#نـصـيـبـي_فـيـك
الحـلـقـة الرابـعـة والـثـلاثـون والأخـيـر
(زي ماقلنا الحلقة قسمتها جزأين وهدا الجزء الثاني من الحلقة 34والأخيرة)
طبعا مرام كانت عارفه ان سومة لما اتحط شي في راسها اديره وخافت انها اتنزل البيبي قعدت اترن علي رقم امها مقفل معش عرفت كيف تتصرف في اللحظة هدي مالقتش قدامها الا نبيل وطبعا كان عندها رقمه لان مرة سومة رنت عليها منه فتشت لين لقاته ورنت عليه
نبيل رد:الو السلام عليكم
مرام;ايوا نبيل انا مرام صاحبة سومة
نبيل:اهلين مرام
مرام;نبيل بنقولك شي مهم
نبيل بخوف:شن فيه
مرام:سومة يانبيل حامل
نبيل بفرحة;تحكي جد
مرام;اها لكن توا بتاخد حبوب وبتنزل البيبي لو سمحت دير حل واصرف انا اتصلت بامها مقفل
نبيل:انتي شن تحكي معقوله سومة ادير هكي
مرام:انا قتلك ولو سمحت اصرف بسرعه
نبيل:حنصرف توا وسكر
نبيل كان قاعد في المعرض وطلع دغري وركب في سيارته وطلع بس خاف سومة تاخد الحبة قبل مايوصل طلع فونه ورن علي صهيب
صهيب رد:ايوا نبيل
نبيل:صهيب وين قاعد
صهيب:توا طالع من الحوش
نبيل:انا توا عرفت ان سومة حامل
صهيب:اها من قالك
نبيل;مش هدا الموضوع راهي بتاخد حبوب وبتنزل البيبي امشيلها توا ياصهيب
صهيل:شن تحكي انت توا انشوفها توا وسكر وخش يجري السومة وفتح الدار وخش ولقها حاطه في جنبها كاسة مية وماسكة الحبة واتشوفلها صهيب كرها من يدها
صهيب:انتي انهبلتي معقوله ياسومة بتقتلي روح
سالمة:خلاص ياصهيب تعبت بنتريح مليت
صهيب:لما تقتلي الطفل اتريحي هكي
ام سالمة سمعتهم وخشت تجري
ام سالمة:شن فيه كنكم
صهيب:سالمة انجنت وبتنزل البيبي
ام سالمة انصدمت:معقوله ياسالمة حرام عليك بتشركي انتي
سالمة تبكي:استغفر الله مش هكي بس انا تعبت
ام سالمة قمعزت جنبها:سومة هدا اوليدك معقوله هكي ايهون عليك
نبيل وصل الحوش هل سالمة ولقى الباب مفتوح وخش يجري ووصل للدار
سالمة تبكي:لا ياماما ماايهونش بس انا معش نبي شي ايذكرني بنبيل
نبيل:سومة انتي شن تحكي معقوله بتحرمينا من اوليدنا
سالمة تبكي:نبيل افهم معش نبيك كرهتك وكرهت اي حاجة منك
نبيل قرب وقمعز عالكرسي قدامها ويبكي:سومة حتي لو كرهتيني الطفل مالش ذنب عاقبيني انا بس هو لا
سالمة:ذنبه انك انت باته وانا كرهتك خلاص لو سمحت اطلع برا واطلع من حياتي كلها
نبيل:انتي لو سمحتي حافظي عا البيبي ماتحرمينيش منه
سالمة:نبيل اطلع ولو عالبيبي تقدر تجوز وايجوك عشرة مش واحد
نبيل يبكي:سومة انا مانبيش العشرة نبي هدا منك انتي ويكفيني عن الدنيا كلها نبي انتي بس اتكوني ام عيالي
سالمة صبت:بعد يطلع من هنا قولولي لان معش عندي خلوق نسمعه او انشوفه وطلعت
نبيل يمسح في وجه:قولولي شن اندير عشان اتسامحني
ام سالمة:بنتي وعارفتها لما حد يغلط فيها مستحيل اتسامحه ربي ايعينك يااوليدي وانشاءلله ايحن قلبها عليك
نبيل صبى:عمتي خليك جنبها وافطنيلها وراه ادير شي فيها او في البيبي
