شفاه ذابلة

فرصة اخرى

مساؤكم عافية...اني كلت اريد يومين ارتاح يلا اكتب...بس ماتنطون مجال ابد....
ولخاطركم...اكتب الي اكدر عليه وانزل...رجاء حبايب لحد يكول بارت قصير وكذا...متابعة ممتعة
البارت الرابع والعشرون
همس ليل
مرت فترة على طلاكي...
خلصتها بين دوامي بالمدرسة والبيت...
بالبيت وية حسومي وكرار سادس ادرسه...
والحمد لله طلع خوش معدل ونقبل هندسة بس بغداد...
وهاي بدينا دوام ونفس الموال...بالمدرسة ماعندي اختلاط هواي...
ماحب الكال والكلت وهواي من ضمن المنطقة
ولهجتي مبينة بغدادية فما اخلص من شلون اجيتي هنا...
عندي كم وحدة اكعد وياهن ومن شافني ما احب اسولف عن حياتي كفوا عن السؤال...
بس وحدة منهن صارت مقربة مني...
اسمها رباب...مزوجة وعدها طفلين اكبر مني كم سنة
اليوم جمعوا معلومات مطلوبة من التربية...
كتبت الحالة الاجتماعية...مطلقة
بعدها بيومين صار همس بالموضوع...
من ادخل غرفة استراحة المدرسات ...
جان معاون المديرة مدرس شاب...
مامزوج بعده....
وهواي حاطات عينهن عليه...
بس الولد ماله شغلة ...يعرفها منطقة عشاير...
واي شي ينأخذ عليه...
هو بالصدفة صديق احمد اخوية...
لذلك دائما يسأل اذا محتاجة شي...
من عرفوا مطلقة ...سؤاله يمهن اخذ غير منحى
والنوب دخلت جو اخر من الحجي ...
جانت وحدة اسمها لمى كلش معجبة بالمدرس اسمه عباس
دخل للغرفة وجان عندي شاغر وبس اني موجودة
_ السلام عليكم...شلون ست هدى
_وعليكم السلام.. الحمد لله...
_احمد شخباره صار مدة ماشايفه
_زين...بس دوامه شوية متعب لان مركز كربلا
ومنة الزرع والكاع...
يجوز لذلك مختفي...
_الله يساعده...انتة مرتاحة هنا
_الحمد لله ...
_الله عليج اذا محتاجة شي كولي
_رحم الله والديك ماتقصر
وية الجملة الاخيرة دخلت لمى
سلمت بس نظرتها لاستاذ عباس
_استاذ عباس..الجدول بيه مجال نغيره
_ست لمى...المديرة هية الي خلته
شوفيها ...
طلع ...ويه طلعته دخلت رباب وكم مدرسة
لمى...الظاهر الاستاذ مايقدم خدمات لاي واحد
وتباوع علية...
رباب اشرتلي بعينها...ما اهتميت ..
بقت كم يوم اذب حجي...
اليوم جان الجو بارد كلش ومغيمة...
داننتظر الخط يجي....
اغلب المدرسات الي بيتها قريب راحت
والي عدها خط اجاها...اني واثنين وياي
خابرنا الخط كال عطل بالطريق
رباب ولمى من مركز كربلا
رباب...شلون ترحين
هدى...هسة اشوف كيا منة تنزلني يم منطقتنا
وهناك اخابر عمي
فات عباس...
_ليش ست خطج وين
_عاطل
_تفضلي اوصلج بطريقي
_تسلم استاذ ...هسة اشوف سيارة
_شلون يصير...اني طريقي مناك
رباب...استاذ احنة مناك طريقنا...مادام وحدة من المدرسات ماجاية ناخذ ست هدى ويانة
سلم وراح...بس لمى ظلت تنافخ
من صعدت وياهم..
لمى...شو الاستاذ ماعرض على باقي المدرسات
لازم مايعجبنه
رباب...لمى عيب...عرض على ست هدى لان يعرف اخوها
لمى..هية حالة انسانية مابيها معارف
رباب...يعرفهن مايصعدن وياه...مايقبلون ازواجهم
لمى...والست ماعدها احد يعترض تصعد وياه
رباب...شنو هالحجي...شفتيها صعدت وياه
هدى...كل واحد يعبر عن اخلاقه وتفكيره ست لمى
لمى...صح...وهو الظاهر يعرف وضع كل وحدة وتفكيرها...
رباب...عيب ست المفروض احنة قدوة
لغيرنا
لمى...اي قدوة للفشل و...وعوجت حلكها
رباب لزمتني يعني لا جاوبيها...
بس حسيت راح اطك...ودمعتي بطارف عيني
خفت تنزل كدامهم وتفضحني
نزلت بداية منطقتنا...
اول مانزلت شفت سيارة دخلت...
مشت مسافة ووكفت ...
رجعت على ليورة..
اني جنت اطلع موبايلي حتى اخابر عمي حيدر يجيني...
