شفاه ذابلة

عرض زواج

البارت الثامن
همس ليل
ام حسام جابتلي سبيرتو وكطن وشاش...
عقمت ايدي ولفيتها بالشاش ولحكتهم للهول
من طبيت جانوا يحجون...
كعدت على القنفة...جانت قنفات خشب يخلون عليها منادر سفنج يخيطون عليها جراجف حلوة
حسام كاعد على القنفة على يميني...وامه يمه بس هية من جهتي..
حسام...خيتي...صار شهرين كل نهاية اسبوع اروح لديالى ادور على خوالج ماكو
المشكلة من وفاة امج همة كطعوا وية جدج...
وجدج اصلا ماعنده عنوانهم ولا مرة رايح عليهم
يعني من دروح ادور بدون معرفة بس عندي اسماء خوال امج
يجوز اصلا ميتين وباقين ولدهم ولذلك مالكيتهم
ويجوز كاعدين على اطراف ديالى...
المهم مالكيت شي...
سكت ...رفعت عيني عليه بعد ماجنت مدنكة ...
اريد اعرف شيريد من حجيه...
وهو قتل اخر امل عندي بوجود اهل لي
حتة لو من بعيد احسن من ماكو...
ام حسام...يمة.. يوم امنتج يمي خيتي سمر...رادت اوديج لخوال امج...بس ماحسبنة حساب مانلكاهم..
حسام...يمة انتو هم مدري شلونكم هية ديالى صغيرة..
غير تعرفين عنوان...لو بس اسم منطقتهم هم بيها باب وجواب
ام حسام...شمدريني...خالتك خطية جانت ترجف على البنية...ومناك ابنها ماتعرف وين راح
حسام ...المهم
هم رجع سكت....
فرحة...وهسة شنو شسوي وين اروح
ام حسام...يمة لا تخافين...قابل نعوفج بالشارع
بس هسة...
شفتها دنكت مثل الخجلانة
حسام...الي تريده تكوله امي...
بقاءج هنا صعب وخطر
فرحة...ليش
حسام...صديقي يكول قبل فترة سألين علينا
ونخاف لا يجي تفتيش...
لازم نطلعج منة لغير مكان
فرحة...وين اروح ماعندي احد
ام حسام...ادري يمة...احنة راح نوديج يم عمة الولد
مرة جبيرة ومامزوجة...جان عمهم يعني اخوها كاعد وياهة.....وانقل شغله لبغداد...يريد يجيب مرته وجهاله ويجي
واخته ماتقبل تعوف بيتها...
نوديج يمها...هية باطراف بغداد
فرحة ...وبعدين شلون
ام حسام....خالة كلشي بوقته
جان حسام مخلي رجل على رجل ويهز بيهن
فرحة...بكيفج خالة...قابل بيدي شي
حسام...ولا احنة بيدنا شي..
عافنا وطلع...واني نظراتي تتعقبه
ام حسام...ان شاء الله يمة ترتاحين يم حسنة...
بلكت ربج يفرجها
فرحة...الله كريم
بيومها عاونت ام حسام بالعشى...
بس ماكعدت وياهم ...ما اشتهيت...
رحت للغرفة...ردت انام واخلص
بس ماجاني نوم ...اسمع صوت التلفزيون طالع مسلسل وهمة يتفرجون...
اذكرت من عمي جاب تلفزيون...
ظلينا نكمز...بس محمد كام يحجي
وبقينة نتفرج على المسلسلات وافلام كارتون متعجبين شلون نشوفهم هيج...
نزلت دمعتي...اشتاقيت لاهلي

كمت اشرب مي من المطبخ...
من مريت يم الهول...هولهم غرفة منفصلة مو حولي
سمعت اسمي اجى بالطاري...
ردت اكمل طريقي...عمتي سمر علمتني عيب اتنصت
وجانت دكول الي يتنصت على غيره دائما يسمع شي مايعجبه...
بس ماعرف شنو الي وكفني ...
بداخلي دافع خلاني استمع لحجيهم بلكت اعرف شي عن اهلي ضامي مايقبلون يكولوه...
ام حسام...ليش يمة والله خوش بنية
حسام....ماكلنا شي يمة...
ردتي نساعدها وساعدناها...
واكيد ماراح نعوفها بالشارع...
هم تبقى وصية خالتي...
وحتة لو مو وصيتها...فاكيد نخاف الله بيها
بس مو لدرجة ازوجها
لطمت على حلكي بسكوت من سمعت حجايته...
