شفاه ذابلة

فرحة لم تكتمل

البارت الخامس
همس ليل
ثاني يوم من الغبشة اخذني للمستوصف..
من طبيت على الدكتورة طلبت مني تحليل..
راح حويتم جابلي كلاص صغير من المختبر...
_چا هذا شسوي بيه
ضحك...روحي للحمام وهو يشرحلي شسوي
_يا صخام شيسوي بشختي الدختور
مات من الضحك حويتم...دروحي فضينا
من رجعت جبتله الكلاص مليان
_هاي شمسوية
_غير حتى يطلع التحليل عدل
هز ايده وراح...
بقينا ساعة وصاحوا اسمنا...
اخذت التحليل للدكتورة
_ها زهرة مبروك حامل
_صدج الله عليج
_اي والله هذا تحليلج
كمزت من مكاني بوستها وهية تضحك
ردت اطلع...
_تعاي وين رايحة...غير انطيج علاج
شكد غابت عليج...
_ماعرفن دختورة...
_شلون يعني
_مو انة ماتجيني كل شهر
ظلت تحسبلي واني طايرة من الفرح اريد بس اطلع اكول لحويتم...
من طلعت تلكاني...
_شبيج جالكة حلكج ...شكالتلج الدكتورة
_حويتم انة حبلى
_صدك...يارحمة الله...
_اي صدج...ودكول هاي وحام عندج
بيومها الفرحة ما وسعتني...
اخذني للكاظم زرنا ووفينا نذرنا...
ومن رجعنا كلهم فرحولنا ...حتى مرت عمي..
بعد شهر كال حويتم خلي اوديج للمستوصف
جاوبته امه
_عليمن هالمستوصف اشو طول عمرنا نحبل ونجيب يم الجدة...
عوفها اوديها يم ام حسين..
راد يحجي حويتم ...اني جاوبت
_اي صدج حويتم خليني يم الجدة
رحت مرة وبعدين عفتها على الله...
بس لحد ماكملت الخامس واني مااطيق حاتم يدنالي
وهو ابد ماضاج...
يكول ماصدكنا الله رزقنا...
بس احسه مرات الشوكه ياخذه ...ومن يجيني ارجع ازوع يبتعد...
سمر هواي دارتني هالفترة...
ومرت عمتي ادردم...اشو حبلنا وجبنا محد حس بينا
ماعرف شلون احسب بالحمل...
ومادري شوكت دخلت بشهري...
بس مرة بنص الليل...حسيت بوجع بدى بظهري...
حاولت اصبر نفسي ماكدرت...
كامت لويات تجيني...كعدت حاتم...
خطية ركض لعمتي وراحوا جابو الجدة...
وصلت الموت وست ساعات اطلك ...
يلا جبت واجت ضي عيني وفرحة كلبي...
فرحة..سماها عمي كال هاي فرحتنا...
فرحة كامت كل ماتكبر تشبه ابوها...
العين صفرة مجرورة...والشفاه مرسومة
ووجها مو ابيض ماخذة مني ومن ابوها ...
صايرة خمرية...
طلعت كلش حلوة مو مثلي..
حمدت ربي حتى محد يظل يكوللها زركة ...
فرحة جانت البنية الوحيدة بالبيت...
وتتلوك للكل خاصة جدها وابوها...
فصاروا يحبوها حيل...
حتة ابوها كام يفضلها علية...
صار عمرها اربع سنوات....
وبدت مرت عمي تزن على ليش ماحبلتي ترة ارجع ازوجه...
وحاتم يكول مالج شغل بيها...
ماشفت هيج زلمة دراني وماسمعني حجاية تغث من ازوجنا ولهسة...
خلاني اتفداه تفدي....
بس فرحتي بدنيتي ماكملت...
جنت اشر هدوم بالسطح ...واسمع صوت عياط
هبطت ونزلت اركض عبالي فرحة صار بيها شي
من وصلت نهاية الدرج تلكتني عمتي...
_لج راح ابو بيتج راح...
المدللج راح...
بقيت صافنة بوجهها ومافهم شدكول
_عمة شدكولين...شصار
_لج غرك رجلج غرك..
بيومها دنيا صيف وحارة كلش...
