انثى في عرين الاسد

الفصل الثاني والعشرون

عدو الاخطاء 🙈
♡ انثى في عرين الاسد ♡

       ~ الحلقة الثانية والعشرون ~
خالد اتحرك بالعربية بعد ما لؤي ركب...وداهو جمب الجامعة من البوابات الخلفية: متذكر الشجره دي ؟
لؤي: طبعا 😒
خالد : تحت الشجرة دي كان اول لقاء لينا
لؤي : عارف مرات بتمنى لو ما قابلناك.
خالد: مجد صحبي من الثانوية
لؤي: وانت عملت حساب للصحوبية دي؟ مش خنتو في النهاية مع شيرين...بالله خطتكم كانت شنو بالظبط ؟ قروشو ؟ ولا صحتو ؟ كان قروشو ياها انتهت...ولو على صحتو برضو انتهت...وهندا ليهو هسه نايم بين الحياة والموت...ذنبو في رقبتكم لي يوم الدييين .
خالد عيونو دمعت وصوتو اتقرش : انت شايف اني خاين يا لؤي؟
لؤي : لا ما تمثل لي دور المسكين المظلوم...اي خاين وكلنا عارفنك خاين .
خالد : اديني دليلك .
لؤي : نظراتك...اسلوب كلامك معاها...ومرة سمعناك بتقول ليها لو يبقى اخر واحد في الدنيا ما حتعرسيهو.
خالد : دي ادلتك ؟
لؤي : يا زول دي ادلتي ولا دي ما ادلتي انت خاين...على الاقل دافع على نفسك.
خالد : ما حادافع عن نفسي حافهمك الحقيقة بس...انا وشيرين كنا بنحب بعض في الثانوي ولحدي اولة جامعة...كان بالنسبة ليها مجرد حب مراهقين...بس انا نظرتي ليهو كانت غير...شيرين بقت بتجيني في البيت...ومرات بتجي معاها امها...اهلي كانو فاهمين اننا اصحاب بس احنا فهمنا كان تاني...بعد مدة اتفاجئنا بي انو ابوي اتزوج امها...يعني كل الحب دا كان لي هدف...عملوني كبري هي وامها عشان يوصلو لي ابوي...امها بتستهدف الرجال الوضعهم كويس عشان تسف قروشهم...وكل ما تعرس بتطلق وبتشيل تعويض...ابوهم هاجرهم وما شغال بيهم
لؤي وهو منطر عيونو : دقيقة دقيقة ابوها مش ميت بي فشل كلوي ؟
خالد : ابوها عايش بس ما شغال بيهم وامها ربتها على كراهيتو....بعد الشي الحصل دا انا انهرت وزعلت من ابوي وسبتها....بعد فتره ابوي رجع وهو ندمان وطلب مننا السماح...امي سامحتو لكن ابت ترجع ليهو...واختي برضو سامحتو...لكن انا ماقدرت اسامحو...ما قدرت اسامح الكان سبب في بكاء امو واختي....بالرغم من انو امي رجعت قوية في فتره بسيطة  بس برضو ما قادر انسا دموعها المقهورة والمصدومة في ابوي القدمت ليهو كل شي عندها...بعد فتره شيرين ظهرت وطلبت مني ارجع ليها وانها في الفترة دي اكتشفت انها بتحبني...بس رفضت وطلبت منها تنساني...اتفاجأت بي انها اتحولت جامعتنا...وقدرت ترمي مجد فيها...ما بعيد تكون خطة منها هي وامها...كنت بحاول بي كل الطرق اني ابعدها منو...كانت فاكره اني بحبها وبغير عليها...شيرين مريضة نفسيا...ممكن تعمل اي شي في خاطر القروش...هي وامها القروش بالنسبة ليهم زي المخدرات للمدمنين...وفعلا لمن سمعتوني بتكلم معاها...كنت بحاول امنعها من مجد...لاني عارف انو طيب وانو حباها بالجد...اكثر شي صدمني لمن طلب يخطبها...عشان كنت عارف انو لو عرسها...هي وامها حينتهو منو ومن عائلتو...والحمدلله ربنا كشفها...بعد ما فلسو سابتو زي الماحصل شي...ظلمتني يا لؤي...قدرت تصدق اني ممكن اسيب مجد صاحبي عشان بنت؟ وما أي بنت كمان شيرين ؟ صدقت انو انا خالد ممكن اعمل عملية زي دي ؟؟؟؟
وعلى فكره يا صاحبي انا ما مسافر مصر عشان اجازة ولا عشان اتفسح واهيص...انا مسافر مع امي عشان اختي عيانه...وما ممكن اخليهم يمشو هناك براهم وما معاهم راجل...امي واختي لو شافو حشره تاني ما بيمشو في الارض... محتاجيني معاهم في المستشفى وفي النزول والطلوع وجيب الادوية والحاجات...والله العظيم قالو لي ما تمشي صحبك تعبان...بس ما حاقدر اسيبهم براهم هم ما عندهم غيري. ( ظلمناك يا خالد 😔)
مسح بي طرف يدو الدموع الكانت جارية من عيونو.
