#نـصـيـبي_فـيـك
الـحـلـقـة الـثـالـثـة
سالمة:حول من قدامي
نبيل:بنقولك كلام ولازم تسمعيه
سالمة:صهيب في الجامعه وحيشوفنا واتصير مشكله
نبيل:مااتخافيش لما يطلع حنعرف المهم توا اسمعي كلامي
سالمة:احكي بسرعه لو سمحت واختصر
نبيل:كان اليوم اندزلك هلي اتوافقي عليا
سالمة;لا مستحيل انوافق عليك
نبيل;حرام عليك ليش مصرة اتعذبيني والله انحبك ياسالمة
سالمة:نبيل لو سمحت افهم ان قلبي مع غيرك
نبيل:عارف بس شن فيه بزيادة عليا والله متاكد ان مستحيل ايكون ايحبك زي ماانا انحبك
سالمة:القلب ومايهوى اسفة نبيل ولو سمحت حاول معش تطلع قدامي لاني مليت منك وعدت وسيباته
نبيل كان ماسك نظارته في يده من قهرته من كلامها زر عليها زين بقبضته نين انكسرت في يده ومشى وطلع من الجامعه وركب في سيارته وهو حاس بنار في قلبه
""""
اما سالمة رنت علي وليد ورد عليها
سالمة:صباح الخير
وليد:صباح النور
سالمة:يومك حلو انشاءلله
وليد;انشاءلله ويومك
سالمة;وينك امس قعدت فاتح نت ودزيتلك مارديتش عليا وبعدين قفلت فونك
وليد:كنت امكسد عالفيس اشوية وماكنش عندي جو نحكي قفلت فوني ورقدت
سالمة بحزن:معقولة ماعندك جو ليا
وليد:انتي عارفه طبعي ماانحب نحكي ديما انحبها بعد ارياف
سالمة:بس انا ديما امرايفة عليك
وليد:خلاص سالمة مااتوجعي راسي
سالمة:حاظر
وليد:انتي في الجامعه
سالمة:اها عندي امتحان اليوم
وليد;حليتي
سالمة:اها كله حليته
وليد:تمام انشاءلله بالنجاح
سالمة:انشاءلله
وليد;خلاص انسيبك توا
سالمة:باهي امتى بنحكو
وليد:لما نفضى انا انرن عليك ماتسكنيش تمام
سالمة:تمام انحبك
وليد;وانا انحبك سلام
(طبعا سالمة في طبعها مااتحب المشاكل وفي نفس الوقت اتحبه وخايفة تخسره ففي حاجات واجد اتفوت فيهن واتكبر في عقلها عشان اتحبه)
طلعت مرام من الامتحان
سالمة:شن صار فيك كنك طولتي
مرام:اخر مسألة انسيت القانون وفي الاخير اذكرته
سالمة;يعني حليتي
مرام:اها الحمدلله
سالمة:خلاص معش عندنا امتحان الا الاسبوع الجاي
مرام;انتريحو اشوي بعد خطرها اليوم دفع وبيان اخت حسام
سالمة:بتمشي صح
مرام:هذا شي اكيد تخيلي ليا واجد ماشفته
سالمة:قصتك قصة امعاه
مرام:بكل خاطري ايحس بيا
سالمة:باهي تحركي اشوي خليه اليوم ايشوفك سلمي عليه ابدي بنظرات وهكي ايشوفك في السنة مرة بوشاح وعباية كيف تبيه ايحس
مرام:انتي عارفه هيثم خويا طبعه واعر مافيش لا تسليم علي اولاد عم لاشي حتى مشيت اليوم بالزر من ماما عشان خلاني نمشي حتى الفيس فاتحته من وراه
سالمة:سامحيني لنقنه خوك بارد وحصله
مرام:بكل عارفه لما امس وصلتوني حقني ودارلي قصة طويله عريضة وماسكت نين قتله ان رنيت عليه وفونه مسكر طلع طافي شحن ومش فاطنله
سالمة:عليك الصامط شن فيها كان وصلناك
مرام:هدا تفكيره كان يلقى يحبسني في الحوش
سالمة:ربي ايعينك عليه خلاص اهو صهيب طلع سلام
مرام:سلام
اشوي وجاها خوها وروحت حتى هيا
""
روحت سالمة للحوش لقت بوها وامها ايجهزو في روحهم بيمشو العمتها في المرج راجلها متوفي
ام سالمة:اسمعي توا نحنا ماشيين عشان نحظرو الدفن وبكرا انتي وامال وصهيب اتجو
