#نـصـيـبـي_فـيـك
الـحـلـقـة الـخـامـسـة عـشـر
نبيل وادموعه ينزلو:تزوجيني
سالمة انصدمت ومعش عرفت مااترد
نبيل:سالمة انتي امعايا
سالمة:اها امعاك
نبيل:عارف انك انصدمتي من طلبي وان مش وقته توا وان قلبك مازال مجروح وان مافيش اي شعور منك تجاهي بس صدقيني نقدر انداويلك جرحك ونقدر انخليك اتحبيني وتنسي وليد بكل بس انتي عطيني فرصة وحدة سالمة تبكي:نبيل انا عارفه انك شخص كل وحدة تتمناه بس طلبك صدمني ونقدرش انرد عليك توا
نبيل:عارفه بس مش حتعيشي علي ذكراه العمر كله اكيد حتنسيه وانا مش طالب منك اتردي عليا توا خودي وقتك وانا نرجى في ردك امتى مااايكون جاهز بس نبي الفرصة اتكون ليا ضعتي من يدي مرة مانبيش اتضيعي مني مرة ثانية واتكوني الغيري يعني لو فكرتي اتحبي من جديد وتفتحي قلبك لو سمحتي تعطيني انا الفرصة هذي
سالمة:حاظر اكيد مستحيل نلقى في يوم شخص احسن منك
نبيل:ومش حتلقي شخص ايحبك زيي
سالمة:عارفه الشي هدا بس لوسمحت توا بنسكر حابه نقعد بروحي اشوي
نبيل;تمام خودي راحتك وفي اي وقت احتجتيلي رني عليا
سالمة:حاظر وسكرت وقعدت اتفكر في طلب نبيل بس ماقدرت تتخيل روحها زوجته او امعاه الفكرة كانت صعبة بالنسبة الها
""""
هيثم خذا الفون من يد مرام
هيثم:الو من انت
حسام:انا حسام ولد عمك
هيثم:هذا انت ادير هكي في اختي والله انوريك
حسام:هيثم اهدى اشوية اختك رايدها في الحلال
هيثم:واللي رايد وحدة في الحلال ايجي من الباب مش يحكي من ورا هلها
حسام:امعاك حق والله بنجيكم بكرا بس انت سبقت
هيثم:تحسابوني راقد علي ذاني تسغفلو فيا والله انوريكم
حسام:حشاك ياهيثم ولو عندك شي تعالي ديره فيا انا مرام ماالهش علاقة لو سمحت تعالي انا هنا وانتفاهمو ماتقربش مرام
هيثم:توا انوريك وسكر في وجه
هيثم مسك مرام من شعرها وضربها كف نين طاحت:مش هدا حده غير نقتلك حبيب قلبك ورادلك وطلع
ام مرام:كنك مع اختك
هيثم:بنتك المصون تستغفل فيا واتحب وتتمعشق
ام مرام:لا مستحيل مرام ادير هكي
هيثم:دارتها ونص وقعد يحكي الامها شن صار
""
حسام طلع من داره للمربوعه دغري بيحكي الباته
حسام:باتي في موضوع ضروري بنحكيه لكي
بات حسام:خير انشاءلله كنك
حسام:انا بنخطب
بات حسام بفرحة:مشاءلله هذي الساعة المباركة لكن من اللي غيرت رايك وخلاتك اتفكر تجوز
حسام:مرام بنت عمي
بات حسام زادت فرحته:يازين مااخترت اخلاق وادب
حسام:نبيكم توا تمشو تخطبوها
بات حسام:توا ليل بكرا انكلم اعمامك ونخطبوها من هيثم
حسام:لا ياباتي توا لان وحكاله القصة****
بات حسام:لالا ياحسام عيب اللي درته وانت تبي البنت ليش ماقلت نبيها ومشينا خطبناها لكي ليش ادير هكي في بنت عمك
