#نـصـيـبـي_فـيـك
الـحـلـقـة الـسـادسـة والـعـشـرون
صباح ثاني يوم سومة وعت وعدت الجناحها لقت نبيل مازال راقد خشت دوشت وطلعت وجت قمعزت عالسرير
سالمة:نبيل نبيل
نبيل فتح عيونه وابتسم:صباح الورد حبيبي
سالمة:صباح النور هيا نوض عشان نمشو
نبيل كرها جيهته وحطها علي صدره ولف ايديه عليها
سالمة حست بشعور حلو وابتسمت
نبيل:بنتك اتهبل سومتي زي البيبي
سالمة:عجباتك
نبيل:اها وانتي كلك عجبتيني تعرفي سومتي ليا ثلاث ايام نرقدش اكويس وانتي مش جنبي تعودت عليك
سالمة ابتسمت:اتصدق لو قتلك حتى انا
نبيل مصدومة:سومة تحكي جد
سالمة:والله الله
نبيل زاد حظنها:وحق ربي انحبك
سالمة:باهي خلاص هيا صبي ودوش عشان نمشو
نبيل:خاطري انخليك في حظني هكي ومعش انحولك بكل
سومة تضحك:باهي بعد انروحو توا خلينا نمشو عشان نتأخروش
نبيل:حاظر ياقلبي
وفك ايديه وسومة بعدت ونبيل صبى وخش دوش وطلع لبس لقى سومة موتية روحها واتسقم في وشاحها لبس هو وانق روحه نبيل جا السومة من الخلف وهي اتشوف الروحها في المرايا ولف ايديه علي خسرها وحط راسه علي كتفها
نبيل:اتهبلي
سالمة:عارفه
نبيل:نجيها المغرورة بس مافيش هروب اليوم راه
سالمة:حاظر
ونزلو مع بعضهم فطرو معاهم لوطة وطلعو ومشو للجامعه وخشو عشان ايجددو قيدهم هما الاثنين سالمة اول ماخشت اتذكر اخر موقف صار امعاها وحاولت تتجاهل الموضوع وخاصة بعد نبيل حس بالشي هذا وحط يده في يدها وزر علي يدها زين بمعنى انا جنبك
"""
وليد في الليل هديل دزتله رساله ان امها وافقت انها تمشي مع وليد وهو فرح ووعي بدري ولبس وتأنق وجاها الساعه 10بزبط خذاها ومشو للجامعه وكان فرحان بكل ووصلو للجامعه ونزلو
"""
سومة ونبيل كملو وطلعو مع بعضهم وهما فرحانين وجوهم سمح وسومة الابتسامة مافارقت وجها وخاصة ان يد نبيل مافارقت يدها
عند الباب وهما بيطلعو خشو هديل ووليد وسومة جت عينها في عين وليد نبيل شاف السومة ولاحظ الابتسامة كيف اختفت من وجها وليد كان ماسك يد هديل ماعبرش الموضوع وكملو وخشو جوا
نبيل زاد حظن يد سومة وطلع بيها بس سالمة كانت في عالم ثاني في لحظة اذكرت كل شريط حياتها مع وليد ولما شفاته يده في يد هديل حست بألم في قلبها
ركبت في السيارة وكانت ساكته تماما ونبيل ماحب يضغط عليها او يحكي اي كلمة وصلو للفيلا ورقو فوق دغري وخشو للجناح امتاعهم وفي دارهم بالتحديد سومة خشت وقمعزت عالسرير وماحكت ولا كلمة نبيل جا قمعز جنبها
نبيل:سومتي كنك
سالمة:شي
نبيل:ماكنت عارف ان بنشوفوه
سالمة:ياريت مامشينا
نبيل:ليش اتقولي هكي سومتي خلاص هو ماضي وعدى وانا وانتي توا عايشين حياه حلوة ومتريحين وانا انحبك وانتي حسيتي بشعور تجاهي
سالمة منزله راسها وساكته
