#نـصـيـبـي_فـيـك
الـحـلـقـة الـثـلاثـون
صباح ثاني يوم وتحديدا الساعة 9:30 سومة فتحت عيونها وهي في حظن نبيل قعدت اتشوفله واتحرك في اطراف اصابعها علي لحية نبيل نبيل حس بيها وفتح عيونه
سالمة:صباحو فل حبيبي
نبيل ابتسم:صباحو ورد وكل حاجة حلوة في الدنيا
سالمة ابتسمت وزادت دفنت روحها في صدره وبساته علي رقبته
نبيل زاد حظنها:قوليلي بس ليش ماينملش منك
سالمة:بلبل بلاش شطانة بنمشو
نبيل:مازال مادرت شطانة بس وين بنمشو
سالمة:مش اتفقنا بنمشو للجامعه اليوم اول محاظرة ليا وليك
نبيل:وااو انسيت بكل تي انتي معش خليتي عندي عقل سالمة:وانا شن درتلك
نبيل:ياما درتي خليني انوريك
سومة بعدت عنه وصبت تجري
نبيل:باهي ياسومة تهربي مني توا انروحو وانوريك
سالمة:بعد انروحو ساهل توا صبي بسرعه عشان نتأخروش
نبيل:حاظر اندوش قبل
سالمة:استنى اندوش انا قبلك
نبيل بخبث:اندوشو مع بعضنا
سالمة:انلا وخشت للحمام
نبيل بصوت عالي:ماشي ياسومة والله انوريك
سالمة تضحك عليه
طلعت سومة وخش نبيل دوش وجهزو ونزلو يفطرو امعاهم وكانت واعية امه نبيل وعمته انتصار
واثناء سومة تفطر رن فونها شافت لقتها مرام ردت
مرام:صباح الخير
سالمة:صباح النور
مرام:شن جوك
سالمة:تمام شن جوك انتي
مرام;تمام مشيتي للجامعه
سالمة:اشوية ونطلع انتي في الجامعه توا
مرام:لا سومة اليوم مش جاية بكرا انجي
سالمة:بدينا من توا غياب
مرام:لا والله غير اليوم درت التحليل وتاكدت من الحمل وحسام فرحان قالي اليوم نحتفلو وبكرا انشيلك
سالمة:باهي مرومة الف مبروك خلاص بكرا انشوفك
مرام;معليش اليوم بتقعدي بروحك
سالمة تضحك;لا مش بروحي امعايا نبيل خذا محاظراته كلهن في نفس الايام ونفس الوقت احتمال حتى انتي معش انشوفك
مرام تضحك:للدرجة هدي مش قادر ايسيبك ولا لحظة
سالمة:قالك المهم توا سلام بنطلع
مرام:سلام
نبيل:كيف صار مش جاية مرام اليوم
سالمة:لالا قالت كانت في المختبر مش جاية
ام نبيل:خير كنها في المختبر
سالمة:امس دايرة تحليل حمل منزلي وطلع ايجابي اليوم مشت اتاكد منه وطلعت حامل
ام نبيل:مشاءلله ان شاءلله من قسمها
سالمة:ان شاءلله
ام نبيل;وانتو امتى بتفرحونا بحفيد
انتصار:صدقتي الهم ثلاث اشهو ساد وانتو عرسان جيبولنا بيبي وفرحونا
نبيل شاف السومة وابتسم:ان شاءلله قريب وخذا سومة وطلع وركبو في السيارة ومشو للجامعه درسو وبينزلو
نبيل:سومتي قبل ماتطلعي تلقيني قدام باب قاعتك
سالمة:وعليش توا انتلاقو برا مرات نطلع قبلك
نبيل:بروحك فيش مشي لازم انكون امعاك وحاجة اخرى في القاعة ماتقعديش جنب شاب ومانبيكش تحكي مع ولا شاب لا صداقة لا شي
سالمة:ياسلام عليك شروط وعليش هذا كله
نبيل:كيف عليش مش انا راجلك وحبيبك وانغار عليك ونبيك ليا بروحي
سالمة:وانا لكي بروحك بلا الشروط هدينا كلهن
نبيل عقد حواجبه:سومتي بديري اللي قلت عليه ولا لا
سالمة:حاظر حنديره لكن حتى انت عيونك لوطة وماتحكيش مع ولا بنت
