انثى في عرين الاسد

الفضل السادس عشر

♡ انثى في عرين الاسد ♡
         ~ الحلقة السادسة عشر ~
كانت قاعدة في المكتب وبتراجع في في المعلومات المكتوبه في الورقة...قبل ما ترفع السماعة وبي صوت واثق وكلمات منمقة طلبت منهم انو يجو بكره الشركة عشان يجتمعو بيهم...حددو ليها الوقت...شكرتهم و وقامت على مكتبو...دقت الباب...جاها صوتو وهو بيطلب منها تدخل...كان شغال في الابتوب بي جهة...وماسك سماعة التلفون في كتفو وبيتكلم:
I know that sweety...I'm sorry but you know I'm too busy...I promise you I will come soon ...okay bye..love you more.
كانت واقفة لحدي ما حضرتو خلص كلامو...ختا سماعة التلفون وهو بعاين ليها.
ميرال: حيجو بكره الساعة 9 ونص .
ضياء : اوكي تمام.
مدا ليها كمية من الاوراق: عايزك ترسلي الفاكسات دي .( ما معقولة معاك كل ما تخلص شغل تديها حاجة تانيه 😒)
ميرال "فكس جوه عيونك ان شاء الله 😒" : طيب .
شالتو الاوراق وطلعت...قعدت في مكتبها وهي متغايظة وبتتكلم بي همس : ما محتمل...دا شنو الكريه دا...كلو ما اخلص من حاجة بيديني حاجة تانية...الله لا جاب باقيك يا كلب..يا حليلك يا انا..دي الحاله اول يوم ليك...ربنا بس يصبرني .
لفت بي كرسيها وبدت ترسل.
*****************************
في بيت الجد :
منذر كان قاعد براهو وحاسي بي ملل لا يطاق...حسام مشا المستشفى لي مجد...واياد ورشاد طلعو.
كانو مقعدنو عشان يحرس البنات.
جلنار : اووووف ياخ...ما قادرة استحمل اشتقت لي اوضتي..
منذر : انا اشتقت لي زنوبا 😔.
جوان : زنوبا دي منو كمان .
منذر : عربيتي ( يا حليلك يا زنوبا )
يقين : حنقعد على الحال دا كثير.
جلنار : ماف مكيفات.. والفرش ما حلو وقديم..وكمان المنطقة اوفر وبيوتها ما حلوه .
جاهم صوت سالي البريئ : ربنا عمل لينا كدا عشان يخلينا نحث بالناث الهنا.
كلهم اتلفتو عليها..كانت راكبه فوق الكرسي وبتسرح في شعر عروستها.
منذر حب يشوفها قاصدة شنو : ما فهمنك يا سوسو وضحي لينا .
سالي: احنا لمن كنا قاعدين في بيوتنا الحلوة ما كنا حاثين بالناث المثكينة القاعدة في بيوت ما حلوه..ربنا طلعنا من بيوتنا عشان نحث بيهم ونساعدهم..حيرجعنا بيوتنا تاني لكن لمن نبقى بنثاعد الناث المثكينة...وعشان ربنا ما يزعل مننا دايما مفروض نقول الحمد لله على كل حال...احنا عندنا احنا ( قاصدة العائلة الكبيره ) لكن في ناث صغيرونين وما عندهم اي زول لا ماما ولا بابا ولا اي حاجة.
منذر ابتسم ما كلامها الحلو.
جيهان وهي بتبوسها : شايفين اصغر منكم واعقل منكم😍.
جلنار : كلامها صح 😔...مفروض نحمد الله على كل حال.
جوان : ياريت يا جماعة ما نحسس اهلنا بي اننا متضايقين اصلا الفيهم مكفيهم.
جيهان: لازم نلقى لينا طريقة نساعد بيها في دخل البيت...اياد ورشاد الصرف حيبقى كثير عليهم...وما ممكن نخلي دا كلو على عاتقهم براهم.
جلنار: اي نشتغل.
نادين : لكن حنشتتغل شنو ؟
منذر : هوي خليكم في جامعاتكم ومدارسكم وقرايتكم.
جيهان : بالذات انتو يا نادين ويقين ما تنسو امتحاناتكم القربت .
