شفاه ذابلة

مواجهة

مساؤكم هيل...انطونا عطوة جنت يم الطبيب😟 ...
ترة ماتاخرت بس ساعة عنكم يوميا بالتسعة انزل اليوم بالعشرة😒....
حتى ماراجعت البارت....
راح ارجع انزل بين يوم ويوم احسن 😁...
....متابعة ممتعة
البارت السادس والعشرون
همس ليل
دخلت لغرفتي ...شفت بتول كاعدة على الجرباية تنيم حسن...
_السلام عليكم.
.توجهت للكنتور راسا
_الله يساعدك ابو حسن...شدور
_شغلة...
فتحت جنطة صغيرة احتفظ بيها باوراق ومستميكات رسمية...ومديت ايدي سحبت شي صغير خليته ابجيبي
وجريت المحزم مال المسدس لبسته بجتفي
_خير ابو حسن صاير شي
_لا ماكو...التفت عليها...
وين بنتج...
_جوة يم جدتها
_انة مو كلت البنية تنام هنا...
_حسبالي الليلة تريد....
سكتت ...فهمت شتقصد بس غلست
_صعديها الطفلة ..طالع شوي وارجع
طلعت للبستان...الدنيا ليل ومانأمن شبيه
بس فكري مشغول وماعرفن ليش اسوي هجي
وصلت لنفس المكان ومديت ايدي سحبت
جفية صغيرة فتحتها...
وظليت اباوع على التراجي...
معقولة الي شفتها اليوم نفسها...
من نطتني صينية الجاي جانت تهتز...استغربت
رفعت نظري لها بدون قصد...
مو من عوايدنا نباوع للنسوان بضيافتنا
بس استغربت رجفتها...
اول مرة ما كدرت اتعرف عليها...
وتمنيت من زديت احمد لسيارته اشوفها من قرب
تكربت على النخلة وكعدت يمها....
رجعتني افكاري لقبل ثمن سنوات...
لذيج الليلة الي بقيت اشهر بعدها اجي لهلمكان
واسال نفسي...الي شفته صدج لو خيال
وصلت مرحلة اصورت انة جنت احلم...
ومرات اكولن اخافن شفت جنية من اباوع للتراجي
بنية ظهرتلي فجاة واختفت فجأة...
يعني معقولة هية نفسها وتطلع اخت احمد
مو كالت اهلي من ابغداد...شصار بذيج الليلة
جريت نفس....
رجعت للبيت لكيتهم كلهم نايمين
صعدت لغرفتي ...باوعت لبتول ولجهالي
بتول بنت خالي وزوجتي صار ست سنوات لزواجنا
وعندي منها فاطمة وحسن...
بدلت دشداشتي وخليت راسي على المخدة...
شلون اعرف وضعها....
كالت بوقتها اهلها ابغداد...بس اهل احمد صارلهم ٢٠ سنة واكثر هنا من ازوج ابو حسين امهم
زين هية اخت احمد.اكيد من امه...
اني سمعت هجي شي من رضيعاتي..
غفيت وانة افكاري تجيبني وتوديني
ثاني يوم الصبح رحت للزرع ورجعت على والدتي
ماكدرت اصبر
_الله يساعدج يمة
_هلا يمة هلا...خيرك يمة...هاليوم من وكت رجعتك
_مالي خلك...وين البنات
_الي تخبز والي تنظف ...مطشرات
_لجن اكعد يمج...
يمتى تكملون زواج حسين...
_چا يمة امس خلص مهره...
انطونا عطوة
_براحتكم...اكولن يمة...
احمد رجل عبير عنده كرار اخوه من امه وعمنا حيدر
ماعنده بعد اخوة لو اخوات
_شمالك ماتعرفن عيال اختك
_بلي يمة...بس احمد مو كرابتنا ماعرفن كل اهليته
_اي صح...عنده رضيعته...
بنية مدرسة شلون حلوة...
وعبير تحمد بيها...
بس ماعدها حظ خطي
_ليش شمالها
_ازوجت ابن عمها ...
