#نـصـيـبـي_فـيـك
الـحـلـقـة الـواحـد والـعـشـرون
صباح ثاني يوم ام سالمة وبات سالمة يفطرو وامعاهم دودي طلع صهيب من داره
صهيب:صباح الخير
كلهم:صباح النور
صهيب قمعز وبدا يفطر:ها شن صار في المشية
بات سالمة:انكمل فطور وانرن علي بات نبيل وانقوله
صهيب;كان وافق نمشو اليوم
بات سالمة;لا وين اليوم عندي شغل كان وافق بكرا ومنها انجهزو كل اللي نبوه
صهيب:تمام
""
في فيلا نبيل مقمعزين كلهم يفطرو رن فون بات نبيل
بات نبيل:صباح الخير ياحاج
بات سالمة:صباح النور شن اخبارك
بات نبيل:الحمدلله شن اخبارك انت
بات سالمة:الحمدلله بنقولك علي موضوع ياحاج
بات نبيل:انشاءلله خير
بات سالمة:لالا خير غير خططنا مشية للمصيف بنغيرو جو وعازمينكم امعانا ياحاج وانت عارف الايام هذينا ايام بحر شن قولك انت
بات نبيل:والله شن انقولك انا ماعندي مانع لكن ناخد رايهم قبل
بات نبيل:خلاص اسألهم وان شاءلله المشية بكرا
بات نبيل:تمام نسال وانرن عليك وسكر
بات نبيل:هذا بوك ياسومة
سالمة:كنه
بات نبيل:قال عازمنا بكرا عالمصيف وبنقعدو كم يوم شن رايكم
طبعا الكل فرحو وافقو وعجبتهم الفكرة الا نرمين
نرمين:لا انا امتحاناتي مازال اسبوعين ويبدن
نهى;بلا صماطة شنو بتخربي علينا
نزمين بنقرا ولا تبوني نسقط
نبيل:عساس قرايتك مقطعه بعضها
سالمة:والله يانرمين غادي جو سمح حتنسجمي وقرايتك حتقري ومش حنطولو
نسمة:نرمين والله خاطرنا كلنا فيها وافقي
نرمين سكتت اشوية وحست انه كلهم يبوها وافقت وخلاص
بات نبيل رن علي بات سالمة وقاله انهم بيمشو معاهم وصهيب سمعها وطار من الفرحة وقعدو الكل ايجهزو المشية بكرا
"
وجا ثاني يوم بعد مااهل سالمة جهزو كل حاجة يستحقوها لان هما اللي كانو عازمينهم وطبعا صهيب اكثر حد تعب لان هو اللي كاين يبي المشية من كل قلبه
وجا وقت اللي بيمشو كانت ام سالمة ودودي في سيارة بات سالمة وصهيب خذا امعاه امال وعصومي ولدها لان راجلها امس سافر مع باته التونس علاج وخوات نبيل وامه في سيارة بات نبيل اما سالمة طبعا كانت راكبة مع نبيل وكانو الكل فرحانين بالمشية
وصلو للمصيف وطبعا الشاليه كان كبير وحلو وكان فيه مسافة بين البحر والشاليه امتاعهم
وصلو قصاد الساعة 1الظهر نظمو دبشهم ورتبو الشاليه اشوي وبعدين جهزو غدا خفيف وتغدو وبعد الغدا اللي خذا قيلوله واللي رقد البنات مشن للبحر وقعدن يلعبن بالمية ومنسجمات بس ماعامنش اشوي ولحقهن نبيل وهدرز امعاهن وبعدها
نبيل:تعالي سومة نبيك
سالمة:حاظر
وعدى هو وسالمة وقعدو يتمشو عالشط وايهدرزو
نبيل:تعرفي سومة ديما نحلم بحاجة وحدة وكان اتسير معش نبي شيء من الدنيا
سالمة:شنو
نبيل:ديما نحلم ان انا وانتي انتمشو علي شط البحر وايدينا في ايدين بعضنا
سالمة:هذا بس حلمك
