شفاه ذابلة

حظ عاثر

#شفاه ذابلة
البارت السابع والعشرون
همس ليل
طبكت سيارة علي على صفحة وحسيته تعصب
نزل وطبك الباب بقوة...
التفت للسيارة الي طبكت يمنا شفت ناصر نزل
نزلت الجامة اريد اسمع شيكول...
_شمالك ابو محمد تخبلت هيج اتطبك علينا
_شجاب بنت عمي وياك بالسيا٢رة
_اذا قصدك على ست هدى فهذا خطها ...
وبعدين ماعرفنها بنت عمك من شوكت هاي
_مو وكتها...مو حسين خطها شجابك وانتة معلم على الخطوط
_حسين عنده شغلة واجيتن بمكانه مابيها شي
شمالك هجي عصبي...
رخى شوية ناصر...تعرف ابو حسن العرض غالي
_ومن يمتى نتعرض لاعراض الناس...
وبعدين لا تتهجم قبل ماتعرف شي
عافه واجى صعد...اباوع لناصر عيونه تجدح وهو يباوع علية
اني مانزلت لان ادري هنا مايقبلوها...
همة يتصرفون بينهم
_شبيه ابو محمد
باوع علية بالمراية...
_ما اعرفن اول مرة اشوفنه هجي عصبي...
دائما اشوفنه رزن
ميله الرزانة شو كلها تحمد بيه بس اني شفت الوجه الثاني...حجيت وية نفسي
وصلني للبيت...وشفت ناصر واصل قبلنا...
وواكف يم سيارته..
بس نزلت ولاف علي وطلع...
اجى ناصر باتجاهي وهو ياشرلي اوكفي..
انتظرته اريد اوكفه عد حده...
بس وصل بديت الهجوم قبل مايحجي
_شنو معنى تصرفك اليوم...
شنو صغيرة وتركض وراي...
لو شايفني ما اعرف اتصرف وناصب نفسه
حكم علية...
_لا هذا ولا ذاك...من خوفي عليج
ما اريدن الناس تجيبن طاريج بشين
_راح تجيب طاريي من وراك...
خط وكل العرب تعرف وبيه اكثر من مدرسة
وبعدين يا اخي انتة شعليك
_من يمتى معاون المدرسة مسوي خط
وبعدين الخط يثرد سوالف وياج
_باوع علية ناصر لا تخليني اتصرف وياك غير تصرف
مالك شغل بية عرفت لو لا...
كافي الي سويته سابقا
عفت ومشيت جرني من ايدي
راسا نفضت ايدي بقوة...ورفعت اصبعي بوجه بشكل تهديد
_اياك تمد اصبعك مو عاد ايدك مرة الخ...
_لا تعوفيني وتمشين من احجي وياج...
ونزلي اصبعج ولا تهددين ماتعرفين شكدر اسوي
_اعلى ما بخيلك اركبه...
عفته وفتت واني ارجف من العصبية...
شلون تاليتها وياه ..
بس المرة التجي اكول لعمي حيدر عليه وافضها
يوم جان دوام علي ظهري وهم اجى اخذنا الصبح...
طول الطريق دايرة وجهي على الجامة...
كعدتي صارت وراه...وادري عيونه بالمراية علية
بس الي يصير غلط...
صار فكري مشغول بيه...
ومن تجي هند يم عبير ويسولفن كمت اركز وياهن
اريد اسمع شيكولن عليه...
رغم سابقا ما اهتم من يسولفن على اخوانهم
بس هسة اركز وية كل كلمة من يجيبن طاريه
نزلن المدرسات وبقيت اخر وحدة...
سويت نفسي الم اغراضي...
_ابو حسن اريد اطلب منك طلب
_أمري
باوع علية بالمراية...
_بعد لا تجي على الخط خلي حسين يجي
شفته عقج حاجبه
_ليش
_اترجاك ابو حسن...
هز راسه ...نزلت واني اكول هذا الصح...
مر اسبوعين تقريبا...ما اجى بعد ماطلبت منه
وصارت امتحانات نص السنة
ويوم جان عندي تصحيح...لازم نبقى لجنة نصحح كل الدفاتر يلا نطلع...
