انثى في عرين الاسد

الفصل العاشر

♡ انثى في عرين الاسد ♡
             ~الحلقة العاشره~
جمانة كانت حاسه انها محتاجة تتكلم مع زول وتاخد مساعدته...عاينت للتلفون اتذكرت بيان وبي سرعة ضربت ليها...سلمت عليها وحكت ليها بالشافتو والحاساهو هي .
بيان: امممممم...طيب شوفي يا جمان انتي خلاص ادبستي في سامي وما اعتقد تاني في طريقة طلاق او كلام زي دا...يعني شنو هو هسا راجلك والبت الظهرت دي ما ليها اي حق في العملتو دا...قدامك واحد من الاتنين يا تستسلمي ليها ودا اكيد مستحيل...يا تقيفي ليها زي شوكة الحوت...وبعدين انتي هسه ضاربا لي عشان كدا ؟ يا حبيبتي انتي جمااااان الفي راسك بتعمليهو وماف زول بيقدر يقيف في طريقك...تجربتك مع سامي خليها تزيدك قوة مش تضعفك...بادري انتي تكلمي معاهو ادلعي عليهو سوي اي شي غرورك وتكبرك دا انسيهو خلاص...لازم تكسبي سامي...هو انا معاك هسه شرير شوية...لكن سامي الانا بعرفو طيوب ومسكين وحليوة 😉
جمان : ادلع عليهو كيف يعني 😔 هو من حيث حليوة ...حليوة ماف كلام ( حليوة=سمح)
بيان متابعة:  اي ادلعي ومهما كان الراجل زي الطفل بتكسبيهو باللين و بالصبر..يلا عايزاك ترجعي جمان البعرفها ديك وما تخلي ام شعر احمر تكسبك .
جمان: ان شاء الله...شكرا يا بيان
بيان : any time 😉
جمان قفلت التلفون...ووقفت قدام المرايا وهي بتعاين لي نفسها قبل ما تبتسم بي ثقة وتدخل على الحمام.
*******************
منذر جا نازل من فوق لقا سالي قاعدة في الكرسي وماسكة لعبتها وصارة وشها😠
رجع خطوتين : الليلة يا النبي دي مالا 😲
لفا طوالي فوق لي اوضة امه...دق الباب.
سلمى: اتفضل
دخل لقا امو قاعدة في التسريحة بتلف في شعرها.
منذر : ماما
سلمى: اها
منذر: سالي دي مالا ؟
امو نزلت يدها من شعرها : مالا 😳
منذر وهو بيقعد في طرف السرير: صارة وشها صرة كعبة خلاص.
سلمى: طيب اتكلم معاها شوفها مالا
منذر بي ضحكة خوف: لاااااا معليش...انا خايف اتكلم معاها تشيل سكينة تطعني بيها شكلو الموضوع خطير يا امي .
سلمى : ما تكبر الموضوع
الباب دق....
سلمى: اتفضل
جا راشد داخل وهو ماسك جكت البدلة بتاعتو ومنطر عيونو : هوي انتو سالي دي مالا وشها دا مكرفساهو كدا ( سالي عاملة شغل 😂😂😂)
منذر: هسسسسه كنت جايب سيرتها...بس عشان تصدقيني .
سلمى : الكلام دا كيف ؟
منذر: شفتي الشفع بتاعين افلام الرعب البتبقي وشوهم غريبة ديلك بس ياها بنتك بتشبهم الليلة .
رشاد: حتكون انت عملت ليها حاجة يا منذر
منذر: اببببدا والله .
سلمى: لا الموضوع شكلو كبير
قامت على حيلها ونزلت ليها تحت ...لقتها نفس الهيئة الوصفوها بيها اخوانها...صارة الوش ومادة البوز..وماطايقة الجمبها 😂
سلمى ورشاد قعدو جمبها...اما منذر قعد بعيد منهم وهو مراقب بانتباه.
سلمى: سالي حبيبتي .
سالي وهي بتزفر: هااا 😧
سلمى: مالك يا ماما زعلانة
سالي : 😠
رشاد : زعلانة مني انا ؟
سالي: منكم كلكم 😠
منذر: سترك يا رب
سلمى: لي عملنا شنو ؟
سالي: خليتو ثامي يعرث ويمشي 😠
هنا الام واولادها اتفجرو من الضحك.
منذر وهو ميت ضحك : يعني دا كلو عشان ثامي 😂😂😂😂
سالي: هو كان بيقعد ويلعب معاي لكن انتو ماكده 😢
رشاد: هو يادوب ليهو يوم يا سالي متين فقديهو
سلمى: والله اضرب ليهو قولي ليهو كلامك دا كلو 😂.
منذر: تضربي ليهو شنو الواطة عندهم بالليل وهو عريس
سلمى : لا لازم اضرب ليهو خليها تتكلم وتفك زعلها دا 😂.
