#نـصـيـبـي_فـيـك
الـحلـقـة الـثـالـثـة عـشـر
نبيل خبط في السيارة وكان فيها شخصين وكان الحادث عنيف نبيل فقد الوعي دغري قعد حوالي خمس دقايق وبعدين الناس التمو عالسيارتين وحاولو ايطلعو اللي فيهم طلعوهم من السيارت وكانو ثلاثة اثنين اصابتهم خطيرة وواحد متوفي سعفوهم للمستشفى وتعرفو عليهم ببطاقاتهم اللي كانن في جيوبهم واتصلو بهلهم وواحد من اصحاب صهيب كان في المستشغى واول ماشاف الحادث عرف نبيل ودغري رن علي صهيب وقالها له
""
سالمة مقمعزة في الجنان تقرا وبوها وامها قاعدين جوا ايهدرزو
سالمة مندمجة تقرا وتسمع في اعياط برا انفجعت وخشت تجري البوها
سالمة داهشة:بابا بابا
بات سالمة بخوف;كنك شن فيه
سالمة:مش عارفه حس اعياط برا وماعرفتش انميزة من وين جاي
بات سالمة يخوف:توا نطلع انشوف برا وطلع
ام سالمة:انشاءلله خير جارنا محمد مريض انشاءلله ماصارله شي اعويلته اصغار
اشوي وخش بات سالمة ووجه متغير وايدور علي مفاتيح سيارته
ام سالمة:شن صاير برا وكنه وجك متغير
بات سالمة وهو يمسح علي وجه:هذا نبيل قالو دار حادث وتوفى
سالمة قلبها وقف وادموعها نزلو:لا مش معقوله نبيل
ام سالمة تبكي:ياناري مازال اصغير حي علي امه شن دايره
سالمة;ماما بنمشيلهم توا
بات سالمة:هيا البسو بسرعه انشيلكم
ولبسن وطلعن ولما جن للفيلا لقنهم كلهم يبكو وايعيطو وسالمة قعدت تبكي امعاهن وقهرها نبيل في وسط قلبها وكل اللي كانت اتفكر فيه كسرة قلبه اللي كسرتها له
نهى:نبيل ياسومة سندنا في الدنيا مشى وسيبنا معش عندنا حد ايخاف علينا وايحبنا زيه
سالمة اتحاول اتهديها:خلاص نهى مش هكي
نهى:هذا مش خويا بس خويا وصديقي وعيوني ودنيتي كلها وووك عليا كيف بنعيشو بلاه ياسومة
وهما يبكو خش عليهم بات سالمة
بات سالمة:اهدن اشوي ياابنياتي الخبر طلع كذبه مغير الاسماء متشابهة هو وواحد اخرى في الحادث نبيل مازال عايش وقاعد في المستشفى توا
ام نبيل:الكلام هذا صاح
بات سالمة;والله صح وتوا كلمني صهيب من غادي وطمنا عرف ان الخبر اللي وصلنا غلط
ام نبيل وخواته:الحمدلله ياربي
ام نبيل;بمنشي انشوفه
بات سالمة;البسن وتوا انوصلكم انا له توا بات نبيل مشى للمستشفى
خشن يلبسن
سالمة:بابا بنمشي امعاكم انا
بات سالمة:توا بنشيل البنات وامهن وامك معش يقعد فيه مكان في السيارة امشي للحوش توا واقعدي مع دودي وصهيب جاي في الطريق بياخدك واتحطو دودي عند امال
سالمة:باهي تمام ومشت الحوشهم علي رجليها طبعا مش بعيد الحوش خشت ووتت دبش الدودي لانها بتبات عند امال وقعدت تستنى في صهيب ايجيها وقلبها شايطة فيه النار علي نبيل وتبكي وجعها نبيل لانها كانت اتعزة واجد