وهية حبلى بانفجار طرحت
وميصير عدها بعد خلفة
كام ابن عمها ازوج عليها
_ها...يمكن جانت موجودة البارحة
_اي يمة غير اطلكت منه
كلش ضجت من عرفت مزوجة
چا شتنتظر ....شمالي شلون افكر
بقيت ايام اوصل من بستانا لبداية بستانهم
ابقى اباوع...جني انتظر تطلعلي ...
مريت اسابيع وماصارلي فرصة اشوفنها
حتة رحت لبيتهم مرة...
لحد ماصار عرس حسين اخوية...
اكيد يجون كلهم...
بقيت قريب من البيت...
واكثر من مرة اوصل لباب المطبخ
بلجن المحها...اريدن اتاكد هي لو لا
وهم ماشفتها...يوم الزفة...
صحت لعبير
_خوية مو ترحن كلجن وتعوفن البيت
ابقي انتي مادامج ماتكدرين وبقي وحدة وياج
_صار خوية...
طلعت الزفة وعيني عليهن...
بلجن اشوفنها ...
ماجانت وياهم...
رجعت على عبير
_خوية ..شو خياتج كلهن طربكن بالزفة
جا من ظلت وياج
_حماتي بقت وعمتي هم
_خوش...
كيفت..
دصيحيها تسويلنا جاي...وانتي جهزيلنا ثلج للمي
شوي ورجعت للمطبخ...
شفت بنية واكفة وظهرها للباب...
حسيت شلون المراهق المرتبك...
اول مرة امرن بهجي موقف
انة المعروف عني ما اهاب شي ...
_السلام عليكم...
شفتها تصلبت بمكانها...
_خوية خلص الجاي...
اجاني جوابها بصوت ناصي وخجول
_اي هسة اصبه...
ابد مالتفت علية...بقت اتحضر بالصينية
_انتي نفسج لوصلتج لبغداد قبل جم سنة
كلتها وانة ما متأكد ان جان هية داتصب الجاي لوغيرها...
بس ماجان عندي وكت...
بقت تشتغل بسكوت واندارت تنطيني الصينية
ماخذيتها منها...
_جاوبيني
_ماعرف خوية عن شنو تحجي
_ماتردين ترجياتج
_مافهمت عليك...
تفضل الجاي...
باوعت لعيونها ...
_ليش تنكرين...
ترة ما اريدن منج شي...
بس اريدن اتاكد
_تفضل خوية...وصدك ماعرف عن شنو تحجي
خذت منها الصينية...
عرفتها خايفة...بس انة تأكدت رغم جانت دنيا ليل
بس انة شفتها زين...هاي العيون السوادها جبير
ونفس الشامة الي بالحنج...
ماتيهن عنها...
بس ليش تنكر...اخافن خايفة...
زين شو ماسمعنة عن شردتها ...لو جانت الشغلة معروفة جان طشت بالعرب...
الظاهر محدن عرف بيها...
ليش شاغل بالي...
ردت اعوف هالشغلة وارجع اتفرغ لشغلي
لاجن رجعت ادور بفكري شصار بذيج الليلة
وليش شردت مني وانة جنت اريد اوصلها سالمة
وليش خايفة اعرفن هية منو....
مر شهر وماصار عندي مجال اشوفنها...
ولا اكدر اسأل عبير...
بدة دوام المدارس واذكرت شغلة من شفت عبير
_اكولن خوية حماتج مو معلمة ليش ماتجي بمدرستنا احسن
_لا مو معلمة ...مدرسة بالمتوسطة مال البنات
_هاي الي على الشارع العام
_اي
كم يوم داومنا...
رجعتها اتكون على طريقنا ...
المدرسة الي بيها انة معاون صايرة مسافة عن بداية منطقتنا...
انتظرت كم مرة اشوفن خطها...بس يوصلها للبيت
لحد يوم شفتها نزلت من الكيا ..
ركبت سيارتي على السريع ورحت عليها...