ام سالمة:مااتخفش حنقهد امعاها ومش حنغفل عليها بكل
نبيل طلع وقلبه محروق من الكلام اللي سمعه من سالمة واللي رافضة تحكي او تسمعه ركب في سيارته ومشى للفيلا وخش ورقى فوق من دون مايحكي مع حد وشافوه كلهم وعرفوه ان متضايق نهى صبت ولحقاته عشان تعرف كنه(واكيد اتقولو نهى كنها ديما قاعدة نهى زي ماقلنا حامل واتوحم وجايها وحامها علي حوشها وقاعدة عند هلها)
نبيل خش الداره وقمعز عالكنبة وهموم الدنيا فوق راسه نهى خشت عليه وشافت حالته جت وقمعزت جنبه
نهى:نبيل كنك شن صار امعاك
نبيل:تعبت حاولت في سومة واجد مش راضية اتسامحني انا انحبها وحياتي بلاها قعدت جحيم
نهى:امشي اخرى واحكي امعاها لين اتسامحك
نبيل:هدي جيتي من عندها قالتلي كارهتك وكارهة اي حاجة منك انا اللي غبي بعد ماحبتني وعطتني قلبها درت هكي وخليتها تكرهني سومة قالتلي حتى البيبي اللي مني ماتبيش وكانت تبي اتنزله لانها كارهتني وقعد يبكي
نهى:قصدك سومة حامل
نبيل:اها توا كيف عرفت
نهى:وقاعد هنا اخرى المفروض توا ادير المستحيل مش اتايس واتجي اتقمعز هنا انت اتحب سومة وماتقدر اتعيش بلاها وتوا عندك دافع اكثر في طفل منها يعني من الانسانة اللي اتحبها المفروض اتمسك بيها اكثر من قبل وماتستسلم بسهوله انا نعرفك يانبيل انت في حب سومة مافيش يوم استسلمت برغم ان قلبها كان مع غيرك قعدت اتحاول وماأيست لين خليتها اتحبك ومافيش يوم يأست تبي تستسلم توا بعد حباتك وعطاتك قلبها سومة بس زاعلة منك وزعله كبيرة لان اتهمتها في شرفها ومافيش بنت اتحمل هكي لذلك ببتعب وانت اتحاول اتخليها اتسامحك بس مااتأيس لان مع المحاولات حتسامحك لكن لو ايست حتقول انك مااتحبهش وايست بسرعه
نبيل يمسح في دموعه:صح امعاك حق انا مش حنستسلم بسهوله وحنخليها اتسامحني
نهى:صح وتو فكر شن ادير
نبيل صبى:انا عرفت شن اندير وطلع
نهى:يارب اتسامحك وترجعو البعضكم لان فعلا حبكم صادق
"""
نبيل رن علي صهيب وقاله نبيك ضروري وصهيب قاله علي مكانه ونبيل جاه صهيب كانو معاه اصحابه سيبهم وركب مع نبيل في سيارته
صهيب:شن فيه شغلتني
نبيل:انا نبي سومة نبي انردها ونبيها اتسامحني
صهيب:بس سومة رافضة اتردلك وكان تبي الصدق لنقني حتى انا بعد اللي درته مانبيها اتردلك
نبيل:انا ياصهيب ماعنديش خوت وديما نعتبر فيك خويا الصغير ومانبيك تزعل مني صح غلطت وامعاك حق وحق علي عليا واللي اترضيك انديرها بس صبي امعايا لين انخليها ترجعلي
صهيب:وانت عارف معزتك عندي وديما معتبرك خويا الكبير وعن نفسي اسفك قبلته لكن سومة صعب اتسامحك انا عارفها اكويس
نبيل:افهمني ياصهيب ولله مانقدر انعيش بلاها حياتي جحيم الدنيا بلاها مظلمة سومة حب حياتي مافيش بنت غيرها قدرت تاخد قلبي ولو ماخديتها واللخ والله مانجوز في يوم ودمعو عيونه
صهيب وجعه نبيل:باهي كيف نقدر انساعدك
