شفاه ذابلة

موقف صعب

يسعد مساؤكم....ممنونة للتعليقات الحلوة...
وبالنسبة للي يسالون عن امها وليش عايفتها
حبايب القصة مال سنوات...فماركز على المواقف العادية التركيز فقط على الاحداث المهمة...وذكرت سابقا امها هية واحمد دائما يجون محملين...
يعني حياتهم العادية ذكرت ملخص عنهة...متابعة ممتعة...ها نسيت لا تتعودون على النشر اليومي هاي لان مجازة اليوم 😁
البارت الثاني والعشرون
همس ليل
ام صفاء...اني حجيت وية ام اكرم على مريم وماعدها اعتراض
عدي...انتي كل عقلج...
بكيفج تصرفين...بدون ما اتشورين احد
زهراء...اكولك هو هلولد الاثنين عندي ..
اريد افرح بزواجهم..
لو لان بنت اخوك ادافعلها
عدي...البنية مامقصرة وياه
والي صار قضاء ربنا...
زهراء ...انتة ليش تعترض...
مو مرة ردت تزوج واني اصلا عندي خلفة
عدي..ردت ازوج لاسباب ثانية...
وها انتي كلتيها شسويتي ابوقتها
زهراء...الحالة تختلف ...صفاء عنده عذر
عدي..لو هو صايرله الحادث تعوفه
زهراء..اسم الله ليش مفاول على الولد ...وبعدين هو رجال...والمرة تصبر وتتحمل كلشي وية رجلها...
وهو مايطلكها ولا راح يعوفها ..
عدي...يامرة حرام عليج...
لا تشيلين خطية بنية يتيمة...
زهراء...اكولك ترة العراق نصه يتامى لا تخبصنا
وبعدين ابنك كدامك اساله ...
اتفاجات يعني الحجي كدام صفاء وهو ساكت
ماعرف شنو موكفني بمكاني استمع..
اني جنت نازلة والدرج يم الهول..
بس رجليو ماتحملني ارجع اريد اعرف رد صفاء
عدي...يابة صفاء احجي موافق على حجي امك
شوية يلا جاوب صفاء
_يابة اني ماريد اكسر بهدى...
صح اتمنالي طفل...بس مو حسابها
اذا ماتقبل منها ومن نفسها ماازوج
ما انتظرت يكمل صعدت بس فتت للحمام...
فتحت الدوش وكفت اني وملابسي اشهك وابجي
اندك الباب...هدى حبي يلا حتى نتريك
_بس انطين المنشفة...
من فتحت الباب اخذها جلب بيدي
_شبي صوتج
_مابي
_لا باجية
_لا ...بس كعدت الصبح بلاعيمي توجعني
راد يدفع الباب
_انزل صفاء عيب خلي نتريك
طلعت من الحمام بدلت ونزلت...
لكيت هبة مسوية ريوك
كعدوا على الميز بس الكل ساكت...
اكلت لكمتين وكمت صعدت
وراي اجى صفاء...كعد يمي على الجرباية
_شبيج هدى
التفت عليه وخليت ايدي على فخذه
_صفاء اطلب منك طلب
_عيني لج
_تسلم عينك...اريد ازور كربلا...
_صار تدللين...كومي بدلي...
وكف ...جلبت بيده...
_اوكف مو بس هيج
_شنو بعد
_نمر على اهلي
حسيته توتر
_مانلحك...حظر التجوال ب١٢ بينما نزور اتصير المغرب...
_عفية صفاء...صار خمس اسنين ابد ماعارضتك بشغلة الروحة لهناك...
بس هالمرة نروح ونبات ونطلع من الصبح
جنت كاعدة على الجرباية ولازمة ايده وهو واكف
التفت علية ...اباوعت عليه بنظرة توسل
_بس هالمرة...
كمزت شبكته...اي والله بس هالمرة
هو لبس دشداشة بيضة ونزل...