طبكت بصفها...فزت..
_تفضلي خوية اوصلج بطريقي
_مشكور...هسة يجي عمي
_هسع بين ماتخابرين اوكنن وصلتج
_لا خوية مشكور
نزلت بعد ماتعصبت...طبكت الباب وارتجيت عليه
_يعني يوم لا اعرفنج ولا تعرفيني وبنص ليل
وصلتج لبغداد...
وهسع انتي من اهالينا ماتقبلين اوصلج
التفت علية مصدومة...وظلت بس تتبلعم
_ما اعرف عن شنو تحجي
_اصعدي وانة افهمج...
عيب وكفتنا من العرب...
ظلت تتلفت ...
_خوية الله يخليك...
عوفني بحالي
_اذكر زين كلتي خوية الله يخليك انا بشاربك
_هسة شتريد
_اصعدي...
_ما اكدر عمي راح يجي
_خلاص تندلين بستنانة تعاي هناك
_ما اندل شي
_تعاي لنهاية بستانكم الظهر...
بقت تباوع علية...
صعدت بسيارتي...
شمالك علي كمت تراهق وانتة بالتلاثينات
وجمالة على اهليتك...
شلون تقبلها على نفسك...
رجعت اجاوب نفسي ...ماريدن منها شي
بس افهم الصار...
وصلت للبيت بين ماتغديت بدون فكر...
وطلعت للبستان اتمشى وصلت لنهايته وعيني على بستانهم...
بقيت انتظر هواي...كلت والله اذا ما اجت الا اروح لمدرستها..
شفتهة اجت تتهادى بمشيتها...لابسة العباية
عيني عليها وهي تقترب...
قارنت بذيج الطفلة الخايفة وتتختل
_السلام عليكم
_وعليكم السلام
_خوية شرايد الله يرضى عليك...
_ما اريدن شي...
بس ردت ارجعلج امانتج
طلعت التراجي...
ومديت ايدي بيهن
باوعت عليهن..
شفتها دمعت عينها..انقهرت حيل
_مو لي
_متأكد لج...
_شلون تذكر قبل ثمن سنوات
سكتت راسا حست غلطت
اتجيت على النخلة  واني اباوع للتراجي
_لهجة بغدادية وعيون حورة...
ومن جيتي هسة تاكدت اكثر
_زين انتة سويت زينة وبشهامة...
ليش جاي تخربها
_اخربها لان ارجعلج حاجتج
_هذني حقك ...وصلتني واني اخذت فلوس من محفظتك
_انتي كلتي سويت زينة...
يعني لوجه الله ليش تردين تنطيني حقها
_اذا علمود هالشي...
مو مشكلة...بس الله يستر عرضك
ماريد احد يعرف...مثل ماساعدتني بذاك الوقت  وانتة ماتعرفني
استر علية هسة ولا تحجي لاحد...
_لهجي نكرتي...حسبالج افضحج
خوية غلطانة...مو انة الي اخوض باعراض الناس
مو عاد عرض رجل رضيعتي يعني عرضي هم
_يعني لهنا وتنتهي المسألة
سكتت شوي...نفسي اجاوبها ب اي
بس شي مانعني انطيها هجي وعد..
_عندي سؤال لج...
_شنو
_ليش اختفيتي بالمحطة
وجهت نظرها حولها ...
بعدين رجعت تباوعلي
_خفت لاتندل بيتنا...
_بيت منو رحتي
_عمي
_الي ازوجتي ابنه
_اي
_وازوجج من باب يستر عليج
_ماجان اكو شي حتى يستر
_فهميني شصار
نسيت نفسي وسؤال يجيب سؤال
_ماتشوف نفسك هواي ادخلت
عدلت وكفت واتقدمت لها...
_تعرفين بقيت ايام وليالي واشهر..
اجي لنفس المكان الي لكيتج بي
واتسائل شفتج صدج لو جذب...
وذني ...فتحت ايدي لها وانة اباوع للتراجي
جانن يأكدلي شفت شي...
