انثى في عرين الاسد

الفصل الخامس عشر

♡ انثى في عرين الاسد ♡
        ~الحلقة الخامسة عشر~
عثمان : جيت في وقتك دي حتكون السكرتيره بتاعتك .
عاينت ليهو بي قوة...كان من نوع الناس البعاينو ليك جوه عيونك (دلاله على قوة الشخصية...وبتخلي الزول ينتبه معاك ).
ضياء صلح يدو وعاين لي ساعتو : درستي في ياتو جامعة ؟
ميرال : الخرطوم ( الله اكبر 👆)
ضياء : عمرك كم ؟ وهل عندك خبرات ؟
ميرال : 22...لا ما عندي خبره .
وقف على حيلو وهو بيجر جكت البدلة : ما حتنفعي معاي.
فتح باب المكتب وكان حيطلع...بس وقف لمن جاهو صوتها : ما كنت متخيلة انو مدير شركة Tiger castle بيقيس الوظيفة بالعمر..لانو العمر ما كان في يوم مقياس لي حاجة...بعدين الخبره دي انا حاحصل عليها كيف ؟ مش من الوظيفة برضو ولاااا شنو رايك يا مستر ضياء.
عاين ليها لي مسافه قبل ما يهز راسو ببرود ويطلع.
مستر عثمان وهو بيضحك : كلامك جميل
ميرال وهي بتشيل شنطتها : باين ما عندي نصيب هنا .
مستر عثمان : انا متأكد لو انتي دخلتي في بالو حيوظفك...شكرا لي مجيئك...وفرصة سعيدة
ميرال وهي مبتسمة : انا الاسعد.
الباب دق.
مستر عثمان: اتفضل
جات داخلة بنت طويلة سمراء...هدومها بتدل على انها متحرره جدا...شعرها طويل ومفكوك لابسه تنورة ضيقة 😷 قصيرة تحت الركبة بشوية لونها اسود...وقميص عملي لونو ابيض مشكوك...عاملة روج احمر...اطلالاتها عموما جريئة.
مستر عثمان بي بشاشه: لارا اتفضلي.
ميرال وقفت عشان تطلع بس قعدت في الكرسي بسرعة لمن شافت دي منو ...سارة 😱😱😱...البنت البتلبس وااااسع وفضفاض وطرحة كبيرة وما بتخت ولا حاجة في وشها...في البداية كذبت عيونها بس لا مجال للشك ياها زاتا...بس...بس جابا هنا شنو ؟ واسمها مش كان ساره كيف بقت اسمها لاره...دا شنو البيحصل هنا دا ...كل الكلام دا كان بيلف في راس ميرال...انتبهت لي صوت مستر عثمان : ميرال انتي كويسة .
لارة الي هي سارة قديما كانت بتعاين لي بي تفحص وهي خاتا يدها في حنكها..
ميرال : راسي لافي شوية .
مستر عثمان مدا ليها قزازة موية : اشربي .
فتحتها وشربت منها وهي منتبها للحوار الحاصل .
مستر عثمان : كنتي وين مختفية كدا ؟
لارا : كان عندي رحلة عمل وهسه انتهيت منها .
ميرال مسكت نفسها...كانت حتقوم وتضربها كف بي قوه..بس كانت بتقول لي نفسها : اهدي والا حتتكشفي وتطين حياتكم.
لارا: وين ضياء ؟ طولت ما شفتو .
مستر عثمان : هسه كان معاي...حتلقيهو في مكتبو.
قامت على حيلها وهي بتصلح في هدومها : طيب امشي اسلم عليهو .
مستر عثمان : اتفضلي.
لارا الحماره 😸 طلعت قبل ما تعاين لي ميرال بي طريقه غريبة.
ميرال وقفت على حيلها : انا برضو اطلع بعد دا .
مستر عثمان : حاسه بنفسك كويسة ؟
ميرال بي ابتسامة : الحمد لله ..يلا عن اذنك.
مستر عثمان : اتفضلي.
طلعت ورجليها ما شايلنها من المصيبة الشافتها جوه...ماكانت قادرة تصدق بدت تربط الاحداث مع بعض واستنتجت انو لاره او ساره هي العميلة بتاعت ضياء.
مشت بي سرعة على الاسانسير...نزل بيها تحت .
اول ما طلعت الشارع ضربت لي رشاد.
رشاد : اها حصل شنو ؟
ميرال وهي ماشه بتعب: اتخيل...اتخيل يا رشاد منو السبب في الاحنا فيهو دا .
