شفاه ذابلة

بلا اهل

يسعد مساؤكم...اتابع كل التعليقات وممنونة للكلمات الطيبة عذرا لعدم الرد لان مرات مالحك...تحياتي
البارت السابع
همس ليل
كعدنا على صوت ركع بالباب ...
كامت مرت عمي مفزوعة وقبل مااتحرك جرتني من ايدي...
اريد افهم منها شي ماكو ...اخذتني لباب السطح
جان خطوتين عن الغرفة..
هية اختارت انام بغرفة الولد ...
لان قريبة من الباب مال السطح...
شفتها جرت عباية وجواها صندوق دفعتهن بحضني
بيد واليد الثانية فتحت الباب ..
_اعبري الحايط على بيت ام حارث واختلي جوة الدرج...
جانت تحجي همس....وبسرعة
سمعت الاصوات صارت داخل البيت...
وية مافتحت الباب وداتطلعني...
_عمة فدوة شكو....
_اسمعي الكلام بسرعة اعبري من الطابوكات
دفعتني بسرعة ....وسدت الباب..
وكعت ليورة واني صافنة عليها ...اول مرة تقسي وياي...
علت الاصوات ...بس مافهمت شنو يحجون
كمت من مكاني بسرعة واني حاضنة العباية والصندوك...
وركضت للحايط جان ناصي بينا وبين جيرانة...
وشفت كم طابوكة مرصوصة صعدت عليهن...
وعبرت ومن نزلت على سطح وكعت وتخرمشت ايدي...
كمت بدون ما احس بالم وركضت ختلت جوة درج جان موجود صب يودي للسطح الثاني...
وجهه للجهة الثانية...
يعني الي يصعد لسطحنا مايشوف شكو جوة درج بيت ام حارث...
ختلت واني الهث وانفاسي تصعد وتنزل سريعة
حاضنة العباية والصندوك لگلبي ولامة رجلي لصدري...
هاي كلها دقايق قليلة بس حسيت عبالك ساعات
سمعت سرقي باب سطحنا انفتح...
واكو واحد طلع بيده لايت ظل يفر على السطح
_سيدي مالكينة بعد احد...
_اني متأكد شفت عدهم بنية بعد...بنت اخوهم
سديت حلكي واني اشهك ...
هذا الصوت ماانساه ولا انسى نظرت عينه الي كله شر...
متاكدة نفسه الي اجى اخذ محمد قبل اشهر...
_سيدي فتشنا كل الغرف مابيه احد..
_اكيد دزوها عد احد...سهلة وين تروح
نزل وسد باب السطح...
دموعي كامت ادير وحسيت اختنكت...بلحظتها
يلا عرفت اني خالة ايدي على حلكي وهو يحجي
واني ازيد بكتم انفاسي لحد ماختنكت..
بعدت ايدي وخليت راسي على ركبي واني انوح بهدوء....
هذا الحجي سنة ٨٠ بدايتها كلش...
محمد اخذوه ب٧٩ .....
بقيت بمكاني على نفس كعدتي....
عقلي واكف...ماكو اي فكرة .احساسي جامد
ما اريد افكر...ويني وين التفكير...
كلشي ماعرف من دنيتي غير مدرستي وبيت عمي
صح عمري ١٤ بس عمتي غلقتني على هيج دائرة
جانت ادكول انتي حلوة وامانة امج اخاف عليج
ظليت اقرأ شكو ايات حفظنياها محمد...
وقريت الفاتحة وهديتها لام البنين...
واني اكول بس الله الي يستر علية ويسلم اهلي
طر الفجر واني متكورة بمكاني متجمدة باردة الدنيا..
ويمكن من البجي والخوف غفيت...
فزيت على حركة باب تنفتح ..
لميت نفسي من الخوف ...
وكلما تقترب الخطوات مني اتزيد دكات گلبي...
احس راح يوكف ...
اجى ضوة بعين ضميت راسي بين رجلية
_ولي دادة سودة علية...
قومي ...قومي بنيتي...
رفعت راسي واني اميز صوت ام حارث...
مدت ايدها تسحبني...اريد اوكف رجلي ماتعيني
يمكن تيبست من الخوف مدري من البرد ...
