شفاه ذابلة

حادث

البارت الحادي والعشرون
همس ليل
ظليت طول الحفلة متخوفة ..
لان شفت صفاء متعصب ويخزرني من امه تجرني حتى نركص...
اباوع بنات خاله وخالاته يشاقن وياه عادي...
ضجت كلش...
خلصنة ونريد نرجع ...
شاورني...خوما جاية بدون عباية
_لا ...لابسة عبابة..
_روحي لبسيها  وتعاي.
رحت للغرفة واني لازمني مغص بطني
شافتني امه...هاعمة وين رايحة
_صفاء يريدنا نرجع
_غير كلنا سوة...خلي نتعشى
_ماعرف عمة
_خلي احاجيه...
راحت ادور عليه...
اخذت عبايتي وجانت وحدة من بنات عماتي تحاجيني واني بالي ولا يهمها...
اريد بس تخلص حتى اروح لا يعصب اكثر...
اجتني وحدة من بنات خاله
_عيني هداوي رجلج خبصنا يريدج بالمطبخ
كلت ياستار...
دخلت للمطبخ شفته واكف وية امه ..
من شافني...
_وين رحتي ...صار شكد من كتلج جيبي عبايتج
سكتت ماجاوبته...خاصة شفت امه ساكتة ومبين عليها الضوجة..
الظاهر راد عليها بقوة...
كتلها وين حجيج اني احاجيه ووكفلج...
طبعا بكلبي..
طلع واني وراه شفت ابن خاله نفس الجابنا واكف ينتظر
حاجاني...
_شبسرعة اجيتي شبسرعة راح ترجعين
لو حكم القوي...
باوعت لصفاء انزعج كلش...
الطريق قريب للبيت...
شوي اكول لنفسي شكو خايفة ماشفته يوم تعصب قوي..وشيريد يسويلي
وشوية... لا... اخاف واظل اقرأ ايات...
لحد ماوصلنا واول مافتنا...اندار علية...
_صعدي فوك جاي هسة.
تلكاني عمي لان ماراح كال كعدة نسوان
_هاعمو شو رجعتوا وحدكم وين الباقين
التفت على صفاء...
صفاء...تعبنا وبقوا بس يتعشون ويجون
اشرلي بعينه...
صعدت وهالمرة صدك خفت....
ذبيت عبايتي وكفت امسح المكياج الهي نفسي
طب وسد الباب...
وكعد على الجرباية وايديه على افخاذه ويباوع علية
ربكتني نظرته جنت اشوفه بمراية ميز التواليت
وانتظر شوكت يحجي...
_ليش كسرتي حجايتي
التفت عليه...عمتي رجعت علية...وكالت اني احجي وياه..
_منو رجلج اني لو عمتج...
وكف وتقدم باتجاهي...
وماحس الا راشدي اجاني...
لزمت خدي واني متفاجأة بس ماكدرت ارفع عيني كلش جرحني موقفه....
_حجاية ما عيدها من اكول شي يتنفذ ...
لو مو عمتج حجت ...وهاي حتى تذكرين
عافني وطلع...كعدت على الجرباية عيوني ادير دمع
ماسويت ذاك الخطأ العملاق الي استحق انضرب عليه...
بقى يومين بعدها مايحجي وياي...
وحتى كام ينام بالغرفة الثانية...
اني الصبح بالكلية ومن ارجع يجي وراي يتغدى ويصعد ينام والعصر يطلع وية اصدقائه لليل يلا يرجع...
جان خطي سيارة صغيرة...
كدام تكعد اخت السايق واني وبنية ليورة
بس الولد السايق ابد مو مريح سياقته مرعبة
وعينه ماينزلها من المراية...
دائما احاول اكعد بالجهة الثانية بس مرات البنية الثانية تجي قبلي...
اليوم راد اكثر من مرة يدعمنا...
رجعت ميتة قهر...هسة فوك ضيمي...
زين لمن احجي ...الفندي زعلان...
وكت العشى...جنت واكفة اكلي واجى علاء يغني
_اي عيني شكو عليك ..