المدرسات الي وياي راحن بقيت بس اني
احنة متفقات الي تبقى عدها تصحيح يرجعلها الخط
خلصت وطلعت لكيت السيارة  واكفة تنتظر
فتحت الباب وصعدت...سلمت والتهيت اخلي سجل الدرجات والجنطة واعدل عبايتي
فما انتبهت...الا من اجاني جوابه
تفاجأت ورفعت راسي...
وگلبي كام يدك سريع...حسيت نفسي تلميذة بحظور معلمها..
_شلونج...لا تتحجين وتكولين ليش اجيت
جابني الشوك...
ماكدرت اصبرن اكثر...
دنكت وايدي تنفض بالعباية وتعدل بيها بدون وعي
_جاوبيني...ليش ماتريدين مني اجي
_مايصير هيج ابو حسن
_شمالج ...هو شنو الي مايصيرن
تعديت حدي وياج...
_لا حشاك
_چا شنو بعد
يابنت الناس مو بيدي...
جنتي حلم ثمن سنين مافاركاني...
شغلتي بالي وانة احسن شفت جنية...
ومن لاجيتج ...شفتج احلى من الحلم
_وتاليها ابو حسن...
انتة مزوج وعندك عائلة ...
التفت لهم احسن خوية
_مالايكة كلمة خوية ...والمشاعر مو مال خوة
ومامسوي شي حرام...
گليبي حبج ورايدج بالحلال
_لا ابو حسن...
زوجتك شنو ذنبها مقصرة وياك بشي
ماعندك اطفال ...
شنو عذرك
_ماكلتن مقصرة...لا والله والنعم منها
بس الگلب ومايهوى...چا هو بيدي
وبعدين ماقصرن وياهة ولا وية الجهال
_ما اقبلها عليها مثل ما اقبلها على نفسي
انتة ماتعرف شلون كسران گلب المرة من يزوج عليها رجلها...
هاي وهو عنده عذر...لعد شلون بالي ماعنده عذر
ومامقصرة وياه مرته
_فدوة اروحن للعد...
هنا مو مثل عوايدكم...
الزلمة يزوج مرة ومرتين
ماعدها اعتراض المرة
_ماكو شي اسمه عوايدنا وعوايدكم...
شعور المرة نفسه وين ماجانت...
يجوز هنا عدها استعداد للتقبل اكثر...
_انتي ليش شايلة همها...
اذا هية ما اعترضت
_اعذرني ابو حسن...
انتة بعيني جبير...
ما اريد احس تفكر بنفسك وبس
سكت...
جان يسوق على كيفه...
_رجائي التفت لعائلتك وهسة تنسى
وبعد لا تجي على الخط
_مو هية لعب جعاب وانسى ...
بس مادامج ماراغبتلي...
مافرضن نفسي عليج
سكتت متجاوبته...
وصلني وراح...
دخلت للمطبخ سلمت
_اصبلج غدة يمة
_لا ما اريد المدرسات الي ويانة جابن غدة
_خوش لعد باجر اني اسويلهن
هزيت راسي وصعدت لغرفتي...
نزعت عبايتي وعلكتها...كعدت على الجرباية
واني احس بخنكة...
اذكر حجايايته...تنهدت وخليت راسي على المخدة
ما اكدر انكر ماحبيته...اجذب على نفسي
اول مرة احب بحياتي...
ومالكيت غير واحد مزوج...شلون اشرب غيري من مر الكاس الي شربته...
غمضت عيني على دمعة طفرت منها...
خلصت امتحانات...ومرات الخط الصبح من يمر من يم مدرسته التفت اشوفه واكف وية الطلاب اباب المدرسة ...
شكد يحن گلبي عليه...
بس اقسيه...يلا هسة اشفت بحياتي بقت على هاي
خلصت العطلة ماطلعت من البيت ...
عدا مرة تمشيت عصرية ابداية البستان وظلت عيني على بستانهم...
اشتاكيت له...جنت بالدوام انتظر يوم يوم جيته
بدون ما اشعر هسة ميزت هالشي
رجعت بخيبة امل...شاريد خليني بعيدة...