سالمة:ماشي تمام لكن قصدك بنقعد بروحي
ام سالمة:لالا كلمت امال وتوا اتجي اتبات امعاك
سالمة:باهي
وعدو بوها وامها وخذو دودي لانها مااتحملش بلاهم
سالمة خشت دوشت وامتدت عالسرير ورقدت
"""
اما نبيل فكانت غامتله بكل وقاهره كلام سالمة وقرر ايشيلها من راسه ويلتفت الحياته مع غيرها
""
اما مرام فكانت اتجهز في روحها وفرحانه بكل لانها بتشوف حسام حتى من بعيد عادي ولبست(فستان توب قصير اسود من الخسر فيه سير عريض شمواء احمر مربوط بشكل وردة ولابسه شوز احمر واكسسوار وميك اب بناتي خفيف وكان شعرها اسود قصير)
لبست عبياتها ووشاحها وطلعت لقت امها تلبس في عبايتها وجنبها هيثم اللي قارن حواجبه وماسك مفتاح سيارته(وطبعا مرام بوها كان متوفي وهيثم خوها طبعه واعر وصامط بكل وهو متحكم في كل شي)
مرام:هيا ماما مازال
ام مرام:خلاص ياماما كملت
هيثم:قصدك انتي ماشية هكي
مرام:اها شن فيه لابسه عباية ووشاح
هيثم;واللبز اللي في وجك هذا شنو امشي امسحيه
ام مرام:مش باين ياهيثم وبعدين ماشية البيان وكلهن بنات ودايرات شن فيها
هيثم:مش شوري بيها يبقى مافيش مشي خلاص
مرام تبكي:انا خاطري نمشي
ام مرام;مش هكي عاد البنت الها زمان ماحظرت مناسبة عليش تحرم فيها
هيثم:خلاص معناها تلبس خمار علي وجها
مرام مصدومة وتبكي:خمار معقوله
هيثم: اها كان بتمشي البسي خمار ولا اقعدي وخلاص
مرام تبي المشية:تبكي توا نلبسه لكن هدي مش عيشه راه وخشت اتجيب في خمار
ام مرام:حرام عليك يااوليدي هذي خيتك وماعندها الا انت ليش ادير هكي
هيثم:يام انا خايف عليها راه انتي مش حاقه البنات برا
ام مرام:بس خيتك انا مربيتها وعاقله مش زي البنات
هيثم:عارف يام لكن الحرص واجب
طلعت مرام ولابسه الخمار ومشو الحوش عمهم ونزلهم هيثم ومشى وكانت الحفله حلوة ومرام انسجمت عالاخر
""
اما سالمة فتحت عيونها وكانت الدار امظلمة تلمست بيدها عالكوميدينا نين لقت فونها شافت الساعة لقتها الساعة 6
سالمة:وااو طولت في النومة وصبت وغسلت ولقت الحوش فاضي ااووف معقولة امال مازال ماجت لعند توا خليني انرن انشوفها رنت سالمة علي امال
سالمة:خير ياحنة وينك مازال ماجيتي لعند توا
امال:خليها ساكته انا جهزت روحي وبنطلعو وعمي ايطيح من طوله شاله صلاح للمستشفى وقالو عتده شريان منسد
سالمة:لا مااتقوليها بكل
امال:وحق ربي وجعني
سالمة:حرام عمك اكويس ياريتها جت في عمتك هالعزوز الشنطاء 😂
امال:اس مااتخليني نضحك مش وقت ضحك صح امزودتها اشوية لكن والله ماانتمناها الها
سالمة:خلاص بلا طيابة زايدة شد حيلك كيف متحملتيها كان انا راه قاتلتها بس قوليلي يعني بعد ايروح صلاح ماتقدري اتجي قاعدة بروحي
امال:صلاح بايت مع عمي والحوش هنا مليان ناس مانقدر انسيبهم سامحيني سومه اكيد خايفة
سالمة:صح اموله عيب اتسيبيهم عاد وانا مش خايفة حنرن علي صهيب وايجي
امال:باهي رني عليه توا خلاص بدت اتظلم ماتقعدي بروحك
سالمة:توا انرن عليه توا سلام
سكرت من امال وقعدت اترن علي صهيب تلقى فيه خارج التغطية (طبعا صهيب ماكان عالم بمشية هله اللي جت فجأة)
