#نـصـيـبـي_فـيـك
الـحـلـقـة الـتـاسـعـة والـعـشـرون
نبيل طلع وركب في سيارته ومشى للمعرض وصل وخش برم عالمعرض وخش للمكتب امتاعه قعد ايراجع اشوي فواتير عنده وبعدين مسك فونه واذكر كلام ايمان وجاه فضول يعرف شن دازه فتح النت وجاه تسجيل صوتي من رقم ايمان فتح عالتسجيل ولما اسمعه ملامح وجه تغيرن ونبضات قلبه زادن (طبعا التسجيل كان السومة يوم اللي حكت مع ايمان هي سالتها سؤالين وسومة جاوبت السؤال الاول كان انتي اتحبي نبيل والسؤال الثاني هو وليد مازال اتحبيه طبعن فبركن التسجيل وعكسن الاجابات فخلن الاجابة علي وليد انها اتحبه واجد وهذي كانت اجابتها علي سؤال نبيل والاجابة علي انها اتحب نبيل انها مااتحبش ومااتحس تجاهة شي وهذي كانت اجابتها علي سؤال وليد)نبيل حاول يتمالك اعصابه وماايصدقش اللي اسمعه لان سومة اعترفت بحبها له وعارف ان سومة ماتكذبش عليه حار ومعش عرف شن يتصرف وبعدين طلع من المعرض وركب في سيارته ومشى للفيلا وصل ونزل وركب فوق دغري من غير مايحكي مع حد وكان باين عليه ان حامق شفاته بيسان وفرحت كلمت ايمان وركبن فوق عشان يسمعنهم لما ايتعاركو
نبيل خش للجناح لقى سومة لامة الدار وكيف طالعة من الحمام كانت ادوش
سومة اتنشف في شعرها;ماطولتش حبيبي
نبيل قمعز عالكنبة:كملت الشغل وروحت
سالمة:يعني انجهز روحي بنطلعو توا
نبيل:اها جهزي روحك
جت سومة للدولاب وقعدت تختار شن تلبس ونبيل ساكت وماحكش ولا كلمة وفي عقله افكار واجد
سالمة اختارت لبسة وحطتها عالسرير وبتلبس لاحظت سكوت نبيل وكيف سارح
سالمة:نبيل انت كويس
نبيل:اها اكويس
سالمة:حاسه ان فيه شي جوك مش تمام
نبيل سكت وصبى وجا وقمعز عالسرير:سومة بنسألك سؤال واتجاوبي بكل صراحة
سالمة:اكيدة بس شنو
نبيل:انتي اتحبيني توا صح
سالمة قمعزة جنبه:والله انحبك صح ومن كل قلبي
نبيل:ووليد معش يعنيلك شي اكيدة
سالمة:صدقني معش يعنيلي اي حاجة ولا عندي تجاهة اي شعور ولو اتحب مستعدة نحلفلك عالمصحف عشان اتصدقني
نبيل اطمن:لا اكيدة مصدقك من غير ماتحلفي
سالمة:شن خطرلك ليش تسال
نبيل ماحبش يحكي اللي صار عشان ماايضايق سومة:لا بس حبيت انتاكد من كلامك امس
سالمة;وتاكدت واطمنت
نبيل:اها بس عادي نطلب منك طلب
سالمة:شنو
نبي مسك ايديها:سومتي انا انحبك واجد ونبي منك ماتوثقيش في حد لان صدقيني مافيش حد فيه ثقة وفيه ناس واجدة تبي اتفرقنا يعني نبي منك مش اي واحد تحكيله اسرارنا يعني اي شي ايصير خليه بيني وبينك
سالمة:حاظر بس انت من تقصد
نبيل:اي وحدة من بنات العيلة مهما كانت اتبان طيبة قدامك والله ياسومتي مافيش وحدة فيها ثقة فيهن وانتي شفتيهن يوم الفرح مرات تضحكي عليا بس لان اغلبهن حاولن ايتقربن مني واتكون بينا علاقة وانا انصد فيهن فكلهن توا غايرات ومايبليش الخير
