شفاه ذابلة

حياة فرحة

يسعد مساؤكم....اليوم نختم حياة فرحة بكل ماعانته وقاسته...صنع منها امرأة قوية كدرت رغم بساطتها الي جبرتها عليها الظروف تواصل مسيرها وتبني حياة ومستقبل لولادها....
البارت القادم نبدي بقصة الحفيدة هدى...
وبيها تكتمل سلسلة قصتنا ...متابعة ممتعة
البارت السابع عشر
همس ليل
جانت الدنيا المغرب من اندكت الباب...
منو يجينة هسة...بيت الحجي قريب  ما اخاف...
بس اليوم ماكو احد ادري بيهم كلهم بالعرس
كلت ما افتح بس رجع الباب يندك
لبست عبايتي جنت واكفة بالدير
_منو
_انة ام احمد فتحي الباب
يا هذا حيدر شعنده جاي...
رحت فتحت الباب
_خير خوية صاير شي
هالكلمات كلتها  اني افتح الباب...
بس من شفته سكتت...جان شايل صينية هاي الي يقدمون بيها بالمناسبات...
بس مو هالشي الي سكتني...
لا..سكتني كشخته...لابس دشداشة بيضة وعليها عباية جتف بيجي على صفار شغل حافتها ذهبي
واليشماغ الي مرتب ..
اني دائما اشوفه من يطلع للشغل لابس دشداشة نظيفة ولاف غترة ...
بس ماشايفته هيج كاشخ...
هو اصلا طويل القامة وجثيث...
_اخذي من ايدي عشاكم ام احمد
فزيت على صوته...وحيل خجلت من نفسي..
دنكت ومديت ايدي اخذها...
_ابو حسين ليش كلفت نفسك...
احنة تعشينة...وبعدين شيكولون جايب صينية
مناك لهنا
رفعت عيني من ماجاني جوابه...
شفته يتأملني ....من انتبه كام يحاجيني بدون مايباوع علية
_لا تخافين ..انة ماحبن احد يجيب طاريج بشينة
غلقي بابج ولا تفكيه لاحد
ردت ادخل صاحني
_ام احمد...شوكت الله يهديج علية وتصيرين فرحتي
خجلت منه طبيت جوة...
بيومها حسيت شي تغيير بداخلي...
ثاني يوم من رحت لرسمية
_خية تعذربني البارحة رحت من الغبشية لبيت عمي
وعودن وصيت هاي الفاهية مرت حييدر...
اجيبج وياهة...
_ماكو مشكلة اني تعبانة مابية حيل للهوسة
_ماتكليلي شمالج...
ادري زلمتج راح يمر عليه خمس سنين..
وانتي جنج بومة بهالاسود ...
خية حفي حواجبج وعدلي نفسج...
بعدج حديثة...باجر وعكبة يكبرون فروخج
وجلمن يشوفن طريقه ...
وتبجيين وحدج....
جانت تحجي واني صافنة عليها...
جنت اشوفها فطيرة واصور مافاهمة من الدنيا شي
اثاري مرات نحكم على البشر خطأ من نشوف ضحكته ومن كلماته البسيطة ...
_شوفي يافرحة انة لو عندي جمالج ...وعلي من باجر ازوجن ...
ها وما اقبل اقل من ابن الشيخ
_ويطلع ابن الشيخ واحد مكعبر ماينباع بوجهه
_لا ولج شيخنا وولده كلهم هيبة ...
صح اكولن مو حلوين...
لاجن كلمة شيخ وهيبتهم تكفي...
_رسمية شكد عمرج
_انة ٣٢
_زين انتو اتزوجون البنية من وكت...
ليش مازوجتي مثل اخواتج
_شكللج....ياهو الي يجيني الحجية اطلع بيه الف لولة...
جنها جانت مستفادة مني ...وانة مابيدي شي
حسيتها دمعت عينها...
_يلا رسمية اني هالمرة بالسبعة ابدلج..
بلكن وحدة تنعمي على عينها وتاخذج لابنها
_چا ياهي تقبل عيجوز...