غني ياوحيد غني
ضحك...لازم بعد الدب مغضب
_كله صوجك...كلت روحي واني بظهرج
تالي ظهري للهوى لكيته
_عمي الدب من يغضب من يكدر يواجهه...
وبعدين انة عيل في حد يسمع كلام العيال
_النوب صرت مصري...
دتعال تعال اريدك بموضوع..
جر كرسي مال ميز وكعد...
_سولفي...شوكت نخلص من مشاكلج
_اي مو كوفي عنان انتة...
باوع هذا  الخط مالتنا اريد اغيره...
عدل كعدته وصار جدي
_شبيه ضايقج
_لا مو هيج بس سياقته مزعجة...
اليوم اكثر من مرة راد يدعمنا...
غير
_غير شنو
_عوينجي...التفت على علاء...
وتفاجأت بصفاء واكف اباب المطبخ
نزلت عيني وسكتت
علاء جان ظهره للباب...
_خوما قل أدبه...اشعل اهله وعلي
ماجاوبته..شبيج هدى
عاد دخل صفاء...
_ليش مااجيتي كلتيلي
_وينك انتة...شو طول اليوم برة
جاوبه علاء
_معليك علاء اطلع منها
كام علاء وطلع...
_مو سألتج ليش ما حجيتلي
_اشوفك مالك وقت لي
_اذا ماعندج شي لا داومين باجر...
_عندي امتحان
_اوصلج تاكسي
_خلي اروح باجر بالخط بينما تشوفلي ثاني.
بيومها رجع للغرفة نام...
بس كل واحد داير ظهره للثاني...
شوي وحسيته يتلمس شعري...
ما حجيت...
_هدى اذا عندج شي احجيلي ...
لا ترحين لغير شخص
التفت عليه...وصار وجهي مقابل وجهه
_انتي باعد نفسك...
ماكو يوم حسيتك قريب وتحب تسمع اخباري
_ليش ماحاولتي تتقربين...
ماجان عندي جواب له...
صح اني هم ماحاولت ابني جسر بينا...
راح يصير سنتين وابد ماحاولت اكعد وياه واحجي
بعدها يومين وغيرلي الخط...
من هذا الموقف غيرت اسلوبي...
كمت اخلص عشى واصعد ابدل واتمكيج...واقرة لحد مايجي...
اجيب فاكهة او حب واكعد احجيله شسويت بالكلية...
اساله عن يومه...شوي شوي تعود يرجع من وكت
ويحجيلي عن اي شي ...
صار رابط جديد بينا...
طبعا حمل ماصار وبعد سنة عمتي رادت توديني ماقبل صفاء كال بعد وكت...
خلي تخلص ثاني واذا ماصار نوديها للدكتورة...
بس قبل شهر من امتحانات نهاية السنة...
كمت احس عبالك عندي افلونزا...
والشهرية تأخرت...
اخذني للدكتورة...سوتلي تحليل وطلعت حامل
من عرف صفاء ...فرح كلش...
لان يحب الاطفال...ورجعنا عمتي كامت تهلهل..
وية الامتحانات طبيت بالشر الثالث وبدى عندي وحام وتعب...
خطية صفاء وعلاء وحتى عمتي كاموا يخففون عني الشغل...
ويحاولون يساعدون باي شي...
بهالفترة الرواتب زادت وضعهم تحسن...
وجمعوا اشتروا سيارة للبيت بس بيد صفاء
اخر الامتحانات...
خابرني كال جايج لا ترجعين بالخط حتى نتغدة برة
راح خطي واني انتظر...
تعبت...خابرته كال بالازدحام
_صفاء دخت ونفسي تلعب...
بعد ما اكدر انتظر
_شلون ترجعين هسة لعد
_هاي بنية صديقتي اجى اخوها عليها...
راح ارجع وياهة الكلية هم فرغت
_ارجعي..
طلعنا..واحنة راجعين فتنا بازدحام...
فجأة نسمع صوت طبة قوية رجتنا...
والجام كام يتكسر ويطاير علينا...
نار اشتعلت كدامنا...