لؤي في اللحظة ديك خجل من نفسو بي طريقة ما طبيعية واتذكر لمن مجد قال ليهو: انا واثق في صحبي.
عاين ليهو...كان بعاين في في الدركسون ووشو احمممر.
لؤي : والله ماعارف اقول ليك شنو ياخالد...والله ماعارف.
خالد وهو بيجر منديل: صدقت اني ماخاين.
لؤي : صدقت يا صاحبي...انا اسف...وليك الحق ما تقبل اعتذاري.. اتسرعت وحكمت عليك.
خالد : ربنا يسامحك .
لؤي : وانت كمان سامحني
خالد سكت شوية قبل ما يقول ليهو : مسامحك.
لؤي: والله يا خالد حاجيب ليك حقك شيرين لازم تندم.
خالد : لو كنت ماشي في الشارع وعضاك كلب...حتجري وراهو وتعضيهو ؟
لؤي : لو كلب زي شيرين دي اجري وراهو واعض ابو ابوه...خليك انت برا الموضوع انا ما حاسيبها...والله اخليها هي وامها زي الطيور الكشحو فيهم موية...انت مسافر متين ؟
خالد : بكره ان شاء الله
لؤي : ربنا يكتب ليك السلامة انت وأسرتك.
خالد : الله يسلمك .
لؤي : نرجع المستشفى ؟
خالد : بقيت الليل كلو ما بنوم يا لؤي...خايف على مجد...انا خايف تاني ما نسمع صوتو.
لؤي : ربنا قادر وكريم...مجد في المرحلة دي محتاج دعائنا وبس.
خالد : ربنا يرفعو ويعافيه ويشفيه.
لؤي : داوو مرضاكم بالصدقة.
خالد : اها.
لؤي : كدي اتحرك انا عندي فكره
*****************************
سامي رجع شقتو فتح الباب براحة وختا المفتاح في الكومودينة المختوته جمب الباب...جا ماري جمب المطبخ لقاها واقفة بتزين في كب كيك...مسرحة شعرها جمايكتين ( بيكون الشعر مبروم ومضفر...مش قادرة اوصف ليكو يا جدعان 🐸 زي المشاط كدا لكن فلات 😸 ان شاء الله تكونو عرفتو )
كانت لابسة برمودة بيضاء ومعاها بلوزة فيها اشكال ورود بالزهري....ولابسة كروكس زهري في شكل ارنب.
دخل بهدوء عشان ما تحس بيهو كان بعاين ليها وهي منتبها ومركزة في شغلها..قالت ليهو وهي لسا منتبه في شغلها : حركات الاطفال دي شنو...على فكره شايفاك من قبيل بس ظايرة اشوف نهايتك.
سامي : انا طفلك .
جمان : اهاااا...طيب يا طفلي يا كلبوظي تعال دوق ( الدوق زارال...ناس اسبيستون متذكرنو ؟)
سامي وهو مكشر وشو : لاااا شكرا ما قنعان من نفسي.
جمان : انت لاقي تاكل حاجة عاملاها انا اصلا 😏
سامي : مالاقي وماعايز القا 😜.
جمان : يعني انا اتعب واعملو وتقول لي ماعايز 😔
سامي : خلاص خلاص جيبي قطعة .
ادتو اكثر واحدة مزينه...سامي اكل منها : ممممم حلوه عايزة ؟
جمان : ممكن .
وفتحت خشمها 😀...سامي راح خاتيها ليها في عينها.
جمان صرخت وهي بترجع ورا : سامي 😠
سامي : اسف ما قصدت 😸
جمان شالت واحدة ومسحتها ليهو قميصو : بس 😛.
سامي : اهاااا يعني كدا .
شال واحدة ومسحها في شعرها ( طيب ادونا ليهو احنا...احنا برضو اطفال زي سامي 🐸)
جمان وهي بتمسك شعراتها : لااااا😠....انا تعبت في تسريحو يا سامي.
سامي : ما مشكلة بسرحو ليك.