بين ما مابدلت ...صفاء مايقبل البس بس جبة
خليت عبايتي بعلاكة ونزلت...
سمعت امه تحاجيه
_صلاوات يمة عبالك عريس...
وين رايح للصلاة
جان اليوم جمعة طبعا
جاوبها...لا طالعين اني وهدى لكربلا
_يا...جان كلتوا نروح وياكم
_غير مرة..راح نبات يم اهله...
خلي ابلغ ابوية
نزلت اول مادخلت المطبخ تلكتني
_غير هالدلال تقدريه وتخلي يشوفله ضنى
سكتت من اجى صفاء...
طلعنا لكربلا بالسيارة...
صفاء يسولف على الطريق وعلى مشاكل دائرته والوضع بالعراق واني بالي ولا يمه...
اباوع عليه واتأمله من ايدي الي تسوق...
لوجه ولحيته المحددة وشاربه الاسود...
التفت علية من يحاجيني...عيوني وعيونه نفس الشكل...ماخذين عيون ابوية سواد العين جبير
يسموهن حوراء العين
وصلنا واول مافتت للامام العباس بجيت
ومادري شدعي...
بس من فتت للامام الحسين...طلعت الي بنفسي
كتله مولاي اطفالكم ظلوا يتامى وصعب كسر خاطر يتيم...
واني خاطري حيل مكسور ...بجاه امك الزهرة تشفعلي عد ربك يجبر خاطري...
من طلعنا اخذني لمطعم اتغدينا...
اشوفه يباوع علية وبعينه سؤال...
بس ظل ساكت...بطريق الرجعة...
مرينا على اهلي...
امي طلعت مامصدكة لان خطية دائما احمد يجيبها بس اني بعرس احمد اجيت  وبس...
ومرت احمد.هم تلكتنا جانت حامل بشهر السابع
خوب كرار صاير اطول مني عمره ١٧ سنة
صفاء راح وية احمد وكرار للمضيف واني وامي وعبير بقينا نسولف...
بعدين عبير عافتنا...
_شبيج يمة ذبلانة...
_ليش ضميتي علية
_شنو يمة
_مايصير عندي اطفال
_يمة رجلج ماقبل كال خلوها مو وكتها...
ليش شصار...
اتقربت يمها جنة كاعدي على مدات ارضية
خليت راسي بحظنها...
_يمة تعبانة...عمتي تريد صفاء يزوح علمود الجهال
_زهراء طول عمرها رعنة...
وصفاء شكال
_يكول الا بموافقتها...يعني مامعترض على الزواج
_هو كالج
_لا سمعتهم يحجون...شسوي يمة ...
جرت حسرة...يمة رجلج خوش ولد ...
وشفتي شلون وكف وياج من تصوبتي...
واصلا لا تنسين مو كل واحد يقبل بوحدة عرف بلي جرالها...
ومع ذلك صانج وحافظ عليج ويحبج...
لا تخسريه...
_يمة والله صعبة بس اتخيل يزوج مو عاد تصير صدك...
ماجربتي هالشعور...
_جربت هواي غيره...
هين على الضرة...
والزمن والعمر خلوة تفكيري يتغير
فكري زين يمة ...
صاحلها احمد...
خلت مخدة جوة راسي وغطتني وراحت...
ظليت افكر يعني لازم ابقى طول عمري شايلة جميل ستره علية...لو شنو
ظلت الافكار توديني وتجيبني...
صحيت على يد تتلمس بوجهي...
فتحت عيني...كومي جاية تنامين هنا ...الدنيا المغرب...
تبسمت بوجهه وكعدت على حيلي...
_تعال نطلع على الزرع...
_لبسي عبايتج
طلعنا نتمشى للزرع الي حول البيت...
اذكر طفولتي كلها هنا كظيتها...
لزم ايدي واحنة نمشي...
_صفاء ...تريد اطفال
سكت وهو صافن حوله...
