انثى في عرين الاسد

الفصل الثلاثون ج 3

♡ انثى في عرين الاسد ♡
          ~ الحلقة الاخيرة ~
الجزء الثالث والاخير :
بعد ما خلصت مراسم العرس جا وقت الجرتك...متخيلين شكل ضياء وهو لابسة الجلابية ورابطين ليهو الهلال والحنة في يدينو وبيرش الريحة في الناس 💔.
وناس مجد ويدل شابكنو هو و رشاد ابششششر يا عريس وتعلى اصوات الزغاريد.
بعد الجرتك خلص...طوالي شالو شنطهم ومشو على المطار...ضياء كان واقف بيتكلم مع وهج وبيوصي على رشاد بيها.
ضياء : زي ما قلت ليك امانه في رقبتك...خلي بالك منها دي اول مرة حتفارقني...فأوعك تزعلها عشان ما ازعلك.
رشاد وهو بيضحك من التهديد الصريح : ما تخاف امانة والله امانه...وانت برضو بيان تختها في عيونك لو زعلتها بزعلك😌.
ضياء بي ابتسامة : ان شاء الله .
اتفارقو في المطار...وهج ورشاد مسافرين جزر المالديف وبيان وضياء مسافرين فرنسا.
اي ثنائي وصل بلدو وهناك قضو احلى ايام حياتهم...وبعديها رجعو.
وهج انتقلت مع رشاد في بيت جديد...اما ضياء و بيان مع مريم.
مرت الايام بي خيرها وحلوها وابطالنا حياتم ماشا في استقرار وجمال.
ضياء جا من الشغل...دخل اوضتو قلع جكت البدلة وهو حاسي بي نعاس...بيان جاتو وفي ابتسامة مرسومة في وشها.
ضياء : حلوة يا ناس ❤.
بيان : عندي ليك مفاجأة
ضياء : طيب فاجئيني.
بيان ختت يدو في بطنها.
ضياء : بطنك واجعاك يعني ؟؟؟ عايزة تمشي للدكتور.
بيان : استغفر الله العظيم 😑....حيكون شنو يعني ؟
ضياء : معليش انتي عارفة جاي من الشغل وتعبان وما مركز طيب فهميني انتي.
بيان رفعت ليهو جهاز كشف الحمل.
ضياء : انتي حامل ؟؟؟؟
بيان : حمدلله على السلامه.
ضياء : لا بالجد انتي حامل ؟؟؟
بيان : اي والله حامل 😂.
ضياء : ثواني دقيقة براحة براحة عيدي كلامك تاني .
بيان : انا حامل يا ضياء...انا حامل انا حامل انا حامل...حامل يعني في بيبي في بطني وبيكبر مع الايام وحاولدو وحتبقى بابا للمرة التانية من حياتك...خلاص كدا فهمت ؟
ضياء : والله ما قادر اصدق.
بيان وهي بتضحك : انا برضو.
عانقها بي حب وقبلها...وكان قاعد ساعة بيحاول يستوعب انو حيبقى ابو تااااني.
سيزار جا داخل الاوضة وهو بيضحك...شكلو عمل ليهو مصيبة وجاي يدسى.
ضياء وهو بعاين لي بيان : اكلمو ؟
بيان : كلمو.
ضياء : سيزار حبيبي انت حتبقى اخو كبير.
سيزار :How ?
ضياء : ماما بيان حامل .
سيزار سكت شوية قبل ما يصرخ بصوت عالي وهو بينط في السرير :really ? I'm gonna be big brother...yeeeeeeh.
بيان حضنتو بي فرح.
بقو كل العائلة مستنيين جمان من جهة وبيان من جهة.
_______________________________
جوان كانت في الجامعة اتفاجأت لمن جاها طلب انو العميد عايزها...مشت وهي بترجف قدرتها.
العميد طلب منها تقفعد وما تخاف : جوان انتي طالبة ملتزمة وذكية ومستواك متميز جدا...عشان كدا ادارة الجامعة قررت تديك التبادل الطلابي...في طالب حيجي من كوريا يقرا هنا بدلك وانت حتسافري هناك...وكل نفقاتك واي شي بتحتاجي ليهو على نفقة الجامعة.
جوان : بالجد يا دكتور ؟؟؟
العميد : اي...بس ناخد موافقة اهلك الاول وبعد ما تنتهي من السمستر الاخير حتسافري طوالي.
