#نـصـيـبـي_فـيـك
الـحـلـقـة الـثـانـيـة عـشـر
وليد رد للصيدلية وفتحها وحاس ان فيه حاجة ملخبطة وماعرفها شنو
""
اما نبيل روح من البحر للفيلا وخش الداره من غير مايحكي مع حد ورقى الداره دغري
""
اما سالمة فكانت اتهدرز مع مرام عالوتس وبعدين اتصلت بوليد هدرزو اشوية ورقدو
""
مرو ثلاث ايام من دون احداث تذكر
وجا اليوم الرابع وبعد العصر تحديدا ووليد قاعد في صيدليته زي كل يوم رن فونه ولقاه رقم ورد
وليد:الو
هديل:ايوا استاذ وليد امعايا
وليد:اها وليد من امعاي
هديل:انا هديل اللي يومتها قست الضغط الماما
وليد:اها شن اخبارك واخبار امك
هديل:انا تمام بس ماما من الصبح تعبانه ومش قادرة اتصبي من فراشها بكل لو تقدر اتجي اتقيسلها ضغطها لان ماتقدر اتصبي ومافيش حد ايشيلنا للمستشفى
وليد:اوكي تمام مافيش مشكله حنجيك توا وسكر
سكر الصيدلية ومشى للعمارة ورقى الشقتهم فتحتله هديل ووليد اول ماشافها ابتسم ابتسامه عريضة ومافهمش عليش دارها هديل سلمت عليه وخششاته الامها قاسلها الضغط ولقاه مرتفع وامها كانت مرا كبيرة اشوي في العمر ووصفلها علي نوع دواء ثاني
هديل:خلاص حننزل توا انجيبه منك
وليد:لا وين تنزلي حننزل انا وانرد انجيبه لكي
هديل:نبيش انتعبك
وليد;لا تعب لا شي مش داعي للكلام هدا
هديل:طلعت فلوس ومدتهن الوليد
وليد:لا والله خليهن
هديل:لا كيف هذا حقك
وليد:نحنا جيران وصيدليتي تحت عمارتكم والجيران البعضهم واي شي تحتاجة عمتي رني عليا وفي اي وقت ماتتحشميش
هديل:شكرا تعبتك امعانا
وليد;ولا ايهمك
ونزل للصيدلية وجابلهم الدوا ورقى شاله الها ونزل وطول اليوم هديل مامشت من باله
في الليل روح وليد للحوش تعشى وكسد عالتلفزيون اشوي وبعدين رن علي سالمة
وليد:اهلا حبيبي شن جوك
سالمة:تمام حبي شن جوك انت
وليد:تمام الحمدلله
سالمة:وينك اليوم مافيش لا رنة ولا رساله
وليد:والله اليوم كله شغل الصيدلية مافضتش بكل
سالمة:ربي ايعاونك حبيبي
وليد:انشاءلله حبيبي
وليد:تسمحيلي حبيبي كان قتلك ناعس
سالمة:عادي حبيبي حتى انا ناعسه وبكرا عندي جامعة بدري
وليد:نجيها اللي تفهم في الجو
سالمة:نعجبك😊
وليد:خلاص تصبحي علي خير وحنرن عليك في الصبح
سالمة:تمام وانت بألف خير
سكرت سالمة وامتدت علي سريرها ورقدت اما وليد قعد ايتقلب في سريره مرة ايمين مرة ايسار وبعدها جت في باله هديل وخطرت عليه ايرن يسألها علي امها حط علي رقمها تردد اشوية وبعدين اتصل بيها وهديل ردت
وليد:ايوا هديل
هديل:ايوا استاد وليد
وليد:شن اخبارك
هديل:الحمدلله تمام شن جوك انت
وليد:الحمدلله تمام شن اخبار الوالدة
هديل:تمام الحمدلله اكويسه توا
وليد:باهي تمام
هديل:انشاءلله خير استاد وليد عليش ران توا
وليد:لا والله نطمن علي امك قلت مرات ساير شي ومتحشمه اترني
هديل:لا الحمدلله بعد الدوا اللي عطيته الها وهي اكويسه