اشوي وجاها صهيب شالو دودي الحوش امال ومشى بيها للمستشفى ولقت الرجالة تحت وخوات نبيل وامه وعماته وايمان وام سالمة كلهم قدام العناية خوات نبيل وامه وايمان يبكو قعدت امعاهن سالمة واتحاول اتهديهن وام سالمة مع ام نبيل واتحاول اتهديها
سالمة:خلاص يابنات اسكتن الحمدلله صهيب قالي اكويس ومش فاقد الوعي
نهى:الحمدلله لكن في وجه خبطات ويده مكسورة وجايته ضربه علي راسه وهدي اللي خايفين منها الدكتور قال لو مشن24ساعة وهو اكويس معناها مااثرتش فيه
سالمة:معناها بدال ماتبكن ادعله يابنات
نرمين:يارب يارب اينوضلنا بالسلامة والله معش انتعارك امعاه وتبكي
سالمة حظنتها:خلاص نرمين خيك توا يقعد اكويس مااتخافيش
نهى;سومة اول ماجيت خشيت النبيل وطلب مني طلب واحد
سالمة:شنو
نهى:قالي بيشوفك
سالمة ادموعها نزلو:لو ايخلوني انخش انخشله توا
نهى:هيا نمشو للدكتور توا
سالمة:هيا
وايمان كانت تسمع فيهم وزادت في البكا لانها هيا كانت خايفة عليه اكثر من سالمة وبعد ماطلب ايشوف طلب سالمة
البنات جن الغرفة الدكتور ودقن عالباب
الدكتور: تفضل البنات خشن
نهى:دكتور معليش لو سمحت هذي ضروري اتخش علي نبيل
الدكتور:من هدي وليش ضروري
نهى:هدي سالمة وهو طلب مني يبي ايشوفها
الدكتور;اها سالمة هذي من اول ماجا فاقد الوعي وهو ايقول في اسمها من هدي
نهى كذبت عشان الدكتور ايخشش سالمة:هذي خطيبته يادكتور
سالمة انصدمت
الدكتور:اها ربي اينوضه لكي بالسلامة الباين ايحبك تقدر اتخش اتشوفه بس لو سمحتي ماتبكيش وماااطوليش
سالمة:حاظر
وطلعن وخشت سالمة للعناية بروحها وخشت علي نبيل اللي كان عليه النفاس واجهزة ثانية وفيه كم ضربة في وجه ويده مكسورة واول ماشفاته هكي ماقدرت تمسك روحها وقعدت تبكي جت جنب سريره وهو مغمض اعيونه قعدت اتشوفله وادموعها ينزلو وحطت يدها علي يده وقالت سامحني
نبيل حس بيدها فتح اعيونه ولما شافها سالمة ضغك بيده علي يدها زين حاول يحكي بس من النفاس ماقدرش شير بعيونه عليه بمعنى حوليه حولاته سالمة وكان يتنفس بصعوبة من غيره
نبيل يحكي بصعوبة:ماتبكيش امسحسي ادموعك
سالمة:حاظر بس مااتعبش روحك في الدوة
نبيل ابتسم;حتى لو انموت توا انموت وانا فرحان لاني شفت خوفك عليا بعيوني
سالمة:اس لو سمحت مااتجيبش سيرة الموت علي السانك لو
اتشوف خواتك وامك برا شن ساير فيهن
نبيل:تعرفي لما درت الحادث كانت صورتك قدام عيوني سالمة:يعني الحادث بسببي
نبيل ضغط علي يدها زين:ماتتزوجيش
سالمة:انت بس نوض بالسلامة وساهل
نبيل:سومة انحبك ومش متخيل اتكوني الراجل غيري
سالمة قعدت اتشوف لعيون نبيل وادموعها نزلو وخشت الممرضة طلعتها ونبيل بصعوبة طلق يد سالمة
وطلعت للبنات وقعدت تبكي وتبكي علي حال نبيل
""