_جاوبني
_محد يكره يصير عنده...
بس كلشي نصيب
_وبعد سنوات ماراح تتندم...
ماجاوب وكف وترك ايدي واجتف وهو يباوع كدام
_وين تريدين توصلين
_اريد اعرف تريد تزوج علمود الاطفال
_انتي كلتيها علمود الاطفال بس بموافقتج
_عمري ماراح اوافق وحدة تشاركني بيك
بس مااكدر امنعك تتزوج
_ليش اول وتالي الي يجي سند لنا اثنينة
كلبي احترك من كال هيج...
_مادام رغبتك تتزوج ...ازوج
عفته ورجعت للبيت...
هو نام بالمضيف واني يم امي...
وثاني يوم رجعنا...
يومين ورجعت عمتي تسمعني..
اخر شي طكت روحي ..
_ترة كتله روح ازوج...
وروحي اتاكدي من ابنج
عفتها وصعدت...
لليل من اجى صفاء...
_ليش كايلة لامي هالحجي
_ياحجي...اكيد على زواجك
ماجذبت كتلك ازوج
_انتي مقتنعة
_مقتنعة لو لا مابيدي شي...
اول وتالي من كثر الحجي تزوج
_مالج علاقة بالي اتكوله امي
_شوف صفاء مالي علاقة في حال انتة مقتنع وراضي...
بس انتة بداخلك تريد اطفال...
فلا تقشمر على نفسك وعلية...
عموما عندي شرط
_كولي
_اريد اتعين...وماتجيبها هنا
صدك ما جذبت خبر عمتي...
عبالك خافت لا ارجع بكلامي...
على نهاية الاسبوع جانت مشترية الذهب ومتفقة وية اختها هية خطوبة هية عقد مهر...
بنت اختها اسمها مريم عمرها ١٩ سنة...
مافلحت بالدراسة كعدوها بالبيت...
وصفاء حتى لو مزوج...بس خوش ولد.وراح يكعدها وحدها...ومهندس ومتعين وراتبه زين...
خلال هالفترة جان اكو تقديم على التربية...
وية دفعة  حصلت تعيين وطبعت صفاء ركضلي بيها
هو التهى ياجر بيت وينطي لامه فلوس هية وخالته يجهزون...
بس اني كمت ماتقبله ...
كل مايحاول يتقربلي اتحجج بشي
جنت احس بغدر منه لا ماقاوم هواي...
الي جان مهون علية عمي وعلاء وهبة...
ذولة مكسبي بالبيت...حسيتهم بصفي ويحاولون يخففون علية ...
شهرين بدة دوامي وبنفس الاسبوع زفة صفاء...
ماقبل يسوي حنة...
ومن لحت امه عمي رزلها....
بيوم حنته داومت عادي ورجعت...
صح الي يشوفني اتصرف عادي بس نار بصدري...
اتغديت وصعدت...
وعمتي اتدردم ليش مانسويله حنة...
صعد وراي صفاء...
_هدى
التفت عليه لان جنت كاعدة على الجرباية اكلب بجدول الدروس
كعد يمي...شبيج
_مابية...
_ليش هالبرود صار مدة
مد ايده يلزم ايدي دفعت ايده...
وكفت ...شتريد اسوي...ها .. اركص وهلهل...
هلهلت...تعالوا شوفوا لازم افرح لان زوجي اليوم حنته وباجر يزفونه...
اصفلك هم...فقدت كمت اصفك واركص..
هو صافن علية...كام تقرب جرني لحظنه
دفعته حيل وهزيت اصبعي بوجهه
لا تقترب مني ما اريد اشوفك اصلا...
روح لذاك بيتك...لوتحب ازينلك سيارة عرسك
باوع علية شوية...وطلع
كعدت بالكاع وظهري متجي على الكنتور...
واني الم رجلي لصدري واشهك بالبجي...