حسام:والله ياباتي من قبل مانحكي امعاها قلتلها بنجي نخطبك هيا اصرت نين اتكمل امتحاناتها واليوم كملت امتحاناتها ورنيت عليها بنقوللها ان بكرا بنجي نخطبها لكن هيثم سبق قبل مانحكي
بات حسام:انا عارفك ياحسام ماادير الشينة توا انرن علي عمامك ونمشو شورهم قبل ماهيثم ايجي هنا بايخة نطلبها منه هنا
حسام:بسرعه ياباتي قبل ماايدير المرام شي انت عارفه
بات حسام:هيا هيا توا انرن عليهم
ورن علي خوته وقاللهم يطلعو توا وايتلاقو عند حوش هيثم وحسام اصر بيمشي مع باته بس باته رفض وقاله هكي اتكبر القصة وطلع بو حسام من حوشهم ومشى شور حوش هيثم
"""
سالمة في دارها اتفكر وراسها وجعها قررت اترن علي مرام رنت عليها ودارتلها مشغول وبعدين فون مرام انقفل
سالمة:هذي كنها دارتلي مشغول وقفلت فونها انشاءلله خير اكيد فونها طفا شحن
""'
هيثم في سيارته وهو اللي امعاه فون مرام قفله واعزقه في السيارة وولع السيارة بيطلع مابتش تولع نزل وقعد ايعاني فيها
درسو سيارات عمام هيثم الثلاثة مع بعضهن قدام حوش هيثم هيثم قعد ايسلم علي عمامه وخششهم للمربوعه
وجت ام مرام وسلمت عليهم وخشت اتوتيلهم في قهوة ومرام في دارها وتبكي ومنهارة
بات حسام:اكيد يااوليدي ياهيثم عارف عليش جاينك
هيثم:عارف ياعمي
بات حسام:اسمع ياهيثم انا جايك انا وعمامك وطالبين مرام الحسام
هيثم:بس ياعمي اللي داره حسام غلط ومااحترمنيش وكلم اختي من ورايا وكأنه مافيش راجل ورارها
عم هيثم لاخر:حشاك ياهيثم انت راجل وسيد الرجاه واللي داره حسام غلط كبير لكن حسام رايد اختك بالحلال وبيجي يخطبها استناها بس اتكمل امتحاناتها ومكالمته اليوم بيقوللها ان بكرا بيجو هله يخطبوها غير انت سبقت وانت عارف حسام اكويس علي صغر سنه ماعمره دار الشينه وبروحك اتقول طبع حسام نفسي ومحسوب انت اللي مربيه وفي الاول والاخر مرام بنت عمه يعني عرضه مستحيل يرضالها الشينة
بات حسام:مرام كيف بنت من بناتنا وانحبوها كلنا ومشاءلله عليها ادب واخلاق وانا اول ماحكالي حسام فرحت مستحيل ايجيب خير منها صح خوي سيبها وهي اصغيرة لكن انت قمت بالواجب وماقصرت امعاها بكل وانت ياهيثم كيف حسام مستحيل نرضى شي ايهنك وايهين كرامتك كرامتك من كرامتنا
هيثم:بس ياعمي
بات حسام:مافيش بس بكرا فاتحة مرام علي حسام ضنا عم ورايدين بعضهم ومش داعي المشكله تكبر
عمه لاخر:هيثم شكلك بتكسر كلمتنا
هيثم:لا والله ياعمامي مانكسر كلمتكم
بات حسام:عارفك ديما امعانا وفي صفنا وديما واخد مكان بوك
عمه لاخر:يعني موافق ياهيثم
هيثم:علي بركة الله في الاول والاخير حسام ولد عمها واولى بيها ونطمن علي اختي امعاه
بات حسام:انشاءلله مبروك علينا كلنا
وقعدو ايخرفو وايهدرزو
"""
