♡ انثى في عرين الاسد ♡
~الحلقة الثانية عشر~
اياد: يعني نهايتنا على يد الاسمو ضياء دا ؟
رشاد: ما تستهين بيهو ابدا
اياد : هسه الحل شنو ؟
رشاد: ماقادر اخمن لكن انا متأكد انو ما حيقيف لحدي هنا...اكيد حيحاول يعمل حاجة تانية.
اياد : ربنا يستر .
*****************
جمان ما طلعت من اوضتها من موقفها مع سامي.
قعدت لي مسافة وهي بتفكر قبل ما تتذكر كلام اياد القبيل...شالت التلفون وضربت ليهو
اياد كان خاتي ايدو في جبهتو جفل لمن سمع صوت التلفون..مسكو وهو بيقول : دي جمان
رشاد : ما توريها اي حاجة عن الحصل
اياد : طيب طيب
شال نفس طويل قبل ما يرد عليها : الو
جمان: اياد كيفكم ؟
اياد : الحمد لله .
جمان : ها لقيوتو النسخ ؟
اياد غطا سماعة التلفون وقال بي همس لي رشاد : بتسأل من النسخ
رشاد بهمس : قول ليها لقيناهم
اياد : كيف يعني ؟ اكذب ؟
رشاد وهو بيأشر ليهو على التلفون : اي كذب.
اياد بي سرعة ختا التلفون في اضانو : اي ...اي لقيناها
جمان وهي بتخت يدها في قلبها : اه الحممممد لله ...لكت ما عرفتو دا منو العمل كدا ؟
اياد : لسه...لكن ان شاء الله حنكشفو.
جمان : ان شاء الله
اياد : سلمي على سامي
جمان : ان شاء الله...وانت سلم لي على رشاد
اياد : يوصل ان شاء الله
جمان : يلا مع السلامة
اياد: الله يسلمك
قفل التلفون ورماهو في المكتب: لي خليتني اكذب عليها
رشاد وهو بيقوم من كرسيه : لانها عروسة وفي شهر عسلها مالازم نقلقها ونخوفها .
اياد : ولمن ترجع حتقول ليها شنو ؟
رشاد : الله يحيينا لمن ترجع .
**************************
جمان غيرت هدومها وطلعت بي حذر خايفة تقابل سامي كانت ماشه بي طرف اصابعها جاها صوتو الساخر من ورا : امشي زي الناس بدل مشية الباليه دي .
ضغطت على اسنانها وهي مغمضة عيونها...قبل ما تتلفت عليهو وفي وشها نظرة لا مبالاة مصطنعة: حمد لله على السلامة...ان شاء الله تكون فاضي للكلام .
سامي : هسه ؟ لا .
جمان : لمن تفضى مستنياك 😏
سامي مسكها من يدها بقسوة : ما يكثر 😒
نفض ليها يدها ودخل اوضتو...غير هدومو.
تلفونو ضرب وكان واحد من اصحابو طلب منو انو يجي يطلع معاهو لانو هو برضو في تايلند...وسامي طوالي وافق.
جمان رجعت اوضتها لبست هوت شورت و top لفت شعرها كعكة وشالت بشكير...فتحت الباب الزجاجي و طلعت للمسبح المطل على البحر...عاينت ليهو وهي بتفرك في يدينها : احتمال مويتك الباردة تطفي ناري .
وبي رشاقة ومهارة نطت في الموية .
سامي طلع من الاوضة وهو بيشك في قميصو سمع حركة الموية لمن اتلفت شافها وهي بتسبح على ضهرها...عاين ليها لي مسافة قبل ما يبتسم بي شر ( على قول حبوبتي قهرتك بي الله والنبي الطاهر )
استناها لحدي ماغطست وبي سرعة شال البشكير بتاعها ودخل وقفل الباب الزجاجي قبل ما يهمس : استمتعي شوية .
رما البشكير في المقعد وطلع . ( زودتها يا الحب 🐸)
********************
مجد والشلة خلصو اكلهم ودخلو جوه...خالد تلفونو ضرب عاين ليهم وشال تلفونو وطلع.
لؤي : ما ناوي تخت حد للمهزلة الحاصلة دي يا مجد .
حسام : مهزلة شنو .
مجد : لؤي ممكن تخلي اليوم دا يعدي على خير .
حسام : لي في شنو ؟
لؤي باستنكار : اخلي اليوم يعدي على خير ؟؟؟؟ ياخ فكر في نفسك وفكر في كرامتك
مجد : انت عايز شنو هسه ؟
حسام : عايز شنو في شنو ؟
لؤي : قوم وامسكو من يدو وفهمو انك عارف اي حاجة...اضربو....كفتو....اقتلو اعمل اي حاجة .
حسام : اوبااااا 🙊
مجد : اها وبعد ما اعمل كدا حيحصل شنو ؟
حسام : يا جماعة مالكم ( يا ود امي اسكت ساي ماف زول معبرك )
لؤي: حتكون رجعت كرامتك
مجد وهو بيضحك باستنكار: يعني كرامتي حتترجع بي كده...ما تكبر الموضوع
لؤي: ما اكبر الموضوع كيف يعني ؟؟؟ شفتهم بي عيونك وسمعت كلامهم اكثر من كده عليو شنو ...انا ما عارف انت بتعمل كده لي ؟
مجد : انا متأكد انو في حاجة خلتو يعمل كدا
لؤي: يا سلام يا سلام على الثقة...اقول ليك شي خليك ساكت كدا وما تتكلم وخلي حقك يضيع لانك بي بساطة جبااااان يا صاحبي
حسام : يا لؤي في شنو ؟
لؤي وهو بيشيل تلفونو : مع السلامة .
حسام قام وراهو : لؤي في شنو ياخ استنى .
خالد جا داخل : وين لؤي ؟
مجد : مشا
خالد : لي ؟
مجد: انت عارفو الايام دي لو الزول قال ليهو اي شي بيزعل.
خالد : صح
مجد وهو بيقوم : انا زاتي امشي بعد دا...تعباااان عايز اخد لي نومه .
خالد :طيب ...انا زاتي ارجع بعد دا .
حسام جا داخل : غايتو الحلبي دا راسو قوي خلاص..دا شنو دا انتو برضو ماشين ؟
مجد : اي 😸
حسام : لي ياخ اقعدو شوية
خالد : الا نصبحها بعد دا معاك...شكرا على الاكل الحلو وصل تحياتي لي خالتي.
مجد : يلا مع السلامة
حسام : طيب مع السلامة...نتلافى بكرة في عزومة رؤى .
مجد+حسام: ان شاء الله
وطلعو...اي واحد ركب عربيتو واتوجه لي بيتهم .
*****************
بيان كانت مع رهف .
رهف وهي واقفة قدام المراية : تفتكري بعدين احسن اجي داخلة بباقة ورد حمراء ولا بيضاء؟
أنت تقرأ
انثى في عرين الاسد
Pertualanganالانسه المدلله بيان في عرين السيد الغامض ضياء لاستعادة املاكهم التي سلبها منهم بقسوه .