****************
جمان طلعت من الحمام...لفت شعرها كعكة ولبست فستان طويل لونو اسود عملت غلوس شفاف ختت طرحة في كتفها ولبست شبشب بلاستيكي وطلعت..دقت ليهو باب اوضتو.
فتح الباب وهو ماسك تلفونو : نعم ؟
جمان: انا زهجت...عايزة اطلع .
سامي : هسه احنا مش كنا بره .
جمان: والله احنا ما جينا لي تايلند عشان نكون قاعدين..لو انت ماعايز تطلع عادي بطلع براي .
سامي بقا بعاين ليها...
جمان بي سرها " ووووب عليك يا جمان ماكان في داعي للجملة الاخيرة دي شكلو الطلعة حتبوظ دا لو ما اداني كف هنا 😭"
سامي : استني خليني اغير هدومي..وقفل الباب.
جمان بقت منطرة عيونها وفاتحة خشمها بضحكة : هيه وافق...يس يس... ماشا كويس 😀.
سامي جا طالع : يلا .
طلعو واتمشو جمب البحر..الهواء كان بارد وبحرك ليهم شعرهم بي شقاوة...وصوت الامواج ( جججج جججج جججج ججج دا صوت الامواج😸)
جمان : انا....انا عايزة اكل بيتزا
سامي: الا نفتش انا ما بعرف المنطقة .
جمان : بسيطة
طلعت تلفونها وفتحت الجي بي اس..: ايوه لقيت محل ارح.
مشت قدامو..سامي وقف شوية وتمتم بصوت منخفض: ذكية
ومشى معاها من دون ما اي واحد يتكلم مع التاني.
سامي تلفونو ضرب...لقاها امو وفتح بسرعة : الو
سلمى: سامي ازيك
سامي وقف : تمام الحمد لله ...مالكم خير ان شاء الله .
سلمى وهي بتضحك: كويسين الحمد لله ما عندنا حاجة بس هاك سالي عايزاك.
سامي: طيب اديني ليها
سالي: ثامي 😢
سامي: عيونو 😍 كيفك يا حبيبتي .
سالي: انا زعلانة😢
سامي: لي 😳؟
سالي: عشان انت عرثت ومشيت
سامي وهو بضحك: معليش يا سالي لأني عرست 😂
سالي: انت بتحب جمان اكثر مني ثح ؟😢
سامي: لا يا عيوني لا...انا بحبك انتي بس...وما بحب ولا حاحب واحدة زيك.
في الوقت دا جمانة جاتو وسمعت جملتو الاخيرة دي.(💔)
عاينت ليهو مسافة وهي بتشيل في انفاسها لانو رجعت ليهو بعد ما مشت....لقت نفسها بتتقدم عليهو وتمشي شوية شوية لحدي ما يلحقها.
سامي: انتي بتبكي ؟
سالي: اي 😭
سامي: يلا يا حلوتي امسحي دموعك انا قربت اجي وحاجيب ليك هدايا معاي ❤.
سالي:طيب ☺.
سلمى شالت التلفون وهي بتضحك : غايتو سالي حالتها صعبة...كيفك وكيف مرتك كويسين دا شنو الصوت دا ؟
سامي: كويسين الحمد لله ... دا صوت الهواء .
سلمى: سلم لي عليها...وخلي بالك منها يا سامي...دي مرتك وبنت عمتك البتحبك 😉
سامي : ان شاء الله 😊
سلمى: يلا مع السلامة
سامي: مع السلامة وخلو بالكم على سالي اوعى زول يزعلها .
سلمى: لا ما تخاف عليها يلا مع السلامة
سامي : مع السلامة.
قفل التلفون...عاين لي جمان لقاها اتقدمت بي مسافة...سرع خطواتو وحصلها.
دخلو المحل وللأسف كانت فيهو رفاء الكريهة وراجلها..اول ماشافتهم نبهت راجلها عشان يناديهم ويقعدو معاهم...وعبدالله طوالي ناداهم وطلب منهم يقعدو معاهم .
مالقو مفر وقعدو معاهم...جابو ليهم طلباتهم بتاعت البيتزا.
رفاء: شنو رايكم بكره نأجر يخت ونصطاد ونشوي سمك...وبالمرة فرصة نتعارف.
عبد الله : فكرة والله 😀 شنو رايكم ؟
سامي عاين لي جمان كأنو بيستشيرها...جمان ابتسمت وهزت ليهو راسها بمعنى اي .(حلاتكم😍)
سامي:اوكي ما عندنا مشكلة.
الطريقة العاين بيها سامي لي جمان كانت كافية تولع نيران الغيرة في رفاء ( بتغير على راجل مرة 😏 يمرمرك في التراب😌).
