#نـصـيبـي_فـيـك
الـحـلـقـة الـثـانـيـة
نهى عند بسمة صاحبتها وايهدرزو ومنسجمين عالاخر
بسمة:شن رايك نطلعو انقمعزو في الحديقة
نهى:تمام عادي
وطلعو البنات وقمعزو في الحديقة برا وطبعا مايخلى الامر من الضحك والقرمة اشوي 😂
اشوي وسمعن صوت اينادي في بسمة من داخل حوشهم
بسمة:هذا علي اشوي وانجيك
نهى:خودي راحتك
مشت بسمة شور علي اللي كان امصبي جوا الحوش ومايبيش يطلع للحديقة عشان سمعهن
بسمة:شن فيه علي كنك
علي:لا بس بنطلع ونبيك تاخديلي طريق لان بايخة نطلع عليكن هكي
بسمة:عليك حركات هذي نهى مش برانية ومن نحنا اصغار اتجيني تعال سلم عليها واطلع
علي:غير انخاف نحرجها ولا حاجة بس
بسمه تضحك😂لا مااتخاف مش حتحرجها لا شي
طلع علي مع بسمة وجو جيهة نهى
علي:خير يانهى ومد يده
نهى مدت يدها وقلبها ينبض بسرعه وماتوقعت ان يطلع وايسلم عليها:خيرات
علي:شن اخبارك
نهى:تمام الحمدلله شن اخبارك انت
علي وايشوف البسمة بكل حنية:الحمدلله تمام
نهى انحرجت وطبست راسها
علي:هيا نستأذن منكن سلام
بسمة;سلام
بسمة تضحك 😂:خلاص ارفعي راسك بلا حركات زايدة عدى
نهي:تضرب في بسمة: والله انوريك هذينا حركاتك انتي عارفه
بسمة:شن بندير معجبين بعضكم ولا واحد فيكم بيسقد روحه ويحكي والله بنموت وتقعدي مرات خويا
نهي:انتي شن تحكي فكينا من الصماطة
بسمة:تحسابيني مش زارقة علي علي ان معجب بيك وحتى ماما عجبتيها وحكتله عليك وقاللها يمشي حال المكتب اشوي وبيدير خطوة رسمية عاد انتي وعارفه تفكير علي ماايحبش حركات شباب توا لا علاقات لاهم
نهي:وهذا اللي عاجبني فيه مش زي شباب توا
بسمة:ربي ايعينك عليه وعلي تفكيره كأنه شايب 😂
نهي:ناعلي منه ياخية ايهبل 😍
بسمه:اه من الحب وخلاص 😂
نهى:خلاص فكينا عاد غيري الموضوع خير ماتطلع عمتو ليلى وتسمعنا
بسمه:باهي خلاص
(انتعرفو علي بسمة وعلي بسمه بنت وحيده علي اخين الكبير متجوز ومسافر ايكمل في دراسته برا هو وجوزته اما علي شاب م 88 محترم وخلوق وتفكيره يختلف علي شباب توا متخرج من قانون وعنده مكتب خاص بيه لكن مالش واجد فاتحه وقاعد يبني في حوشه وعاجبته نهى بس مااعترفلها بالشي هذا لان مقرر اول ماايكون روحه يمشي الحوش هلها دغري)
كملو البنات هدرزتهم اشوي ونهى اتصلت بنبيل عشان ايجيها
رن فون نهى :ردت نهى:الو نبيل
نبيل:انا برا اطلعي
نهى:تمام
سلمت علي بسمة وامها وطلعت وركبت في السيارة ومشو للفيلا درس ويرجى فيهم يفتحو الباب وشاف سالمة طالعة هيا ومرام بيركبو في سيارة صهيب قعد ايبحت فيها من تحت النظارة
مرام نغزت سالمة من عند يدها امتاع تبيها تفطنله سالمه لوت بوزها ومابتش اتبحت فيه ابدا ولا التفتت شوره
طلع صهيب بالسيارة وبيب النبيل
صهيب;شن الجو نبيل
نبيل حول نظارته:تمام والله صهيب
صهيب:اشوي وبنجيك في المعرض عندي موضوع امعاك
نبيل:تمام انا اشوي وماشي غادي انتلاقو
نهى شيرت السالمة ومرام بيدها والبنات ابتسمن وشيرنلها
