انثى في عرين الاسد

الفصل السابع

♡ انثى في عرين الاسد ♡
              ~الحلقة السابعة ~
عند ناس مجد :
دخلو قاعة الامتحان...وامتحانهم بدا
مجد وخالد ورؤى قاعدين قدام
وريان وحسام ولؤي قاعدين وراهم بي كنبتين.
الامتحان كان كلو امسكيوز وملوع ناااار( ضع دائرة 💔)
لؤي بقا بيتلفت 😂..قبل على ريان: بسبس ريانوه السؤال الاول شنو ؟
ريان وهي بتحمر ليهو : هسه بقيت ريانوه 😒
حسام بي همس : يا متخلفين وطو صوتكم .
لؤي: ريان عليك الله الاول شنو
ريان: B
لؤي دور على B
ريان: لا لا شكلها C.. غايتو ما متأكدة يا C يا B
لؤي : حسام ساعدني 😢😔
حسام وهو بيرقد في الدرج: هو انا لاقي اليساعدني..القريتو كلو ما جا.
لؤي خلااااص غلبو 😂..وقف على حيلو : والله يا بروف الكلام دا كدا ما جاي...ماعرفناهو امتحان ولا نشرة جوية..انا ما قادر احل اي حاجة .
المراقب صلح نضارتو وخلف رجلو : طيب شوف من اصحابك الجمبك.
لؤي : يعني فكيت المراقبة😳 ؟
المراقب: اي  ( الله يزيد من امثالك 😂❤)
لؤي :الله ينصرك وينصر دينك🎊🎉🎊🎉 يا شباب السؤال الاول اجابتو شنو .
ناس ورا قالو ليهو : B
لؤي: B ?
الورا : اي
المراقب جاهو : عايز تعرف ياتو اجابة ؟
لؤي : كلو 😀...وبالله جيب لي الاجابات من قدام من ناس مجد وخالد ورؤى ابعد لي من الكنبة القاعد فيها والقدامي. ( غاسل يدو منهم 😂)
حسام طلع تلفونو ومن الجوجل جاب الاجابات كلها 😂.
طلعو من الامتحان وهم الضحكة من الضرس دا للضرس دا... مبسوطين وكلهم نفس الاجابات 😂😂😂.
حسام تلفونو ضرب ودا كان منذر.
حسام : خير ؟
منذر : تمام والله الحمدلله وانت كيفك ؟
حسام وهو بيضحك: انا برضو كويس الحمدلله.
منذر: اسمعني..انتو في الجامعة ولا رجعتو ؟
حسام : لا في الجامعة .
منذر: طيب انا جاييكم 😀.
حسام : طيب مستنينك بس اسرع .
منذر: يلا نتلاقى.
شيرين جات.
ريان: استغفر الله
شيرين: السلام عليكم 😒
ريان: وعليكم 😒.
لؤي بدا يكح: يا جماعة الجو دا قبل شوية مش كان بارد الحر دا شنو يا كافي الببببلا.
ريان: حر الموت .
شيرين : انا ماعارفة يا مجد انت مستحمل الاشكال دي كيف .
ريان وهي بتصفق : اشي اشي ياختي هو استحمل خلقتك دا ما حيستحملنا.
شيرين : انتي لي يا حبيبتي مقهورة .
مجد: شيرين خلاص.
ريان : اي مقهورة من قلة ادبك ولطاختك 😏.
رؤى : ريان ارح .
شيرين : نعم؟ قلتي شنو ؟
ريان : خليك على السمعتي 😏.
مجد وهو بيسوق شيرين من جهتهم : خلاص يا جماعة اهدو .
مجد ابتعد شوية..لؤي بي صفقة: 👏👏👏👏 والله خطيرة يا ريان كيفتيني 😂.
ريان: لسا انت ما شفت حاجة 😌.
خالد: مبسوطة من نفسك يعني ؟ انتو كدا بتزعلو مجد..وانتي عارفة مجد زول عيان واقل انفعال بوديه في خبر كان .
ريان: وهي بتقل في ادبها عايزني اسكت ؟
خالد: انتي البديتي ياريان...على الاقل امسكي اعصابك بس عشان مجد .
في اللحظات دي منذر وصل جا داخل ليهم بي عربيو الرياضية الجامعة كلها وقفت تتلفت.
سلم عليهم وقلع نضارتو: وين مجد ؟
حسام: هسه بيجي
منذر: انتو جامعتكم دي كلها عبارة عن مزز وجكس ؟؟؟
ريان: انت ما شفت الباقيين 😏 جامعتنا اصلا رهيبة.
