#نـصـيـبـي_فـيـك
الـحـلـقـة الـرابـعـة عـشـر
سالمة مصدومة واتشوف بعيونها زين:من هدي اللي قاعد امعاها وليد ومشت تجري شوره
وليد شافها جاية شوره ارتبك وقعد ايشوف الهديل
سالمة وقلبها بيوقف;هذي من وليد
وليد:اهدي بشوية خليني انفهمك
سالمة;نبيش نهدى قولي هدي من بس
هديل بتمشي وليد مسك يدها:هدي حبيبتي
سالمة تبكي:وانا شنو اذا هذي حبيبتك
وليد:سامحيني هدا اللي صار ماالقيتش روحي الا وانا انحبها
سالمة:وليد نحنا فرحنا بعد اسبوع شن اللي تحكي فيه هدا
وليد;باتي زر عليا اني انطلع الفرح كان عليا حكيتلهم اني بنفسخ
سالمة زادت تبكي وحطت يدها علي فمها ومعش عرفت تحكي
مرام:تعرف انك واحد حقير
وليد;لو سمحتي بدون غلط وانتي ياسالمة سامحيني الحب مش بيدي فعلا البنت هذي انحبها ونبيها ومش قادر نتخيل حياتي بدونها
سالمة تبكي:وانا عادي هكي بعد كل هالسنين وبعد كل حاجة اتسيبني بالبساطة هذي
وطبعا الناس كانو ملمومة علي سالمة ووليد ويتفرجو عليهم ونبيل وصل للجامعة وقعد امصبي قدام القاعة يرجى فيها تطلع وكانن في بنات مصبيات جنب نبيل
البنت:تعالن شوفن شن صاير
البنت لخري:شن فيه
البنت:سالمة اللي امعانا في القسم مش فرحها قريب لقت حبيبها مع وحدة اخرى مازالو يحكو تعالي انشوفو
ونبيل سمعهن وقلبه وقف ومشى في جرتهن ووصل للمكان
سالمة منهارة وتبكي 😭
وليد:لو سمحتي قتلك الدنيا نصيب ونصيبك مش امعايا حيجيك نصيبك مع غيري
نبيل شافها تبكي وماقدر يتحمل
نبيل مسك سالمة من يدها;انت اكثر انسان واطي شفته في الدنيا واحسن شي نصيبها مش امعاك وفي غيرك ايموت في التراب اللي تمشي عليه وخدا سالمة وطلع بيها من الجامعه وهي منهارة وتبكي وركبها في سيارته
سالمة تبكي وتبكي ومش امصدقة اللي صار
نبيل في سرعه رهيبة وبيشيلها الحوشهم ووصلو الشارعهم
سالمة تبكي:نبيش نمشي للحوش توا
نبيل; باهي وين بتمشي
سالمة تبكي بالعبرة:مش عارفه اي مكان اهم شي نبيهمش ايشوفوني هكي
نبيل:تمام وطلع بيها وسالمة طول الطريق تبكي ووصل بيها علي شط البحر
نبيل;اهو انزلي هنا ابكي عيطي كل طاقتك طلعيها هنا حتريحي
سالمة نزلت وقعدت تبكي وتبكي ونبيل في السيارة قلبه ايتالم عليها يبيش ينزل نين اتفضي كل طاقتها بعد حوالي ربع ساعة نزل لقاها هدت اشوية واتشوف للبحر وادموعها ينزلو
نبيل قمعز جنبها وقعد ايشوف للبحر:مش عارف شن نحكيلك بس حاجة وحدة انقولها لكي (عسى ان تكرهو شي ويجعل الله فيه خيرا كثيرا)
سالمة: ونعم بالله بس لما خاني المرة اللي فاتت وبعدها تأسف وجا خطبني قلت خلاص غلطة وحدة انسامحه عليها ووثقت فيه من جديد بس اليوم قتلني قتلني وتبكي
نبيل:والله واحد خاين زيه مايستحق كل هالدموع اللي نزلتيهم عليه صدقيني هو الخاسر لان خان وحدة زيك
سالمة تبكي:قالي انحبها ماتحشمش فيها وانا اللي فرحانة ان فرحنا بعد اسبوع وهو قاعد ايحب ويتمعشق
نبيل:باهي تخيلي طلع فرحك وبعد الفرح اكتشفتي ان يعرف وحدة ثانية مش تعرفي توا خيرلك
سالمة تبكي;صح توا خير بس قلبي نار نار بنموت كلمته ان ايحبها في وذني نسمع فيها
نبيل:سالمة حاولي اتكوني اقوى من هكي لان مايستاهل كل هالزعل هو اللي اختار غيرك
سالمة:كيف نقدر انكون قوية بعد اللي صار