_ليش يمة...حلوة وصغيرة...وانت عمرك مال زواج اخوك اصغر منك خلص معهد وتعين وراح يزوج
_انتي كلتيها صغيرة...ترة البنية طفلة..اني اكبر منها بتسع سنوات
_ياطفلة اني بكدها حامل باختك هبة
_ذاك غير وكت...هسة منو يزوج بنته عمرها ١٤ سنة
_زين اعقد عليها ونسويلكم زفة كدام الناس...
وخليها كدام عينك سنتين او ثلاث...خليها تكمل دراسة
بعدها اذا عجبتك كمل زواجك...
واذا لا طلكها ونشوفلها نصيب...تكون كملت دراستها
_بهالشكل تكسرين نصيبي ونصيبها...نصير اثنين مطلكين
_اكولك حسام اشو اجيبك منة تجيبني منة..
شنو موضوعك عندك وحدة تريدها كول
_يمة من شنو اخاف اذا عندي...
_لعد ليش ...اشوفك تتهرب مو اكثر
سمعت صوت تنهيدته...
_شوفي يمة...وضع البنية خطر...
منة ابن عمها اخذوه ...
ومنة اهلها سفروهم...
يعني راح تصير عليها علامة استفهام...
منو يورط نفسه هيج...
_كم سنة وينسي موضوعها...ومحمد هم ابن خالتك
_ماينسي...بيت خالتي راحوا مالهم اثر...
وملفهم يبقى عند الحكومة...
وبعدين حتى اهل ماعدها..
لا خوال لا عمام...عشيرتها مامعروفة...
من شرد جد ابوها لهنا ماعلم احد على اهله
شمدرينة شجان مسوي...
_لعد شلون يمة والله البنية كاسرة ظهري
_مانعوفها نساعدها بالي نكدر عليه...
بس مو الا ازوج وحدة مكطمة...
من سمعت حجايته الاخيرة...
انسحبت للغرفة...
تمددت بفراشي وجريت البطانية على راسي
وعفت الدموع تنزل شلال ...
صدك صرت مكطمة...
لا اب ولا ام...وحتى عمامي راحوا
فكرت اروح لعمي كريم..
بعدين خفت اذا هو على اخوه بلغ
يجوز يسلمني للهم ...
كتمت شهكتي بيدي...واني اكول
اوووف منك ياوكت يتمتني بصغري...
وفوكها صرت بلا اهل ولا احباب...
صار الدمع رفيك دربي وانا بعدني بالاربعطش...
كعدت الصبح عيني وارمة من البجي...
كمت للمطبخ اسوي ريوك...اليوم حتى صلاة الفجر ماكعدت عليها مثل ماعلمني محمد...
فدوة لاخيي الي ماجابته امي وين رحت عني...
_صباح الخير ياكمر...
سمعت صوت عدي
جاوبته من دون ماندار عليه
_صباح النور
_اشو من ورة خشمج...
عرفنا حلوة بس مو هيج
تبسمت وية نفسي...شكد حجاياته حلوة ومريحة
_شمسويتلنا ريوك اكيد بيض ...
صرنا دجاج من وراه
دخلت امه...هو من محصله نلزم سرة على المصلحة يلا نحصلنا طبقة بيض وانتة تتبطر
_عمي مامتبطرين...واكيد يخبل يطلع مادام من يد فروحة
_عدي..
سمعنا صيحة حسام.
_ليش ماتبطل شقاك الماسخ
_هاي شبيك من الصبح كاعد متفرعن علينا...
كول ياالله...
_تريك وانت ملصوم..
خليت لهم الصينية بالكاع...واني مقهورة من حسام
وعفتهم وطلعت...
من سمعت ام حسام تسرقي باب المطيخ عرفتهم راحوا لشغلهم...
طلعت يمها...
ام حسام...تعاي خالة تريكي
فرحة...لا خالة انظف واتريك ما اشتهي هسة
ام حسام...عوفي التنظيف وحظري ملابسج...
راح يرجع حسام ياخذنا لعمته...
هزيت راسي....ردت اروح
_تعاي يمة تريك ورانا طريق...
اكلت لكمتين وكمت...
رحت للغرفة اجمع ملابسي...
مانزلن دموعي هالمرة...تعلمت على الهجولة...
وكلبي كام يجلد شوية شوي..
ام حسام خلال كعدتي يمهم جابتلي هواي دشاديش...
طلعت العباية الي انطتنياها عمتي سمر...
شميتها بيها بعد عطرها...