_وج بعدج ماصرتي عيجوز على كولتج...
مرت الايام لحد يوم السبعة واني اشوف الحجية مركزة هواي وياي ماعرف شبيها..
قبل يوم من السبعة رحت لرسمية وعدلت حواجبها
بالتسعينات جان عيب البنية تحف وبعدها مامزوجة
وخاصة بالعرب...
واختارتلها ثوب حلو ورهمت وياه حجاب...
وبيوم السبعة خليت لها كحل واخذت من مرت قاسم اساس هم بس خليته خفيف...
ترتيب بسيط بس بين عليها...ودعيتلها من كل گلبي الله يرزقها ابن حلال
جانت السبعة يوم اربعاء وبعد ماشفتها لثاني يوم الخميس...
هية اجت من الصبح ادك بالباب...
فتحته...يلا صباح الخير شعندج مغبشة...
_غيرن لو نايمة انة
_شكو مانايمة باجر زفتج...
_چاخية باجر مشيتي
_ما فهمت شنو
تعاي خلي اسوي جاي ونتريك واحجيلي
_تذكرين المرة الي سألت عنج بالحنة
_اي شبيها
_حاجت الحجية عليج...
وبوجتها الحجية حجت جدام الحجي وحييدر
...كاللها سدي الموضوع احنة مانورط نفسنا
اني وية نفسي ضحكت ...
من هاي ماخذوني وياهم...
_اي وبعدين شصار...
_المرة شافتني بالسبعة...وسألت الحجية
كالت عدها ابنها مرته ميتة وعنده اثنين فروخ
_يافرج الله...بركاتج يافرحة
_اي والله يافرحة يرادن احني بابج
_كملي خية
_اي والناس هلي يعرفوهم...
والحجية كالت لحييدر كال خوش ناس
واليوم الحجية تسير لبيت عمي حتى ترد خبر باجر يجونة...
_اهلهل...كلللوش..كلتها بسكوت
_لا يفرحة اريدج بيوم عرسي تهلهلين..
انتي اكثر من خيتي
_چا ماخذة عريسي واهلهللج
_عريسيج موجود بس انتي كلبج حجر ماتحنين
التفت عليها متفاجأة
_لا ادحجين علية هجي...
تشوفيني فطيرة وعبالج ماعرفن...
ترة خوية فاضحته عيونه...
عمره ماشفته دحج لمرة ولا رفع عينه
بس من يشوفج ...
اشوفن عينه ماتقبل تنزل...تبكى مراقبتج
جنة كاعدين حول الصينية واني عيني على الاكل
استحي ارفعها
_خية فرحة...حييدر خوش حييدر ...
وانتي تستاهلين بعد ذاك التعب ترتاحين بفي زلمة يخاف الله بيج وبفروخج
_رسمية...طبيت بيتكم غريبة...
وحسبتوني بنتكم...وماعاملتوني الا بالحسنى
اجي بالتالي اهجم بيت ابنكم
_چا بوية وين الهجمان...
خية احنة عدنا عادي الزلمة ياخذ وحدة واثنين ومرات ثلاثة....
وحييدر ابوي جبره صغير ويزوج مرت اخوه...
وهاي شوفة عينج...لا ترتيب لا شكل...
چا من حقه ياخذ هالمرة على مرامه
_عيب من الحجي والحجية
_خية ماعيب الا العيب...
هو زلمة موش صغيرون...
يعرفن شلون يحاجيهم...
دكومي كومي اخذتنا السوالف ونسينا الحليب
ثاني يوم انخبصنا بالطبخ والتحضير
لان المشية اجت على غدة...
المزرعة امتلت سيارات...
جابوا مشية شكبرها...
ولحد ماخلصنا وقروا الفاتحة وجانوا جايبين سيد عقدلهم..
طبعا الولد.يعرفونه فما اخذوا وكت يسألون وهيج شي...
وهم ماسوو كعدة مهر بوقتها حصار وكلشي غالي
والولد حالته بسيطة وراد راسا يزوج
كالوا ماكوا داعي للكعدة مهر...
