شفاه ذابلة

وداع

البارت الخامس عشر
همس ليل
تفاجأت بحجايته وبنظرة عينه ...
دنكت وماجاوبت...رادت خالتي نرجع راسا للكراج
ماقبل اصر الا يوصلنا بعد مايوصل الحجية ورسمية
بس خالتي ماقبلت كالتله ترة بعد مانجيكم
وصلنا للكراج وصعدنا بالسيارة...
وراح لابو الكوستر دفع كروتنا...
رجعنا للبيت وصلنا متأخرين بالليل..
اني من التعب صعدت الجهال نيمتهم ونمت...
كعدت نص الليل راسي يأذيني...
نزلت اجيب مي حتى اخذ بريستول...
وصلت لنهاية الدرج سمعت صوت بالهول..
الدرج يصير بصف باب الهول...
_اي والله يمة شفتهم خوش ناس...
وزلمهم ماتدخل يم النسوان...
وحتة بيتها وحدها...اصلا من تيهت
ابنهم ضل حاير شلون يلكها لان ماشايف وجهها
اني شفتهة تجر عبايتها على وجهها...
_هاهية يمة المهم اطمن على المكان الي جانت بيه
_لايمة هاي ترباة ايدينا ...لا تخاف مايطلع منها العيبة...
رجعت صعدت بسكوت واني شابعة قهر
اثاري روحة خالتي مو تشكر منهم...
جانت تريد تطمن واطمن ابنها وين جنت...
كعدت على جربايتي ودموعي اتصب...
عفية دمع ماتخلص ...
بس الصبح نزلت ولا كأنو اكو شي ...
واستلمتني زهراء....بسامير ومن اتشوف خالتي تسكت...
مرت الايام نفس المنوال لحد يوم ٢ من شهر الثامن سنة ١٩٩٠...
وعينا على بيان بالتلفزيون...
دخول العراق للكويت...جان اكبر صدمة لنا...
مر سنتين من طلعنا من حرب القادسية ...
مالحك الشعب يرتاح...ولا لحك دموع الارامل والامهات اتجف...
الشعب ضاج...بين خوفة لا ندخل حرب ثانية...
وبين تململ من الوضع والي ممكن يصير
وفعلا كم يوم واعلنت امريكا هية وتلاثين دولة وقوفها ضد العراق....
سبع اشهر تفصل بين دخول العراق للكويت
وبين ضربة امريكا ...
سبع اشهر من التوتر النفسي والخوف للي راح يصير
المدارس مثل كل سنة بدت بشهر التاسع بس هالمرة بدت وياهة دورات على تعليم استخدام السلاح حتى للنساء...
ودورات دفاع مدني شلون تتعامل وية الغازات السامة...
بث اشاعات راح ننضرب كيماوي خلى الشعب يدخل بمرحلة جديدة من الخوف...
وبشهر الثاني....كعدنا على صوت ضرب يرج العاصمة...
هجموم بالطائرات لاح اغلب المناطق والمنشأت الحيوية...
رعب وخوف ...اول مرة نشوف طيران فوق العاصمة...
دوي القنابل والصواريخ وصوت الانفجارات...
ليل بغداد صار نهار....
من سمعنا احنة ركضنا نسد فتحات البوب..
ونغلقها من جوة خوفا لا ننضرب غازات سامة...
طبعا قبل الضربة الي جانت متوقعة ...
السوق فرغ من المواد الغذائية...
صبح الصبح...واحنة مانايمين...
احنة نص فرعنا جانوا طالعين للمحافظات قبل الضربة بكم يوم...
وزهراء ظلت تبجي وتتعارك وية عدي تريد اروح وية اهلها ...
عمامها عدهم مزرعة خارج بغداد...
واهلها قرروا يرحون بيها...
عدي كال لخالتي خلي نروح وياهم...
بس ادري خالتي تفكر بية لان عدهم شباب هواي شلون تاخذني..
ماقبلت...
عدي....يمة لعد راح اوصل زهراء والولد وارجعلكم...