يقين : يا جماعة ما اشتقتو لي مجود😢.
جيهان: يا حليلو هسه لو في كان ادانا طاقة ايجابيه.
جوان: اشتقت ليهو والله.
منذر: ربنا يرجعو لينا بالسلامه.
جلنار: ما عرف بي الحصل صح ؟
نادين: طبعا لا...لو عرف ممكن يتأثر وهو اقل خاجة خطر عليهو
جلنار: ياااارب بيان ترجعنا بي سرعة..ومجد يقوم بي عافية.
كلهم: امين👐
الباب دقا.
جلنار: منذر قوم افتح .
منذر: وانتي مالك ؟
جلنار باستنكار: عايزني انا البنت اقوم 😳.
منذر: اوباااا بس اصدميني وقولي لي حاسبة نفسك مع البنات 😱.
جلنار : اي...يلا اتصدم 😒.
وبدت المناقره والمشاحنة وقصف الجبهات في الكلام 😂.
الا بعد ما اتدخلت جيهان وهدتهم...بعديها منذر قام فتح الباب.
لقا ليك سيرة بتاعت نسوان...لابسين تيابهم وشايلين حاجات في يدهم.
المرة : ازيك يا ولدي امك وين ؟
منذر وهو بيبلع ريقو : ثواني.
دخل جوه لي امو : انتي عملتي حاجة ؟
سلمى : حاجة زي شنو يعني ؟
منذر: في نسوان كثاااار بره قالو اناديك ليهم .
ماجده : كدي نمشي نشوفهم.
سلمى : ارح .
منذر : استنو 😱...استنو ما تمشو براكم.
ماجده : اهدا ما حياكلونا.
طلعو ومنذر ماشي وراهم.
المره كانت بتتكلم بي سرعة : هي السلام عليكم .
ماجدة+سلمى: وعليكم السلام.
المرة: كلمتني كوثر
منذر : كوثر 😳؟
المرة بي ضحكه : اهاهاهاها اي كوثر قالت لي في ناس رحلو هنا جديد...اها قلت اجيكم كلمت نسوان الحله...اي...يلا كان من المفترض نجيكم من امبارح ونساعدكم في الرحولة..اي...بس المشكلة كنا في بيت سعدية بنجهز لينا في فطور العريس...لكن قلنا الليلة لازم نجيكم....اها جبنا ليكم شوية حاجات كدا اعتبروها هدية رحول...اي...واحنا وبناتنا جينا نساعدكم في نضافة البيت...اصلو البيت دا ليهو مده كبيره ما انفتح واكيد حيكون مترب ووسخان.
وتوشك دخلت والحلة كلها دخلت معاها 😂.
ماجده وسلمى ومنذر وشوشهم بقت كدا 😳😳😳.
دخلو جوه والبنات كلهم وقفو يعاينو ليهم سلمو عليهم وكان في تربيزة كبيره ختو فيها الحاجات الجابوها...طبعا جماعتنا كانو قايلين نفسهم منضفين بيتهم😂...وديل جوه وروهم النضافة الحقيقية...اول شي منذر طردوهو برا الشارع...اولاد الحلة لقوهو واقف وطوالي جوهو سلمو عليهو واتعرفو ليهو وساقو معاهم ناديهم...اما ديل نزلو قش في الارضيات ومسح وتمير وتنفيض...ساعة بس خلو البيت يلمع 👋👋👋.
غيرو ليهم رصة العفش وفرشو ليهم...وشالو ليهم هدومهم رتبوها ليهم...لمن البيت بقا عاجبهم..وظهرت عتاقتو وجمالو...وولعو ليهم البخور ( جيران السرور 😍)
المره : انا اسمي فوزية احفظني كويس يا بنوت ( كلاااام )
سلمى : شكرا ليكم يا فوزية والله ما قصرتو.
فوزية : دي عاداتنا اي جار يجي جديد بنعمل ليهو كدي.
ماجدة : تمام والله...عادة جميلة.
فوزية : الله ما ضراك.
واحدة من النسوان: عندكم جنينة بي ورا ممكن تصلحوها وتزرعوها واحنا بنساعدكم فيها.