صباح ثاني يوم سالمة فتحت عيونها وطلعت فطرت وبعدين ردت الدارها مسكت فونها وفي لحظة قررت تفتح نت اللي الها اسبوعين مافتحتش واول مافتحت جتها رسالة في المازنجر من وحدة تقرا امعاها في القسم اسمها #جود_موسى وكانت اتعز سالمة برغم انها تعرفهش واجد وكانت كاتبتلها(انتي بنوته طيبة مااتخليش اللي صار يكسرك برغم اني مانعرفكش واجد بس انعزك وانتي ماتستاهلي اللي صار وهو اللي خسر لان خسر وحدة زيك كملي حياتك لانها مش حتوقف عليه والف واحد يتمناك افتحي قلبك من جديد وحتلقي اللي قدره وياريت تسمعي المقطع اللي دزيته لكي لان حيخليك تفتحي عيونك علي حاجات واجدة واخر شي عيشي حياتك ياسومة واللي صار اعزقيه وراك {طبعا اللي ماشافت المقطع نزلته امس اتشوفه} )
سالمة فتحت عالمقطع وحست فعلا ان كل كلمة فيه تقصدها عاودت المقطع كم مرة وهيا حاسة بكل كلمة فيه في لحظة سالمة مسكت فونها ورنت علي نبيل
نبيل كان يفطر طلع من جنب هله ورد:صباح الخير سالمة
سالمة:صباح النور
نبيل:خير سالمة في حاجة صايرة امعاك
سالمة:انا موافقة علي طلبك
نبيل بفرحة:تحكي جد
سالمة;والله جد انا فكرت اكويس لعند امتي بنعيش عالذكريات
نبيل:وانا نوعدك انسيك كل شي عارف ان موافقتي مش لانك اتحبيني بس انا حنخليك اتحبيني
سالمة:اهم شي اتكون حاس بجرحي وماتطلبش مني دغري ننسى او تقعد تزعل وتقعد حياتنا مشاكل
نبيل:مستحيل اندير هكي خلاص اسمعي اليوم في العشية هلي ايجو يطلبوك رسمي
سالمة:لا مش بالسرعه هذي
نبيل:لا هكي احسن مااتغيري رايك
سالمة:مش مغيرة رايي وبعدين مش مجهزين شي
نبيل;مانبيكمش اتجهزو شي نحنا عيلة وحدة مش داعي للرسميات
سالمة:شن بنقول الماما
نبيل:انتي ماتحكي شي وكانك مش عارفه شي وامي حتكلم امك تم
سالمة نبيل حللها كل المشاكل'ماشي تم
نبيل:سلام توا خليني انفرحهم
""
مرام في دارها وعيونها مورمات من البكى ومش عارفه ان اليوم فاتحتها لان هيثم ماحكالها وطلب من امها ماتحكيلها شي وهيا تبكي خش عليها هيثم خافت وقعدت تمسح في ادموعها جا هيثم وقمعز جنبها
هيثم:صباح الخير
مرام:صباح النور
هيثم:انتي عارفه انك غلطتي صح
مرام تبكي:اها وانا اسفة
هيثم:اكيدة في عقلك كارهتيني وتحسابيني من معاملتي لكي اني ماانحبكش وامزعملك كبدك بس والله يامرومة انتي اغلى حاجة عندي في الدنيا كلها قبل مااتكوني اختي انتي بنتي انا اللي ربيتك من انتي اصغيرة كل معاملتي هذي لاني بس خايف عليك لانك امانة في رقبتي امس بعد اللي صار الدنيا ضلمت في عيوني مرومة اللي ديما انشوف فيها اصغيرة معقوله ادير هكي
مرام تبكي:والله اسفة
هيثم;انا سامحتك بس نبيك اتحسي بغلطك ومعش اتعاوديه مرة ثانية
مرام;والله ماعاد انعاوده
هيثم;اصلا خلاص معش تقدري اتعاوديه اليوم بتقعدي مرات حسام الحمدلله بنسلمك في يد حد ايخاف عليك وايقدرك
مرام مصدومة:شنو