نبيل قرب منها ورفع راسها بأطراف اصابعه:سومتي حبي انا انحبك وجنبك حسي بالشي هذا وقرب يبي ايبوسها سومة لفت وجها للجيهة الثانية
نبيل فهم ان اللي بيديره مش وقته وان سومة متضايقة صبى وجا بيطلع وبعدين لف جيهتها
نبيل:سومة ماتسمحيش للي صار اليوم ايخرب حياتنا بعد ماقعدت حلوة وطلع
سالمة طاحت عالسرير وقعدت تبكي وتبكي وكل الماضي مع وليد اللي كانت حاسبه روحها نساته اذكراته كله وقعدت صورة وليد وهديل االي مع بعصهم قدامها ومافارقتها وحست بقلبها بيطلع من مكانه ونست كل الفترة اللي تقربت فيها من نبيل واحساسها تجاهه اضايقت ومالقتش قدامها الا صاحبتها ورفيقتها مرام ورنت عليها
مرام:اهلين سومة
سومة تبكي
مرام:شن فيه كنك سومة
سومة:شفتة يامرام شفته
مرام:مااتقوليش وليد
سومة:اها هو
مرام;وين شفتيه ونبيل وين
سالمة:شفته في الجامعه ونبيل كان امعايا
مرام:وكان شفتيه ليش دايرة هذا كله
سالمة:كانت ايده في يدها ويضحك امعاها والباين ان نساني خلاص وتبكي
مرام:وكان نساك انتي خلاص معش ايهمك وتوا متجوزة وحرام اديري هكي نبيل شن ذنبه
سالمة تبكي
مرام:نبيل شن دار
سالمة;نبيل ماتكلمش بس قالي ان ايحبني وان جنبي وان الشي اللي صار ماايخرب حياتنا
مرام:سومة اوعي العقلك نبيل ايحبك ولو راجل ثاني كان دارلك قصة ويمكن فيها طلاق بس نبيل امقدر شعورك ومايبيش ايزعلك علي احساب شعوره هو وهذا كله عشان ايحبك بصدق
سالمة تبكي:عارفه والله عارفه وعطيته فرصة ومشاعري بدن ايتحركن وقلت خلاص انسيت الماضي بس لما شفته اليوم اذكرت كل حاجة بينا وكل كلامه ليا والقيت روحي مش ناسية شي وحسيت ان المشاعر اللي تجاه نبيل وهم وكذب كله
مرام:سومة وسعي بالك توا وعدي صلي وادعي ان ربي ايريحلك قلبك من النار اللي فيه واستغفري لان اللي حاسة بيه توا يعتبر خيانه النبيل
سالمة:سلام وسكرت
عدت توضت وصلت وقعدت تقرا في قرأن وتبكي ودعت الربها ان ايريح قلبها
""
وليد في سيارته وكان قريب من عمارة هديل
هديل:وليد ممكن نسالك سؤال
وليد:اكيدة حبي
هديل:اللي شفنها ونحنا خاشين للجامعه هدي خطيبتك اللي فاتت صح
وليد:اها هي
هديل:ممكن نعرف شن شعورك لما شفتها
وليد:عادي زيها زي اي بنت ماشعرتش بشي
هديل:متأكد
وليد;متاكد ونبيك تعرفي ان انتي بس في حياتي توا وانتي اللي انحبك
هديل ابتسمت:طمنتني من بدري وانا خايفة ايكون شعورك تحرك تجاهها
هديل:باهي من اللي امعاها هي اجوزت
وليد:مش عارف معش تبعت اخبارها
هديل:باهي حبيبي
وليد:اهو وصلنا حبي
هديل:شكرا حبيبي لولاك راه السنة قعدت بدون مانقرا
وليد:مستحيل انخليك ماتقريش كنت درت اي شي وتقري تقري
هديل ابتسمت ونزلت ورقت العمارتها
ووليد طلع ومشى الصيدليته وفتحها
""