نسوي حنة وعرس...
صدك التهت رسمية تنزل لكربلا تجهز واني اسد بمكانها بالبيت
مرات اشوف حيدر وكت الغدة مايحجي شي...
بس مرات يذب حجي...
_صابر وانتظر الله يجازي صبري
لو....ماتكوللي شوكت گليبج يحن علية
لحد حنة رسمية...ظلت تتوسل بية احف واعدل حواجبي...
ومرت قاسم هم...وجلبن بية وصدك حفيت وجهي..
وعدلن حواجبي...
اباوع بالمراية شكلي طلع غير...
_خية رجعي مثل قبل...
بس يشوفنج بالحنة يعوفني ويظلن يباعن عليج
_صوجج انتي ردتي...
صح مانزعت الاسود...بس رسمية جابتلي كلابية
سودة بيها شغل من كدام لبستها...
طبعا ولدهم عافووا البيت...
تونست على حنتهم وهوساتهم الي كمت مافهم منها شي...
من خلصت ظليت انظف وتأخرت هدى نامت...
دخلت للحولي اريد اخذها شفت حيدر...
رجعت لان بدون عباية...
ومن جيت اخذها شفته شايلها...
_انة اوصلج ام احمد...دنيا ظلمة
_لا خوية البيت قريب..
_ميخالف...
طلعت ابراه واني اعدل عبايتي...
جنت امشي وراه وكايدة احمد
_اليوم الكمر غايب...
حقه ماينافس كمرنا..
فوكها لابس اسود...
يبوه اني صرت بنص هدومي
_انة لو ادري هجي يطلع عليج هالثوب
فلا اخذه...
بوية حرام عليج...رحمي بحالي...
عزة طلع هو جايبه...شكد عيب احجي وية نفسي
_النوب الوجه طالع يضوي...
وصلنا مديت ايدي اخذ هدى منه...
همس...يابنت الناس ماظل صبر عندي
ليش تشيلين خطيتي..
اخذت بنتي  وردت اطب
_فرحة...باجر لا طلعين كدام الاوادم هجي
طبيت جوة بدون ما اجاوبه
بليلتها ظليت افكر...
رجال وهيبة ومكانة...
ليش ما اوافق...
اضمن مستقبل جهالي ..
وهم سند لي من الزمن...
خاصة عدي بين فترة وفترة يجي يريد نرجع
ما انكر كلبي هم ماله...
ها يفرحة نسيتي حسام
لا ما انساه...له بالگلب مكان ما يزحزح...
بس هاي دنيا اليوم بظل الحجي...
وباجر شلون...
نمت على هاي الافكار...
ثاني يوم زفوا رسمية...
بجيت من طلعت حسيت هاي اختي ...
ثاني اليوم الزفة رحت للبيت لكيته نفس هوسته
اني بيوم الزفة رجعت للبيت من وكت...
وام حسين الظاهر مامادة ايدها مخلية بناتها يشتغلن
اكبر وحدة ابناتها عمرها ثمن سنوات...
عاد اني بلشت بالبيت وهنة خطية وياي اصخرهن
صاحتني الحجية...
_هت حجية
_تعاي يمة...اجعدي يمي..
شوفي يمة...وليدي حاجانة عليج
انة ما اكدر اكوله لا...
هو ماردنا من كلناله ازوج مرت اخوك
واول بخته ارملة ...
ومادام هو هاويج ماكدرن نرده...
بس اكللج هلة الهلا بناته ومرته
هاي بنت خاله...ومثل ماتشوفيها فطيرة وعلى نياتها
خجلت منها...
_حجية اني ما وافقت
سكتتني...
يمة وافقي...انتي حديثة ومابراج احد...
وهواي ناس شافوج ورادوج...
ومثل ماسوة فليح الفلاح وشيع عليج
يجي غيره وهم يسوي سوايته...
استري نفسج بزلمة وربي فروخج بظله..