جوان : شكرا شديد 😍...بس لازم اهلي يعرفو الاول.
العميد :اكيد حنستنى موافقتهم.
جوان اول ماطلعت زرت اصحابها اتخلعو وفرحو في نفس الوقت...بعد الدوام رجعت البيت...استنت لمن امها وابوها بقو فاضيين بعديها كلمتهم...امها وابوها سكتو لي مسافة حست انهم رفضو الموضوع وكانت حتقول ليهم خلاص ما مشكلة بكلمهم بي انكم رافضين لكن اتفاجأت بيهم بيرحبو بالقصة...مادام دا في صالحها وفي صالح دراستها وبعدين دي مش اي بلد يا جدعان دي كوووووريا اهل ناس #ليمنهو. ( ما بعرفو الا الكي بوبر ✋)
مرت الشهور بي سرعة وجمان ولدت جابت بنت  وسموها اسيل...وبقا فاضل الدور على بيان.
وب رضو الايام عدت...والدكتور كلمها انها حتزلد بعد اسبوع ان شاء الله...ضياء سافر بريطانيا لي شغل ومشت معاه امو وسيزار عشان ماشي اجازة لي امو...وكان مفروض يجي بعد 3 يوم.
اما بيان امها واختها سافرو مع ابوهم لي عزاء...كانت براها في البيت وقاعدة مع مجد.
كانت خاته يدها في بطنها الممدودة قدامها...مجد جا قعد وهو شايل كيس شيبس حجم عائلي : الفيلم شوية وحيبدا انتي عارفة انو دا اول عرض ؟
بيان : لما نشوف.
فجأة حست بي رفسة في بطنها...بس ربتت فيها ورجعت لي فيلم مجد...لكن شوية الالم زاد شديد.
بيان : مجد...مجد بطني واجعاني شديد.
مجد وهو بياكل من الشيبس : اي عادي عادي بتحصل.
بيان وهي بترمي ليهو الشيبس بتاعو : انا شكلي بولد.
مجد وهو بيرفع الشيبس : يا حيوانة الدكتور قال بعد اسبوع مستعجلا لي ؟
بيان صرخت : يا عواليق انا بولد.
مجد رما الشيبس ووقف على حيلو حسا بيها جادة : بيان بالجد ؟؟؟
بيان : وهي بتشوتو بي رجلها : لا بهظر يا كلب .
مجد بي توتر : طيب ...طيب دقيقة
جرا بي سرعة المطبخ وشال ميس وبقا بينفخ فيهو...جاهو صوتها وهي بتناديهو : مجججد مشيت وين.
مجد :بتولد ياربي اعمل شنو ؟
جا طالع بره : اهدي انا حامشي اجيب امجاد.
بيان : استغفر الله...استغفر الله البيت فيهو 4 عربيات يا مجد 💔
مجد : اي
اي صح نسيت ....بس انتي اهدي ما تكوركي...انا هسه اعمل شنو اضرب للاسعاف ؟ اول مرة اشوف حالة ولادة مباشر.😱
بيان وقفت على حيلها وادتو كف 😂 : اهدا انا حاطلع معاك للعربية.😠
مجد : طيب طيب...حاهدا.
وفرررر قام جاري بعد ماشال المفتاح...بعد ما وصل العربية بقا بيتكلم مع نفسو : اهدا شي عادي جدا مش انت صيدلي خايف من شنو ؟ ياما شفت جثث في المشرحة حتخاف من طفل طالع من بطن اختك وحتبقى خالو اهدا ريلااااااكس....اختك😳...واي اختي😱.
وقام جاري ليها بسرعة ودخل جوه...لقاها ماشا بي صعوبة وهي ماسكة بطنها.
ساعدها وطلع بيها على المستشفى بسرعة...وطوالي دخلوها على غرفة العمليات وهو ماعارف يعمل شنو...ضرب لي سامي...وطوالي سامي  جا وجات معاهو امو.
وطلعا لازم يقلقل الناس ضرب لي امو وابوه وريما وفي الوقت المتأخر دا طلعو على الخرطوم.
بيان بعد لحظات صعبة ومؤلمة ولدت 💃...توينز بنت وولد (👧👦)
مجد دموعو نزلت من شدة الفرح...وماهي الا سويعات وامها وريما وصلو وطوالي على المستشفى...الاجواء كانت فرايحية...كل الناس فرحانة وشغالين يباركو لي بعض.