لثاني يوم مانزلت اجى علاء وهبة علية ورادوا مني ماقبلت انزل...
الي عرفت ابوه كاله طلع الزفة من بيتك
هو بنفس الفرع..
هبة رادت تبقى وياي كتلهت روحي...من الصبح راحن للبيت الثاني واني رحت لدوامي ولا عبالك اكو شي
بس العصر من سمعت الموسيقى...
حسيت واحد يخنك بية وروحي لابت...
دكيت على امي ابجي...
احمد بوقتها من عرف بصفاء يريد يزوج
كال عوفي وصار عصبي وراد يجي يتعارك
بس عمي حيدر كاله مالك حق عليه...
_ماما عفية راح اموت
_شبيج يمة اسم الله
_زفوه
_اجي اخذج
_اي اي تعاي
تقريبا ساعتين بين مالميت ملابسي سمعت جرس الباب...
عمي صاحني...نزلت وجنطتي بيدي لان خابرت امي قبل ماتوصل
_هاعمو وين
_عمو كم يوم يم اهلي ارتاح
_حقج بابا...بس رجلج يدري
_رجلي ملتهي
_خاف يزعل عمو
سكتت...هو تنهد
ودخل كدامي لكيت امي واحمد...
سلمت وكتلهم يلا...ردت اطلع قبل ماترجع الزفة
من صعدنا
_خيتي مامجبورة تتحملين ...مامحتاجة احد
اذا ماتريدين ترحين لهناك
بيتنا موجود نعدله ونجي نكعد بيه
سكتت شجاوبه
امي جاوبته...لا تقرى براسها...رجلها شاريها ومامقصر وياهة
من شافوا ماكو جواب ...عافوني...
طريق لحد البيت صافنة ماتنزل دموع بس احس راسي فارغ ...
من وصلنا دخلت غرفة كرار وسديت الباب كتلهم اريد انام...
اخذت فاليوم...ما اريد افكر بهالليلة وشراح.يصير..نمت لساعة ب١١ ثاني يوم
كعدت على صوت امي...
_يمة اكعدي خوفتيني عليج...
_مابية شي...
كعدت افرك بعيوني...
_رجلج خابر احمد
سكتت...شيريد العريس
_تلاغى وية اخوج شلون تاخذوها من غير علمي
_ليش عنده وكت يتفكدني
كعدت يمي...يمة اذا راح تبديها هيج اتعبين وتبعديه عنج..
هو داك عليج شوفي شيريد وتعاي تريكي
شلت التلفون ...جنت مخليته صامت اشوف عشر مكالمات لم يرد عليها...
دكيت عليه راسا رفعه
_الو...مبروك شايف خير
_وين جنتي...شكد دكيت عليج
_نايمة...والتلفون صامت
_شوداج هناك...وشلون تطلعين بدون علمي
_ماردت ازعجك وانتة ملتهي
حسيته جر نفس
_هدى مثل ما اخذج اخوج يجيبج هسة
_خليك بعروستك واني كم يوم وارجع
_كتلج هسة يجيبج ...
لو تبقين...
_ها ابن عمي بلشت...بعدك بسم الله
_استغفر الله...شبيج بابا انتي تخبلتي
كام يصيح بالتلفون...
ظليت ساكتة وادموعي ادير واني اسمعها يمه
دكوله بدلع على كيفك حبيبي لا تتعصب...
موهيج..
وكع التلفون من ايدي...
خليت ايدي على وجهي وابجي بقهر...
طبت امي من سمعت صوتي
_شبيج يمة...اسم الله جرتني لحظنها
شبكتها ابجي...ماكدر يمة ما اتحمل...
_يمة بالبداية صعبة بعدين تتعودين....
تريكت وجانت عبير طابة بشهرها ...
بقيت صافنة عليهم وهم يسولفن ويسون غدة ...
