#نـصـيـبـي_فـيـك
الـحـلـقـة الـثـانـيـة والـثـلاثـون
نبيل مصدوم:هذا شنو
وليد بعد علي سومة وسومةقعدت تبكي وتلتقط في انفاسها
نبيل مسك وليد من قميصه:انت شن ادير هنا
وليد:سومة طلبت مني انجي
سالمة مصدومة:انت واحد كذاب
وليد:انا مانكذبش انتي قلتيلي هلي مش قاعدين تعال
نبيل مسكه وبدا يضرب فيه وليد معش عرف ايبعده وليد ضربه ضرب عنيف وسالمة تبكي واتحاول اتوقف نبيل وليد استجمع كل قوته ودف نبيل بكل قوة لين بعده منه وطلع يجري
نبيل بيطلع وراه وقفاته سالمة وصبت قدامه وهي تبكي
نبيل:حولي خليني نقتله
سالمة تبكي:خلاص نبيل مااتضيعش روحك علي واحد زيه
نبيل:صار واحد زيه اللي زيه قاعدة اتخوني فيا امعاه
سالمة:انت شن تحكي معقوله صدقت كلامه
نبيل:اكيد انصدقه ترا قوليلي شن عرفه انك عند هلك وانك قاعدة بروحك اكيد صح مكلمتيه
سالمة تبكي:شن هالكلام انا والله ماكلمته ولا نندري عليه دق الباب وفتحت انصدمت لما شفته هو
نبيل:الكلام هدا قوليه العيل صفير ايصدقك بس انا لا انا شفتك بعيوني قاعدة امعاه وياعالم شن كنتو اديرو
سالمة بعلو صوتها:احترم نفسك انت شن اتقول
نبيل:اللي انقول فيه حق لازم تعرفي يامحترمة انك متجوزة وان الشي هذا حرام
سالمة تبكي:نبيل تسمع في اللي تحكي فيه انا سومة وانت عارفني شنو وعارف اني انحبك مستحيل اندير شي ايزعلك
نبيل:اتحبيني واضح يامدام انا اللي كانن عيوني مغمضات لاني كنت انحبك حبك عماني عن كل حاجة وفرحت لما قلتيلي انحبك وصدقتك ماكنت عارف انك تلعبي بيا بس واضح الكلام اللي وصلني صح ومازال اتحبيه وماانسيتيش
سالمة تبكي:اي كلام انت شن تحكي انا والله انحبك بكل صدق
نبيل يمسح في يده علي وجه:طلعت مغفل مش فاطن الشي يااخسارة حبي لكي كنت انحبك الدرجة اني انكذب اي حد وانصدقك بس هالمرة شفت بعيوني ماحد قالي وياريت نقدر انكذب عيوني وانصدقك قهرتيني ياسالمة طعنتيني في وسط قلبي
سالمة قربت من نبيل:نبيل صدقني والله ماخنتك ولا عاد وليد ايهمني انحبك انت بس
نبيل دفها:صدقتك واجد خلاص انا فهمت وعرفت كل شي ياريت ماحبيتك وطلع
سالمة قعدت تبكي وتبكي لان نبيل فهمها غلط
""
نبيل طلع وركب في سيارته ومشى بسرعه جنونية وهو طول الطريق يبكي علي حب حياته اللي ضاع وعلي سومة اللي صدقها وطلعت خاينه
""
سالمة قعدت تتصل بيه فونه مقفل ونار والعه في قلبها وخايفة نبيل ايدير شي في روحه بعد اللي شافه وفهمه
سومة امها اتصلت بيها وقالتلها ان امال جابت وبيروحو بيها الصبح
روح صهيب وسالمة ماحكتله شي برغم ان حس انها متضايقة ولما سألها قالتله انها تاعبه اشوي
"""
في الليل وتحديدا الساعة 3 سومة اترن علي نبيل مقفل انشغلت اكثر ورنت علي نرمين قالتلها ان مازال ماروح
""""