رشاد : عرفتي ؟
ميرال : ساره .
رشاد : ساره منو ؟
ميرال : الكانت شغاله معاكم في الشركة وكانت بتزورنا في البيت ما شفتها عاملة كيف...شعرها الفاكاهو اطول من تنورتها...ما ساره البنعرفها في الشركة البتلبس هدوم تدخل معاها 3 انفار...لا وكمان اسمها الحقيقي لارا.
رشاد : انا اصلا من اول يوم جات فيهو ما كنت متطمن ليها...هدوئها كان ما طبيعي ونظراتها وراها كلام كثير...انتي عارفة معناها هي المسحت التصميمات من لابتوب جمان...لانو جمان دايما بتخليهو معاها.
ميرال بي احباط : ضياء رفض يشغلني...انسان غريب وما عندو في قاموسو كلمة السلام عليكم...هسه حنتصرف كيف ؟
رشاد سكت شويه قبل ما يقول ليها : كدي انا مستنيك في نهاية الشارع...تعالي نرجع البيت ونفكر في خطة تانية .
ميرال : عايزة ازور مجد .
رشاد : طيب حنزورو.
جاها صوت زول من بعيد : يا انسه يا انسه.
قبلت وراها...لقتو واحد من السكيورتي بتاع الشركة ...كان جاري بي سرعة عشان يوقفها....حصلها...وقف ثواني وهو بيتنفس بي صوت عالي وخاتي يدو في قلبو : استاذ عثمان طلب انو افتش عليك بعد ما عرف انك طلعتي .
ميرال : انا .
السكيورتي وهو بيدقق في عيونها : ياكي..قال لي عيونها رمادية . ( رصاصية 😑)
ميرال : طيب يلا .
رشاد سمع الكلام كلو..وقرب يموت من الفرح.
ميرال: برجع ليك بعدين .
رشاد : طيب .
قفلت التلفون وختتو في الشنطة...وصلت الشركة لقت مستر عثمان واقف ليها قدام الباب.
مستر عثمان : الحمد لله لقوك.
ميرال : في شنو ؟
مستر عثمان : ضياء مستنيك في مكتبو...انتي عارفة لو ما كنا لقيناك كان حيقلب الدنيا فوق ريسانا 😂.
بيان : اها .
طلعو بالاسانسير...وصف ليها مكتبو بي وين .
مستر عثمان : Good luck 😉
ميرال : thanx 😊.
شالت نفس طوييييل قبل ما تمشي بي خطوات واثقة ناحية مكتبو..فتحت الباب الخشبي بهدوء
لقت مكتب ديكورو عصري ارضيتو من السراميك البني ...فيهو سجادة لونها بيجي..فوقها تربيزة مكتب صغيرة خشبية لونها بني غاااامق...ووراها طوالي كرسي متحرك اسود...كان في زي مكتبة في الحيطة فيها كتب وشوية تحف...فيهو رف كبير فيهو الكمبيوتر...وفي شباك زجاجي كبير...عرفت انو دا مكتب السكرتيرة بتاعتو(حتنزل صورتو)...في باب زجاج بيكشف البره وبيغطي الجوه..وقفت قدامو ودقتو...جاها صوتو: اتفضل.
فتحت الباب...لقتو قاعد في طرف المكتب ولارا واقفة قدامو وباين انها بتتكلم في موضوع مهم.
مكتبو كان بااااارد زي برودة دمو...اقل ما يقال عنو راااائع من حيث الديكزر وكل حاجة وبيطغي عليهو اللون البني والاسود...ارضيتو من الرخام البني...وفيهو مكتبه كبيرة من ورا..تربيزتو كبيرة و بنية والكراسي ممزوجة بالاسود والبني...باختصار فخم ( حنزل صورتو).
لارا شالت شنطتها وطلعت وهي صارة وشها.
ضياء : قلتي اسمك منو ؟
قالت ليهو : ميرال.
ضياء : ممممم ميرال...من الليلة انتي سكرتيرتي او ممكن اقول مساعدتي...طبعا اناي قلتي العمر ما مقياس لي حاجة...عشان كدا ما حاعاملك معاملة واحدة مبتدأة.
هزت ليهو راسها.
تابع كلامو : الشغل هنا كثير وصعب ...اقل غلطة حتتحاسبي عليها وممكن تترفدي لانو هنا لا مجال للاخطاء...حاجتين تتجنبيهم معاي الكذب والتأخير...اكثر شي بكرهو وما ممكن اسامح عليهو الكذب...والتأخير دا ما عايز اصلا اكلمك عنو...دوامك بيبدا الساعة سبعة لو اتأخرتي دقيقة بس حاقول ليك باي.