ام حسام...اي وليدي لا تنسى وحدنا نبقى مو تتاخر علينا
عدي...لا يمة شلون اعوفكم...بس ليلة وحدة ابات وارجع..
بس الحظ بالليلة الي بات بيها صارت الضربة..
بقيت اني شابكة هدى وخالتي شابكة احمد من الخوف.
الجهال يبجون وصوت الدوي فوك راسنا...
لحد ماصبح الصبح يلا بطل الضرب...
طلعت خالتي للباب...
رجعت ضايجة...الشارع فارغ ...حتة الي بقوا من الصبح طلعوا...
بقى كم بيت ماعدهم احد وين يرحون...
_يمة شلون بينا واحنة وحدنا....
_مادري والله خالة...حقها زهراء من طلعت
_هسة لو عدي موجود جان على الاقل نشوفلنا مكان
اثناء النهار ماكو ضرب...
بس الدنيا سنطة لان فارغ الشارع...
وعدي ما اجى...الظاهر ماحصل سيارة ...
لو الطريق مسدود...
بالليل اشتغل الضرب مرة ثانية...
وهالمرة اقوى لان ضربوا مواقع يمنا...
بحيث جام البيت اتكسر...
الجهال ارعبوا وصار عياطهم بفلس...
خالتي حسيتها ماتت خوف...
تشبك مرة احمد وتسكته مرة هدى...
الي كاموا يرجفون...ماصدكنا صبح الصبح...
_شلون يمة ولج الجهال راح يصير بيهم شي
_شمدريني خالة وين نروح قابل...
_هسة لو عدي موجود
_اكيد نسد الطريق...خالة همة بس يضربون بغداد
_اي يمة غير العاصمة وبيها كل المواقع المهمة
_لعد خلي نطلع لكربلا
_وشعدنا هناك
_روح يم بيت حجي ابو حيدر....
اصلا منطقتهم بالاطراف وما يمهم شي
_عيب يمة شنكول
_خالة شكو بيها مايكولون شي...
وبعدين ماتشوفين وضعنا باقين وحدنا ...
البنات طلعن وية عيالهن...
وعدي اكيد نسد الطريق عليه...
نبقى هنا والجهال الليل كله يلوبحون من البجي...
عود نروح بالصريفة الي سولياها
_صار سنة قابل بعدهي
_ما اعتقد يفلشوها...
_خلي اشوف سيف بلكت يودينا....
طبعا بيت الحجي بعد روحتنا لهم...
عزمهم عدي...اجى الحجي والحجية ورسمية وقاسم
ورجعوا فترة وعزمونا...
بس راح عدي وعمتي...اني ماقبلت اروح...
لان هدى جانت مريضة وهم نحرجت من حيدر من صار الموقف وياه بكربلا...
_يلا يمة لمي غريضاتج واخذي مواد وياج...
الولد راح يودينا...
ودانا وهالمرة خالتي اندلت اكثر مني وصلتنا لحد بيتهم...
راسا طلعوا من سمعوا صوت السيارة...
تلاكنا الحجي ذاك الملاكة...ورسمية طلعت تبوس بية
_ياخاينة العشرة...هجي بذات لا تسألين لا تتتحجين
_عذريني رسمية خيتي...امري مو بيدي
دخلنا جوة بالدير...الحجي والحجية والنسوان ويانة
_شلونها ابغداد
ام حسام...والله حجي مو شي الوضع...
الليل ينكلب نهار من القصف...
_چا بوية المنطقة امتلت من كرابتنا لهناك...
ليش ماجيتوا كبل الضربة..
_ماجنة متوقعين هيج
_ابو صفاء ماشوفنه وياكم ...
_راح يودي مرته لاهلها وماكدر يرجع...
ذولة الجهال يموتون خوف بالليل...
ام احمد كالت خلي نروح لبيت الحجي
الحجي...كل الهلا بيكم مناك لهنا...
چابوية غير بيت أبوها هذا
فرحة...عمي والنعم منكم...ناخذ الصريفة اذا بعده موجودة
الحجي...عفى عليج بوية...
