شفاه ذابلة

حضن دافي

يسعد مساؤكم..
اتفقنا مانزل بالعيد بس مثل ماكلت سابقا ماحب المتابعين ينتظرون ...
ولان البنات طلبوا عيدية...  حاولت انزل حتى لو بارت قصير...متابعة ممتعة
البارت الرابع عشر
همس ليل
_اوكفي..
جانت بحجايته لهجة أمر...
وكفت بمكاني وماعرف ليش رعشة خوف سرت بجسمي...
_شوفي خوية...
اريدن افهمج شي...انة ماراضي على الي سواه الحجي...
ماعرفن شنهي قصتج...
ومايهمني...احنة نساعد كل واحد...
هاي عوايدنا....
بس انة احسن وارج سالفة جبيرة...
واريدن انبهج....هني ماعدنا مشاكل
وبناتنا تربيتهم تختلف عن ابغداد...
راح اطلعين ويانة....على عيني وراسي
بس اياني واياج اشوفن شي عليج...
_مافهمت خوية شتقصد
_لا فهمتي زين...
لا تنسين حجاياتي...
عافني ومشى...
اني جنت مدنكة ماباوعت عليه...
بس نقهرت من حجايته...
هو اصلا ماشايفني...
وطول فترة وجودي ماطلعلي صوت...
عموما عفته...طلعت وياهم بسيارة قاسم...
من وصلنا تلثمت مثل ماعلمتني حسنة ولفيت ايدي...
بقيت هدى واحمد يلعبون قريبين علية...
اشتغلت وياهم...بس متت تعب...
وية حسنة جان الزرع قليل...
هنا المزرعة جبيرة...ما اصورت هيج
طبعا عدا مرت قاسم وحيدر...اكو فلاحات يشتغلون
بس الظاهر اقارب لهم...
لحد ماصار وكت الغدة...
هدى تعبت وكامت تبجي...
واحمد كل شوية يبتعد وارجع اجيبه...
من رجعنا...بس نزلت
حاجاني حيدر...عليمن مبهذلة جهالج...
ماباين عليج متعلمة على الشغل...
عفته ورجعت لبيتي...حقهن يحجن عليه...
طول الشغل هو عصبي ويصيح...
مامتعلمة على هيج شخص...
حسام رغم حديته مو عصبي حيل...
وعدي اصلا بارد الاعصاب
ثاني يوم كعدت مابية حيل اشيل لا رجل ولا ايد
اني شجابني على هالشغلة...
عبالي بحيل قبل...الظاهر تعلمت على الراحة...
مدري حيلي راح بروحة الغالي...
رجعت نمت...وكعدت على دكت الباب...
شفت جهالي كاعدين يلعبون يمي..
كمت لبست عباتي..فتحت الباب
_ها خية مابينتي اليوم..
_والله رسمية مكسرة
ضحكت...چا شعبالج هينة الشغلة...
_اي والله مو هينة
_امشيج خية اتريكي وارجعي وياي احسنلج
هزيت راسي...كلت بنفسي...
عندي كم فلس جوة ايدي...ومن اخلصها ابيع من الذهب...
والله كريم لباجر....
رجعت وية رسمية وراها يومين لاكاني الحجي اباب المطبخ...
من طالعة وجان وياه حيدر...
بوقتها جنت ادور على احمد اختفى...
وحيل هبطت عليه...
وفجاة شفته برة البيت يلعب..
طلعت شايطة...وصحت عليه بصوت
_احمد تعال اني اعلمكم اليوم
جنت احجي واني افتح الباب...
الزلم دائما يدخلون من باب المضيف...
واجى بوجهي الحجي...
_بوية على كيفج وية الفرخ....شماله
استحيت وجريت راسا عباتي على وجهي
حيدر جان داير ظهره والتفت فجأة
_مابي شي عمي جنت ادور عليه ظل بالي
_حقج بوية...هذا امانة...
مرتاحة هنا مو اخيرلج من الحوي والتعب
_رحمة والديك عمي...