ضياء وروه بعد ما ولدت عشان ما يجهجهو ساي وهو بعيد شديد.
وفي اقرب طيارة نزل السودان ومعاهو امو.
بيان فتحت عيونها كانت الساعة 7 مساء.
شافتو واقف وهو بعاين ليهم من بعيد.
نزلت من السرير : خايف تشيلهم ؟
ضياء : عاينيهم صغار شديد خايف لو لمست واحد فيهم يتجرح.
بيان ضحكت....ضياء باس راسها : مبروك ❤.
بيان : الله يبارك فيك.
ضياء : تعبتي شديد ؟
بيان : يعني.....لكن لحظات بالرغم من شدتها حلوة.
شالت البنت.
ضياء : براحة براحة.
بيان : شيلها.
ضياء : لا ماف داعي خليها لمن تكبر شوية بشيلها.
بيان :دي بنتك ما حتعمل ليها شي ....حاول شيلها جرب الاحساس بتاع انك تكون ابو بنت .
ضياء اتردد شوية قبل ما يشيها براحة....كان صغنوووووونة ومغمضة عيونها وكيوت 😍💔.
ضياء قعد في السرير وبقا بلولي فيها.
بيان شالت الولد وقعدت جمبو : عارف فكرت ليهم بأسم منو ؟
ضياء :ثولي.
بيان : احمد ولاره.
ضياء عاين ليها وابتسم : بالجد
بيان : اي...ديل اتنين ما حننساهم ابدا وحيفضلو دايما في قلبنا.
ضياء : ربنا يخليك لي وما يحرمني منك ( جمعا 🙈)
بيان : وانت كمان ❤.
بعد مرور اسبوع كانت السماية وطبعا سموهم احمد ولاره .
بيان كانت لابسة قفطان مغربي وفاكة شعرها ماسكة البنت والولد ماسكاهو ريما....كانت بتتجول بعيونها في وشوش اهلها السعيدة...مجد واصحابو البيضحكو اي زول يقعد معاهم...المناقرات المستمرة بين لؤي وجلنار...سامي وجمان الحلوين وبنتهم اسيل...امهاتها...اعمامها وابوها...اولاد عمها وضياء البيتكلم معاهم...البنات وهم بيتونسو...صوت الضحكات العالية البتعبر عن مدى السعادة...جاهم حمزة :يلا يلا يا جماعة الصورة الجماعية .
حمزة خت الكاميرا بعيد وظبط الموقت بتاعها...
جا جاري بي سرعة ووقف ورا جمب شلة مجد...ناس ريان ورؤى والبنات جزء قاعد وجزء واقف...والازلاد كلهم واقفين...الرجال واحدين قاعدين وواحد واقفين...اما الامهات كانو قاعدت...الكنبة الفي نص قاعدين فيها بيان وضياء وهم شايلين اولاد...ضياء غمز ليها وهو بيهمس ليها بي خشمو : بحبك.
ابتسمت قبل ما تقبل على جهة الكاميرا...وطلع شعاع من الكاميرا...التقط لحظة وقف عندها الزمن...ومهما مرت السنوات حيتذكرو فيها الصورة دي....كلعم مبتسمين والسعادة ظاهرة في وشهم...شعاع بيعلن عن نهاية حكايتنا البتمنى نكون اتعلمنا منها التالي :
■ ما دايما الناس بتحبك عشان نفسك احيانا الناس بتحبك طمع فيك..ومن ما تلقى العايزاهو بتسيبك...زي مجد وشيرين في البداية.
■ ما دايما نظرتنا للناس صح...ومفروض دايما يكون عندنا حسن الظن بالناس...حاجات كثيرة بتصورها لينا عيونا بي حاجة والحقيقة بتكون حاجة تانية خالص...زي خالد مثلا اتهمناهو انو خاين وطمعان في مجد والحقيقة طلعت انو كان خايف عليهو وعايز يحميه.
■ اعرف انو ما دايما اي مصيبة مؤلمة موجعة في حياتك بتجيك كدا ساي...اكيد بعدها في حاجة مفرحة وربنا عايز يشوف مدى تحملك...زي بيان لو ما شركتهم فلست ودخلو في مشاكل ما كان لاقت مشتر ضياء الراجل المغرور البيحب الاسود الاتغير 360 درجة بعد ما حباها....لو ما مجد مرض ما كان عرف انو شيرين ما بتحبو وما كان انتبه لي رؤى.