وليد:باهي الحمدلله
هديل:الحمدلله واسكتت
وليد:عادي هديل اتعرفيني علي نفسك اشوي
هديل:عليش تبيني انعرفك علي نفسي
وليد:شن انقولك عندي فضول نعرف ليش انتي وامك وحدكن
هديل:حاظر استاد وليد حنريحلك فضولك وانقولك ليش
وليد:ممكن اتبطلي كلمة استاد وليد اتكبر فيا واجد
هديل تضحك😂حاظر
وبدت اتعرف فيه علي نفسها وخلونا حتى نحنا انتعرفو عليها اشوي(هديل بنت م97 تقرا في السمستر الثالث كلية الهندسه امها كبيرة في العمر اجوزت متاخر وماجابتش الا هديل ومن ثلاث اسنين دارو حادث هيا وبوها وامها بوها مات في الحادث وامها فقدت بصرها بعد الحادث عاشت هيا وامها مع خالها في حوشه لان ماعندهش اهل اب بوها كان وحيد اهله بس ماتريحتش مع مرات خالها وقررت هيا وامها ايردو الشقتهم ويقعدو فيها ومرة مرة ايجيهم خالهم وايجيبلهم طلباتهم وللجامعه تمشي مع صاحبتها عندها سيارة الروحها)قعدو وليد وهديل ايهدرزو طول الليل وسالمة راقدة في العسل
""
في فيلا نبيل وتحديدا في داره نبيل متمدد علي سريره ماسك فونه وفاتح فيس اشوي وجاته رساله فتح عليها لقاها من ايمان بنت عمه
ايمان:اهلا نبيل
نبيل:اهلين ايمان
ايمان:شن اخبارك
نبيل:الحمدلله شن اخبارك انتي
ايمان:اكويسه شن موعيك لعند توا
نبيل:اهو مكسد عالفيس
ايمان:اها حتى انا فتحت توا مانحسابك فاتح لين شفت منشورك وقهرني وحرك فيا مشاعر كنت انحاول ننساهن
نبيل:اي منشور
ايمان:اللي توا اللي كاتب فيه( شَاء القَدر ، أن تكَون جُزء منَي ولسَت لي💔)
نبيل:اها
ايمان:ماتتصورش قد شنو قهرني فعلا كلامك صح
نبيل:خلاص كم مرة قتلك انسي الموضوع اللي في بالك ايمان:حاولت بس والله تعبت لا قدرت ننساك ولا انطولك وانت بيدك انك اتخلينا انحاولو ولو مرة
نبيل:والله ماايصير منها حتتعبي امعايا وخلاص
ايمان:انا راضية بيه التعب هذا
نبيل:بس انا مانرضش بيه
ايمان:باهي ترا قولي لعند امتى بتقعد متعلق بوحدة مخطوبة الغيرك واسمت بأسمه
نبيل:وانتي شن عرفك انها انخطبت
ايمان:سمعتها من نهى وقلبي وجعني عليك وحسيت بكسرة قلبك
نبيل:كل شي نصيب
ايمان:صح والله انا اكثر وحدة حاسة بيك لاني نفس شعورك ولو انت تخطب انا حننجن
نبيل:تهني مش حنخطب
ايمان:معقوله للدرجة هدي
نبيل:واكثر اخرى
ايمان:حاسة بيك من كلامك انك شايل في قلبك حمل ثقيل
نبيل:اثقل من ماتصوري
ايمان:احكيلي انا نسمعك وممكن انشيل من علي قلبك
نبيل:عادي تسمعيني
ايمان:اكيدة
نبيل:قعد يحكيلها علي حبه السالمة وقهرته من خطبتها وكيف قاعد يبذل في كل جهدة عشان ينساها ومش قادر وكيف ان الدنيا ماالهش طعم من غيرها وحكالها لما سمع خطيبها يحكي علي فرحهم وكيف قهراته الكلمة
ايمان:كانت حاسة بوجع في قلبها من كلام نبيل بس مشت الموضوع وسمعاته للاخر وبعدين نعسو هما الاثنين وسكرو ايمان بكت بكية لين فشت خاطرها