نبيل:والله هذا بس ديما اللقطة هذي بين عيوني ومرة حلمت بيها وانا راقد
سالمة:للدرجة هذي
نبيل:واكثر اخرى
سالمة حطت يدها في يد نبيل نبيل شافلها وقعد مصدوم
سالمة ابتسمت:بنحققلك حلمك
نبيل ابتسم:والله انحبك
سالمة طبست راسها
نبيل:نجيلي الخجول يارب
وقعدو يتمشو وايهدرزو وجوهم سمح بكل
""
البنات ايشوفن فيهم من بعيد
نهى:لايقين علي بعضهم صح
امال:اها مشاءلله ربي ايهنيهم
وطبعا صهيب مقمعز عالشط وطول الوقت عيونه علي نرمين اللي ماجتش شور البحر لانها تعرفش اتعوم بكل وكل مااتشوف النبيل ايبحت فيها تلوي بوزها واتشقلب عيونها وتقعد اتنفخ وصهيب كل مااتجي عينه في عينها يبتسملها وهي تلوي بوزها عليه
البنات خشن ايعومن الا نرمين
صهيب من بعيد:اتجي اتعومي نرمين
نرمين:لا واصلا ماانعومش مع واحد زيك
البنات فنصن من جلاطتها
نهى:اصلا نرمين ماتعرف اتعوم واتخاف من البحر
صهيب:معقولة
نرمين:لا نعرف لكن مانبيش انعوم بعد تمشي حظرتك من هنا انعوم وعدت وسيبتهم
امال:كنكم شن بينكم صهيب عليش كارهتك
صهيب;والله مادرتلها حاجة
نهى:هذي هدا حالها عشان صهيب تعارك معاها في القاعة في الفرح مازال مانستها حتي نحنا واحلين في السانها
امال تضحك:ربي ايعينكم علي جلاطتها
صهيب:بس عاجبتني جلاطتها فيها حو بعد اتعقدها
نهى:حتى نبيل ايحب ايعقدها ايقول فيها جو
وكملو الوقت يحكو علي نرمين والسانها
"
اشوي وجت العشية وقمعزو كلهم برا يشربو في القهوة وايعصرو وصهيب عيونه علي نرمين ونرمين مش عاجبها الوضع واتشقلب في عيونها عليه ونبيل قاعد حنب سالمة وايهدرزو والباين ان الجو قربهم من بعضهم أكثر
نرمين;نهى مديلي كاس المية
نهى:كامل صبي جيبي من جوا
نرمين:اوف عليا وخذت الكاس وصبت بتجيب مية وهنا صهيب استغل الفرصة ولحقها من غير ماحد يفطنله
هو خش للمطبخ وهيا تبي تطلع من الباب صبالها قدام الباب وقعد اتجي ايمن بتطلع ايجي ايمين اتجي ايسار ايجي ايسار
نرمين:تقدر اتحول من طريقي
صهيب:انلا
نرمين:تحكي من جدك انت
صهيب:اها
نرمين:توا انعيط وايخشو كلهم عليك
صهيب:اول شي مش حيسمعك حد وحتى لو سمعوك بنقوللهم انحبها
نرمين:حبك برص شكلك مافهمتش اللي قلته لكي في المول
صهيب:بجد انك مش معجبة بيا
نرمين:قتلك لا
صهيب:وعليش بجد راك عاجبتيني وحبيتك يابنت الناس لو توا اتقولي معجبة بيك بنطلع توا ونخطبك منهم
نرمين تضحك:انا ننخطبلك انت 😂
صهيب;وكني انا
نرمين:ماكنك شي بس
صهيب:بس شنو
نرمين:انا مرتبطة وانحب واحد ثاني
صهيب بصدمة:انتي شن تحكي
نرمين:اللي سمعته ودفاته وطلعت وسيباته
صهيب حس وكانه ضرباته بموس في قلبه ومعش قدر يطلع
اما هيا طلعت حامقة وجت بتمشي للبحر
ام نبيل:وين ماشية
نرمين:بنمشي للبحر
ام نبيل:من امتى اتحبيه