نبيل:حاظر انتي تؤمري امر
سالمة ابتسمت وجت بتنزل
نبيل:سومتي انسيتيش شي
سالمة:شنو انسيت واتشوف جنبها
نبيل اشرلها علي خده:هنا مافيش حاجة انسيتيها
سالمة تضحك:مجنون وباساته ونزلو
خشت سالمة للقاعة وخش الدكتور وقعد يشرح اشوي ودق الباب
الدكتور:تفضل ياطالب
نبيل:ممكن انخش دكتور
الدكتور:انت معانا هنا
نبيل:اها
الدكتور:تفضل
نبيل خش وقمعز جنب سومة وهي مصدومة
سالمة بشوية:انت شن جابك هنا
نبيل:الدكتور ماجاش
سالمة;وكان ماجاش اتجي هنا
نبيل:يعني تبيني نقعد برا ونقعد انشوف للبنات مش هنا خير
سالمة:هنا خير بس تخيل الدكتور يعرف انك مش معانا
نبيل:عندش كيف يعرف وبعدين كان عرف انقوله غالط وتوا انتبهي للشرح احسن ماايشوفنا نحكو وراه كان شافنا انا بنقوله هي اتنابش فيا
سالمة:ماشي يانبيل توا انوريك
نبيل يضحك:انتبهي بس
وسومة قعدة منتبهة للشرح ونبيل كل الوقت ايشوفلها ومركز عليها وكل مرة كاتبلها حاجة في ورقه وعاطيها الها (مرة انحبك ومرة اتهبلي وانتي مركزة ومرة خاطري ايبوسها)
طلعو من المحاظرة
سالمة:انت صامط معقوله ماخليتني انركز بكل
نبيل:هدا كله مش مركزة وبعدين شن بنديرلك ماانتحملكش تي اتهبلي يابنت
سالمة:عارفه روحي
نبيل:ناعليا نا من الواثق في روحه ومسك يدها وطلعو من الجامعة وروحو للفيلا ورقو فوق دغري واول ما خشو سومة بدت اتحول في دبشها نبيل شالها وحطها عالسرير ومسك ايديها فوق
نبيل:تهربي مني في الصبح صح
سالمة:بلا صماطة نبيل بعد
نبيل:اها صامط ومش مبعد اليوم قاعدلك هنا وبعدين سمعتي امي تبي حفيد
سالمة:لا مازال بدري عليه
نبيل:اي بدري وحق الله خاطري اتجيبيلي بنوته تشبهلك ولا تبيش بنوته مني
سالمة ابتسمت:اكيدة نبي منك
نبيل:معناها تمام وباسها بكل حنية علي شفايفها وسومة استسلمت الباقي بوساته خرب اللحظة الحلوة فون نبيل ايرن وسكن بالرنين
نبي بعد:اوووف من المزعج هدا ولما شافه لقاه واحد يشتغل في المعرض وقاله لازم ايجي ضروري عشان السيارت اللي داز عليهن موعدهن توا ايجن ولازم ايجي
نبي صبى ولبس تيشرته وبيطلع
سومة ممتدة عالسرير وتضحك
نبيل:فرحانة نقذوك مني لكن اشوي ورادلك
سالمةتضحك:متشمته فيك تستاهلها عشان من الصبح تصمط عليا
نبيل;سومة مااتخلينيش انسيب السيارات والشغل كله وانجيك وانتي عارفه انديرها
سالمة:لا خلاص سكتت عدي الشغلك
نبيل:ساعتين وراد
سالمة:باهي حبيبي نرجا فيك
نبيل جا باسها:ايوا خليك هكي شاطرة وطلع
سومة تغطت وبترقد قعد فونها ايرن
سالمة:هدي اكيدة مرام بتعرف شن خذيت وصبت اطلع فيه من الشنطة طلعاته وولما شافت انصدمت بأن اللي ايرن وليد قعدت اتشوف للرقم زين وفي لحظه صماتاته وجت وقمعزت عالسرير وهي ماسكة فونها وليد سكن بالرنين وسومة ماردتش
سالمة:اوووف هدا شن يبي شن خطرني عليه توا