اما نبيل اول ماسكر امعاها اذكر ان اللي داره زي اللي كانت سالمة ادير فيه له وهو كان يسمع فيها بألم فحس بشعور ايمان لان زي شعوره من قبل ووجعاته وندم ان حكى قعد اشوي ايفكر وبعدها امتد ورقد
""
نهى في دارها فاتحة وتس واتخرف مع بسمة وكان علي جنبها فطلب من بسمة اتقوللها ان علي يبي رقمها بيحكي امعاها(زي مالاحظتو علي من اول ماخطب نهى ماحكش امعاها بكل لان كان طبعه صعب اشوي)نهى فرحت ووافقت دغري وبسمة عطتها رقمه ورن عليها
علي:اهلا نهى شن جوك
نهى:تمام الحمدلله شن جوك انت
علي:الحمدلله تمام نهى واسف علي طلبي هدا واتصالي في نص الليل
نهى:لا عادي انا مازلت ساهرة
علي:اكيدة اتقولي هالصامط معقولة مش خاطرة يحكي امعايا وانا خطيبته وماطلب هالطلب الا بعد شهر
نهى:لا عادي كل واحد وظروفه
علي:لا ظروف لاش مانبيش نكذب عليك انا ماطلبتش نحكي امعاك لاني ماقريتش فاتحة وانتي عارفه دوة هكي فيها ذنب وانا انخاف من ربي لكن طلبت من بسمة توا اول شي مانبيكش اتحسي اني صامط واتقولي مافيش مشاعر تجاهي وثاني شي بنحكي امعاك في امور الفرح وبنسالك علي حاجات في الحوش
نهى:لا والله ما فكرت هكي بكل وانا بروحي ماانحب سريب المكالمات وهكي لان بجد ايجيبن المشاكل
علي:بصراحة ربي ايكملك بعقلك فعلا عرفت نختار
نهى:سكتت وانحرجت😊
علي:توا بنقولك الحوش مازاله اشوي وانجهزه خلاص ونبدى انأثث فيه وبعدين نبدو في تجهيزات الفرح يعني الموضوع كله يبي حاجة شهر ونص شهرين بالكثير
نهى:انشاءلله ربي ايساعدك
علي:بنسالك علي بعض الحاجات في المطبخ والصالون واشوي حاجات كيف اتحبيهم يعني بناخد رايك وذوقك
نهى فرحت:تمام
علي:وبدى يحكيلها وياخد في رايها وقعدو ايهدرزو وبعد حوالي نص ساعة سكرو وكل واحد رقد وقلبه طاير من الفرحة وولقو ارواحهم مناسيبين البعض بكل ونفس التفكير
""
مرو اسبوعين وسالمة بدت في اول امتحان ليها ووليد همل سالمة اشوي ولما سألاته قاللها ان مشغول تجهيزات الفرح
واما نبيل كان كل بعد كم يوم يحكي مع ايمان عالفيس ويقعد يحكيلها وهيا تحكيله واتحاول اتصبره واتنسيه سالمة وقعد ايتريح كل مايحكيلها وايطلع اللي في قلبه
""
وليد طول الاسبوعين اللي فاتو تقرب من هديل اكثر وكثرو مكالماته امعاها لان كان ايتحجج السالمة ان نعسان وتعبان وكل يوم بعذر وسالمة طيبة نست خيانته اللي فاتت ووثقت فيه ولما ايسكرو ياتقعد تقرا ياترقد ومعش اترن عليه وهو كان مستغل النقطة هذي الصالحة(طبعا هذي مشكله يوقعن فيها بنات واجد بعد ايسكر حبيبها ولا خطيبها معش اترن عليه واتشوفه انتظار ولا لا خليكن فاطنات وربي ايقدرني على فعل الخير😂)
في يوم ايهدرز مع هديل بالفون وهديل كان غامتلها وليد ايحاول يعرف كنها
وليد;كان اتقوليلي هدولي كنك
هديل;ماكني شي
وليد;حلفتك بالله اتقولي ك
هديل;ماكني شي