سالمة تضحك:يعني حبيبي البنات ميتات عليه وانا خذيته منهن كلهن
نبيل:ايوا واي وحدة فيهن حتى لو انتي حسيتيها طيبة ماتوثقيش فيها حتى لو ايمان
سالمة:حرام عليك ايمان طيبة وحتى في عركتنا الاخيرة تنصح فيا اني نعترفلك بحبي وقعدة اطمن فيا واتقولي نبيل ايحبك مش حيسيبك
نبيل:مافيش حد طيب توا حتى هي انتي مش عارفه نيتها فلو سمحتي معش تحكي اي شي ايخصنا او شي ايخص بيك الاي حد حتى ايمان خلينا ناخدو احتياطنا عشان يقدرش حد ايفرقنا
سالمة:حاظر
نبيل:ونتفقو اتفاق لا انا انصدق اي شي نسمعه ولا انتي اتصدقي اي كلمة اتجيك عليا
سالمة:نبيل انت كنك انا مش فاهمة عليك فيه شي صاير امعاك
نبيل خاف لو يحكي اتصير بينه وبين سومة مشكله وخاصة لو عرفت مكالمته مع ايمان فماحبش يحكي الموضوع
نبيل:لا مش صاير شي بس تفاديا الاي مشاكل ايسيرن نتفقو الاتفاق هدا وانتواعدو عليه
سالمة;خلاص اتفقنا وعد مش حنصدق عليك شي
نبيل:وانا نوعدك مش حنصدق شي ينحكالي عليك وباس اكفوف ايديها وسومة صبت عشان تلبس ويطلعو
لبست سومة وكملت وطلعو وهما نازلين تلاقو مع بيسان وايمان عالدروج بيسان اول ماشافتهم مع بعضهم لوت بوزها وخشت الدارها اما ايمان كانت مصدومة كانت ترجى في عركة ومشكله نزلو ايديهم في ايدين بعض ابتسمت ابتسامه خفيفة وهي كان قلبها نار وهما نزلو وهي مشت الدار بيسان
ايمان:شفتيهم ماتعاركوش لا نازلين وايديهم في ايدين بعضهم اخرى
بيسان:انا قاعدة بنموت خاطري نعرف شن صار بينهم كان المفروض توا تعاركو بس ليش صار العكس
ايمان:الباين مش حنقدرو انفرقوهم وانتعبو في روحنا عالفاضي
بيسان;بس انا مش مستسلمة وراهم وراهم لين يفترقو وحنفكر في خطة جديدة وحتشوفي
ايمان:بيسان ممكن نسألك سؤال
بيسان:اسالي
ايمان:انا فكرت واجد ماعرفتش انتي شن مستفيدة من ورا كل شي اديري فيه يعني انا عندي هدف نبي نبيل ايكون ليا بس انتي قلتي تبيش نبيل معناها شن تبي ولو تبي الصدق انا خايفة اتكوني تجري بيا حتى انا وبعدين تاخدي نبيل
بيسان تضحك:واااو علي تفكيرك بس حنريحلك عقلك من التفكير وانقولك ليش انا اندير هكي
ايمان:ياريت لان بجد تعبت وانا انفكر
بيسان:انا في امريكا حبيت شخص من كل قلبي كان من اصل لبناني كنت مستعدة اندير عشانه كل شي هو كان ايحبني واستمرت علاقتنا 3اسنين وبعدين اكتشفت ان ايخون فيا مع صاحبتي وحبها اكثر ماحبني واتجوزها ومن يومها وانا ماانحبش انشوف اي اثنين ايحبو بعض كنت تقعد نار فيا لين انفرقهم ممكن قعد شي نفسي بس هذا احساسي وقعدت اندير هكي لاي اثنين انشوفهم ايحبو بعض كل اصحابي في الشله لما اثنين ايحبو بعض نقعد