خلت ام حارث يدها جوة ابطي تسحبني واني حاضنة العباية والصندوك بيدي الاثنين وضامتهم لصدري...
سندتني لحد مادخلتني لغرفة....
_دحقي علية بنيتي...اعغف زين انتي مفزوعة..
غاح اجيبلكي مي واجيكي..
جنت اباوع لام حارث باستفهام...
ام حارث جارة العمر لبيت عمي...
مصلاوية بس ابد ماسامعتها تحجي هيج..
تحجي معانا بغدادي بس بعض الكلمات تبقى مصلاوية ...
لذلك مافهمت عليها...كلت يجوز نست نفسها
ويجوز من الارتباك والخوف...
كعدت على فراش ممدود بالكاع...
وهية راح سدت باب السطح ...ونزلت وجانت تمشي وتتحرك بسكوت...عبالك ماتريد احد يسمعها...
شوي وصعدت جابتلي كلاص بيه مي وشكر...
شربتني بيدها...
ورجعت حاجتني بس هالمرة غيرت لهجتها
_حدقي بنيتي...انا اخاف عليكي ...راح تبقين هنا
لحد ما يجون اهلك ياخذوكي
هزيت راسي ....خالة وين راحوا بيت عمي
_لا حول ولا قوة الا بالله...
ماعرف شقول...بنيتي ماعندي جواب ...
بس اريد منكي ماطلعين صوت ابد..
اجيكي الصبح بعد.مايطلعوا للدوام...
وترجعين قبل وصولهم لهنا...
هم هزيت راسي...اريد افهم الي يصير...
بس ماكو كلمة تطلع مني....
_نامي وارتاحي..
مدت ايده تريد تفتح ايدي الي مجلبة بالاغراض لصدري..
جلبت اكثر بيهن...شفتها دمعت عينها...
جرتني لحضنها...لاتخافي  ربنا موجود
سحبتهن وخلتهن يم راسي...
وطلعت...تمددت وخليت راسي على المخدة...
وخربطت الافكار بدت تتزاحم براسي
وين راحوا....وليش هذا يومية جاي ماخذ واحد من اهلي...
زين اخذهم كلهم هالمرة....
مرت عمي اكيد جانت متوقعة ...
لذلك تنام يمي ومحضرة كلش...
نزلت دموعي واني اذكر شلون نقهرت منها لان دفعتني...
ليش ماحظنتها...ليش مابست ايدها على كل الي سوته لي...
نمت من كثر التفكير ...وعيت على صوت ام حارث
_قومي نزلي جوة...
نزلت شفتها محضرة ريوك...تريكت واني اسألها
_خالة فدوة ماكو احد من اهلي رجع...
هزت راسها ...
بقيت جوة يمها بس عيوني تروح وتجي وياهة
جانت تسولف عن ولدها وبناتها الي بالكلية ...
اني السنة ماداومت لان عمتي سمر ماقبلت
خلتلي غدة من وكت....وقبل مايجون ولدها
صعدتني للمخزن...ابو حارث عسكري جان
هالمرة ظليت اباوع على المخزن مليان غراض..
بس هية مرتبتهن...وعبالك جانت تعرف بالشغلة
ومتفقة وية عمتي ...لان مرتبتلي مكان ودوشك وغطى وحتى اكو ملابس من ملابسي موجودات.
بقيت ابيت ام حارث اسبوع...
جانت تجيني الصبح تنزلني يمها وماتقبل اسوي شي
بس تبقى دسولف ومرات تنسى تبدي تحجي مصلاوي وما افهم اغلب كلامها...
وقبل مايجون ولدها تصعدني...بس بالليل خطية تبقى سهرانة لحد ماينامون تنزلني للحمام..
اسمع مرات صوت ضحكهم وسوالفهم...
وانقهر...ليش اني متهجولة...
وين راحوا اهلي وعافوني...
ليش ما اخذوني وياهم....
ام حارث من جنت اسالها منو اخذهم تسكت
وجنت استحي اسالها ليش من يجون اولادها وبناتها تختلني...
لحد يوم صعدتلي الصبح...
_قومي امي....اجاكي اهلك...