وليد;حلفتك بالله اتقولي كنك
هديل:خلاص توا انقولك انت صح خاطب
وليد:اه من قالها لكي
هديل;سالت وعرفت ومااتحاولش تنكر لاني واثقة من كلامي
وليد:بصراحة اها خاطب
هديل:وليش تحكي امعايا وانت خاطب
وليد;تبي الصدق والصراحة
هديل;ياريت
وليد:انا خطبتها لان هلي زرو عليا اني نختار وحدة نخطبها ولا يخطبولي بنت عمي وانا بنت عمي مافيش اي شعور تجاهها
هديل:وخطيبتك اتحبها
وليد;نكذب عليك لو انقولك ماانحبهش انا ليا 4اسنين امعاها هيا اتحبني واجد انا حبيتها بس مش زيها لكن ماعمريش شفتها عساس انها زوجة بس بعد ماهلي اصرو عليا قلت هيا خير
هديل:وعليش قاعد امعاها وخطبتها المسكينة وانت مش شايفها زوجة لكي
وليد;ماكنتش لاقي البنت اللي اتخش راسك
هديل;وعليش ماالقيتها وشن مواصفاتها اللي ماالقيتهش بكل هذي
وليد:تأمني بالله
هديل:لا اله الا الله
وليد:هيا انتي البنت اللي خشت راسي ونبيها زوجة ليا
هديل انصدمت:انا
وليد;والله انتي بجد
هديل:بس انت خاطب
وليد:بصدق لنقني ماعاد عندي الها نية ومن اول ماقعدت نحكي امعاك وانا فايتها
هديل:حرام بس هيا شن ذنبها
وليد;ماعندهش ذنب بس وحق ربي حبيتك بكل صدق ومانبيش نظلمها امعايا
هديل:يعني شن بدير
وليد:بنفسخ الخطبة
هديل:تحكي جد
وليد:اها والله جد الجد بس بنسالك
هديل:تفضل
وليد;شن شعورك تجاهي
هديل:تبي الصدق
وليد:ياريت
هديل:بصدق حتي انا تعلقت فيك وحبيتك وبعد سمعت انك خاطب ياما بكيت وحسيت روحي بنموت
وليد:بعيد السو عليك انشاءلله فيا ولا فيك
هديل;بعيد الشر عليك
وليد:اه ياقلبي انا لازم نفسخ خطبتي في اقرب وقت ودغري انجي نخطبك
هديل:تخطبني
وليد:اها انا ماصدقت القيتك نبي نخطبك وانطلع الفرح دغري
هديل:لالا فرح توا لا انكمل قرايتي قبل
وليد:قصدك بنرجاك ليت اتكملي اقرايتك
هديل:اها لو اتحبني صح
وليد;باهي وامري لله اهم شي انك اتكوني راضية
مع خشت امه عليه قال الهديل اشوية وامه تحسابه يحكي مع سالمة
ام وليد:تحكي مع كنتي السمحة
وليد:اها
ام وليد:حكيتلها علي موعد الفرح
وليد:اها حكيت
ام وليد;باهي اهم شي عندها خبر انا امس كلمتها وعرفت انها اليوم اول يوم في امتحاناتها وتوا كنت نحكي مع باتك واتفقنا بكرا نمشو الهلها عشان انحددو الفرح رسمي وهما يبدو في التجهيزات ونحنا نبدو في تجهيزاتنا ونحجزو في القاعات انت عارف لازم نحجزو قبلها بوقت
وليد:اها بس ياامي انا بنحكيلك موضوع عالفرح
ام وليد:تأجيل مافيش راه باتك حدد الموعد وقال مافيش تأجيل
وليد:مش قصة تأجيل بس انا بنفسخ الخطبة
ام وليد بصدمة:شنو شنو وعليش
وليد:هكي ياامي انا القيت انها ماتصلح بيا اتكون زوجتي
ام وليد;اصلا ماعندك عقل وين بتلقى بنت زيها جمال وادب واخلاق وهلها ناس اكويسه ومعروفه مستحيل باتك ايوافق عالشي هدا وبذات ان عجبوه هل البنت