نادين: انا بححححب الزراعة.
المره : خلاص بنساعدك فيها .
كانو في بنات قدرهم اتعرفو بيهم وساعدوهم ( الله كريم)
بعد التعرف الطويل والمساعدة والتنضيف طلعو النسوان وودعوهم.
ديل بي هنا كانو منبهرين...بالرغم من الوضع الكانو العايشنو في الاحياء الراقية...الا انو كان نادرا ما يكون عندهم جار يدخل عليهم يسلم او يساعدهم في حاجة.
لمن بدو يفتحو في الحاجات حسو بالفرح...انو الناس ديل بالجد كريميييين بالرغم من انهم ناس عاديين جدا جدا...ما عندهم فلل وعربات ولا غيرو...بس اخلاقهم جميلة وحلوة...كانو جايبين ليهم حاجات كثيييرة...اشي عده وملايات واكل ومواد تموينية...يعني بي اختصار ما قصرررررو❤
***********************
الشلة بتاعت مجد كانو قاعدين معاهو...طبعا بيدخلوهم عشان بطاقاتهم.
كانو متكتمين على موضوع افلاس الشركة دا..كأنو ماف شي حاصل...وشغالين يتونسو معاهو.
رؤى: الليلة مشينا دار الايتام...كلهم بيسألو منك وقالو ليك مشتاقين ليك شديد .
مجد وهو بيضحك : يا حليلهم ياخ.
ريان: يلا مجود شد حيلك كدا واطلع لينا سريع.
لؤي: اسمعني الممرضة بتاعتك دي ما عجيبة لكن...ما بتعرف تجيب لي رقمها.
ريان : شوف جنس دا بالله 😒.
مجد : كدي الم فيهو انا اول .
ريان : انتو الاتنين ما نافعين..اي واحد منتهي اكثر من الثاني.
رؤى : اخير خالد .
ريان : خالد زاتو ما هين..لكن ما بيعمل حركاتو قدامنا.
رؤى : حالة صعبة 😂.
فتحت شنطتها وطلعت منها علبة اكل بلاستيكيه ختتها جمب مجد : عملت ليكم كب كيك .
مجد : شكككرا 😍.
لؤي : وانا 😢👉.
رؤى : ماف ليك 😛.
لؤي : ما راضي والله.
مجد فتح العلبة كانت قطع الكب كيك شكلها لذيذ ومزينة بطريفة حلللوة.
شال منها قطعة اكلها بي تلذذ : ممممم حلوة .
لؤي : انا عايز 😸
مجد : لا 😌.
لؤي: انت لي بقيت شرير كدا😢
مجد وهو بيضحك مدا ليهو العلبة: خلاص شيل 😂
قبل على حسام وعاين ليهو بي استغراب: انت مالك ساكت كدا ؟
حسام : ها ؟
مجد : سرحان وين ؟
حسام : مصدع شوية.
مجد : وين ديل بقو ما بيزورني...وابوي وين ؟
حسام : ما انت عارف ناس المستشفى سغيلين ما بيخلوهم يدخلو كلهم...وابوك مشغول شويه .
مجد : مممممممم
لؤي : انتو وين خالد الليلة ؟
مجد : جاني قبييييل...معاهو امو.
لؤي : اهاااا.
الباب دق.
لؤي : ادخل
جات شيرين 🐍داخله : هاي كيفكم
ريان ولؤي قامو طوالي وطلعو.
رؤى : الحمد لله انتي كيفك ؟
شيرين : تمام .
رؤى وحسام طلعو...رؤى قفلت الباب وهي بتلقي نظره على مجد.
شيرين : كيفك الليلة ؟
مجد : الحمد لله .
شيرين : عايزة اتكلم معاك في موضوع.
مجد : طيب اتفضلي.
شيرين : مجد الصراحة كدا...انا شايفة انو علاقتنا بقت ضعيفة الايام دي...واصحابك شايفهم بيكرهوني كيف...انا شايفة انو احسن ننفصل.  ( كلبة )
مجد اتعدل في قعدتو : طيب دقيقة اصحابي بيعاملوك كعب...انا ذنبي شنو ؟؟؟ وبعدين علاقتنا كيف بقت ضعيفة؟ احتمال بقيت ما بتكلم معادك كثير بس انتي عارفة ما نعني من التلفون.
