#نـصـيـبـي_فـيـك
الـحـلـقـة الـحـاديـة عـشـر
في الليل وبعد ماكمل البيان امال قعدت بايته عندهم وقاعدة هيا وسالمة وصهيب وام سالمة ايخرفو عالبيان والاجواء بعد اشوي ام سالمة استأذنت منهم وخشت رقدت
امال تضحك:كان اتحقي خشت صهيب عالبنات امبدري😂
سالمة تضحك:اكيدة دايرها بلعاني😂
صهيب;بلا صماطة انتن لثنين والله خشيت ابسرعه وانسيت البنات بكل انتن عارفات مش ليا الحركات هذينا
سالمة:صدقتك صدقتك 😂
صهيب:باهي نسالك اموله والله اتقوليلي من البنت اللي حكيتلك عليها امبدري
امال:والله ماعرفتها ياصهيب البنات واجد ماركزتش عليهن
سالمة:اي بنت واتقول مش لكي الحركات هذينا
صهيب;والله بالصدفة شفتها ولفتت انتباهي
سالمة;من وشن قصتها
امال:لما خش عالبنات شاف وحدة من الخلف قال لابسة فستان وردي وشعرها طويل
سالمة اتفكر;فستان وردي
صهيب:اها ياسومة ياريت تعرفيها
سالمة;المشكلة البنات كانن واجد معش نذكر بس انت عليش تسأل عليها
صهيب:شي عندي فضول نعرف من
سالمة:شكله السنارة غمست وطحت وماحد سمى عليك 😂
صهيب:لا انتي عارفه الجو هذا مش شوري لا للنساء
سالمة:واضح واضح ياصهيب بكرا نعرفو
صهيب;المهم توا انا نعست بنرقد تصبحن علي خير
سالمة وامال:وانت بخير
وقعدو سالمة وامال ايهدرزو وبعدها امال رقدت وسالمة رن عليها وليد وقعدت اتخرف امعاه للصبح وهاتي علي غزل من وليد وحب وغرام وكلام عمره ماقاله السالمة ابدا وسالمة كان طايرة من الفرحة
"
في حوش مرام مرام اتهدرز مع امها وهيثم
هيثم:تريحتي ومشيتي مع صاحبتك
مرام:اها تريحت
هيثم:ماشي لكن معش اتعاوديها ليا مرة اخرى
مرام:في فرحها بس وبعدها خلاص
هيثم;انتن عاد ماينفتحلكن مجال وصبى
بعدها امها خشت ترقد ومرام خشت الدارها وفتحت النت ولقت رسائل واجد من حسام مكتوب فيهن(الو• وينك•كنك مش فاتحة•عليش طولتي•طمنيني عليك•هذا كله في البيان•)ردت عليه مرام
مرام:خيرات حسام 😊
حسام:وينك كنك طولتي
مرام:كنك وشن الرسائل هذينا كلهن
حسام:شغلتيني عليك
مرام:وعليش تنشغل
حسام:معقوله هدا كله في بيان صاحبتك
مرام:اها طولت عندها وبعد روحت قعدت انخرف مع ماما وهيثم
حسام:اها باهي قوليلي شن جو البيان
مرام:جو ايهبل وفرحانة واجد السومة
حسام:باهي احكيلي كل حاجة درتيها وامتى مشيتي
مرام:مشيتلها من الصبح ومشيت امعاها للكوافير
حسام:شنو شنو مشيتي امعاها
مرام:اها 😊
حسام:وعليش مشيتي امعاها ومن شالك
مرام:عادي صاحبتي ومشيت امعاها
حسام:ومن شالكن
مرام:شالنا صهيب خو سومة 😊
حسام:تحكي من جدك انتي
مرام:اها شن فيها
حسام:كيف شن فيها
مرام:خو صاحبتي زي خويا
حسام:انا اللي نعرفه ان عندك خو واحد
مرام:شن مشكلتك حسام كنك
حسام:مشكلتي عليش تمشي امعاه
مرام:عادي هيثم وافق مشيت بس انت عليش متعقد
حسام:كيف عليش مانبيكش تمشي مع حد غريب
مرام;وعليش
حسام:يعني مش فاهمة
مرام;لا والله اتقول كنك
حسام متعقد:افهمي انحبك
مرام انصدمت وقلبها بيطلع من مكانه صح حاسة بإهتمامه لكن ماتوقعتش ايقول هكي وسكتت ومعش دزت شي
حسام:الو مرام
مرام:ساكته ومعش ردت شي
حسام:اسمعي مرام عارف انك انصدمتي من كلمتي لكن بجد والله والله الكلمة من قلبي وتامني بالله من زمان وحاس بشي تجاهك بس ماكنت انشوف فيكي ديما وماعرفتش كيف نوصل فيك وكنت ديما انخاف انتقرب منك انتي اتصديني او هيثم يفهم غلط والله والله انا رايدك بالحلال
مرام:قلبها بيطلع من مكانه وادموعها نزلو من الفرحة
حسام;مرام ردي عليا قوليلي شن ردك علي كلامي
مرام:انت فاجئتني حسام
