#نـصـيـبـي_فـيـك
الـحـلـقـة الـتـاسـعـة
سالمة:شنو
وليد:شنو اللي شنو كلامي واضح
سالمة;وليد مش وقت بصارة
وليد;ومن قالك انبصر كلامي جد بكرا هلي بيجوكم عشان يخطبوك
سالمة مازال مش مصدقة:بيجونا هنا
وليد;لا غادي اكيدة بيجوكم هنا في حوشكم
سالمة:وشن خطرلك توا
وليد:بصراحة انا غلطت في حقك امس وانا مانبيش نخسرك وعارف انك زاعله وبعد فكرت قلت ممكن هذي اشارة من ربي عشان انراضيك بانك اتكوني ليا العمر كله فقررت اندير خطوة جدية ومنها انتي اتصدقي اني نادم وفعلا شاريك
سالمة مصدومة من الكلام اللي ايقول فيه لانها اول مرة تسمعه منه وساكته
وليد;الو سومة وين رحتي
سالمة:امعاك
وليد:كنك سكتي مش خاطرك اتكوني حلالي
سالمة سمعت الكلمة قلبها طار من الفرحة:اكيدة وليد بس خايفة اتعاود اديرها مرة ثانية
وليد:صدقيني كانت اول مرة ونادم عليها بنموت اول غلطة سامحيني عليها واهو ماارضيت زعلك واكتشفت اني مانقدر انعيش بدونك وبنكمل امعاك عمري
سالمة:من قلبك الكلام هذا
وليد;من جواجي قلبي بجد ياسومة انحبك وبنكمل عمري امعاك بس انتي شكلك معش اتحبيني
سالمة;لا معقوله والله انحبك وانت عارف بس مجروحة منك
وليد:اسف اسف اسف اسف وسامحيني يااغلى شي في حياتي
سالمة مصدومة وحاسه ان هذا مش وليد شخص ثاني
وليد:سومة كنك ساكته قولي سامحتك وريحيني
سالمة حست بأن وليد نادم وان فعلا اكتشف ان ايحبها زي ماقاللها:اكيد سامحتك
وليد تنهد:ريحتيني حبيبي خلاص بكرا جهزي روحك نبي امي تنهبل فيك
سالمة فرحانه:اكيدة بس اتصدق قلبي بيوقف من توا مش مصدقة ان فعلا بنكون لكي
وليد:لا صدقي حبي خلاص واخيرا بنكونو البعض
سالمة;الحمدلله ياربي قهرتي امس والنار اللي فيا تحولت كلها الفرحة اليوم
وليد:الحمدلله خلاص توا نمشو انرقدو بكرا ورانا يوم مهم
سالمة:تصبح علي خير حبيبي
وليد:وانتي بألف خير يامراتي 😍وسكر
وليد يحكي مع روحه;اهو بالك امي تسكت واتريح حتي وهيا مش خاشة راسي بس اقل شي خير من بنت عمي اللي مانعرف عنها شي غير اسمها واتفكني امي من الصداع اللي دايرته ليا
""
اما سالمة سكرت وهيا طايرة من الفرحة وطبعا كالعادة رنت علي مرام صندوق اسرارها ورفيقتها في الحلوة والمرة بتحكيلها اللي صار
مرام:ايوا سالمة خير شن فيه رانه توا
سالمة:فرحانة فرحانة بكل يامرام
مرام:دوم عليك الفرح لكن شن صاير امعاك
سالمة:وليد توا كلمني وقالي بكرا هلي بيجو يخطوك
مرام بصدمة:تحكي من جدك انتي
سالمة:والله من جدي وانا بروحي مش مصدقة
مرام;قصدك سامحتيه عاللي داره
سالمة:انقولك بيخطبني قالي انا نادم عاللي درته وعرفت قيمتك وبنكمل امعاك حياتي
مرام:بالك يكذب
سالمة:لا مستحيل يطلع يكذب انتي عارفه وليد عمره ماحكي علي موضوع خطبه هذي اول مرة
مرام;حتي انا عارفه وبصراحة عمري ماتخيلت وليد يخطبك
سالمة:وحق ربي حتي انا ديما خايفة ان مايخطبني بس اهو واخيرا قالها وبنقعد حلاله