ام نبيل وباته قعدو امعاه في المستشفى وسالمة وامها خذن امعاهن البنات الحوشهم وقعدت طول الليل تقنع فيهن ان نبيل اكويس واتحاول اتغيرلهن جوهن اما صهيب فقعد مع بات نبيل في المستشفى
""
بعد ثلاث ايام نبيل قعد اكويس والدكتور كتبله علي خروج خوات نبيل كانن مع سالمة في حوشهم وبعد سمعن ان خوهن بيطلع قررن بيمشن للفيلا عشان ايجهزله داره ويستقبلنه اول ماايجي وسالمة مشت امعاهن لمن اشوي في الفيلا وجهزله داره ونبيل وصل للفيلا وكان يمشي بصعوبة من قوة الخبطات
اول ماخش وخواته شافنه جن بيسلمن عليه وهنا يبكن نبيل ضمهن هنا الثلاثة
نبيل ضامهن:خلاص اسكتن عارفات ماانحبكن تبكن اهو انا اكويس
نهى;خفنا اتسينا وانت عارف مانقدرو انعيشو بلاك نبيل;مش مسيبكن بكل قاعد علي قلوبكن نين انجوزكن كلكن ونفتك منكن
نرمين تبكي وتشهق;خليك علي قلوبنا ديما انا بنقعد امعاك لعند لما انموت
نبيل:خلاص ياام السان وانتي بذات بنجوزك ونفتك من السانك لكن كنك قاعدة طيبة اليوم
نرمين زادت حظناته:خفت عليك وحق ربي انشاءلله انموت قبلك
نبيل:بعيد السو عليكن كلكن وبذات انتي ياام السان مع من انتعارك بعدها
قعد ايسكت فيهن وبعد سكتن شاف السالمة اللي كان ادموعها علي خدودها وابتسملها سالمة جت وسلمت عليه
سالمة;الحمدلله علي سلامتك
نبيل:الله ايسلمك وقعد ايشوفلها خربت اللحظة ايمان
ايمان سلمت علي نبيل:الحمدلله علي سلامتك نبيل
نبيل:الله ايسلمك ايمان
وركب نبيل فوق بمساعدة خواته والكل رقى امعاه الداره وقعدو ايهدرزو امعاه الا سالمة كانت مصبية بعيد عند باب الدار ونبيل ايهدرزو امعاه وهو راقد في سريرة وكل اشوي نظراته يمشن السالمة اللي مصبية عند الباب اشوي وقررو ايسيبوه ايتريح نبيل قبل مايطلعو مسك نهى وقاللها يبي سالمة ضروري نهي طلعت وحكت السالمة وسالمة جاته في الدار اول ماشافها خشت كان راقد قمعز وابتسملها
نبيل:شكرا سومة لاني اول ماجيت شفتك فرحت واجد والله
سالمة;ولو انت شخص غالي علي قلبي وانعزك
نبيل:فرحني كلامك هدا ورد الروح فيا
سالمة ابتسمت:اهم شي توا دير بالك علي صحتك ومعش تجري
نبيل:حاظر😍
سالمة:انا توا لازم نمشي
نبيل:عليش خليكي هنا
سالمة:بكرا عندي امتحان ومازلت ماقريت شي😊
نبيل;انشاءلله بالنجاح
سالمة:انشاءلله وحنقعد نتصل بيك نطمن عليك
نبيل:ياريت نقعد احسن كان اديري هكي
سالمة ابتسمت وطلعت
نبيل فرح من كل قلبه ونسى وجعه كله
""
مرو كم يوم ووليد مازال هامل سالمة بس ماقدر يحكيلها عاللي في قلبه وان ايحب بنت ثانية وان بيفسخ الخطبة لان بوه عطا كلمة وحدة وهو خاف يكسر كلمة بوه
حكى الهديل اللي صاير بس هديل مااقتنعت بكلامه وحست ان يلعب عليها
"
موعد الفرح قعد ايقرب ومازال عليه اسبوع بس
سالمة لاهية مابين قرايتها وتجهيزها الفرحها