شيرين : صدقني ما حنقدر نستمر.
مجد : شيرين انتي قولي ماعايزاني ما تدخلي اصحابي في الموضوع.
شيرين : لا يا مجد ما كدا ...لكن بالجد ...انا ما عارفة اوصل ليك المعلومة .
سكت شوية قبل ما يقول ليها : انا بحبك ... ولو طلعت من هنا حاخطبك ( 💔)
شيرين بانفعال : وانت ضمنك شنو انك حتطلع من هنا حي ؟
مجد نطر عيونو وبقا بعاين ليها بصدمة .
شيرين : مجد انا اسفة...انا اسفة ما قصدي والله .
مجد : ما تتأسفي كلامك صح...الضمان شنو اني حاطلع حي.
شيرين : مجد انا عايزاك تخطبني بي سرعة بس انت بي وضعكم الحالي وافلاس شركتكم ما حتثدر تعمل لي اي شي .
مجد : شنو ؟ قلتي شنو ؟ شركة شنو الفلست .
شيرين : اي شركتكم فلست...وابوك واعمامك هسه مسجونين ما وروك بالموضوع دا .
مجد ما صدقها : الكلام دا من راسك...بعدين انتي كنتي بتحبيني انا ولا قروشي .
شيرين سكتت .
مجد وشو بقا احمررررر ...وبدت انفاسو تتعالى من الزعل: امشي .
شيرين : مجد انا .
مجد بي عصبية : قلت ليك امشي..اطلعي بره .
شيرين : مجد صدقني .
مجد : اصدقك في شنو بالظبط ؟ في انك كذابة ؟؟؟ في انك انانية؟
وبتحبي نفسك بس...انا ما قصرت معاك في يوم يا شيرين لانو حبيتك بالجد...جاياني هسه عشان تقولي لي  لازم ننفصل عشان اصحابك بيعاملوني كعب ؟؟؟ طب انا هنا ذنبي شنو ؟؟؟ واصحابي ما كنتي مقصره فيهم..وين وعدك الوعدتيني بيهو مش قلتي لي ما حاخليك ودايما حاكون جمبك...لي كذبتي علي ؟؟؟ لي خليتيني اصدق انك بتبادليني نفس الشعور...انا كنت بالنسبة ليك مجرد تمضية وقت ؟
حسام والشلة جو داخلين من صوت مجد العالي .
حسام : في شنو يا مجد مالك ؟
مجد : حسام احنا فلسنا ؟
حسام : مجد كدي اهدا .
مجد بي غضب : جاوبني على سؤالي احنا فلسنا .
حسام : سكت
مجد : حسام انا بتكلم معاك .
رؤى : مجد اهدا شوية .
مجد : ياريت ما تدخلي .
رؤى سكتت وعيونها دمعت .
مجد : يعني كلامها صح ؟؟؟ هي كلامها صح ؟؟؟ ابوي في السجن ؟؟؟
لؤي : انتي قلتي ليهو شنو ؟
شيرين : قلت ليهو الحقيقة .
لؤي : انتي واحدة حقيره وتافهة .
شيرين ببرود وهي بتشيل شنطتها : ما اكثر منك .
ريان : مبسوطة من نفسك يا انتي ؟
شيرين وهي بتلزها عشان تطلع : على الاقل عرف الحقيقة .
ريان جرتها من يدها وقطعت فيها كف بي ضهر يدها: اللحظة دي انا مستنياها من زمان...وكنت محترمة نفسي عشان مجد.
شيرين بقت منطرة عيونها بي صدمة وهاجت وجات جارية على ريان وهي بتصرخ بصوت عالي. ( واي قصيرة وتجي جاريه بسرعة فلم رعب )
جو دكاتره وممرضات حجزوها .
مجد صوتو بقا مبحوح من كثيرة الصريخ : لي ماوريتني يا حسام ؟ ابوي في السجن وبتقول لي قاعد ومشغول .