نبيل:انا سومة حكيت امعاها بس رافضة تحكي امعايا ومش عاطيتني فرصة حتي اندافع علي روحي لازم انكون امعاها في مكان بروحنا عشان تسمعني
صهيب:انت شن تحكي انت طلقتها راه
نبيل:طلقتها صح بس هي حامل توا ونقدر انردها في اي وقت ومحسوب انا زوجها وماتقدر تطلق او تجوز لين اتجيب البيبي وبعدين انا نبي انكونو بروحنا عشان انفهمها ونحكيلها ونقدر نقنعها وانت عارفني ياصهيب وعارف شنو سومة بالنسبة ليا انا نبيها وانحبها وشاريها ومش مستغني عنها لا اليوم ولا بكرا ولا العمر كله
صهيب:انا عارف الشي هدا وعارفك انت شنو
نبيل;معناها ساعدني
صهيب:تمام انساعدك بس كيف
نبيل:نبي نخطفها
صهيب انفجع:شنو من جدك تحكي وبعدين حامل تخيل ايصيرلها شي
نبيل:مااتخاف مش حيصيرلها شي وبعدين انا انخاف عليها اكثر منك واللي في بطنها وليدي
صهيب:باهي انفضيلك الحوش واحكي امعاها خطف لا
نبيل:باهي تمام موافق بس قولي انت تقدر اتفضي الحوش
صهيب:اها بكرا كلهم ماشيين اللمة امال وسومة مش ماشية انت تقدر اتجي في الوقت هدا
نبيل;تمام
صهيب:خلاص بكرا يمشو هلي انرن عليك
نبيل:وانا نرجا فيك
نزل صهيب الاصحابه ونبيل مشى للمعرض
وكمل اليوم من دون احداث تذكر
"""
يوم جديد وهو اليوم اللي فيه ايتحدد مصير نبيل وهل حتزين حياته برجوع سالمة او حيعيش في جحييم من دونها
في العشية وتحديدا الساعة 4 نبيل في داره وقاعد علي نار ويرجى في رنت صهيب اشوي وصهيب رن عليه
نبيل رد بسرعه:ايوا صهيب شن صار
صهيب:هلي طلعو توا وانا توا طالع وحنخليلك الباب مفتوح خمس دقايق وتعال
نبيل:خلاص تم خمس دقايق وانجي
مرو الخمس دقايق وكانن علي نبيل اطول خمس دقايق في حياته وبعدين طلع من فيلتهم ومشى الحوش هل سومة ولقى الباب مفتوح وخش ولقى باب دار سومة مفتوح خش ولقاها راقدة في سريرها ومتغطية ويسمع في صوت خفيف وعرف ان سومه تبكي
نبيل:ياريت متت ولا شفتك في يوم تبكي بسببي
سومة حولت الورغان:انت شن خششك هنا
نبيل:خشيت عشان انفهمك وانتأسف منك عشان اتسامحيني
سومة صبت من السرير وتبكي:مستحيل انسامحك انت هنتني وماوثقتش فيا ولا في حبي وطعنتني في شرفي
نبيل:سومة انتي عارفه اني واثق فيك بس انا شفت بعيوني كيف تبيني انكذب ماخطرش في بالي بكل انها اتكون خطة
سالمة:حلفتلك وطلعتني نكدب وقتلي حبك ليا كذب وقلت رخيصة وانسيت وعدك ليا يوم اللي قلت مااتصدقيش اي شي عليا وانا مش حنصدق طلع كلام وتوا تحمل نتيجة تسرعك من اول موقف صار طلقتني وماعديتش حتى حبنا
نبيل:والله مااول موقف قبل هكي سمعوني تسجيل وانتي اتقولي فيه انحب وليد وماصدقتش وكل شي داراته بيسان كنت انفوت فيه وحتى معش حكيت امعاها وحذرتهن اكثر من مرة بس مانحساب توصل امعاهن للدرجة هدي يعني لما شفت وليد ماخطرنش عليا
نبيل:والله مااول موقف قبل هكي سمعوني تسجيل وانتي اتقولي فيه انحب وليد وماصدقتش وكل شي داراته بيسان كنت انفوت فيه وحتى معش حكيت امعاها وحذرتهن اكثر من مرة بس مانحساب توصل امعاهن للدرجة هدي يعني لما شفت وليد ماخطرنش عليا بكل ولا فكرت ان اتكون بينهم صله ببعضهم