وراهم لين انفرقهم من غير مايعرفو ان انا السبب صح مرات نندم لكن بعدين انقول يستاهلو لان مافيش حب وكله كذب ولما رجعت مانكذبش اني كنت حاطة نبيل في راسي بس بعد معاملته ليا هكي عشانها وشفته كيف ايحبها قلت لازم انفرقهم وخاصة لما سمعت سالمة تحكي عليا واتقول وقحة حطيتها في راسي لانها شايفة روحها وواثقة في حب نبيل ليها بزيادة وانا حنوريها وانوريها شوفة النفس والثقة الزايدة في الراجل وين اتودي
ايمان:انتي هكي خوفتيني يعني لو خذيت نبيل وحبني مرات اتفرقينا
بيسان:لا مااتخافيش الواحد انخرب عليه مرة وحدة وبعدين نبيل انتي تستحقيه لانك اتحبيه اكثر منها واصلا الشي الاهم بعد انتم خطتي وانفرق بينهم وانخليك انتي تاخدي نبيل بنرد انسافر الامريكا انا الجو هنا ماعجبنيش مش حنقدر انعيش هنا
ايمان:معقوله وامك اتخليك اتسافري بروحك
بيسان:انا توا بالغة وكبيرة ومسؤوله عن نفسي وتصرفاتي وماما تأمن بالحرية واصلا انا وهي متفقين ان لو ماانسجمتش هنا بنرجع غادي وانكمل قرايتي وبنعيش في امريكا
ايمان:اها لانك تعودتي عا العيشة في امريكا بس المهم توا شن انديرو في فيهم
بيسان:اصبري عليا اشوية انفكرلهم في شي مهم
ايمان:اهو قاعدة صابرة بس انا معش انتحمل انشوفهم مع بعض اكثر من هكي كل يوم انموت الف موته انا اليوم بنرجع الحوشنا ولو فيه اي شي صار امعاك حتكلميني
بيسان:تمام ماشي
"""
نبيل وسومة مشو المطعم حلو وتغدو وكان جوهم خيال وبعدين ركبو في السيارة ادهورو اشوية وبيرجعو عالفيلا
سالمة:حبيبي ليا ايام علي هلي بنمشيلهم
نبيل:حاظر حبيبي انخطمو عليهم توا اتشوفيهم
سالمة:خليني عندهم لين ترجع انت بعدين تاخدني
نبيل:تمام سومتي
خطم خذالها حلو وعصائر ومشو الحوش هلها ونزلو نبيل قعد اشوية امعاهم وبعدين خلى سومة عندهم ومشى للمعرض
سومة كانت مرايفة علي هلها واجد واتهدرز هي وامها ومنسجمات جتهم امال في العشية خرفت امعاهن وروحت عالمغرب وسومة وامها خشن للمطبخ دارن عشا مع بعضهن وتعشو الكل في اجواء حلوة ومناقرات صهيب وسومة طول الوقت
بعد العشا مقمعزات سومة وامها ودودي ايهدرزن وصهيب مقمعز يلعب في بلستيشن جنبهم
صهيب:سومة تعالي العبي امعايا بلستيشن
سالمة:لالا مش خاطري نلعب
صعيب'?:باهي وراس سومة انزلي نلعبو
سالمة:باهي لكن بشرط اتخليني انفوز
صهيب:تي ملحي شنو خليني انفوز نلعبو لعبة مسقمة واللي ايفوز يطلب من الثاني طلب
سالمة:معناها نلعبو مصارعه مش كورة
صهيب:باهي تمام تعالي ووتي روحك الطلبي لانك حتخسري
ونزلت سالمة قمعزت جنب صهيب وبدو يلعبو ودودي اتشجع في سالمة بعد لعبة كلها حرق دم وعياط وصوت عالي واخيرا سومة فازت وقعدة هي ودودي ايعيطن واينطن متشمتات في صهيب اللي كان واثق من فوزه
