمدرسة
جاوبت وحدة من المدرسات
_لا يامدرسة...بعد هالهبطة...هسع نخابر المديرة
_هو شصار ...حجيت وياه...
وكلبي يم الراح هسة بسيارته
_ست طفل راد يعبر الشارع...والسيارات مو جانت واكفة
تحركت اول سيارة وصاحبها جنى مستعجل...
شاف الطفل راد يتفاداه..ضرب بريك
واحنة وراه واحد انضرب بالثاني
_والطفل
_مالحك يوخر...ضربه اخذه ابو حسن للمستشفى..
اني على نفس كعدتي بالسيارة...
بس طلعت رجلي برة....اريد اكوم مااكدر...
حسين راح خابر ورجع علية...
_خابرت عمي ابو حسين..لان ادري باحمد بالدوام
هسع يجي...
بس الاجى ناصر...
جان اكو خوفة بعيونه...راسا اتقدم علية
_هاهدى بيج شي
هزيت راسي ب لا
_كومي اوصلنج للبيت
ماعارضت...
صعدت وياه ويانة باقي المدرسات
وصلهن بدون حجي...
ورجع ديوصلني...
جنت كاعدة يمه بالصدر...
_وجهج اصفر...اخذنج للمستشفى
_لا مابية شي ...بس وصلني للبيت
_ماتعرفين من خابرني حسين...
احسن گلبي راد يوكف....
_ناصر...رحمة لوالديك...مو وكتها
_ليش اصديني....اعرفن غلطت وياج...
ودحاولن بكل الطرق ارضيج ولا جن يمج
_تعرف شنو الي يرضيني
_بس أمري
_تلتفت لعائلتك وتعوفني بحالي...
ثق باالله راح ارضى بهالشكل..
بعد بيا لغة اكولها تريد..
_صار.....بس اريدن تخلين ابالج
رب الي انتظرت عشر سنين...حتى من بعدي عن عيني...
هم بقى حبج بكلبي...مايوم نسيت ولا راحن انسى
سكتت ...
مدري انقهر على حاله...
مدري على حالي...دنيا عوجة ماتنطي احد مثل مايريد
وصلت وشفت امي بالباب واكفة...
تلكتني شبكتني...
بقى بالي يم الطفل والي شاله...
كلت لعبير من باب اريد اعرف شصار بالطفل تخابر
وفعلا خابرت...
كالت الطفل مكسورة رجله ...وعلي باقي وياه لحد ماجاين اهله ومتاكد من وضعه يلا راجع
من اطمنت يلا رحت نمت...
بعدها كم يوم عبير اجتني...
_هدى...اكدر اسولف وياج
_طبعا تعاي بطوط...صايرة بطة وانتي وكرش
جنت فارشة مدة بالحديقة وكاعدة العب وية حسام
الصغيرون
عبير جابت صينية جاي وكليجة
اخذتها منها حتى تكعد
_اريدن اسولف عن علي
جنت احاول ابعد ايد حسام عن الجاي...
ومن سمعت حجايتها جمدت ايدي
_شبيه
_ليش ماتوافقين عليه
رفعت عيني لها...منو كالج عن الموضوع
_احجيلج الصدج...انة من يوم شفته شلون صفن بوجهج بالمهر...
وانة اعرفن اخوي مايعرف عينه على وحدة بضيافتنا
وبعدها سألني عليج
شكيت بشي...
بس ماعرفن شكو...
شفت نظراته لج من حسباله محد يراقبه
وداشوفه من اروحن لاهلي هالايام عصبي
وعرفت من احمد علي محاجي عمي ابو حسين
_عبير...تقبلين رجلج يزوج عليج
وماعنده عذر ولا بيج صوج
_لا طبعا...
_ليش تقبليها على مرت اخوج
ولا دكولين هنا عدنا عادي...
هاي انتي راسا انتفضتي من كتلج اذا احمد ازوج عليج
_اي خية ...احنة نسوان منو تقبل يزوج عليها
كلنا مانريدن...بس زلمة لو راد يزوج
مابيدنا شي...خاصة اذا ماقصر
وبعدين انتي شعليج بيها...
زلمة رايدج وشاريج...وعنده امكانية يزوج ويفتح بيت ثاني...
تنهدت...جربت خيتي...جربت نار الضرة...
جربت كسرة گلب مرة رجلها زوج عليها
_بس مارفضتي بقيتي وياه...
يعني هم ماجان بيدج شي
بس هية ماطلعت بنت أودام...
وابن عمج هم ماعدل بينكم
اخوية غير...وادري بيج بنت حلال وراح ماتكطعيه عن جهاله ومرته...
هاي مو عمتي اشوفها شلون تركض لبنات رجلها...
_وليش عبير...مرته بيها عيب...مامخلفة
شو حتى جهال الله يحفظهم مثل الورد عنده
_لا والله عاد بتول بنية صايمة مصلية
ومابيها اي قصور...
سكتت شوية...
هدى راح احجيلج شي بس امانة الله بينا
_جوة رجليج
_علي قبل زواجه بفترة...