هيثم مبتسم:زي ماسمعتي يابنوتي 😊
مرام اتشوف الهيثم زين
هيثم عقد حواجبه;بس مش معنى هكي ان لو يوم حسام زعلك نسكتله والله لو اينزل دمعة وحدة من عيونك نقتله ادموعك غاليات عندي واي حد ايحاول اينزلهن نمحيه من الدنيا حطي في بالك
هيثم عقد حواجبه;بس مش معنى هكي ان لو يوم حسام زعلك نسكتله والله لو اينزل دمعة وحدة من عيونك نقتله ادموعك غاليات عندي واي حد ايحاول اينزلهن نمحيه من الدنيا حطي في بالك اني ديما وراك وسندك مستحيل في يوم انخليك دبيني حي حتي لو قعدتي عزوز واسنونك طايحات بتقعدي مرومة الطشونه اللي انا ربيتها علي يدي
مرام تبكي وحظنت هيثم زيييين
هيثم زاد حظنها:انحبك يامرومتي
مرام:وانا انحبك يااحسن اخ في الدنيا
بعد كملو حظنهم الطويل هيثم:هاكي هدا فونك ومسحلها ادموعها;هذينا معش بنشوفهن لاي سبب
مرام;حاظر
""
نبيل خش علي هله وهو فرحان وكلهم لاحظو عليه الابتسامة العريضة
نبيل:امي اليوم نبيك تخطبيلي
ام نبيل وباته وخواته كلهم فرحو:هذا النهار المبروك ومن اللي تبي تخطبها
نبيل:سالمة
الكل وجوهم تغيرو ومعش عرفو يحكو
نهى:بس سالمة مازال كيف طالعة من صدمة واصلا هي مش موافقه عليك وانت عارف الشي هدا
نبيل:بس توا وافقت
نهى خايفة علي نبيل:ممكن اتكون وافقت لانها بتنسى وليد يعني مااتحبكش نبيل
نبيل:عارف وانا راضي ونقدر انخليها اتحبني
ام نبيل:انا صح نبي سالمة ومتمنيتها لكي لكن هكي انت اللي تتعب يااوليدي
نبيل:افهموني انا ماصدقت وافقت وانا راضي باي شي بات نبيل شاف اصرار ولده :خلاص يانبيل اليوم انا وامك نمشو نخطبوها لكي وانكلم بوها توا ناخد منه موعد
نبيل صبى باس علي راس باته:ربي ايخليك ليا ياباتي
نرمين:حتي انا بنمشي امعاكم
نبيل:امشو كلكم وخطرها حددو الفرح في نهاية الشهر هذا
ام نبيل;انت شن اتقول مازال اسبوعين علي نهاية الشهر مش حنلحقو
نبيل:حتلحقو ياامي غير ماتحرموني من هالفرحة
بات نبيل:زي ماتبي يانبيل الفرح في نهاية الشهر وماعليكم كل شي حنلحقو عليه
ام نبيل:خلاص زي ماتبو اهم شي عندي انشوفك عريس ونفرح بيك انا نمشي توا انرن علي ام سالمة وانقولها الها
بات نبيل:وانا انرن علي بوها ناخد منه موعد عشان في العشية يقعد قاعد
نبيل;وانا نمشي انوتيلكم الحاجات اللي بتاخدوهم امعاكم
""
مرام طلعت فطرت وهيا طايرة من الفرح وهدرزت مع هيثم وامها اشوي خشت الدارها مسكت فونها ورنت علي رفيقتها عشان اتفرحها
سالمة:تي وينك يابنت من امس مقفل
مرام;حي كان نحكيلك شن صار امعايا
سالمة:شنو احكي
مرام هدا ياحنة وحكتلها**
سالمة:يانا عليا هذا كله صار فيك ياقلبي
مرام;قبل متت من الخوف
سالمة:مش مشكله اهم شي اليوم بتقعدي مرات حسام
مرام:مش مصدقة ياسومة
سالمة:صدقي ياقلبي واخيرا الي اتحبيه قعد لكي والله فرحتلك من كل قلبي ياروحي