وليد رن فوق من 10مكالمات خاطي الرسائل وكلهن يجدى فيها اترد وقعد ايرن وسومة اتصمت في الفون فكرت اترد واتهزبه وبعدين حست لو ردت حتقعد خيانة النبيل واصلا ماعندهش عليش اترد لان هو معش يعنيلها شي حطت الرقم في الحظر وامتدت ورقدت
""
وليد بعد رن لين مل وعرف سومة حطاته في الحظر دز رسائل لين مل مافيش فايدة
وليد:معقوله سومة اتشوف رقمي ومااتردش عليا اكيد مازال زاعله مني
قعد ايفكر شن بيدير وجت في باله فكرة مسك فونه واتصل
""
مرام في دارها وتتفرج عالتلفزيون رن فونها ولما شافت لقاته رقم حست ان مار عليها وبعد ركزت اذكرت ان رقم وليد
مرام:بسم الله هدا شن خطرني عليه
اشوي وجتها رساله مكتوب فيها(لو سمحتي مرام ردي نبيك في موضوع ضروري)
مرام جاها فضول تعرف كنه ولما رن ردت عليه
وليد:اهلين مرام شن اخبارك
مرام:الحمدلله شن اخبارك انت
وليد:الحمدلله اكويس
مرام:تفضل شن الموضوع اللي تبيني فيه
نبيل:من بدري انرن علي سومة مااتردش وبعدين حطتني في الحظر نبي منك اتقوليلها اترد عليا ضروري نبيها في كلام مهم
مرام:وشن تبي فيها انت
وليد:تبي الصدق لنقني نادم عاللي درته ونبيها اتسامحني وانردو البعضنا من جديد وانا عارف انها زاعله ومن حقها بس عارف اخرى انها اتحبني وانا فعلا اكتشفت اني انحبها لذلك بنصلح اللي درته
مرام تضحك:ضحكتني ياوليد بعد كل اللي درته فيها اتقول نادم وبترجعلها
وليد:عادي اي انسان يغلط
مرام:صح لكن مش زي غلطك وبعدين شكلك مش عارف ان سومة اجوزت
وليد بصدمة:مستحيل سومة تجوز غيري
مرام:وعليش انت مش اخر راجل في الدنيا وسومة توا اجوزت واتحب راجلها موت وعايشة احلى حياه امعاه ومستحيل اتشوف الغيره
وليد:انتي اتبصري صح انا متاكد من حب سومة ليا
مرام:مافيش بينا بصارة نحنا وبعدين سومة ماتبيش تقعد علي ذكراك ديمة ربي عوضها براجل ايحبها موت وماايتحمل فيها شي وهيا اتحبه واتموت فيه وتاكد انها نسياتك ومعش اتفكر فيك بكل لذلك مااتعبش روحك واترد اتكلمها ومافيش داعي اديرلها مشاكل ساد كل اللي جاها منك وخليها متريحة في حياتها
وليد:حاظر بس نطلب منك طلب واحد قوليها اتكلمني مكالمة وحدة بنقوللها كلام مهم
مرام: مافي داعي اتعب روحك سومة صدقني مش حترضى اتكلمك وانت لو سمحت معش تتصل بيها احسن ماتحكي الراجلها واتصير مشكله خليها عايشة حياتها بدون مشاكل لو صح اتحبها زي ماقلت بعد عليها
وليد:ان شاءلله واسف اني ازعجتك
مرام:لا عادي وسلام توا
وليد:سلام وسكر
وليد بحزن:معقوله سومة اجوزت غيري ونستني مستحيل هي اتحبني واجد كيف تنساني بالسهوله هدي حس بندم غريب وقهرة علي ان خسرها كان متوقع اول ماايكلمها اترد دغري بس كلام مرام صدمه وقهرة في نفس الوقت قعد ايفكر ان فعلا كما تدين تدان القهرة ا
وليد:سلام وسكر
وليد بحزن:معقوله سومة اجوزت غيري ونستني مستحيل هي اتحبني واجد كيف تنساني بالسهوله هدي حس بندم غريب وقهرة علي ان خسرها كان متوقع اول ماايكلمها اترد دغري بس كلام مرام صدمه وقهرة في نفس الوقت قعد ايفكر ان فعلا كما تدين تدان القهرة اللي قهرها السومة وعاش حياته توا سومة قهرتها له وعايشه حياتها في لحظة نزلو ادموعه وندم علي كل لحظة هملها فيها وماقدرهش