وليد في داره حصل طريحة رباش القبور لكن بهذا كله كان راضي باللي صار وفرحان لان حيقدر ايفرق بينهم اتصل ببيسان اللي طول اليوم اترن عليه بتعرف شن صار وهو كان في المستشقى ماردش عليها
بيسان:ايوا وينك من بدري انرن عليك
وليد:قاعد كنت في المستشفى من العشية
بيسان:عليش شن صار
وليد:هالواطي تعاركت امعاه وضربني وماقدرتش عليه لكن مش مشكله اهم شي وصلنا للي نبوه
بيسان:قصدك الخطة نجحت
وليد:انا انقول نجحت هو قاعد توا ماحكالكم شي
بيسان:لا هو ماروحش للفيلا لعند توا حتى عساس بيجيب بريوش في العشية ماجشش وامبدري الكل ايرنو عليه مقفل
وليد:اها اكيد غامتله ان لقى مراته اتخون فيه
بيسان:قولك حيصدق اللي شافه ولا حيصدقها هي وبكرا نلقاهم خاشيين مع بعضهم
وليد:اسمعي مافيش حد ايكذب عيونه وايصدق حد اخرى انا متأكد ان حيطلقها بعد اللي صار لان مهما الراجل كان ايحب مستحيل ايسامح عالخيانة وبذات ايشوفها بعيونه اسأليني انا عالشعور هدا
بيسان:يارب ان شاءلله خلاص خاطري نفتك منها
وليد:ان شاءلله وناخدها انا واتعيش امعايا بصراحة اكتشفت ان الحياة بلاها ماتسوش
بيسان:بصراحة نحسدها في اثنين ايحبوها هكي
وليد:سومة تستاهل بجد لان بنت مافيش منها اثنين بكل
بيسان ماعجبهش الكلام:اها المهم توا انا بنسكر وبكرا انقولك اللي ايصير وانت لو صار امعاك شي قولي
وليد;تمام سلام وسكر
"""
ثاني يوم الصبح سومة مارقدتش طول الليل وهي اتحاول في نبيل علي امل يفتح فونه او يتصل بيها مافيش فايدة
روحت امها للحوش ولاحظت ان سومة متضايقة ولما سالتها قالتلها انها تاعبة اشوي وماحكتش الحد اللي صار
خشت سومة الدارها بترقد وماقدرت وقعدت متضايقة بكل واتصلت بصاحبتها مرام
مرام:اهلين سومة
سالمة:اهلا مرام
مرام:شن اخبارك سومة
سالمة;مش اكويسه بكل
مرام بخوف;كنك شن صاير
سالمة:حكتلها اللي صار
مرام بصدمة:ريتي الواطي معقوله ايدير هكي
سالمة تبكي:المشكله نبيل لما حكيتله ماصدقني وفهم اني انخون فيه
مرام:سومة اهدي واتصلي بيه وفهميه اكيد حيفهم نبيل ايحبك
سالمة:مقفل من امس وماروحش للفيلا بكل قاعدة بنموت مش عارفه وينه وشن صاير امعاه
مرام:ان شاءلله مافيش الا الخير اكيدة حيتصل بيك بعد مايهدى اشوي وايحاول يستوعب الموضوع
سالمة تبكي:خايفة ايصدق اني خنته وايسبني والله بعدين انموت مانقدرش انعيش بدونه
مرام:لا قولي خير نبيل عقله مش صغير ويعرف اكويس انك اتحبيه بصدق
سالمة:هالمرة غير شاف بعيونه ومستحيل ايصدقني وايكذب عيونه مرام نبيل قالي حبك ليا كذب وياريت ماحبيتك وقعدت تبكي
مرام:سومة وسعي بالك صدقيني نبيل ايحبك غير قال هكي لان عصب بس
سالمة تبكي:ان شاءلله احساسي ايخيبني يامرام انشاءلله ماكرهنيش
"""
هل نبيل خافو عليه وباته اتصل بكل اصحابة مافيش حد عنده علم اتصل بسالمة مش عارفه شي عنه اتصل بصهيب وبرضو مش عارف شي عنه