جات واحدة صاروخ ( التشبيه متعوب عليه 😂) ماشه .
منذر: اوباااا 🙊 دي شنو دي .
خالد: دي بالذات تنساها مخرفنة اولاد الجامعة كلهم..وتقيييلة ما بتقدر ليها .
منذر: يا ولدي انا منذذذر بقدر ليها 😏.
حسام: والله ما بتقدر ليها..دي ما من النوع البجيك عشان عربيتك.
منذر : لو جبت رقمها حتدوني شنو ؟
خالد : حادفع ليك حق البنزين لي مدة 3 ايام .
منذر: اسبوع 😏
خالد: طيب اتفقنا 😉
حسام: دقيقة ولو خسرت حيحصل شنو؟
منذر: انتو عايزين شنو ؟
حسام : حتدفع لي خالد بنزين عربيتو لي مدة اسبوع..بالاضافة لي انو حيبقى اسمك الخروف 😂.
ريان: احسن تتنازل يا منذر لقب خروف دا حينتهي منك 😂.
منذر : شوفوني واتعلمو 😏.
رؤى: اتحفنا 😂
منذر مسك تلفونو..واستنى البت لحدي ماجاات طالعة من المكتبة..وبي هناك الشلة واقفة بتعاين ليهو ومستنيين متين عشان يطلقو عليهو لقب خروف 😂.
البت جات شايلة دفاترها 📚 ومن فوقها التلفون 📱..منذر بقا بيتكلم بالتلفون انجليزي... وهو انجليزيهو طلللقة.
عمل نفسو ماشايفها وصدمها بكتفو وطاخ حاجاتها كلها وقعت والتلفون ادشدش..منذر عمل نفسو مخلوع.
البت : انت عميان ولا حاجة 😠.
منذر دنقر لقط ليها حاجاتها : اسف .
عاين ليها في وشها بتركيز : انتي عارفة ربنا رزقك بي اي حاجة الا رقم تلفوني
البت زمت خشمها عشان تكتم الضحكة..طبعا وشو ما  بيستاهل الصرة فيهو ( مظ 🐸).
منذر : التلفون اتكسر.
البت : ما مشكلة
منذر : لا لازم اجيب ليك واحد .
البت : لا والله ماف داعي .
منذر: مستحيل انا كسرتو لازم اصلحو على الاقل احس بالرضا عن نفسي..يعني طقشتك ورميت بيك حاجاتك وكسرت تلفونك ما حينفع امشي ساكت.
البت سكتت
منذر: بتحبي الايفون ولا الجلكسي ؟
البت : طيب ايفون نفس النوع الرميتو لي .
منذر : طيب رقمك
البت: طيب سجل******* 09133
منذر: بشتريهو وبجيبو ليك بكرة ان شاء الله .
البت : شكرا  😊.
منذر بي ابتسامة : العفو ☺✋.
البت مشت ... وهو جا لي اصحابو الكانو مدهوشين..
منذر: هاهاهاهاهاهاها 😂 جبتو..يا حبيبي ما تستهينو بي😌
حسام: عملتها كيف دي ؟
منذر: المهم عملتها 😌.
ختا يدو في كتف خالد : تقل جيبك حق البنزين لي اسبوع 😏.
في الوقت دا مجد جاهم.
مجد: جيت متين انت ؟
جيت من قبيل 😀.
حسام: اتخيل دخل قي تحدي مع خالد عشان يجيب رقم تلفون البت السمحة ديك.. وهسه خالد حيدفع ليهو حق البنزين لي مدة اسبوع 😂
مجد وهو بيربت على كتف خالد : قلبي وربي معاك 😂
شوية كدا رؤى وريان مشو...الشباب مشو كافيه...ومجد اصرا على انهم يرجعو معاهو البيت.
**************
بيان كانت واقفة قدام اوضة مجد بي خطوات ثقيلة اتقدمت وفتحت الباب..قعدت في سريرو وهي بتعاين لي صورو المعلقة في الحيطة..وصور نجوم الكورة البيحبهم..الميداليات بتاعتو..الكمان الخاتيهو في المكتب..وهدومو المرميها في الكرسي..شال تيشيرتيهو وضمتو ليها..استرجعت كلام الدكتورين القدرت تميز صوت سامي فيهم.