ونبيل قعد اكويس وفك الجبس وسالمة كل بعد كم يوم اترن عليه وتطمن واتسكر ومعطاتش فرصة يحكي اي شي في موضوع حبه الها ورد يشتغل في المعرض زي قبل لكن كل يوم يمشي وايقرب فيه موعد الفرح ايحس بالقهر والحزن اكثر
""
وليد يحكي مع هديل وايحاول يقنعها بحبه الها وان مايلعبش
وليد يحكي مع هديل وايحاول يقنعها بحبه الها وان مايلعبش بس هيا ماصدقتش وقررت اتسيبه
وليد;حرام عليك انا انحبك ليش بتنهي كل شي
هديل:ماتقنعش روحك انك اتحبني لو اتحبني صح راك فسخت خطبتك
وليد;حاولت بس باتي مسكر راسه
هديل:تقدر توقف ضده
وليد;والله مانقدر انتي مش عارفه باتي وبعد ايصمم علي شي لازم ايديره
هديل;وانا مش مظطرة نقعد مع واحد خاطب
وليد:بس الخاطب هذا مش قادر ايتخيل حياته من دونك
هديل; فرحك بعد اسبوع حاول تنساني واتعيش حياتك مع مراتك
وليد:مانقدرش قلبي مش امعاها امعاك انتي والله هكي نتعب تحملي اشوية حندير حل
هديل:لا انت عارف وضعي ماعنديش حد ومانقدر انعلق مصيري بواحد مش قادر ياخد قرار بروحه
وليد:يعني شنو
هديل:يعني خلاص انساني ولد خالي خطبني وامي وافقت وخالي قرر ان ايطلع الفرح بسرعه
وليد:انتي شن تحكي وانا وحبي لكي مستحيل نسمح اتكوني مع راجل غيري
هديل:بس انت موافق اتكون مع وحدة غيري
وليد يبكي;والله مانبيها عطيني فرصة وحدة حندير حل ارجوك
هديل:انا اسفه سامحني حتى انا حبيتك بس قعدت امعاك وماشفتك درت شي وماما تبي تطمن عليا ونبو حد يحمينا لذلك مانقدر نرجى اكثر من هكي حاول تنساني واتعيش حياتك الجديدة انا اسفة وسكرت
وليد:الو الو وعاود اتصل بيها كم مرة لقاها مقفل زاد الهم عليه وفعلا هو حبها وكان حاس بنار في قلبه طلع وسيب الحوش بكل ومش قادر ايصدق ان خلاص هديل طلعت من حياته
"""
اليوم اخر امتحان السالمة
سالمة ومرام في القاعة وايحلن في الامتحان
نبيل قلبه واجعه وعارف ان اليوم اخر يوم في امتحانتها وان زي اليوم هدا حيكون فرح سالمة زادو نبضات قلبه وفي لحظة قرر يمشي للجامعة وايشوفها
"""
سالمة ومرام طلعن من الامتحان سالمة فرحانة لانها كملت امتحاناتها ولانها خلاص بعد اسبوع بتكون عند نبيل
سالمة تمشي هيا ومرام:مرومة فرحانة واخيرا خلاص حلمي بيتحقق
مرام:نجك ليا وانا فرحانتلك بالاكثر
سالمة:حتى انتي خلاص تحظري فرحي وبعدها انا انجيك وانا عروس نحظر بيانك
مرام بفرحة:انشاءلله بس اسمعي بتمشي امعايا للكوافير
سالمة;اكيدة ياقلبي نمشي امعاك
مرام اتشوف قدامها ومصدومة:سومة شوفي
سالمة;كنك وبحتت قدامها وكانت الصدمة
#يتبع
زعما شن اللي شافوه البنات قدامهم وشن بصير بعد الصدمة هذي كله حنعرفوه الحلقة الجاية ☺
اسفة لو فيه اخطاء في الاسماء وأكيد رايكم ايهمني 😉
گـتـابـتـي Koka Saleh 😊
منقولة💖