صهيب شك لان لاحظ حالة سومة واختفاء نبيل في الوقت هدا اكيد فيه سبب واكيد سومة عارفته وقرر يمشي يحكي امعاها جا الدارها ودق
سومة قعدت تمسح في ادموعها واتحاول اتبان عادية وفتحت الباب
صهيب:خير سومة
سالمة:خيرات صهيب
صهيب;وينك من اول ماجيتي وانتي حابسة روحك في الدار وماطلعتي بكل
سالمة;تاعبة اشوي
صهيب:باهي عادي انخش انهدرز امعاك اشوي
سالمة:اكيد خش
خش وقمعزو هو وسومة
صهيب:سومة نسالك سؤال
سالمة:شنو
صهيب:انتي فيه مشكله بينك وبين نبيل
سالمة:لا مافيش شي(وطبعا ماحكتش لانها كانت تبي تعرف رد نبيل قبل وكان عندها اشوي امل ان بعد ايرد حيسمعها ويفهمها)
صهيب;باهي وين نبيل وين مختفي مافيش حد عارف وينه معقوله
سالمة:مش عارفه انا بروحي قالقة عليه ممكن عنده شغل
صهيب:اكيدة فيه شي ساير نبيل مستحيل يختفي بالطريقة هذي انا متاكد ان زاعل من شي
سالمة:انا مش عارفه شي وانا بروحي خايفة ايكون صايرله شي وقدت تبكي
صهيب حظنها:خلاص سومة بلاش بكا انا حنمشي توا اندوره ومش حنروح لين نعرف وين ومااتخافيش اكيدة مش صايرله شي ممكن متعقد من شي صاير معاه حنعرفوه لما ايروح وتوا ارقدي وتريحي ومش حنروح في اللي الا وانا عارفه مكانه
سالمة:ياريت ياصهيب انا خايفة عليه بكل
صهيب:انتي تريحي توا لان وجك تاعب بكل وانا حنعرف مكانه وطلع
سومة تريحت من كلام صهيب وان حيدور نبيل امتدت وحاولت ترقد ولانها واعية من امس نعست ورقدت
"""
روح صهيب في اللي بدون مايعرف نبيل وين سومة زادت في قلبها النار وخافت عليه بس صهيب طمنها ان سأل في كل المستشفيات والعيادات وكل المراكز ومش قاعد اسمه اطمنت اشوي بس مازال قالقة لان مافيش حد عارف وينه
"""
طبعا نرمين كانت حالتها قريب من حاله سومة وخايف علي خوها صهيب اتصل حب ايطمنها اشوي
صهيب:خير حبيبي
نرمين:خيرات صهيب ها طمني ماعرفتش وينه
صهيب:بصراحة سالت كل واحد نعرفه وفي كل مكان يمشيله نبيل ماعرفتش شي عليه
نرمين تبكي:حي وين بيكون اول مرة نبيل ايدير هكي
صهيب:بطلي بكا حبي اكيدة حيرجع وين بيمشي
نرمين تبكي:خايفة ايكون صايرله شي
صهيب:مااتخافيش حبي والله سالت في كل مستشفى وكل عيادة وكل مركز اسمه مش قاعد وان شاءلله مش صايرله شي
نرمين:زعمك مسافر
صهيب:نعرف واحد صاحب في المطار وقتله يسالي وقالي مافيش اي حجز بأسمه
نرمين;معناها وين مشى
صهيب:ممكن مسافر داخل ليبيا الله واعلم وين لكن انا متأكد ان نبيل اختفاءه بسبب زعله من شي
نرمين:سالت سومة ممكن تقعد عارفه شي انا سالتها ماحكتلي
صهيب:سالتها وقالت مافيش شي وهي بروحها قالقة عليه وغير تبكي وخلاص وحالتها حاله
نرمين:يارب ايرده لنا كلنا اكويس
صهيب:يارب
"""
بيسان في دارها رنت عليها ايمان
ايمان:اهلا بيسان شن جوك
بيسان:تمام شن جوك انتي
ايمان:تمام نرجا فيك اترني اتفرحيني واتقوليلي شن صار معش رنيتي
بيسان:لحدت توا اللي نرجو