وليد:تبي الصدق ياامي لنقني تعرفت علي بنت اخرى وحبيتها ونبيها هيا مراتي وام عيالي
ام وليد بعلو صوت:قول هكي انت مااتحشمش علي وجك تحكي في الكلام هذا ووين بتحيبلي احسن منها وبعدين بنت الناس شن ذنبها بات وليد سمع الصوت عالي ووخش عليهم
بات وليد:كنكم شن فيه صوتكم عالي
ام وليد:***وحكتله الكلام اللي قاله وليد
بات وليد;شن هالكلام ياوليد انت شكلك مااتحشمش علي وجك
وليد:ياباتي انا معش نبيها
بات وليد:مش بجوك بعد مامشينا الهل البنت وشلنا رجاله وحكو فيها واتفقو جاي توا اتقول معش نبي تحساب كلام الرجاله لعبة تي نحنا شلنا رجاله مش عيال كيفك كل مرة براي
وليد:بس ياباتي
بات وليد:لا بس لا شي كلا انك اطلعني عيل قدام العرب لا هيا كلمة وحدة بكرا ماشي انا وامك الهلها وامحددين الفرح بعد ثلاث اسابيع وبنبدو انجهزو في تجهيزات الفرح وانت بترضى بجوك ولا غصب عنك وبتاخدها والبنت اللي متعرف عليها انساها ولا حنعرفها من ونمشي الهلها ونحكيلهم وانت حر وعلى فكرة هذا الكلام الاخير اللي عندي وهيا ياام وليد وخليه ابروحه عشان ايردله عقله وطلعو
وليد غمتله وعارف روحه مايقدر يكسر كلمة باته ومعش عرف كيف يتصرف
"""""
ثاني يوم بات وليد وامه جو الهل سالمة وحددو الفرح ايكون بعد ثلاث اسابيع وفرحو العيلتين واتفقو علي ايام الفرح وكل واحد شن بيدير
"""
صهيب حكتله امه علي ان فرح سالمة بعد ثلاث اسابيع غمتله بكل لان سالمة كانت قريبة منه وكان ايحبها واجد طلع من الحوش وهو غامتله ومالقش روحه الا عند نبيل في المعرض
صهيب وباين عليه راقيله:السلام عليكم
نبيل;وعليكم السلام
صهيب قمعزو وهو اينفخ
نبيل:كنك عاقدهن
صهيب:شي
نبيل;نغبى الا فيك تي كنك ياراجل
صهيب:عشان سالمة
نبيل بخوف;كنها سالمة
صهيب:اليوم هل وليد كانو عندنا وحددو الفرح بعد ثلاث اسابيع
نبيل زادو نبضات قلبه ووادموعه بينزلو وحبسهن بالغصب عشان صهيب ماايلاحظ
صهيب:غامتلي بكل لنقنه الحوش بلاها بيفضى ويقعد شين
نبيل مش قادر ايتحمل وايتنفس بصعوبة ومعش عرف ايرد علي صهيب مع رنت تليفونه تحجج بيه وطلع قفل تليفونه وركب في سيارته وطلع بسرعه جنونية ومش شايف شي قدام اعيونه الا صورة سالمة لابسه الفيلو وماسكها وليد من يدها جن اجنونه وزاد سرعته اكثر واكثر ويبكي بعلو صوته وايزيد في السرعة وفي لحظة جت سيارة قدامه وماقدرش ايتحكم في السيارة وايوقفها وفجأة طاااااااااااااااااااااااااااااااااااااااااااااف🚖
#يتبع
حي زعما شن بيصير وهذي حتكون نهاية نبيل 😭 وسالمة حتتجوز وليد كله حنعرفوه في الحلقة الجاية انتظروني 😊
اهو مارقدتش نرقد نين نزلتلكم حلقة ماقدرتش انزعلكن وانتن متعودات تقرانها ضغطت علي روحي وكتبتها وهكي نقعد ماقصرتش امعاكن حبيباتي 😍
واسفة لو فيه اخطاء في الاسماء واكيد رايكم ايهمني 😉
گـتـابـتـي Koka Saleh😊
منقولة💖