نسيت اخابره ...ادور بالجنطة وارفع عيني امسح الدمع...تغوش ماداشوف الموبايل
فما انتبهت للسيارة لا من سمعت صوت ميزته
ناصر...هدى تعاي اصعدي اوصلج
جان فاتح الجامة وهو جهة السايق من يمي
رفعت عيني واني مصدومة....بقت ايدي بالجنطة وعيني عليه...
اذكرت ذيج الليلة الكشرة...
رعشة خوف امتدت على طول عمودي الفقري...
ناصر...شمالج شفتي شبح
ماحاجيته...رجعت ادور بالجنطة بعد ما استعاديت وعيي...
_مو اتحجى وياج ...
هم ماجاوبته...جنت مدنكة سمعت صوت الباب تنفتح...
وصوته قريب مني...خفت كلش....
_دحكي علية...من اتحجى وياج لا تتجاوزيني
اصعدي السيارة احسن من وكفتج والدنيا راح تمطر
بنفس اللحظة رعدت الدنيا..
فزيت مدري من الرعد...مدري من صوته الغاضب
_دتصور أمن واصعد وياك
صفن بوجهي ثواني...
_احسن من هاي وكفتج...
ماحجى اكثر...بس حسيته مو ذاك ناصر
شخصية ثانية ثابتة وراكزة مثل مانكول
مطرت الدنيا...
_امشينة فضيها
رحت للجهة الثانية...لفيت عبايتي حولي وصعدت عبالك احمي نفسي هيج
من رجعت لهنا لازم البس عباية...
ماعدهم مرة تطلع بدون عباية...
كعدت قريب الباب كلش...
هو سيارته بيك اب...
ساق...لا تخافين ما راحن اتهجم عليج
الخياطات بعدهن براسي
ماجاوبته...جان مركز بالسياقة...
الغيم صار كثيف وظلمت الدنيا عبالك الدنيا ليل وهية ماتجاوزت الوحدة الظهر...
المطر زاد والرعد هم...
_اريدن اعتذر على الي صار...
كالها وعينه على الطريق...
باوعت عليه...متغير هواي...جان شكله مثل مانكول طفولي ...
بعد مرور ثمن سنوات قارب التلاثين ...
شكله صاير رجولي اكثر.....
شواربه ثخنن ولحيته مالية وجهه بس بترتيب
بالبيت يجنبون يذكروه..
واصلا علاقته وية احمد خربت من يومها...
والبيت مالنا رغم مسافة عن بيتهم...بس الباب مالتنا من الجهة الثانية...
حتى من جنت اجي مااشوفه...
وخلال هالسنتين...ابد ماصار لقاء...
اني ماروح لبيتهم وطلعتي من الباب الثاني
اشوف سيارته من بعيد بس...
مرات عبير من تجي مرته اسمها هند يحجن هيج سوة ناصر...
اصفن من شوكت انبنت شخصيته وصار له مواقف تنشهدله...
عنده هسة ولد وبنية...
_متأخر كلش...والاعتذار مو كد الذنب
_ادري ...بس مابيدي شي..
اصلا بعد ماشفتج...وتحرم علية اوصل ليمكم
_وتعتقد اعتذارك راح يمحي الي شفته من الي صار
وبقت نقطة علية
التفت علية ...ورجع ركز كدام
_مو بس انتي عانيتي....
غلطة بلحظة ضعف دفعتني غالي كلش
كال هالجملة وهو يوكف يم بيتنا...
فتحت الباب ونزلت بدون ما اشكره ولا التفت وراي
بليلتها رجعت شريط ذكريات احداث ذيج الليلة
يعتذر ويريد ....
شنسى ...انسى خوفي ورعبي...
لو انسى شلون جانت سبب بعد صفاء اول ايام
لو انسى بقت نقطة سودة علية واتعير بيها من اقرب انسان لي...
بعز هاي الافكار اذكرت الي وصلني بليلتها لبغداد....
وين صفى بيه الدهر...
ثاني يوم وصلني احمد...ونزل سلم على استاذ عباس
من كتله سال عليك...
من دخلت لغرفة المدرسات...
تلكتني لمى تحاجي صاحبتها ...
لمى...الجوة ابطه عنز يبغج...
اليوم على اساس شوفوا ماعندي شي
ماجاوبتها اخذت دفتري وطلعت...ورباب وياي
_لا تجاوبيها ترة تريدج تتعاركين وياهة
_مو هية هم يمسها الحجي اذا رديت عليها
_باعي دادة...هية دكولك اني ماعندي شي...
بس انتي من باب...
سكتت...حسيتها استحت من ادكول الحجاية
_من باب مطلقة...والناس راح اصدك اي شي عني
_مو قصدي والله...بس هذا تفكيرهم
_عادي بقت على هاي
كمت اجنب استاذ عباس...
فترة وجنت طالعة من الصف..ولاكاني يفتر
على الصفوف والساحة
عباس من بغداد بس بالطائفية جاين لكربلا ومستقرين بيها...
سلم...شلونج ست هدى
_الله يسلمك استاذ
ردت امشي...
_ست من رخصتج...
_تفضل...وكفت انتظر يحجي
_صاير شي
_ما فهمت ...