في الليل سومة مازال واعية وقاعدة متمددة في سريرها ومانزلتش اليوم كله وليد روح ولما سمعاته دارت روحها راقدة لانها تبيش تحكي خش نبيل وشافها راقدة ماحبش يزعجها خش دوش وطلع وجا قمعز عالسرير وقعد ايشوف السومة وهي راقدة طبع بوسه علي جبينها وتنهد من وسط قلبه ورقد سومة حست بنبيل وعرفت ان قلبه واجعه من اللي صار اليوم وفي نفس الوقت ايخبي عشان ايحبها نزلو ادموعها وطول الليل ماقدرت ترقد
""
صباح ثاني يوم نبيل وعى ولقى سومة مازال راقدة ولافه وجها للاتجاه الاخر قرب منها وحظنها وحط راسه علي رقبتها
نبيل:سومتي حبي هيا نوضي عشان نفطرو
سالمة حست بنبيل واضايقت
نبيل باسها علي رقبتها:هيا حبي سادك نوم وبعدين انا مرايفلك من امس ماحكيت امعاك ولا شفتك وجك الحلو بنصبح فيك زي كل يوم هيا
سالمة فتحت عيونها وشالت يد نبيل من علي خسرها وصبت وخشت للحمام من غير ماتحكي ولا كلمة
نبيل تمدد عالسرير وهو قلبه محروق عاللي قاعد ايصير رجاها تطلع من الحمام وبعد طلعت قعدت اتنشف في شعرها
نبيل جا جيهتها ولفها شوره ومسك ايديها:سومتي عارف انك متضايقة نبيش نغصب عليك بس لو حابة نطلعو انسافرو لأي مكان اتغيري جو عادي
سالمة كرت ايديها من نبيل:لا نبيش
نبيل اضايق بكل وخش غسل وجه وغير ادبشه وطلع وسيبها من غير مايحكي ولا كلمة
"""
وليد في داره ايغير في ادبشه بيمشي للمحل فتح الدرج اللي حنب سريره ايطلع في بطاقته ولقى عقد الزواج امتاعه هو وهديل ابتسم ومسكه وفتحه وقعد يقرا فيه اكتشف من مواليد هديل ان عيد ميلادها بعد اسبوع طبعا هو عمره ماسألها عليه ولا هي حكتله جت في باله فكره وقرر ايديرلها مفاجئة وخذا بطاقته ومفاتيح سيارته وطلع للصيدلية
""
نبيل يفطر وكان باين عليه ان جوه مش تمام فطر بسرعه وطلع من غير مايحكي مع حد
بيسان طبعا حست بالشي هذا وفرحت وحست ان الفرصة جتها واخيرا
""
مر اسبوع علي هالحالة ونبيل وسومة يحكوش مع بعضهم نبيل معش حب ايضايقها وسومة ماكانت حابة تحكي امعاه تعمد ان طول اليوم ماايروحش وفي الليل ايروح للفيلا متأخر وتقعد سومة راقدة ويطلع قبل ماتوعى حب ان ايخليها بروحها
"""
اما وليد كان عايش في دنيا ثانية وفي حياته ويبي ايدير مفاجئة الهديل وسومة مافكرش فيها بكل ولا حاطها في باله وكل اللي هي ادير فيه عشانه عالفاضي
مشى المحل حلو حجز كيكة حلوة وعليها اسم هديل وعدى المحل ذهب وخذا الهديل طاقم خيال بكل وشرالها امعاه فستان حلو وحجز في باقة ورد وكان فرحان بكل الاول عيد ميلاد الحبيبته وهي امعاه
"""