الدكتور: سامي..انت دكتور زينا وعارف اي حاجة..مجد مشكلتو كبيرة وبقت بتأثر على الجهاز التنفسي..ومحتاج لي عملية جراحية دقيقة جدا..اي غلط فيها حيكون ثمنو غالي...انا معجب بيهو لانو ماشاء الله قوي وبيستحمل وبيكابر..انت عارف المرض دا فيهو الم لا يطاق.
سامي: حيعمل العملية ان شاء الله وحيخف.
الدكتور سكت شوية قبل ما يقول : نسبة نجاحها 30 في المية فقط.
سامي : كلو بيد الله..بس ياريت ما تقول ليهو نسبة نجاحها كم...انا ماعايزو يتأثر باكلام دا..واهلو برضو ياريت ما يعرفو.
الدكتور: ما تخاف ماف اي زول حيعرف.
سامي : شكرا .
بيان كانت حاسه بخوف عميق..اخوها الوحيد..اخوها الصغير المجنون..بيتوجع وبيتألم لكن مخبي دا كلو ورا ضحكتو وشغبو..ماف يوم جا اشتكا ليها وقال ليها فيني حاجة بتوجعني..اتمنت لو كان بيدها تاخد مكانو وتريحو..كان في سؤال بيطرح نفسو بفضولية حل #حتفقدو ؟ 30 في المية بتقول ليها #لا....و 70 في المية بتقول ليها #اي.
نزلت دمعة سريعة من دون تجي على خدها..سمعت صوت مجد واصحابو وهم طالعين في السلم وبيتكلمو .
وقفت بي سرعة وهي بتمسح في عيونها .
مجد فتح الباب: اقبببض بتعملي شنو في اوضوتي.
بيان عملت نفسها بطبق في التيشيرت : اوضتك المبشتنة الوسخانة..اهتم ونضفها على الاقل .
مجد: اي اي افضحيني .
منذر وهو بيقعد في الكرسي : عادي اصلا احنا بنحب البشتنه 😀.
بيان وهي بتضحك : شنو رايكم اعمل ليكم مكرونة.
مجد : بالبشميل ؟ 🙈
بيان : شرط يعني ؟
لؤي : ما شرط المهم بس نتحشي وناكل اي شي .
بيان وهي طالعة على الباب: اشتغلتو كيف في الامتحان .
لؤي ومجد وحسام وخالد ابتسمو بي اجرام وقالو في نفس الوقت : تمام...تمام شديد.
*******************
عند سامي :
كان على ضهرو في السرير وخاتي يدو تحت راسو وبعاين للسقف : غببببية يا جمان...بس مصطفى الكلب كيف...كيف قدر يوصلها؟ لا وبتقول لي اشرف منك ومن عشرة زيك..معقولة ما ففكرت في نفسها ولا فينا..هسه لو كان شافها زول كان حيقول عليها وعلينا شنو ؟ ما عندها رجال يلموها..صدقيني فتحت النار على نفسك حاندمك 😠.
قطع تفكيرو صوت سالي البريئ.
سالي : ثامي
اتلفت عليها بي ابتسامة : عيونو
سالي : مامي قالت ليك الغداء ☺.
سامي قام من السرير ورفعها في كتفو..نزل بيها تحت..لقا امو وابوه ورشاد قاعدين في السفرة مستنينو.
قعد نور فوق السفرة ( اصغر واحد في البيت لازم يقعد فوق السفرة 😂).
بعد ما خلصو اكلهم اي زول قام..سامي امو طلبت منو يقعد.
سلمى : اها شنو رايك في الاكل 😀
سامي : ملحتو زايدة 😛
سلمى : 😒😒😒
سامي وهو بيضحك : حلو حلو والله مافيهو اي كلمة تسلم يدك 😍😘.
سلمى: عقبال ما تقول الكلام دا لي مرتك  ☺.
سامي (فاهم حركاتها) : امييين 😉.
سلمى : اها موافق عليها
سامي حابي يستهبل : منو ؟
سلمى : هو شنو المنو ...جمانة
سامي : جمانة منو 😳
سلمى : سااااااامي 😒
سامي : اها جمان... اي جمان اتذكرتها 😸.
سلمى : موافق ؟
سامي : .........
سلمى: عاين يا ولدي لو ما عايزها بس قو.... قاطعها وهو بيقول: موافق
سلمى سكتت شوية كانها عايزة تتأكد من السمعتو.
سامي : اي موافق
سلمى حست انها حتطيييير من الفرح اخيرا حتفرح بي واحد من اولادها..وبي اعلى صوتها زغردت :ايوووووووي يوي يوووووي 👌👄 ( ابشر ☝😌).
