#نـصـيـبـي_فـيـك
الـحـلـقـة الـسـابـعـة عـشـر
طلعت نرمين من القاعة بتركب مع صهيب عساس حتى خواتها ركبن ولما جت للسيارة وفتحت الباب لقتها فاضية صهيب كان مصبي قدام السيارة ولما شافها جا جيهتها
صهيب:على فكرة هدي سيارة الحقير😒
نرمين بحتت فيه بنص عين وسكرت باب السيارة بالقوة وبتمشي وبتسيبه مع جيت خواتها
بسمة:وين ماشية اهو جينا
نرمين:نبيش نركب هنا بنمشي نركب مع سند
نهى:سند طلع بعد قتله ان مش ماشيين امعاه وجتها قربت منها وعلى فكرة معش فيه سيارة الا سيارة بابا ومليانة وسيارة صهيب بس وركبت في السيارة
نرمين معش عندها حل الا انها تركب مع صهيب وفتحت الباب اللي وراه وبتركب صهيب بينه وبينها
صهيب:معش اتسكري الباب بالقوة زي توا فهمتي 😒
نرمين ركبت وعناد في صهيب سكرت الباب بالقوة
نهى فنصت فيها:عيب هكي انتي انهبلتي
نرمين مابتش اترد وقلبت وجها في الروشن وهيا لاوية بوزها وطلعو بالسيارة
نهى وهما في الطريق:سومة ديما تحكيلي عليك وعلي جوكم مع بعضكم اكيدة بتكسد بلاها
صهيب:قالك توا مش عارف كيف بنروح للحوش ومانلقاها
نرمين تحكي النهى:افتكت منه حتى اسلوب ماعنده
نهى انصدمت:تحشمي مرض
صهيب سمعها:عندي اسلوب مع الناس اللي تستاهل لكن فيه ناس يبوش اسلوب ولا لا يانهى
نهى بحتت في نرمين:فعلا والله صدقت
نرمين حمقت منهم هما الاثنين نزلت وشاحها ولفت شعرها اللي كان نازل وماكانت فاطنة ان صهيب ايشوف فيها في المرايا صهيب اول ماشاف شعرها اذكر البنت اللي شافها وقال في عقله ان هي بس كان مش متأكد وكملو طريقهم شور الفيلا وصهيب كان حاير
""
نبيل خش هو وسالمة وقعد ايفرج فيها عالجناح امتاعهم وكان نظام حوش بروحهم (وكان عبارة عن غرقة نوم وصالة صغيرة وحمام ومطبخ صغير لكن كانن ديكوراته حلوات وسالمة عجبها بكل)خشو الدار النوم وكان هيا اخر حاجة بوريها الها
نبيل:وهدي اخر حاجة دار النوم
سالمة:اها حلوة بكل وحست بالدنيا لفت بيها قمعزت عالسرير
نبيل مافطنش السالمة سلح جاكته وحطها عالكنبة وجا قمعز جنب سالمة
نبيل:سومة كنك متحشمة خودي راحتك هذا حوشك
سالمة زاد لف راسها وقلبها قعد ايدق بسرعه وطاحت عالسرير
نبيل بخوف:سومة كنك وقعد ايحاول ايوعيها وجاب عطر وشممه الها وماوعتش زادت النار في قلبه وقعد بيشيلها للمستشفى وفطن ان هيا مازال بالفيلو حار اشوية كيف يتصرف وبعدين قرر ايحوله الها هو جاب دبش من الدولاب تاعها وحوللها طرحتها والكندرة وبدا ايحوللها في الفيلو وهو قلبه بيوقف خوف عليها
""
في السيارة صهيب خش بسارته لعند جوا عشان البنات ينزلن دغري وكل تفكير صهيب كان في نرمين ان هيا البنت اللي شافها او لا نزلن نسمة ونهى ونرمين نزلت اخر وحدة لانها كانت لابسة كعب عالي وهيا مااتحبش فسلحت كندرتها ومسكتها في يدها ونزلت
صهيب:معليش ممكن نسالك سؤال
نرمين بلوية بوز:نحكيش مع ناس قليلة اسلوب زيك ومشت وسيباته
صهيب حمق منها جا وراها وحط يده علي فمها وشالها وجا بيها من جنب الفيلا ونزلها صهيب ماسكها من الخلف وحاط يده علي فمها وماسك ايديها ويحكيلها وهو قريب من وذنها
صهيب:اسمعي بنسألك سؤال واحد وياريت بلا طول السان واتجاوبي عليه
نرمين كان خايفة وترعش من صهيب