سالمة:هدوما شياطين وقدرو ايفرقونا لان انت صدقتهم وماكان حبك صادق
نبيل:سومة انا والله انحبك والله انموت من دونك انتي حياتي كلها مستحيل انتخلى عنك عطيني فرصة وحده ونوعدك لو انشوف بعيوني مرة ثانية انكدب عيوني وانصدقك
سالمة تبكي:خلاص نبيل انا كرهتك مستحيل انردلك لو قعدت اخر راجل في الدنيا
نبيل يبكي:سومة انتي هكي بتقتليني شن ذنب طفلنا تحرميه من ان ايعيش بينا انا غلطت بس هو ماعنده ذنب سومة فرصة وحدة بس وحنخليك اتحبيني من جديد صدقيني حياتي من دونك ماالهش اي معنى
سالمة لفت وجها للساس:خلاص نبيل كل شي انتهى الهنا وبس واطلع معش بنشوفك بكل اطلع برا من حياتي كلها البيبي حنربيه بروحي مانبيكش انت ولا نبيه يعرف انك باته انا كرهتك وحنخليه يكرهك زيي انا انسيت كل اللي كان بينا اطلع توا بروحك احسن ماانعيط وانلم عليك الدنيا كلها
نبيل يبكي:معناها معش عندي سبب انعيش عشانه اذا انتي معش اتحبيني وكرهتيني وبتحرميني منك ومن البيبي معش عندي عليش عايش وطلع مسدس من لاوره وسحبه وحطه علي راسه
سومة سمعت الصوت ولفت
نبيل زر بصبعه علي زناد المسدس
سومة خافت وقعدت تبكي
نبيل ادموعه ينزلو وابتسم السومة اخر ابتسامه وزاد زر عالزناد
سومة جت تجري ورفعت يده فوق الطلقة طلعت وطبت في الصقف
سالمة تبكي:انت شن ادير يامجنون
نبيل:بنموت لاني بلاكي محسوب ميت
سومة حظناته ونبيل ضمها بالقوة وقعد حظنها قريب 10دقايق حظن كان كله شوق وارياف
سومة بعدت من نبيل وكان ماسكها من خصرها
سالمة:انت مجنون
نبيل وايحرك في يده علي وجها:مجنون لاني انحبك انحبك انحبك انحبك ياسومة
سالمة وادموعها ينزلو:وانا انحبك
نبيل قرب وباسها علي شفايفها وسومة استسلمت للبوسه وكانت بوسه كلها حب صادق وحنية وارياف واستمرت 5دقايق
كملو بوستهم
نبيل:خلاص سومتي بترجعي امعايا صح
سالمة:بنرجع بس خايفة ايصير نفس اللي صار مرة اخرى
نبيل:اللي دارو هكي خدو جزاتهم وانا وقدامك توا وشاف مصحف وجابه وحطه قدامها
نبيل حط يده عالمصحف:اهو المصحف وانا متوضي وكيف مصلي العصر وحق الله وكتاب ربي وكلامه ماعاد انخلي حد ايفرق بينا وكلمة طلاق ماعاد تطلع مني ولا انصدق اي كلمة عليك ولو انشوف بعيوني انكذب عيوني وانصدقك انتي
سالمة ابتسمت
نبيل:ترجعي امعايا
سالمة:باهي بس هلي مش قاعدين توا
نبيل:عارف انتي توا وتي ادبشك وانا نمشي الهلي في الفيلا ونحكيلهم ولما ايجو هلك ايجوكم وايردوكي بالاصول
سالمة:تمام
نبيل قرب باسها علي خدها وطلع
"""
طلع نبيل ومشى للفيلا وحكا الهله وفرحو وقالوله يرجعو هلها ونمشو انردوها وبعدها نبيل طلع منهم وعدى شرا طاقم حلو وجابه الهله عساس انصفه السومة وبعد روحو هلها مشو هل نبيل ورجعوها له ونبيل قاعد علي نار يرجى فيها