جانت لحظات نشوف الناس رعبت كامت تنزل تركض من السيارة...
محد ينتبه لاحد....نار مشت بالسيارات
احنة هم نزلنا...ركضنا بس احس عيوني مغوشة...
رفعت ايدي اريد امسح عيوني ...مسحته
اباوع ايدي مليانة دم...
شوي كمت ماتشوف ونظربت بسيارة واكفة...
وبعد مادري...
صحيت على صوت يمي...
بس جان الم براسي يموت...
وجسمي ثكيل...فتحت عيني واني أون
شفت صفاء راسا وكف فوك راسي...
وامي ...
_هدى حبيبتي اتسمعيني...
_اخ راسي يموتني...اريد امي
اجاني صوتها المبحوح ...اني يمج يمة
سودة علية بنيتي...
_شبيه راسي ثكيل...
يمة عفية...
امي ايدها على المخدة فوك راسي..
وهية مدنكة علية...
صفاء جان لازم ايدي من الجهة الثانية...
صفاء...مابيج شي حبيبتي...لا تخافين هسة يروح الوجع
_وين اني...عفية اريد شي يسكن راسي
جنت أون واحجي
صفا...هسة...
رجعت غمضت عيني لان اشوف مغوش
شوي وحسيت احد دخل...
فتحت عيني شفت واحد.لابس ابيض بس ماميزت ملامحه..
ضرب ابرة بالمغذي...دقايق وماحسيت بشي...
من كعدت مرة ثانية عندي وجع بس مو مثل الاول...
ردت ارفع يدي احسها ثكيلة...
رفعت اليسرى...تلمست راسي ملفوف...
الضوء جان خفيف بالغرفة ...يمكن الدنيا ليل
التفت على صفحة شفت صفاء كاعد على كرسي ومرجع راسه يمكن غافي...
بس ماكدر ارفع راسي واشوف منو بعد بالغرفة
جنت كلش عطشانة..
_صفاء...صفاء
راسا كعد...ها حبيبتي...كمز يمي...
شلونج هسة...
_اريد مي عطشانة...
جاب كلاص مي...حاول يخلي ايده خلف اكتافي ويرفعني...شربت ورجع الكلاص
_شبيه راسي..وايدي ليش ماكدر اشيلها
_راسج مجروح بالكزاز مال الجام
وجف ايدج مكسور...بس شلون مادري
_خاف من نزلت اركض...اذكر وكعت على وجهي
_يجوز...
جان ابالي سؤال بس اخاف اطرحه..
_والطفل...
اجى دنك علية وباس كصتي...
ورفع ايدي اليسرى وباسها...
_فدوة لج ...المهم انتي سالمة...
دمعت عيني وانقهرت حيل...
مد ايده مسح دمعتي...
_ابد لا تنقهرين...حبي طلعتي من نص الموت
_امي وين
_نامت خطية صار يومين مانامت
_ليش صار يومين اني فاقدة..
_اي حبيبتي...بنج واصابتج براسج
بقينا كم يوم بالمستشفى لحد ماتأكدوا ماعندي ارتجاج او اي خلل براسي ...
من طلعنا صفاء مامقبل ابقى جوة ...شالني صعدني
لغرفتنا...
ونزلني على الجرباية...
_صفاء خلي ماما تجي تغسلي...
احس ريحة بية...
_مايصير تغسلين...يلا نلبس ايدج نايلون
اقترب علية...راد ينزعني دشداشتي
_شدسوي
_اغسلج
_لا صفاء ..خلي امي
ماسمعلي...نزعني دشداشتي وطلع شاف خاف اكو احد...ودخلي كرسي بالحمام..ورجع شالني...
لبس.كفي جيس حتى مايتبلل...
شاف طكعة زركة بزري...
تلمسها...هاي شنو..
_ماعرف يجوز من انظربت بالسيارة..
دنك باسها...
غسلي جسمي وطلعني للغرفة...