صهيب:انتي هيا نفسها البنت اللي شفتها من الخلف في بيان سالمة وكانت لابسة فستان وردي وطالقة شعرها وكان طويل صح وحول يده من علي فمها وطلقها يبيها اتجاوبه
نرمين لفت عليه وضرباته كف:فعلا انك انسان حقير ومش مجاوبتك وعدت تجري وسيباته صهيب حاط يده علي خده ومصدوم من تصرفها
""
نبيل لبس سالمة دبش ولبسها عبايتها ووشاحها وشالها بين ايديه ونزل يجري بيها والكل لما شافو نبيل انفجتو وطلعو في جرته صهيب في سيارته وبيطلع واول ماشاف نبيل نزل يجري
صهيب;تي كنها هدي
نبيل:مش عارفه طاحت توا وبنشيلها للمستشفى
صهيب فتح سيارته وركبوها ومشو امعاها نبيل وصهيب وصهيب طاير اطيارة بالسيارة ومشو شور المستشفى ووصلو ونبيل شالها ونزل بيها بسرعه جوا وخدوها منه وقعد هو وصهيب يرجو وقلوبهم نار عليها اشوي وطلع الدكتور جوه يجرو
نبيل:ها يادكتور كنها
الدكتور:بسيطة اشوي توتر وضغطها هبط بسببه
صهيب:يعني شن حالتها توا
الدكتور:اكويسة وعيت وركبنالها تغذية بعد التغذية تقدرو اتروحو بيها
نبيل:شكرا دكتور نقدرو انخشولها توا
الدكتور:اها تقدرو وعدى
رن نبيل علي هله وطمنهم وخشو نبيل وصهيب عليها وسالمة كان باين عليها التعب اشوي وكملت التغذية وروحو بيها ووصلو للفيلا نبيل نزلها وهو ماسك يدها وايسند فيها وصهيب طلع بسيارته بيجيب الدوا اللي قال عليه الدكتور
نبيل سندها لعند لما وصلها الدارها وامتدت عالسرير وبعد اشوي خشو عليها هل نبيل كلهم بيطمنو عليها
نهى:سلامتك سومة كنك شن صارلك
سالمة:مش عارفه فجاة معش فطنت الشي
ام نبيل;يانا عليا يابنتي لما نزل بيك نبيل وشايلك خفت ومعش عرفت شن صارلك
سالمة:معليش خوفتكم
بات نبيل:المهم توا حاسة روحك اكويسة يابنتي
سالمة:الحمدلله اكويسة
رن فون نبيل وكان صهيب
نبيل:ايوا صهيب
صهيب:جبت الدوا لكن لو تاخذلي طريق بنشوف سومة اشوي
نبيل:لا ارقى مافيش حد قدامك وسكر
نبيل:بنات صهيب بيجي هنا ايشوف سالمة
طبعا البنات من خوفهن علي سالمة مازال بعبياتهن وقعدن يرجن فيها اتجي صهيب خش عليهم ودق
صهيب:السلام عليكم
الكل:وعليكم السلام
نرمين شافت صهيب ولوت بوزها
نبيل:خش تفضل صهيب
نبيل كان امقمعز عالسرير جنب سالمة ولما خش صهيب صبى وخلاه ايجي مكانه
صهيب خش وجا قمعز جنب سومة وحط الدوا عالكوميدينا
صهيب:ها سومة اكويسة توا
سالمة:اها اكويسة
صهيب:حتى لما قلت افتكيت منك ومن شحورتك ليا ماصار شي مصرة اتعبيني امعاك
سالمة بزعل:حرام عليك صهيب والله مرضت
صهيب:المهم توا مااتحسيش في شي
سالمة:لا لا اكويسة مكان التغذية بس تورم
صهيب:ساهلة اكيدة اللي ركبتها لكي يدها واعره
سالمة:شكلها
صهيب صبى:خلاص انا بنمشي توا
سالمة مسكت يده:باهي خليك امعايا
صهيب يضحك:وين نقعد يامهبوله
سالمة:معناها مااتقولش اللي صار البابا وماما ماتفجعهمش في الليل
صهيب باس جبينها:حاظر وطلع
نرمين كانت اتشوفله من تحت واذكرت خوف صهيب علي سالمة اول ما طلعها نبيل وشافت حنيته عليها توا حست بإحساس غريب اول مرة اتحسه وبعدين اذكرت اللي داره امعاها تجاهلت احساسها وقالت ان واحد حقير وطلعت
اشوي وطلعو كلهم وقعدو نبيل وسالمة بروحهم نبيل جا قمعز جنب سالمة وسالمة كانت متحشمة من نبيل لان فهمت من كلام هله ان هو اللي غيرلها الفيلو