بدو ياكلو...وعبدالله ظريف شديد ووناس ( خسارة في رفاء)
رفاء لمست سامي بي رجلها من تحت...سامي بقا فاتح خشمو لي مسافة قبل ما يجر فيها نور ويرجع لي اكلو ( عديمة الحيا 😠)
بعد ما خلصو جابو ليهم علب البيبسي.
سامي: عن اذنكم .
كلهم: اتفضل.
قام ومشا الحمام وبدا يغسل في يدينو.
رفاء : اوبس🙊..ماما بتضرب..عن اذنكم 😊
عبدالله+جمان: اتفضلي.
رفاء ختت التلفون في اضانها ومشت..اول ما وصلت على جهة الحمام قفلت التلفون ودخلت..سامي شافها بالمراية.
قبل عليها: انتي عايزة مني شنو 😒
رفاء بصوت دلع : انا عايزاك انت
سامي ضحك باستنكار: انتي ما طبيعية
رفاء: سامي ما تلعب على نفسك انت بتحبني..انا عارفة انك ما نسيتني...وبتحاول تتناسى فيني ما اكثر.
جمان لي عبدالله: عن اذنك حشوف سامي 😸
عبدالله وهو بيضحك : اتفضلي
سمعت صوتهم جمب الحمام وبدت تسمع في الكلام.
سامي: انتي عايزة توصلي لي شنو بالظبط ؟
رفاء: طلق مرتك
جمانة شهقت وختت يدها في خشمها من الكلمة
رفاء متابعة: حاول اعمل معاها مشكلة بي اي طريقة وطلقها...وانا حاعمل مشكلة اول ما ارجع مع عبدالله وحخليهو يطلقني...واول ما اكمل العدة تعال واتقدم لي... بس
سامي فضل يعاين ليها مسافة قبل ما يضحك بي سخرية: دا اكبر دليل على انك خاينة والخيانة جارية في دمك...خنتيني زمان مع مصطفى..وهسه عايزة تخوني راجلك معاي...لا ولا شنو عايزاني اطلق مرتي عشانك..قبل ما تكون مرتي وحبيبتي وام عيالي الحيجو هي بنت عمتي...وضفرها ما بيساويك...عشان كدا شوفي ليك واحد غيري😏 ( اديلو 👏👏👏👏)
رفاء وهي بتمرر يدها في سكسوكتو: ههههههه دا كلام بتحاول تتقاوى بيهو قدامي...لكن مصيرك تكون لي انا وبس...انا في والايام في.
سامي رجع لي ورا منها قبل ما يقول ليها بثقة: نشوف 😏.
جمانة براحة قامت جارية ورجعت محلتها .
سامي جا طالع وقعد في مكانو...جمانة كانت في عالم تاني "مصطفى بيعرف رفاء...ورفاء بتعرف سامي من زمان وكان في حاجة بينهم..خانتو لي...واشمعنا مصطفى جاني انا بالذات...يعني اول لقاء لينا ما كان بالصدفة..في قصة كبيرة ورا مصطفى ورفاء وسامي...انا لازم اعرفها...وياربي كلامو القالو عني...قالو عشان يغيظها ولا كان جادي...وكمان الحقيرة بتقول ليهو يطلقني...ياربي المصايب دي بتجيني من وين ولا وين...ودي اتصرف معاها كيف...ايوا بيان ماف غيرها حيساعدني...لا لا بيان ما حاقعد احشرها في كل حاجة واجننها...لازم احل مشاكلي براي...انا حليت مشاكل موظفين وشركة كاملة ما حاقدر للمشكلة دي...لكن اول مرة تصادفني مشكلة كدا..ياربي انا هسه اتصرف كيف 😣"
سامي : جمانة
جمانة : ......... ( بتنضم مع نفسها 😂)
سامي وهو بيخت يدو في كتفها : جمانة .
جمانة بي خلعة : ها ؟
سامي : يلا .
جمانة شالت شنطتها: يلا.
رفاء جات : اوووه ماشين ...معليش بس ماما حبيبة قلبي البحبها اتكلمت معاي كثير
ارتسمت ابتسامة صغيرة ملتوية فيها كم كبير من الاستهزاء في خشم سامي وهو فاهم قصدها من الكلام...اما جمان كانت مذهولة من وقاحتها.
عبدالله: نتلاقى بكرة ان شاء الله .
رفاء جات سلمت على جمانة وباستها : نتلاقى بكرة حبيبتي.
حبيبتي دي قالتها وهي بتعاين لي سامي  .
سامي مسك يد جمانة: تصبحو على خير .
عبدالله: وانتو من اهلو.
رفاء عيونها لمعت بي حسد وغيره وهي بتعاين ليهو ماسك يد جمان.