حسام وهو بيصرخ : كنت عايزني اعمل شنو ؟؟؟ شوف نفسك بتعمل في شنو وانت حتعرف لي ما وريتك .
مجد فكا الاجهزة المركبنها ليهو بي عصبية ونزل من السرير كان غضبااااااااان من شرين بي جهة ومن كذب اهلو عليهو بي جهة .
الدكتور والممرضة جوهو .
الدكتور : مجد ارجع سريرك بي سرعة انت بتعرض نفسك للخطر.
مجد : انا ماعايز اقعد ولا ثانية هنا....واتفضل يا حسام انت والمعاك اطلعو بره .
رؤى وهي بتبكي : دكتور هديهو عليك الله
الدكتور : مجد اقعد في مكانك
مجد وهو بيضرب التربيزة الجمبو : اسكتو مني ما عايز اسمع صوتكم انا خلاااااااص تعبت من اي حاجة .
الدكتور للمرضة اديني حقنة مهدئة .
مجد مسك حسام من قميصو ولزاهو: شكرا ليك ...شكرا يا ولد عمتي...شكرا يا اخوي..ماعايز اشوفك تاني .
جا دكتور تاني ومسكو والدكتور طعنو بالمهدئ...كان بيقول : ما عايز اشوفك تاني...ما عايز اشوفك تاني...بي فتور...وعيونو بدت تغمض لحدي ما خلاص نام..الدكتور طلب من الممرضة ترتب الاوضة..وطلع.
اصحابو نزلو تحت...حسام كان قاعد ومغطي وشو بيدينو...ورؤى وشها احممممر من البكاء....وريان هايجة ومتغايظة من شيرين...لؤي كان ساكت والزعل باين في وشو .
هدى جاتهم : في شنو يا اولادي حصل شنو .
ريان حكت ليها الحصل....هدى بعد ما فهمت الموضوع طلعت فوق وضربت لي شيرين ...ادتها ذلتها ونبزتها ووعدتها انو لو حصل شي لي ولدها حتندمها وحتخليها تدفع الثمن وقفلت الخط في وشها .
*****************************
تايلند:
جمان كانت قاعدة ومنزلة رجلينها في المويه بتاعت المسبح وخاتا جمبها صحن بتاع فواكه استوائية ( عايشة الجو )
كانت سرحانه وبتفكر...رجعت لي واقعها وقامت ما كانت عارفة سامي وين...من ما صحت من الصباح ما شافتو.
ضربت ليهو وكان تلفونو مختوت في الاوضة.
ضحكت لمن لقت نفسها بتقول احتمال اختطفو..طلعت بره...بالمرة تتمشى وبالمرة تفتش عليهو.
كان في مسبح كبير وجمبو محلة كدا زي البار.
مشت لي مسافة وقفت عشان تتأكد من انو دا هو ولا لا ؟
كان واقف مع رفاء...وشكلو الموضوع كان مهم...سامي بيتكلم وهو بيحرك يدينو...ورفاء ما عايزة تزح من قدامو ( لايوقة )
سامي : رفاء انتي ما بتفهمي ؟ ما عندك مخ ؟؟ قلت ليك انسيييييني ما تنسي انك متزوجة اخجلي شوية ياخ .
رفاء : لا ما حاخليك لي واحدة ما بتستحقك...اعمل معاها مشكلة سوي اي حاجة طلقها زحها منك.. وانا حاعمل مع عبدالله مشكلة وحأطلق .
سامي : وبعداك .
رفاء : حنتزوج .
سامي : حتكوني راضية عن نفسك ؟
رفاء : ما عملت حاجة غلط عشان ما ارضى من نفسي ( بس ادوني كلاشنكوف وانا حاتصرف 😠)
سامي : انا بحب مرتي .
رفاء : لا 😠 ما بتحبها فيها شنو احسن مني ؟
سامي: كلها احسن منك 😏.
رفاء وهي بتبكي : سامي حرام عليك   ( تحرم عيشتك )
شافت جمان جايه بي ورا....وبي جرائة رمت نفسها في حضنو .
جمان : ان شاء الله ما اكون قاطعتكم في حاجة .
سامي اتخلع وزح منو رفاء...الاتزلقت وبردلب جوه المسبح...وبقت بتكورك ليهو : سااامي ساعدني .