نرمين:بنقمعز عليه اشوي مليت هنا وعدت شور الشط وطول الطريق اللي تمشي فيها وهيا تبكي وماعرفت السبب بس كانت واجعتها انها كذبت عليه انها مرتبطة وماعرفتش ليش دارت هكي وجت قمعزت عالشط وبعدين اذكرت ضحكهم عليها امبدري وهما ايقولو ماتعرف اتعوم فقررت اتخش البحر واتعوم
""
صهيب طلع من جوا وقلبه واجعه من كلمة نرمين ومشى شور الشط وقمعز بس كان بعيد اشوية وقعد ماسك حيط ويعزق فيه في البحر وفي لحظة انتبه الحد بعيد وكانه غارق ولما صبى وركز حسها نرمين دغري سلح ماليته (وطبعا صهيب كان ايتمرن في صاله فكان جسمه عضلات وايهبل)ونزل دغري للبحر وخشلها جوا والباين لانها ماتعرف اتعوم فخذها البحر بسرعه طلعها وهو شايلها بين ايديه ولما حطها عالشط كانت فاقدة الوعي ومااتنفسش حاول فيها وبعدها معش قعد قدامه حل الا ان ايديرلها تنفس صناعي طبس عليها وحط شفايفة علي شفايفها وقعد ينفخلها نرمين وعيت وفطنتله دفاته وقعدت اتكح بعد ردت شرقتها
نرمين:شنو القرف اللي كنت ادير فيه ولا استغليت اني فقدت الوعي
صهيب:انتي شن تحكي كنتي حتموتي درتلك تنفس صناعي
نرمين:ياريت لو خليتني انموت ولا لمستني يامقرف
صهيب غمتله وصبى
نرمين:واصلا عليش لاحقني هنا افهم انك مش عاجبني واني انحب واحد ثاني خلي عندك اشوي كرامة
صهيب هزاته الكلمة وحمق بكل:اسمعي اول شي ماكنت نحسابك هنا لو عارفك هنا ماجيتش بكل وبعدين انتي من اللحظة هذي معش اتهميني ممكن عجبتيني بس طلعت غالط طبعك والسانك ايخلي اي حد ايبعد منك وانا كرامتي عندي فوق كل شي والف بنت غيرك تتمناني واي كلام قلته لكي من قبل انسيه لان بجد معش فيه منه شي وعدى وسيبها
نرمين وجعها الكلام وحست بروحها زودتها عليه وكثرت لان كان عاجبها فكرت ان يقعد يلحقها وهي اتصده وحست بأنها حقيرة في تصرفاتها امعاه وان هو مادار شي غلط ولا غلط فيها فقعدت تبكي
صهيب رد للشاليه وقعد باله مع نرمين وخاف اتخش للبحر مرة ثانية لكن بعدها قال شن دخلني هيا حرة وحاول يتجاهل موضوعها
وبعد اشوي ردت نرمين للشاليه وكانو ايوتو بيبدو يشوو وصهيب اول ماحقها قلب وجه وخش جوا اضايقت من تصرفه وخشت غيرت دبشها وطلعت وولا واحد فيهم حكى علي قصت الغرقه بعد اشوي نبيل خش كلم صهيب وجا قمعز امعاهم لكن طول الوقت ايهدرز مع البنات كلهم وايشفط ويضحك الا هيا ولا عاد بحت فيها زي امبدري ولا دورها وحتى لما اتجي عينه في عينها بالغلط يقلب وجه فيها
وقمعزو كلهم بعد العشا وايهدرزو ويضحكو ومنسجمين
نبيل:خاطري في بسبوسه من اتصبي اديرلنا بسبوسه وقهيوة (طبعا نبيل كانت عشقه البسبوسه)
ام سالمة:قول المراتك اديرلك شن ذنبهن لخرات (وطبعا امها تحرج فيها لانها ديما تبيها اتعلم وسالمة اتساعد فيهم بس ماعمرش وافقت انها ادير حاجة بروحها)
سالمة:اه توا ضروري