ايمان:تمام نرجا فيك اترني اتفرحيني واتقوليلي شن صار معش رنيتي
بيسان:لحدت توا اللي نرجو فيه مازال ماصار ونبيل مختفي من امس
ايمان بخوف:وينه وشن صارله
بيسان:مش عارفه مافيش حد عارف عنه شي
ايمان:حي تخيلي بسببنا ايدير شي في روحه
بيسان:لا مستحيل عليش بيدير هكي
ايمان:انتي مش عارفه قد شنو نبيل ايحب سالمة
بيسان:لالا مااعتقدش ايدير شي في روحه عشانها
ايمان:ان شاءلله
بيسان:توا ندعو ان شاءلله لما يرجع ايكون مقرر ايطلقها ويفضحها قدامنا كلنا
ايمان:انا راضية حتى بدون مايفضحها اهم شي عندي ان ايطلقها وخلاص لان بصراحة حرام يفضحها
بيسان:بلا طيابة ان شاءلله يفضحها قدامنا كلنا والكل يكرهوها والغرض ثاني اصلا لما يفضحها حتى هلها بيعرفو وفي اللحظة هذي حتصير مشكله وحتى نرمين وصهيب حيطلقو بسببها وهكي انتريحو من العيله هدي ومعش يقعد فيه اي رابط يربطهم
ايمان:وواو نحسدك علي تفكيرك كيف يخطر عليك هدا كله
بيسان:هذي شطارة وبعدين انا اندير هكي عشان بسنت اختي اتحب صهيب ونبيها تاخدة ونمكر هالمغرورة نرمين اللي خذاته منها
ايمان:ان شاءلله انا وبسنت ناخدو اللي انحبوهم
بيسان:ان شاءلله وبعد ايصير هكي انا انكون تميت مهمتي وبنرجع الامريكا
ايمان:اكيد حنفقدك
بيسان;حنقعدو علي اتصال اكيدة
ايمان;اكيدة
""
مرو 7 ايام علي اختفاء نبيل وكلهم كانو قالقين عليه ومافيش حد عارف عنه شي
""
اليوم الثامن في الصبح نبيل روح للفيلا الكل فرحو ان مافيه شي وقعد مابين احظان وادموع من امه ونرمين ونهى ونسمة اللي كانو قاعدات يرجو فيه وكانن منشغلات عليه قعد امعاهم بس كلهم لاحظو عليه ان فيه شي مضايقه بس هو ماحبش يحكي الحد ورقى فوق ومن اول ماخش وهو ذكرياته مع سومة كلهن قدامه معش قدر يتحمل وفي لحظه خانوه ادموعه ونزلو غصب عنه
"""
سومة كانت راقدة وكانت تاعبة من كثر السهر كل يوم وابكاها علي نبيل اول مافتحت عيونها مسكت فونها بترن علي نبيل زي كل مرة علي امل تلقى فونه مفتوح لقت رسالة جايتها وانصدمت لما لقتها من نبيل وكان مكتوب فيها(انا روحت اليوم ومش عارف شن نكتبلك وماعرفتش انوصلك اللي حاس بيه بسببك وماالقيتش الا شي واحد انوصلك بيه احساسي وهو كله في الاغنية اللي وصلاتك عالوتس واسمعيها وحتفهمي اللي بنحكيه لكي)
سالمة فتحت النت وسمعت الاغنية وقعدت تبكي وقهرتها بكل قعدت اترن علي نبيل ماايردش عليها رنت اكثر من 10مرات مافيش فايدة نهائي فقررت تمشيله في الفيلا لبست وطلعت برا لقت هلها راقدين فتحت الباب ومشت الفيلا هل نبيل واول ماخشت تلاقت بيهم كلهم ورحبو بيها (وطبعا الفترة اللي نبيل مش قاعد كلهم جوها عشان اتروح امعاهم هي رفضت عشان كانت ترجى في نبيل هو اللي ايروح بيها وام سالمة مسكتها لانها حست ان بنتها تاعبة وتقعد امعاهم هما افضل فهل نبيل ماحبو يضغطو عليها)