جمان : ساعد حبيبتك عشان ما تموت
ومشت .
سامي عاين لي رفاء الفي الموية ولي جمانة المشت وبي سرعة جرا وراها ( واك واك واك 😂 في زول كدا خلو في الموية 😜😜😜).
سامي : جمان استني ...انتي ما قاهمة حاجة .
جمان ما ردت وتابعت طريقها.
سامي مسك يدها : جمان اسمعيني .
جمان بي غضب : انا هسه ما عايزة اسمع اي شي ...بس خليني في حالي...وبكره على اول طياره نرجع
سامي وقف قدامها.
جمان : ززززح 😠.
سامي وهو بيهز راسو : لا
جمان : هو شننننو اللا ؟ 😠
سامي : ما حازح
مسكها من يدها : تعالي.
وقفو قدام شاليهم : اهدي وحافهمك كل شي .
جمان وهي مكتفة يدينها وبتحرك في رجلها : تفهمني شنو بالظبط على فكرة دي ما اول مره  اشوفك معاها ... وما عايزة احكي ليك كم مره شفتها معاك وسمعت كلامكم .
سامي وهي بيمشي يدو في شعرو : طيب اسمعي القصة كلها...رفاء كانت حبيبتي في الجامعة.
جمان : ما تقول الكلمة دي 😠.   ( الغيره 😸)
سامي : اها اقول شنو ؟
جمان : قول صحبتي 😠
سامي : طيييب😧...كانت صحبتي..وكنت حاخطبها
جمان: يا سلام
سامي: ياريت تسكتي 😒...بس بعديها اكتشفت انها خاينه...عارفة خانتني مع منو ؟ مع مصطفى .
جمانة  : 😱.
سامي : و
جمان قاطعتو : عارفة الباقي... مصطفى وعدك بي انو يعمل فيك حاجة وانا كنت هدفو صح ؟؟؟ ورفاء عايزة ترجع ليك بالقوه .
سامي هز ليها راسو بمعنى اي.
جمان : سامي كفاية ارح نرجع السودان .
سامي : لسا وقتنا .
جمان : انا متأكدة انو ما حتخلينا في حالنا بعديت انا زهجت واشتقت لي اهلي.
سامي : انا عايزك تعرفي انو ما عندي ليها شي .
مسكت يدو وهي مبتسمة : طيب .
جمان : عليك الله نرجع .
سامي : طيب حاحاول اغير الحجز.
جمان : شكرا .
سامي : ندخل ؟
جمان : لا ...عايزة اتمشى شويه.
سامين : طيب يلا .
*****************************
ميرال اخيرا دوامها خلص...طلعت وهي هلكااااانه وما خلت دعوه ما دعت بيها ضياء...لقتها وهج.
وهج : ميرا ؟
قالت ليها وهي مبتسمة : ميرال
وهج : اهاا..ساكنة وين ممكن اوصلك؟
ميرال : لا ماف داعي..شقتي قريبة...شكرا .
وهج بي ابتسامة : عفوا 😉...نتلاقى بكره .
ميرال : ان شاء الله .
وهج : باي ✋
ميرال : باي .
طلعت ولقت رشاد في نهاية الشارع.
ميرال : رشاد ...انا هلكت الليلة...كل دقيقة شغل.
رشاد : معليش تستحملي...لازم تكسبي ثقتهم وبي اسرع طريقة.
ميرال : ان شاء الله...يلا عايزة ازور مجود اشتقت ليهو.
رشاد : ما اعتقد .
ميرال : لي ؟ في شنو ؟
رشاد : مجد عرف بي موضوع الشركة.
ميرال : كيف ؟؟؟ منو الوراهو .
رشاد : قالو واحدة من البنات المعاهو .
ميرال : شيرين ؟ اسمها شيرين ؟
رشاد : اي ياها.
ميرال : الحقييييرة 😠....لازم امشي ليهو.
رشاد : الدكتور منع زيارتو.
ميرال : حصل ليهو شي 😢؟
رشاد : لا كويس...بس عايزنو يرتاح شوية.
ميرال: طيب ارح البيت .