بس شنو انسية لو جنية...
وتدرين كم مرة حلمت بنفس الموقف..
مرات تاخذني رجلية لنفس المجان بدون ماحسن
يجوزن لان بقيت قضيتج مجهولة
ويجوزن لان طلعتي فجأة واختفيتي فجأة
هاج يابنت الناس ترجياتج...
بقيت ماد ايدي باوعت عليها صافنة علية
_خليهن
_مو كتلج سويتها لوجه الله...
ماريدن اجرة
_بس تبقى تطلبني الفلوس الي اخذتهن
والعباية والدشداشة...
_اي...ذكرتي بقت رضيعتي اسبوعين تسألني وين وديتهن...
والا خسرتني بمجانهن
_خلص لعد
احلى لعد سامعها بحياتي...كلتها وية نفسي
_هم اخذيهن ...
هزت راسها...اذا اخذهن تاخذ بمكانهن الفلوس
عافتني ومشت...
عيني عليها لحد ما اختفت بين النخلات
جريت حسرة...شنو سالفتج يابنت الناس
رجعت الترجيات بجيبي ورجعت للبيت...
وانة اكولن ليش مااصريت الا تاخذهن
بقيت اراقب خطها كلما يجي ومرة التقيت
بعمها ابو حسين وهو اقاربنا ...
كتله شفت بنتكم وماقبلت اوصلها...
كال راح اوصيها احسن ما تبقى واكفة بمجانها بالظهرية...
وفعلا يوم نزلت من الكيا...جان دوامنا ظهري
الصبح دوام متوسطة ولد...
وهسع جنت واصل للمدرسة...لفت السيارة ورجعت طبكت يمها
_الله يساعدهم
من شافتني تبسمت...حسيت خذت روحي بضحكتها
_ويساعدهم...دوامك ظهرية شجابك
_وشعرفج دوامي ظهري
احمرت جنها طماطة صارت بوية ليش هجي يصير وياي..
_.صعدي اوصلنج
الظاهر موصيها عمها...
اجت صعدت بس ليورة...
_خطج دائما هجي وياكم
_اي والله يوميا متحجج بشغلة
_كم وحدة انتو
_تلاثة والرابعة ناخذها من الطريق
_ماريدن اصير كطاع رزق احد
بس شرايج اخلي حسين ياخذكم
سيارته نظيفة وهم تفيدوه توه مزوج
_ياريت....هسة اكول للمدرسات الوياي
يومين وردت اخبر بيد احمد حتى يبدي وياهم
من بداية الشهر...
بس لكيت نفسي كل مادوامي ظهري ادز حسين
للزرع واطلع بمجانه اخذهم...
صارت شوفتها ادمان...مرتين بالاسبوع تخلي اسبوعي كله غير شكل...
كمت انتظر هاليومين بفارغ صبر...
گليبي تعلق بهالبنية من قبل ثمن سنين وبقت ابالي
*******
هدى...
من يوم شفته بالمهر واني عايشة بقلق
كلما تروح عبير لاهلها وترجع ...
اظل خايفة لا سمعت شي...
بس مرت الايام وماكالت ولا لمحت شي
لحد يوم الحنة ماقبلت اروح وظل كرار وياي
بس بالعرس محد بقى بالبيت...
اضطريت اروح ومن كالت عبير على الزفة
كتلها اني ابقى وياج...
ردت ما اطلع برة البيت...
صاحتني عبير اسوي جاي...
شوي وسمعت صوت براي خلاني اتصلب
يعني عرفني
.. شلون ميزني بعد هالسنوات بس بقيت مصرة ماعرفه...
ورجعت للقلق يارب شلون تفض...ثمن سنوات وبقت هالمصيبة ملاحكتني ...
الله لاينطيك ناصر..وفوكها يريد اسامحه
لحد يوم طبكت سيارة يمي...
وشفته ...حقدت عليه كلش من الح الا اجي...
رجعت للبيت افكر شلون بية وشسوي
حتى غدة ماتغديت ...