ابد ماغسلتها...ورجعت جريت الصندوك
كعدت بالكاع وهو بحظني...
اريد افتحه ايدي متاخذ...
بقيت صافنة عليه...
_ها يمة...افتحيه
ماحسيت عليها من دخلت رفعت راسي اباوع عليها
ورجعت باوعت للصندوك...
مديت ايدي افتحه...لكيت بيه ذهب كومة...
بقيت صافنة...
كعدت ام حسام يمي...ومدت ايدها سحبت قطعة
_هاي الكردانة مال صياك عمتج سمر
وهاي البتوت هم ...وهالمحبس
وهاي التراجي قبل فترة وصتني اسويهم
والباقي ذهب امج
_ليش بقتلي ذهبها عمتي
_هو منو رباج غيرها...واول وتالي يناخذ منها
كالت خلي لفرحة خاف تحتاجه للزمن
مديت ايدي اكلب بالذهب...
بس بالي مو يمه...
_شسوي بيه ...اهلي وراحو...شيفيدني
_هذا زمن ماتعرفين شضام
_صدك خالة مانعرف شمضموم
كامت وعافتني الم ملابسي...
لحد ما اجى حسام...
سمعته كال لامه يلا دنرجع من وكت
حقه حمل ويريد يخلص منه...
ونفس ما جابني طلعني مختلني ورة...
مشينة مسافة طويلة وام حسام كل شوي تسألني
خوما اختنكتي...
فجاة وكفت السيارة...
وحسيت واحد نزل ...انفتح الباب الي بصفي ورفع البطانية...
_اطلعي اكعدي على الكشن...
سد الباب ورجع لمكانه...عدلت كعدتي واني اجر نفس
عيوني تباوع للطريق...
احنة بطريق ريفي...حلوة الخضرة...
جريت نفس...صار شكد ماطالعة...يمكن ست اشهر من قبل ما ياخذون بيت عمي...
كام عمي مايخليني اطلع ...حسيت مثل الطير المحبوس وفكوا اسره...
فتحت الجامة اشتم هوى طيب واغمض عيني للشمس من تصير بوجهي...
التفت واجت عيني بعين حسام...
شفته يباوع علية بالمراية....
البسمة الي جانت على وجهي غابت من شفت نظرة عينه...
دنكت راسا....
نزل من طريق الترابي على طريق فرعي هم ترابي...
من وصلنا...
ام حسام وحسام نزلوا...نزلت وراهم...
اباوع هاي شنو بيت من طين...
التفت ماكو بيت قريب على مد البصر...
لاحظت بين بيت وبيت مسافة كلش بعيدة...
عبالك جولة بس اكو زرع يم باقي البيوت
رجعت انتبهت على ام حسام تصيحني...
مشيت لهم ...
_تعاي خالة...سلمي على عمتج حسنة
باوعت ...مرة يطلع عمره بالخمسين...
لابسة فوتة وجرغد...وداكة على حنجها..
من امهات كبل...
باوعت علية بنظرة حسيت تريد تخترق اعماقي
خفت ماعرف ليش واقتربت من ام حسام
_هاي البنت كمر يام حسام...
بس مادري وين شايفتها
_لا خية وين شايفتها...
دفوتوا جوة وفهميني سالفتها
حسام...عمة راح اسلم على بيت ابو فيصل وارجع
حسنة...لا تتغدى عدهم...تراني مسوية غدة
طبينا جوة...جان حولي مفتوح...واكو بوب تودي للغرف...
بس البيت كله مبني من الطين...بس من دخلنا وحدة من الغرف تفاجأت...
مكدود كله مدات حلوة كلش...ومرتب ولا عبالك بيت طين
كعدت واني محشوكة بام حسام
_شمالها البنت عبالك خايفة
_اي خطية من ماتوا اهلها هذا وضعها
اني فزيت على حجاية ام حسام...بس هية راسا دغتني يعني لا تسألين
_مين تعرفين اهلها
_جيران العمر...وخطية نكلبت بيهم السيارة...
وبس هية نجت ...
_ماعدها عمام... خوال
_مانعرفلهم احد...وبقت بطرك روحها
واني تعرفين عندي شباب...اخاف من حجي الناس لا يمسها
صفنت حسنة عليها...
_ام حسام تدريني مو هبلة...
وادري هالبنت وراها سالفة...
بس مراح اسالج...اسويها لله
واني هم محتاجة بنت وياي
ظلن يحجن بسوالف ماعرفها لحد ماجى حسام...