ماجنت اكدر احجي وحيدر موجود...
هو مايباوع واحد يحجي الحق...بس احسه متملل
_چا بوية الحصاد يرادله تعلوم وحيل...
وانتي بت ابغداد مامتعلمة....
وان احتاجيت لشي بس أمري
انة حسبة أبوج...
_والنعم منك عمي ماتقصر...
وكفت على صفحة فات...
وبعده حيدر...
فات من يمي وحجى...
_صوتج لا تعليه...منة الزلم ..
حسبالهم من نسوانة...
رفعت راسي اباوع عليه وهو يطلع من المطبخ..
اخذت جهالي ورحت للبيت...
جنت حيل مقهورة...وبنفس الوقت مشتاقة لخالتي
وكل الي بالبيت حتى زهراء...
احمد دائما يسائل على بيبيته وعمه وولد عمه
واني صار مدة احس بخنكة ...
احس فجأة وعيت على نفسي وعلى الي سويته
صار اربع اشهر على طلعتي....
هسة خالتي شكالت...هم سبتني...
هم كرهت اليوم الي لفتني بيه...
ماتعبانة هنا...بالعكس متونسة وية رسمية والحجية
بس الحجي الي اسمعه...
ان كان من حيدر او جناينهم ...يقهرني
بليلتها نمت وحلمت حسام زعلان مني...
اجاني نفس ماهو ...
عاتبته ليش عفتني...ماجاوبني...ويباوع علية بنظرة زعل...
كعدت مقهورة..كلت اكيد زعلان لان عفت امه...
وهم صار اشهر مازرته...
بس مو يكولون الموتى يحسون بأهلهم...
ماحس بلي شفته...
كمت لميت ملابسي وملابس جهالي...
بهالوكت طب الشتى...
والحجي خطية جان جايب للجهال ملابس...
وردت انطيه فلوس زعل مني وعاتبني...
طلعت لبيت الحجي من الصبح...
_صبحج الله بالخير...
خية شمالج جنج مخروعة من الصبح...
_رسمية وين الحجي...
خومة طلع...
_لا...اليوم ماطلع وياهم...
ليش شجرى...
_وينه هسة
_بالغريفة وية الحجية يتريكون..
رحت عليهم...
_صباح الخير
_صبحج الله بالخير والعافية بوية...
تكربي الزاد مصبوب
_بالعافية عمي...
بس اجيتك بشغلة
_كولي بوية...
_اريد ارجع لاهلي..
_عين الصواب بنيتي...جاوبت الحجية
والله يمة تهكين عمتج ميتة على شوفة فروخ وليدها
الحجي...صار بوية...بس كون ماحد سمعج حجاية
_لا عمي...بس اني اشتاقيت لهم...
وخلي ولدهم يربون بحظنهم...
ذولة امانة  ...
_اي بوية..عفية عليج...
انتظري لباجر...نحدر لبغداد وناخذج ويانة
بقيت اساعد رسمية بس متوترة...
شراح يصير.....
ثاني يوم من الصبح...طلعت اغراضي طبعا بس الملابس...
واجيت سلمت على الحجية وبست ايدها...
_الله وياج يمة...احنة هلج...
شماتحتاحين ...
الله لا يحوجج لبنيادم ...
رسمية كامت تبجي...
_تبجين علية لو لان اساعدج
بوستني..
_خايبة والله عشرتج حلوة...
شكثر ما انتي بومة بس تبجين وتونين...
بس راح اشتاكلج ...
السيارة جانت بيكم دبل قمارة...
صعدت بالكشن ليورة صرت ورة الحجي...
وقاسم يسوق...
وصلنا لبغداد....ودليتهم بيتنا...
وكف اباب البيت...واني رجلية ماتشيلني حتى انزل
باوعت للبيت من برة..
_نزلي بوية...لا تخافين انة وياج...
ومثل ماكالتلج الحجية...
احنة هلج شمادار بيج الوكت
نزلت وشفت الحجي هم نزل وياي...
دكيت الجرس وحس گلبي يريد يوكف..