فرحت وكمزت من مكاني...اخذت عباتي والصندوك ..
ونزلت وياها سريع والفرحة ماسايعتني
بس من وصلت المطبخ مالكيت احد...
التفت عليها...وخيبة الامل واضحة بعيني
تقربت وحظتني...بنتي اعذريني من التقصير معاكي
طلعت للطرمة شفت سيارة لادة...
واكف واحد يمها...مو من ولد عمي...
سمعت ام حارث تحجي
_ابني دير بالك عليها...بس بهمس حجيها
تقرب الولد ماعرفته...بس بيه لمحة من عمتي سمر...
_فرحة...اني حسام ...ابن اخت عمتج سمر
هسة اذكرت وين شايفته ...
بس من زمان هالحجي...
_يلا فرحة...راح فتح الباب الخلفي...
مشيت بطاعة من وصلت يمه
_انزلي جوة الكشن وراح اغطيج بالبطانية
_ليش
_بعدين مو هسة...يلا خيتي
التفت على ام حارث جانت عينهة على الباب شوية
وعلى بيتنا شوي...
عبالك تخاف لا احد يشوفنا...
دخلت السيارة وحشرت نفسي بين الكشن الورة
وخلى حسام البطانية علية...
حسيت بيه صعد وساق...اختنكت من الخوف والحشكة...
بس بداخلي امل الكاهم يم ام حسام...
جنت اتمنى اباوع لبيتنا...
ماعرف شكد بقى يمشي...وكف فجأة...
ونزل سمعت صوت باب انفتح...
رجع صعد حسام وساق...
نزلته الثانية جانت من فتحلي الباب وشال البطانية
_نزلي خيتي وصلنا...
نزلت شفت نفسي بطرمة بيت جديد...
ماشايفته قبل...وبنفس اللاحظة انفتحت باب المطبخ
وطلعت ام حسام...
رحت ركض عليها...
فتحت ايديها وحظنتني وهية تبجي...
_خالة عفية وين عمتي سمر...بيبتي..عمي
_فوتي يمة فوتي جوة...
دخلنا للمطبخ جانت عالكة صوبة ومخلية جاي عليها
وصينية بيها ريوك...وفارشة يمها مدة
كعدت وكعدتني...العباية والصندوك بحظني...
فات حسام...
_يمة خوما شافكم احد
_لا...خطية ام حارث دخلت السيارة بالطرمة..
وهية انطتني فكرة اختلها ليورة
التفت علية ...خالة خوما اختنكتي
_لا ...بس خالة كوليلي وين اهلي
_احجيلها يمة لا تخليها هيج...
عافنا حسام وراح...
_تريكي واني اسولفلج
_ما اريد...اريد بس اعرف اهلي وين
مدت ايدها وصبتلي جاي وخلت كرصة خبز يمي
_اكلي يلا...
بدت اكل جبر...وعيني عليها...
بلكت ادكولي حجاية اطمني
_شوفي يمة....ابن عمج محمد اخذوه الامن...
ومانعرف عنه شي...
عمج سلم امره لله...وجان يسوي واسطات ومقابلات
حتى يشوف بلكت يكدر يطلعه..
ومتعارك وية عمج كريم  كايله انتوا بلغين على ابني
ولهالشي فتح باب ثاني عليه...
سكتت...
_شنو خالة
_مرت عمج الحية عارفة من عمج شغلات....ورايحة مبلغة عنكم وكايلة تبعية
_يعني شنو تبعية
_يعني اصولكم ايرانية...وهسة اكو تسفير لكل واحد تبعي...
_بس احنة عراقيين ...
_يمة شكلج...
_هسة اهلي من اخذوهم وين ودوهم
_والله يمة ماخلينة ماسالنا...
اخر شي كالوا...يذبوهم على الحدود وهم يدخلون لايران
ضربت على صدري وبجيت...خالة واني
ليش عافوني...منو لي
_يمة....عمج وعمتج خافوا عليج...
حلوة وصغيرة...وهناك مشي هواي وماتعرفين شمضموملكم بالطريق..
_شميكون خالة وياهم اتحمل...احسن ماابقى وحدي..عسى ماموت
_والله خالة على الموت سهل...بس خافوا  من غير شي..