كمت منها واني احسها ماراضية بس
مجبورة لان ماتكدر اتكله لا
للعصر جنت اغسل هدوم واشرها...
وشفت حييدر اجى ...
وبعد ماوصاني على الباب وراح...
اجاني الحجي المغرب...
كال بوية افرشيلنا برة على الهوى الطيب
طلعت له فراش...حولنا الزرع والجو يصير حلو
_تعاي بوية ...
عندي سالوفة وياج
كعدت يمه...أمر عمي
_بوية انة ماعرفن اجيبن وأودي حجي...
احبن دائما احجيها عدلة...
عرفت من الحجية محاجيتج...
وانة هسع اسألج...اذا موافجة اروحن لحماج اخطبج منه...
ولا تحسبين هذا رد فضل للي سويناه...
هذا زواج طول العمر...موشن يوم يومين
سكتت...لازم انطي حجاية
اذا ماقبلت ما اكدر ابقى هنا...
ولازم ارجع لضيم زهراء...
لو ارجع لبيتي اكعد بيه...
بس منو يصرف على جهالي...
وشراح يخلصني من الناس الي ماترحم...
واني جهالي صغار وماعندي احد...
كتله...عمي انتة بمكان ابوية بكيفك
_لا بوية هذا قرارج...
اريدن اسمعها منج...
هزيت راسي...
كام..على خيرة الله...
باجر احدرن لبغداد واشوفن ابو صفاء
مشى واني مترددة الي سويته صح لو غلط
باوعت على جهالي يلعبون كدامي...
كله لخاطركم...
بس اكو صوت بداخلي جاوب...
ولخاطر گلبج لا تجذبين على نفسج ۔..
الثاني يوم العصر تفاجأت من اندك الباب وفتحته شفت عدي جاي وياه ولده وزهراء
سلم ودخل واجت زهراء بوستني وتعتذر...
مااكول نسيت الي سوته...
بس تجاوزته لان يبقون اهل جهالي
_فرحة لاتزعلين مني...
وزة شيطان واحنة عشرة عمر...
ماعدنا غير بعض...
اعذريني خيتي...
جبت جاي شفت عدي وجهه ثكيل...
_ ام احمد...اجيت اخذج والجهال للبيت ترجعون
اني انخمط گلبي كلت بس لا مايقبل
_ليش خيي شصار
زهراء...مايصير تنزفين منة...غير من بيتج
عدي...بعد ماعرفنة هية موافقة لو لا
وبكل الاحوال يصير كعدتها غلط هنا
زهراء...خوب اسألها...الناس تريد جواب
عدي...اسكتي زهراء مو وكته الحجي...
كومي ام احمد لمي غراضكم نرجع من وكت
صدك لميت الاغراض...
ورحنا سلمنا على بيت الحجي...جان حيدر ماموجود
من رجعنا لبغداد ...لكيت غرفتي مثل ماهي
ومبين منظفيها جديد...
بقى يومين عدي مافتح موضوع...
وزهراء تحومي علية...
لحديوم خلصنا عشى...
وصاحني بالهول
_شوفي ام احمد...
اكيد الحجي حجى وياج قبل مايجيني
بس اريد اكولج...
هذا بيتج...تكدرين ترجعين بيه
واذا ماتريدين ...افرغ بيتكم من المؤجر واكعدوا بيه
لا تحسين مجبورة على الزواج
_اكعد بيه وما اخلص من حجي الناس...
وبعدين مين اعيش الجهال..
ترة اني هناك ماعندي مسواك كله طالع من كاعهم..
والايجار يدوب لملابسهم والمدرسة
_عفى عليج خيتي...
واني وين رحت قصرت وياج
_ما كلت قصرت ابو صفاء..
بس هم عندك جهال وبيت...
والجهال كلما يكبرون يزداد همهم
شفته انقهر ودنك
_ام احمد مو هين اشوف ولد اخوية يرحون يربون عد غريب...
مو هاي وصية امي
_الجهال اول وتالي ولدكم ويرجعون لكم...
ورغم الصار ماشفتني قسيتهم عليكم...