نبيل:انهي كل شي واحكي الهلك وهله وافسخي خطبتك ووريه انك قوية وان اللي داره مستحيل يكسرك ومصيره يندم عاللي داره
سالمة:مش قادرة انتخيل ان بيكون الغيري
نبيل:يعني بترضي بالشي اللي داره وبتخلي الفرح يطلع في موعده
سالمة:مستحيل مستحيل انكون له بعد اللي داره بس نار في قلبي نبي شي ايبردها
نبيل:شي زي شنو ايبردلك النار
سالمة تبكي;تمنيت روحي ضربته او قتلته قبل ماانسيبه
نبيل مسك يدها وصباها:هيا توا ونمشي نضربه قدامك عشان النار اللي فيك تطفى
سالمة تمسح في ادموعها:انت شن تحكي
نبيل:والله نحكي من جدي بنعطيه طريحة قدامك نين النار اللي فيك تبرد
سالمة:لالا نبيل خلاص
نبيل:شنو اللي خلاص لالا بنقعدو خالصين بكاك ونزل ادموعك توا بنبكيه وانزل ادموعه قدامك
سالمة ابتسمت:انت مجنون يانبيل
نبيل:مازال ماحقيتي شي من جنوني هيا اركبي في السيارة نمشوله
سالمة:لالا خلاص فوت عشان خاطري
نبيل:خاطرك فوق عيني وراسي بس لازم انبرد قلبك توا
سالمة:خلاص نبيل والله بتصرفك هدا قلبي برد
نبيل:بس انا قلبي مازال دم عليه
سالمة ابتسمت;خلاص عشاني نبيل
نبيل ابتسم:حاظر والله عشانك بس لكن لو تبيني توا نقتله قدامك ماانقولش لا بكل
سالمة:والله عارفتك بس توا بنروح للحوش
نبيل:انتي اكويسه توا تقدري تمشي للحوش
سالمة:اها بنمشي نحكي البابا اللي صار عشان اليوم ينهو كل شي
نبيل:تمام وركبو في السيارة وبيشيلها للحوش وهما قريب من الحوش رن صهيب علي نبيل
نبيل:ايوا صهيب
صهيب متعقد;وين سالمة
نبيل:امعايا انت سمعت اللي صار
صهيب;توا كلمني واحد صاحبي وحكالي اللي صار وقالي انك خذيت سالمة
نبيل:عارفه تصرف غلط لكن والله ماتحملت اللي داره الكلب هذكي وكلامه السالمة وهي تبكي والطلبة كلهم يتفرجو عليها
صهيب:بارك الله وفيك عاللي درته باهي اللي خديتها اكيدة كانت منهارة
نبيل:بكل وتوا قاعدين اقريب من الحوش
نبيل:تمام انا توا طالع ماشي للكلب هدكي والله نشرب من دمه عاللي داره
نبيل:صهيب مااتحركش من قدام الحوش انا قريب نوصل نمشو مع بعضنا اهو نبهتك مااتحركش
صهيب:بسرعه راه الدم واصل لعروقي وناويها له
نبيل:اهو قريب منك
وصلو نبيل وسالمة للحوش ونزلها علي هلها وخشت للحوش وركب صهيب امعاه ومشو ايدورو علي وليد
سالمة في الحوش رنت علي باتها وجاها وحكت الامها وباتها كل اللي صار وقالت الباتها انها معش تبيه وباتها رن علي بات وليد وحكاله كل حاجة صارت وبات وليد قاله انهم بيجوه توا هو وام وليد
""""
نبيل وصهيب لقوه في الصيدلية وخشو عليه وسكرو الصيدلية وعطوه طريحة سمحة نين معش قدر ايتحرك
صهيب:لو انك راجل راك جيت وقلت معش نبيها مش ادير فيها هكي وكل الناس اتفرج عليها
نبيل:ماعديتش كلام الرجاله اللي جبتهم للرجاله ولا عيلتكم كلها اعيال زيك لكن هنا كلمتين تعرف انحقك امقرب منها ولا ران عليها وقسما بالله نقتلك سمعتني اكويس شن قلت صح
وطلع هو وصهيب والناس خشو علي وليد وشالوه للمستشفى
""
بات وليد وامه جوهم في الحوش بات وليد مع بات سالمة في المبربوعه وام وليد وام سالمة في دار الضيوف
ام وليد;خلاص ياام سالمة نعتبروه سوء تفاهم وخلاص وخلو الفرح في موعده وباته والله ايدير فيه كل اللي تبوها