_من شنو
تنهدت....ودنكت على الصينية صافنة وفكرها لبعيد
_زين عمتي جانت تدري ورتبت هالشي
_اي من يوم جنت هناك...امنتج يمي...وراحت لام حارث اتفقت وياهة...
وجانوا يتوقعون باي لحظة ...لذلك نزلت الولد جوة
وخلتج يمها فوك...حتى يلتهون بيهم...
بينما تشردج من السطح...
لميت رجلي لصدري...وحظنتها بيدي اثنينهن...
وخليت راسي عليهن واني اشهك من البجي
ربتت على جتفي ام حسام
_كولي ياالله بنيتي...ربج ارحم الراحمين
_وين اروح خالة...اهلي عافوني منو لي
_لا تكولين هيج يمة...احنة هم اهلج...وانتي من ريحة خيتي...
وهية وصتني اوديج لخوال امج اذا مارجعوا
من سمعت هيج راسا رفعت راسي...
_يعني ممكن يرجعون...
_ماعرف يمة...خليها على ربج....
هسة راح اخليج هنا عندي ..وحسام
كل فترة يروح لديالى يدور على خوال امج
_خالة زحمتج....
_لا تكولين هيج...
بس يمة اول فترة ما اريد اطلعين باب المطبخ
الطرمة ماتشوفيها ...
والسطح هم...
اني عندي حسام وعدي وهالة وهبة...
هبة وهالة مزوجات كل خميس يجون...
من يجون اصعدين بغرفة حسام ابد لا تنزلين
ذني اثنينهن مايضمن شي على رجولتهن...
وخاف تطفر حجاية هنا لو هنا...
ولدي اثنينهم ضامنتهم ....
عدي خاطب هسة بنت خاله...وبعد كم شهر نزفهم
هزيت راسي....
وبالي مو يمها ...
كل تفكيري شراح يصيرلي....شسوي...
جان ابو حسام متوفي....
اخذتني لغرفتها....كالت بدلي وارتاحي وبعدين نكمل
شأنام واني التفكير شل حالي ....
بس الغريبة نمت...مرات النوم هروب من واقعنا..
من كعدت جانت الدنيا ظلمة...
يا شكد عيب ...الظاهر بقيت هواي نايمة...
كمت لبست حجابي...
لبسي كله دشاديش طويلة وردان...
حتى ابيت عمي هيج علمني محمد ...
سمعت صوتهم...استحيت تطلع لو لا...
قطع تفكيري دخلت ام حسام ...شعلت الضوة
_ها خالة كعدتي....عفتج براحتج كلت اكيد تعبانة...
بس انتي بلا غدى كومي تعشي ويانة
طلعت شفت شباب اثنين عرفت الاول حسام والثاني اكيد عدي...
سلمت واني مدنكة ...
جانوا كاعدين حول الصينية ينتظرونا...
جابوني...وعدي رفع راسه
_اللهم صلي على محمد واله
هاي شنو يمة مادري خالتي عدها هيج كمر
_عدي...اثكل شوي
صاح عليه حسام...واني صرت بنص هدومي
_هاي شبيك ...الله جميل يحب الجمال
_شكلت اني ...جاوبه حسام
بقيت واكفة ومستحية...
جرتني ام حسام حتى اكعد يمها...
_يمة شبيك خجلت البنية...عوفها بحالها
ضرب حلكه بيده...
_يلا سكتنا....وهذا حلكي بعد ما افتحه
ضحكت لحركته...اول مرة اضحك من اسبوع
_صدقة لله...شفتوا ضحكتها
خزره حسام...شكلنا...اكل وسد حلكك
_بلة شلون اكل واني ساد حلكي
_اني اعرف شلون اسكتك...باجر اكول لزهراء حجت امه بشقى
رفع ايديه علامة الاستسلام....
_لا لا لا...بطلت...يا كلمة ردي لمكانج
عمي انتي مو حلو...ولا كمر...
وسدي حلكج لا اضحكين...
ضحكت بصوت على سوالفه...
بس شفت حسام خزرني...استحيت ودنكت
بس امه ظلت تضحك
_والله دواك بس زهراء ....