رشاد جا نازل وهو مخلوع : في شنو ... منذر نجح ؟
سلمى : لا اخوك حيعرس😀
رشاد : اخوي منو 😱.
سامي: انا 😌
رشاد وهو بيضحك : منو تعيسة الحظ ؟
سامي : قصدك سعيدة الحظ 😏.
رشاد: المهم
سامي : جمان .
رشاد : جمان بنتي ؟؟؟ 😂... ونعم الاختيار والله .
سلمى : خلاص امشو من هنا .
رشاد : احسن نمشي بي كرامتنا..
سامي: طيب... اصلا نعسان وعايز انوم شوية..وطلعو.
سلمى ضربت لي عبير : عبير كيفكم ان شاء الله كويسين
عبير : الحمد لله بخير وانتي كيف اولادك ؟
سلمى : الحمد لله كويسين...اها جمان ردت عليك ؟
عبير : انا كلمتها قبيل ولحدي هسه ما جابت لي سيرة..انتي عارفة انا ماعايزة اجبرها.
سلمى: وانا زاتي ما بقبل والله انها تتزوج واحد ماعايزاهو...لانو مهما كان في النهاية العرس ما لعبة .
عبير : طيب شنو رايك يوم الخميس اعمل عزومة عشاء في البيت... وتبقى فرصة حلوة يتلاقو فيها ممكن يتكلمو بعض.. ويشوفو حيقدرو يتفاهمو مع بعض ولا لا 😀.
سلمي : فكرة حلوة
عبير : على بركة الله
************
مجد كان لابس شورت..ولابس جكت وخاتي طاقيتو في راسو..وقاعد مع اصحابو في السفرة هو راكب فوق 😂 ( حتالة البيت) بسان جابت ليهم المكرونة... كلهم بقو بيكوركو بي حماس..ونزلو كلللهم ضرب في الاكل.
بيان قعدت في مصطبة المطبخ وهي بتعاين ليهم..ركزت في مجد كان بياكل وبيتكلم.. بيضحك شوية..ويخلل شعرو بيدو..كان لمن يضحك بغطي عيونو بيدينو..ومرات بيزم خشمو لمن يكون منتبه في كلام واحد من اصحابو.
انتبهت لي تلفونها البيضرب...جاها صوت جمان المخنوق.
بيان: جمان في شنو .
مجد وحسام انتبهو ليها .
بيان لقت حسام ومجد بعاينو ليها وفي تساؤل في عيونهم..قالت ليهم وهي بتضحك : هوي اكلو اكلكم وخلو الشمار .
مجد وحسام ضحكو ورجعو لي اكلهم .
بيان طلعت فوق اوضتها: جمان خير في شنو ؟
جمان حكت ليها كللللل الحصل وورتها بي عزومة يوم الخميس .
بيان هدتها واتكلمت معاها طويل...نزلت تحت لقت الاولاد فاحين تلفزيون الصالة.
منذر  : ساعة بتتكلمي 😉
بيان : دي جمان 😒
حسام : مالها ؟
بيان : عاملين عزومة يوم الخميس .
منذر : يس على الاقل موضوع لي نهاية الاسبوع
لؤي : انا من هسه جاي
حسام : انت جاي في اي حاجة ياخ احتمال عايزين نقطع فيك...بس قاعد لينا في حلقنا .
لؤي : قاعد ومحكر كمان 😌.
الاولاد قعدو طويل مع مجد بعديها كلهم رجعو بيوتهم .
مضت ايام الاسبوع بي حلوها ومرها...بيان الوقت كلو بتفكر في اخوها المكابر..وزاد الطين بلة مشكلة جمان..مجد ملتزم بي علاجو وكل دقيقة حسام بيضرب ليهو ويسألو هل بلع حبوبو ؟ سامي مستني يوم الخميس..وجمانة خايفة شديد من لقاء سامي .
يوم الخميس :
الساعة 8
بيان كانت قاعدة فوق مع جمانة وصحبتها ريم.
جمانة كانت قاعدة في السرير ومتوترة .
ريم وهي بتبرد في اضافرها: شوفي ماليهو اييييي حق يكورك فيك..واوعك تخافي منو وتسكتي ليهو.. انا لو كنت محلك كان قرقشتو بي اسناني وتفلتو.
بيان : انتي جيتي عشان تحمشي النيران 😒
ريم : انا بقول الحقيقة بس ما اكثر.
جات جلنار داخلة وهي منتبها مع تلفونها : هي ماما قالت ليكم انزلو خلاص.