صهيب غمتله وقعد حامق
سالمة تقهر فيه:تعالي دودي انفكرو شن نطلبو
دودي اتفكر:امممم انا نبي ذولاطي
سالمة:حتي انا نبي جولاطي زي دودي ونبي نمشو نشروه امعاك مكسدين
صهيب غامتله وماردش عليهن
سالمة:هيا صهيب نمشو هذا طلبنا
صهيب:لالا فوتني مش جايبلكن
سالمة:لالا انت اتفقت امعانا
دودي:لالا انا نبي ذولاطي
سالمة:لالا انت اتفقت امعانا
دودي:لالا انا نبي ذولاطي وبدت تبكي
سالمة اتسكت فيها:اس دودي صهيب توا ايجيبلنا
صهيب:لا مانيش طالع خاطن وجي بنلعب
سالمة ودودي سكنله وهو معش رد عليهن وقعد يلعب سومة ودودي غمتلهن من صهيب واتفقن ايطفنله البليستيشن خلنه لاهي وطفنه له ومشن يجرن دودي مشت تجري الباتها اما سومة لحقها وطلعت تجري للجنان صهيب زرها وبيمسكها مع خشت نبيل جت تجري وانطمرت وراه
سالمة:نبيل فكني منه
نبيل قعد ماسكها وصهيب بيضربها
صهيب:حول يانبيل خليني انوريها
نبيل:تي كنكم شن فيه
صهيب:هي ودودي طفلي البلستيشن وانا نلعب
نبيل يضحك:عليش درتن هكي
سالمة:قالي العبي امعايا واللي ايفوز يطلب طلب وبعد انا فزت قتله انا ودودي نبو جولاطي مابش ايجيب وطلع يضحك علينا نحنا طفيناله البلستيشن
نبيل:وليش ماجبتلهن انت درت ارهان ليش ماوفيت بيه
صهيب:عناد مانبيش انجيبلهن
سالمة:كذاب عشان خسرته
صهيب:حول خليني انوريها ومسك يدها
نبيل فكها منه وقعد ماسك سومة:لا وين اتوريها بعدها تلقاني انا قدامك
صهيب:ماشي ماشي ياصاحبي اتبعيني عشانها
نبيل:ولا مافيها هدي سومة حتي روحي انبيعها عشانها
سالمة:باهي يانبيل قوله نبو جولاطي حرام دودي تبكي
نبيل:عدي جيبيها والبسي عشان نمشو انحيبو جولاطي
سالمة:اييي ومشت تجري وقفت عند للباب وولفت الصهيب
سالمة تضحك:المهم خسرتك وخشت تجري
صهيب بيلحقها نبيل مسكه
نبيل:تي بطل ياراطل ماتخيلت عقلك اصغير هكي
صهيب يضحك:مش قصة عقلي صغير انت مش عارف سومة بعد تمسك في حاجة وتبي الصدق ماانحبش حد ايفوز عليا
نبيل يضحك:هبل انت واختك
طلعن سومة ودودي ومشن مع نبيل شرالهن جولاطي وادهورو اشوية ورحو حطو دودي في الحوش ومشو للفيلا نزلو خرفو مع هل نبيل اشوية وبعدين رقو فوق
نبيل خش ايدوش وسومة اتغير في دبشها ورن فونها بحتت لقتها مرام
سالمة:اهلا مرومة
مرام:اهلين سومة شن اخبارك
سالمة:تمام شن اخبارك انتي
مرام:تمام عندي لكي خبر ايهبل
سالمة:شنو
مرام:انا حامل
سالمة قعدت اتعيط وفرحانة:نجك ليا ياقلبي الف الف الف مبروك
نبيل طلع من الحمام علي صوتها ومش فاهم شي وكان لابس شورت راب ومن فوق مش لابس شي
مرام:الله ايبارك فيك قاعدة فرحانة بكل ياسومة
سالمة:وانا فرحتلك ياكلبة بتقعدي ام بس قوليلي كيف عرفتي