جت سومة وقعدت امعاهم وهدرزو وتعشو مع بعضهم ونبيل كاين طاير من الفرحة وبعدها رقت هي ونبيل فوق
واول ماخشت الجناحها لقت نبيل مزينه كله والارض كلها ورد ودار النوم كلها ورد وامبولات وحاط تورته حلوة علي طاوله وامعاها عصير ومكسرات وشبس
سومة مصدومة:شن هدا كله
نبيل حظنها من الخلف:هدا احتفال بسيط عشان رديتيلي
سالمة بحتت فيه من الجنب:هدا كله بسيط
نبيل خطف بوسه سريعه من شفايفها:الوقت اشوي لو هدا شفتي اكثر من هكي
وقمعزو واحتفلو مع بعضهم بعدين نبيل طلع الطاوله للمطبخ ولم الحوسة كلها وماخلى سومة تقرب شي وسومة غيرت دبشها وجت امتدت عالسرير نبيل جا امتد جنبها
نبيل:تاعبة حبي اتحسي في شي
سالمة:لا تمام
نبيل قرب:يعني اوليدي مش متعبك
سالمة:مرات ايتعبني بس تو لا
نبيل:عادي نحكي امعاه
سالمة ابتسمت:انت مجنون مش حيسمعك
نبيل;حيسمعني غير خليني نحكي امعاه
سالمة:باهي
نبيل رفع البدي وحط يده علي بطنها:انت ياشين مااتزعلش حبيبتي اللي هي امك راه ماانتحمل فيها شي وحتى انت انحبك بس انحبها هي اكثر ماتزعلش مني لكن هدا الحق وبعدين انا حاسدك ان قاعد فيها جوا وحاسة بيك وقاعد انت وهي واحد طول الوقت وبعدين حتاخد قلبها وحتحبك اكثر مني وبحت في سومة صح
سالمة حطت يدها علي لحيته واتحرك فيها:هو اوليدي وانت حبيبي
نبيل:يعني حتحبيه اكثر مني
سالمة:حنحبه لان منك بس مش حنحبه اكثر منك
نبيل باسها علي شفايفها وبعدين بعد
سالمة:كنك
نبيل:استني اشوي بنقول الوليدي حاجة
سالمة تضحك:شنو
نبيل باس بطنها:اسمحلي بناخد امك اشوي منك
سالمة تضحك:مجنون
نبيل:توا حنوريك الجنون شن شكله وجا عليها
والباقي #مشششششششفر
"""
مرو 5اشهور وربي خدا حق سومة من بيسان في يوم كانت مقضيتها مع اصحابها في امريكا وشرب وجو وبعدين طلعت هي وواحد وهما سكرانين ركبو في السيارة وهما طالعين خشت فيهم شاحنة الشاب مات وهي انشلت شلل نصفي وجتها امها وبيسان وقعدن امعاها في امريكا وقعدت مشلولة وندمت علي كل اللي داراته في سومة وعرفت ان الله حق وقاعدة اتفكر ترجع واتأسف من نبيل و السومة عاللي داراته فيهم
""
سومة وصلت في حملها في الشهر السابع واليوم فرح هيثم وشالها نبيل حظراته وكان فرح ايهبل ومرام كانت طايرة من الفرح وكانت قريب اتجيب كمل الفرح وسومة جاها نبيل روحت للفيلا ورقت فوق وخشت دوشت وطلعت تمشط في شعرها قدام المرايا
نبيل:هاقوليلي الفرح حلو
سالمة:ايهبل واحلى حاجة فرحة مرومة بخيها حسيت بفرحتي لما يطلع فرح صهيب
نبيل قرب منها وحظنها من الخلف وباسها علي رقبتها:ان شاءلله نفروحو بيه كلنا
نبيل قعد ايبوس فيها
سالمة:نبيل شكلي بنجيب توا
نبيل ايبوس فيها:بطلي حركاتك ياسومة ديما اديري فيها عشان انبعد بس مش مسيبك
سالمة:حي يانبيل والله مانكذب شكلي بنجيب صح اي بطني
نبيل خاف:انتي تحكي جد انتي مازال في الشهر 7