سالمة مقمعزة امعاهم;نبيل روح صح
ام نبيل:اها روح ماتكش عليك هو
سالمة;اكيد يحسابنا مرقدين وعيت توا القيت منه رسالة ان روح ماقدرتش انتحمل لين ايجيني جيت دغري
نهى ابتسمت:خلاص ارقيله اكيد هو مرايفلك
بيسان ضحكت وكلهم بحتو فيها
سالمة ماعدلتش عليها ورقت فوق وفتحت الباب وخشت لقت نبيل مقمعز عالسرير وحاط راسه بين ايديه سالمة جت وقمعزت جنبه
نبيل انتبه وصبى اول ماشافها;انتي شن جابك هنا
سالمة:جاية بنحكي امعاك
نبيل:ماعنديش شي نحكيه امعاك واللي نبي نحكيه وصلك في الاغنية
سالمة تبكي:الاغنية تقهر وفيها معنى واحد
نبيل:هو المعنى هدا
سالمة تبكي:يعني معش اتحبني وتبيني نتساك
نبيل:اها خلاص انا كرهتك
سالمة:بس انا انحبك مانقدرش انعيش من دونك
نبيل:بطلي تمثيل انتي وحدة كذابه ومازال اتحبيه بس لو حكيتي من الاول بدل ماتكدبي عليا واتفرحيني واتعيشيني في وهم انك اتحبيني وتطلعي اتخوني فيا سالمة:نبيل والله انحبك بصدق والله ماانخون فيك ولا وليد عاد يعنيلي شي
نبيل بعصبيه:معش اتقولي اسمه قدامي يااخسارة حبي لكي ياسالمة انتي ماتستاهليش انا كرهتك
سالمة:نبيل شن تحكي انا سومتك واللي ايحب مايكرهش
نبيل:لا اللي ايحب وينخان يكره ياريت مااتجوزتك
سالمة تبكي وقربت من نبيل ومسكت يده:انت كرهت سومة سومة اللي والله اتحبك اكثر من روحها
نبيل دفها ويبكي:معش تلمسيني ولا اتقربي مني انتي وحدة رخيصة مافكرتيش في حبي مافكرتيش الا في روحك وبس انانية وحدة كذابة تلعب بمشاعر الناس
سالمة مصدومة;نبيل انت تسمع في شن تحكي
نبيل:اها نسمع فيه وعارف في شن نحكي انتي وحدة خوانه والله واعلم شن درتي امعاه اخرى وانا معش نبيك ولا ايشرفني ان وحدة زيك اتكون مراتي
سالمة مصدومة من كلام نبيل وتبكي:وانا مستحيل بعد اللي سمعته توا نقعد امعاك
نبيل:ولا انا نبيك يبقى انتي وقعد يبكي
سالمة تبكي:قولها خلاص قلت اللي اكبر منها
نبيل:انتي طالق
سالمة حطت يدها علي فمها ماتوقعت نبيل يقدر ايقولها
نبيل:اسمعي توا حتطلعي وحنقول الهلي ان قررنا ننفصلو والسبب ان ماتفهمنش اول شي عشان مانبيش نفضحك قدام هلك وهلي والناس لاني ولد اصل وفي يوم كنت انحبك وكانت بينا عشرة مش داعي كلام الناس يكثر والشي الثاني علي خاطر نرمين وصهيب مالهمش ذنب يتحملو نتيجة انانيتك لو عرفو هلي وهلك الموضوع حيفترقو صهيب ونرمين وانا عارف انهم ايحبو بعضهم فانا مش حنكون اناني زيك ونحكي اللي صار الحد انا وانتي بس عارفين ليش اطلقنا والباقي حنقولولهم ان ماتفهمنش تمام
سالمة تبكي وهزت براسها بمعنى موافقة وطلعت
نبيل رجليه معش شالوه وقمعز وقعد يبكي زي البيبي الصغير
اما سالمة نزلت تبكي والكل قعدو يسألو فيها وماحكتش ولا كلمة وقمعزوها وجابو مية ونرمين رقت النبيل وقالتها له قاللها اشوي وننزل وبعد اشوي نزل