حاتم يروح وية جماعته يم الشط الي هية الجادرية حاليا...
ويسبحون بنهر دجلة...
واحد من جماعته رايد يغرك...رايح حاتم يطلعه
غارك وياه...
من سمعت هالحجي بقيت اكمز بمكاني...
ماعرف شسوي...
نار شبت بصدري...
من مودي واحد يجذبها يكول مو هو...
انة اكمش سمر ...صدج سمر حويتم غرك
ومرة اكمش عمتي...ومرة اكمش ابن حماي جان عمره ١٢ سنة...
الجيران التموا على عياطنا وشوي وكرايبهم اجو...
الدنيا نخبصت واني متكورة بزوية ما اريد اصدكهم...
لليل جابوا تابوت حپيب روحي...
وانة صرت مثل المخبلة...ساعة املخ شعري..
ساعة اخرمش وجهي...
حاضنة التابوت واصيح...موكلت ماتعوفني..
شو جذبت علية...
لك حويتم هسة حسيت اني يتيمة ...
جروني من عليه...واخذوه...بس اخذو روحي وياه
صرت جسد بلايا روح...
لحد السبعة اني فاقدة ماخليت شي ماسويته
هلزت شعري...صدري من كد مالطمت صار ازرك..
خلصت السبعة...
خوالي جانوا جاين...كالوا ناخذها...
عمي اعترض كال تبقى هنا...احنة اهلها وهاي عزيزة وليدي...
بقيت يمهم...من يطلعون حمويني الصبح للشغل..
انزل جوة اشتغل وياهم ومن يجون اصعد لغرفتي
لحد ماخلصت العدة...
مشت الايام واني طيف صرت ...الي يشوفني مايكول عمري ٢٢ سنة يكول بالاربعين...
عصبة اشد راسي وفوكها شيلة...ودشداشة سودة عريضة...وجهي ابد ماحفيته...
ودوم ساكتة احس روحي مغادرتني...
الي مصبرني فرحة اخاف اعوفها يتيمة ...
ليش هية هسة مو يتيمة...
عمي وحماي صالح ابد ماقصروا وياي...
شايلين فرحة بالصلوات...
مرت عمي اول ايام بدلت كلمة الزركة بوجه الفكر...
ماجنت اهتم...مشاعري ماتت وية الي مات وعافني
شكد ماتحجي ماجاوبها اظل اشتغل...
ودموعي ادير مو على كلامها...
بس اذكر عزي وسندي  راح ...
صارت دورت السنة...واجو خوالي...بس هالمرة بدون بيبتي لان مريضة...
من شافوني رادوا ياخذوني وعمي تعارك وياهم...
واني هم مارضيت...
هنا ريحة رويحتي ....كل ليلة انام على مخدتي واغركها بدمعي واني احاجيه...
بالسنة الثانية...خوالي كثرت جياتهم وكاموا يلحون على عمي...
يريدون يزوجوني...يكوللوله صغيرة وعندك ولد شباب...
واسمعهم واهز بيدي...كل عقلهم بعد ذاك الطول الحلو يحلالي زلمة...
اخر جية دز عمي علية...
_بوية تدرين خوالج كل يوم وثالث جاين بنفس الموال...
وانة اخاف ربي...ماريد اكسر بختج...
اخافن لج نية تزوحين كوللي ...
صاحت مرته...شتزوج وفرحة...لو تموت ماخليها تاخذها...
جاوبته...عمي صدج تتحجى ...ويني وين الزواج
بعد عين...
ماكدرت اكمل غصيت باسمه
عمي...شوفي بوية...حتة نخلص من هاللغوة...
وتبقين هنا تربين بنتج...
راح اخلي كريم يعقد عليج...
ماعرف منو جانت شهكتها اكبر انة لو مرت عمي
_صدك تحجي ابو صالح...
وينها وين كريم...
بعدها ماكملت...عمي سكتها
_خلى يعقد عليها بس...حتة محد.يكدر يجرء يحجي بعد..
_عمي اترجاك ما اريدن خلني بينكم بدون عقد
زوج كريم
_چا اذا زوجته حليت مشكلة وصار محرم عليج
لا بوية هذا الحل الانسب...
نار وكبت بالبيت ...مرت عمي انكلبت علية وحش..