اجى فجأة بليلة راد من اختي امال الجبيرة عباية ودشداشة...
اخذهن وراح...وبقى للصبح مانعرف عنه شي
ابوية الله يرحمه جان بعده طيب...
بقى هو وامي للصبح كاعدين ينتظروه...
ومن رجع الصبح...شكد حاول ابوية وياه
يعرف وين جان ماعرفنة ...
بعدها بقى فترة بالليل يطلع للبستان...
ومرة امي دزت وراه اخوية شافه واكف يم نخلة ويسولف وية نفسه
امي كل ظنها متلبسته جنية...تعرفين البستان بالليل يخوف
وظلت تريد ازوجه وهو مايقبل...لحد مرة كالتله
شايفلك وحدة نخطبها لك
مجاوبها بالضحك شايف جنية...
امي صدكت وظلت اتكول مو كتلكم...
وشدت عليه الا يزوج...
وهو تعب منها ومن ملحت ابوية ...
كالهم اخطبولي...
وزوجوه بتول...
هية تحجي واني ايدي على گلبي خاف تعرف شي
_بس ازوج ومستقر بحياته
_اي صح...بس ما احسه مرتاح...
علي مو مثل باقي خواني...
گلبه حنين على الكل...
يتفكد الصغير والجبير..
لذلك اتشوفينة كلنا نميله...
هدى لا تكسرين گلبه ....
سكتت واني اباوع كدامي...
شكد فكرت بس ماكدرت...
كلما احن له واشتاك...اذكر لوعتي
من ازوج صفاء...
مر تلث اشهر وخلصنا امتحانات وبدت العطلة بداية حزيران
خلال هالاشهر جنت اشوفه مرات واكف يم المدرسة من يمر خطنا تبقى عينه على سيارتنا
بداية شهر السادس من عام ٢٠١٤...وبالضبط يوم ٦ بالشهر صحينا على انباء دخول داعش للموصل
وبدتت تتوالي الاخبار عن خروج الجيش من الموصل وسيطرة داعش على القسم الايمن منها
طلعت صور الشباب الي طلعوهم من قاعدة سبايكر...
جانت الصور على وحدة من القنوات اتوصفهم
بالعسكريين الي تركو اسلحهم بالقاعدة وشردوا
وبعدها كم يوم علنوا عن مجزرة لهالشباب
وصور بشعة لطرق قتلهم من قبل داعش
شباب بعمر الورد...امهات مفجوعة...وارامل وايتام
اسبوع عشنا قلق وحزن وخوف من الي يصير
الثقة نهزت بالجيش بعد ماطلع من الموصل...
والحركة امتدت لتكريت...
واصلا الانبار من شهر ١٢ لعام ٢٠١٣ شبه مفقود السيطرة عليها...
بعد اسبوع وتحديدا يوم الجمعة...
شبابنا كلهم طلعوا لصلاة الجمعة وهمة متوقعين بيان يصدر عن المرجعية...
وفعلا اجت فتوة الجهاد...
رجعوا لنتفاجأ كلهم يريدون ينظمون للجيش
امي جلبت باحمد
_يمة انتة الي طلعت بيه...عندك جهال لا تتيمهم وتعيدلي ماساة ابوك
_هسة حطيتها بالمقدمة استشهد كولي يا الله
ظلت تبجي وهية تتوسل بيه
وبطل احمد مالتحق وياهم...
بس جانت مفاجاتي ناصر التحق...وياه علي وحسين اخوة عبير
من اجت عبير وكالت انخمط گلبي...
كالت بتول اتشجع بعلي...عكس مرت حسين مجلبة بيه دكله بعد ابنك ما اجى للدنيا
جنت بغرفتي اكلب الموبايل واشوف الاخبار
طبت عبير
_هدى
_هاحبي
_اكو طلب دزوه بيدي لج
بعدت الموبايل وباوعت عليه
_منو
_علي...راح يلتحق وطلب مني اكولج يريد يشوفج انتي تعرفين وين...
_ما اكدر عبير
_براحتج...بس كال انتظرها الظهر
عافتني وطلعت..ظليت حايرة...
بس بعد الغدة...لبست عبايتي...
وطلعت للبستان اقدم رجل وأخر رجل...
بس شفته من بعيد متجي على نخلة ويباوع على شي بيده
من حس بية استعدل بوكفته...
اقتربت سلمت
_جنت خايف لا ماتجين
_ماجنت ناوية اجي...
سكت وباوع بيده ومدها لي
_امانتج
_ليش
_حقج ويرجعلج
_ليش اتطوع...انت معلم وهم جهاد وظيفتك
وعندك عائلة وين يرحون
سد ايده على التراجي
وباوع بعيوني
_اذا كل واحد يكول عندي عائلة خلي غيري يروح
نلكاهم باب بيتنا...
_كلمن يدافع عن محافظته
_لا هدى...مو انتي تحجين هيج...
ماكدرتي تجرحين انسانة ماتعرفيها
كل المحافظات عراقية....رايحين ندافع عن كاعنا
عن عرضنا...