هذا بيتكم نطلع احنة وانتو دجعدون
ام حسام...دايم حجي...بس هناك احسن
الحجي ...والله بوية اجونا ناس من ابغداد وكعدوا بيها
ام حسام...حقكم حجي...احنة نطلع لكربلا ناجر هناك
_لا بوية شنه هالحجي...
كولي ياالله حجية...
هسة تريحوا وتغدوا وبعدين اندسولف
طلع وعافنة...ارتاحينة ...
صبوا غدة ...
همة طبعهم الزلم تتغدى وحد والنسوان وحد
من خلصنا وشربنا جاي ...
جنت اغسل واجت خالتي يمي...
_يمة عيب ...امشي نروح لكربلا..
واذا مالكينا مكان نرجع لبغداد
_صار خالة ...
انداريت شفت رسمية واكفة...
خالتي ما انتبهت راحت تحاجيهم
_وين هية شمالها عمتج
_ماتاخذ راحتها...هية مامتعلمة خارج بيتها...
حتى يم بناتها ماتبات
سمعت صوت حيدر طب سلم على خالتي...
وديحجي وياهة...
_حجية وين رايحة...
ترة كربلا وضعها موشي ...
ورجعة لبغداد صعبة طرق بغداد اغلبها مسددة
وهذا بيتكم...
اذا ماتشيلكم الكاع...على راسنا نحطكم
_يمة تسلم...بس اخيك هم ماعرف عنه شي
_ابو صفاء زلمة ماعليه شي...
عفته يحجي وياهة ورحت يم رسمية للمطبخ
كدروا يقنعوها ..وفرغولنا غرفة كعدنا بيها...
وخطية خلال هالفترة الولد ابد مايتواجدون كله بالمضيف...
واغلب الليالي يجون اقاربهم من الزلم...يتعللون
والنسوان هم...
كهرباء انكطعت....بيتهم طول اليوم هوسة ناس طابة وناس طالعة...
اصلا المنطقة كلها هيج...لان هواي ناس اجت من بغداد...
حقول الدواجن مالتهم كاموا يفرغوها...
صار غدانا وعشانا دجاج...لان وين يودوه والطرق انقطعت...
يوم سمعنا ضرب بس بعيد
كلنا معقولة كاموا يضربون كربلا هم...
بس اجى قاسم كال الجيش انسحب من الكويت...
والطريق بين بغداد وكربلا امتلى دبابات...
وديضربون كربلا لان بيها ثورة...
وهالموضوع شمل مناطق الجنوب هم...
بس ماتوصلنا اخبار...
خلص شهر الثاني والثالث وخالتي كامت تلوب على عدي...
واكثر من مرة تريد تنزل لبغداد ومايخلوها...
اخر شي عندت...الحجي كاللها خلي قاسم يوديج
وبقي ام احمد والجهال هنا...
طلعوا من الصبح...
واني بقيت مثل كل يوم اساعد رسمية...
شوية وافتقدت احمد...بهالوكت عمره جان تقريبا سبع سنوات...
طلعت ادور عليه اعرفه يلعب وية الجهال...
مالكيته دورت البيت كله...هم ماكو...
سألت الجهال كالوا جان ويانة يلعب...
ظليت ادور والبيت كله انخبص ..
كمت ابجي وطلعنا ندور حول البيت...
اخر شي فقدت كمت اصيح ...احمد لك يمة وين رحت...
ظليت امشي ومادري بروحي لحد ماوصلت للشارع ..
شفت سيارة بيكم اجت وطبكت بصفي..
نزل منها حسين ابن حيدر من الباب اليمي...
وبراه احمد...يمة اني شفته فقدت كمت ابوس بيه
لك يمة وين رحت ...وكعت عبايتي...
_على كيفج ام احمد...
شطلعج للشارع وحدج...
رفعت راسي شفت حيدر واكف يباوع علية
_ماما عمو حيدر اخذنا هناك يم الزرع وشفنا طيور حلوة...
اني سمعت هيج واعصابي اصلا تعباهة ...