ام سالمة:سالمة مسكرة راسها وقالت ماتبيه
ام وليد:بالله عليك انا سالمة خاشه خاطري وحسيتها زي بنتي انا ماجبت بنت والله اعتبرت سالمة زي بنتي وخاطري اتكون كنتي
ام سالمة:والله مانقدر نغصبها واللي داره وليد فيها مش ساهل
ام وليد;والله عارفه ان غلطان من ساسه الراسه لكن ولا تصغري كلميلي سالمة نحكي امعاها
ام سالمة:حاظر وصبت اتكلم في سالمة
""
في المربوعة بات وليد ايحاول يقنع بات سالمة انهم يعتبرو اللي صار سوء تفاهم وايخلو الفرح في موعده
بات سالمة:اسمع ياخوي البنت قررت وانا مانقدر نغصبها وبعدين انا بنتي غالية عليا واللي صار فيها مش ساهل وولدك ماراعش حتى مشاعر بنتي
بات وليد;والله عارف وانا حنضربه ومش حنقصر فيه وانجيبه هنا ايتاسفلكم وايتأسف السالمة
بات سالمة:لنقنك سامحني كيف ماخشينا بالمعروف نطلعو بالمعروف
بات وليد:بس ورن تليفونه وكان عصام خو وليد وبات وليد رد
"""
سالمة جت الدار الضيوف واول ماحقتها ام وليد قعدت تبكي
ام وليد تبكي:اسفة ياابنيتي عالللي داره وليد
سالمة:اعميمة انتي مالكي دخل وليد هو اللي غلط
ام وليد:علي خاطري انسي اللي صار وماتفسخي الخطبة وخلي الفرح في موعده والله نرجى في اليوم اللي بتقعدي كنتي فيه ومش كنتي بس والله اعتبرتك بنتي
سالمة:والله يااعميمة وانا حبيتك وخاطرك فوق راسي بس وليد خاني وهان كرامتي ومااحترمنيش وانا مستحيل انكون امعاه بعد اللي صار
ام وليد:يااسلومة يابنتي هدي زلت شيطان وحنجيبه ايتأسف منك
سالمة:اسفة يااعميمة والله مانقدر وليد لو ايتأسف عمره كله مش حنسامحه عاللي داره سلحت دبلتها ومدتها العمتها هدي عطيها له وكل شي بينا تم وعدت وسيبتهم
""
في المربوعه الاتصال اللي جا البات وليد من عصام قاله فيه ان صهيب وصاحبه ضربو وليد وتوا في المستشفى وقالها البات سالمة وطلعو مع بعضهم للمستشفى واول ماخشو
وليد كانو مجبسينة والضربة كانت قوية واول ماشاف بات سالمة
وليد:كله من ولدك والله انخليه ايعفن في الحبس والله نقتله لكي
بات سالمة:اسمع انا جاي انقولك الحمدلله علي سلامتك
بات سالمة:اسمع انا جاي انقولك الحمدلله علي سلامتك حتى وانت بعد اللي درته ماتستحقها ومافيش داعي للغلط واللي تبي اديره ديره وطلع وسيبهم
بات وليد;تحشم علي وجك راجل اكبر منك واللي داره فيك تستاهل اكثر منه
عصام:كيف ياباتي كانو بيقتلوه لازم انردو ضربته
وليد:والله انبلغ فيهم وانخليهم ايعفنو في الحبس
بات وليد:اسمع انت وياه كل اللي في راسكم حولوه واحد ايبلغ فيه ولا ايجي شوره احسابه عندي انا اللي داره خوك يستاهل عليه اكثر من هكي اللي داره ابدا مش حركة راجل ولو انا مكانهم كنت قتلتك وكلمة وحدة تنسو اللي صار وزي ماخشينا مع العرب بالمعروف نطلعو بالمعروف ساد حشمتي قدام الناس حطيت راسي في التراب وطلعتني عيل قدامهم ومش حاكم في اعيالي
وليد طبس راسه وتحشم من كلام باته وحس بغلطه
بات وليد:سمعتوني شن قلت لا بلاغ لا اتجو شوره باهي انت وياه
وليد وعصام;باهي ياباتي
""
بعد اشوي جا بات وليد وخذا ام وليد من حوش سالمة وتاسفلهم عاللي صار ونهو كل شي بينهم وتم الموضوع
"""