صهيب طلع بسارته ونبيل خش للفيلا
نبيل:شفتيها كارهتني عالاخر
نهى:نبيل انت كثرت عالبنت حتى هنا كانت ديما اتحب اتجي واتكسد امعانا معش اتحب اتجي بسببك
نبيل;والله مادرت حاجة غلط نبيها بالحلال بس
نهى;ماهذا الكلام اللي خلاها معش اتحب اتجينا كل مااتشوفها تحكيلها نفس الكلام خلاص نبيل طلعها من راسك والبنات واجدات غيرها واولهن بنات العيله كلهن ايتمنى ترضى عليهن بس
نبيل:تحسابي مش خاطري انطلعها من راسي لكن والله ماقدرت 24ساعة تفكيري فيها والله مانبي البنات كلهن ايحبني امغير كان هيا بس اتحبني حتى اشوي بس لو اتقولي به بس دغري انطلع الفرح وحق ربي
نهى:والله شن انقولك اللي فيها خير ربي ايجيبها
نهى;حي انسينا بريوش نرمين توا تطلق السانها عليا 😱
نبيل يضحك:ياخوافه اهو بريوشها معقوله نقدر ننساه
نهي:والله ماني قد السانها اختك وعارفها
نبيل:هيا انزلي خليني انكسد عليها اشوي قبل ماانعدي
"""
وصل صهيب الحوش مرام
مرام:هيا سلام نتلاقو بكرا
سالمة:انشاءلله سلام
ونزلت مرام وخشت الحوشهم وصهيب مشى بالسيارة
سالمة ااتنقنق علي صهيب:باهي صهيب تكي علي محل حلو خودلي حاجة حلوة
صهيب:سومة اطلعي من راسي مش فاضيلك بكل
سالمة:باهي باهي وراس صهيب
صهيب:اوف عليك السكانة يالله انحطك في الحوش وبنمشي النبيل في المعرض
سالمة:خطرها شن تبي فيه
صهيب:شفته يومتها جايب سيارات صقع لنقني جت عيني علي وحدة بنشوفها وانبيع هذي وانزيد عليها لكن خايف الشايب ايسكر راسه
سالمة بخبث;لو اتكيلي توا علي محل حلو وتاخدلي حاجة حلوة بابا شوري وانا نقنعه
صهيب:تحكي جد تقدري سومه
سالمة:جد الجد انت عارف بابا اي طلب نطلبه ايوافق عليه دغري
صهيب:من الناحية هذي صح ماايتحملك بكل
سالمة:خلاص امالا هيا خودلي حاجة حلوة
صعيب:كلام رجاله
سالمة تضحك:رجالة بأشنابهم اخرى 😂
تكى صهيب علي حلواني وخذالها طبق حلو كبير وكله انواع اتهبل وجابه الها
صهيب:اهو ياانسه سومه اللي تبيه
سالمة:استنى انشوفه يعجبني ولا لا وفتحاته وقعدو عيونها اقلوب😍 جابه الها كله شكولاطه قهوية لانها اتحبها
صهيب:ها شن رايك اعجبك
سالمة:امممم ايهبل وخدت اول طرف وبدت تاكل 😍
صهيب:خلاص انوصلك للحوش ونمشي للمعرض
سالمة:باهي صعيب كساد الحوش خليني انشوف امعاك السيارة
صهيب:شنو شنو تي المعرض كله رجاله
سالمة:باهي صهيب درس السيارة بعيد ماحد ايشوفني بنشوف سيارتك الجديدة وخلاص
صهيب:باهي وامري لله منك لكن انشاءلله بس ناخدها
سالمة:غير خليها عليا بس
صهيب;تمام
وطلع ومشى للمعرض ودرس السيارة بعيد اشوي نزل شاف نبيل لقاه مازال ماجا رد للسيارة وقعد ايوري في السيارة اللي بياخدها السالمة اشوي وواحد صاحبه خش للمعرض مشاله وقعد ايخرف هو وياه
سالمة مسكت فونها وقعدت اترن علي وليد ماايردش عليها
خطم نبيل بسيارته وشاف سيارة صهيب وفيها سالمة غمتله بكل ونزل وهو حامق جا جيهة سيارة صهيب وسالمة فاتحة روشن السيارة
نبيل حامق;شن اديري انتي هنا