ام نبيل:تي كنكم وكنها سالمة تبكي وحالتها حاله
نبيل:فيه مشكله بينا
ام نبيل:هدي بس ساهله خلاص خود مراتك وراضيها وحلو القصة
نبيل:لا المشكله ماتنحلش ونحنا اتفقنا عالطلاق واصلا طلقتها
البنات شهقن
نهى:انت شن تحكي انت عارف في شنو تحكي
نبيل:اها عارف اللي نحكي فيه خلاص مافيش نصيب بينا سالمة وجعها الكلام وصبت بتمشي
بيسان متشمته:وشن السبب
سالمة شافت النبيل وسكتت
نبيل:انا وهي ماتفهمنش الافضل كل حد في حاله
طبعا بسنت كانت مقمعزة امعاهم وبيسان كانت حكيتلها اللي داراته وهي وبيسان منتظرات ان نبيل يحكي اللي صار عشان تكبر القصة ويطلقو نرمين وصهيب وتكمل خطتهن
بسنت:مش معقوله هدا سبب اطلق سومة اللي اتموت عليها عشانه اكيدة فيه شي اكبر
نبيل بعصبية;مافيش شي انا وهي ماتفهمنش واتصير ديما واتفقنا ننفصلو عشان مانكرهوش بعضنا
نرمين تبكي:لا نبيل انت اتحب سومة وهي اتحبك عشاني خليكم مع بعضكم خلي سومة اتريح فترة وانت تريح فترة بلاها بس مااتسيبهش
نبيل:خلاص انا قررت واصلا سالمة كانت جاية عشان تاخد دبشها ومن يومتها نحنا متفقين عالطلاق مش صح ياسالمة
سالمة تبكي:صح
نبيل:ادبشك كله في العشية ايكون عندك
سالمة جت بتطلع وكلهم قعدو يبكو ويمسكو فيها بس هيا كان واجعها كلام نبيل وقهارها ومشت الهلها وحكت نفس كلام نبيل وانهم ماتفاهموش
"""
بسنت انقهرت هي وبيسان لان ماحكش الموضوع وهكي صهيب ونرمين مش حيفترقو وقعدت بيسان اتفكر في موضوع عشان تفضح سالمة او اي خطة عشان اتفرق صهيب ونرمين زي مانجحت في تفريق سومة ونبيل
""
نبيل طلب من خواته ايلمن دبش سومة لان قرر معش ايخش للجناح بكل لمنه له وحطه في السيارة وشاله الهلها وحكى مع صهيب وباتها وقاللهم ان بيطلق وكان مصر وحكى نفس كلام سومة انهم ماتفاهموش وانهم قررو ينفصلو وان رمى عليها يمين الطلاق وبعد كم يوم حيبدى في اجراءات الطلاق
"""
مر اسبوع وسومة كانت منهارة وتبكي طول الوقت وقاهرها كلام نبيل اللي قاله الها وتصرفه امعاها وان طلقها وبعد كلامه معش حاولت اترن عليه بكل ولا اتكلمه ومرام الوحيدة اللي كانت عارفه وكان كل يوم اتجيها اتحاول اتخفف عليها اشوي
اما نبيل ماطلعش من الفيلا بكل وكان الحزن واضح عليه وطبعا للجناح امتاعه هو وسالمة مارقش بكل وكان قاعد في داره القديمة وحابس روحه فيها
"""
بيسان كلمت ايمان وقالتها الها وقالتها ان هدي فرصتك ولازم اتجي عشان تحكي مع نبيل واتقربي منه
""
جت ايمان للفيلا عساس جاية بتغير جو البنات اللي كانن نفسيتهن تاعبة من اللي صار قعدت امعاهن اشوي وبعدين لما التهيو الكل مشت النبيل في داره ودقت وفتحت الباب وخشت
نبيل:نهى قتلك ماعنديش نية ناكل بعد انجوع توا ناكل
ايمان:انا ايمان مش نهى
نبيل:انت شن جابك هنا لو سمحتي اطلعي