جمان : انت شرير 😠
سامي وهو بيقرصها في نخرتها : الاشرار الزيك لازم ابقى معاهم شرير.
زحت من قدامو ومشت جمب الماسورة...سامي قبل عليها وفجأة لقا علبة صابون كاملة في قميصو .
سامي بقا بعاين لي هدومو...
جمان : شوف الشر الحقيقي 😌.
سامي شالها وقبلها على بطنها وهي بتصرخ وبتحاول تتفك منو...كب ليها صابون في شعرها وفتح الماسورة...بعديها ختاها في الارض ومشا...جمان قامت بي سرعة وغسلت عيونها بالموية لقتو مافيش جمبها..عاينت لي هدومها الاتبلت وشعراتها الفيها صابون العدة السائل : ياريت لو ما اديتك الزفت كيك.
مشت على اوضتها لقت الباب مقفول...دقتو بغيظ .
جاها صوت سامي : نعم عايزة شنو ؟
جمان : انت بتهظر...دي اوضتي يا فالح .
سامي : قولي والله .
جمان : اطلع 😒
شوية كدا فتح الباب : طلعت اوضتك 😸.
جمان : شايف عملت شنو في شعري...ممكن يتحتا من صابون الغسيل الكبيتو فيني دا
سامي : انتي البديتي استحملي 😌.
جمان : حتنضف المطبخ معاي 😒
سامي : ولو قلت لا
جمان : تاني ما بدخلو الا لو عايزة اطبخ لي نفسي..اما انت المطاعم رااااقدة اكل فيها وتلقا العافية
سامي : كذابة...معقولة تشوفيني جعان وما تعملي لي معاك.
جمان : امشي استحمى شكلك منتهي
سامي وهو ماشي على اوضتو : ما كلو بي سببك .
دخلت الاوضة وهي بتضحك عليهو...دخلت الحمام وقفت وهي بتعاين لي شكلها المبهدل بي سبب راجلها.
اخدت حمام طويل وغسلت شعرها ولفتو..عاينت لي نفسها في المراية قبل ما تقول : امشي انضف المطبخ بعد دا.
طلعت على المطبخ لقتو نضيف يلمع واي حاجة مختوتة محلها ( اريتك يا سامي راجل السرور 😍)
ضضحكت وطلعت بره لقتو قاعد في الارض جمب التلفزيون.وخاتي علبتين بيتزا في التربيزة .
سامي وهو بعاين ليها : يلا تعالي اللعبة حتبدا .
جمان : لعبة شنو ؟
سامي : مباراة بين برشلونة وريال مدريد
جمانة : لا شكرا مالي في الكورة انا حاكل بس.
سامي : تعالي حوريك اسماء اللاعبين ياعيني عليك ما عندك اخوان ما حتكوني ناقشة حنانك في اسمائهم😂.
جمان : طيب بالمرة ثقافة 😀.
قعدت جمبو ومسكت الغلبة ختتها في نصهم وبدت تحضر معاهو وهو بيفهمها في قواعد اللعبة وبيوريها اسماء اللاعبين . ( ياترى حيخلوكم كدا يا سامي وجمان)
*******************************
ميرال بعد ما وصلت ودعت الناس الكانو معاها ورجعت شقتها ختت الشنط وركبت امجاد طوالي على المستشفى.
اول ما لقت امها سلمت عليها بي شووووووووق...وابت تبكي قدامها الفيها مكفيها...بعد تحنيس قبلو انها تدخل لي اخوها في العناية.
ماكان في اي صوت غير صوت الاجهزة...ميرال دخلت بي خطوات بطيئة..ختت يدها في يدو ودموعها نزلت 😢: مشيت خليتك بتتكلم اجي القاك كدا...مجد عارف انا كنت مستحملة كل الحصل لينا عشان انت في..اشتقت لي اي حاجة فيك يا أخوي...عارف نفسي في شنو؟ اسمع صوتك وانت بتقول لي بنبناية فجولة...اصحا من الصباح القاك ماسح لي جلك في شعري...نفسي تتشاكل معاي زي كل مره...وتنكش لي شعري واطردك بره الاوضة...مجد انت لي ما بترد علي..يا ترى انت هسه سامعني ولا لا ؟ لو سامعني عايزة اقول ليك كفاية خلاص ارجع...ارجع عشانا💔.
باست يدو وعاينت ليهو مساااافة...قبل ما تطلع وهي بتمسح في دموعها...اتكلمت مع امها طويل...ودعتها ورجعت شقتها.