"""
مرام مع بنات عمها تخريف وهياجة وجو سمح ومسكهم عمها للعشا صبن البنات عطن مرام جينز وبدي من عندهن وخلنها في الدار بروحها عشان اتغير دبشها وتلحقهن سلحت مرام فستانها ولبست الجينز ومازال بتلبس البدي وهوب الباب انفتح
مرام انفجعت وحطت البدي عليها
حسام:معش عرف شن ايدير لف وجه انا اسف معليش نحساب البنات بروحهن هنا
مرام ترعش وتلبس في البدي
حسام بيطلع وسمع صوت البنات يحكن ويضحكن في الممر وجايات شور الدار
مرام خافت:حي عليا البنات
حسام تلخبط ومعش عرف شن ايدير
مرام تبكي:حي شن بيقولن عليا 😭
حسام:اس ماتبكيش توا عندي فكرة
مرام:شنو قول بسرعه
حسام:انا حنزقب من الروشن وانتي امسحي ادموعك واطلعي مااتخليهن يفطنلك
مرام;كيف تبي تزقب مرات ايصيرلك شي او حد ايشوفك
حسام;مش حيصيرلي شي والروشن يفتح لاورة مافيش حد بس انتي تعالي ورايا عشان اتسكري الروشن ومشى جيهت الروشن بيزقب لف وقال مرام
مرام خايفة:نعم
حسام مدلها منديل:امسحي ادموعك عشان ماايشوفوك مرام خذاته منه: وسكرت الروشن ومسحت ادموعها والبنات فتحن الباب وخشن
اسماء اخت حسام:تي وينك نرجو فيك ليش طولتي
مرام وعينها في الروشن;كنت بنطلع توا
اسماء:معناها هيا ننزلو للمطبخ عشان انديرو السلطات
مرام:تمام هيا ونزلو لوطة للمطبخ
""""
سالمة ظلمت الدنيا وهيا خافت ومازال صهيب ماروح وفونه مازال خارج التغطية
"""
نبيل روح للفيلا لاوي بوزه وحامق ولقى نهى امقعزة اتفرج عالتلفزيون
جا نبيل قمعز جنبها:خير
لفت نهى وشافت حواجبه اللي قارنهم;كنك عاقدهم 😂
نبيل بجدية:نهى مش وقت حناطه
نهى:لا الباين الحكاية جد كنك نبيل
نبيل:غامتلي اشوي
نهى:من شنو انشاءلله خير
نبيل:خلاص قررت انشيلها من راسي
نهى:بسم الله شن خطرلك
نبيل:هكي كل حاجة درتها لحدت ماخليتها تستحقرني وانا ماعمري درت هكي البنت
نهى:فيه حاجة جديدة صارت
نبيل:لا مافيش شي صار بس انا هكي قررت القرار
نهى;يعني غامتلك عشان قرارك
نبيل:لا واجعتني روحي اللي رخصتها واجد
نهى:خلاص اهم شي توا فطنت الروحك
نبيل:صح هذا المهم وتوا بنوتي ادبشي وماشي السوسة انا والشباب انكسدو كم يوم غادي
نهى:هكي تمام انسجم وغير جوك وانا حنمشي انجهزلك شنطتك توا
نبيل:ياريت اتجهزيها ليا زي كل مرة وماتنسيش شي
نهى:حاظر من عيوني
"""
مرام في المطبخ الصغير مع بنات عمها ايجهزو في اسلاطات وحركات للعشا والصبايا في المطبخ الكبير ايديرن في العشا
مرام ماسكة صفرة واتحط فيها في كاسات للعصير
خش حسام للمطبخ يعرج:السلام عليكم
البنات;وعليكم السلام
اسماء:كنها اكراعك شن فيك ليش تعرج
حسام ايبحت في مرام:اه لا بسيطة طحت برا
اسماء:باهي بسيطة سلم علي مرام
حسام جا جيهتها:ومد يده كيف حالك مرام
مرام وجها احمر ومنحرجة منه عالاخر;تمام الحمدلله
اسماء:ليش خاش فيه شي تبيه
حسام:اها نبي نشرب مية بس وجا جنب مرام وخدا كاسه من الكاسات اللي اتوتي فيهم وقرب منها وقاللها;على فكرة اتهبلي وانتي منحرجة
مرام انصدمت منه واول مرة يحكيلها هكي وطاحت الكاسة من يدها وشهقت😱