وظليت حايرة اروح لو لا...
اخاف اروح شمدريني شيريد
ارجع اكول خاف يحجي والحجارة الماتصيب تفشخ
يعني اذا محد صدكه تطلع سمعة علية...
رحت وگلبي احسه راح يوكف...بس من سمعت حجيه
رجعت واني اضحك على نفسي...
يعني واحد بشهامته خاطر ووصلني بعز الليل
لبغداد وبذاك الوقت الخطر وماحجى ...
راح يجي هسة يفضحني...
من طلعت من البستان لكيت بوجهي ناصر
_شعندج بالبستان بهالظهرية
_انتة شعليك...احد كالك وصي علية
مشيت...
_يعني اخوج وعمج يدورن بيج وين هسع
خفت لا شافني بس مابينت له هالشي
التفت عليه
_الشي الي مايدرون بيه انتة رجعت اتضايقني
كف عني ناصر افضلك
عفته ومشيت...
احسه مرات يراقبني من اطلع بالخط الصبح...
بس ماعندي شي اخاف منه...
عرفت من عبير من سالتها عن اخوتها كلهم
وصلت لعلي ..عدلت نفسي وفتحت اذاني
واني اسمع اخباره...عرفت هو معلم ومعاون بالمدرسة...
وعمره بالتلاثينات...بس نقهرت من عرفت مزوج وعنده اطفال...
شريد لعد هنا وبهيج عمر لازم مزوج...
ورجعت شرايدة منه عوفي الرجال بحاله...
هبة خابرتني...
هية فوك الولد صار عدها بعد ولد..
وعرفت مريم حامل مرة ثانية وبيها ولد
بالعافية عليك ابن عمي...
وتريد هدى ترجعلك...
شبيج هو ليش ازوج لعد...
لو تريدين يوقف حياته ويظل يتوسل
احجي وية نفسي...رغم هو بين فترة وفترة
يخلي هبة تحاجيني
كالت متأمل مادام مازوجتي بعدج ترجعين له
خلي يحلم...
علي بعد مادز اخوه خط لنا...كام يومين من دوامه ظهري يجي هو يوصلنا...
عجبني ثكله...ابد مايرفع عينه على وحدة...
وسمعت من المدرسات لان اغلبهن اقارب وعدهم جهال بالمدرسة هواي يساعد الطلاب...
وبالامتحانات يجمد مي ويجيبلهم...
والصف الاول يتلاكاهم بالحلويات  ...
والطلاب الايتام بداية كل سنة يتكفل بملابسهم
رغم هو حالته متوسطة...راتبه والكاع الي يزرعوها هو واخوانه...
حتى مواقف وية المعلمين والمعلمات الوياه
يوم عن يوم يزيد اعجابي بيه
اليوم جنة بس اني ومدرسة وياي...
بيتها على الطريق...
تفاجأت علي جاي بالخط
نزلت المدرسة وبقيت اني...
_مرتاحين بالخط
_الحمد لله...شو اليوم حسين ماكو
_عنده شغلة صارت...
ليش ماتحبون تشوفونا
سكتت ماعرف شجاوب اخاف تتأول حجايتي
_اذا ماتحبون اتشوفونة...احنة نريد شوفتكم
مو بيدنا ....الشوك يجيبنا ليكم
دنكت خجلانة ماعرف شجاوب ...
_اوييييلي بوية على الطماطة ...
ترة گليبي مامتحمل...
رحموا بيه شوي...
_رجاء ابو حسن...
لا تخليني بعد ماصعد وياك
_ماينطيج گليبج تحرميني من شوفتج...
جان يسوق وعينه على الشارع شوي
وشوي يباوعلي بالمراية...
رغم اني كاعدة بالجهة الثانية...
سمعت صوت هورن بس ما انتبهت على السيارة الي ورانة...
_هذا شبيه...
_منو...
طبكت سيارة علينة...
واضطر علي نزل على الترابي...
واني فزيت من يمي...
....وللحكاية بقية