سالمة;وانت شن دخلك
نبيل:كيف شن دخلني معقولة صهيب امخليك هنا وكل اللي ايخطم ايبحت فيك
سالمة:بيني وبين خويا مادخلكش
نبيل:مادخلني تمام حنشوفو
وسيبها ومشي للمعرض وخش ولقى صهيب يحكي مع اصحابه
نبيل:صهيب تعال نبيك اشوي
صهيب:تمام
ومشو وبعدو من جنب الشباب
صهيب;تي كنك شن فيك
نبيل غامتله: تي معقوله ياراجل مسيب اختك برا
صهيب;اها شن بنديرلها سكنت وسكرت راسها بتشوف السيارة اللي بناخدها درست السيارة بعيد عشان اتشوفها
نبيل:جو مش تمام هذا كل واحد امخطم ايبحت فيها روح بيها للحوش خير ياراجل وتعال نرجى فيك
صهيب;والله صدقت هبعتني توا انشيلها وانرد تم ياباشا نبيل;تم ياباشا
طلع صهيب ركب في السيارة وولعها
سالمة:ها خلاص تميت موضوع السيارة
صهيب;لا مازال بنوديك وانرد
سالمة;وعليش مانبيش انروح للحوش توا
صهيب:بلا سكنان سومة انحرجت قدام نبيل توا لما قالي كل امخطم ايشوفلها والله صدق هبعتيني يافرخة
سالمة:هالبارد وهو شن دخله بيا
صهيب:كيف شن دخله نبيل جارنا وعادك كيف اخته وانا شهادة لله نعتبر فيه خويا الكبير
سالمة:انت وافقت هو مادخلش يدخل في خواته انا مالش علاقة بيا
صهيب:خلاص هيا فكينا من الحركات كلمة وحدة بنوصلك للحوش وتم
وطلع بيها ووصلها للحوش ورد عالمعرض
ام سالمة:كنكم طولتو
سالمة:مشينا المحل حلو وجابلي هذا
ام سالمة:مشاءلله اكيدة متفقين علي شي انتو الاثنين جايبلك هذا كله مش بلاش
سالمة;كنك ياماما خيي وحب ايدلعني
ام سالمة:المشكلة اني نعرفكم اكويس
سالمة اتغير في الموضوع تبيش امها تعرف قصة السيارة لانها حتخربها:تعالي دودي خلينا انديرو قهوة وناكلوهن
دودي;نبيس قهوة انا نبي عثير
سالمة:عارفه توا نعطيك عصير امغير هيا تعالي وتي امعايا
دودي:باهي ثلومة😊
ومشن ايوتن في قهوة
سالمة:دودي زعما انرنو علي امال بالك اتجي نشربو قهوة مع بعض
دودي:ياريت نبي نلعب مع عثومي
سالمة:هيا انرن عليها توا ورنت علي امال
امال:خيرات سومه
سالمة:خير ياحنة وينك معش جيتي
امال:والله صلاح ديما مشغول وانا من اول ماحملت وصلاح مانع عليا انسوق بروحي وعصومي هنا امطلع عيوني من شطانته
سالمة:نجك ليا امرايفة عليه واجد انا قاعدة انوتي في قهوة وصهيب جايب حلو قبل نبيك اتجي انكسدو عليهن مع بعضنا
امال:اممم بعدك وقته توا لكن قوليلي كيف جت منه صهيب اكيدة فيه وراها شي
سالمة😂احسن حاجة صهيب مفضوح لنقنه وراه طلب اتجي ونحكيلك
امال:خلاص بكرا الصبح يطلع صلاح للشغل وايحطني عندكم وعقبيلي قرعتي مش تاكليها كلها عارفتك راه
امال:خلاص بكرا الصبح يطلع صلاح للشغل وايحطني عندكم وعقبيلي قرعتي مش تاكليها كلها عارفتك راه
سالمة:ههههه لا والله انعقبلك قرعتك تم
امال:خلاص سلام نمشي انشوف هذكي وين قاعد معش سمعت حسه اكيدة داير كارثه
سالمة:راك تضربيه وبوسيه ليا زيين 😍
امال:باهي وسكرت
دارت سالمة القهوة وشربت هيا امها وكلو من الحلو وامعاهم دودي تشرب في عثير😂