سومة في دارها وتتفرج عالتلفزيون فجأة مرت علي اغنية وحطتها عليها وكان اسم الاغنية (ياللي اختارت غيري ايشاركك مبروك)واول ماسمعتها قعدت تبكي ومن حظها النزيك اول ماحطت الأغنية نبيل كان راد بياخد فلوس ولما خش ماحست بيه سمع الاغنية وكانن كل كلمات الاغنية ايدلن علي وليد ولما كملت الأغنية خش ولقاها تبكي عصب بكل وماقدرش يمسك روحه
نبيل:معقوله للدرجه هدي تبكي عليه وانتي مراتي
سالمة تبكي وماقدرت اترد ولا كلمة
نبيل:ردي عليا بعد كل اللي در
نبيل:ردي عليا بعد كل اللي درته عشانك واللي مازال اندير فيه مازال تبكي عليه
سالمة;افهمني نبيل
نبيل:فهمتك واجد وتبعادت عنك وخليتك براحتك قلت فترة واتعدي مانغصب عليها علي امل اتحسي بيا وبغيابي مافرقتش عندك نهائي كل هالشي تحملته عشانك عشان انحبك نبيش انزعلك بس انا مش فارق عندك انشوف فيك بعيوني كيف متضايقة من يوم اللي شفتيه تحسابي هالشي مش مضايقني قاعد بنموت من القهر كل يوم
سالمة تبكي:انا عارفه
نبيل:انتي مش عارفه شي مش فاهمة معنى راجل له ثلاث شهور متجوز ماقربش علي مراته بكل كله لان مايبيش ايزعلها لان ايحبها اكثر من روحه برغم عارف ان قلبها مش امعاه عطاها فرصة اتحبه بعد قربت منه وحس بيها وبشعورها تجاها ابتعدت عنه من جديد ليش ياسالمة انا شن درتلك اكثر من اني كل يوم نثبتلك في حبي اكثر من اليوم اللي قبله لو اتقوليلي نبيل هات عيونك نعطيهم لكي لو اتقولي نبيل موت توا انموت من غير ماانتردد بكل ليش اتعذبي فيا امعاك وقعد يبكي
سالمة تبكي:نبيل انا اسفة
نبيل يبكي:علي شنو اسفة بزبط علي انك تبكي عليه وانتي مراتي علي انك اتفكري فيه وانا امعاك لانك مش راضية اتخليني انقرب منك لانك مش قادرة تتخيلي راجل غيره تعبت ياسالمة تعبت كل هذا علي حساب جرح قلبي علي حساب ادموعي اللي كل ماانشوفك اتفكري فيه تولع النار في قلبي وينزلو ادموعي
سالمة قربت منه:نبيل انا اسفه
نبيل بعدها عنه وعلى صوته:مااتأسفيش لاني معش نقدر انسامحك او انتحملك اكثر من هكي
سالمة:شن قصدك
نبيل:حتفهمي بعدين وطلع وسيبها وخبط الباب وراه
سالمة طاحت عالسرير وقعدت تبكي وتبكي وقلبها محروق من كلام نبيل
""
بيسان سمعت صوتهم وعرفت انهم متعاركين وشافت نبيل كيف نازل وهو حامق حاولت تحكي امعاه بس صدها ومشى وسيبها مالقتش الا ايمان كلمتها وقالتلها الفرصة جتنا ولازم اتجي عشان تعرفي اللي صار
#يتبع
حياتهم تعقدت أكثر وهل المشكله اللي صارت حتكون فرصة البيسان وايمان انهم ايخربو كل شي كله حنعرفوه الحلقة الجاية 😊
الاغنية اللي كانت تسمع فيها سالمة حنزلها في منشور بروحها عشان تسمعنها وياريت كلكن تسمعنها لانهت فعلا اغنية #خيال بكل
معليش تاخرت بس هذا وين كملتها وسهرت عشانكم وعارفه اني مش حنقدر نرقد بس كله ايهون عشانكن
أسفة لو فيه أخطاء في الأسماء وأكيد رأيكم ايهمني 😉
گـتـابـتـي Koka Saleh ☺
منقولة💖