سالمة تبكي:مش عارفه كيف بس الم في بطني مش عادي
نبيل شالها وحطها عالسرير
نبيل:سومة شن اندير
سالمة تبكي:وانا شن عرفني كله منك اصرف
نبيل:ننزل انكلم امي وانجيك
ونزل بسرعه حكا الامه وبعدين خدوها للمستشفى وقرورلها علي عمليه
قعدو نبيل وهله قدام الباب يرجو اشوي وجابو حتى مرام وخشوها للعمليات
الدكتور اشوي وطلع جوه كلهم هل سومة وهل نبيل وهل مرام وحسام وامه
كلهم:شن صار يادكتور
الدكتور:بشوية بس الاثنين جابو وحدة وليد وحدة بنوته
كلهم ;من اللي جابت وليد من اللي حابت بنوته
الدكتور بيحكي
نبيل:مش مهم يادكتور المهم سومة اكويسه
الدكتور ابتسم:اكويسه وهي اللي جابت بنوته والثانية جابت وليد
نبيل:الحمدلله نقدر انشوفها
الدكتور:توا ايطلعوهن للقسم وتقدرو اتشوفوهن اما الاطفال حنشيلوهم للحظانة لانهم ناقصين
بعد اشوي الكل عدو ايشوفو في الاطفال الا نبيل رجاهم ايطلعو سومة للقسم وخش وقعد جنبها وماسك يدها وبعدين جو الباقي وهما يحكو عالبيبين وكيف هما اصغار نبيل مانتبهلهمش وكان كل فكرة في سومة طبعا هي حطوها في دار ومرام في دار اخرى
بعد ساعة سومة وعت واول مافتحت اعيونها شافت نبيل
سالمة ابتسمت ومسكت يد نبيل زين
نبيل:انتي اكويسه حبيبي
سالمة:اها اكويسه
نبيل:اه هدا وين تريحت
سالمة:شفت البيبي
نبيل:لا بنشوفوه مع بعضنا
سالمة:شن جبت
نبيل:قالو بنوته
الكل فطنو ان سومة وعيت وجوها وقعدو يحكولها عالبيبي
نرمين:ياسومة عليك بنوته اتهبل تتاكل اوكال زي البريوش
نبيل:غير خطيها معقولة اتشبهي في بنتي بالبريوش
نرمين:انا عمتها انشبها باللي نبيه
نبيل:غير هني روحك وماتمسكيهش واجد مانبيهش تطلع ام السان زيك
صهيب:تي وهي اطول تقعد زي نرومتي ماخلى ربي ماعطاها كان طلعت زيها
سالمة:شن بيلايمها اثنين جالطين والتمو علي بعضهم
صهيب:مش حنظربك علي كلمة جالطين لانك مريضة بس
نبيل:ترا قرب ترا وشوف شن انديرلك
صهيب:اقل شي انا الساني طويل لكن راجلك يده طويله
سالمة تضحك
والباقي يضحو عليهم
نرمين:باهي قولولي شن بتسموها
سالمة;مافكرنش في اسم
نبيل:بنسميها سالمة
الكل انصدمو
سالمة:انت شن تحكي نبيل
نبيل:بنتي وبنسميها عليك
سالمة:مااتجيش نبيل
نبيل:اتجي بيقعدن عندي سومتين
صهيب يضحك:ربي ايعينك علي عنادهن وتسكير راسهن
نبيل:ماعليك فيهن متفاهم امعاهن
"""
بعد 6شهور نهى جابت اوليد وسماته معتز ونسمة حامل في 5 شهور ومرام سمت ولدها أحمد علي اسم باتها وحامل توا اخرى في شهر واحد
طلع فرح صهيب ونرمين وكان فرح ايهبل ونرمين طلعت اتجنن اما سومة
بعد 6شهور نهى جابت اوليد وسماته معتز ونسمة حامل في 5 شهور ومرام سمت ولدها أحمد علي اسم باتها وحامل توا اخرى في شهر واحد
طلع فرح صهيب ونرمين وكان فرح ايهبل ونرمين طلعت اتجنن اما سومة فنبيل عند نفس المصمم اللي المرة اللي فاتت جابلها هي وسومة الصغيرة فستانين زي بعضهن بس هالمرة جابهن بدري قبل ماايديرو مشكله وطلعت هيا وبنتها ايهبلن كمل الفرح وصهيب خذا نرمين ومشو الحوشه اللي بناه فوق حوش هله خشو للحوش