""
سومة وعت علي رنت فونها ولما شافت لقتها مرام
سالمة بصوت ناعس:اهلا مرومة
مرام:اهلين شكلك راقدة
سالمة:اها كنت في الجامعه ووعيت بدري جيت رقدت طول
مرام:امالا وين نبيل غريبة مسيبك
سالمة تضحك:كلموه في المعرض وعدى وهو حامق يبيش المشية
مرام تضحك:ايضحك نبيل ايحبك بجنون
سالمة:بكل
مرام;سومة بنسالك سؤال
سالمة:شنو
مرام:انتي اتحبي نبيل
سالمة:سبحان من نزل حبه في قلبي علي قد ماكنت زمان ماانحبش علي قد ماتوا مش قادرة نتخيل حياتي من دونه انحبه فوق ماتصوري مرومة
مرام بفرحة:طمنتيني سومة ربي ايهنيك امعاه يارب
سالمة:يارب بس عليش سؤالك الغريب
مرام:بصدق عشان اليوم رن عليا وليد وقالي وحكتلها اللي قاله كله
سالمة:اها وانتي شن قلتيله
مرام:قتله انك اجوزتي واتحبي راجلك وعايشة احلى حياه امعاه وقتله معش اترن وخليها عايشة حياتها بدون مشاكل ساد اللي جا من وراك
سالمة:احسن حاجة درتيها حتى انا رن عليا ومارديتش عليه بصراحة معش عندي له نية ولا عندي له اي شعور في قلبي انا معش انشوف في راجل غير نبيل ونبي انعيش كل حياتي امعاه واتصدقي كل مانذكر اللي داره وليد نحمد ربي اللي دار هكي عشان بسببه خذيت نبيل لان هذا هو الحب الحقيقي اللي حسيته مع نبيل ماعمريش حسيته مع وليد نبيل فعلا حبيته حب حقيقي وهو اللي خلاني انحبه وانتعلق فيه من دون ماانحس كله طيبة وحنية ورجوله بأختصار معش نقدر انعيش بلاه
مرام:يارب ايخليكم البعضكم ويبعد عنكم كل حد بيفرقكم وليد انا حكيتله الكلام هدا وقتله بعد عنها
سالمة:احسن مادرتي وانا اول ماايروح نبيل حنحكيها له وهو يتصرف امعاه
مرام:عليش تحكيله بلا غباء مااديريش مشاكل الروحك وانتي عارفه نبيل يمشي دغري يضربه وتقعد قصة وبعدين وليد ماكان عارف انك اجوزتي وانا قلتها له وقتله معش اترن عليها وبعد من طريقها وهو قال باهي ولو رن مرة ثانية عليك احكي النبيل لكن توا ماتحكيش
سالمة:قولك هكي
مرام:اها وانا متاكدة مش حيرن مرة ثانية
سالمة:باهي تمام انشوف لكن لو رن مرة اخرى انقولها النبيل
مرام;تمام
سالمة:باهي قوليلي شن اخبار البيبي
مرام:تمام لكن الحمل ايتعب وقعدن ايهدرزن بعد حوالي ربع ساعة سكرن
سومة صبت وبرمت علي حوشها ولماته وبخرت ورنت علي نبيل وقاللها اشوي وانجيك لبست وتأنقت عشان ترجى نبيل وبعدين فكرة تفتح نت واتنابش نبيل بكم صورة عشان اتلخبطة وايجي بسرعه صورت وفتحت النت وهي بدز الصور جتها رساله عالوتس من وليد مكتوب فيها (اليوم كيف عرفت انك اجوزتي ماتصوريش قد شنو انقهرت لاني توا كيف اكتشفت اني فعلا انحبك ونادم علي كل اللي درته فيك انا اللي ضيعتك من يدي ونستاهل اللي قاعد ايصير فيا توا لكن بعد شنو الندم بعد فوات الاوان انتي توا مع راجل اخرى واتحبيه وانا نحسده عليك وانشاءلله يعرف ايحافظ عليك وماايودرك من يده زي ماانا درت وصدقيني مستحيل نزعجك مرة ثانية وربي ايهنيك امعاه بس كلمة اخيرة حنقعد طولي عمري انحبك وطول عمري نادم اني ضيعتك مني وياريت اتسامحيني علي كل شي درته فيك ونطلب منك طلب واحد تسمعي اللي دزيته لكي )سومه سمعت المقطع وماتأثرتش بيه وبعدين حذفت المحادثة وحظرت وليد ودزت الصور النبيل وطبعا نبيل ماتحمل وجاها يجري