نبيل:سومة انتي اكويسة توا
سالمة ومنزله وجها وخدودها حمر من الخجل:اها
نبيل رفع وجها بأطراف اصابعه:كنك تبيش اتبحتي فيا
سالمة حطت يدها علي وجها:مش قادرة نرفع وجي فيك
نبيل:وعليش
سالمة:عشان وبحتت في الفيلو اللي كان عالكنبة
نبيل فهمها:اها اوكي بس حاب انقولك شي راه والله عقلي ماكان امعايا بكل وكنت خايف عليك والله ماانتبهت الشي
سالمة حست بالراحة من كلامه بس مازال خايفة من اللي يبي ايصير
نبيل حس بيها ووشاف كيف كانو ايديها يرعشو:سومة انا عارف ان اليوم انتي تاعبة مااتفكريش في شي ايخليك اتوتري وتوا ارقدي عشان اتريحي
سالمة حست براحة غريبة:شكرا نبيل
نبيل:عليش تشكري فيا مادرت شي خلاص عاد ساد دوة وتعب باين عليك ناعسة هيا ارقدي
سالمة سقمت رقدتها ونبيل مازال ببدلته خدا ادبشه من الدولاب وخش دار دوش وطلع لابس بيجامة وواينشف في شعره خش للدار وكانت سالمة راقدة في نوم عميق جا جنب السرير ونزل علي ركبيه وقعد ايشوفلها ومبتسم وبعدين طبع بوسه خفيفة علي جبينها وصبي وتمدد عالسرير جنبها وهو الفرحة مالية قلبه ان حبيته واخيرا راقده جنبه زي ماكان يحلم
""
صهيب بعد مابرم علي واحد صاحبه روح للحوش ولما خش جاته دودي تجري
دودي:ثهيب انت جيت
صهيب:اها جيت بس انتي شن موعيك لعند توا
دودي;وين ثلومي نرجا فيها انا
صهيب;سلومي في حوشها
دودي:قصدك خلاث معش بتجي هنا
صهيب:اها خلاص
دودي تبكي:بس انا نبي ثلومي توا
صهيب خذاها في كتره:دودي توا سومة عنديش كيف انجيبها لكي خلاص لازم اتعودي انتي كبيرة توا
دودي تبكي;لالا دخلنيش نبيها توا
مع جيت امال :صهيب احكي معاها سكنتلي من بدري وهيا ترجي فيك تحساب سومة تبي اتجي امعاك
صهيب:لا دودي شطورة وانا فهمتها وتوا تمشي ترقد مع عصومي صح دودي
دودي:لالا نبيش
صهيب:باهي نتفقو اتفاق تمشي توا ترقدي وبكرا من الصبح انشيلك السومة
امال:انت شن اتقول ياك الا اتشيلها السومة هدي تسكنلك راه
دودي تبكي:تكذب عليا صح
صهيب:لا يادودي والله بكرا انشيلك السومة وبعد نطلعو من س
صهيب:لا يادودي والله بكرا انشيلك السومة وبعد نطلعو من سومة انشيلك انتي وعصومي للملاهي
دودي:وعد
صهيب:وعد دودي
دودي بفرحة: اييي وباست صهيب وخشت تجري
صهيب يضحك;نادرة البنت هذي
امال:ليش توعد فيها بالكذب بكرا من الصبح اتوعيك واديرلك قصة
صهيب;تي عارفها من جدك نقدر نكذب عليها بكرا بنشيلكم السومة
امال:ياك الا سومة شن تبو فيها من الصبح
صهيب:نحكيلك لكن بشرط ماتحكيش لا الباتي لا الامي
امال بخوف:شن صار كنها سومة
صهيب:سومة وحكالها اللي صار
امال:حي عليا نبي نمشيلها توا
صهيب;شن نمشو توا بحتي الساعة كم بكرا في الصبح انشيلكم واهو قتلك ماتحكيش الباتي وامي بكرا في الصبح انقولها الهم انا
امال:معناها نمشي انرن عليها
صهيب:قتلك والله اكويسة والدكتور قال ضغطها هابط مافيش داعي اترني اكيد راقدة توا
امال:شن يبي ايجيب الصبح توا بس
صهيب:غير عدي تريحي وارقدي وبكرا من الصبح نمشولها
امال:باهي تصبح علي خير
صهيب:وانتي بخير
""""
جا صباح ثاني يوم نبيل في سريره وايشوف السالمة وهي راقدة ومبتسم وبعدين صبى ومشى للمطبخ وجهزلها فطور حلو وزين الصفرة بورد وجاب الصفرة وحطها عالطاوله