طلعو واي اتنين اتوجهو على منطقتهم...جمانة كانت كاتمة انفاسها وشاده جسمها من مسكة سامي...ماف واحد فتح خشمو مع التاني...واول ما بعدو شوية سامي فكه يدها ( بتلعب بي مشاعرها يعني ولا شنو 😒)
اول ما وصلو اي واحد دخل  اوضتو من سكات...جمان غيرت هدومها ورقدت وراسها حينفجر من التفكير في الحاصل.
اما سامي كان بيفكر في كلام رفاء...بالرغم من وقاحتها ووقاحة كلامها الا انو لسا قلبو مايل ليها 😔 ( لا يا سامي لا 😭)
صباح اليوم التالي:
الليلة اخر امتحان عند ناس مجد.
بعد ما طلعو كانو قاعدين كلهم بره وحيموتو من الفرح.
شيرين جات : مجد حبيبي امتحنت كيف ؟
ريان : تحبك الشكلووووتة😏...مش في غنية كدا يا لؤي  ولا كيف؟
لؤي: اي...دقيقة دقيقة اتذكرها ...لو كنت قايلاني ميت في حبك موته...والله ما حابيك.👏👏👏
ريان: تحببببك الشكلووووتة
لؤي: انا ما بدور البنت
ريان : اي اي
لؤي: لا خلاص نسيت الباقي ( تحية للقروها باللحن 😂)
ريان : الله الله عليك 😏👏👏👏👏.
حسام ختا وشو ورا ضهر لؤي ومات من الضحك😂😂😂...اما رؤى ماقدرت توقف ضحك من مغرزة لؤي وريان.
خالد ومجد اكتفو بالابتسام.
شيرين بغيظ: انا شايفة انك يا ريان احسن تحترمي نفسك عشان ما اردح ليك.
ريان : هههههاي....الردح انا بديك فيهو دروس ومجاني كمان...بعدين انتي هسه منو سألك😏...الحرامي في راسو رييييشه ( يا سلااااام 😍)
رؤى: اهدو يا جماعة ماف داعي للمشاكل.
شيرين: انتي الكلام دا كان تقوليهو قبيل مش لمن اصحابك يغلطو علي بعدين تجي تقولي كدا...ممثلة لينا دور الملاك.
مجد: شيرين
رؤى: طيب اهدي
ريان: كلللو الا رؤى يا ماما خط احمر ليك يا قصيرة ولو كلامي ما عاجبك جيبي ليك طربيزة اطلعي فيها واتكلمي 😂.
مجد وهو بيجر شيرين من جهتمهم: خلاص معليش ناخد فاصل.
مشا واتكلم معاها شوية بعدين رجع لي اصحابو.
خالد: رحلة الجامعة لي ماليزيا مستعدين ليها.
لؤي: وانت عايز تجي معانا يعني 😒.
خالد وهو بعاين ليهو باستغراب: اي لي ؟
لؤي : ولا شي سلامتك.
مجد: فاضل عليها كم ؟
خالد وهو لسا بعاين لي لؤي: بعد شهر ان شاء الله .
ريان: حتكون موضووووووع.
رؤى: ربنا يسهلها
كلهم: امين
رؤى : يلا يا ريان نمشي بعد دا ؟
ريان: اولاد...لازمانا طلعة احتفاليه بس مناسبة اخر يوم دا.
مجد: طيب فكري لينا .
رؤى: خلاص انا عازماكم بكرة عندي في البيت غداء .
لؤي: يا سولااااااااام
مجد: ايوا دا الكلام الصح
خالد: ان شاء الله .
ريان : عزومتك جات في وقتها نوفر قروشنا زاتو.
حسام: حجة حريصة 😂
رؤى: يلا مع السلامة نتلاقى بكره 😊.
كلهم مع السلامة.
مجد: تجو معاي البيت ؟
لؤي: اي انا زاتي عايز اسبح.
حسام: لا المرة دي تجو معاي انا.
لؤي: انا عايز اسبح 😢.
حسام وهو بيجرو معاهو من يدو: عندنا مسبح 😒.
*************************
رشاد واياد كانو قاعدين في المكتب بيتناقشو في عقد .
فجأة جاتهم سارة جايه وهي مرتبكة: يا جماعة حاصل اختراق غريب للسيستم بتاعنا.
رشاد وقف على حيلو : كيف يعني 😳.
سارة قعدت في الكمبيوتر: التصميمات الحنقدمها للشركة الانجليزية اتسرقت...وحصل اختراق لي اجهزتنا كل بياناتنا اختفت.
اياد بي سرعة رجع لي الكمبيوتر بتاعو وكانت الصدمة وهو بيقول: مسسستحيل
وقف وهو بعاين لي رشاد بي صدمة : احنا...احنا انتهينا
#نهاية_الحلقة_العاشره
ما تنسو الڤوت 💜🌸