سلم وكعد...
كامت حسنة وام حسام ديصبون غدة...
واني ظليت كاعدة استحي اتحرك من مكاني...
رفعت راسي من سمعت حسام حجاني
_ليش عيونج وارمة...
ماكو داعي للبجي ...
احمدي الله مارحتي وية اهلج وتبهذلتي
هاي اذا مو...
وسكت...
ماجاوبته...
_شنو انتي خرسة ...
نادرا ما اسمع صوتج...
ترة الفقير بهالوكت مايعيش
خلج قوية واوكفي على رجليج..
بكلبي...كتله صدك حجايتك
اتغدوا وراحوا وام حسام توصي حسنة علية...
من طلعت اجت علية
_يمة ان شاء الله ماقصرت وياج...
واني كل فترة امر عليج لو ادز الولد
وخاف نتاخر لا يظل بالج نخاف لا نتراقب...
باستني وطلعت...حتة ماطلعت براها...
بقت رجلي مثبتة بالكاع...
رجعت حسنة...شسمج
_فرحة
_مابين عليج اسمج على حظج...
امشي وياي ادليج على الغرف...
وبدت رحلة جديدة بحياتي...
صح صعبة...بس صنعت مني غير انسانة
راحت فرحة الخجولة...والي تخاف من ظلها...
بدت من اول صباح كعدت بيه بعد ماعوفوني يم حسنة...
دزتني اجيب مي من الساكية...
_ليش عمة ماعدكم مي اسالة
_شفتي بوري عندي من جيتي لسة
خجلتني من حجت...
تعاي...مشيت براها...
_دشوفين ذيج الساكية...
روحي املي منها مي...
دخلت وعافتني واكفة...اباوع على التنكة كدامي
مال دهن الراعي...
مغسولة ومكصوص الغطى ومشكلة خشبة بالنص ليفوك حتى تشيليها...
اخذتها ورحت للساكية...
وصلت شفته جدول ترابي مثل النهر ... اكو خشبة مسويها معبر...
رحت وكفت عليه ودنكت انزل التنكة...
بس من امتلت مي ماكدرت اسحبها...
كمت اذب منه لحد مابقى بالنص بيها
سحبتها كوة...
جنت لازمتها باثتين اديدي...
كوة وصلت
_عمة وين افرغه
_بالحب
_وين
_خايبة بالحب...
شو دتعاي...
_لج هاي شنو...على هيج لباجر ماتخلصين نكل مي
فرغته...مو ثكيل ماكدر اشيل
_تتعلمين...
_عمة مو منة شربنا مي...شلون من هالمي الوسخ
_ياوسخ...هذا انظف من مايكم...
هالحب ينظفه ويخليه بارد ثلج
روحي خايبة روحي...راح تكضين النهار بالسوالف
رجعت للساكية...
هالمرة اخذت جانب منها ونزلت على كيف...
وظليت اتعاددت وية التنكة حتى كدرت اسحبها..
بس من رجعت بقى المي ينكب منة ومنة...
من رجعت مرة ثالثة...الطريق صار زلك وكله طين
كمت ازحلك...اخر شي انجبحت على وجهي
بقيت كاعدة بمكاني وابجي...
شافتني حسنة...
اجت تمشي علية
_كومي ياخايبة...كومي مادبرتي ميات اجيبين
شلون ادبريها وية هالدنيا...
هزت ايدها وراحت...
حقدت عليها...ليش هيج قاسية...
ماحاولت اصلا دكومني...
بقيت اشهر يمها علمتني احش زرع للهايشة مالتها وانكل مي...
واطبخ ونزرع كاع صغيرة نطلع مسواك البيت من المخضر ...
جانت هواي تقسي علية تكعدني من الفجر...
وابدي اعمال شاقة للمغرب...
ام حسام جانت كل فترة تجي...
ولازم تجيبلها شي لي...
بس جان عدي دائما يجيبها...
دخلت ب١٥ سنة...
جان صيف وحسنة صح عدها كهرباء بس عدها بنكات ارضية...
بالليل نطلع بالحولي انام الجو طيب...
بس بالنهار تسمط...
جنت من اخلص شغل ونتغدى اروح للساكية...
اجلب بالخشبة مال المعبر وانزل بالمي بدشداشتي...
ابرد نفسي...
مرة مجلبة بالخشبة اخاف ياخذني المي
ومغمضة عيني على البرودة ...
فزيت على صوت يصيح
_هاي شدسوين...
...وللحكاية بقية