رشاد : استني انتي نسيتي انو حتعيشي في شقة براك.
ميرال : الله وروحي ؟؟؟
رشاد : في حاجات كثيرة لازم تستحمليها...معليش بس مع الايام حتتعودي .
ميرال: طيب خلي واحدة من البنات تجيني 😢.
رشاد : مع اني ما مع الفكرة دي بس نشوف...ارح اوديك.
كانت شقة حلوة وانيقة في برج سكني...
رشاد : الشقة فيها كل حاجة ممكن تحتاجيها وهدومك كلها جبتها ليك...احنا بيتنا قريب من هنا...في اي وقت لو خفتي او حسيتي بي شي غريب ولا شي اضربي لي كويس ؟؟؟؟
ميرال : طيب 😔
رشاد : اقفلي الباب كويس واتحصني .
ميرال : طيب
رشاد : لا اله الا الله .
ميرال : محمد رسول الله .
طلع ...وهي قفلت الباب بالمفتاح...قعدت في اقرب كنبة ليها وبكت بي صمت 💔.
*************************
صباح اليوم التالي :
كانت حريصة جدا على انها تقوم تصحى بدري .
لبست بنطلون قماشي اسود ماسك شوية من تحت ومن فوق فضفاض...معاهو بلوزة شفون بيضاء..ومن فوقها جكت بدلة ابيض اطرافو بالاسود...لبست جزمة كعبها عالي سوداء...وشنطة جلدية سوداء...موجت شعرها بي طريقة انيقة...ولبست عدساتها الرصاصية..عملت روج وردي فاتح كان مناسب مع اطلالتها العملية...عاينت لي نفسها في المراية...كانت مختلفة تماما عن بيان في كل حاجة.
شالت نفس طويل قبل ما تطلع على شغلها...دخلت مكتبها ورمت ششنطتها بي زهج.
ضياء جا داخل وهو بيتكلم التلفون كان لابس بدلة سوداء وقميص اسود.. قاليها بي سرعة السلام عليكم .
ردت السلام.
ضياء : ما تخلي اي زول يدخل لي...الا لمن الاجتماع يبدا مفهوم .
ميرال  مفهوم.
ضياء : في تقارير حتوصل في الايميل اطبعيها وجيبيها لي .
ميرال : طيب
(انا بس نفسي افهم مستر ضياء بيشتغل شنو ؟ )
بدت تتصفح في الايميل عشان تشوف التقارير القال عليها.
جات لارا داخلة....اول شي ريحتها بتشق المكان...لابسة بنطلون جينز سكيني...ومعاهو قميص كحلي وشاكاهو بي حزام وشايلة شنطة يد كبيرة ( متحررة 😷).
جات داخلة وطوالي عايزة تدخل ليهو .
ميراب وقفت : عفوا..مستر ضياء مانع اي زول يدخل.
لارا بي استعلاء : انا ما اي زول 😒.
ميرال : قال ماعايز زول يدخل ليهو اقولا ليك تاني بياتو لغة 😒.
لارا وهي مبتسمة : حادخل 😏.
ميرال: لعب اطفال هو ؟؟؟ قال ماف زول يدخل .
ضياء فتح الباب بي انزعاج : في شنو ؟
لارا : السكرتيرة بتاعتك
ضياء : انا طلبت منها ما تدخل زول.
لارا دخلت على مكتبو : الموضوع مهم .
ضياء قفل الباب..شوية صوت كلامهم بدا يعلا ...ميرال ما فهمت شي...ما فهمت هم بيتكلمو في شنو بالظبط بس حست بي انو موضوع مهم...شوية طلعت وهي صارة وشها كالعادة بعد ما حدرت لي ميرال وطلعت.
بعد مرور كم ساعة الضيوف جو..
دخلو غرفة الاجتماعات كان اجتماع طوووويل من 9 ونص خلص 11.
ضياء جا طالع : جهزي نفسك عندنا سفرية طارئة لي انجلترا بكرا.
#نهاية الجزء الخامس عشر.
الليلة ما قصرت جزء طويل زي ما عايزين...الليلة انا قاعدة ليكم لو عايزين تسألوني اي سؤال اتفضلو 😀