نبيل جا جيهة سالمة:سومة سومة
سالمة فتحت عيونها وشافت نبيل نطت
نبيل:بسم الله كنك
سالمة:اه لا شي مازال مش متعودة بس
نبيل يضحك:باهي صباح الخير
سالمة:صباح النور
نبيل جاب الصفرة عالسرير:هيا عشان نفطرو
سالمة:انت وتيت الفطور
نبيل;اها انا شاطر راه نعجبك
سالمة: شكرا
وبدو يفطرو نبيل طول الوقت عيونه ماحولهم من علي سالمة وسالمة كانت منحرجة منه كملو فطور ونبيل شال الصفرة للمطبخ ورد للدار وسومة كانت في الحمام تاخد في دوش ولما طلعت كان نبيل لام السرير ومقمعز عالكنبة طلعت سومة كانت لابسة بيجامة عادية لانها كانت حاسة بتعب وماتبيش تنزل وكانت ماسكة المنشف وتمسح في شعرها نبيل اول ماشافها بياالبيجامة وشعرها مبلول ابتسملها وماشال اعيونه من عليها سالمة صبت قدام المرايا ومسكت المشط وبدت اتمشط في شعرها نبيل جا جيهتها وهيا شافاته في المرايا قعد قلبها ايدق بسرعه
نبيل:انمشطلك شعرك
سالمة بخوف:براحتك
خدا منها المشط وبدا ايمشط فيه الها وسالمة حست بالدنيا ضاقت عليها ومعش عرفت شن ادير نبيل كمل مشط ولفها شوره
نبيل;تعرفي انك اتهبلي وشعرك مبلول
سالمة تبلع في ريقها:اها
نبيل ذوبه خوف سالمة وقعد ايشوف لعيونها وبعدين وجه نظراته الشفايفها وبدا ايقرب منها سالمة انفاسها زادو ونبضات قلبها زادو وفجاة رن فون سالمة وهي ما صدقت فرصة وجت نقضتها ووسيباته ومشت تجري الفونها ولقتها امها وردت عليها امها كانت قالقة علي سالمة وكلمتها وهي تبكي سالمة طمنتها وامها قالتها ان اشوي وبتجيها هي وامال ودودي
"""
سالمة غيرت دبشها ونزلت تحت وبعد اشوي جوها هلها وامها كانت تبكي اول شي واجعها فراق بنتها وثاني شي علي انها مرضت وهي مش جنبها ورقن امعاها فوق وشافن جناحها وخرفن امعاها اشوي وبعدين روحن وسالمة ياما بكت لما جن بيروحن وبعدها اسكتت و قعدت مع البنات اشوي وبعدين رقت فوق اشوي وجاها نبيل وخش لقاها تتفرج عالتلفزيون
قمعز جنبها
نبيل:شن جوك توا
سالمة:اكويسة
نبيل:قالتلي نهى ياما بكيتي بعد جت امك بتروح
سالمة:اه لا مش بكيت
نبيل:امالا شنو
سالمة:لا شي
نبيل:غير احكي مش حنقول حركات اعويله اصغار
سالمة:طبست راسها
نبيل يضحك:باهي المهم انتي مااتحسيش في شي توا
سالمة:لالا اكويسة
نبيل:يعني تقدري عالطيارة صح
سالمة بإستغراب:عليش
نبيل:كيف عليش مش نحنا عرسان والمفروض نمشو شهر عسل
سالمة:اها
نبيل:خلاص معناها انا من قبل الفرح حاجز في رحله التركيا واليوم بعد المغرب موعد السفر كان انتي اكويسة نمشو وكان حاسة روحك تعبانة اناجلوها يومين
سالمة:لا انا اكويسة بس كم بنقعدو غادي
نبيل:والله انا انقول شهر
سالمة;شهر لا شهر واجد نقدرش نقعد الفترة هذي كلها بعيد علي هلي
نبيل:ماشي علي راحتك انقولو اسبوعين وكان عجبنا الجو انزيدو
سالمة بعد تفكير:باهي تمام
نبيل:معناها هيا انوتو دبشنا عشان انلحقو موعد الطيارة
سالمة تمام
وصبو ايوتو في دبشهم وهما ايحطو في الدبش في الشناطي فجاة رن فون نبيل
#يتبع
زعما من اللي رن وهل حيصير من السفرة ولا لا انتظروني الحلقة الجاية وحنعرفو مع بعضنا 😊
واسفة لو فيه اخطاء في الأسماء وأكيد رأيكم ايهمني😉
گـتـابـتـي Koka Saleh😊
منقولة💖