عدت الايام يوم ورا التاني لحدي ما عدا شهر....جمانه وسامي اتقربو لي بعض في الفتره دي بس في عيون بتراقبهم وناوية عليهم بي شر....خالد سافر مصر مع امو واختو....لؤي بيخطط لي شيرين....رؤى وريان بيزورو مجد كل يوم ورؤى اليوم كلو بتدعي ليهو...
مجد الدكاترة يئسو من حالتو وبقا قاعد بالاجهزة فقط...رشاد واياد لقو وظائف بي مرتبات لا بأس بيها ومتابعين مع بيان اول بي اول....منذر وحسام برضو فتشو على شغل...حسام اشتغل مساعد صيدلي...اما منذر اشتغل في مكتبه....ياما شباب اشتغلو في حاجات هم ماليهم علاقة بيها بس لقمة العيش صعبة...ميرال في الفتره دي قدرت تتقرب من ضياء بي طريقة كبيرة....وعلاقتها مع مستر عثمان كانت حلللوة لانو شخصية لذوذة ومضحكة...و وهج بقت صحبتها في الشغل...اما لارا ديك علاقتها معاها بايظة اصلا
كانت قاعدة في المكتب...بتراجع في الورق الاداهو ليها.
ضياء جا طالع : ها خلصتي ؟
ميرال : لا لسا 😊.
ضياء : خفي يدك شوية .
ميرال : حاضر يا مستر.
دخل مكتبو...عاينت مسافة لي الباب الدخل بيهو قبل ما تبتسم وترجع لي شغلها...جا واحد داخل...طويل كدا واسمراني شعرو اسود...كانت معاهو بت عمرها زي 7 سنوات كدا عسووووولة وماسكة في يدو .
الراجل : ضياء موجود ؟
ميرال بي ابتسامة : ايوه موجودة بس عندك موعد ؟
الراجل : لا...بس ممكن تقولي ليهو احمد وهو بيقهم براهو.
في اللحظة دي ضياء فتح الباب : ميرال الملف بتاع....اووووه احمد.
سلم عليهو سلام معرفة...وشال البت: حبيبتي كيفك تمام ...اتفضل.
دخل معاهم المكتب...ميرال بي سرها " ياربي ديل منو "
بعد مسافة جو طالعين .
ضياء : نورت المكان ياخ...امشي شوف ابوك بهناك
احمد : اي ماشي ليهو يلا يا حلا.
ضياء : بااااي يا حلا.
بعد ما طلعو عاين ليها : خلصتي .
ميرال : اي ☺.
ضياء : الحمدلله...يلا تعالي
ميرال : اجي وين ؟
ضياء : عايز اعرفك على اكثر اتنين مهمين في حياتي...هم الصراحة ثلاثة...بس الثالث دا لسا ما جا هنا.
ميرال : اهاااا...على فكرة الراجل الجا قبل شوية دا عندو ملامح ليك.
ضياء وهو بيلبس جكت البدلة : اي دا ولد عمي
ميرال : عندك اعمام ؟
ضياء : اي بس علاقتي معاهم ما قوية...الا عثمان .
ميرال : مستر عثمان عمك 😱
ضياء : اي ماف شبه صاح.
ميرال : نهائي حتى في الشخصيات...مستر عثمان ظريف ومضحك..لكن انت جادي شدييييد كدا وبتاع.
ضياء بي ابتسامة : اي اي عارف 😉.
نزلت معاهو وهي عايزة تعرف الاتنين ديل منو.
ضياء لبس نضارتو الشمسية...كان بيمشي بي شموخ كدا وراسو مرفوع...والموظفين كلهم من ما يشوفوه بيسلمو عليه وهو بيرد عليهم بهدوء.
ماعايزة اوصف ليكم شكلو...لانو اصلا سواء شرير او طيب كان وسييييم وجذاب من كل النواحي.
فتح ليها باب العربية...ركبت...قفل الباب.
مشا ركب...تقريبا طول الطريق ما اتكلمو مع بعض...بيقولو انو 21 يوك كفيلة بي انك تتعود على اي شي...ميرال بقت متعودة عليهو....متعودة على ضوتو الرجولي الخشن...على طريقة كلامو...نظراتو...ابتسامتو...هدومو السوداء...اي شي فيهو بس جواها ما كانت ناسية هي جايه لي شنو.
كانت بتعاين لي يدو الظاهرة فيها العروق...كان بيسوق بي يد واحد...واليد التانية متكل بيها على فخدو.
يا ترى ضياء موديها وين...وديل منو العايز يوريها ليهم ...كل دا حنعرفو بكرة..اشطا ؟
#نهاية الحلقة الثانية والعشرون