_ماعرف ست بس صار فترة احسج مجنبتني
_لا استاذ ليش اجنبك
بس ماعندي شي بالادارة...
_يجوز اني متوهم...
بس اتمنى ما ديرين بال للحجي...
ترة محد يعوف احد بحاله...
ولا تطيهم الي ايريدوه
عافني وراح عرفت هو واصله حجي
بقى فترة يتعمد يجي يسلم ويسأل عن احمد
بس شاف ماكو تجاوب مني...
ترك الموضوع...
لحد يوم اجى احمد اخوية...
جنت كاعدة بغرفتي اصلح دفاتر...
كعد يمي...
_سولف شعندك
_يعني مايصير اكعد يمج
_هو انتة صاير عملة نادرة...
محد يحصلك...
خف علينا ...درينا حلو... وندري معحبيك هواي
بس مو هيج
ضحك...لا اتسمعج يمعودة ...هية بلا هاي وهاي مدخلتني استجواب يومي...
ويامن حجيت بالدائرة ..ومنو شفت
_حقها...غير تحبك...وتريد تحافظ على بيتها
_هو الي يريد يلعب بذيله لو يزوج راح يوكف بعينه شي...
مية حجة وحجة يطلع
تنهدت...صح حجيك
خلى ايده على ايدي
_خيتي انسي وعيشي حياتج...مثل ماهو عايش...
باوعت عليه...
_هسة كولي ليش اجيت
_ها اذكرت...اليوم استاذ عباس اجاني للشغل
_استاذ عباس الي ويانة
_اي نعم
_شنو الغريب مو صديقك
_مو غريبة...بس هو اجى بطلب
_شنو
_يريد يخطبج...
باوعت عليه...شجاوبته
_غير اخذ رأيج
_احمد...انتة مو تدري عباس مامزوج
وتدري وضعي شنو
_وشبيه وضعج...اذا على شغلة الاطفال
فأكو هسة هواي طرق ممكن تسويها
_اولا اني ما افكر بالزواج...
ثانيا ولد شاب مامزوج ياخذ وحدة مطلقة وفوكها لو تخلف لو ماتخلف بعد مايصرف كومة فلوس على علاجها
_شنو ماتفكرين بالزواج...
كل عمرج ٢٤ سنة ...بعدج بعز شبابج
اكو بكدج بعدهن مامزوجات وهسة متخرجات
_اول شي غبطت ٢٤ ...وثاني شي اني كاسبة سنة
وثالثا مااريد اعيد التجربة...
_يعني هسة شنو...
_اعتذر منه...
_بس هذا مو وضع...
لازم تغيرين تفكيرج...
راجعي دكتورة بلكت اكو علاج او اي شي
_الله كريم...
كلتها اخلص من المناقشة...
من طلع...جريت الموبايل وفتحت الفيس
وطلعت صفحته...
بداية الصفحة مخلي صورة بنته...
صايرة تشبهه حيل..
سبحانة الله ماخذة نفس عيونه...
تبسمت هاي سمة مشتركة بينا ...
كاتب على صورتها...الاسم وحده يكفي وتأتي العيون لتكمل على المشتاك...
ماكملت الباقي غلقت الفيس وخليت راسي على المخدة ودموعي تنزل...
يمكن عندي دمع اكثر من باقي البشر
عمي وعلاء وهبة متواصلين وياي بالتلفون...
بس يجنبون ذكر صفاء
مرات هبة تحجي دكول وين جان وية دلالج
هاي مرته حايرة بالتلفون والنت وجايفة...
حتى خالتي ملت وكامت تحجي وتتعارك وياهة
ثاني يوم جمعة...
كعدت متاخرة لان مانمت...اجيت اتريك ...
كعدت امي يمي...
_هافرحة شعندج عايفة حيدر اليوم ومكابلتني
_الرجال طلع للشغل قابل يكابلني ويكعد
_ولا والله يا دادة لو بيده يكابلج..
ضحكت...بطلي سوالفج بس تسمعج ام حسين
هسة تسوي هجوم علينة
_چا ماخذة رجلها وتحجين عليها
هسة كولي شعندج...
اكيد احمد حجالج وجاية تقنعين بية
_يمة شكو بيها...
خوش ولد ...وانتي ماقاصرة جمال واخلاق ومدرسة
_وماكدر اخلف
الله عليج يمة اذا ابنج كرار تقبلين تاخذيله
هيج وحدة
سكتت...ميزة بأمي تعلمت من بيبتي اتكون صادقة الي ترضاه لنفسها ترضاه لغيرها
_ها شوفي سكتي...ماما عوفي هالموضوع
_زين اكو شغلة ثانية
_كولي
_من تخلص هالسنة...نروح لبغداد نشوف دكتورة زينة...ونراجعها نفهم وضعج شنو
_الله كريم...اني هم احتاج اراجع لان وضعي مو تمام
ومن داومت الاحد...
اكثر من مرة راد عباس يحجي وياي..
مانطيت مجال...بقيت كم يوم على هذا الحال
اخر شي اجتي الفراشة كالت يريدوج بالادارة
...رحت واكول وية نفسي منو يريدني
....وللحكاية تكملة