من انفتح الباب..شفت عدي كبالي...
راسا فتح عينه على وسعهم..
_لج فرحة وين جنتي...
بعده ما مكمل جيت عليه احمد وحضن رجليه وهو يصيح عمو..
نصى عدي وشبكه..
_يابعد عمك واهله...
جان يبوسه واحس عينه مدمعة...
رفع عينه علية وبيها عتب...
_وين جنتي حسابي عسير وياج...
مد يده يريد يجر هدى ..
حشكت راسها بصدري...
انقهر...بسيطة يافرحة
_على كيفك بوية...
مو هيج الحجي يصير
اول مرة ينتبه عدي للحجي...
_العفو عمي منو حظرتك
_بوية خيتك جانت يمنا معززة مكرمة...
ولا يروح بالك لبعيد...
انة ابو حييدر...
_تفضل حجي استريح يمنا...
_لا بوية وراي شغيلات لازم اخلصها...
هاي بنتكم...وان جان عقلك يوزك لشي
هي تندل بيتنا خليها تجيبك وتجينة
سلم عليكم...
مانطى لعدي مجال يحجي...
ولا انطاني مجال اشكره...
صعد بسيارته ومشى...
_فوتي فوتي خلي نفهم...
احمد دخل يركض..وتلوكه ول١د عمه...
وزهراء طلعت عليه هم..
_لج فرحة...وين جنتي خيتي...
اجت تحظن بية...
عدي جر هدى مني
_ها عمو نسيتيني...
حبيبة عمو ...
هدى جانت البنية بين الولد...وحيل تشبه ابوهة
لذلك يحبوها حيل
_وين خالتي...
زهراء...جوة نايمة...خطية من رحتوا لسة مريضة
بهالاثناء سمعنا الباب انفتح...
وصيحة خالتي...
اثاري احمد راكض على غرفتها...
رحت عليها...لكيتها تشبك باحمد
_يايمة ريحة وليدي...
يمة حسام ابنك رجعلي
وكفت بالباب ودموعي اتصب...
استحي اطب عليها...
التفت من حست بية..
_ليش هيج يافرحة...
هاي تالي تعبي وياج ...
تحرميني من الباقيلي من الغالي...
تكربت عليه...جانت كاعدة على الجرباية...
كعدت يم رجليها وخليت راسي على ركبها
_خالة فدوة اعذريني...
والله ماجنت بعقلي...
مدري شجاني...
ماكدرت اتحمل فكرة غير حسام يصير زوجي...
والله خالة ...ناره بعده بكلبي...
شلون رضيتيها انتي..
خلت ايدها على راسي
_يمة اني اريد مصلحتج ومصلحة هالجهال...
خفت عليكم من عمج...
ماردت تتبهذلون واني ادري بيه نذل
_ادري خالة...بس نفسي ماقبلتها...
خالة فدوة سامحيني...ماكدرت ابعد عنكم..ولا عن حضنج الدافي...
واذا تريدين...اخذي الجهال واني اروح لعمي
_ليش يمة همة بس الجهال ريحة حسام...
انتي قطعة من كلبه...شلون افرط بيها...
شهكت ونيت لحجايتها ...
وظلينة هية تنعي واني ابجي...
من ارتاحينة...حجيتلهم وين جنت
بس ماحجيت كل التفاصيل
عدي حسيته ابد ما راضي..
بس كأنه ماحجى لخاطر خالتي...
ايام ورجعت حياتنا مثل ماجانت...
الي فهمت عمي اول شهرين مسويلهم هواي مشاكل...
كل يومين والثالث جايهم لجنة...
بس بعده ملتهي عنهم...
مرت كم يوم ورجعنا لوضعنا القديم...
بس زهراء هواي تحسس مني...
اذا غسلت واجى عدي ادكلي شعندج يومية غاسلة وهو شتى...
وتحجي عدي شكد يحبها ومايرفضلها طلب
واصلا من اجى صالحها كال لها مستحيل ازوج لو اعرف اعوف البيت ومن هالامور...