نبيل بينه وبين سالمة;انتي ماتعرفيش
سالمة:بصدق اها
نبيل:خلاص توا انقوللهم معش نبي
وطبعا كلهم فطنولهم وهما يحكو وركزو عليهم
نبيل ايحكرك في يده علي راسه;
وطبعا كلهم فطنولهم وهما يحكو وركزو عليهم
نبيل ايحكرك في يده علي راسه;انقوللكم حاجة معش خاطري فيها
ام نبيل:شكلها قالتلك مانعرفش
ام سالمة تضحك:لنقنها ماتعرف
نبيل:لا تعرف لكن انا معش خاطري فيها
سالمة ساكته وماتكلمتش
نرمين:اه ياكبدي انا خلاني انتعلمها بالغصب عشان لما يقعدن البنات مرقدات في الليل وانا ساهرة انديرها له
نهى;وانا ان شاءلله يقعد عندي شني يفرض عليا انديرها
نسمة:هذي الكبيدة مايبيش ايتعبها
بات نبيل:خلوهم عنكم كنكم امعاهم هما متفاهمين
ام سالمة:لا عاد حرام الواسطات
سالمة اتبحت في امها زين تبيها تسكت
ام نبيل:لا كنتي تعرف توا اتحقوها وهيا توا دايرتها لنا
نبيل:عليش بديرها وراجلها مايبي
صهيب:لنقني انا خاطري فيها
امال:حتى انا خاطري انذوقها من دياتك ياسومة
سالمة قعدت اتشوف النبيل ومعش عرفت شن ادير بعد ما الكل جو عليها ويبوها اديرها توا
نبيل بينه وبين سالمة;صبي وانا انساعدك فيها
سالمة:تعرف انت
نبيل:غير صبي وماعليك وقوليلهم باهي بثقة
سالمة:باهي
سالمة صبت;خلاص توا انديرها لكم وخشت
نبيل صبى وراها
صهيب;انت وين ماشي خليك هنا
نبيل:نبي انساعدها حرام ليل وعشان اتكملها بسرعه وماحدش ايجي ورانا نين تكمل وخش جوا
وقعدو كلهم يضحكو عليهم
""
سالمة:هيا قولي شن اندير
نبيل;وانا شن عرفني
سالمة:ماقتلي خشي وما عليك
نبيل:مانبيهمش يضحكو عليك
سالمة بدت تبي تبكي:اووف اصلا كله منك
نبيل:خلاص سومتي والله مش خاطرة عليا ايدبسوك فيها انتي
سالمة:وكيف انديرو توا
نبيل: شن رايك ناخدو الطريقة من النت
سالمة:فكرة هيا
وطلع نبيل فونه وفتح نت وطلعوله الطريقة وبدو ايطبقو فيها مع بعضهم خلطوها ووحطو العسل عالنار وحطو البسبوسه في الكوشة
سالمة متوترة:زعما اتجي سمحة
نبيل:ان شاءلله
سالمة:حي كان قعدت شينة يقعدو يضحكو عليا
نبيل:بالنسبة ليا حتى لو طلعت شينة بناكلها كلها مش ايكفي دايرتها انتي
سالمة ضحكت:صامط 😂 بس ان شاءلله تطلع سمحة
طابت وحطو عليها العسل وزينوها بجوز هند وتت سالمة القهوة وحطتهن في سفرة وفتلكت السفرة وطلعو بيها
نبيل:البسبوسة وتت
ومدتلهم كلهم وجت قمعزت جنب نبيل
سالمة:هاقولي سمحة ولا لا
نبيل ياكل:اتهبل بكل زيك
صهيب:شكلها هكي سمح امدرعن طعمتها
نبيل:تي صقع بكل
وبدو ياكلو ومن حسن حظها طلعت سمحة وكلهم عجبتهم
نبيل: سلم دياتك سومة هذي اصقع بسبوسه ناكلها
نهى:باهي يانبيل
نبيل:عاد يكفي دارتها عشاني
امال:دارتها عشانك وهي ماتعرفش اخرى
نبيل:من قال ماتعرف مش دارتها لكم خلاص
ام نبيل:لا دارتها لنا وسلمها والله دوارة سمحة اتهبل