مرام:والله فرحتلك سومة بس بصدق خايف عليك منه خايفة ايعاود ايديرها اخرى
سالمة:قلتها له بس قالي ان هذي اول مرة وبيموت من الندم ومش حيعاودها مرة ثانية
مرام:انشاءلله سومه وربي ايتملك بخير واتهني امعاه يارب
سالمة:يارب مرومة قلبي بيطير من الفرحة
مرام:دوم فرحانة واهو ثبتلك ان ايحبك زيدي افرحي اكثر واكثر
سالمة:العقبالك مع حسام يارب
مرام:يارب حي انسيت انتي رنيتي وانا نحكي امعاه عالفيس خلاص سكري بنمشي انكمل امعاه
سالمة:امشي بسرعه هيا وسكرت
سالمة امتدت عالسرير وهي فرحانة وترجا في بكرا بفارغ الصبر واتخيل في اليوم اللي تلبس فيه الابيض وايكون وليد حلالها بعد كل هالسنين ❤
""
مرام تحكي مع حسام عالفيس (وطبعا من بعد ماخشلها عالفيس هذك اليوم وهما كل يوم يحكو مع بعضهم عالفيس في النهار والليل)
حسام:وين رحتي توا
مرام;رنت عليا سومة صاحبتي تحكيلي في حاجة صارت امعاها
حسام دزلها السمايل المتعقد👈😡صار سومة تصبحي علي خير
مرام:كنك حسام
حسام:شي
مرام:بس شكلك تعقدت من شي
حسام:اها منك
مرام:شن درت
حسام:اول شي مااتفوتيني عشان حد وبعدين صاحبتك شن تبي فيك الساعة 2في الليل
مرام:صار امعاها موضوع ضروري وبتحكيه ليا وانا وهيا متعودين لما وحدة ايصير امعاها شي اترن عالاخري في اي وقت وتحكيلها
حسام:اها عموما نبيكش تحكي مع حد في الليل فاهمة
مرام:فاهمة بس سومة انرد عليها في اي وقت لانها اكثر من اخت
حسام:اتحبيها
مرام:وااجد بكل اخرى
حسام:يابختها 😍
مرام انحرجت ومعش دزت شي وحسام عرف انها انحرجت فحب ايغير الموضوع وماايزيد عليها
حسام:احكيلي صاحبتك شن تبي فيك توا
مرام:سومة وبدت تحكي في قصة سالمة الحسام
""
نبيل كان ساهر مع اصحابه عند صاحبه محمود لان عنده شقه وقاعد فيها بروحه وكل يوم يسهرو فيها يلعبو كارطة بليستيشن(سوني) ايهدرزو وهكي
روح للفيلا وهو فرحان وجوه سمح وحاس ان ربي حيستجيب الدعاه اللي ديما يدعي فيه وسالمة حتكون نصيبه وان بكرا احلى بالنسية له وخش الداره وامتد عالسرير ورقد وهو يحلم باليوم اللي سالمة بتكون فيه حلاله
والمسكين مش عارف اللي مستنيه بكرا
""
جا صباح ثاني يوم اللي كان بالنسبة السالمة اسعد يوم في حياتها وتحديدا الساعة 10 نزلت سالمة فطرت مع هلها وحاولت تحكي الامها علي اهل وليد بس تحشمت وخافت في نفس الوقت فقررت تحكي الامال وامال هيا اللي تحكي الامها
طلعت مع صهيب ووصلها للجامعة وتلاقت مع مرام وقبل مااتخش للامتحان كلمت امال وحكتلها الموضوع(وطبعا امال كانت عارفه بعلاقة سالمة بوليد وحتى انها عارفه ان نبيل ايحب سالمة بس مااتحب تدخل في موضوعها وحابه ان سالمة تختار بروحها شريك حياتها)وطبعا سالمة اصرت علي مرام انها لازم اتجي للحوش وتحكي الامها قبل ماهي اتروح من الجامعه وامال وافقت وقاللتها ان حتروح تلقاها حاكية الامها وسكرت امعاها وخشن سالمة ومرام للامتحان
"""