لبسني...تعاي نامي بحظني...تعبان
خليت راسي على ايده بهدوء
_تعرفين شصار بحالي من عرفت بيج
حسيت واحد وكف على صدري ويخنك بية
النفس بصدري ضاق
_شلون عرفت
_دكيت عليج ماجاوبتي...
رجعت دكيت على اهلي كالوا ماوصلت
ظليت ادك عليج
لحد ماواحد جاوب كال بهاي المنطقة صار انفجار
رحت اقرب مستشفى وظليت افتر بين الجرحى
سكت فجاة...حسيته غص
_عوف هالموضوع..بس خطية صديقتي واخوها ماعرف عنها شي
_ما ادري
بقت امي يمي كم يوم واخر شي راحت بعد مالح عليها صفاء...
وصفاء اخذ اجازة علمودي لان جانت الدوخة ماتفكني وماكدر اوكف وايدي مجبسة
وخطيبة علاء ...هبة جانت تجي دائما خطية تساعد عمتي بالتنظيف وتاخذ ملابسي تغسلهن
هبة مو بنت خاله علاء الح...
تصير بيبتي خالة امها...وامي من التقت بيها
كالت نفس اخلاق بيبتج ام حسام...
مرت الايام وبدت صحتي تتحسن وجبس مال ايدي فتحته...
وخياطات راسي هم...بس كصيت شعري لان مزينيه من جهة...
من جنت اضوج منها يبوس مكانها صفاء...
ولحد مابدى الدوام صرت احسن...
بس جف ايدي يأذيني اذا حركته هواي
صار زواج علاء...سويناله حفلة حلوة تونسنا
بس طبعا بالعرس لابست جبة لان صفاء ماقبل
حياتنا جانت عادية مابيها شي جديد
سوو سلفة ورتبوا البيت...
والشغل موزع بيني وبين هبة...
وهم ملتهية بالدوام...
بالعطلة مال الثالث احمد خطب...
ورحت بالخطوبة وصفاء على اعصابه
بحيث وداني الظهر ورجعني المغرب
ماشفت ناصر...بس شفت مرته...
خوش بنية وعائلتهة معروفة بالمنطقة...
وخطيبة احمد اخوية اختها اتصير
شايفها احمد بالعرس وعاجبته
بنات عمي حيدر عاتبني لان ما اجيهن...
وهنة كلهن اجن من صارت حادثتي...
شهرين وازوج احمد...
وجان لازم صفاء يحضر وكلنا رحنا بتنا  هناك
بيوم الحنة...اتكون هناك للزلم...
واغلبهن يلبسن حجاب لان طابين طالعين
وبالعرس جانت زفة للبيت وجوبي
وتفاجات بصفاء بس زفوا احمد كال يلا
طلعت امي له حاجته خلي بس للصبح شيرجعكم
واصلا اكو حضر تجوال
وعمي حيدر هم حاجاه...
كوة قبل...رغم امي طلبت من عمي حيدر ناصر مايحضر تجنبا للمشاكل...
وبس صبح الصبح كال يلا...
كلش انقهرت وطول طريق الرجعة دموعي ادير
هبة تسألني صفاء ليش هيج مستعجل
بس وصلنا صعد راسا للغرفة...
من صعدت...
_ليش تبجين
_ماكو شي بس انقهرت لفراق اهلي
_صار سنوات مفاركتهم لو حنيتي لهناك
سكتت...عرفته جان كوة لازم اعصابه فماردت اخلي ينفجر...
بعد سنة من زواج علاء واني جنت رابع جابت مرته ولد...
وبدت عمتي تسمعني حجي على الاطفال
وكل ما اكول لصفاء خلي اراجع دكتورة يتهرب
لحد مايوم نزلت سمعت عمتي تحاجيه
_يمة اول وتالي هية مايصير عدها...
وانتة ادري بيك تريد اطفال وتحبهم
_لا يمة خطية ما اكسر خاطرها
_ليش تكسر خاطرها اذا تحبك راح تريد سعادتك
حاجيها وفهمها وضعها
عفتهم وصعدت واني الوب
من صعد صفاء...