وكفت على حيلي واني اباوع لحيدر...
_على اي اساس تاخذه بدون ما تكلي...
من انطاك الحق...ماكلت امه لو دورته ومالكته شدكول...
رفعت صوتي من احجي...
اباوع هذا فتح عينه على وسعهم...
_صوتج كصري...ماعدنا حرمة ترفع صوتها على زلمة...
وابنج دزيته عليج يكلج وكال امي وافقت...
وعباتج حطيها على راسج...
وامشي من جدامي هسع لان داشوفن النبي عربي
جان يحجي بعصبية واحسه دمراته راح اطك
عدلت عباتي وجريت ابني ومشيت...
ركب سيارته وساق...بس مارجع للبيت
_ماما شبيه عمو حيدر
_صدك دزك علية...
_اي ماما بس دورتج مالكيتج
_باوع احمد هالمرة راح اعديها لك...
بس مرت الثانية ترى اعاقبك اذا جذبت...
شكد عيب واني انهديت بالرجال...
صدك لو كالوا سكت دهرا ونطق كفرا...
هسة صوتي ما سامعه ومن احجي انهد بيه
رجعت للبيت والكل تلاكاني وين لكيتيه...
جانوا خطية متوزعين يدورون عليه...
بقيت اكل بنفسي...عيب من الرجال فوك مامضيفينة. .
العصر رجعت خالتي...
كالت عدي راجع اول مافاتحين الطريق بس بدون مرته...
باجر يجي ياخذنا...
بالليل سوينا عشى...
كل مرة رسمية ومرت قاسم ياخذونه للباب المضيف
ومرات اني اطلع من المطبخ...
ويجون الولد يشيلون الصينية اذا ماعدهم ضيوف وماكوا مواعين...
اليوم ماطلعت ...انتظرت بالمطبخ...
اخذوا كل المواعين...كمت خليت القوري على النار...
_امشي خية نتعشى
_روحي رسمية...اني اسوي جاي ما اشتهي...
بين ماحظرت الاستكانات
_رسمية خوية الجاي جاهز...فات للمطبخ وهو يحجي..
شافني دنك وراد يطلع
_خوية ابو حسين....
بقى واكف وظهره لي...
_تعذرني على اليوم...ترة والله اعصابي تعبت من كد مادورنا ومالكيناه...
ماحاجاني...عافني ومشى...
براحتك...المهم بريت ذمتي...
حجيت وية نفسي...
ثاني يوم اجى عدي من الصبح...
اخذنا بعد ماتشكر من الحجي...
رجعنا للبيت...الجام كله مكسر...وصاير التراب بيه تخنك...
اجينا انظف المي انكطع...
بقينا فترة تبهذلنا....مي قليل يجي...
ومن يجي نركض نملي اسطوال وبطالة...
كهرباء ماكو...عود بعد فترة اجت متقطعة باليوم ساعة لو ساعتين...
خالتي كل مادكول لعدي جيب مرتك والجهال
يكول خليهم هسة...
بعدين رجعوا اهلها يلا راح جابها...
واول ماجت ...ذبت بمسمار
_من هاي مايجي علية ...
طبعا خاليله الجو...
ماجاوبتها...رجعنا للحياة الاولى...
انفتحت المدارس...ورجع احمد يداوم وية عمه وولد عمه...
وبهالاثناء نفرض الحصار على العراق...
وراتب المعلم صار ٣٠٠٠ دينار...مايكفي كروة يومين...
كلشي غلى...
سوولنا بطاقة تموينية للعوائل...
صح بيها هواي مفردات بس كلها تعبانة التمن والطحين...
هذا جان برنامج الغذاء والدواء مقابل النفط
الوضع تعب...صارت اغلب الناس حصرة عليها اللحم والدجاج...حتى باقي المواد صعد سعرها...
احنة ماعدنا مورد بس راتب حسام وعدي...
واثنينهم صار مايسوون...
عدي اضطر يعوف التعليم ويلزم بس المحل
وايجار البيت مالتنا ...
فوكه زهراء كامت تذمر ...