جمان : جايين
بيان : خليك ريلااااكس وطبيعية تمام
جمان : تمام .
ونزلو...عبد الرحمن واولادو وصلو..ودخلو يسلمو الا سامي الكان واقف بيتكلم مع مجد..بعديها دخل عشان يسلم على عمتو...لقاها واقفة ومعاها ريم وبيان
عبير: اووووه سامي شرف.
ريم رفعت راسها عشان تشوفو...ماقدرت تعاين ليهو مرتين..لابس جلابية خليجية متناسقة مع بنيتو العضلية 💪..لونو اسمر جميل 😍 وسكسوكتو مرتبة.
سلم على عمتو في راسها.
عبير : ان شاء الله كويس؟
سامي: تمام والله الحمد لله .
عبير: دي ريم صحبة جمان
سامي: اهلا ياريم كيفك
ريم بي ادب وعيونها ملصقة في الارض: تمام الحمدلله ( كان يسمع الحريش القبيل داك 😂)
سامي وهو بعاين لي بيان : ودي منو ما عرفتها
عبير : بري انا زاتي ما عرفتها
بيان : اها نكرتوني 😳
سامي ضحك وسلم عليها... جمان جات نازلة اول ماشافتو قلبها بقا بيضرب برااااحة اتسحبت علي ممر في يمينها فيهو صالة كبيييرة فيها قعدة ومراية كبيرة ومغسلة زجاجية.. وقفت مسافة وهي بتشيل في انفاسها..عاين للساعة لقتها 8 وعشرة دقايق... غسلت وشها ونشفتو وطلعت...لقت سامي طلع برة..شالت نفسها بي ارتياح..بعد شوية انشغلت في ختو دا وطلعو دا... ومنذر ومجد وحسام كلو دقيقة يطردوهم بره لانو ماف صحن طلع الا ومدو يدهم عليه.
بعديها النسوان ختو اكلهم في الصفرة وبدو ياكلو...ويتونسو ويضحكو..جمان قامت وغسلت يدها وقعدت في الكنبة...حست انو فيها حاجة غلط فيها خاجة ناقصة ايوااا  تلفونها ما معاها.. سألت بيان القاعدة جمبها : بيان شفتي فوني ؟
بيان : لا
جمان: ياربي ختيتو ويييين ؟
بيان : حاولي اتذكري
جمان عاينت في النجفة لي وقت طويل قبل ما تشهق : اتذكرت.
قامت بي سرعة ومشت المغسلة الفي الصالة...لقت تلفونها..ابتسمت وشالتو وهي بتزفر بي ارتياح.
عاينت في المراية وشافت شي ماكانت متمنية تشوفو اببببدا وكانت خايفة بكل معاني الكلمة من اللحظة دي واتمنت بي شدة انها ما تمر بيها...كان سامي (😱💔) واقف وراها وهو مكتف يدينو وفي نظرة باااااردة في عيونو.
جمانة حست بي قلبها وقع في الارض ورجلينها ماشايلنها...بي محاولة شديدة شالت تلفونها ولفت عشان  تطلع وهي ماعارفة القوة دي جاتها من وين..سامي وقف قدامها...جمان اتجرأت وعاينت ليهو : لو سمحت الطريق.
سامي بصوت خشن : انا حاتزوجك.
جمانة بلعت ريقها : ما حتقدر تجبرني عليك
كانت جواها في احاسيس مختلطة...غضبانة وزعلانة وخجلانة...اي خجلانة من المنظر الشافها فيهو مع مصطفى الندل.
سامي : متأكدة ؟
جمانة بي خوف مخبياهو : اي
سامي وفي ثقة شديدة في تفاصيل وشو ارعبت جمانة : انتي عارفة اني لمن اقول حاعمل حاجة بعملها بعملها مهما كان... واوعدك عرسنا حيكون الشهر الجاي سواء رضيتي او ابيتي ونشوف الكلامو حيمشي منو 😏 ( شرير 😢)
جاهو صوت جوري الواقفة قدام الباب : حالو شامي (😍)
سامي ادا جمان نظرا فهمتها كويس... شال جوري وهو مبتسم وبدا يلعب فيها وطلع ....خلا جمانة واقفة وهي بترجف من الانفعال.
#نهاية_الحلقة_السابعة
اسفة على التأخير...بس الشبكة 😠
يلا وروني اكثر شخصية حابنها منو
الجكس بتاع مجد اقيفو بعيد عارفاكم مسيطرين 😉😂