حسام يضحك:ساهله ساهله بعدي خير ماتجرحك
اسماء:تاخد سوك غير ماتقربيها بيدك
ولمن البنات القزاز ومرام مشت تجري وقلبها بيطلع من مكانه وخشت للحمام ومش مصدقة اللي قاله معش عرفت تفرح ولا تنحرج وقعدت تغسل في وجها
""""
سالمة امقمعزة في مكان واحد والخوف بدي ايسيطر اكثر واكثر وصهيب قعد مقفل فجأة الضي طفا ولعت فلاش فونها وقعدت تبكي واترن علي رقم صهيب بعدين قعدت تسمع في صوت غريب طلعت بتشوف لقت الصوت جاي من مفتاح الضي والباين ان فيه مشكله لان المفتاح ايدير شعاع خافت ومعش عرفت علي من اترن اترن علي امال وهيا عارفه ان راجلها مش قاعد ومش حتقدر اديرلها حل
سالمة تبكي:ياربي شن اندير علي من انرن في اللحظة هذي ماخطرتش عليها الا نهى حطت علي رقم نهى وقعدت مترددة في الاتصال
"""
نهى: نبيل اهي شنطتك جهزتها لكي
نبيل;ماانسيتي شي
نهى:كل شي تبيه حطيته لكي
نبيل:تمام سلام توا
نهى: سلام ورن فونها
نهى:خيرات سالمة
نبيل:سمع الاسم وقف في مكانه
نهى;وقفي بكي واحكي بالشوية مافهمتك
نبيل رد بسرعه وهو خايف عليها:تي كنها
نهى:اها اوكي فهمتك توا حنجيك مااتخافي وسكرت
نبيل:قولي بسرعه كنها
نهى;هلها مش قاعدين وصهيب مقفل وقالت الضي فاصل والمفتاح ايدير في شعاع وهي خايفة وتبيني انجيها
نبيل:هيا البسي عبياتك بسرعة والحقيني نمشولها
لبست نهى عبايتها وطلعت وراه ومشو السالمة دقو وفتحتلهم الباب وهي ببجامة النوم وتبكي وحالتها حاله
نهي;حظنتها:خلاص اسكتي اهو جيت(وطبعا سالمة كانت تعتبر في نهى زي اختها الكبيرة واتعزها واجد)
نبيل كان واقف برا وقلبه يتقطع وهو يسمع في سالمة تبكي
سالمة تبكي:معش عرفت خفت من الضي مش عارفه شن صارله
نهى;وينه المفتاح ايخش نبيل ايشوفه
سالمة:اهو تعالي انوريه لكي
نهى نادت نبيل عشان ايخش وراهم وخش نبيل وجت عينه دغري علي سالمة اللي اول مرة ايشوفها ببجامة النوم واول مرة ايشوف شعرها ومعش شال عيونه من عليها
سالمة اهو المفتاح
نبيل قعد ايشوفله شكله في مشكله كبيرة انا حنفصل عالحوش كله عشان ماايصير اي التماس تمام
سالمة;باهي انا كيف بنقعد في الظلام
نهى:حنقعد امعاك انا هنا
نبيل:شن تقعدو هنا بروحكم والحوش ظلام توا ناخدكم غادي
سالمة:لا نقدرش مرات صهيب يرجع ومايلقاني وانخوفه عليا
نبيل;صهيب ماعليك فيه انا حنحناول نتصل بيه او بحد من اصحابه ولا نمشي اندوره نين نلقاه
سالمة;هو مقفل مش عارفه كنه اول مرة يقفل فونه
نبيل:انتي عدي البسي عبايتك ومااتخافي صهيب نعرف اصحابه كلهم وتو نعرف وين
سالمة في اللحظة هذي اذكرت ان هيا بالبيجامة ومش لابسة وشاح انحرجت بكل;تمام نلبس عبايتي وانجي ومشت تجري
نبيل فصل عالحوش كله وطلعن البنات للسيارة وسكر الحوش اكويس وطلع ومشى بيهن للفيلا امتاعهم
#يتبع
زعما شن حيصير في فيلة نبيل وهل فيه شي حيتغير من ناحية سالمة حنشوفوها في الحلقة الجاية انتظروني😊
ومعليش لو فيه اخطاء في الاسماء 😊
انشاءلله ايكونن احداث اليوم عجبنكم وأگيد رأيكم ايهمني 😊😍
گـتـابـتـي Koka Saleh
منقولة💖