تنهدت ...ادري بس
_بس شنو...ان شاء الله اذا الله كاتبلنا عمر نرجع وية ماتبدي المدارس...
مد ايده مرة ثانية...
_اخذي وحدة وخليلي وحدة ونس...
اذا مارجعت ابريني الذمة..
حجايته وجعت گلبي حيل
غصب نزلن الدمعات يسابقن
_ما اريدن اشوفن دموعج ...
ترة غاليات عندي...
بس اريدن منج وعد
_شنو
_اذا رجعت سالم تفكرين بموضوعنا...
ان جنتي موافقة رجعيلي تك الترجية
واذا لا اخذي التك الثاني
مديت ايدي واخذت تك...
من لامست اصابيعي باطن جف ايده...
بس وخرت ايدي سدها حيل...
_مودعج الله ...يانبض گلبي الي ماتهنى
_مودع الله ومحمد وعلي
الله يحرسكم وينصركم وتردون سالمين غانمين
انداريت اخاف دموع عيني تفضحني
رجعت اتعثر بخطواتي...عيوني مغوشة
واضغط حيل بيدي على الترجية
من وصلت شفت ناصر كاعد على جذع نخلة مكصوصة
خفت بس لا شافني من وصلت يمه
كام وكف...
_ها ناصر مو وعدتت متراقبني بعد
_ من عمرج اربطعش وانة اتابعنج واراقبنج
اخافن واحد يمسنج لو يسمعنج حجاية
بس هالمرة الوحيدة الي ماراقبتج
شفتج من دشيتي بالبستان...
بس مالحكتنج...
تدرين ليش...
خفت على گلبي لا يوجعني من الي اشوفنة
فوك ماهو موجوع...
_ماكو شي ولا راح اتشوف شي
هز راسه مشكك بالموضوع
_شوفي يابنت الناس...
أذيتج واخذت اقسى عقاب
عقابي يوم جنت السبب تصيرين لغيري
وهسع ماشي انة...
واخر طلب تحالليني وتواهبيني...
كلشي قسمة ونصيب...
وانتي مامقسومتلي...
ظليت اباوع عليه وهو يبعد عيونه عني
وبكلامه غصة وصلت لگلبي..
حسيت بيه...لان مثله اعاني...
صعبة على اليحب وماينول الي يحبه
رغم كل الأذية صارت بسبب غلطته
بس ماكدرت ما اسامحه ...
_خلص ناصر...محالل وموهوب...
_دير بالج على نفسج...
ترة انتي اعز من الروح
ما انتظر جوابي وعافني ومشى
رجعت للبيت واني مخنوكة...
طبيت المطبخ شفت امي
_يمة وين جنت بهالظهرية
ماجاوبتها...صعدت لغرفتي وعبايت تسحل وراي
وكعت اباب الغرفة...
فاتت امي ودنكت شالتها
_يمة جاوبيني وين جنتي
التفت عليها
_ليش اني ماعندي حظ...ليش
شبيه من دون هالناس...
ماريد هواي بس شوية
اشرت بيدي ...هلكد اريد حظ مو اكثر...
_كولي يا الله يمة...
لطمت على وجهي
_كايلة يا الله كايلة
ماعندي غيره...
بس تعبت يمة تعبت...
وتعبت الي حولي...
لا كادرة اخذ الي يحبني
ولا كادرة اخذ الي احبه
ورجعت ضربت وجهي بيدي
وفوكها ماكادرة اعوف كلشي واعيش مثل الباقين
كعدت على الجرباية تعبانة...
اجت امي كعدت يمي...
خليت راسي بحظنها...
_يمة مثلج هواي...
اذا ماتأخذين اجر صبرج بالدنيا
تأخذيه بالاخرة
_لعد خلي اموت واخلص
والله بهاللحظة اتمنى اموت...
_اسم الله يمة
ظلت تمسد على راسي...
التحقوا بالحشد وبعده باوله...
لاتدريب ولا سلاح مثل العالم...
ولا تنظيم...مر شهرين بدون مايرجع احد
بس جانوا يخابرون...
جنة نسأل على ناصر وعلي واخوه بنفس اللهفة
ونتابع الاخبار اول باول...
نصلي وندعيلهم...دموعنا اتصب كلنا من نشوف على الي يصير بالعراق....
ناصر وعلي بنفس الوحدة...
مكانهم جان بالمقدمة وبالمواجهات الصعبة
ثالث شهر لالتحاقهم...
تعرض مكانهم لهجوم...بالليل خابر احمد ناصر كاله الحمد لله صديناه...
وانة وعلي مابينا شي...
وهالايام نجي اجازة...
فرحت بهالخبر...
عبير جانت بنهاية الثامن ...وهند مرت ناصر جابت بنية قبل شهرين..
احنة بداية التاسع...مامتأملين الدوام يبدي من وكت السنة...
جنت حلمانة بلمة جبيرة ابيتنا...
لا هذا مو بيتنا...هذا بيت اهل علي...
فزيت على صوت عياط...
....وللحكاية بقية