نبيل فهم الموضوع وابتسم وقرب من سومة وجا من وراها وحظنها
مرام:ليا كم يوم تاعبة نحسابه برد بعدين توا حسام جا وجايبلي امعاه اختبار حمل وزرني انديره مع اني كنت انقوله لا انا متاكدة مش حامل وبعد جربته طلع ايجابي وبكرا بنمشي انتأكد وانتي اول وحدة خبرتك
سالمة:نجك ليا ياسمحتي انشاءلله اتجي بنوته وتطلع تشبهلي 😂
نبيل قعد اينابش في سومة وايبوس فيها في رقبتها وهي تحكي وسومة ذابت وقعدت اتحاول اتبعده منها بس ماقدرت
مرام تضحك;ان شاءلله تطلع تشبهلك وانشاءلله العقبالك ياقلبي
سالمة اتبعد في نبيل لان ذوبها بكل بحركاته:ان شاءلله بس قوليلي شن شعور حسام توا
نبيل فنص عيونه وقعد ايعض في سومه في رقبتها علي سؤالها عالراجل
مرام:قاعد طاير من الفرحة ومش مصدق ان بيقعد اب
سالمة بعدت نبيل ومشت تجري وهو وراها:ربي ايهنيكم ياقلبي
مرام: ان شاءلله بس انتي كنك تصرفاتك غريبة وداهشة
سالمة تضحك:من الصامط نبيل
مرام فهمت وقعدت تضحك:خلاص سلام انسيبك له خير مااتسير حاجة وانا معاك
سالمة تضحك;سلام وسكرت
نبيل:صار شن شعور حسام
سالمة:عادي راجل صاحبتي نسال عليه
نبيل:والله انوريك
سالمة مشت تجري ونبيل وراها ومسكها وشالها وحطها عالسرير وجا عليها ومسك ايديها فوق
نبيل:ها وين بتريحي مني توا
سالمة:نبيل بطل
نبيل:شن بطل والله ماامخليك ونزل عليها وباسها علي شفايفها وسومة اتحاول اتبعده نبيل كمل باقي بوساته بكل حب سالمة استسلمت النبيل وطبعا الباقي #مششششششفر 😂
""
ثاني يوم نبيل مشي الحوش عمه عساس بيشوفهم وبعدين حذر ايمان ان لو اتعرضلهم مرة ثانية او اتقرب من سومة ان بيحكي الباتها كل شي
ايمان خافت ورنت علي بيسان وحكتلها وقالتلها اطلعها برا اللعبة لكن بيسان قالتلها الفترة هذي تقعد بعيدة وحتى هنا معش اتجي لحدت ما اتفكر في الخطة اللي في راسها وتعرف كيف اتفذها وفي وقتها حتكلمها وقنعتها انها لو اتحب نبيل مااتنازلش بسهوله ايمان اقتنعت بكلامها ووافقت
""
مرو يومين وهل صهيب جو حددو يوم الفاتحة والبيان واتفقو ايكونن في يوم واحد بعد اسبوع
مر الاسبوع وسومة ونبيل جوهم فوق الخيال وجا يوم البيان وسومة ونرمين عند الكوافيرة بعد قرو الفاتحة نرمين اتمكيج فيها الكوافيرة وجت رساله علي فونها
نرمين:سومة افتحي شوفي شنو الرسالة
سالمة فتحت الرسالة وقعدت تضحك
نرمين:كنك تضحكي
سالمة صهيب طلع رومانسي وانا ماعندي علم
نرمين تضحك:شن داز
سالمة:دازلك ياحنة واخيرا قعدتي حلالي ياام السان
نرمين تضحك:وين الرومانسية في الموضوع فيه واحد ايدز الحبيبته ياام السان
سالمة:شن بيكذب عليك هذا الواقع
نرمين;والله انوريك غير انكمل