""
مر اسبوع وليد وفه بكلامه وفعلا معش رن علي سومة بكل لكن كان نادم للمليون ان ضيعها منه ومنقهر انها مع غيره توا وسومة ونبيل عايشين حياتهم ومنسجمين عالاخر
اما ايمان وبيسان ايسن انهن يقدرن ايفرقنهم وايمان قررت انها معش بتساعد بيسان وكان ديما اتشوف الصفحة نبيل واتشوف في صوره ومناشيره اللي كانن ايدلن علي انه عايش حياه سعيدة لانها اتحبه بصدق قالت انها اهم شي ايكون سعيد وهي لازم ترضى بالنصيب وتنساه واتشوف حياتها
""
اما سومة كان عيد ميلاد نبيل بعد اسبوع فكانت بديرله مفاجئة واتجهز العيد ميلاده وايساعدو فيها نرمين وصهيب وبديرله عيد ميلاد حلو لان ماكان يحتفل بيه فحبت اتفاجئة
""""
ايمان في دارها وفاتحة نت وتصفح فجأة شافت منشور عجبها لان لمسها من جوة المنشور كان مكتوب فيه (مَوجودون في قلُوبنا .. ولَكن لَا يُمكن أن يَوجدوا في حيَاتنا !! حَقيقة مؤلمه لَكن عَلينا تَقبلها. . . !!💔)علقتله عليه وكتبتله (جيت عالجرح)الشاب رد عليها وقعدو ايخرفو في التعليقات وبعدين خشلها خاص وقعدو ايخرفو هدرزلها الشاب عالبنت اللي ايحبها وعدة الغيره وهي حكتله علي حبها النبيل من هي اصغيرة وهو حب غيرها واجوزها وحتى ان هددها اتبعد من طريقهم ومعش اتجيهم ولا يحكي الهلها
قعدة هي والشاب ايهدرزو كم يوم علي حبهم الضايع من غير ماايتعرفو علي بعضهم
بعدها تعرفو علي بعضهم وانصدمت ايمان لما عرفاته منو طلع هو وليد اللي ايحب سومة عرفاته لما قاللها اسم سالمة واسم راجلها اللي اجوزاته(طبعا وليد سال عليها وعرف من اجوزت اما ايمان مالاحظت الاسم وماكانت تحسابه هو وليد صاحب سومة لانها ماكانت عارفه منه الا اسمه لا تعرف شكله ولا لقبه لكن لما حكالها عليزسالمة وقال اسمها عرفاته)انصدمت لما عرفاته وقعدت حايرة شن ادير مابين تقعد علي قرارها واتخلي نبيل ايعيش حياته مع البنت اللي اختارها مابين تحكي البيسان لان هدي الفرصة اللي كانت تبيها كانت بتوصل الوليد بأي طريقة والصدفة جاباته الهن قعدة اتفكر شن ادير وحايرة وبعدين قررت انها ماتحكيش البيسان واتخلي نبيل عايش حياته مع البنت اللي حبها
#يتبع
زعما شن ايصير وفعلا ايمان طلعت طيبة وبتخليهم في حالهم او حيصير شي اخرى مش متوقعينه كله حنعرفوه الحلقة الجاية ☺
المقطع اللي دزه وليد السالمة حنزله في منشور بروحه وياريت كلكن تسمعنه لانها اغنية اتهبل 😍😉
اسفة لو فيه لخبطة في الاسماء واكيد رأيكم ايهمني 😉
گـتـابـتـي Koka Saleh 😊
منقولة💖