مرام;نجك ليا ياسومة انتي شن جوك اليوم
سالمة:حتي انا في شي صار امعايا
مرام بخوف;شنو
سالمة:مااتخافي وحكتلها طلب نبيل وان هيا وافقت وانهم بيجوهم في العشية
مرام بفرحة;احلي خبر نسمعه في حياتي واخيرا بتقعدي النبيل واخيرا عرفتي مصلحتك
سالمة;خايفة نقعد تسرعت في قراري
مرام:لا ماتسرعتيش مستحيل تلقي واحد زي نبيل ايحبك وايخاف عليك قرارك صح مليون في المية وصدقيني نبيل يقدر اينسيك كل شي مر في حياتك
سالمة:خايفة نظلمه امعايا
مرام:مش حتظلميه لانك اول ماتقعدي امعاه حتحبيه تلقائي لان يستحق الحب
سالمة;قولك هكي
مرام:هكي ونص
سالمة:اسمعي حس ماما اتنادي اكيدة ام نبيل كلمتها وتبينا انوتو حاجات توا بعد ايعدو هل نبيل انقول الصهيب ايجيبني لكي
مرام;تمام ياقلبي
سالمة;واسمعي اول ماايكلمك حسام ايقولك قرو الفاتحة دزيلي رسالمة
مرام:حاظر وسكرت
وسالمة مشت الامها ولقتها فرحانة لان نبيل مافيش كيقه كلمو امال وجت وبدو ايجهزو الجيت اهل نبيل
"""
جت العشية وجو اهل نبيل ونبيل ماعقب حاجة في السوق ماجابها (جميع انواع الحلو جايبهن وكل حاجة منها طبق وكيس مليان شكولاطات وباقة ورد كبيرة وكم نوع عصير وكلهن مغلفهن في محل تغليف حلو بكل )
وخشو واستقبلوهم هل سالمة وقمعزن الصبايا في دار اضيوف وبات سالمة وبات نبيل وصهيب في المربوعه
وطلبو سالمة وهل سالمة وافقو وقالولهم انهم يبو الفرح بسرعه في نهاية الشهر في الاول اهل سالمة رفضو بعدين وافقو واتفقو انهم ايديروه فرح كبير ليلة وحدة والعيلتين مع بعضهم (بحكم ان العيلتين كانو متقربين من بعضهم واجد يعني زي الخوت)
واتفقو عالشروط وكل شي بيديروه
"""
عالمغرب بعد ماروحو هل نبيل سالمة طلبت من صهيب ايشيلها المرام ولبست وشالها صهيب المرام في حوشها
وصهيب طلع شور المعرض النبيل واول ماخش صهيب للمعرض لاحظ نبيل ان قالب وجه
نبيل;كنك ياباشا عاقدهم
صهيب:ياراجل انت اكثر واحد عارف كيف سالمة غالية عليا ولما تحدد فرحها كيف تعقدت وكيف فرحت لما فسخت جاي تبي تاخدها مني
نبيل يضحك:هذا عليش عاقدهم ياراجل كأنها امعاكم رانا جنب بعضنا وامتى ماتبيها وفي اي لحظة بلا سيارة لا شي تلقى روحك عندها
نبيل:اللي خلاني انوافق وصبرني حاجتين انها قريب منا وثاني شي انها عند صاحبي ورفيقي وخوي الكبير اللي ايقدرها وايخاف عليها نفسي واكثر
نبيل;اكيدة ياصهيب والله سالمة في عيوني
صهيب:ماعنديش فيها شك بكل
#يتبع
زعما شن حيصير والفرح حيتم ولا فيه شي ايغير الموضوع كله حنعرفوه الحلقة الجاية انتظروني 😊
اسفة لو فيه أخطاء في الأسماء وأكيد رأيكم ايهمني😉
گـتـابـتـي Koka Saleh😊
منقولة💖
طبعا نشكر حبيباتي متفاعلات مع الروايه💕😘
I love you ❤️