وليد ناض في الصبح وحكا الامه ان بيمشو ويخطبوله وحكالها علي سالمة وقاللها اسم عيلتها وطارت من الفرحة وماصدقت روحها واخيرا ولدها الكبير واول فرحتها بتفرح بيه واليوم بتشوف البنت اللي اختارها
"""
في فيلا نبيل نهى اتهدرز مع بسمه بالفون
نهى:باهي ياصامطة امتي بترديلي الزيارة
بسمة:عليك ثقالة يومتها وانتي عندي غير خلينا انرايفو علي بعض قبل
نهي;والله كساد انتي عارفه بعد ماكملنا قراية لا طلعة لا خشة تعالي اتغيريلي جو اشوي
بسمة:صح والله عليك ايام ايام القرايا مرات انقول ياريت ماكملنا
نهى:كل مانذكرهن قريب نبكي انقول ياريت ايتعاودن
بسمة تضحك:تذكري عائشة اللي زمان امعانا كل مانذكرها نقعد نضحك بدموعي من حركات التوحد اللي كانت ادير فيهن وهيا تحكي وخش عليها علي
علي:صباح الخير علي من تحكي من الصبح بس
بسمة تضحك:نحكي النهى علي بنت كانت تقرا امعانا
علي:قصدك تحكي مع نهي وايسقم في روحه
بسمة تضحك;ماعندك عليش اتسقم في روحك مااتحقش فيه
علي;ههه عليك الحانطة المهم سلميلي عليها واجد وطلع
بسمة تضحك;ياحنة ايسلم عليك علي واجد
نهى فرحت:والله تحكي من جدك😍
بسمة;والله نحكي من جدي شكلنا بنزوروك كلنا قريب مش غير انا 😂
نهى تضحك:انشاءلله خوك ايتحرك
بسمة:كان حقيتيه بعد قتله ان نحكي امعاك انتي كيف قعد ايسقم في روحه 😂
نهى تضحك😂ناعليا منه وخلاص
وقعدو البنات ايهدرزو
"""
روحت سالمة من الجامعة ولقت امال عندهم ولقتها حاكية الامها وامها رحبت بالموضوع وقالت عادي دبينه جا من الباب وقعدو ايوتو الجية هل وليد في العشية وجهزو الضيافة كلها ولما قرب موعد جيتهم خشت سالمة ولبست( فستان تركي قصير اخضر ولبست حذاء ذهبي واكسسوار ذهبي وميك اب خفيف وطلعت اتهبل)اشوي ورن عليها وليد وقاللها انهم طلعو وبيجوهم توا
جو اهل وليد وكانت امه وحنه ام بوه وعمته
خشو وام سالمة وامال اسقتبلوهم استقبال حلو ورحبو بيهم وكانو اهل وليد جايبين امعاهم (تورته حلوة وطبق حلو وعصير وبوكيه ورد وكانو امغلفينهم في محل تغليف حلو وراقي)
بعد اشوي طلعت سالمة وسلمت عليهم وام وليد عجبتها سالمة وانهبلت عليها وعجبها اسلوبها وذوقها وطبعا ماخصهم شي من الضيافة واهل سالمة قامو بالواجب وبعدها ام وليد طلبت سالمة وام سالمة قالتلها نشاورو بوها وبعد كم يوم انردو عليكم الرد ام وليد عطت رقمها الام سالمة وخذت رقم ام سالمة عشان ايكونو علي اتصال ويعرفو الرد وهدرزو وتعرفو العيلتين علي بعض وبعدها جا وليد وروح باهله
سالمة اتغير في دبشها وطايرة من الفرحة اشوي ورن فونها وكان وليد😍
سالمة:اهلا حبيبي
وليد:اهلين بمراتي
سالمة:يارب انشاءلله بجد وليد مش مصدقة اللي صار فرحانه بكل
سالمة:يارب انشاءلله بجد وليد مش مصدقة اللي صار فرحانه بكل
وليد:وانا فرحان اكثر منك ولو تسمعي كلام امي عليك اتزيدي تفرحي اخرى
سالمة:شن قالت عليا
وليد;مش عارفه شن تحكي عليك ميته فيك وقالتلي هذي الكنة اللي نبيها طول عمري وحتى عمتي وحني عجبتيهن وحبنك وحبن هلك