صهيب:عجبك حوشك ياعروس
نرمين: اها عجبني
وبعدها خشت دوشت وطلعت
صهيب كان مجهز مكسرات وشبس وحلو وطامر البريوش عليها
نرمين جت:شن هدا كله بس مافيش بريوش
صهيب:حي انسيته
نرمين حطت يدها في نصها:معقوله تنساه وانت عارف اني انحبه
صهيب:عادي مرات الواحد ينسى
نرمين;والله بعد تنسي هدي مش بعيد تنساني
صهيب:وااو مطول السانك اهو جبته ياام السان
نرمين:معش اتقول ام السان
صهيب قرب منها:انقولها ونص شن بديري
نرمين:انقولك طلقني
صهيب: انطلقك والله انوريك الطلاق شن شكله وشالها وهي اتعيط وحطها عالسرير نرمين اتبعد واتعظ فيه
صهيب:انا عارف انك مااتجيش الا بالقوة وجا عليها وقعد ايبوس فيها وهي استسلمت والباقي #مشششششفر
""""
مرو 4سنين
سومة حامل للمرة الثانية وفي الشهر 8 وهالمرة قالولهم وليد وسومة الصغيرة عمرها 5سنين
مقمعزة سومة ونبيل في الحديقة وايهدرزو وسومة الصفيرة تلعب جنبهم
اشوي وخشت لجين بنت نرمين تجري وعمرها 3سنين
نبيل مسكها:كنك لوجي
لجين:هدا اللي اثمه ثهيب مايبيش ايجيبلي ثكولاطة
صهيب خش وراها
صهيب:تعالي هنا راه نضربك
نبيل شالها في يده:تي كنك امعاها
صهيب:اه هي وامها يبو ايجننوني
نبيل يضحك:كنهن
صهيب:انروح من العمل تاعب نلقاهن طالقات السانهن وحدة تبي شكولاطة وحدة تبي بريوش لما قلتلهن ليش ماقلتن قبل ماانجي دارنها زعله وقلبنها مناحة قعدت انسكت في نرمين وانحايل عليها هدي زعلت وهربت وجت هنا
نبيل:يضحك ربي ايعينك وخلاص
صهيب:تعبت عطوني حل
نبيل:خلي لوجي هنا تلعب مع سومة الصغيرة وامشي اشري بريوش وشكولاطة وراضي نرمين وبعدين تعال هنا وخودها
صهيب طلع ايخبط:عليك حظ ازح
نبيل نزل لجين وقعدت تلعب مع سومة الصغيرة وجا قمعز جنب سومة اللي ميته ضحك
سالمة:هما كلهم عقولهم صغار
نبيل:قالك هنا عبيطات وصهيب شر منهن يعني عائلة طروح بكل
سالمة تضحك
نبيل قرب منها;ناعليا من ضحكتك
سالمة:نبيل بطل
نبيل:عيون نبيل شن انبطل بس وقرب وباسها علي شفايفها
بعد كملو البوسه
سالمة:معش اتعاودها تخيل حد ايشوفنا
نبيل:وكان شافونا مش انتي مراتي وحبيبتي ودنيتي كلها خلاص ماانحس في حد
سالمة تضحك:مجنون
نبيل:مجنون فيكي والله انحبك وحنقعد انحبك لين انموت
#الــنـــهــايـــة
كملنا قصة نبيل وسومة وخذاها برغم كل اللي صار وعاند كل شي لين قعدت له وهدا المقصود من اسم #نصيبي_فيك ان نصيبها في نبيل
وانشاءلله اتكون نالت اعجابكم ووصلتلكم كل اللي حابة انوصله في الرواية واهم شي هو ان مش معنى الحب ايكون الاول شخص الحب ايكون للشخص الصادق اللي ايحبنا من قلبه وبرغم كل حاجة مايتخلى عن حبنا وعبر واجدة انتمنى وصلنكم
مع تحياتي الكل اللي تابعني
اسفة لو فيه لخبطة في الأسماء وأكيد رأيكم ايهمني 😉
گـتـابـتـي Koka Saleh😍
منقولة💖