بس تجيب وادردم...
وتغم بية من اطب واطلع...
ماحاجيتها...مابيدي شي وين اولي...
اروح لخوالي من باجر يزوجوني...
وكريم....هذا اصغر من حاتم...
المديليل مال امه...لا فلح بمدرسة ولا بشغل...
بس يمشي ويتمعشك ....
وفوكها جانت دايرة مودة الشرب...
وكم مرة لكاه حاتم سكران وكتله...
هو مو صغير عمره ٢٣...وجان على اساس يزوجوه بنت خالته من مات حاتم...
من عرف بأبوه شيريد يسوي تخبل...
وكام يدردم على امه...لان مايكدر يواجه ابوه...
وابوه طرده من سمعه...
عاد امه حتة تتجفى الشر قنعته...
وفعلا عقد علية...
بس ماتغير شي...بقيت بشيلتي وعصبتي ودشداشتي السودة...
غبط على وفاة حاتم سنتين...وقرروا يزوجون كريم
بس خواله ماقبلوا الا يبطل شرب...
وهو رايد وحدة من بنات خاله....
ويوم جنت نايمة...وحسيت الباب انفتحت علية...
رفعت راسي واشوفن كريم داخل
_بيمة...شجابك هنا...
_غير زوجتي وجاي عليها...
شفته يتطوطح...عرفته سكران...
كمت من فراشي وغطيت فرحة لان شتى وباردة..
تقربت منه...
هو فتح ايديه...هلا هلا بالحلو تعال بحضني...
لزمت ايده...تعال خوية الله يهديك..
امشينا اوديك لغرفتك...
_لج اكولج هاي غرفتي وانتي زوجتي...واني اريد حقي اليوم...
جان رافع اصبعه كدام وجه..وهو يروح ويرجع بمكانه...
_ميخالف خوية غير مرة...
_اشششش...ماكو اريد هسة..
كام يجر بية واني ادفعه....حاول يوصل لوجهي يبوسني دفعته حيل...
وكع....سند ايديه بالكاع كاملي....
عبالي راح يطلع...بس هو جرني من عصبتي وكعت...
وكام يجر بية من شعري...
هو مجلب بشعري واني مجلبة بيده اريده يفكه...
جرني لباب السطح فتحه وشمرني ...
وسد الباب...اول شي دكيت الباب...
بعدين بطلت كلت كلها نايمة وبعدين شكلهم...
تكرفصت يم الباب ولميت نفسي واني ميتة برد ...
لحد اذان الفجر صرت ارجف سمعت صوت سمر كعدت دكيت الباب ...
سمعت صوتها ...منو
_انة خية زهرة...
فتحت الباب...يا صخام شطلع هنا...وج صرتي زركة من البرد ...
طببتني للغرفة...سمر غطيني بردانة...
_خية شطلعج بالسطح مادكوليلي
حجيتله...
لطمت على وجهها...صخام الي صخمه...
الا اكول لصالح عليه
_لا وانة خيتج لا تتحجين...
_وج ليش
_اخافن يندارون علية ويكولون حقه..
ثاني يوم دكتني نشلة خلتني ارجف من الصخونة..
تلث ايام مادري بالدنيا...
ومن كمت صارت عندي كحة...كمت اذا احجي اظل اكح..
عمي وداني للمستوصف ونطوني علاج ومافاد
كريم وجوده وعدمه نفس الشي..
من يجي اصعد للغرفتي...
ونعادت الطبة تالي الليل...
بس هالمرة كتلني وهم ماخليته يدنالي...
وكل مايروحون يخطبلوه نفس الحجاية خلي يتوب من الشرب...
امه رادت تحرك كلوب اخوانها...
كامت تخطبله من الغربة...بس هالمرة مايقبلون لان مايريدون بناتهم تنزل على ضرة...
من رجعت وحجتله...جنت فوك بغرفتي...
ماحسيت الا الباب ندفر ..وهو فات يجر بية
_كله صوجج محسوبة علية مرة...
مرمرة...مو مرة...هم زركة وشايفة نفسج علية
_شبيك خوية ليش هجي
_خي تخيج...من وراج مايقبلون ينطوني مرة
جان يجر بثوبي ويرجع يدفعني...
