Миний хөл газарт хүрэх мөчид нүдээ удаанаар нээгээд харвал бид эмнэлгийн дээвэр дээр ирчихсэн байв. Мөнөөх чөтгөр чинь хоолойгоо засахад гэнэт ухааран түүний хүзүүгээр тэвэрсэн гараа суллан холдож зогслоо.
"Нэг муу жул амьтныг явуулаад энэ Жонү бүр манарч дуусаа юу?" гэж тэр ихэд ёжилсон мөн гайхсан байдалтай хэлэх нь миний дургүйг хүргэнэ. Өөрийнхөө жул гэдэгтэй эвлэрч байгаа ч энэ чөтгөр хэн болчхоод манай Жонү ахлахыг ингэж муугаар хэлээд байгаа юм бэ?
"Чи байгаагүй бол би түүний сүнсийг авах байсан юм. Өөрөө мөрөөрөө ажлаа хийгээд явж байсан надад саад болчхоод ингэж хэлэх чинь их бүдүүлэг биш гэж үү?" хэмээн түүнд хэлээд дээврийн өнцөг рүү явж эхлэх бөгөөд явах явцдаа далавчаа гаргах гэж хичээнэ.
Их хүч гаргасны эцэст далавч минь гарч ирэх агаад яг нисэх гэж байхад мөнөөх чөтгөрийн дуу сонсогдож би түүн рүү эргэж харвал "Хаачих нь вэ?" гэж тэр юу ч болоогүй мэт асуулаа.
"Өөрийн сүнсээ очиж авъя" хэмээн түүнд хариулаад дээвэр дээрээс яг үсрэх гэхэд тэр дахиад ам нээв би ахиад түүн рүү эргэж харвал гартаа нэг юм барьсан байгаа харагдана.
"Энэ үү?" хэмээн тэр толгойгоо гилжийлгэн надаас ёжтойгоор асуулаа.
Би гайхан ойртоод гаран дахь зүйлийг сайн ажиж харвал... Байж боломгүй юм! Үгүй байлгүй дээ! Гарт нь байгаа зүйл болор ампул байв! Би болор ампулын талаар зөвхөн диваажин гийн номын сан дахь ном дээрээс л харж байсан болохоос бодитоор харж байгаагүй.
Болор ампул гэдэг нь шидэт болор шилээр хийгдсэн жижигхэн лонх шиг хэлбэртэй зүүлт байдаг юм. Болор ампул сүнсийг сорж аваад дотроо шингээж чаддаг бөгөөд дотроо сүнс хорих боломжтой эд байгаа юм ер нь бол нэг үгээр сүнс хадгалах зэвсэг гэж хэлж болно, маш ховор эд.
Болор ампул руу орсон сүнс ампулыг дахин нээхээс нааш гарч ирж чаддаггүй тийм болохоор ийшээ орсон сүнс очих ёстой газар луугаа явж чадахгүй хоригдоно гэсэн үг. Болор ампул дотор хоригдох нь там руу явснаас ч долоон доор байдаг гэж сонссон юм байна.
Би балмагдаж тэвдэн "Хүүе ээ яаж байгаа юм бэ? Түүнийг тавьж явуул" гэж түүнээс хүсэхэд тэр миний үгийг тоосон шинжгүй "Тэр одоо минийх болсон байхад би яагаад тавьж явуулах ёстой гэж?"
"Тэр бол миний сүнс! Тэглээ ч тэр ямар ч гэм нүгэл үйлдээгүй шүү дээ тийм болохоор чөтгөр авах ёсгүй" гэж бага зэрэг түүнийг зэмлэнгүй айлдлаа.