شوكت ماتريد يجوك
_الظاهر انتي مقتنعة بالموضوع...
_اني مقتنعة اوفر بيت لجهالي...
واخليلي سند من الدنيا الغدارة
_هاهية خوية براحتج
كام وهو ضايج...
ومن اجى الحجي يريد موعد...
انطاه موعد على الجمعة...
وحضر وياه خواله وعمامه لعدي...
وحيدر هم ماقصر جاب مشية هواي وياه
خطوبة ماصارتلي واني بنية...
وعقدنا سيد...وخلال اسبوع عقدنا محكمة...
وبيومها اتغدوا يمنا...
وصاحني الحجي...انطاني فلوس كال انتي اشتري ذهب واغراض...
راحوا وبعد ماشفتهم...مر شهر يلا اجى حيدر
جان جايب اشكال من الكاع...
ومابقى هواي كال مشغول...
بس كال بعد اسبوعين الزفة...
كتله ما اريد زفة وموسيقى سيارتين كافية
ضاج من حجايتي...
راح وانخبصت بالتحضيرات...
طبعا الاسود ذبيته بيوم المشية...
اجت الحجية ورسمية وشافني وتخبلن...
خلن زهراء تلبسني منها فستان ملون...
وحنة ماسويت...ماكدرت هم عيب من عدي...
وهم اني مانطتني نفسي...
بس زهراء اخذتني للصالون...
وصبغت شعري وكصت اطراف...
وبيوم العرس طبعا مالبست بدلة...
لبست فستان مال مناسبة بيجي فاتح...
وعفت شعري مفتوح بس لفيت اطرافه يم الصالون
وخليت مكياج...
حيدر احترم رغبتي وجاب سيارتين او ثلاث بس...
واصلا هو الطريق بعيد مو مال زفة...
زهراء جلبت بالجهال كالت خليهم للسبعة
ومن دخل حيدر فتح عينه وهو يشوفني...
جان جايب وياه رسمية واخواته اثنين...
صاح رسمية كاللها لبسيها عباية...
ومن طلعنا وصعدنا بالسيارة شاورني لا ترفعين راسج ابد....
لحد.ماوصلنا لبيتهم ركبتي انكسرت...
اتلكونا طلقات وهوسات...
بس شفته كاله لقاسم ودينا لبيتنا...
صفنت شيقصد...
طلعت سيارتنا كبل...ونزلنا يم بيت...
ماكدرت اشوفه...
جانت رسمية وياي...
حاجته...مايصير ياخوي...غير تنزل هناك...
الناس تنتظر...
_اسكتي رسمية...ياناس...انزلها كدامهم بهالشكل...
دخلوني للصالة بس كعدني طلع...
نزعتني العباية رسمية ...
_حقه للزلمة..بوية شطالعة ...
وين دافنة هالجمال...
بس فضول النسوان مايخلص شوي واجن علية بحجة يباركن...ردت بس اعرف هذا يابيت...
لحد ماكالوا صبوا العشى راحن عاد جلبت برسمية
تعاي ماترحين...احجيلي احنة وين
_چا خية ماتعرفين هذا البيت الي جان يبنيه حييدر
_ادري جان يبني...بس عبالي لام حسين
_لا خيتي هاي العوبة مادبرها...
بس والله ماطلعت هينة...غير من عرفت بزواجه..
ذبت فروخها وراحت لاهلها
_يا وشلون رضت
_خالي ماقبل عليها...
كاللها مو من حقنا على الزلمة نمنعه ..
ولا تنسين هو اخذج ارملة وهو ولد مامزوج...
ومرة ما تاكل مرة...
عاد اخوتها يحبون حييدر هواي ويحترموه جابوها ...
_خطية...هم حقها مو سهلة على المرة زوجها يزوج عليها
_خايبة ماتكعدين...
مرة...قصدج مرمرة
سمعنا صوت الهوسات
_يا زفوه للعريس وانة ماشفت شي...
كومي خية ادخلي للغرفة...
طبعا كلبي كام يوجعني عبالك اول مرة ازوج...