نبيل:حتى هيا سومة دايرتها
ام سالمة:هذي شاكة فيها ماضنيش دايرتها سومة
سالمة:والله انا ياماما درتها كنك😔
نبيل:والله هيا دارتها ياعمتي انا مانعرف فيها شي
نسمة:صح نبيل والله ماهو عارف حتى مكوناتها
ام سالمة:مشاءلله باهي طلعتي تعرفي توا
بات سالمة:خلاص اهي دارتها لكم عليك قصة كلا انتو دارتها ولا لا قارضينها في كل الحالات
سالمة:شفت يابابا
بات سالمة:شفتهم يابابا مااتعدلي علي حد عارف ان بنيتي شاطرة
بات نبيل:حتى انا عارفها كنتي شاطرة سلم ايدياتك ياسومة
سالمة:سلمك عمو
وقعدو اتهدريز ووجو ضحك وكل مرة مستلمين حد وطبعا طول الوقت هدا وصهيب يستكرد في نرمين وماعدلش عليها بكل ونرمين قهرنها تصرفاته واندمت علي دراته له
وبعدها جا وقت النوم وخشو الكل رقدو البنات في دار بروحهن والرجالة في المربوعه برا وام سالمة وام نبيل مايبنش اتهدريز البنات لانهن عارفاتهن بيخرفن لعند الصبح فرقدن في دار ابروحهن
عالفجر البنات مازال ساهرات نبيل رن علي فون
سالمة
سالمة ردت:الو نبيل
نبيل:مازلتي واعية
سالمة::اها
نبيل:باهي قاعد برا اتجي انهدرزو
سالمة:باهي وطلعتله
نبيل خذاها وقعدو يتمشو برا
سالمة:عليش مازلت ساهر لعند توا
نبيل:بصدق تعودت عليك امعايا ماجاني نوم
سالمة:ياساتر ومن قبل كيف كنت ترقد
نبيل:توا الوضع يفرق عن زمان توا تعودت علي وجودك جنبي
سالمة ابتسمت وقعدو ايهدرزو حوالي ساعة وبعدها خشو وكل واحد رقد في مكانه
"""
ثاني يوم الصبح الكل يفطرو برا وايهدرزو واجواء الضحك مغلبة عالوضع والمشاغبات وعمكم صهيب مازال يستكرد في نرمين
وبينما وهما ايهدرزو ومنسجمين رن فون بات نبيل
بات نبيل رد: صباح الخير انتصار
نرمين ونسمه ونهى فرحن:اعميمة
بات نبيل:صح اتأنسي واتشرفي جايك توا وسكر
بات نبيل:لنقنه الجو سمح هنا لكن اسمحلنا ياحاج لازم انروحو توا
بات سالمة:شن فيه خير انشاءلله
بات نبيل:هدي اختي انتصار اللي عايشة في امريكا قالتلي انها في المطار وصلت توا ولازم نمشو للحوش عيب جايتنا عاد
البنات فرحن بجيتها واجد
بات سالمة:خلاص خلوها اتجي هنا واهو منها اتشوف بحر بلادها الها زمان عليه
ام نبيل:صح انتصار غالي عليها الجو هذا واكيد مرايفة عليه ومنها بناتها ينسجمن مشن من هنا اصغار اكيد مش متذكراته الجو هنا
ام سالمة:والله ماتحرمونا من هالجمعه الحلوة رن عليها وقوللها اتجيبها هنا وتوا تلحقو عالحوش
بات نبيل:انرن انشوفها قبل
ورن عليها ووافقت ومشى ايجيب فيها
والكل قعدو يستنو فيها اتجي
#يتبع
زعما شن حيصير من تطورات وهل في حاجة حتصير من جيت عمتهم هذي او حتكون زيارة عادية كله حنعرفوه في حلقة بكرا 😊
اسفة لو فيه اخطاء في الأسماء وأكيد رأيكم ايهمني 😉
گـتـابـتـي Koka Saleh 😊
منقولة💖