تعشينا وعدي مابطل شقة ويداهر بامه...
حسام ساكت...حسيته ما راضي...
نقهرت حيل...كلت خاف مايريد يتورط بشغلتي..
جنت ماكدر ارفع عيني واميزهم...
بس لمحتهم...حسام من شفته جان طويل...
مو ضعيف بس جسمه رياضي...
عدي من كام من الصينية ...
نفس طول حسام بس اكثر مليان...
شكلهم اثنينهم سمر ...بس حسام على وسامة اكثر
تفاصيل الوجه ماركزت بيهم...
بقيت يمهم شهرين....
تعلمت عليهم وبديت اساعد ام حسام بالبيت...
واغسل واكوي ملابس الولد...
عدي معلم مدرسة...
وحسام عنده محل كهربائيات....
عدي اخذ علية...وكام هو ينطيني ملابسه اكويها
ودائما يشاقى وياي ...
بس حسام لا...دائما يطلب من امه اي شي يحتاج...
وابد ماحجى وياي مباشر...
اذكر اول خميس اجو بناتهم...صعدت لغرفة حسام
وقفلت الباب...
ظليت اتفرج على غراضه...
كلش مرتب ذكرني بابن عمي محمد...
جربايته مرتبة..شمعة تعليك ملابس مرتب عليها الملابس مو شمر...
كنتور مافتحت رغم جان عندي فضول اشوف شبيه...
كعدت على الجرباية...بعدين استحيت ...
كعدت على الكاع....
طولوا يمهم...جريت مخدة وتمددت بالكاع...
وعيت على دك على الباب قوي...
كمت مفزوعة واني اذكر ذيج الليلة...
سمعت صوت حسام  ...
_فرحة ...فرحة
فتحت الباب واني ارجف
_شبيج ليش وجهج اصفر...صار شكد ادك بالباب
نزلن الدموع تتسابق
_استغفر الله...منو وياج ليش هالدموع...
عيوني مغوشة من اباوع عليه وماميز ملامحه
بس احسه عصبي من صوته الحاد
النوب زادت دموعي
_شلون بيج...هسة اني شكتلج وزدي...
يمة ...يمة تعاي شوفيها شبيها...
صعدت ام حسام تتسند على المحجر...
_هاي شبيج خالة...
شبكتهة اشهك...
_استغفر الله ربي...يمة اخذيها ونزلوا جوة
نزلنا...اخذتني للغرفة وراحت جابت مي
_هاج يمة اشربي...
شصار احجيلي...
اذا حسام عصب لان تاخرتي يلا فتحتي الباب
فلا تزعلين منه عباله صار بيج شي..
اني ما اكدر اصعد الدرج ...
فدزيته هو...
_لا خالة اني غفيت...وفزيت على دكة الباب
واذكرت ذيج الليلة...
_سودة علية ...
منها كام ابد حسام مايحاجيني ..واصلا من يكون موجود مايباوعلي...
جنت اكره الخميس لان انصلب بالساعات فوك...
يوم جنت اغسل مواعين بالمطبخ...
دخل حسام سلم..
شكله جان عصبي حيل....
_وين امي
_جوة بالغرفة...
طلع من يمي وهو يصيح يمة ...يمة
طلعتله من الغرفة...ها يوم خيرك
_تعاليلي للاستقبال نحجي...
ماعرف ليش حسيت الموضوع يخصني...
ظليت فكرة توديني وفكرة تجيبني...
لحد ماسمعتهم صاحوني...
وكع الماعون وانكسر...
دنكت المه...وهمة طلعوا على الصوت...
اجت خالتي جابتلي المكناسة
_يلا يمة فدوة طار الشر
_شبيج ماتكليلي ...حصرة اتسمعين صوت ترجفين
حجى حسام بنرفزة...
_على كيفك يمة ليش هالاعصاب
طفرت الدمعة بعيني...وبقيت مدنكة ...
تغوشت عيوني...اخ...
جرحت نفسي بالكزاز
_يلا تفضلي...تكلي على كيفك
خلي تعقم ايدها وجيبيها وتعاي نحجي ...
....وللحكاية بقية....