هالمرة المستحة هو الغالب مو الخوف...
دخل حيدر...واني مدنكة...
حسيته تحرك بالغرفة رفعت نظري شفته نزع العباية وصفطها ونزع يشماغه...
اندار علية...واجى كعد يمي...
_شلون الكمر ...
ابتسمت...الحمد لله
_بوية ترة انة مامصدك فرحة يمي...
احسن گليبي مايدك اليوم بس لج
مد.يده ورفع راسي من حنجي
_ماخفتي ربج...
ماكلتي هالزلمة يروح بيها من يشوف جمالي
_اسم الله
_فرحة ...انة احبج...
هواج ملة صدري ...
دنكت...رجع رفع راسي
_اليوم ماكو مستحة...
وقبل مايكمل حجايته نزلت شفايفه تطبع
اشتياقها على ركبتي...
رفع ايده يمسد شعري...
واصابيعه تخلل خصلاته...
ضعت بيديه وماعرف شوكت مددني على الجرباية..
تركت نفسي له...
وهو يوشم جسمي بوشم حبه...
ومن وصل مركبنا لشاطيه...انطرح بجانبي...
_بكل احلامي ماتخيلت هيج ...
ماصورت الزواج بلي تهواها له طعم ثاني
بيومها ماخلاني انام للفجر...
ومن كعدت الصبح...كمت غسلت وطلعت اتفرج على البيت...
صح تأثيثه بسيط...بس حبيته...
سويت ريوك...وحسيته كعد
_صبج الله بالخير يارويحتي
_صباح الخير والعافية...
اغسل وتعال تريك
_مابيها مجال شوط ثاني
_كافي اشواط...تعال تريك ماجعت
_والله بوية متت جوع...
غير يراد جهد وتعب
غمزلي وراح يغسل...
بس گلبي نار على جهالي...
استحي اكوله اريدهم...
اخذت الصينية للهول...
طبعا لكيت كيمر ومربى وخبز حار...
عرفت رسمية جايبتهن من الصبح...
عايفتهن بالمطبخ ورايحة
_شعجب طلعتنا وحدنا
_اشوفن هالشي اريحلنا...
البيت خطاره هواي وانا اريدنج تاخذين راحتج
وهمن علمود الجهال
بس هذا مايعني ماترحين وتساعديهم..
تعرفين ام حسين مادبرها
_صار...اكيد ماعوفهم...
بس
_بس شنو
_ما اريد.اتضوج...
اشتاقيت للجهال...
_مو تدللين ...
نروح نزور كربلا اليوم...
وباجر من الصبح اروحن لبغداد اجيبهم...
تعبت سنين وسنين...
لا اهل ولا سند...حتى يوم الي فرحت بحسام
مادامت فرحتي...
بس ربنا ماكطع ...يجوز جان ضاملي فرحة وية حيدر...
صح عصبي...ويغار...لا يقبل اروح عرس يصير ولا اي مناسبة بالمنطقة...
بس ياخذنا لكربلا نزور...ومرات لبغداد للكاظمية ونمر على بيت عدي نسلم...
عدي بقى متواصل وية الجهال ومرات ياخذهم يباتون يمهم...
اني بعد سنة حبلت بس اتعس من ولدي ...
ولادتي كلش صعبة جانت وردت اموت بيها
بوقتها حلف حيدر مايخليني اسوي طفل
اكتفينا بكرار...
بيت الحجي ماتركتهم دائما وياهم...
بس حيدر مرات اكوله انتة مو عادل لان استخطي مرته...
نادر مايبات يمها...اذا يروح اثناء النهار..
واذا بات يجي ملهوف عبالك غايب اسبوع...
ولجهالي جان اكثر من اب مافرق بينهم وبين اخوهم كرار ...
الحياة ماتخلى من المشاكل...
بس هالمشاكل هينة مقارنة بالي شفته سابقا.

لهنا وتنهي قصة فرحة بكل مرارها وحزنها
واخيرا لكت نصيب  من اسمها
....وللحكاية بقية