_شناطرة هنا
جان واكف على صفحة بس مسافة مو بعيدة
معقولة هيج صافنة ماحسيت بيه من اقترب
_استغفر الله...اريد افهم شنو انتة تطلع فجأة
_انتي الي جاية بمكاني مو انة
_جاية اتمشى بالبستان...يعني معقولة لسة ماخلصت شغل هنا
_اريدن اتخيل جاية علمودي
_لا ...لا تتخيل حتى لو باحلامك
مشيت عنه...بس وكفتني حجايته
_هدى..بعده حبج بگلبي...عمري مانسيتج
وشطلبين حاضر
التفت عليه...ياحب ناصر...الي يحب انسان ماياذي
وانتة دمرت حياتي...
كل الي صار من ثمن سنوات ونص لحد هاي اللحظة
بسببك...
_انة كلت لعمي بوقتها اصحح الي صار وازوجج
وانتو الي ماقبلتوا...
وهسة وبعد مستعد من باجر وابنيلج بيت وحدج
_تزوجني...وزوجتك واطفالك
_شمالهم...لا انة اول ولا اخر رجال يزوج مرة ثانية
_شوف ناصر خليها ترجية باذنك...
لو تبقى اخر رجل على وجه الكاع ماازوجك
مشيت وصوته وراي
_والي بالج هم مايصير ...
جنت خايفة منه رغم اتصنع القوة...
اعرف ناصر على شخصيته الجديدة ماممكن يبدر منه نفس الخطأ...
بس حجابته الاخيرة خوفتني...
معقولة عرف شي...
شبيج هدى شيعرف ...هو شكو حتى يعرفه
النوب من وراه انحبست بالبيت كمت اخاف اطلع برة الحديقة...
شهيتي للاكل قل ...جنت انتظر الدوام على الاقل اشوف شي...والتهي وية الطالبات...
بنهاية العطلة مال نص السنة عبير اجت من اهلها...
جنت واكفة اغسل مواعين...
دخلت سلمت وذبت عبايتها وداصفط بيها
_عمة امي عزمتكم على زيارة باجر...
مسوية سفرة ام البنين..
فرحة...وين زيارة لكربلا
_اي عمة...اكدت عليج
_ان شاء الله...
_وانتي هدى تجين هم مو
هدى...لا حبيبتي روحوا الله وياكم
فرحة...يمة منو يبقى يمج ...
هدى ...احمد لو كرار
عبير...احمد يروح
فرحة...كرار راح يبات ابغداد
ظليت حايرة مااريد اروح ...اريد ابقى مبتعدة
بالليل هم لح احمد اروح وياهم...ماجان عندي حل
طلعنا من الصبح بسيارة احمد لحد بيتهم ومناك لكينة كيا جبيرة تنتظر...مرت ناصر هند اجت ويانة
بس هية لا ناصر ولا ام حسين اجو
واهل مرت اخوهم حسين الي ازوج موخرا...وجناينهم
صعدت راسا للسيارة بعد ماسلمت...
صعد الكل وبقوا ينتظرون بعد ماصعدوا الاغراض
اجى لابس دشداش بيضة تبرج...
ومهندم صعدت مرته..صعدلها بنته كعدها يم امها
وبعدها شال ابنه وكعده بحضن مرته...
بنته عمرها تقريبا خمس سنوات وابنه تلاثة...
هالمنظر حز بنفسي حيل...
اختنكت ودرت وجهي للجامة...جنت  قبل الاخير كاعدة...
غرت من مرته وجهاله...وبنفس الوكت ضميري أنبني
ليش اخرب واهدم لمتهم...
بس مو بيدي من طفرت دمعة تايهة...مو من عيني من گلبي الواجعني...
ماشفت التفاته وعيونه الي ادور على شي من سد
الباب مال السيارة وكعد كدام يم السايق
وصلنا ونزلنا مسافة عن التفتيش...
جنت اريد ابتعد عنهم بس طبعهم لازم كلهم سوة...
هو شايل ابنه ومرته اتكود البنية...