جنت اسمع واني ساكتة...
حتى كمت مانزل من الصبح لحد مايطلع عدي لدوامه وياخذ ولده وياه يلا انزل...
ومن يجي اتغدى واصعد لغرفتي...
وهو العصر يطلع للمحل...واسوي عشى اتعشى اني وخالتي والجهال من وكت....
واصعد حتى ياخذون راحتهم...
بعد اسبوعين من رجعتي ...
خالتي تحسنت صحتها...وطول هالفترة اني اداريها
فجاة سألتني
_اكول فرحة يمة...
الناس الي جنتي يمهم...
وين كاعدين
_ماعرف خالة...منطقة على طريق كربلا
_يعني ماتعرفين ترحيلهم...
_ اعرف...عرفت اسم قريتهم...
واذا نروح نفس الطريق يمكن اندل...
بس ليش خالة
_عيب يمة جابوج لهنا وماقبل ابوهم يدخل..
واشهر انتي يمهم قايمين بواجبج هم لازم نتشكر منهم...
اني حسيت ورة الموضوع شي...
بس كلت يلا اروح اشوف الحجي والحجية ورسمية
اشتاقيت لهم...
وفعلا الجمعة...راد عدي هم يجي..خالتي ماقبلت
طلعنا من الصبح...
ومن عبرة بغداد كمت اركز بالطريق...
اريد اتاكد...اني اذكر شفت لوحة بداية طريقهم
شفتها...خالة هاي هاي...طبعا صحت من دون ما اشعر
الركاب انتبهوا علية...
وكفت السيارة خالتي ونزلنا
_خالة خوما صوتي عالي جان
_والله خالة جفلتيني
_نسيت نفسي...واني هم ما اطلع هواي...
بقينا واكفين حايرين شلون نوصل...
اندل بس بداية الطريق...
وهمة عرب هواي شلون نميزه...
اجت سيارة خالتي اشرتله
_الله يساعدك يمة...نريد بيت حجي ابو حيدر..
_اي حجية اصعدي اني اوصلكم...
وفعلا والله وصلنا...
شفت شخص طلع...يمكن سمع صوت السيارة
انتبهت حيدر...اهو هذا الغثة شطلعه..
نزلنا وهو اجى باتجاهنا...شفته انتبه للجهال...
الله يساعدك يوم...بيت حجي ابو حيدر مو
_وصلتي حجية...هلا بيج
_بالمهلي...
_شلونج خوية ام احمد
طبعا اول ماشفته جريت عبايتي اغطي نص وجهي
_الله يخليك خيي ابو حسين...
_تفضلوا حجية...زراتنا البركة
كلهم النسوان طلعنا استقبلن خالتي بالترحاب...
ومنهم الحجي...
ودخلنا للدير...من الزلم بس الحجي دخل ويانة...
رسمية صاحتني للمطبخ  خالتي بقت يمهم...
من رجعت جانت تسولف ومرتاحة شكلها...
جلبوا الا نتغدة يمهم...
ومن كالت خالتي اريد نروح نزور...
اخذنا حيدر ويانة الحجية ورسمية للامام...
دخلنا زرنا تيهت خالتي ...طلعت ظليت واكفة انتظرهم...
ماكو...باوعت من بعيد حيدر يتلفت ...
ضحكت هو حتى لو شافني مايعرفني بس يمكن يميز الجهال...
رحت باتجاهه...ها خيي...وين الباقين
_وين جنتي...صار ساعة ندور...
ضجت من اسلوبه..جان احمد واكف يمه...
وبيده حذائه...نزلت هدى...ودنكت البسه الحذاء...
_وين الباقين...حاجيته واني مدنكة...
_كلهم كاعدين هناك..بس انتي اختفيتي
رفعت وجهي له اريد اجاوبه واني بعدني كاعدة بالكاع...
شو هذا راسا صفن علية وفتح عينه...
_اللهم صلي على محمد...
تفاجأت بحجايته...وراسا اذكرت ماغطيت وجهي بالعباية...
....وللحكاية بقية