بعدين رجعت للغرفة بدون ما احجي وخليت راسي عل  المخدة واستعيد شريط ذكرياتي...
مديت ايدي واخذت حباية ونمت...
كعدت امي توعي بية على الغدة كتلها مااريد واني كوة افتح عيني...
بقيت للمغرب نايمة...
بالليل خابرت مديرتي كتلها مريضة كلش وطلبت اجازة كم يوم...
كعدت ثاني يوم البيت سنطة...كمت افتر ماكو احد
شوي واجى عمي حيدر
_عمو لعد وين الجماعة...
_اخذوا عبير للمستشفى عدها ولادة
_يا ليش ماكعدوني
_بوية انتي شماخذة حسبالك بغير عالم شكد وعوج
بين مانظفت وسويت غدة اريد الهي نفسي وما افكر
اجو...
امي خلت ابن احمد.بحظني...
شلته واني اباوع عليه شكد صغير...
فرحت حيل بيه...
عبير ماقبلت تروح لاهلها بقت يمنا وامها اجت شوية وراحت ...
التهيت وية الخطار واداري عبير والصغير...
خلص الاسبوع وصفاء ما سأل ولا خابر بعد
جنت من يجي الليل اول ما تجيني الافكار اخذ فاليوم وانام...
نهاية الاسبوع حرت شلون بدوامي...
الظهر وصلت سيارة باوعت هاي سيارة صفاء
بس من اجى احمد كال علاء وعمي جايين
هاي الفترة هبة ادك علية ما اشيله...
شوي وصاحني عمي...دخلت سلمت عليه...
وكعدت....شنو عمو مو كلتي كم يوم وارجع
_صفاء لعد وين...مو خلصت سبعته
_اني اجيت بمكانه....لو مالي مكانة عندج
_لا عمو على راسي...
_خلص عمو حظري جنطتج دنرجع قبل الغروب
من طلعت احمد اجى بوراي
_لا ترجعين...شنو مسويها شغلة عناد وما اجى
_احمد اني طلعت من غير علمه...لو بعلمه ما ارجع
رجعت وياه بس كلبي متعلق بابن احمد سماه حسام
وعمي عدي من شافه دمعت عينه...
تلكتني هبة تعتب ليش ماجاوبهة...
وعمتي من ردت اسلم ...
_هاي نفس طبع امج راسا تنهزمن...
غثتني حيل حجايتها
_امي مو يمج ليش اجيبين طاريها
_على كيفج عيني سبينا عنكود العنب...
عفتها وصعدت لغرفتي لكيت هبة منظفتها...
اجت علية
_لج ليش ما تفتحين خط
_تعبانة والله هبة اعذريني...وملتهية وية عبير
_اي كال علاء جاي ولد لاحمد...على الخير يتربى بعزكم...
هسة نروح عليهم...
_تسلمين حبيبة
_اسكتي غير كبت عركة وراج بين عمي وخالتي
_ليش
_من ورة ست ست الحسن...خالتي تروح يوميا تطبخلهم ...وعمي يكوللهة ليش ماتطبخ هية
تكله عروسة...
وجابها صفاء يوم حتى تسلم على عمي ...
ماتشوفين شلون تتنعوص ...
انفتح الباب ودخل صفاء...
هية راسا كمزت...وترخصت وطلعت...
جنت اطلع الهدوم من الجنطة واصفطها...
وكفت حركتي وبقيت اباوع عليه...
وهو هم...جان بعينه عتب...
كعد على الجرباية وظهره لي..
بقيت على وكفتي افتح حلكي اريد احجي وارجع اسده اخر شي حجيت
_شلونك صفاء...
_بخير
_دوم يارب
بس خنكتني العبرة انداريت اخلي الملابس بالكنتور
حسيته وكف وراي
_ليش هيج هدى...
_مستكثر علية كم يوم ارتاح
_تعرفين هالمكان بالذات مااقبل ترحيله
_وين اروح صفاء ليش عندي مكان ثاني
_وليش مابقيتي ابيتج...