مرات احسها حقها...رجلها يركض ليل نهار...
مامجبور يعيل عائلة فوك عائلته..
حتى لو نشارك بفلوس الايجار...
خالتي تمرضت...والمراجعة للدكتور تكلف...
مرات بدون ماتدري اخذ قطعة من الذهب...
من اوديها للدكتور...ابقيها تنتظر يمه انزل ابيعها
وارجع...
وهم ماكول لعدي من يسألني كفت فلوس الدكتور والدوة اكوله اي...
وابد.ما اطلب منه شي...رغم هو خطية من يشتري للولده يشتري للجهال...
اني هم تعلمت من اودي خالتي اشتري لجهاله وجهالي...
بس الحياة حيل صعبت...وبدا دوام المدارس...
ويراد لبس وقرطاسية...
هواي عوائل بطلوا جهالهم لان مايكدرون يوفرون لهم ابسط المستلزمات...
اني من الي تعلمته من حسنة...
ساويت الكاع مال الحديقة وياي عدي...
وزرعناها كم نبتة طماطة وباذنجان وخيار وخضرة وحسب الموسم حتى نطلع مسواك البيت...
وحتة كمنا نربي دجاج علمود البيض...
بس خالتي صحتها تعبت اكثر...
وبيوم صاحت على عدي وعلية...
_يمة عدي....وصيتك مرت اخوك وجهاله...
لا تعوفهم ترة مالها احد غيرك...
جانت مددة على الجرباية...ومسندة ظهرها للمخدة
اجيت كعدت يمها...ولزمت ايدها...
_خالة شنو هالحجي ...انتي الخير والبركة
تربين الجهال وتكبريهم على ايدج...
رفعت ايدها وبستها...
جرت ايدها وخلتها على راسي...
_يمة الله ينطيج على كد نيتج...
ماضاع تعبي وياج...
والله احسن من بناتي الي من بطني...
ربي يرزقج من اوسع ابوابه...
ويطرح بولدج البركة ويبرون بيج مثل مابريتي بية وبأبني...
عدي...كولي ياالله شنو هالحجي...
ان شاء الله تكومين بالسلامة وترجعين تنورين البيت
وجهال حسام محد يربيهم بس انتي
هزت راسها...
عفناها تنام وطلعنا...
ثاني يوم نزلت اريد اوعيها حتى اغسللها ...
جان يوم جمعة وتحب تغسل قبل صلاة الظهر...
جنت بعدني نعسانة...لان كعدتهة على صلاة الفجر صلت وصليت وياهة...ورجعتها لفراشها
جرتني باستني من راسي....يمة المال والنخل حمال
ان شاء الله...
بستها وصعدت اريد انام بس ماكدرت بالبداية وبعدين يلا ...فكعدت متاخرة...
نزلت الجهال...خليت لهم ريوك ورحت عليها
فتحت الباب...يلا خالة حظرتلج الحمام...
فتحت البردات مال الشباك...
خالة...شو اليوم متاخرة بنومتج...
هم متجاوبت اجيت عليه...
خالة مديت ايدي على صدرها ماكو نفس...
بهتت ماعرف شسوي...اذكر بس عطت وجريتها بحظني...
اجى عدي وزهراء يركضون...عدي يريد ياخذها من حظني ما اقبل اهدها...
ماتت الحضن الدافي وعافتني...
شكد انهد حيلي من استشهد حسام...
انهد اضعاف هسة ...
ام حسام جانت ام لي...مايوم غثتني بحجاية...
حسام جنت اشوفه سبع ايام بالشهر...
وهية يومية وياي...صارت جزء من حياتي...
جنت بايعة كم قطعة من الذهب علمود موعد دكتورها
شلتها انطيتها لعدي لفاتحتها وللدفنة...
وبيدي غسلتهة...بدموعي عيني مو بالمي...
ودعت اخر حضن دافي لي...
ودعت اخر سند بالحياة...
اووووف يالزمن بعد بيك قهر ضام لي لو اكتفيت
...وللحكاية بقية