شماحاولت ابعد عيني...يصير كدامي...
ودائما يلتفت يتفكد الكل خاف نسينا احد
من وصلنا بين الحرمين...فرشوا مدات وحجزوا مكان
وكالوا اخذوا راحتكم بالزيارة وبالوحدة هنا غدانا...
اخذت امي ورحنا للامام العباس زرنا...
ورجعنا للامام الحسين...
هناك تفاركنة اني وامي بالتفتيش...
اني وصيتها اذا خلصت ترجع لهم...
طبيت زرت وصليت وقريت الزيارة...واني كاعدة بالحضرة...رفعت عيني ...بعد مت دعيت للكل
بس لي ماعرف شدعي...
كتله مولاي اجيتك مرة مكسورة خاطري وردت منك بجاهك عند الله تجبره...ومانجبر خاطري لسة
بكيفك بعد...
خليت راسي على السياج ومادري غفيت ...
صار هواي مانايمة نومة عميقة...
وعيت على مرية تصحيني
_خالة صارلج هواي على هالكعدة ومغمضة...
باوعت عليها بعين مغوشة...
_ترة اذن الظهر
صحيت ...يا صار اكثر من ساعة ونص لعد اني هنا...
كمت بسرعة...وطلعت اركض...
لاكاني حسين اخوهم...ست وينج صار شكد ندور عليج...
رحت وراه وشفته يخابر مدري منو يكوله لكيتها
من وصلنا شفتهم كلهم مجموعين وبنات من شافوني بلشوا يصبون غدة...استحيت منهم...
اجى احمد...وين رحتي خيتي..
صار ساعة ندور ظل بالنا...
ماعرفت اجاوبه...
باوعت علي هستوة اجى..الظاهر هم جان يدور
باوعلي بغضب...
رحت كعدت يم امي بس على صفحة...
بحيث النسوان كاعدت مثل الدائرة واني خارجها
والزلم هم على صفحة كاعدين...
عبير...تعاي هنا هدى
هدى ...ما اشتهي حبي
فرحة..وين رحتي يمة...ظل بالنا...
هدى...بالحضرة كاعدة نسيت نفسي
مدت عبير ايدها بماعون بيه اشكال الاكل...
ماخجلتها اخذته...جان كعدتي قريب على الحايط الفاصل بين الممرين...اتجيت عليه...
لميت رجلية واسندت ايدي عليهن...رفعت دولماية
خليت بحلكي اخذت جزء  ولعبت نفسي
مو لان مو طيب الاكل...بس هالايام اجبر نفسي جبر
رجعت بقيتها بعدها بيدي داخليها بالماعون...
واني صافنة على الماعون..بالي مو يمه...
احس بدوخة...حسيت اكو احد يراقبني...
رفعت عيني شفته واكف على صفحة وعينه علية
رجعت نظري للماعون الساندته على ركبي...
مختنكة وغصة ابلعومي...
طلعوا يسوكون اغلبهم كلمن اخذ زوجته وجهاله وراح...
هو كعد على الحايط سمعت بنته حاجته..بابا اشتريلي...كال.له صحي ماما ويلا...
احمد اجى علية...هدى كومي ويانة
هدى...ما اريد شي
عبير...اتمشي شوية...
هدى...تعبانة والله روحوا
راحوا...امي باوعت علية وبعينها سؤال
ماطرحته...
هدى...هافريحة تريدين تشترين شي لحيدوري
فرحة...كومي يمة خلي نتمشى للسيارة بين مايجون
كالت لام عبير...
وطلعنا نتمشى بنص السوك...
خليت فكري يسرح وية هالناس التمشي..من امي تريد تشتري شي اوكف وياهة...
شفته كدامي يشتري لمرته دشداشة...
ياربي رحلة عذاب هاي مو زيارة...
من طلعوا من المحل..صرت برة النسوان ماردت يشوفني...
وصلنا للسيارة قبلهم...والسايق فتحلنا الباب...
امي بقت كاعدة جوة...
واني صعدت بالسيارة خليت راسي على الكشن...
وعفت ادموعي ادير...