اول مادخل سألته
_صفاء شبية اني
_شبيج
_يعني من صارت الحادث قبل سنتين شصار
_سمعتي حجي امي
_احجي صفاء
جر نفس وكعد على الجرباية...
واني وكفت مقابيله...
_احجي صفاء
_رحمج تأذى من الضربة مال السيارة
_يعني شنو....مايصير عندي بعد اطفال
سكت ماجاوب ودنك
_جاوبني...مايصير عندي..
ليش ضميت علية...ليش خليتني بأمل
كل شهر اكول هالشهر حامل...
كمت اصيح...كام شبكني...
واني ادفع بيه ...
_حبيبتي كلشي رزق...وهذا هو نصيبنا من الدنيا
ظليت ابجي
_ليش هيج حظي...كولي ليش
بعد ماعرفت تغيرت الامور...
كامت عمتي تحجي علني...
ودكولي شجعي خلي يزوج...
ومن اتشوفه ايشيل ابن علاء...
ويلاعبه ادكولي حرام عليج تحرميه ...
لان يحبج مايريد يكسر خاطرج
اني صرت اكثر انعزالية عنهم...
واحس كل كلمة يقصدوني بيها...
حتى صفاء كمت ما اتحمل منه كلمة
تخرجت وصفاء كال اذا تريدين اوديج للدكتورة اتجيكين...
وفعلا رحت وماكو اي تغيير ...
مرت سنة على تخرجي...
وردت اقدم تعيين ماقبل صفاء
_ادري ليش
_مامحتاجين حتى تبهذلين نفسج
_مو الا واحد محتاج...ضجت من الكعدة...
وشتبهذل وراي الجعويط
_انتي صايرة واحد مايكدر يحاجيج كلمة...
ترة طكت روحي...سويت كلشي لج
وانتي مجلبة بحجاية الخلفة...
بابا خلينا نعيش مرتاحين لا تنكين
_صرت انك هسة...
لو تريدلك حجة
_حجتيش...شبيج انتي...
من شنو خايف
_لا عمي العفو من شنو تخاف
جنة واحد واكف مقابل الثاني تقدم بأتجاهي
وبعد خطوة وكف ...طلع وركع الباب
نزلت بالليل اسوي عشى...
صاحتني عمتي..
_اكعدي يمة اريد احاجيج...
كعدت مقابيلها...
_شوفي عمة...صارلج خمس سنوات مزوجة ابني
وقبلها سنة عشتي ويانة
حسبتج مثل بنتي... وماقصرت وياج
وابني هم مدللج ويخاف عليج من الهوى الطاير
بس انتي هم لا تصيرين انانية...
صفاء يحب الجهال...خلي يزوج ويأجر لمرته
وانتي ابقي بنصنا معززة مكرمة...
هية بس كالت كلمة مرته احس كلبي انخمط...
شلون لو صارت صدك...
كمت من يمها بدون ما احاجيها...
شافتني هبة واني داصعد الدرج...
حاجتني ماجاوبتها ...
دخلت لغرفتي وخليت دموعي تعبر عن حالي
اندكت الباب وانفتحت راسا
_شبيج هدى
ماجاوبتها...اجت كعدت يمي
_خالتي حاجتج
_هبة...صفاء ممكن يزوج علية
_والله شكولج...خالتي صار اشهر ادك عليه وتقنع بيه
وانتي هم عزلتي نفسج...
انتبهي لرجلج وداريه مثل قبل...
لج جان علاء يكولي شوفي هدى شلون اداري رجلها
سمعت صوت ابنها يبجي..
كامت له...
ظليت افكر صدك ليش هيج اسوي...
كمت غسلت ولبست سيت وتمكيجت
من رجع صفاء ودخل الغرفة...
شافني...اقترب مني وجرني لحظنه
_اي هيج اريدج...ترجعين وردتي المفتحة
بيومها عشنا ليلة حلوة ...كل ما اريد انام
مايقبل يكول مفتقد حجاياتج...
جان ثاني يوم جمعة كعدت متاخرة
نزلت وسمعت صوت خلاني جامدة بمكاني
....وللحكاية بقية