بما انك سكرتيرة المدير العام فلازم تعرفي انو احيانا دوامك بيستمر لحدي الساعة 12...وعادة بكون عندنا سفريات طويلة...يعني خلي شنطتك دايما جاهزة واتوقعي في اي دقيقة اقول ليك مسافرين...مفهوم ؟
ميرال : مفهوم.
ضياء : اتفضلي على مكتبك.
ميرال اتحركت على الباب...بس وقفت لمن قال ليها : استني دقيقة .
اتلفتت عليه .
قال ليها وهو بيأشر بي راسو : الملفات دي عايزك تراجعيها لي كلها وتختصريها لي في صفحة واحدة.
شالت الملفات وطلعت.
ختتهت قدامها... 3 ملفات كبيرة جدا...كانت مهمة شبه مستحيلة انو تقدر تختصر دا كلو في صفحة...حست كأنو عايز يختبرها.
فركت يدينها وهي بتشيل نفس وبدت تقرا فيهم..وتخت خطوط بالهايلايت .
شويه كدا جا طالع وهو بيتكلم في التلفون...زح السماعة شوية من اضانو وقال ليها : في طرد حيوصل بعد شويه دخليهو جوه.
وطلع بي سرعة.
ميرال : يدخل فيك جان ان شاء الله 😒.
تابعت شغلها بي اهتمام...شوية كدا الطرد وصل...دخلتو المكتب...ورجعت لي شغلها بعد ساعة انتهت...راسها لفة وبطنها طمت من كترت التخطيط والكتابة...طبعت الورقة المختصرة.
شالت قزازة موية وشربتها كلها...قبل ما تطلع على جهة الحمام...كان فيهو مرايات كبيرة واصايص زهور.
غسلت وشها في المغسلة..عاينت لي نفسها في المراية : حتندم يا حقير 😠...والله حتندم .
تلفونها ضرب...كانت دي جمان.
جمان : بيان ياخ وين مختفية كدا خوفتوني لا انتي بتردي ولا اخواتي بيردو.
ميرال: الشبكة.
جمان بي فرح : عايزة احكي ليك الحصل.
ميرال : طيب احكي.
جمان فتتو ليها كلو من بسم الله لي طقطق.
ميرال بي فرحة : شفتي مش قلت ليك اصلا هو طيوب.
اتكلمت معاها لي دقايق قبل ما تقفل...شافت بنت ووراها...اتخلعت وتلفونها وقع.
كانت بنت جميلة ومبتسمة لونها برونزي فاتح وعدساتها زرقاء...شعرها لونو بني ورافعاهو ضنب حصان وفي خصلات طالعة على وشها .
نزلت رفعت ليها التلفون : اسفة خلعتك ؟
ميرال وهي بتشيل التلفون : لا لا ماف مشكلة ..ما خلعتيني.
البنت : شكلك جديدة هنا .
ميرال : اي.
البنت : انتي السكرتيرة الجديدة .
ميرال : اي .
البنت : انا وهج
ميرال : اتشرفنا.
وهج : انا برضو جديدة هنا..حنقابل كثير تاني.
ميرال : ان شاء الله.
شالت مناديل نشفت وشها وطلعت على مكتبها .
لقتو قاعد في طرف المكتب وماسك الورقة.
وقفت وهي بتعاين ليهو وكأنها عايزة تشوف ردة فعلو.
كان بيراجع فيها بي اهتمام.
قال ليها وهو لسا بعاين في الورقة: في تفاصيل كثيرة ماف داعي ليها هنا..ختا الورقة في مكانها..اداها ورقة في معلومات عن شركة تانية وتحتها في رقم: عايزك تنظمي لي اجتماع مع الشركة دي في اسرع وقت .
دخل مكتبو وقفل الباب.
قعدت في مكتبها وهي خاتا يدها في راسها...بعد التعب التعبتو كلو في كوم الملفات دي ما قال ليها ولا كلمة كويسة بي بساطة رما الورقة بعد ما قال ليها تعليق محبط...بس مستنية شنو من واحد زيو.
#نهاية_الحلقة_الخامسة_عشر
بعتذر من انو الحلقة قصيرة...بس دا الطلع معاي الليلة..بتمنى تتقبلوها وتعجبكم...ياريت اي واحد/ة منكم يعرف لينا نفسو ويوريني متابع الصفحة من وين 😀