من سمعت صوتهم...مديت ايدي من جوة مسحت عيوني...
ومارفعت راسي الا من سمعت صوت عبير
_هدى بيج شي...
سويت نفسي جنت غافية
_لا مابية يمكن غفيت...
التفت على الجامة...واكف وراهم كلهم ديصعدون وعينه علية...
ليش مايعوفني بحالي...
بطريق الرجعة...حسيت معدتي انكلبت ...اصبر نفسي ماكو...
توازيت كلشي جريت ايد عبير واشرتله
صاحت عبير على احمد
راسا وكف السيارة...ماعرف شلون عبرت الكل نزلت اركض..
كمبصت على صفحة بعيد على السيارة...
وتقيئت رغم ماماكلة شي...ايد صارت على ظهري
وصوت امي...يمة شبيج...شجاج
رفعت راسي لها...
_دايخة...
ماعرف منو جاب مي واجى احمد يغسل وجهي
_يمة صار وجهها كركم...خلي نوديها للمستشفى
اني كعدت بعد بالكاع وراسي بحضن امي...
سمعت احمد يحاجي علي
_توكلوا انتو..راح اخذ تاكسي ارجع لكربلا
_اوصلهم واجيبن سيارة وارجع لكم
_خوش
اخذلي تاكسي واني اشوف علي باقي واكف لحد ماصعدنا
وصلت للمستشفى..راسا شكلولي مغذي...
امي تمسح على راسي وتقرا ايات...
_يمة شجاج...سودة علية جبتيها قهر بقهر امر من حال امج
شيوجعج بنيتي...
_گلبي يوجعني يمة
كلتها بدون وعي
_الله كريم..فرج ربج قريب
من خلص المغذي وضربوني ابرة ...
دخل احمد ...تباتين هنا
هدى...لا عفية ما اطيق المستشفى
_يلا لعد ابو حسن اجى من زمان...
خلي نطلع...
من كال اسمه عبالك وجعلي كلبي فوك وجعه
ليش اجى هو...
سندتني امي واحمد...وطلعنا...
شفته واكف يم سيارته..فتحلنا الباب...
وراح صعد  حتى ناخذ راحتنا ...
النوب صارت كعدتي وراه...
الطريق كله احس عينه علية واني راسي متجي على الكشن الورة...
اخر شي خليت راسي بحضن امي...
ودموعي ادير بدون وعي...
امي تمسد على راسي...
لحد ماوصلنا...بقى بالسيارة..وطلعت عبير من سمعت
صوت السيارة...
واشوف ناصر جان برة هم اجى باتجاهنا...
ردت ادخل بسرعة قبل مايوصل...
بلحظتها حيل كرهته...
دخلتني للغرفة امي وعبير...
كالت لعبير سويلها شوربة بلكت تاكل شي
امي تنزعني ملابسي
_يمة ليش ماعندي حظ...
شمعنى اني من دون الناس...
_كلمن وحظه وبخت...وان شاء الله بختج عالي
_ههه...ضحكتيني...حيل عالي بعلو السما
_كولي ياالله ..ربج ياخذ شي وينطي شي
_اي...بس لي نسى ينطيني
_لا يمة...استغفري ربج...
_استغفر الله
ذبيت راسي على المخدة
نمت للصبح لان انطاني منوم...
كعدت على صوت امي...
_يمة اكعدي اكوليلج شي من البارحة معدتج فارغة
كمت غسلت وكعدت يمهم...
بس جنت دايخة...
خلصت اليوم متمدة بالهول...
لحد ما اجى عمي حيدر...
كعدت استحي انام كدامه...
كعد يمي...وكال لعبير تسوي جاي
بقيت بس اني وامي وهو
_بوية هدى...انتي حسبت بناتي
ومعزتج مو اقل منهن
وانة اريدن لج الخير...
بوية اول وتالي البنية لازم تزوج وتنسند لزلمة
مايصير تبقى هجي
وانتي مو صغيرة...
_ها عمو جايبلي عريس
جنت عادي اشاقة وياه
شفت باوع على امي..
_اي بوية وانتي بكيفج بعد...
....وللحكاية تكملة