حسام:حسام يعني مش موافقة عليا
مرام:لا مش هكي بس
حسام:في حد في حياتك
مرام:لاوالله مافيش حد
حسام:امالا مش عاجبك
مرام:لا والله مش هكي
حسام:يعني عاجبك
مرام:انت مافيش بنت ما تعجب بيك
حسام:ماايهمنيش البنات انتي اتهميني عاجبك ولا لا
مرام:اها عاجبني
حسام:فرحتيني وحق ربي يعني لو جيت طلبتك من هيثم اتوافقي
مرام بصدمة:خطبة توا
حسام;اها ماعندنش في شنو نرجو
مرام:نحنا مازال انتعرفو علي بعض
حسام:شن نبو انتعرفو نحنا اولاد عم
مرام:عارفه بس يعني لنا بس اسبوعين نحكو
حسام;باهي امتى اتكملي تعرفك عليا
مرام:اقل شي بعد امتحاناتي
حسام;بعد الامتحانات اكيدة
مرام:اها اكيدة
حسام:تمام معناها اتفقنا يكملو امتحاناتك وانجي نخطبك من هيثم
مرام:تمام
حسام:باهي ممكن نطلب طلب
مرام:شنو
حسام;عادي تعطيني رقمك شوفي زي اليوم طولتي مافتحتي نت وقعدت مشغول عليكي وقعدت نرجا نين تفتخي ومانبيش نغصبك براحتك
مرام قعدت ساكتة اشوي واتفكر بعدين وافقت وعطاته رقمها ورن عليها وقعدو يحكو
""
صباح ثاني يوم نبيل روح الحوشهم لقى امه وخواته مقمعزات في الحديقة وايخرفن عالبيان وام نبيل كانت متضايقة وباين علي وجها الزعل لانها كانت اتحب سالمة وتبيها النبيل
نبيل جاهن:صباح الخير
الكل;صباح النور
نبيل لاحظ زعل امه:كنك ياامي شن فيك
نهى:شي راسها واجعها بس
نبيل بخوف;من شنو ياامي هيا انشيلك للمستشفى
نهى:لا توا اكويسه مش داعي
نبيل;كيف مافيش داعي مرات ضغطها مرتفع ولا حاجة
ام نبيل;اكيدة ضغطي مرتفع بعد اللي صار
نهى:ماما خلاص
نبيل:شن فيه امي شن صاير
ام نبيل:وجعتني سالمة اللي مشت من ايدينا وانا كان خاطري ناخدها لكي
نبيل بحزن:خلاص ياامي كل شي نصيب
نهى:خلاص ياماما عاد
ام نبيل:باهي باهي اهو سكتت
نبيل:انا راقي الداري بندوش ونطلع ورقى فوق
نهى:ماما قلبه مكسور بروحه عليش اديري هكي
ام نبيل:عارفه لكن والله قاهرتني حتى انا
نهى:خلاص كل شي نصيب ربي مش كاتبها له
نبيل في داره دوش وطلع للمعرض
""""
مر اليوم عادي جدا وفي الليل بسمة اتصلت بنهى نهى:خيرات بسومة
بسمه;اهلين ياقلبي
نهى مستغربة:وين الكلام الحلو هذا قبل مااتقولي الا خير ياثقيلة وهالكلام كنك مزاجك حلو اليوم
بسمة:بعد بكرا بنجيك
نهى:قولي والله
بسمة:والله واخرى مش جايتك ابروحي
نهى:اكيدة امعاك عمتو ليلى
بسمة:اها ومش جايين مكسدين
نهى مستغربة امالا شنو
بسمة:جايين نخطبو فيك
نهى:شنو بلا ابصارة زايدة
بسمة:وحق ربي ماانبصر توا سمعت علي يحكي االماما وقاللها بعد بكرا انجوكم نخطبوكي
نهى مصدومة:تخطبوني
بسمة:اها واخيرا علي تحرك وبتقعدي مرات خويا
نهى:حي يابسومة خاطري انزغرت
بسمة:حتى انا غير مانقدر توا سمعته ايقول الامي مااتخليش بسمة تعرف الا يوم اللي بنمشو عارفني بنقولها لكي وهو بيديرها مفاجئة واخري سمعت ان توا بنخطبوكي هكي يعني مافيش بيان لاشي لان علي حوشه في التشطيبات الاخيرة وبيطلع القرح دغري
نهى:بشوية عليا خليني نستوعب قبل راك بتجلطيني بكل الاخبار هذينا
بسمة:هيا اهو حسه ايناديلي خليني نمشيله وانتي استوعبي براحتك
سكرت بسمة من نهى ونهى قعدت فرحانة ومش مصدقة روحها واخيرا حسام دار خطوة ايجابية بعد ها الحب والاعجاب اللي كان كل واحد فيهم محتفظ بيه النفسه ولا واحد اعترف للثاني باللي في قلبه
"""
وفعلا جا بعد بكرا وجو اهل علي واللي كانت بسمة وامها وطلبن نهى واهل نهى وافقو والعيلتين اتفقو ان مافيش لا بيان لا شي لان علي قريب ايكمل حوشه وبيطلع الفرح دغري