جا باتها سالمة وقنعاته زي ماوعدت صهيب ووافق دغري عشان غالية عليه سالمة بكل وماايحب يرفضلها طلب لان مسميها علي امه
وبعدين جا وقت النوم سالمة خشت الدارها فتحت النت لقت وليد متصل دزتله واجد مابش ايرد قعدت اترن عليه ماردش عليها وبعدين قفل فونه
غمتلها بكل ورقدت وهيا دمعتها علي خدها منه اتحبه واجد وفي نفس الوقت هو هاملها بكل
""
وليد يحكي بفونه لاخر
وليد:بصراحة عجبني اسلوبك وصوتك ولنقني تريحتلك
البنت:ههه وحتى انت اسلوبك حلو وهدرزتك احلى
وليد:اتهبل ضحكتك😍
البنت:شكرا توا بنسالك كل بنوته تحكي امعاها عالفيس تاخد رقمها
وليد;معقولة هذا ضنك فيا لا بس انتي من الصبح نحكي امعاكي وعجبتيني
البنت:يعني انت مافيش حب في حياتك ابدا
وليد:مافيش بكل تبي الصراحة مازلت ماالقيت البنت اللي اتخش راسي
البنت:انشاءلله تلقاها
وليد;عندي احساس اني القيتها
البنت:هههه باهي تمام
وليد:اوصفيلي روحك نين انتلاقو بكرا
وقعد ايهدرز هو والبنت الليل كله
""
جا الصبح وعت سالمة غسلت وتوضت وصلت الصبح ولبست وبدت اتجهز في روحها للجامعة(لبست بلوزة طويلة وردي هادي وجينز ازرق ووشاح ليكرا كريم واسبيدرو اسود مموج بالوردي وشنطة صغيرونه كريم مع اشوي ميك اب خفيف بكل )
طلعت وفطرت مع هلها وطلعت مع صهيب بيوصلها للجامعه لان حتى هو عنده محاظرة
وصلو للجامعه تلاقت مع مرام وقمعزن راجعن اشوية وجا وقت الامتحان وخشن للقاعة
""""""
في فيلا نبيل
نبيل:صباح الخير ياحاج
ابو نبيل;صباح الخير تعال قمعز افطر
نبيل;عارفني ياحاج ماانحب نفطر في الصبح
ابو نبيل:وين ماشي بتفتح المعرض من توا
نبيل:لا والله مازالع عندي محاظرة بنمشيلها قبل وبعدها نفتح(وطبعا يكذب لا يحظر في محاظرات لا سو)
نرمين تضحك:😂😂صار محاظرة
نبيل:اها محاظرة ياام السان ولا عندك مانع
نرمين:لا ماعندي مانع غير انجح السنة امدادك الهم زمان متخرجين
نبيل:مش موضوعك هذا ياام السان وبعدين هدي اخر سنة وانا وناوي ننجح انشاءلله(ايسمع في باته)
نرمين:توا تنجح غير اعبي
ابو نبيل:تحشمي يابنت خوك الكبير انشاءلله يااوليدي تنجح واتريح
نبيل ايبحت في نرمين وايرقص في حواجبه متشمت فيها:انشاءلله ياحاج سلام توا وطلع
مشي للجامعه وقعد يرجى في سالمة تطلع من الامتحان وقعد اقريب من قاعة امتحانها(طبعا الاخ كان عارف كل شيء عليها موعد محاظراتها والقاعات اللي تاخد فيهم وحتى حبيبها عارفه لكن ماعمره حاول يتقرب منه او يخرب عليها او ايدير حاجة اتزعلها او ايفرق بينهم ابدا) اشوي وسالمة طلعت بروحها قبل الوقت ومرام مازال في القاعة وصهيب في القاعة والدكتور ياخد في الحظور وبيطلع من محاظرته
شفاته قدام القاعة لوت وجها ومشت لحقها نبيل وصبى قدامها
#يتبع
زعما شن بيصير وصهيب ايشوفهم مع بعض هذا اللي حنعرفوه الحلقة الجاية 😊
سامحوني كان في اخطاء في الأسماء😊
وأكيد رأيكم ايهمني 😉
گـتـابـتـي Koka Saleh
منقولة💖
بليز نبي تفاعل ع الروايه