_وانة شعلية...
_چا عليمن...
بدة يغلط...لو عندج اهل جان مابتليت بيج اني
_مو صوجي اذا انتة عار...
لساني وزل...وما ابطل هالزلات...لطمت على حلكي..
لجن عبالك انطيته فرصة...
حطني وخلص علية من الكتل...امه وسمر يدكون بالباب...واسمع صوت فرحة طكت بجي...
وهو عبالك كمش عدوه...اريد بس يهدني ماكو..
لحد ما ابن حماي محمد دفع الباب حيل..جان عمره ١٥ سنة...وجره مني...
بس مخليني ونيدة....
حضتني بنتي تبجي...وسمر هم خطية...
وامه كامت تحجي عليه...
_الله لا ينطيك يااخبل...شلك على المسكينة فوك كرد الله عليها
كومتني سمر بدلتني ونمتني بفراشي ...وجابت دهن دهنت جسمي...
اسمع صوت امه تشهك وتدعي عليه...
غفيت من الضرب والتعب وانة حاضنة بنتي....
شفت بالحلم حاتم اجاني لابس دشداشة بيضة تبرج
وجهه ينور...
عاتبته...هاي حويتم شوف عفتني...كتلي ماتنظامين وتالي عفتني ورحت...
كال لا تهتمين تعاي يمي وماخلي احد يأذيج
_اي اي اجي
فزيت على صوت عمي واكف فوك راسي...
_بوية امسحيها بوجهي...
صوجي ردتج ماتبعدين عنة
_لا عمي اعرفن تريد بنتكم تربى بحظنكم...
عمي فرحة امانة عدكم اخليها
_بوية وين رايحة انتي...هذا بيتج...
وهذا الناقص اذ تندالج وطخج حسابه وياي...
_انة رايحة لحاتم...
_بوية كولي ياألله...ماعرف شحجى بس انة جنت فرحانة وماحس بوجع....
احس راح التقي برويحتي ...
صعدت سمر جابتلي عشى...
_اكعدي خيتي اكوليلج لكمة...
لو تشوفين محمد شسوة تخبل ...يكول عمتي حبابة ليش هجي يسوي عمي وياه
كتله علمود عمتك لو علمود بنتها
والله زهرة بنتج ماخليها تطلع لغريب...
عندي ثلاثة لازم تاخذ واحد...
جانت تريد تكسر علية وتجبر بخاطري...
لزمت ايدها...سمر انتي اكثر من خيتي...
أمان فرحة عندج...ادري تصونيها
كامت دموعها ادير...خيتي لا تحجين هجي
قابل اول مرة يكتلج ...اني منج يدبغ جلدي
_٠حويتم يريدني وينتظرني
ماحاجتني عبالها اهذري...
سمر....من حجت زهرة هجي خمطت گلبي بحجايتها...
بس كلت هاي من كد مامشتاكتلته...
عفتها غفت ونزلت على الدرج واني ادعي على كريم
خطية هالبنية ماشفت شي ...
ومن مات رجلها وهية بدت تذوي مثل الشمعة
كريم عمي طرده...وحتة مرت عمي هالمرة مارضت على السواه...
صبح الصبح...سويت ريوك لعمي وصالح...
وصعدت اريد اودي ريوك لزهرة...
طبيت لكيتها حاضنة بنتها ونايمة...
_خية زهرة...اكعدي جبتلج ريوكج...
على كولتج چا بعد شتريدين
ماجاوبتني ...خليت الصينية بالكاع...
وتقربت منها...نتهدت...زهرة...خية ام فرحة
هم ماكو...مديت ايدي على جتفها اهزها...
ماجاوبتني...رفعت صوتي فزت عليه فرحة...
_لج خية زهرة اكعدي...
لج خية على بختج لا تسويها صدك..
فرحة كامت تبجي وهية تشوفني اصيح وصعد عمي وصالح يركضون
ولكم زهرة ماتت...ماتت من القهر والضيم الله لاينطيكم...
لكل انسان طاقة تحمل...وزهرة تحملت هواي بحياتها
بس ماتحملت فراك الحبيب...
وبهاي تنتهي حكاية جدتي....
....وللحكاية بقية