ايمان:انا حاسة باللي صاير امعاك وعارفه انك اكيد مقهور توا
نبيل
ايمان:انا حاسة باللي صاير امعاك وعارفه انك اكيد مقهور توا
نبيل:مالكش علاقة اطلعي وفوتيني
ايمان:انا حنطلع بس بنقولك حاجة وحدة اللي خانك انساه وفوتها هي الخاسرة لانها خانت واحد نفسك حبها من كل قلبه وطلعها من قلبك هي ماتستاهلك
نبيل مصدوم:انتي شن تحكي
ايمان:واضحة يانبيل سالمة مازال مانست حبيبها الاول وانا نبهتك بس انت ماصدقتنيش وهددتني وانا خفت ومعش حكيت الحد وقلت حيجي يوم ويفطن بروحه واهو جا والحمدلله ماطولش واجد وبانت علي حقيقتها تعرف كيف عرفت انها خاناتك لانك انت مستحيل اتخلى عليها الا بسسب كبير واكبر سبب الخيانه مش عارفه انت كيف اكتشفتها بس المهم انك عرفت
نبيل يبكي:طعنتني في قلبي قهرتني حبيتها وخانتني بكل انانية ياريت ماحبيتها
ايمان:هي ماتستاهل كل هالحب طلعها من قلبك والله ماتستاهل حتى ادموعك عليها هي دارت هكي لانها متاكدة انك اتحبها وانها مهما دارت حتسامحها واكيدة توا اتقول حيرجعلي
نبيل:مستحيل انردلها بعد اللي داراته
ايمان:معناها ليش حابس روحك هكي اكيدة خواتك يحكولها اطلع واثبتلها انك تقدر اتكمل من دونها وانها مش اخر وحدة في الدنيا وتقدر اتعيش بلاها
نبيل:قهرتني كيف بنثبتلها وهي ذبحتني
ايمان:تقدر تثبتلها بان حياتك مش موقغة علي وحدة خاينه زيها اطلع ورد العملك زي قبل وفي غيرها اتحبك واتموت فيك ومستعدة اتنسيك كل شي صار امعاك بس عطيني فرصة وحدة وبيا انا تقدر تقهرها وتثبتلها انها مش فارقه عندك
نبيل:انتي شن تحكي
ايمان;نحكي في اللي المفروض ايصير وصدقني انا حنتحمل وجعك وانك مقهور عليها ونقعد جنبك لين تنساها ومش حنخلي حد ايشوف وجعك وحتى لو مقهور انورو للكل انك انت اكويس ولما بتبكي واطلع اللي في قلبك ابكي قدامي وانا حنتحمل لاني انحبك صدقني مش حتلقى وحدة اتحبك زيي
نبيل ساكت
ايمان:فكر في كلامي ونرجاك اترن عليا حتى لو العمر كله وطلعت
نبيل قعد يبكي ووجعاته روحه بكل
"""
مرو يومين نبيل فكر في كلام ايمان وقرر يثبت السومة ان يقدر ايعيش بلاها وانها مش اخر وحدة في الدنيا وقرر يثبتلها ان خيانتها ما اثرتش فيه وعدى حلق ورد دار حمام ولبس وتانق وبين للكل ان مش متأثر وان فترة وعدت وقرر ان يخطب ايمان الكل انصدمو ورفضو لانهم قالوله ان قرار غلط لانك انت حامق من سالمة وهو قاللهم ان معش ايحبها واصر علي خطبة ايمان وعاندهم كلهم ومشى العمه وطلبها وحدد ان الفاتحة والفرح ايكونن بعد اسبوع
#يتبع
بيسان وايمان نجحو في خطتهم وفرقو عشاقنا زعما حيكملن باقي خططهن وايمان حتجوز نبيل وبيسان حتقدر اتفرق صهيب ونرمين كله حنعرفوه الحلقة الجاية☺
اسفة طولت لاني طولتلكم الحلقة واجد
واسفة لو فيه لخبطة في الأسماء واكيد رأيكم ايهمني 😉
گـتـابـتـي Kok Saleh 😊
منقولة💖