سالمة;والله حتى انا حبيتهم وحبيت امك بزيادة لان فعلا باين عليها طيوبة مش زي باقي العمات
وليد:امي طيبة وحتحبيها اكثر بعد اتعيشي امعاها
وقعدو وليد وسالمة ايهدرزو وهاتي علي حب وغرام
جا بات سالمة وصهيب في الليل حكتلهم ام سالمة عاللي صار وقررو يسالو عالعرب قبل وبعدين يعطو الراي وطبعا مهمة السؤال كانت علي صهيب ومن ثاني يوم صهيب قعد يسال وايقصقص عليه من هنا ومن هنا وكل الناس قالوله ان شاب اكويس ومحترم وفي حاله وان هله ناس اكوسين وحكا الكلام هذا الباته ورحبو بالعرب ووافقو عليهم ورنت ام سالمة علي ام وليد وخبرتها بالموافقة وبعد يومين جتهم ام وليد وحددت ان الدفع والبيان ايكون بعد اسبوع
"""
مرن الايام وسالمة لاهية في تجهيزات بيانها وطايرة من الفرح وطول الفترة هذي ووليد تغيرت معاملته مع سالمة وقعد طول الوقت امعاها عالفون ومهتم بيها بكل
""
اليوم اللي قبل البيان وفي فيلا نبيل بالتحديد
نهى في دارها واتكلم في سالمة وجنبها نسمة ونرمين
نهى:صح مشاءلله الف الف مبروك ياسومة
سالمة:الله ايبارك فيك خلاص اهم شي بكرا نبيكن كلكن اتجن راه وحدة منكن اتغيب نزعل منها
نهى:حاظر ياسومة ماانجو الأعز منك سلام
نهى سكرت وملامح وجها تغيرن
نسمة:كنه وجك تغير شن فيه وشن عندها سومة اتباركيلها
نهى:بكرا بيان سومة
نرمين بصدمة:تكذبي
نهى بحزن:وحق ربي صح
نرمين:حي شن بيصير في نبيل توا
نهى:مش عارفه بس ردبالكن وحدة تحكي النبيل
مع خشت نبيل :شن اللي ماتبنش تحكنه ليا
نهى;اه ارتبكت لا شي
نبيل لاحظ ارتباكها ولاحظت وجوه نسمة ونرمين متغيرات
نبيل;احكن شن فيه شن صاير
نهى;قتلك مافيه شي نبولي
نبيل:قتلك احكي باين فيه حاجة سايرة وحاجة كبيرة اخرى
نهى:خلاص نبيل قلنا مافيه شي
نبيل:احكي ياام السان انتي ماتعرفي ادسي شي شن صاير
نرمين مقهورة علي خوها;خلاص نهى خلينا نحكوله شن في الاخير بنت في غيرها مليون
نبيل بخوف:احكي نهى شن صاير
نهى وهيا اتحرك في ايديها علي بعضهن:نبيل مانبيكش تزعل
نبيل:غير احكي بسرعة خوفتيني
نهى:نبيل بكرا بيان سالمة
نبيل بصدمة:شن اتقولي انتي مافيش منها الدوة هذي يومتها حكيت امعاها ومافيش حاجة زي هذي اتبصري صح انتي
نهى:والله ماانبصر وهيا كانت تحكي امعايا توا وعزمتنا
نبيل;مستحيل مستحيل سالمة اتكون الغيري وطلع من الدار ومشى الداره وهو حامق
خش للدار مسك فونه وقعد ايرن علي سالمة وايدز في رسائل وسالمة مااتردش رن ورن ورن ومافيش فايدة صبى وقعد ايخبط في الدار وايكسر مستحيل ياخدك غيري مستحيل ياسالمة وايخبط في راسه عالساس
البنات سمعنه وجن يجرن الداره وفتحن الباب وخشن ولقن الدنيا متكسرة
نبيل بعصبية وصوت عالي:اطلعن برا
نهى طلعت نسمة ونرمين وخشت هيا وسكرت الدار
نبيل:اطلعي برا
نهى:مش طالعة يانبيل معقوله هذا كله عشان بنت
نبيل:انحبها يانهى انحبها مش بيدي
