انثى في عرين الاسد

الفصل الثالث

#انثى_في_عرين_الاسد
#الحلقة_الثالثة
بيان كانت قاعدة مع امها..فجأة هدى ختت يدها في قلبها من شدة ضربانو .
بيان : ماما انتي كويسة ؟
هدى وهي بتذكر اسم الله : اي كويسة ... كان جواها في شعور انو في حاجة حاصلة واحد من اولادها واحساسها كان قوي على مجد..دعت الله بسرها انو ولدها يكون بخير.
بيان وهي بتشيل عيشة توست وتدهنها بمربى : متأكدة ؟
هدى : اي متأكدة.. انا اطلع بعد دا عندي قضية مهمة عايزة اركز في اوراقها .
بيان : طيب مع السلامة .
هدى طلعت برة وركبت عربيتها ..بيان فتحت مجلة وبدت تتصفح فيها..نغمت تلفونها علت.. شالت التلفون وردت: الووو
رهف: بنبناية فجولة .
بيان وهي بتضحك : خير ان شاء الله ضاربة لي من الصباح .
رهف: وراك حاجة الليلة ؟
بيان : ما اعتقد لي ؟
رهف : عايزاك تجي تختاري معاي الفستان بتاع الزفاف.
بيان : ايوااا يعني لي مصلحة ضاربة لي
رهف : بيان ياخ..انتي الوحيدة البتقدري تستحمليني ..وبعدين انا ماعايزة فستان اي كلام وانتي بتعرفي في الموضة .
بيان : طيب طيب... بجهز وبستناك.
رهف: يلا مسافة السكة وبكون عندك..بيان طلعت فوق استحمت وجهزت نفسها..لبست تنورة كبدية..وقميص اسود يدينو طويلة ربطتو من قدام وخلتو مفكوك من ورا وعقد فضي جميل وجزمة بيضاء كلاسيكية(حنزل صورتها) رفعت شعرها كعكة بفوضوية ولبست نضارتها الشمسية ولبست طرحة قطنية بلون التنورة اطلالتها كانت انيقة ومناسبة مع الجو الشبه خريفي      
بعد نص ساعة رهف وصلت ..ضربت ليها بوري وبيان جاتها نازلة .
رهف وهي بتطلع نضارتها الشمسية : هيلو
بيان : هيلو
رهف: يلا شدي حيلك عايزة لي فستان سمح .
بيان : نقول بسم الله ونتوكل.
لفو طويل يطلعو من محل ويدخلو لي محل تاني بيان روحها طلعت المحل السابع يطلعو منو ورهف مشكلتها كبيرة ما بتقتنع بي سهولة .
بيان : رهف حرااام عليك..انا خلااص تعبت يابت الناس ارحميني .
رهف : يرضيك يا بيان صديقة طفولتك تلبس فستان اي كلام ؟
بيان : طيب يرضيك انتي تشلهتيني وتتلتليني وتكرهيني حياتي ؟
رهف : معليش اخر مرة بس استحملي كلها كم شهر واعرس وترتاخي مني .
بيان وهي بتضحك : طيب امشي ..امري لله.
لفو ولفو وكل مرة رهف عندها راي..لحدي ما ربنا رحم بيان ورهف عجبها فستان كان حلو شديد فستان علاقي ضيق من الصدر والبطن  وبعديها منفوش وعندو ذيل طويل ومنطقة الصدر فيها كريستالات لامعة..رهف جربت الفستان وعجبها شديد..كان متناسق مع جسمها ومظهر لون بشرتها الاسمر الجميل وهي رافعة شعرها الاسود وبتعاين لي نفسها بي اعجاب في المراية وبيان واقفة وراها وهي مبتسمة بي سعادة وبتعاين لي صحبتها الفضلت واقفة قدام المرايا كتير .
رهف : حلو ؟
بيان : حلو شديد 😍
رهف : عقبال ما اجي اختار معاك فستانك .