وكملت مكياج وطلعت اتهبل وجا نبيل خداها هي وسومة للمصوراتي وجا صهيب وصورو نرمين وصهيب مع بعضهم وكانو طايرين من الفرحة ومايخلش الامر من المناقرة امتاعهم وحتى سومة ونبيل صورو مع بعضهم
وبعدين مشو للفيلا وجو هل صهيب وكان يوم ايهبل
اما بسنت كانت قريب اتموت وطول الوقت اتزن علي بيسان عشان ادير حاجة اتفرقهم وبيسان واعدتها ان عن قريب اتفرفهم هما الاربعه
""''
مرو اسبوعين ووليد كان مسافر برا ليبيا ورجع وكان مغير جوه وطلع هديل من حياته تماما وفتح صفحة جديدة
""
في الليل وليد في داره وفاتح نت خشت عليه امه
ام وليد:مازال واعي
وليد:اها مش جايني نوم تعالي انهدرزو
ام وليد قمعزت:ها طمني غيرتلك جوك السفرة وقدرت تنسى كل اللي صار
وليد:الحمدلله توا خير من الفترة اللي فاتت
ام وليد:الحمدلله
وليد:تعرفي ياامي طول الفترة اللي فاتت وانا انفكر في اللي صار امعايا القيت اني نستاهل اللي صار
ام وليد:الستر ياربي ليش تستاهل
وليد:ربي عاقبني لاني اللي صارلي نفس اللي انا درته في سالمة برغم انها حبتني من كل قلبها بس انا ماقدرتش وهذا عشمها فيا
ام وليد بحزن:اكبر خسارة هي خسارتك السالمة
وليد:فعلا والله انا قاعد بنموت من الندم ان ودرت بنت زي هدي من ايديا ياريت لو نقدر انرد الزمان لاورة اشوي كنت انحافظ عليها ومااندير اللي درته
ام وليد:خلاص كلمة ياريت ماتنفع
وليد:انتي ماسمعتي عليها شي بعد اللي صار ولا عاد كلمتيها
ام وليد:الحق انت حشمتني امعاهم معش عندي وجه انكلمها ولا نحكي امعاها بس عليش تسال
وليد:انحاول انصلح اللي درته بس خايف اتكون اجوزت او انخطبت
ام وليد:انشاءلله تقعد مازال قاعدة وياريت ترضي ترجعلك ماتصورش قد شنو متمنية اتكون كنتي
وليد:المشكلة شفتها الفترة اللي فاتت مع واحد في الجامعة انشاءلله مايطلع خطيبها او راجلها
ام وليد:تبي نسالك عليها
وليد:لا ياامي انا حنسأل ونعرف بطريقتي وانشاءلله اتكون مازال مااجوزت لاني فعلا توا بنصلح غلطي ونبيها بجد اتكون مراتي لاني مستحيل نلقى زيها
ام وليد:ان شاءلله اتكون من نصيبك
وليد:ان شاءلله
ام وليد: انا نعست وبنرقد
وليد:تصبحي علي خير
ام وليد:وانت بخير وطلعت
وليد قعد ايفكر كيف بيوصل في سالمة لان فعلا كان ناوي يرجعلها وكان واثق من حب سالمة له ومتأكد ان لو رجعلها حترجعله لانها اتحبه بصدق
#يتبع
الحكاية بدت اتعقد مع عشاقنا ووليد رد ايفكر في سالمة وبيرجعلها من جيهة ومن جيهة ثانية بيسان ومكرها وخططها اللي بتنفذهن عشان اتفرقهم لكن هل تقدر اتفرقهم وهل سالمة حتأثر بعد تعرف ان وليد بيرجعلها كله حنعرفوه في الحلقة الجاية 😊
طولت في التنزيل لاني طولتلكم الحلقة وان شاءلله اتنال اعجابكن ☺
أسفة لو فيه اخطاء في الأسماء واكيد رأيكم ايهمني 😉
گـتـابـتـي Koka Saleh ☺
منقولة💖