نهى:في غيرها الف يانبيل
نبيل:مانبيش الا هيا منهن مش متخيل بتقعد الغيري مستحيل نسمح للشي هدا ايصير وقعد يبكي
نهى بصوت عالي:افطن الروحك نبيل انت راجل ماتبكيش عشان بنت فضلت واحد اخرى عليك هيا اللي اختارت مافيش حد غصبها لو مثلا سالمة اتحبك وهلها ماعطوها لكي انا اول وحدة انصبي امعاك واندير امعاك المستحيل عشان تاخدها لكن سالمة عمرها مابادلاتك اي مشاعر
نبيل يبكي:حتى ولو انا انحبها انحبها ولو خداها غيري انموت
نهى;مش هدا خويا اللي نعرفه نبيل الراجل اللي قد كلامه اللي نفتخر بيه قدام الدنيا كلها مااينزلش ادموعه عشان بنت واينزل كرامته انت مكانك اعلى من هكي بواجد معقوله يانبيل ياسند اظهري بتموت عشان بنت ونحنا اللي ماعندنش غيرك واللي انحبوك اكثر من روحنا انا ونسمة ونرمين ماعندنش الا انت سندنا وحمايتنا وبابا وماما اللي ايشوفو فيك ومش مصدقين هذوما كلهم مش هامينك
نبيل يبكي:اكيد هاميني يانهى
نهى تمسحله في ادموعه:يبقى خلاص هيا اختارت اتكون مع غيرك عارفين ان هيا اللي خاسره بس انقولو ربي ايهنيها وانت مليون وحدة غيرها اتمناك وصدقيني ياحبيبي حتنساها وحتحب غيرها مع الايام فتره واتعدي وحتقعد سالمة مجرد ذكرى
نبيل ايحط في يده علي قلبه:وهذا شن اندير فيه قوليلي
نهى:اوطى عليه وانت اللي تحكم فيه ساد له اسنين متحكم فيك وساد اللي جاك من وراه كم مرة حكيتلها ورفضاتك وذليت نفسك الها وكم حاجة درتها علي خاطرها وهيا ماعدت هذا كله واختارت حد ثاني ايكون شريك حياتها يبقى حافظ عاالشوية اللي مازال من كرامتك وانساها
نبيل:صدقتي كم مرة ترجيتها تسمحلي انحبها وهي رفضت وكم مرة عرضت عليها نخطبها وهي صدتني وكم حاجة درتها علي خاطرها وعشان نثبتلها حبي ماعدتش شي حتى وهيا تحكي علي حبيبها كنت انتحمل الم قلبي ونسمعها بس هذا كله ماهمها واختارت شخص ثاني
نهى:ها شفت يبقى انساها ودور علي بنت ثانية اتحبك واتحبها
نبيل:انا حندير اللي قلتي عليه بس نبي منك شي واحد
نهى:شنو هو
نبيل:رني عليها من فونك وعطيها ليا لانها مااترد علي رقمي
نهى:وانت شن تبي فيها نبيل خلاص فوتها
نبيل:نبيها في كلام مهم واعتبريها اخر مكالمة بيني وبينها
نهى:اكيد اخر مكالمة
نبيل:اكيد
خذت نهى فونها واتصلت بسالمة
#يتبع
وجعني نبيل الحق لكن زعما شنو الكلام اللي بيقوله السالمة وشن ردة فعل سالمة منه كله حنعرفوه الحلقة الجاية انتظروني 😉
وأسفة لو فيه اخطاء في الاسماء وأكيد رايكم ايهمني وبذات في حلقة اليوم😊😍
وأسفة لو بكيت حد في حلقة اليوم راه والله انا بروحي نكتب فيها ونبكي يعني زي شعوركم بالزبط 😔💔
واسفة بنات عالتاخير من بدري كاتبتها لكن والله النت كاين رايح وتوا غير جا 😊
گـتـابـتـي Koka Saleh 😊
منقولة💖
بليز نبي تفاعل ع الروايه لاني نشبح في عدد المشاهده كل يوم في تزايد لكن مفيش اي تعليق او لايك
طلب وليس امر نبي تفاعل ع الروايه 😭😢💕