بيان : امين 😊
♢♢♢♢♢♢♢♢♢♢♢♢♢♢♢♢♢♢♢
في المستشفى مجد فتح عيونو بي بطئ..حسام كان واقف جمب الشباك وهو بعاين لي حركة الناس الدؤوبة في الشارع وكل هموم واحزان الدنيا ظاهرة في عيونو كانو شايب عمرو كم وسبعين مش شاب في مقتبل العمر..خالد مكتف يدينو ومتكل على الحيطة..لؤي قاعد في الكرسي جمب مجد وهو منزل راسو ومغطي وشو بيدينو .
في كنبة كبيرة قاعدين فيها رؤى وريان وشيرين.. مجد شال قناع الاكسجين من وشو.. رؤى انتبهت ليهو ووقفت بي سرعة : مجد؟
حسام جا بي سرعة وقعد على ركبو في الارض جمب مجد: مجد كيفك .
مجد بصوت ضعيف : انا كويس لكن جابني هنا شنو ؟
لؤي : ايييييك موضوع طويل..اخر حاجة متذكرها كانت شنو ؟
مجد: كنت في الجامعة.
ريان : خلاص يا جماعة ما تتعبوهو بالكلام .
شيرين بي صوت متهدج : خوفتني عليك 😢
مجد بي ابتسامة صغيرة وهادئة : اسف ❤
رؤى : سلامتك ان شاء الله .
مجد : الله يسلمك
دخل دكتور سامي: كيفك يا بطل ؟
مجد : الحمد لله
سامي : حتطلع الليلة ان شاء الله وما عندك ااااي مشكلة .
شوية كدا بدو زملائهم في الكلية يجو .. مجموعة تطلع ومجموعة تدخل عشان يطمنو عليهو .
بعد تحنيس من لؤي وخالد وحسام حتن ريان ورؤى قبلو انهم يرجعو بيوتهم شيرين قعدت شوية وبعديها طلعت.. في النهاية فضلو الشباب اصحاب مجد فقط.
سامي جاهو تاني .
مجد : سامي عايز اطلب منك طلب .
سامي : انت تطلب وانا انفذ .
مجد : ماعايز الموضوع يتعرف طيب ؟
سامي سكت شوية قبل ما يقول ليهو : ما تخاف ماف زول حيعرف..لكن..لي ما كلمتني انا ؟
مجد: والله انا ما كنت عايز اي زول منكم يعرف حتي اصحابي عرفو بالصدفة .
سامي : مرضك تم عليهو كم ؟
مجد : 7 شهور .
سامي : هسه ناس الجامعة عرفو ؟
لؤي : قلنا ليهم ضيق تنفس عادي.
سامي : لكن يا مجد حتفضل ساكت كتير اهلك لازم يعرفو مهما كان .
مجد : والله خايف عليهم.. انت عارف امي واخواتي لمن يكون عندي نزلة بيقومو الدنيا ويقعدوها.. تفتكر لمن يعرفو انو .... انو انا عندي مرض في قلبي حيعملو شنو ؟مصيرهم يعرفو في يوم😔
كلماتو سكتتهم..مجد خايف على اهلو اكتر من نفسو .
مجد شوية شوية بدا يرجع لي حالتو الطبيعية.. لانو تقريبا اعتاد على المضاعفات المفاجأة البتحصل ليهو من مرضو..زي ضيق التنفس والدوار والصداع الشديد.. بدا يضحك ويتكلم مع اصحابو كانو ماحصل شي .
حسام تلفونو ضرب : طيب تمام انا جاي .
حسام وهو بيدخل التلفون في جيبو : مجد الحارس جاب ليك عربيتك.. انا حارجع البيت ارتاح شوية .
مجد : طيب نتلاقى في العزومة .
حسام : ان شاء الله.
طلع وهو وشو محمر من الغضب : اقسم بدين الله الا اندمك .
جاهو صوت لؤي وهو بينده عليهو : حسام
جاهو جاري : حسام انا عارفك بتفكر في شنو ما تتهور عليك ... ما تدخل في مشاكل انت في غنى عنها .
حسام : ما حاسيبو
لؤي : طيب انا عارفك هسه غضبان... استفغر الله وارجع بيتكم وخلي عمر في حالو انت في لحظة غضبك دا ممكن تعمل اي حاجة وتندم عليها.