تدرين اني ثاني يوم بالتسعة هنا...
_اختنكت صفاء ليش ماتحس بيه...
شبكني من ورة وخلى راسه بركبتي ...
_مشتاكلج...مشتاك اشم نفسج
دارني عليه...حاوط وجهي بأيديه...ذذ
البيت وحشة بدونج....خله شفايفه على عيوني...
ومشى بيهن على كل وجهي ...
استلم شفايفي بلهفة وجرني للجرباية...
بس من ذكرت جان وياهة دموعي كامت تنزل
ما سال ليش بس ظل يبوس بدموعي...
الي مافهمته عمتي ليش خلته يأجر..
بعدين وضحت المسالة من اجى يبات يمي...
_ليش ومرتك الثانية شلون تبات وحدها
_امها يمها
_يمة خالتك عدها بيت...قابل يومية عايفة بيتها وجاية..
_هذا الاتفاق واذا خايفة عليها روحي باتي يمها
يومين ورجعت ادكله بات هناك يومين وهنا يوم
هم ماقبل....
اني الصبح بالدوام ومن ارجع شكد تبسمر ما اهتم زواج وزوجته بعد شتريد...
فترة وبطلت شهر ونص مر على زواجه...
ومن رجعت من الدوام فتت للبيت سمعت هلاهل
شفت مريم وامها وعمتي تهلهل...
_تعاي باركي لمريم حامل...
حسيت سجين بنص كلبي ضربوني
_مبروك
_شبيج من ورة خشمج ادكوليها...
جنت اتمنى اكولج يوم لج..
بس ادري بوضعج
باوعت عليها...شجاوبها
التقيت بيها كم مرة تجي تتغدى يمنا بس دائما اعوفها واصعد...
بس هبة اتكول صلفة حيل وماتستحي...
كامت عمتي يوميا الصبح تروح تنظفلهم وتطبخ
وتبقي البيت على هبة...
وطبعا لازم استلم البيت العصر...
صفاء اجنب يكلي مريم حامل...
بس اني باركتله...كلت على الاقل ماراح زواجه بلاش
واشتغلت خباثة مرته...
كل مايكون ليلتي تخابره تكله متخربطة..
هو التهى وياهة واني ليلا انام ودمعتي على خدي
حتى جان يجي الصبح قبل مايروح للدوام..
يجيك شلابسة ويوصلني قريب المدرسة هسة لا
شغلته كلش ...
صار عليها تلث اشهر...ويوم جنت امسح البيت
واني امسح بمعقم...
اجت هية وامها وعمتي جانن يم الدكتورة..
طبت ضايجة...من اشتمت ريحة الديتول
_اوي شنو هاي الريحة لعبت نفسي
ماجاوبتها...عفت الهول ورحت امسح المطبخ
لحكتني...وكفت واني امسح...
_اكول يعني انتي شنو معنى وجودج هنا
رفعت راسي...وياي الحجي
_لعد وية خيالج
_حبيبتي هذا بيت رجلي وبيت عمي وبيتي
_بس ابقى اني الاصل وام الولد
باوعت عليها هسة شربط هاي بهاي
_بالعافية عليج..بس مو اني نزلت ضرة
_بس نزل عليج مرة
_مرة ...التفت يمنى يسرى...وينها هالمرة
بابا اهلج رادوا يخلصون منج..
لعد اكو وحدة بعد ماداخلة العشرين تزوج واحد مزوج
شفته تعصبت وتقدمت علية رجعت ليورة وهية اتمد ايده وتزحلكت وكعت بالكاع...
كامت اتصيح اجيت اكومها ...طبن عمتي وامها ركض وهنة يدفعن بية ويغلطن...
عفتهن وصعدت لغرفتي...خفت كلش لا يصير بيها شي
شلون ابختي اني...
وللحكاية بقية