سالمة خشت الدارها ورنت علي مرام اللي لقتها حارقة الفون مكالمات بتعرف شن صار وكانت سالمة تحكيلها ومنهارة تبكي مرام ماتحملت اجدت هيثم وشالها السالمة وقعدت اتصبر فيها وجت امال وقعدو الكل ايصبر فيها وايكرهو فيها في وليد لانهم اصلا ماكانو ايحبوه وتريحو لما سالمة افتكت منه
"""
مرو اسبوعين وسالمة نفسيتها 0لا تطلع لا اتخش وطول الوقت في دارها حاول صهيب كم مرة يقنعها وياخدها الاي مكان او يمشي هو وياها المصيف او ايسافرو برا ايغيرو جو سالمة كانت رافضة والاثنين الوحيدين اللي كانت اترد عليهم في الفون مرام ونبيل لان نبيل كان شبه يومي يحكي امعاها وايحاول اينسيها وايصبرها علي احساب قلبه هو اللي كان ايتألم عشانها
""
سالمة حاطه سماعات في وذنها وتسمع في اغاني حزينة زي كل يوم رن فونها وكانت مرام
سالمة تبكي:اهلا مرومة
مرام:اهلين سومة كنك تبكي
سالمة تبكي:قهرني وقلبي نار
مرام:انسيه خلاص سومة
سالمة تبكي:والله حاولت ومش قادرة
مرام:وكان عرفتي ان خطب تنسيه
سالمة بصدمة:لا مستحيل بالسرعه هدي
مرام:اها وخطب البنت اللي حقيناه امعاها في الجامعه قالتها ليا وحدة جارت وليد توا يعني شوفي ياسومة انتي هنا حابسة روحك وتبكي ومش قادرة تنسيه وهو مافكر فيكي بكل ومشى خطب والله مايستاهلك
سالمة قعدة تبكي:معقولة نساني بالسرعه هذي
مرام تبكي:لان واحد حقير وماعمره حبك وربي فكك منه لانك طيبة انسيه وطلعيه من راسك وعيشي حياتك وحبي من جديد ومعش اتفكري فيه
سالمة تبكي ومرام تبكي امعاها
سالمة;مرام خلاص سكري بنقعد بروحي اشوي
مرام;حاظر سومة انسيبك توا لكن اشوي وانرن عليك وحلفتك بربك اتردي
سالمة تبكي:باهي وسكرت
"""
مرام سكرت وهي تبكي وواجعها حال صاحبتها واختها رن فونها وكان حسام وردت عليه وهيا تبكي
حسام سمعها وعرفها تبكي وانفجع:تي كنك شن صاير امعاك
مرام تبكي:سومة سومة
حسام بخوف;كنها
مرام تبكي وتحكيله علي سومة مع خشت هيثم اللي سمعها اتقول في اسم حسام
مرام عيونها ادموع ونزلت الفون وبصدمة:هيثم
هيثم: اها هيثم المغفل فعلا كنت شاك فيك وشكي في محله من حسام هذا اللي اتكلمي فيه
مرام تبكي 😭
"""
سالمة مازال في دارها وتبكي ورن فونها وكان نبيل سالمة ردت عليه دغري لانها كانت محتاجة تحكيله لان ايريح فيها بكلامة
سالمة تبكي:ايوا نبيل
نبيل بخوف:كنك تبكي
سالمة تبكي:خطبها يانبيل خطبها
نبيل;وكان خطب ينحرق هو وهيا مش انتي معش تبيه
سالمة:اها معش نبيه لكن قهرني معقوله نساني بالسرعه هدي
نبيل:مااتنزلي ادموعك عليه لانهن اغلى منه وافرحي لان ربي وراه لكي علي حقيقته
سالمة:عارفه بس قهرني مرتين بخيانته ليا وبخطبته بالسرعه هذي
نبيل:انتي مازال اتحبيه
سالمة تبكي:هدي مشكلتي كرهته بس مازال انحبه
نبيل حط يده علي قلبه:في غيره ايحبك معقوله مش حاسه بيه
سالمة:مش بيدي حبه مش راضي يطلع من قلبي برغم كرهي له بعد اللي داره
نبيل وادموعه ينزلو وفي لحظة:سالمة تجوزيني ??
سالمة;---
#يتبع
زعما شن رد سالمة علي نبيل وشن مصير مرام بعد مالقاها خوها هيثم تحكي كله حنعرفو الحلقة الجاية 😊
اليوم خميس وحبيت انفرحكم بحلقتين تعبني واجد بس كله ايهون علي خاطركن 😊
اسفة لو فيه اخطاء في الاسماء وأكيد رأيكم ايهمني😉
گـتـابـتـي Koka Saleh 😊
منقولة💖