■ اعرف انو مهما عملت ربنا شايفك والبتعملو الليلة بيرجع ليك بكرة...زي مستر عثمان الكان همو كلو القروش والجشع والحقد خلاهو يقتل اخوه...وكان عايز يقطع قلب مريم ووهج ويقتل ضياء بس بي نفس الرصاصة الكان حيقتل بيها ضياء قتل ولدو فلذة كبدو وفقد عقلو...ورفاء زي ما كانت بتخطط لي دمار جمان دمرت حياتها وبيتها...ومصطفى وامها كانت نهايتهم السجن لمن نيتك تكون نضيفة كلو بتسهل ليك.
■ ما دايما نحكم على الناس من طريقة لبسها او غيرو خصوصا في الامور الاخروية...زي لارا مثلا الكنا بنشوفها انسانة شديدة التحرر وماشا على كيفها...نهايتها ماتت موته شريفة وهي راجعة من الحج وجاية غشان تقول الحق.
■ كل زول فينا جواهو صراع بين ذئبين...ذئب ابيض وذئب  اسود...زي شيرين...بس عارف الحيتغلب ويسيطر على تفكيرك ياتو واحد ؟؟؟ البتغذيهو اكثر....شيرين بي غرورها وطمعها الكان مسيطر عليها في البداية فقدت مجد الكان بيعشقها...لكن في النهاية عرفت انها كانت غلط وهسه حياتها مستقرة مع اسرتها الجديدة في المانيا.
■ ما كل النهايات السعيدة بالزواج...زي جوان مثلا نهايتها السعيدة انها حتكمل دراستها في سيئول.
■ ما نستسلم للمرض البيصيبنا مهما كان ولااازم نصبر ونتوكل على الله....الصبر مفتاح الفرج...زي مرض مجد
♡♡♡♡♡♡♡♡♡♡♡♡♡♡♡♡♡♡♡♡♡♡
شكرا جزيلا لي اي زول تابع الروابة دي ونشرها واثنى عليها وشكرا للناس الكانو بيصممو لي الصور وبيرسلوهل لي...بالجد بتمنى تكون عجبتكم...عارفة انو فيها حاجات بعيدة شوية عن واقعنا...بس دا هدفي اني انتشلكم من الواقع واوديكم لي عالمي الخاص....انثى في عرين الاسد رواية بحبها شديد بديت كتابتها يوم الاحد ( 3/8/2015)
الساعة 1 و 9 دقايق ظهر...دا في الدفتر وبعديها وقفت جيت كملتها ليكم هنا من دون دفتر  من راسي عشان كدا كنت بتأخر مرات عشان التفكير والخيال وكدا...انتهيت منها الليلة...26 يونيو 2016
الساعة 10 و 58 دقيقة صباح
شكرا ليكم جميعا...وسامحوني لو اتأخرت عليكم يوم وتعبتكم...وسامحوني على الاخطاء الكثيرة الكانت موجودة...واسفة على اني بتأخر في الرد على الرسائل بس عشان انا براي وهي كثيرة شديد ودايما بحاول بقدر الامكان ارد على اكبرعدد اقدر ليهو....بالجد اجازتي السنة دي مختلفة لاني قدرت اوصل للناس كتاباتي وكان شرف لي انكم تقرو لي...#نور_العين  #انثى_في_عرين_الاسد عرفتني على ناس كثار جدا وسعدت بصحبتهم....بقدر حبك للروايتين ديل وبقدر حبك لي الابطال الكانو فيها ( فهد ونوران / ضياء وبيان)
بتمنى انكم ما تنسوني من صالح الدعوات خصوصا اننا في العشر الاواخر...الصفحة حتقيف ودا لاني ممتحنة الشهادة والمدرسة قربت 😊...والناس البتسأل من عمري انا عمري 16 سنة ....اسفة على الكلام الكثير وشكرا ليكم ثاني...ان شاء الله نتلاقى دايما في الخير...وصلو على الحبيب
#اووحوبكم 😗
#لينا 🐸
ملاحظة : الرواية قديمة وانا ناسخة الحلقات ... حاليا عمري ١٩ سنة