حسام وعرق جبهتو ظاهر من الغيظ : البيهبش زول من عائلتي حاخليهو يندم مهما كان.. وما حاخليهو يعني ما حاخليهو .
ولفا وطلع بي سرعة وهو بيتجاهل في مناداة لؤي ليهو .
لقا السواق واقف تحت ..لانو هو عربيتو ما معاهو ركب بي سرعة واتحركت بيهو العربية لي مصنع كبير مهجور .
بعد 5 دقائق وصلت عربية برادو نزلو منها 3 بودي جارد لابسين بدل موحدة.
نزل البودي جارد الرابع وهو ماسك ليهو واحد ورماهو في الارض بي قسوة .. عرفتو دا منو؟؟ اااي عمر .
حسام مسك عمر بي قوة من شعرو بي طريقة مؤلمة ( بري منك بري ) واداهو كف مهين .
قال ليهو بي صوت هادئ لكن فيهو نبرات غضب واضحة : دي حاجة بسيطة اذكرك بيها نفسك.. قسما بدين الله العظيم يا عمر تاني تقرب من مجد بي اي طريقة  قسما بدين الله ادفنك بيديني هنا فاهم .
عمر وهو حاسي بي مرارة الاهانة وبيحاول يقيف على حيلو بعد الكف الافي بيهو : جايب لي كم واحد معضل .. مش كان تجي براك ؟
حسام : اوكي ماف اي مشكلة .. انا وانت راجل لي راجل وماف واحد فيهم حيهوب ناحيتك حتي لو قتلتني .
عمر بي كل قوتو ادا حسام بوكس خلاهو رعف
حسام بي سخرية: ضربتك ما بطالة..ورداها ليهو بي بوكس أقوى في معدتو خلاهو وقع في الارض وهو بيرجع اي حاجة اكلها .(واااي فزيعين فزيعين🐸)
حسام وهو بيمسح الدم المتدفق بي غزارة : عمر..انت واحد عند امك ما عايز احيرها فيك..ابعد مننا احسن ليك.
واحد من الحراس جا بي سرعة عشان يدي عمر شلوت ..لكن وقف بي سرعة بعد اشارة حسام ليهو .
حسام ادا عمر نظرة جهنمية..رجع عربيتو والسواق اتحرك بيهو..والبودي جارد رجعو بي عربيتهم..وخلو عمر براهو وهو لسا بيرجع 😷.
حسام مسح الدموع الملت عيونو وهو بيتذكر في شكل مجد.. كان خايف..خايف يفقدو في ثواني..يفقدو للابد.
وصل فيلتهم..اول ما دخل قعد في اقرب كرسي جمبو..كان ماسك كمية من المناديل عشان الرعاف .
امو جاتو : حسام 😱 دا شنو دا مالك يا ولدي ؟  الدم دا شنو 😱.
حسام وهو بيقيف بي سرعة : رعفت ..رعفت من الحر .
ماجدة(امو): حر شنو يا ولدي؟ الليلة الشمس زاتا ما ظهرت..مالك عايز تخوفني
حسام وهو بيجي ليها : القاعة بتاعتنا حارة شديد وما مكيفة..وبعدين تخافي شنو؟ دا مجرد رعاف يعني حاجة عادية.
نادين جات نازلة : يلا يا ماما انا خلاص جهزت .
حسام وهو رافع حاجبو : علي وين ان شاء الله ؟
نادين : صحبتي في المدرسة عيانة ليها اسبوع كامل ماجات عايزة ازورها .
حسام : لا..ماف مشي .
نادين : كيف يعني ماف مشي 😢.
حسام : يعني كدا ..ولو انتي مرة القاك عتبتي خشم الباب..ووقتها ما تلومي الا نفسك فاهمة 😒.
نادين: لكن
وقطعت كلامها لمن امها اشارت ليها بالسكوت .
حسام طلع السلم بي خطوات واسعة وسريعة.. و خلا امو واختو تحت وهم بعاينو ليهو بي لستغراب وحيرة.
#نهاية_الحلقة_الثالثة